Tullermut asanninneq qanoq paasisariaqartoq
Tullermut asanninneq qanoq paasisariaqartoq
„Tullit ilittut asassavat.“ — MATTHÆUSI 22:39.
1. Guutimut asanninnerput qanoq ersersittarparput?
JEHOVAP pallorfiginnitsini qanoq piumaffigai? Jiisusip akissutaa naatsunnguuvoq, paasiuminartuulluni isumalerujusuullunilu: Inassutit annersaat tassaavoq uummatikkut isumakkullu tarnikkullu iluunngarluta nukivullu tamakkerlugit Jehova asassagipput. (Matthæusi 22:37; Markusi 12:30) Soorlu allaaserisap matuma siuliani sammigipput, Guutimik asanninnermut ilaavoq taassuma uagutsinnut asanninneranik akisinerput, taassumunnga naalannitsigut peqqussutaanillu maleruaanitsigut. Guutimik asannittunut taassuma piumasaatut iliorneq artornartuunngilaq. Taamaaliornertik nuannaarutigaat. — Tussiaat 40:9; 1 Johannesi 5:2, 3.
2, 3. Sooq tullitsinnut asanninnissatsinnik peqqussut soqutigisariaqarparput, apeqqutillu suut saqqummerpat?
2 Inatsisit annersaata tullia, Jiisusi naapertorlugu, annersaannut attuumassuteqarpoq imaallunilu: „Tullit ilittut asassavat.“ (Matthæusi 22:39) Peqqussut tamanna maanna sammissavarput — pissutissaqarluarlutalu, nalerpummi namminissarsiorluni, mumingasumik asanninnermik ilisarnaateqarpoq. ’Ullussanik kingullernik’ allaatiginninnermini isumassarsiarititaasumi apustili Paulusi allappoq inuit tullertik asanagu imminut asajumaartut nuannareqalugillu aningaasat aliikkusersornerlu. Amerlasuut „tassaalerumaarput . . . asanniuitsut [ilaquttaminnut pissusissamisoortumik tunniusimassuseqanngitsut, God’s Word]“. (2 Timotheusi 3:1-4) Jiisusip siulittuutigaa ’amerlasuut imminnut killuutigeqattaakkumaartut uumissoqatigiillutillu’ aamma ’asanninneq amerlanerni nillertunngorumaartoq’. — Matthæusi 24:10, 12.
3 Maluginiariarulli Jiisusi oqanngimmat asanninneq inunni tamani nillertunngorumaartoq. Asanninnermik, Jehovap piumasaqaatigisaanik pisassaanillu, ersersitsisoqartuaannarnikuuvoq ersersitsisoqartuaannarumaarlunilu. Jehovamut ilumoorlutik asannittut allanut taassumatut isiginnittaaseqarniarput. Kisiannimi kinaagami tullerput asasassarput? Qanoq tullermut asannittuliortariaqarpugut? Apeqqutit taakku pingaarutillit Biibilimi akissutissarsisinnaavavut.
Kina tulleraara?
4. Israelikkut Mosesimik allakkat pingajui kapitali 19 naapertorlugu kikkut asannittuliorfigisussaavaat?
4 Jiisusip farisiiari akigamiuk inatsisit annersaata tullia tassaasoq tullermik immisut asanninnissamik peqqussut, innersuussutigaa Israelikkunnut peqqussut aalajangersimasoq. Tamanna Mosesimik allakkat pingajui 19:18-imi allassimavoq. Kapitalimi tamatumani Israelikkut peqquneqarput nunaqqatimik saniatigut aamma allat tullermissut isigissagaat. Versit 33 34-lu imaapput: „Takornartamik nunassinni akornassinni najugaqartoqarpat . . . nunaqqatissitut iliorfigisassavat ilittullu asassallugu. Ilissimi nammineq Egyptenimi takornartaasimavusi.“ Tassa aamma juutiunngitsut, ingammik juutit upperisaannut ilanngussimasut, asannittumik pineqartussaapput.
