Jehovap ’imminut qinusut anersaamik illernartumik tunisarpai’

„Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ — LUKASI 11:13.

1. Ingammik qaqugukkut anersaap illernartup ikiuinera pisariaqartittarparput?

’TAMANNA uanga kisimiillunga anigorsinnaanngilara. Aatsaat anersaap illernartup ikiuineratigut misilinneqarnera tamanna naammagalugu atorsinnaavara!’ Illit taamatupajaaq oqarnikuuit? Kristumiut ilarpassui taamatupajaaq oqarsimapput. Immaqa perulunnartumik napparsimalersimanerit paasereerlugu taamatut eqqarsarputit. Immaqaluunniit ukiorpassuarni aapparisimasat toqummat. Immaqaluunniit taamani tassanngaannaq isumatsassimangaaleravit. Immaqa misigivutit atoruminaatsut tamakkua anigorsinnaallugit aatsaat Jehovap anersaamigut illernartukkut ’pissusissaq akimorlugu pissaanermik’ tunimmatit. — 2 Korinthimiut 4:7-9, NV; Tussiaat 40:2, 3.

2. (a) Kristumiut ilumoortut sunik unamminiagassaqarpat? (b) Allaaserisami matumani apeqqutit suut akissutissarsissavavut?

² Kristumiut ilumoortut silarsuarmit ajortumit matumannga tatineqaleraluttuinnarlutillu akerlilersorneqaleraluttuinnarput. (1 Johannesi 5:19) Aamma Kristusip ajoqersugai Saatanimit Diaavulumit namminermit saassunneqartarput, taannami ’Guutip inassutaanik Jiisusillu nalunaajaataanik aalajangiussisunut’ naakkittaatsumik sorsuppoq. (Saqqummersitat 12:12, 17) Taamaammat paasinarpoq Guutip anersaavata ikiuinera maanna aatsaat taama pisariaqartitsigigatsigu. Qanoq ililluta qulakkeersinnaavarput Guutip anersaavanik illernartumik naammangaartumik piuarnissarput? Aamma sooq qularissanngilarput Jehovap artornartorsiorfinni uagutsinnik pisariaqartumik nakussatsitsinissaminut piumassuseqangaarnera? Apeqqutit taakkua Jiisusip assersuusiaani marlunni akissutissarsissavavut.

Qasusuillutit qinusarit

3, 4. Jiisusip suna assersuusiaraa, qinunermullu tunngatillugu qanoq atorpaa?

³ Ilaanni Jiisusip ajoqersugaasa ilaat ima oqarpoq: „Naalagaq, ajoqersortigut qanoq qinusassasugut.“ (Lukasi 11:1) Tamatumunnga akissutitut Jiisusip ajoqersukkani marlunnik assersuusiorfigai imminnut attuumassuteqartunik. Siulleq angummut pulaarneqartumut tunngavoq, aappaalu ataataasumut ernerminut tusarnaartumut tunngavoq. Assersuusiat taakkua marluk sammeriartigik.

⁴ Jiisusi ima oqarpoq: „Arlarsi ikinnguteqaruni taassumalu ikinngutini unnuarornerani ornillugu oqarfigiguniuk: ’Asasara ikinngut, timiusanik pingasunik atukkinnga ikinngutiga tikeraarlunga tikiummat sassaalliutissaqannginnama’, taqqamanngaanniit akippat: ’Pisarissersoqinanga! Matu parnaareersimavoq qitornakkalu tamatta innareerpugut. Atukkinniarlutit makinnianngilanga’ — oqarfigaassi: Ikinngutiginera pillugu tuniniarlugu makinngikkaluaruniluunniit taamaattoq innimiillisaarnera pillugu makissaaq pisariaqagaanillu tunissallugu.“ Taava Jiisusip assersuusiaq taanna qinunermut qanoq attuumassuteqarnersoq nassuiarpaa: „Oqarfigaassimi: Qinugitsi, tunineqassaasi taava; ujarleritsi, nanisissaasi taava; kasuttoritsi, mappiunneqassaasi  taava. Kinaluunniimmi qinusoq pisarpoq, ujarlersorlu nanisisarpoq, kasuttortorlu mappiunneqartarpoq.“ — Lukasi 11:5-10.

