Guuti ilinnik asannittoq asajuk
Guuti ilinnik asannittoq asajuk
„[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ — MATTHÆUSI 22:37.
1, 2. Inassut suna annerunersoq pillugu apeqqummut suna pissutaasimasinnaava?
JIISUSIP NALAANI farisiiarinit apeqqut una oqallisaangaatsiarsimarpasippoq. Mosesip inatsisaani 600-nit amerlanerusuni inassut sorleq pingaarnerpaava? Tassaanerpa pilliutit pillugit inassutit ilaat? Tassami juutit isumakkeerfigineqarumallutik Guutilu qutsavigiumallugu pilliuteqartarput. Imaluunniit kipineqartarnermik inassut inassutinit allanit tamanit pingaarnerpaava? Inassut tamannattaaq pingaaruteqaqaaq, tassami kipineqartarneq Jehovap Aaperaap kinguaavisalu ’angerfigeqatigiinnerannut nalunaaqutaammat’. — 1 Mosesi 17:9-13.
2 Farisiiarilli ileqqunik pingaartitsinersaasa qularnanngitsumik eqqarsarluariarlutik manna isummiuppaat: Inatsisit Guutimeersut tamavimmik pingaaruteqarput; inassutit ilaat pingaarutikinnerorpasikkaluarput, kisiannili inassutit ilaat sunaluunniit allanit pingaarnerusutut isigineqartussaanngilaq. Farisiiarit isumaqatigiissutigaat apeqqut oqallisaasoq Jiisusimut saqqummiunniarlugu. Immaqa tatiginassutsiminik ajoqusiisumik oqaaseqartissinnaavaat. Taakkua ilaata Jiisusi ornippaa imalu aperaluni: „Inassut suna inatsisini annerua?“ — Matthæusi 22:34-36.
3. Jiisusi naapertorlugu inassut suna inatsisini annerua?
3 Jiisusip akissutaa ullumikkut uagutsinnut pingaaruteqangaarpoq. Mosesimik allakkat tallimaat 6:5 issuarlugu pallorfiginninnermi ilumoortumi pingaarnerpaajuaannarnikuullunilu pingaarnerpaajuaannartussaq ima eqikkarpaa: „’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu.“ Farisiiari inassummik ataasiinnarmik eqqaasaqaqqusigaluartoq, Jiisusip alla ataaseq ilannguppaa. Mosesimik allakkat pingajui 19:18 issuarlugu ima oqarpoq: „Aappaata taamaaqatigaa: ’Tullit ilittut asassavat.’“ Taava Jiisusip ersersippaa inatsisit marluk taakku pallorfiginninnermi ilumoortumi pingaarnersaasut, inassutinillu allanik immikkut pingaaruteqarnerat naapertorlugu taaguisinneqarnaveersaarutigaa ima naggasiilluni: „Inatsisit tamarmik pruffiitillu allagaasa inassutit taakkua marluk tunngavigaat.“ (Matthæusi 22:37-40) Allaaserisami matumani inassutit taakkua marluk annersaat misissussavarput. Sooq Guuti asassavarput? Asanninneq tamanna qanoq ersersissavarput? Qanorlu tamanna ineriartortissinnaavarput? Apeqqutinut tamakkununnga akissutit ilisimanissaat pisariaqarpoq, Jehovamummi iluarisaassagutta taanna uummatitsigut iluunngarluta tarnitsigullu iluunngarluta isummatsigullu iluunngarluta asassagatsigu.
Asanninneq pingaaruteqangaarpoq
4, 5. (a) Jiisusip akissutaa sooq farisiiarip tupaallaatiginngilaa? (b) Suna Guutip isaani pilliutinit ikikkagassanit toqutassanillu naleqarnerua?