5. Tullermut asanninneq juutit qanoq paasivaat?
5 Jiisusilli nalaani juutit siuttuisa tamanna allamik isumaqarfigaat. Taakkua ilaasa taaguutit ’ikinngut’ aamma ’tulleq’ juutinuinnaq tunngatinneqarsinnaanerarpaat. Juutiunngitsut uumissorneqartussaanerarpaat. Ilinniartitsisut taakkua isummiuppaat Guutimik mianerinnittut guutiitsut nikagisussaagaat. Qinerlerfissiami ima allassimasoqarpoq: „Avatangiisini taamaattuni uumissuineq perlersiarineqarsinnaanngilluinnarpoq. Uumissuineq nerlersorneqangaarpoq.“
6. Jiisusip tullermut asanninneq oqaluuserigamiuk suut marluk ilinniartitsissutigai?
6 Qaqqami oqaluutsimini Jiisusip sammisaq tamanna sammivaa qaammarsaatigalugulu kikkut asannittumik pineqartussaanersut. Oqarpoq: „Tusarparsi oqartoqarsimasoq: ’Tullit asassavat akeqqallu uumissorlugu.’ Uangali oqarfigaassi: Akeqqasi asasigit, ilissinnillu qinuginnittut qinnussigit Ataatassinnut qilanniittumut qitornaaqqullusi; taassumammi seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu.“ (Matthæusi 5:43-45) Uani Jiisusi pingaarutilinnik marlunnik ilinniartitsissuteqarpoq. Siullermik, Jehova tukkortuuvoq inussiarnersuullunilu ajunngitsunullu ajortunullu. Aappassaanillu, uagut taassuma maligassiaa malittussaavarput.
7. Samariamiu naakkinnittoq pillugu assersuusiaq qanoq ilinniarfigaarput?
7 Ilaanni juutip inatsisinik ilisimasup Jiisusi ima aperaa: „Kinami tulleraara?“ Jiisusi akivoq oqaluttuaralugu assersuusiaq Samariamiu juutimik piiaasunit saassunneqartumik piiaaffigineqartumillu nassaarinnittoq pillugu. Naak Samariamiut juutit amerlanersaannit asissugaagaluartut, Samariamiup taassuma angutip ikii mattusersorpai akunnittarfimmullu isumannaatsumukaallugu ajorunnaarniassammat. Suna ilinniarparput? Inoqativuttaaq naggueqatigiinnit, inuiaqatigiinnit uppeqatigiinnilluunniit allaneersut tullitsitut asannittuliorfigisariaqarivut. — Lukasi 10:25, 29, 30, 33-37.
Tullermut asanninneq qanoq paasisariaqartoq
8. Qanoq asannittuliortoqartariaqarnera pillugu qanoq Mosesimik allakkat pingajui kapitali 19-imi allassimasoqarpa?
8 Guutimut asanninneq assigalugu tullermut asanninneq tassaaginnanngilaq misigissuseq. Iliuutsit tamatumunnga ilaapput. Versit allat, Guutip kiffaasa tullerminnik immisut asanninnissaminnik oqaanneqarfigisaasa, Mosesimik allakkat pingajui kapitali 19-imiittut misissornerat ilikkagaqarfiulluassaaq. Tassani atuarneqarsinnaavoq Israelikkut katersukkaminnik pissarseqataatittussaagaat annikilliortut takornartallu nunaminni najugaqartut. Tillinneq, salluliorneq ilumuunngitsuliornerlu inatsisinik unioqqutitsinerupput. Israelikkut kinaassusersiornatik eqqartuussisussaapput. Pisariaqaraangat arlaminnik naqqissuisartussaapput, kisianni tamatumunnga atatiinnarlugu aamma toqqaannartumik ima peqquneqarput: „Qatanngutit uumissussanngilat uummatikkut.“ Peqqussutit tamakku allarpassuillu oqaatsinut ukununnga eqikkarneqarput: „Tullit ilittut asassavat.“ — 3 Mosesi 19:9-11, 15, 17, 18.
9. Sooq Jehovap Israelikkut inuiaqatigiinnit allanit avissaaqqajuaqquai?
9 Israelikkut allanik asannittussaapput aammattaarli guutipilussiortunit avissaaqqajuartussaallutik. Jehova ajortunik ilagisartagaqarnerup navianaatai kingunerisaalu pillugit mianersoqqusivoq. Assersuutigalugu Jehova inuiaqatigiit Israelikkut peersitassaat pillugit ima peqqusivoq: „Aappaninnikkut atassuteqarfigissanngilatit, panitit ernerinut nuliartaaritissanngilatit taakkualuunniit panii erninnut nuliartaaritissanagit, ernitit uannik tunussitinneqaqqunagit guutit allat guutisiorfigilerlugit. Naalanngikkussi [Jehovap] kamaatingaarumaarpaasi.“ — 5 Mosesi 7:3, 4.