5. Angut malartaatsoq pillugu assersuusiaq qinugaangatta isiginnittaaserisariaqagarput pillugu sumik ilinniarfigaarput?

⁵ Angut malartaatsoq pillugu assersuusiami tamatumani qinugaangatta qanoq isiginnittaaseqartariaqarnerput ersersinneqarpoq. Maluginiariaruk Jiisusi oqartoq angutip ’innimiillisaarnini pillugu’ pisariaqartitani pigai. (Lukasi 11:8) Oqaaseq ’innimiillisaarneq’ matumani atorneqartoq Biibilimi ataasiaannarluni atorneqarpoq. Oqaaseq taanna grækerit oqaasiannit nutsiinnavillugu „kanngusujuissuseq“-mik isumaqartumit nutserneqarpoq. Kanngusujuissuseq amerlanertigut pissuserineqartumut ajortumut tunngatinneqartarpoq, pissutissaqarluarlunili kanngusujuikkaanni, innimiillisaaraanni imaluunniit malartaakkaanni, tamanna pissusiusinnaavoq ajunngitsoq. Assersuusiami angummut pulaarneqartumut tunngatillugu taamaappoq. Taassuma pisariaqartitami qasusuilluni qinnutiginissaat kannguginngilaa. Jiisusip angut pulaarneqartoq uagutsinnut maligassaalluartutut saqqummiummagu uaguttaaq qasusuilluta qinusariaqarpugut. Jehovap kissaatigaa qinujuassasugut, ujarlertuassasugut, kasuttortuassasugut. Tamakkununnga akissutitut ’imminut qinusut anersaamik illernartumik tuniumaarpai’.

6. Jiisusip nalaani inoroorsaarneq qanoq isigineqartarpa?

⁶ Jiisusip ersersiinnanngilaa qanoq — malartaalluta — qinusariaqarnerput, aamma ersersippaa sooq qinusariaqartugut. Tamanna paasiniarlugu Jiisusip pulaarneqartoq malartaatsoq pillugu assersuusiaanik tusarnaartut inoroorsaarnermut isiginnittaasiat eqqarsaatigisariaqarparput. Biibilimi oqaluttuarpassuarni erserpoq taamanikkut inuit, ingammik Guutip kiffaasa, pulaartunik isumassuilluarneq assut pingaartikkaat. (1 Mosesi 18:2-5; Hebræerit 13:2) Inoroorsaarnaveersaarneq kanngunarsaataasarsimavoq. (Lukasi 7:36-38, 44-46) Tamakkua eqqarsaatigalugit Jiisusip assersuusiaa sammeqqilaariartigu.

7. Sooq Jiisusip assersuusiaani angutip pulaarneqartup ikinngutiminik itersaanini kanngusuutiginngilaa?

⁷ Assersuusiami angut pulaarneqartoq unnuaqeqqata missaani pulaarneqarpoq. Taanna misigaaq pulaartuminut arlaannik sassaallertariaqarluni, ’sassaalliutissaqanngilarli’. Tamanna taassuma ajornartoornertut isigaa! Qanorluunniit timiusanik pissarsisariaqarpoq. Taamaammat ikinngutimi ilaannukarpoq taassuminngalu itersaanini kanngusuutiginagu. Ima oqarpoq: „Asasara ikinngut, timiusanik pingasunik atukkinnga.“ Qinujuarpoq pisariaqartitami pinissaata tungaanut. Aatsaat timiusat pereerunigit pulaartoqallaqqissuusinnaavoq.

Qinunerup pingaaruteqassusia paasilluartariaqarpoq

8. Guutip anersaavata qasusuilluta qinnutiginissaanut suna kajumississutigissavarput?

⁸ Assersuusiaq taanna qasusuilluta qinusarnitsinnut pissutaasumik sumik ersersitsiva? Angutip timiusat qinnutigiuarpai, misigigami taakku pinngitsoorsinnaanagit pulaartoqallaqqissutut pisussaaffini eqqortissinnaassaguniuk. (Esaja 58:5-7) Timiusaateqanngikkuni pisussaaffini  eqqortissinnaanavianngilaa. Taamatuttaaq uagut nalunngilarput kristumiutut ilumoortutut kiffartussagutta Guutip anersaava pinngitsoorsinnaanatigu, taamaattumik anersaaq taanna Guutimut qinnutigiuarparput. (Zakaria 4:6) Anersaaq illernartoq piginagu sapissagaluarpugut. (Matthæusi 26:41) Assersuusiaq taanna pingaarutilimmik qanoq isummerfigisinnaaneripput takusinnaaviuk? Guutip anersaava pinngitsoorsinnaanngisatsitut isigigutsigu, qularnannginnerussaaq tamatuminnga qasusuilluta qinnutiginnittarnissarput.

