Jehovap ’qinikkani naapertuilluartumik pineqartikkumaarpai’

„Guutip qinikkani ullukkut unnuakkullu imminik torlorfiginnittut naapertuilluartumik pineqarnissaat isumagissannginnerpaa?“ — LUKASI 18:7, NV.

1. Kikkut uagutsinnut qiimmassaataappat, aamma sooq?

SILARSUAQ tamakkerlugu Jehovap Nalunaajaasuisa qatanngutinik angutinik arnanillu kristumiunik ukiorpassuarni aalajaallutik Jehovamut kiffartorsimasunik peqateqartarnertik nuannaarutigaat. Illit ukiorpassuarni Jehovamut kiffartorsimasunik ilisarisimasaqarpit? Immaqa qatanngut arnaq utoqqaq ukiorpassuit matuma siorna kuisissimasoq naalagaaffilersaarfimmullu ataatsimiigianngitsuunngisaannangajattoq eqqaasarpat. Immaqaluunniit qatanngut angut utoqqaq ilumoorfiginnilluni sapaatip-akunneri tamaasa katersuuttunukartartoq ukiorpassuarnilu taamaaliortarsimasoq eqqaasarpat. Qatanngutit aalajaatsut taakkua ilarpassui isumaqarsimagaluarput Harmagedoni maannakkut qaangiuteriikatassimassasoq. Silarsuarli naapertuilluanngitsoq suli atagaluartoq Jehovap neriorsuutaanik upperinnikkunnaarnatillu ’naggatissamut nikallujuinnissaminnik’ aalajangiusimannikkunnaanngillat. (Matthæusi 24:13) Jehovamut kiffaasut ilumoorfiginnittut taakkua upperluarnerat ilagiinnut tamanut assut qiimmassaataasarpoq. — Tussiaat 147:11.

2. Suna assut ajuusaarutigaarput?

² Ajoraluartumilli ilaannikkut tamatuma akerlerluinnaanik isumaqartoqartarpoq. Qatanngutit ilaat ukiorpassuarni oqaluusseqataasarsimasut Jehovamut upperunnaariartuaarsimapput ilagiinnullu kristumiunut aggertarunnaarsimallutik. Ikinngutigisimasatta Jehovamik qimatsisimanerat assut ajuusaarutigaarput, aamma ’savanik tammarsimasunik’ tamanik savaatinut uternissaannut ikiuiuarnissarput qamannga pisumik kissaatigaarput. (Tussiaat 119:176; Romamiut 15:1) Assigiinnginnerujussuilli tamakku — ilaat aalajaattuartut allalli upperunnaartut — apererusulernarput. Sunaana pissutigalugu oqaluussisartorpassuit Jehovap neriorsuutaanik upperinnittuaannarsinnaasut allat upperinnikkunnaartut? ’Jehovap ullussarsuata’ qanillineranik qularutiginninngilluinnarnerput attattuarumallugu uagut nammineq qanoq iliorsinnaavugut? (Sefania 1:14) Assersuusiaq Lukasip iivangkiiliuaniittoq iluaqutigalugu apeqqutit taakkua akissutissarsissavavut.

’Inuup Ernerata tikiunnerani’ inuusunut mianersoqqussut

3. Ingammik kikkut uillarneq eqqartuussisorlu pillugit assersuusiaq iluaqutigisinnaavaat, aamma sooq?

³ Jiisusip uillarneq eqqartuussisorlu pillugit assersuusiaa Lukasi kapitali 18-imiippoq. Taanna angut pulaarneqartoq malartaatsoq pillugu assersuusiamut allaaserisap matuma siulianiittumut assinguvoq. (Lukasi 11:5-13) Versilli ataqatigiinnerini, uillarneq eqqartuussisorlu pillugit assersuutitaqartuni, erserpoq tamatumani ingammik ’Inuup Ernerata’ Guutip naalagaaffiani kunngitut pissaaneqarluni ’tikiunnerani’, tassa 1914-imiit ulloq manna tikillugu, inuusut pineqartut. — Lukasi 18:8. *