4 Farisiiarip Jiisusimut aperisup akineqarnini uissuummissutigisimagunarnagulu tupaallaatigisimagunanngilaa. Ilisimavaa Guutimut asanninneq pallorfiginninnermi ilumoortumi tunngaviusoq, naak amerlasuut asanninnermik tamatuminnga sumiginnaasut. Upperisamik nassuerutip, Mosesimik allakkat tallimaat 6:4-9-mi allassimasup Jiisusip issuagaata, synagogini alanngaarneqartarnera ileqquuvoq. Markusip oqaluttuaa tamatumunnga assingusoq naapertorlugu taava farisiiarip Jiisusi ima oqarfigaa: „Ajoqersuisoq, oqarluarputit. Ilumoorpoq oqaravit Guuti ataasiusoq allamillu taannaanngitsumik Guuteqanngitsoq, aamma uummatikkut iluunngarluni siuneqassutsikkullu iluunngarluni nukiillu tamakkerlugit taassumunnga asanninneq tullimillu immisut asanninneq pilliutinit ikikkagassanit toqutassanilluunniit tamanit annerusoq.“ — Markusi 12:32, 33.
Sjemap, ilaatigut5 Aap, pilliutit ikikkagassat toqutassallu Inatsisini peqqussutaapput, Guutimulli pingaarnerpaaq tassaavoq kiffaasa uummatimikkut iluunngarlutik imminik asanninnerat. Qupaloraarsuk Guutimut asanninneq tunniusimanerlu pissutigalugit pilliutigineqartoq taassuma isaani savanit angutivissanit tusindilippassuarnit ajortumik pissutiginiagaqarluni pilliutigineqartunit naleqarneruvoq. (Mika 6:6-8) Uillarnermik piitsumik Jiisusip Jerusalemimi naalaffimmi qimerluugaanik oqaluttuaq eqqaariassagit. Aningaasannguit marluk nakkaatitsivimmut taassuma nakkartitai qupaloraarsummik ataasiinnarmilluunniit pisissutaasinnaanngillat. Tunissutaali, Jehovamut asanninnivimmik pissuteqarluni tunniunneqartoq, Guutimut pingaaruteqarneruvoq aningaasarpassuarnit pisuut sinnerussaminnik tunniusaannit. (Markusi 12:41-44) Qiimmaallannarpoq nalunagu Jehovap nuannarinerpaasaa tassaasoq tamatta qanorluunniit atugaqaraluarutta ersersissinnaasarput — asanninnerput!
6. Asanninnerup pingaaruteqassusia pillugu Paulusi qanoq allappa?
6 Pallorfiginninnermi ilumoortumi asanninnerup pingaaruteqassusia apustili Paulusip erseqqissarpaa ima allakkami: „Oqaluttaraluaruma inuit inngilillu oqaasiinik asannissuseqarnangali, tassaassagaluarpunga sianissiaq qoqernartoq sianinnguarlu aviluarpaluttoq. Pruffiititullu oqalussinnaagaluaruma anngigisallu tamaasa nalunagit paasinninnerlu tamaat pigalugu uppersuseqarlungalu tamakkiisumik qaqqat nuussinnaallugit allaat, asannissuseqarnangali, taava suunngeqqajaqaanga. Pikka tamaasa tunniussoraluarukkit timigalu tunniukkaluarukku ikuallagassanngorlugu, asannissuseqarnangali, taava iluaqutiginngeqqajaqaara.“ (1 Korinthimiut 13:1-3) Tassa asanninneq pinngitsoorneqarsinnaanngilaq pallorfiginninnerput Guutimit iluarineqassappat. Jehovamut asanninneq qanoq ersersissavarput?
Jehovamut asanninneq qanoq ersersissagipput
7, 8. Jehovamut asanninneq qanoq ersersissinnaavarput?