9, 10. (a) Guutimut anersaava qinnutigigaangatsigu sooq qasusuittariaqarnerput pillugu assersuusiorit. (b) Imminut qanoq aperisariaqarpugut, aamma sooq?

⁹ Matumani paasisavut ullutsinni atorniarlugit takorlooriaruk illit ilaquttat unnuaannakkut napparsimalersoq. Nakorsaq ikioqqullutit itersassagaluarpiuk? Ilaquttat iluaalliulaaginnarpat itersarnavianngilat. Uummalliulersimappalli nakorsamut sianernissat kanngusuutiginavianngilat. Sooq? Ajornartooravit. Nalunnginnakku ilisimasalimmit ikiorneqarnissaq pisariaqarluinnartoq. Ikiortissarsiunngikkaanni ajortorujussuarmik kinguneqarsinnaavoq. Kristumiut ilumoortut ajornartoorfimmiiginnavippullusooq. Saatanimi „løvitut uiannisaartutut“ angalaarpoq iiniarsaraluta. (1 Petrusi 5:8) Anersaakkut ittumik inuuginnassagutta Guutip anersaavata ikiuinera pinngitsoorsinnaanngilarput. Guutimut ikioqqunaveersaarneq ajortorujussuarmik kinguneqarsinnaavoq. Taamaattumik Guutip anersaava illernartoq taassumunnga malartaalluta qinnutigisarparput. (Efesosimiut 3:14-16) Aatsaat taamaaliornitsigut ’naggatissamut nikallujuinnissamut’ pisariaqartumik nukissaqartuarsinnaavugut. — Matthæusi 10:22; 24:13.

¹⁰ Taamaattumik assut pingaaruteqarpoq ilaanneeriarluta ima imminut aperisarnissarput: ’Qinusarnikkut qanoq qasusuitsigaanga?’ Eqqaamajuk Guutip ikiuinera qanoq pisariaqartitsigineripput paasilluinnarutsigu, anersaap illernartup qinnutiginerani qasusuinnerulissasugut.

Tatiginnilluta qinunissamut suna kajumississutigisarparput?

11. Ataataasoq taassumalu ernera pillugit assersuusiap qinunermut tunngasuunera Jiisusip qanoq ersersippaa?

¹¹ Jiisusip pulaarneqartoq malartaatsoq pillugu assersuusiaani uppertup, qinusup, isiginnittaaserisariaqagaa erseqqissarneqarpoq. Assersuusiami tulliuttumi qinnutinik tusartartup, Jehova Guutip, isiginnittaasia erseqqissarneqarpoq. Jiisusi ima aperivoq: „Kia arlassi ataataasup ernermi aalisakkamik qinnuigippani pulateriaarsummik tunissanerpaa, mannimmilluunniit qinnuigippani skorpionimik tunissanerpaa?“ Taava Jiisusip assersuusiap qanoq paasisariaqarnera nassuiarpaa ima oqarluni: „Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ — Lukasi 11:11-13.

12. Ataataq ernermi piumasaanik tunniussisoq pillugu assersuusiami Jehovap qinnutitta akinissaannut piumassuseqarnera qanoq ersersinneqarpa?

¹² Ataataasoq ernerminut tusarnaartoq pillugu assersuusiaq atorlugu Jiisusip ersersippaa Jehovap imminut qinusut qanoq isiginerai. (Lukasi 10:22) Siullermik maluginiariaruk assersuusiat taakku marluk assigiinngissutaat. Assersuusiami  siullermi angutitut qinnutigineqartut malillugit iliorniaasaartutut innani, Jehova ataatatut isumassuisutut qitornami piumasaanik tunniusserusungaartutut ippoq. (Tussiaat 50:15) Jiisusip erseqqissarpaa Jehovap uagutsinnut tunisiumatunera. Jiisusi oqarpoq ataatap nunamiusup, ajorti kingornussaq pissutigalugu ’ajortuugaluarluni’, ernini tunissutinik ajunngitsunik tunisarpagu, qanoq qularnannginnerutigissasoq Ataatatta qilammiusup asannittup qitornaminut nunamiusunut imminut kiffartortunut anersaamik illernartumik tunisinissaa! — Jaaku 1:17.