4. Jiisusip Lukasi kapitali 18-imi allassimasumik assersuusiunnginnermini suna oqaluuseraa?

⁴ Jiisusi uillarneq eqqartuussisorlu pillugit assersuusiunnginnermini oqarpoq Guutip naalagaaffiani kunngitut pissaaneqarluni najuunnerminut uppernarsaatit ’innaallannertut qilaap  killinganiit killinganut qaammaallattartutut’ erseqqaritsigissasut. (Lukasi 17:24; 21:10, 29-33) Taamaakkaluartorli ’naggatissap’ nalaani inuusut amerlanersaasa uppernarsaatit erseqqissut sumiginnassavaat. (Danieli 12:4) Sooq? Inuit Noap nalaani Lotillu nalaani Jehovap mianersoqqussutaanik sumiginnaasut sumiginnaanerminnut pissutigisaasa assinginik pissuteqaramik. Taamanikkut inuit ’nerillutillu imerput, pisillutik tuniniaallutillu, naatitassanik ikkussuillutik illuliorlutillu ulloq Guutimit nungutinneqarfitsik tikillugu’. (Lukasi 17:26-29) Toqupput Guutip piumasaa eqqumaffiginnginnamikku ulluinnarni sammisartakkatik ulapputigingaaramikkit. (Matthæusi 24:39) Ullumikkuttaaq inuit ulluinnarni suliassatik ima ulapputigitigaat silarsuup matuma ajortup naggatissaata qanillineranut uppernarsaatit takusinnaanagit. — Lukasi 17:30.

5. (a) Jiisusip kikkut mianersoqquai, aamma sooq? (b) Ilaasa suut upperunnaassutigisimavaat?

⁵ Erseqqippoq Jiisusip ajoqersukkami Saatanip silarsuaanik allamut saassutiginninnissaat, immaqa allaat allamut ima saassutigitigalugu ’tunuminniittunut uternissaat’, isumakuluutigigaa. (Lukasi 17:22, 31, NV) Aammami kristumiut ilaasa Saatanip silarsuaa allamut saassutigisarlugulu ’tunuminniittunut utissutigisarpaat’. Immaqa ulloq Jehovap silarsuarmik ajortumik matuminnga piuneerussiffissaa ukiorpassuarni qilanaarisimavaat, Harmagedonili piffissami ilimasuffigisaminni nalliutinngimmat pakatsipput. Ullup Jehovap eqqartuussiffissaata qanillinera upperiunnaariartuaarpaat. Oqaluusserpiarunnaarput, ulluinnarnilu sammisassanik ima ulapputiginnitsigilersimapput anersaakkut ittunut piffissaqarpiarunnaarlutik. (Lukasi 8:11, 13, 14) Ajoraluartumillu naggataatigut aalajangerput ’tunuminniittunut uterniarlutik’.

’Qinuttuinnartariaqarneq’

6-8. (a) Uillarneq eqqartuussisorlu pillugit assersuusiaq oqaluttuarilaaruk. (b) Jiisusip assersuusiaq taanna qanoq atorpaa?

⁶ Jehovap neriorsuutiminik eqqortitsiumaarneranik qularutiginninngilluinnarnerput attattuarniarlugu qanoq iliorsinnaavugut? (Hebræerit 3:14) Apeqqut taanna Jiisusip akivaa Saatanip silarsuaanut ajortumut uternissaq ajoqersukkaminut mianersoqqussutigeqqammerlugu.