7 Inuppassuit asanninneq misigissutsitut inuup nammineq pissaaneqarfiginngisaatut isigaat. Assersuutigalugu oqartoqartarpoq asanninneq tappiillisitsisartoq. Asanninnivilli tassaaginnanngilaq misigineq. Asanninnerup ilumoortup immikkut ilisarnaatai tassaapput iliuutsit, tassaanatik misigissutsit. Biibilimi ’aqqutissatut allanit tamanit pitsaanerungaartutut’, ’tamaviaarutitsitut’, eqqartorneqarpoq. (1 Korinthimiut 12:31; 14:1) Kristumiuugatta ’oqaasiinnartigut oqaannakkulluunniit pinnata suliatsigulli sallusuinnikkullu asannittuussaagut’. — 1 Johannesi 3:18.
8 Guutimut asanninneq kajumississutigaarput taassuma iluarisaatut iliornissamut taassumalu kisimi oqartussaaneranik illersuinissamut qutsissisitsinissamullu, oqaatsitigut iliuutsitigullu. Silarsuarmik tamatumanilu guutiitsuunermik asanninnaveersaarnissamut kajumississutigaarput. (1 Johannesi 2:15, 16) Guutimik asannittut ajortoq uumigaat. (Tussiaat 97:10) Guutimik asanninnermut ilaavoq tullermut asanninneq, soorlu allaaserisami tulliuttumi sammissagipput. Aammattaaq naalanneq Guutimik asanninnitsinnut ilaavoq pinngitsoorneqarsinnaanngitsoq. Biibilimi ima allassimasoqarpoq: „Guutimut asanninneq tassaavoq inassutai maleruaratsigit.“ — 1 Johannesi 5:3.
9. Jiisusip Guutimut asanninnini qanoq ersersippaa?
9 Jiisusip naammalluinnartumik ersersippaa Guutimut asanninneq qanoq paasisariaqarnersoq. Asannissutsi pissutigalugu qilammi inigisani qimappaa nunamilu inuttut inuulluni. Asanninnini kajumississutigalugu iliuutsimigut ajoqersuinermigullu Ataatani naalannarsisippaa. Aamma asannissutsi pissutigalugu ’toqumut naalappoq’. (Filippimiut 2:8) Taassuma naalannera asanninnermik pissuteqartoq inuit upperlutillu aalajaatsut Guutip saavani naapertuilluartumik inissisimaffeqalersinnaanerannik aqqutissiuivoq. Paulusi ima allappoq: „Soorlu inuup ataatsip [Adamip] naalanngitsuliorneratigut inuit amerlasuut ajortilinngortut, taamatut inuup ataasiinnarluinnaap [Kristusi Jiisusip] naalanneratigut inuit amerlasuut iluartunngorumaarput.“ — Romamiut 5:19.
10. Sooq Guutimut asanninnermik ersersitsinermut ilaava naalanneq?
10 Jiisusitut Guutimut asanninnerput taassumunnga naalannitsigut ersersittarparput. Jiisusip asasaa apustili Johannesi ima allappoq: „Asanninneq imaappoq inassutaa malillugu inuussasugut.“ (2 Johannesi 6) Guutimik ilumoorlutik asannittut taanna siunnersortigerusungaarpaat. Nammineerlutik allorarnerminnik aqutsisinnaannginnertik miserratiginagu Guutip ilisimassusia tatigaat taassumalu siulersuineranut asannittumut naalatsigitillutik. (Jeremia 10:23) Taakkua ilaarpaat itsaq Berøami ’isumagissut’ tusarliussaq Guutimeersoq ’kajumigingaarlugu ilassinnittut’, Guutip piumasaatut iliorusungaartut. (Apustilit Suliaat 17:11, 1900/1961) Guutip piumasaa paasilluarneruniarlugu Berøamiut taakkua Allakkat misissortarpaat, tamannalu naalattuarnikkut asanninnermik ersersitsinissaminnut iluaqutigaat.
11. Uummatikkut tarnikkullu isumakkullu iluunngarluta nukivullu tamakkerlugit Guutimut asanninnerput qanoq paasisariaqarpa?