10. Suna mianersorfigissavarput?
10 Taamatuttaaq kristumiut uppernerminnik sanngiillisitsisinnaasunik qanittumik attaveqalernissaq mianersorfigaat. (1 Korinthimiut 15:33) Biibilimi ima oqaaqqissaarneqarpugut: „Uppinngitsut [tassa ilagiit kristumiut avataanniittut] qamutinik uniaqatiginiaqinasigik.“ (2 Korinthimiut 6:14) Aammattaaq kristumiut siunnersorneqarput ’Naalakkamiinnaq’ kateqqullugit. (1 Korinthimiut 7:39) Jehovamilli uagutsitut upperinninngitsut nikaginngisaannartariaqarpavut. Kristusi ajortillit pillugit toquvoq, ajortuliortarsimasullu amerlasuut allanngorsimapput Guutimullu saammaannartilersimallutik. — Romamiut 5:8; 1 Korinthimiut 6:9-11.
11. Jehovamut kiffartunngitsut pitsaanerpaamik qanoq asannittuliorfigisinnaavavut, aamma sooq?
11 Jehovamik ilaarsinitsigut Guutimut kiffartunngitsut pitsaanerpaamik asannittuliorfigisinnaavavut. Taassuma guutiitsuliorneq iluarinngilaa, guutiitsulli tamaasa ilumoorfiginnilluni tunniusimaffigai ileqqorisaminnit ajortunit tunussinissamut naassaanngitsumullu inuunissamut periarfissillugit. (Ezekieli 18:23) Jehovap ’tamaasa allamik isumataarnissamut periarfissikkumavai’. (2 Petrusi 3:9) „Taassuma piumasaraa inuit tamalaat annaanneqassasut sallusuissummillu eqqorluartumik ilisarsilissasut“. (1 Timotheusi 2:4, NV) Taamaattuminguna Jiisusip ajoqersukkani oqaluusseqqugai, ilinniartitseqqullugit ’inunnillu inuiannit tamaneersunik ajoqersuganngortitseqqullugit’. (Matthæusi 28:19, 20, NV) Suliamut tamatumunnga peqataanitsigut Guutimut aammattaaq tullitsinnut, uagutsinnut akeraasut allaat ilanngullugit, asanninnermik ersersitsivugut!
Qatanngutitsinnut kristumiunut asanninneq
12. Qatanngummut asanninneq pillugu apustili Johannesi qanoq allappa?
12 Apustili Paulusi allappoq: „Tamanut ajunngitsuliorniarta, pingaartumik uppeqatitsinnut.“ (Galatiamiut 6:10) Kristumiuugatta uppeqatitsinnut — anersaakkut qatanngutitsinnut — asannittuliornissaq pisussaaffigaarput. Asanninneq tamanna qanoq pingaaruteqartigaa? Apustili Johannesi toqqaannartumik ima allappoq: „Kinaluunniit qatanngumminik uumiginnittoq toqutsisuuvoq . . . Ima oqartoq: ’Guuti asavara,’ qatanngunnili uumigalugu, taanna sallutuujuvoq; qatanngunnimi takusimasani asanngikkuniuk Guuti takusimanngisani asasinnaanngilaa.“ (1 Johannesi 3:15; 4:20) Oqaatsit taakku paatsuugassaanngillat. Jiisusip Saatani Diaavulu ’toqutsisumik’ aamma ’sallutuumik’ taavaa. (Johannesi 8:44) Soorunami uagut taamatut taaneqarusunngilagut!
13. Uppeqativut sutigut asannittuliorfigisinnaavavut?
13 Kristumiut ilumoortut ’Guutimit ajoqersorneqarput asaqatigeeqqullugit’. (1 Thessalonikamiut 4:9) ’Oqaasiinnartigut oqaannakkulluunniit pinnata suliatsigulli sallusuinnikkullu asannittuusariaqarpugut’. (1 Johannesi 3:18) Asanninnerput ’pisuusaarnerussanngilaq’. (Romamiut 12:9) Asanninneq kajumississutigaarput inussiarnersuunissatsinnut, misiginneqataasuunissatsinnut, isumakkeerfiginnittuunissatsinnut kamaginnittuunissatsinnullu sinngasuunissamuunngitsoq, usorsitsaartuunissamuunngitsoq anneruniartuunissamuunngitsoq namminissarsiortuunissamuunngitsorlu. (1 Korinthimiut 13:4, 5; Efesosimiut 4:32) ’Kiffartorfigeqatigiinnissatsinnut’ kaammattuutigaarput. (Galatiamiut 5:13) Jiisusip ajoqersukkani asaqatigeeqquai soorlu nammineq taakku asagini. (Johannesi 13:34) Taamaattumik pisariaqarpat kristumiu allaat inuunerminik uppeqatini pillugit pilliuteqariaannaasariaqarpoq.