13. Jehovamut qinugaangatta suna qularutigissanngilarput?

¹³ Tamanna qanoq ilinniarfigisinnaavarput? Ataatarput qilammiusoq anersaamik illernartumik qinnuigigaangatsigu qularutiginngilluinnassavarput piumasatsinnik tunerusungaassagaatigut. (1 Johannesi 5:14) Qinunikkut saaffigisaqattaarutsigu imatut oqanngisaannassaaq: „Pisarissersoqinanga! Matu parnaareersimavoq.“ (Lukasi 11:7) Jiisusili ima oqarpoq: „Qinugitsi, tunineqassaasi taava; ujarleritsi, nanisissaasi taava; kasuttoritsi, mappiunneqassaasi taava.“ (Lukasi 11:9, 10) Aap, Jehova „qanippoq torlorfigisiminut tamanut“. — Tussiaat 145:18.

14. (a) Annikilliuuteqartut ilaat qanoq kukkusumik paasinnittaaseqarpat? (b) Sooq annikillioraangatta tatiginnilluta Jehovamut qinusinnaavugut?

¹⁴ Jiisusip ataataq isumassuisoq pillugu assersuusiaani aamma erseqqissarneqarpoq Jehovap ajunngissusiata ataatap nunamiusup ajunngitsuliarisinnaasaanit annerungaarnera. Taamaammat misiginngisaannartariaqarpugut annikilliuutigisartakkavut Jehovap uagutsinnik iluarinninnginneranut ersiutaasut. Uagutsinnununa akeraanerpaasup, Saatanip, taamatut eqqarsartikkusukkaatigut. (Jobi 4:1, 7, 8; Johannesi 8:44) Eqqarsaatit aserorsaataasut tamakku Biibilimi tunngavissaqanngillat. Jehovap „ajortumik“ misilinneq ajorpaatigut. (Jaaku 1:13, NV) Pulateriaarsuttut skorpionitulluunniit ittunik misilinneqartinngisaannassavaatigut. Ataatatta qilammiusup ’imminut qinusut ajunngitsunik tunisarpai’. (Matthæusi 7:11; Lukasi 11:13) Jehova qanoq ajunngitsigisoq aamma uagutsinnik qanoq ikiuiumatigisoq paasinerujartortillugu, tatiginnilluta qinunissamut kajumissuseqarnerujartuinnassaagut. Tatiginnillutalu qinusarutta, uaguttaaq tussiaasiortutut ima allattutut misigisinnaassaagut: „Ilumut Guuti tusarsimavoq, qinnutiga tusarsimavaa.“ — Tussiaat 10:17; 66:19.

Anersaap illernartup qanoq ikiortaraatigut

15. (a) Jiisusi anersaamut illernartumut tunngatillugu qanoq neriorsuiva? (b) Anersaap illernartup ilaatigut qanoq ikiortarpaatigut?

¹⁵ Jiisusip assersuusiamini ajoqersukkaminut neriorsuutigisani toqunngitsiarluni neriorsuutigeqqippaa. Anersaaq illernartoq pillugu taakkununnga ima oqarpoq: „Ataataq qinnuigiumaarpara, tuniumaarpaasilu illersuisussamik [ikiuisussamik, NV] allamik naassaanngitsumik ilissinniittussamik.“ (Johannesi 14:16) Taamaalilluni Jiisusip neriorsuutigaa ajoqersukkani ikiuisumit, anersaamit illernartumit, siunissami, aamma  nalitsinni, najorneqarumaartut. Ullumikkut anersaap illernartup ikiuinera qanoq malugisarparput? Assersuutigalugu anersaap illernartup misilinneqarnerit assigiinngitsut naammagalugit atornissaannut ikiortarpaatigut. Qanoq? Apustili Paulusip, nammineq misilinneqarsimasup, kristumiunut Korinthimiittunut allakkamini allaatigaa Guutip anersaavata qanoq ikiorsimagaani. Allagai misissulaariartigik.

16. Paulusip akiugaanut assingusumik qanoq nalaataqarsinnaavugut?

¹⁶ Paulusip siullermik uppeqatini unneqqarilluni oqaluttuuppai ’kapinartumik timiminut kapputtumik’, arlaatigut misilinneqaatiminik, akiugaqarluni. Taava ima allappoq: „Pingasoriarlunga Naalagaq [Jehova] qinnuigaara taanna uannit peersitaaqqullugu.“ (2 Korinthimiut 12:7, 8) Paulusip Guuti ilungersorluni qinnuigaa erloqissutini peeqqullugu, peerneqanngilarli. Ullumikkut immaqa illit tamatumunnga assingusumik atugaqarputit. Immaqa Paulusitut qasusuillutit tatiginnillutillu qinusarsimavutit Jehovalu ilungersorlutit qinnuigisimallugu misilinneqaatigisat peeqqullugu. Qinusaqattaaraluarlutilli ajornartorsiut qaangiutinngilaq. Taava imaappa Jehovap qinnutitit akisimanngikkai anersaavanillu ikiorneqanngitsutit? Naamerluinnaq! (Tussiaat 10:1, 17) Paulusip nangilluni allagai maluginiariakkit.