11 Jiisusip oqarneratut uummatikkut tarnikkullu isumakkullu iluunngarluta nukivullu tamakkerlugit Guuti asassavarput. (Markusi 12:30) Asanninneq tamanna uummammit aallaaveqarpoq aamma misigissutsitsinnut, kissaatigisatsinnut eqqarsaatitsinnullu ilorlerpaanut sunniuteqarluni ilumoorluta Jehovamut iluarisaarusunniassagatta. Aamma isummatsigut, aap, siuneqassutsitsigut, asanninnermik ersersitsisarpugut. Tunniusimanitta tappiillisinngilaatigut. Jehova ilisarisimalersimavarput, nalunngilarpullu taassuma qanoq pissuseqarnera, najoqqutassiaqarnera piumasaqarneralu. Aammattaaq tarnikkut iluunngarluta — inuttut suususerput pigisavullu tamaasa atorlugit — taanna kiffartorfigaarput unnersiutigalugulu. Taamaaliornissamullu nukivut tamakkerlugit atorpavut.
Sooq Jehova asasariaqaripput
12. Suna pissutigalugu Jehovap piumasaraa asassagitsinni?
12 Jehovamut asannittariaqarnitsinnut pissutaasut ilaat tassaavoq taassuma pissutsiminik ersersitsinissarput piumasarimmagu. Guuti asanninnermut pilerfiullunilu asanninnermik ersersitsineq eqqarsaatigalugu maligassaalluarnerpaavoq. Apustili Johannesi isumassarsisitaasoq ima allappoq: „Guuti tassaavoq asanninneq.“ (1 Johannesi 4:8) Inuk Guuti assilillugu pinngortitaavoq, taamaammat asanninnermik ersersitsisussatut pinngortitaavugut. Ilumummi Jehovap kisimi oqartussaanerata asanninneq tunngavigaa. Taassuma kissaatigaa pallorfiginnitsimi kiffartorfigissagaanni naalakkersuinera naapertuilluartoq nuannaareqigamikku erinigalugulu. Aap, asanninneq pinngortitat tamarmik eqqisseqatigiinnissaannut aaqqiagiinnissaannullu pingaaruteqartorujussuuvoq.
13. (a) Sooq Israelikkut ima oqarfigineqarpat: „[Jehova] Guutit asassavat“? (b) Sooq pissusissamisuuginnarpa Jehovap piumasarigaa asassagitsinni?
13 Jehovamut asannittariaqarnitsinnut pissutaasoq alla tassaavoq uagut pilluta iliuusii qujamasuutigigatsigit. Jiisusip juutinut oqaasii uku eqqaamakkit: „[Jehova] Guutit asassavat.“ Guuti ungasissoq ilisimaneqanngitsorlu pallorfigisussaanngilaat. Kinaassusilik imminnut asannittuliorfiginnittoq asasussaavaat. Jehova tassaavoq taakkua Guutigisaat. Taassumaana Egyptenimit anisissimagai nunamullu neriorsuutigisamut siulersorlugit, isumassuilluni sernissorsimagai, inuussutissaqartissimagai asannittumillu perorsarlugit. Ullumikkullu Jehova tassaavoq uagut Guutigisarput. Ernini pilliutitut utertitsissutitut tunniussimavaa naassaanngitsumik inuusinnaalerniassagatta. Pissusissamisuuginnarpoq Jehovap piumasarigaa akisilluta imminik asanninnissarput. Asanninnerput akissutaavoq, Guutimik uagutsinnik asannittumik asanninnissamik kajumissaarummut akissutaalluni. Asavarput „taassuma asaqqaarmatigut“. — 1 Johannesi 4:19.