14. Ilaqutariit iluanni qanoq asannittuliorsinnaavugut?
14 Asanninneq ingammik ilaqutariinni kristumiuni ersersinneqartariaqarpoq, pingaartumik uiusup nuliaasullu akornanni. Aappariinnermikkut ima qanitsigisumik attaveqatigiimmata Paulusi ima allassinnaasimavoq: „Uiusut nuliatik asassavaat namminneq timimittut.“ Ima nangippoq: „Nuliaminik asannittoq imminik asavoq.“ (Efesosimiut 5:28) Versit tallimat tamatuma kingorna Paulusip oqaaqqissaarut tamanna eqqaaqqippaa. Uiusoq nuliaminik asannittoq Malakip nalaani Israelikkut aapparminnik ilumuunngitsuliorfiginninnerattut issanngilaq. (Malaki 2:14) Nuliaminik isumassuissaaq asassallugulu soorlu Missiarsip ilagiit asagai. Asanninninilu kajumississutigalugu nuliaasup uini ataqqissavaa. — Efesosimiut 5:25, 29-33.
15. Qatanngutigiittut asaqatigiinneq iliuutsitigut ersersinneqartoq kajumississutigalugu inuit ilaat qanoq oqarpat aamma qanoq iliorpat?
15 Erseqqippoq asanninneq taamatut ittoq kristumiut ilumoortut ilisarnaatigigaat. Jiisusi ima oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:35) Asaqatigiinnerput inuit allat Guutimut asasatsinnut sinniisuuffigisatsinnullu kajungilissutigaat. Tamanna oqaluttuami tulliuttumi Mocambiquemi ilaqutariinnit Jehovamut nalunaajaasuusunit oqaluttuarineqartumi erserpoq: „Taamaattumik takusimanngisaannarpugut. Ualikkut sualuttumik anorlileriartorpoq, taavalu sialussualerpoq nataqqornalerlunilu. Anoraarsuarnerit illuararput ivikkat kanaartaannik sanaajusoq aserorpaat, qaliarlu zinkiusoq tingippoq. Qatanngutit ilagiinnit qaninnerusuneersut aggermata illuttalu sanaqqinnerani ikiuullutik, eqqaamiuvut tupigutsallutik ima oqarput: ’Upperisarsi ajunngeqaaq. Uagut ilagiitsinnit taamatut ikiorneqanngisaannarpugut.’ Biibili qupperlugu Johannesi 13:34, 35 taakkununnga takutipparput. Maanna eqqaamiutta ilarpassuisa Biibili atuaqqissaartarpaat.“
Inunnut ataasiakkaanut asanninneq
16. Inuit eqimattat inuillu ataasiakkaat asannittuliorfiginissaasa suna assigiinngissutigaat?
16 Inuit eqimattat tullitsitut asannittuliorfiginissaat ajornakusuunngilaq. Inuilli ataasiakkaat asannittuliorfiginissaat allaanerusinnaavoq. Assersuutigalugu inuit ilaasa tullermut asannittuliornissartik killeqartittarpaat ikiuiniaqatigiinnut tapersersuinissaminnut. Aap, tullermik asannilluni oqarneq ajornannginnerungaarpoq suleqammut imminut naammagisumut, sanilimut akaarnaatsumut imaluunniit ikinngummut uagutsinnik pakatsisitsisumut asannittuliornermit.
17, 18. Jiisusi qanoq inunnut ataasiakkaanut asannittuliortarpa, sunalu kajumississutigaa?
17 Inunnut ataasiakkaanut asanninneq pillugu Jiisusi, Guutip pissusiinik naammalluinnartumik ersersitsisoq, ilinniarfigisinnaavarput. Jiisusi silarsuup ajortaa peerniarlugu nunarsuarmukarpoq, aammali inuit ataasiakkaat asannittuliorfigai — assersuutigalugu arnaq napparsimasoq, angut pupissoq meerarlu. (Matthæusi 9:20-22; Markusi 1:40-42; 7:26, 29, 30; Johannesi 1:29) Uaguttaaq inunnut ulluinnarni atassuteqarfigisatsinnut ataasiakkaanut periaatsitsigut tullermut asannittuliortarpugut.