17. Jehovap Paulusip qinnutai qanoq akivai?

¹⁷ Paulusip qinnutaa Guutip ima akivaa: „Ajunngissusera pisassarineqanngikkaluartoq ilinnut naammappoq; pissaanerami sanngiissutsimi naammalluinnartunngortarpoq.“ Paulusi ima allappoq: „Taamaattumik nuannaaqalunga sanngiissutikka usorsisimaarutigiumaneruakka Missiarsip pissaanerata tupertut qulangersimasinnaaniassammanga.“ (2 Korinthimiut 12:9, NV; Tussiaat 147:5) Tassa Paulusip Guutip Missiarsi aqqutigalugu pissaanermigut illersuineranit tupertut qulangersimaneqarnini misigaa. Ullumikkut aamma taamatut Jehovap qinnutivut akisarpai. Illersuinini tupertut kiffaminik qulangersimannitsittarpaa.

18. Sooq misilinneqarnerit naammagalugit atorsinnaavavut?

¹⁸ Soorunalimi tupeq siallersitsinaveersaarneq ajorlunilu anorlersitsinaveersaarneq ajorpoq, silarlussuarmulli ilaatigut illersuutaasarpoq. Taamatulli „Missiarsip pissaanerata“ illersuinera uagutsinnik annikilliortitsinaveersaarneq ajorlunilu ajornartorsiortitsinaveersaarneq ajorpoq. Silarsuarmili matumani ajoqutaasunut tamatumalu naalagaata, Saatani Diaavulup, saassussinerinut anersaakkut ittumik illersortarpaatigut. (Saqqummersitat 7:9, 15, 16) Taamaammat ajornartorsiummik ilinnit ’peerumanngitsumik’ akiugaqaraluarlutit qularutigissanngilat Jehovap akiugaqarnerit nalunngikkaa aamma ’torlulanerit’ akisimagaa. (Esaja 30:19; 2 Korinthimiut 1:3, 4) Paulusi ima allappoq: „Guuti unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ — 1 Korinthimiut 10:13; Filippimiut 4:6, 7.

19. Suna iliuuseriniarlugu aalajangiusimaviuk, aamma sooq?

¹⁹ Aap, ’ullut atugarliungaarfiit’ silarsuup matuma ajortup ’ulluinut kingullernut’ makkununnga ilisarnaataapput. (2 Timotheusi 3:1) Guutilli kiffaasa ullut atugarliungaarfiit tamakkua naammagalugit atorsinnaavaat. Sooq? Guutip anersaavanit illernartumit, Jehovap tatiginnillutik qasusuillutillu imminut tamatuminnga qinnutiginnittartunut tamanut kajumilluni sinnilimmik tunniuttagaanit, ikiorneqarlutillu illersorneqartaramik. Taamaammat ullut tamaasa Guutip anersaavata illernartup qinnutigiuarnissaa aalajangiusimatigu. — Tussiaat 34:7; 1 Johannesi 5:14, 15.

Qanoq akissavit?

• Guutip anersaava illernartoq piumallugu qanoq iliortariaqarpugut?

• Sooq qularissanngilarput anersaamik illernartumik tuneqqulluta qinnutivut Jehovap akiumaarai?

• Misilinneqarnerit naammagalugit atornissaannut anersaap illernartup qanoq ikiortarpaatigut?

[Atuaqqissaarnermi apeqqutit]

[Qupp. 19-mi assiliartaq]

Pulaarneqartoq malartaatsoq pillugu Jiisusip assersuusiaa sumik ilinniarfigisinnaavarput?

[Qupp. 20-mi assiliartaq]

Guutip anersaava illernartoq qasusuillutit qinnutigisarpiuk?

[Qupp. 21-mi assiliartaq]

Ataataq isumassuisoq pillugu assersuusiaq Jehova pillugu sumik ilinniarfigisinnaavarput?