14. Jehovap angajoqqaallu asanninnerisa suut assigiissutigaat?
14 Jehovap inuiannut asanninnera ataatap asannittup meeqqaminut asannittuliorneratut ippoq. Naammalluinnanngitsuugaluarlutik angajoqqaat asannittut meeqqatik isumaginiarlugit ukiorpassuarni suleruluttarput pilliuteqangaartarlutillu pigisatigut allatigullu. Meeqqatik ilinniartittarpaat, kajumissaartarlugit, tapersersortarlugit perorsartarlugillu kissaatigigamikku taakku ingerlalluassallutillu nuannaassasut. Angajoqqaat tamatumunnga taarsiullugu suna kissaatigaat? Meeqqamik imminnik asanninnissaat iluaqutissaminnillu pitsaasumik ilinniartinneqarsimanerminnik kajumillutik
maleruaanissaat. Ataatarput qilammiusoq naammalluinnartoq uagut pilluta iliuutsiminut tamanut qujamasunnissatsinnik piumasaqarnissaminut pissutissaqarluannginnerpa?Guutimut asanninnerput qanoq ineriartortissinnaagipput
15. Guutimut asanninneq ineriartortinniarlugu suna iliuusereqqaartariaqarparput?
15 Guuti takusimanagulu nipaa tusarsimanngilarput. (Johannesi 1:18) Taamaattoq imminut asannittumik attaveqaleqquaatigut. (Jaaku 4:8) Qanoq taamatut attaveqarfigilersinnaavarput? Allamik asasaqalissagaanni iliuuserineqaqqaartussaq tassaavoq taassuminnga ilisarisimannilernissaq. Ilisarisimanngisap tunniusimalluinnarfiginissaa ajornakusoorpoq. Jehovap oqaatsiminik, Biibilimik, tunisimavaatigut immineq pilluni ilinniarsinnaaniassagatta. Taamaattuminguna peqatigiissortamigut kajumissaartaraatigut Biibili akuttoqatigiimmik atuartaqqullugu. Tassani Guuti, taassuma pissusii, kinaassusia aamma ukiut tusindillit ingerlaneranni inunnut iliuusii pillugit ilinniartinneqarpugut. Biibilimi oqaluttuat eqqarsaatigeqqissaartarutsigit Guutip kinaassusia paasinerulissavarput taassumunngalu asanninnerput ineriartortissallugu. — Romamiut 15:4.
16. Jiisusip kiffartornera eqqarsaatigeqqissaartarutsigu qanoq tamanna Guutimik asanninnerulissutigissavarput?
16 Guutimik asanninnerulissutigisinnaasarput alla tassaavoq Jiisusip inuuneranik kiffartorneranillu eqqarsaatiginneqqissaarneq. Jiisusimmi Ataatani ima naammalluinnartigisumik ilaaramiuk ima oqarsinnaavoq: „Uannik takunnittup Ataataq takuaa.“ (Johannesi 14:9) Jiisusip misiginneqataanera uillarnerup ernituanik makititsinermigut ersersitaa pillugu atuarneq killitsinnannginnerpa? (Lukasi 7:11-15) Taassuma, Guutip ernerata, inuup inuit inuusimasut pingaarnerpaartaata, ajoqersukkami isigaannik maniguulluni asaanera uagutsinnut nuannarinannginnerpa? (Johannesi 13:3-5) Tiguartinnannginnerpa ilisimallugu taanna, naak inunnit allanit pingaarnerungaaraluarluni ilisimassuseqarnerungaaraluarlunilu, inunnut tamanut, aamma meeqqanut, ilassiortuusoq? (Markusi 10:13, 14) Qujamasulluta tamanna eqqarsaatigisarutsigu kristumiutut Petrusip imatut allaffigisaatut issaagut: „[Jiisusi] takusimanngikkaluarlugu asavarsi.“ (1 Petrusi 1:8) Jiisusimik asanninnerujartortilluta aamma Jehova asanerulissavarput.
17, 18. Tunissutit Jehovameersut suut taassuminnga asanninnerulissutigaavut?