⁷ Lukasi allappoq Jiisusip nangilluni taakku ’oqaluttuukkai qasusuilluni qinuttuinnartariaqarnermik assersuummik’. Jiisusi ima oqarpoq: „Illoqarfimmi eqqartuussisoqarpoq Guutimik mianerinninngitsumik inunnillu sussarisaqanngitsumik. Illoqarfimmi tassani najugaqarpoq uillarneq, taassuma eqqartuussisoq ornittuartarpaa oqarfigisarlugulu: ’Akerlerisannut ikiunnga naapertuilluartumik pineqartillunga!’ Sivisuumik pinaaseqqaaraluariarluni kiisa imminut oqarfigaaq: ’Guuti mianerinngikkaluarlugu inuillu sussarinngikkaluarlugit taamaattoq uillarneq taanna ikiorniarpara naapertuilluartumik pineqarnissaanut, pisarissersormanga, taamaaliunngikkuma ornillunga isarujussuaqinavaanga.’“

⁸ Taava assersuusiaq qanoq paasisariaqarnersoq Jiisusip nassuiarpaa: „Tusariarsiuk eqqartuussisoq naapertuilluanngitsoq qanoq oqartoq! Taavami Guutip qinikkani naapertuilluartumik pineqartissannginnerpai ulloq unnuarlu torlorfigiuarpanni? Utaqqisiinnassanerpai [Taavami Guutip qinikkani ullukkut unnuakkullu imminik torlorfiginnittut naapertuilluartumik pineqarnissaat  isumagissannginnerpaa taakku kamagigaluarlugit, NV]? Oqarfigaassi: Naapertuilluartumik pineqartissavai erniinnaartumik. Inuulli Ernera tikiukkuni uppernermik nunarsuarmi nassaarumaarnerpa?“ — Lukasi 18:1-8.

’Naapertuilluartumik pineqartinnga’

9. Uillarneq eqqartuussisorlu pillugit assersuusiami pingaarnersaq suna erseqqissarneqarpa?

⁹ Assersuusiami tamatumani pingaarnersaq erseqqilluinnarpoq. Tamanna assersuusiami inunnit taakkunannga marlunnit aamma Jiisusimit namminermit eqqaaneqarpoq. Uillarneq ima qinuvoq: ’Naapertuilluartumik pineqartinnga.’ Eqqartuussisoq ima oqarpoq: ’Naapertuilluartumik pineqartissavara.’ Jiisusi ima aperaaq: „Guutip qinikkani naapertuilluartumik pineqartissannginnerpai?“ Jehovalu pillugu Jiisusi ima oqarpoq: „Naapertuilluartumik pineqartissavai erniinnaartumik.“ (Lukasi 18:3, 5, 7, 8) Qaqugumiuna Guutip ’qinikkani naapertuilluartumik pineqartissagai’?

10. (a) Ukiuni hundredelinni siullerni qaqugukkut naapertuilluartuliortoqarpa? (b) Qaqugu aamma qanoq Guutip kiffani ullutsinni naapertuilluartumik pineqartissavai?

¹⁰ Ukiuni hundredelinni siullerni ukiumi 70-imi Jerusalemi naalaffillu piuneerunneqarmata ’ullut pillarneqarfiit’ (imaluunniit: ’ullut akiniaaffiit’, 1900/1961; ’ullut naapertuilluartuliorfiit’, NV quppernerup ataani ilanngussaq) nalliupput. (Lukasi 21:22) Ullutsinni Guutip ’ullussarsuarmini’ innuttani naapertuilluartumik pineqartissavai. (Sefania 1:14; Matthæusi 24:21) Taamanikkussamut Jehovap innuttaminik ’annikilliortitsisut annikilliortitaanermik akilissavai’ Jiisusi Kristusip ’aggiuppagu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut’. — 2 Thessalonikamiut 1:6-8; Romamiut 12:19.

11. Guutip kiffaminik naapertuilluartumik „erniinnaartumik“ pineqartitsiniarnera qanoq paasisariaqarpa?

¹¹ Jehovalliuna kiffaminik „erniinnaartumik“ naapertuilluartumik pineqartitsiumaarneranik Jiisusip neriorsuutaa qanoq paasisariaqartoq? Guutip oqaasiani erserpoq ’Jehovap kamaginnittuugaluarluni’ piffissanngorpat eqqartuussut naapertuilluartoq naammassipallassagaa. (Lukasi 18:7, 8; 2 Petrusi 3:9, 10) Noap nalaani ulersuarmat ajortut ingerlaannaq piuneerunneqarput, Lotillu nalaani qilammit innermik siallermat ajortut ingerlaannaq suujunnaarsinneqarput. Jiisusi ima oqarpoq: „Taamaakkumaarportaaq ullormi Inuup Ernerata saqqummersitaaffissaani.“ (Lukasi 17:27-30) Ajortut ’perlussamit tassanngaannaq’ tikinneqaqqikkumaarput. (1 Thessalonikamiut 5:2, 3) Aap, qularutiginngilluinnassavarput Jehovap naapertuilluartuliornissaq pillugu Saatanip silarsuaa ullormit ataasiinnarmilluunniit sivisunerusumik pisariaqanngitsumik atatinnavianngikkaa.