18 Puiunngisaannartariaqarparput tullermut asanninneq Guutimut asanninnermut attuumassuteqarmat. Jiisusi piitsunik ikiuivoq, napparsimasunik ajorunnaarsitsilluni kaattunillu nerisitsilluni, taamaaliornerminulli katersanillu ajoqersuinerminut kajumississutigaa inuit Jehovamut saammaannartilernissaannik ikiuinissamik kissaatini. (2 Korinthimiut 5:19) Jiisusip iliuutsini tamaasa Guutimut ataqqinaataatippai, puiunngisaannarlugulu Guutimut asasaminut sinniisuunini taassuminngalu ilaarsisuunini. (1 Korinthimiut 10:31) Jiisusip maligassiaanik ilaarsinitsigut uaguttaaq ilumoorluta tullermut asannittuliorpugut tamannalu ilutigalugu guutiitsut silarsuaannut ilaanaveersaarluta.
Tullerput immitsitut qanoq asassavarput?
19, 20. Tullerput immisut asassagipput qanoq paasisariaqarpa?
19 Jiisusi ima oqarpoq: „Tullit ilittut asassavat.“ Imminut isumassorneq oqimaaqatigiissumillu imminut ataqqineq pissusissamisoorpoq. Taamaanngippat peqqussut tamanna isumaqarnavianngikkaluarpoq. Imminut asaneq naleqquttoq tamanna tassaanngilaq namminissarsiorneq Paulusip Timotheusimut allagaasa aappaanni 3:2-mi eqqartugaa. Tassaavorli naleqquttumik imminut nalilitut isigineq. Biibilimik ilisimatuup asanninneq tamanna allaatigaa ’imminut asanertut oqimaaqatigiissutut, imminut asanertut imminut pingaartippallaarnertuunngitsutut nikanartinniarpallaarnertuunngitsutullu’.
20 Imminut asanitsitut allanut asanninneq ima paasisariaqarpoq nammineq isigineqarumasarnitsitut allat isigigivut iliorfigineqarumasarnitsitullu allat iliorfigigivut. Jiisusi ima oqarpoq: „Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Maluginiariaruk Jiisusi oqanngitsoq allat uagutsinnut qanga iliuuserisimasaat eqqarsaatigiuassagivut taavalu taamaaqataanik pissagivut. Eqqarsaatigissavarpulli nammineq qanoq pineqarumanerluta, taavalu tamanna naapertorlugu iliussalluta. Aammattaaq maluginiariaruk imaanngitsoq Jiisusip taamaallaat ikinngutivut uppeqativullu pigai. Oqaaseq „inunnut“ atorpaa, immaqa ersersikkumallugu inoqativut tamaasa, naapitavut tamaasa, taamaaliorfigisariaqarivut.
21. Inoqatitsinnut asannittuliornitsigut suna ersersipparput?
21 Tullitsinnut asanninnitta eqqunngitsuliornissatsinnut illersussavaatigut. Apustili Paulusi ima allappoq: „Inassutit uku: ’Allasiussanngilatit, inuassanngilatit, tillissanngilatit, pileritsassanngilatit’ inassutillu allat tamarmik ataatsimut eqinneqarput inassummi matumani: ’Tullit ilittut asassavat.’ Asannittup tullini ajortuliorfigineq ajorpaa.“ (Romamiut 13:9, 10) Asanninneq allat ajunngitsuliorfiginissaannut periarfissarsiornissamut kajumississutigissavarput. Inoqatitsinnik asanninnitsigut ersersipparput aamma inummik imminik assililluni pinngortitsisuusoq, tassa Jehova Guuti, asallugu. — 1 Mosesi 1:26. (wE 12/01 06)
Qanoq akissavit?
• Kikkut asannittuliorfigissavavut, aamma sooq?
• Guutimut kiffartunngitsut qanoq asannittuliorfigisinnaavavut?
• Qatanngutitsinnik asannittariaqarnerput Biibilimi qanoq allaatigineqarpa?
• Tullerput immisut asassagipput qanoq paasisariaqarpa?
[Atuaqqissaarnermi apeqqutit]
[Qupp. 9-mi assiliartaq]
„Kinami tulleraara?“
[Qupp. 12-mi assiliartaq]
Jiisusip aamma inuit ataasiakkaat asavai