17 Aamma Guutimut asanninnerput alliartussaaq eqqarsaatigisarutsigit taassuma uagutsinnut inuunermik nuannaarutiginninnissatsinnut iluaqutissatut tunissutai naammangaartut — pinngortitarsuup alianaassusia, nerisassat mamartut assigiinngitsorpassuit, ikinngutinut qanittumik attaveqarneq nuannaarutillu kisissaanngitsut allat. (Apustilit Suliaat 14:17) Guuti pillugu ilikkarnerujartortilluta taassuma ajunngissusianik tukkorneranillu killeqanngitsunik qujamasuutiginninnissatsinnut pissutissaqarnerulerpugut. Aamma Jehovap illit pillutit iliuusii tamaasa eqqarsaatigikkit. Isumaqannginnerpit taassuma ilinnit asaneqarneq pisassarigaa?
18 Guutip ajunngissutsiminik ersersitsinerpassuisa ilaat tassaavoq taanna qaqugukkulluunniit qinunikkut saaffigissinnaagatsigu qularutiginagu taassuma, ’qinnutinik tusartartup’, tusarnaassagaatigut. (Tussiaat 65:3) Jehovap naalakkersuisutut eqqartuussisutullu oqartussaassuseq ernerminut asasaminut tunniuppaa. Qinnutinilli tusarnaarnissaq allamut isumagisassanngortissimanngilaa, ernerminulluunniit isumagisassanngortissimanagu. Jehovap qinnutivut nammineq tusarnaartarpai. Jehovap asannittumik, nammineerlunilu uagutsinnut inuttut isumassuinera tamanna, taassumunnga qanillissutigaarput.
19. Jehovap neriorsuutai suut taassumunnga qanillissutigaavut?
19 Jehovap uagutsinnut inunnut siunissarititaa eqqarsaatigigaangatsigu taassumunnga qanillissutigisarparput. Neriorsuivoq nappaatit, aliasunneq toqulu nungutikkumaarlugit. (Saqqummersitat 21:3, 4) Inuiaat naammalluinnartunngortinneqareerpata kinaluunniit isumatsassimangaarnermit, nikallunganermit aliasunnermillu eqqorneqassanngilaq. Kaannersuit, piitsuuneq sorsunnerillu piujunnaassapput. (Tussiaat 46:10; 72:16, 1990) Nunarsuaq paratiisinngortinneqarumaarpoq. (Lukasi 23:43, NV) Tamakku tamaasa Jehovap uagut pilluta iliuuseriniarpai, imaanngitsoq pinngitsaalineqarami kisiannili asagamisigut.
20. Jehovamut asanninnerup iluaqutaanera pillugu Mosesi qanoq oqarpa?
20 Taamaattumik Guutimik asanninnerujartornissamut pissutissaqarluarpugut. Illit Guutimut asanninnerit nakussatsittuassaviuk taassumunngalu siulersortittuassallutit? Illit nammineq tamanna aalajangigassarivat. Jehovamut asanninnermik ineriartortitsinerup taassuminngalu asannittuarnerup iluaqutaanerat Mosesip paasivaa. Taanna Israelikkunnut nalimini inuusunut ima oqarpoq: „Inuuneq qinerniaruk illit kinguaassatillu inuuginnaqqullusi! [Jehova] Guutit asassavat naalassallugulu attavigittuinnarlugulu! Taava inuuginnassaatit.“ — 5 Mosesi 30:19, 20.
Eqqaamavigit?
• Sooq Jehovamut asanninnerput taama pingaaruteqartigaa?
• Guutimut asanninnerput qanoq ersersissinnaavarput?
• Jehovamut asanninnitsinnut suut pissutigaavut?
• Guutimut asanninnerput qanoq ineriartortissinnaavarput?
[Atuaqqissaarnermi apeqqutit]
[Qupp. 3-mi assiliartaq]
Jehovap tamatta ersersissinnaasarput pingaartippaa — tassa asanninnerput
[Qupp. 6-mi assiliartat]
„Uannik takunnittup Ataataq takuaa.“ — Johannesi 14:9