„Naapertuilluartumik pineqartissavai“

12, 13. (a) Jiisusip uillarneq eqqartuussisorlu pillugit assersuusiaa sumik ilinniarfigisinnaavarput? (b) Sooq qularutigissanngilarput Jehovap qinnutivut tusarumaarlugillu naapertuilluartumik pineqartikkumaaraatigut?

¹² Jiisusip uillarneq eqqartuussisorlu pillugit assersuusiaani ilumoortut pingaarutillit suli allat erseqqissarneqarput. Jiisusip assersuusiani nassuiaramiuk ima oqarpoq: „Tusariarsiuk eqqartuussisoq naapertuilluanngitsoq qanoq oqartoq! Taavami Guutip qinikkani naapertuilluartumik pineqartissannginnerpai?“ Soorunami Jiisusip Jehova eqqartuussisumut assersuutinngilaa, oqarniarlunilusooq eqqartuussisup uillarnermik pinninneratut Guuti uppertunik pinnikkumaartoq. Jiisusilli ajoqersukkani Jehova pillugu ilinniartippai Taassuma eqqartuussisullu assigiinngissutaannik erseqqissaanermigut. Taakku suut assigiinngissutigigamikkik?

¹³ Jiisusip assersuusiaani eqqartuussisoq ’naapertuilluanngitsuuvoq’, ’Guutili eqqartuussisuuvoq naapertuilluartoq’. (Tussiaat 7:12; 33:5) Eqqartuussisup uillarneq inuttut soqutiginngilluinnarpaa, Jehovalli inuit tamaviisa soqutigilluinnarpai. (2 Nalunaarsuutit 6:29, 30) Eqqartuussisup uillarnermik ikiuinissani kajumiginngilaa, Jehovalli kiffaminik ikiuinissani kajumigaa — aap, taakkuninnga ikiuerusuttorujussuuvoq. (Esaja 30:18, 19) Tamanna sumik ilinniarfigisinnaavarput? Eqqartuussisup naapertuilluanngitsup uillarnerup qinnutaa tusarnaarsimappagu taannalu naapertuilluartumik pineqartillugu, qanorli Jehovap kiffami qinnutaat tusarnerutigissavai taakkualu naapertuilluartumik pineqartillugit! — Ussatit 15:29.

14. Ullup Jehovap eqqartuussiffissaata nalliunnissaa sooq upperiunnaassanngilarput?

 ¹⁴ Taamaattumik ullup Jehovap eqqartuussiffissaata nalliunnissaanik upperinnikkunnaartut kukkorujussuarput. Sooq? ’Jehovap ullussarsuata’ qanillineranik upperilluinnaraluakkaminnik upperinnikkunnaarnermikkut ersersippaat Jehovap neriorsuutiminik eqqortitsiumaarnerata upperineqarsinnaanera qularalugu. Kialuunniilli Guutip aalajaassusia pissutissaqarluarluni apeqqusersinnaanngilaa. (Jobi 9:12) Imminulli ima aperisinnaavugut: Uanga aalajaattuassaanga? Tamannarpiarlu Jiisusip sammivaa uillarneq eqqartuussisorlu pillugit assersuusiami naggataatungaani.

’Uppernermik taama ittumik nunarsuarmi nassaarumaarnerpa?’

15. (a) Jiisusi qanoq aperiva, aamma sooq? (b) Imminut qanoq aperisariaqarpugut?

¹⁵ Jiisusip apeqqut soqutiginartoq una apeqqutigaa: „Inuup Ernera tikiukkuni uppernermik [taama ittumik, NV quppernerup ataani ilanngussaq] nunarsuarmi nassaarumaarnerpa?“ (Lukasi 18:8) Oqaatsini ’upperneq taama ittoq’-mi ersersinneqarpoq Jiisusip upperneq nalinginnaasoq oqaluuserinagu, upperneq immikkut ittoq — upperneq uillarnerup upperneratut ittoq — oqaluuserigaa. Jiisusip apeqqut akinngilaa. Apeqqut taanna apeqqutigaa ajoqersukkat namminneq qanoq upperluartiginerminnik eqqarsaatiginnilersinniarlugit. Ima upperunnaariartuaartigippat qimassimasaminnut uteriaannaallutik? Imaluunniit uppernerat uillarnerup upperneranut assersuunneqarsinnaava? Ullumikkut aamma uagut imminut ima aperisariaqarpugut: ’Upperneq qanoq ittoq uanga uummatinniittoq ’Inuup Ernerata’ nanissavaa?’

16. Uillarneq qanoq ittumik uppersuseqarpa?

¹⁶ Jehovap naapertuilluartumik pineqartitaanut ilaassagutta uillarneq ilaartariaqarparput. Taanna qanoq ittumik uppersuseqarpa? Uppernini ersersippaa ’eqqartuussisup ornittuartarneratigut ima oqarfigalugu: Naapertuilluartumik pineqartinnga.’ Uillarneq angummit naapertuilluanngitsumit naapertuilluartumik pineqartitaajumalluni malartaappoq. Taamatuttaaq ullumikkut Guutip kiffaasa qularissanngilaat Jehovap naapertuilluartumik pineqartikkumaaraatik — immaqa tamatuma pinissaa ilimagisaminnit sivisunerusumik utaqqissagaluarunikkuluunniit. Aamma Guutip neriorsuutaanik upperinninnerput ersersittarparput qasusuilluta qinusarnitsigut — aap, ’ulloq unnuarlu Jehovamik torlorfiginnittarnikkut’. (Lukasi 18:7) Kristumiup naapertuilluartuliortoqarnissaa qinnutigisarunnaarpagu, tamanna Jehovap kiffaminut iluaqutaasumik akuliunnissaanik qularutiginnilersimaneranut ersiutaassaaq.

17. Qasusuilluta qinunissamut ullullu Jehovap eqqartuussiffissaata nalliunnissaanik upperinnittuaannarnissamut sunik pissutissaqarpugut?

¹⁷ Uillarnerup pissutsini immikkut ittuni atugaani erserpoq uagut qasusuilluta qinusarnissatsinnut pissutissaqarnerusugut. Pissutsit taassuma atugaasa uagullu atukkatta assigiinngissutaasa ilaat eqqarsaatigeriakkit. Uillarneq eqqartuussisumut saaffiginneqattaartuarpoq taamaaliornissaminut kajumissaarneqanngikkaluarluni, uagulli Guutip oqaasiani ’qinunitsinni qasusuinnissamut’ kajumissaarneqartuarpugut. (Romamiut 12:12) Uillarnerup qinnutimi eqqartuussisumit tusarneqarnissaa qulakkeersinnaanngilaa, Jehovalli uagut neriorsoqqissaarpaatigut naapertuilluartumik pineqartikkumaarluta. Jehova pruffiitimi ilaat aqqutigalugu ima oqarpoq: „Nalliutiaanngikkaluarpat utaqqiinnarina [ilimagiuaruk, NV], eqquutinngitsoorani piviusunngorumaarmat.“ (Habakkuki 2:3; Tussiaat 97:10) Uillarneq qinnutiminik sunniuteqarlualersitsisinnaasumik imminik qinnussisinnaasumik ikiortissaqanngilaq. Uagulli pissaaneqangaartumik ikiortissaqarpugut, tassa Jiisusi, taannalu ’Guutip talerpiata  tungaani issiavoq qinnullutalu’. (Romamiut 8:34; Hebræerit 7:25) Uillarnerup, imaannaanngitsunik atugaqaraluarluni, eqqartuussisumit naapertuilluartumik pineqartitaanissani neriuutigalugu taanna kimigiiserfigiuarpagu, taava uagut ullup Jehovap eqqartuussiffissaata nalliunnissaanik upperinninnitsinnik attassinerusariaqannginnerpugut!

18. Qinuneq qanoq uppernitsinnut nakussatsissutaasinnaallunilu Jehovap naapertuilluartumik pineqartitaanut ilaanissamut iluaqutigisinnaavarput?

¹⁸ Uillarneq pillugu assersuusiami erserpoq qinuneq uppernerlu imminnut attuumassuteqarluinnartut aamma qasusuilluni qinusarneq uppernitsinnut sanngiillissutaasinnaasumit sunnertinnginnissamut iluaqutigisinnaagipput. Soorunami imaanngilaq takoqqusaaginnarluni qinuneq upperunnaannginnissatsinnut iluaqutaasinnaasoq. (Matthæusi 6:7, 8) Guutimilli pisariaqartitsilluinnarnitsinnik paasinnissimanerput pissutigalugu qinusarutta, qinuneq taassumunnga qaninnerulissutigissallugulu uppernitsinnut nakussatsissutigissavarput. Uppernerlu annaanneqarsinnaanissamut aalajangiisuummat, tupinnanngilaq Jiisusip ajoqersukkami ’qasusuillutik qinuttuinnarnissaannik’ kajumissaarnissaat pisariaqartutut isigimmagu! (Lukasi 18:1; 2 Thessalonikamiut 3:13) Soorunalimi qinnutivut ’Jehovap ullussarsuata’ nalliunnissaanut aalajangiisuunngillat — qinnutigigutsigu qinnutiginngikkaluarutsiguluunniit nalliutissaaq. Uppernerpulli aamma qinnutigisartakkavut naapertorlugit inuunerput tamatta immikkut Jehovap naapertuilluartumik pineqartitaanut ilaanissatsinnut taassumalu sorsunnerani aniguinissatsinnut aalajangiisuulluinnarput.

19. Qanoq ililluta ersersissavarput Guutip ’qinikkaminik naapertuilluartumik pineqartitsiumaarneranik’ upperinnilluinnarluta?

¹⁹ Eqqaaneqareersutut Jiisusi ima aperivoq: „Inuup Ernera tikiukkuni uppernermik nunarsuarmi nassaarumaarnerpa?“ Apeqqummut soqutiginartumut tamatumunnga suna akissutaava? Nuanneqaaq takullugu ullumikkut silarsuaq tamakkerlugu Jehovamut kiffaasut aalajaatsut millionillit qinusarnermikkut, naammagittarnermikkut pinertusaarnermikkullu uppernerminnik taama ittumik ersersitsisut. Taamaammat Jiisusip apeqqutaa angerneqarsinnaavoq. Aap, Saatanip silarsuaani naapertuilluanngitsumik pineqartaraluarluta, upperilluinnarparput Guutip ’qinikkaminik naapertuilluartumik pineqartitsiumaarnera’. (wE 12/15 06)

[Quppernerup ataani ilanngussaq]

Eqqaamavigit?

• Kristumiut ilaasa suut upperunnaassutigaat?

• Sooq ullup Jehovap eqqartuussiffissaata nalliukkumaarnera upperilluinnarsinnaavarput?

• Qasusuilluta qinusarnissatsinnut sunik pissutissaqarpugut?

• Qasusuilluni qinusarneq upperunnaannginnissamut qanoq iluaqutigissavarput?

[Atuaqqissaarnermi apeqqutit]

[Qupp. 24-mi assiliartaq]

Uillarneq eqqartuussisorlu pillugit assersuusiaq sumik ilinniarfigisinnaavarput?

[Qupp. 27-mi assiliartat]

Ullumikkut inuit millionillit qularutiginngilaat Guutip ’qinikkaminik naapertuilluartumik pineqartitsiumaarnera’