Allat Biibilimi ajoqersuutigineqartunik maleruaanissaannut ikiukkit

„Issorissumiittut tassa pitsaasumik ajunngitsumillu uummateqarlutik oqaatsimik tusareerlutik tamatuminnga piginniinnartut pinertusaarlutillu inerititaqartut.“ — LUKASI 8:15, NV.

1, 2. (a) Atuakkap Hvad er det Bibelen virkelig lærer?-ip atuakkiarineqarneranut suna siunertaava? (b) Jehovap innuttami ajoqersuganngortitsiniarlutik ilungersornerat ukiuni kingullerni qanoq pilluaqqusimavaa?

„ATUAGAAVOQ pitsassuaq. Biibilimik atuaqqissaaqatigisartakkama nuannarilluinnarpaat, uangattaaq assut nuannaraara. Atuagaq taanna atorlugu alloriusami Biibilimik atuaqqissaaqateqalertoqarsinnaavoq.“ Jehovap Nalunaajaasuisa ilaat piffissaq tamaat oqaluussisartoq atuagaq Hvad er det Bibelen virkelig lærer? * pillugu taama oqarpoq. Aamma oqaluussisartoq utoqqaq atuagaq taanna eqqarsaatigalugu ima oqarpoq: „Ukiuni 50-ini oqaluussininni Jehovamik ilisarisimannilernissamut inuppassuarnik ikiuineq immikkut pisinnaatitaaffigigaluarlugu oqartariaqarpunga atuagaq taanna nalissaqanngitsuusoq. Assitai assersuutitaalu isumassarsinartut nuannareqaakka.“ Atuakkamut Biibilimik atuaqqissaaqatigiissutissamut nutaamut tunngatillugu aamma illit taamatut misigivit? Taanna atuakkiarineqarpoq Jiisusip peqqussutaanik matuminnga illit naalannissannut iluaqutissatut: „Taamaattumik aallaritsi inunnillu inuiannit tamaneersunik ajoqersuganngortitsigitsi . . . ajoqersorsigit ilissinnut peqqussutikka tamaasa maleruaqqullugit.“ — Matthæusi 28:19, 20, NV.

² Qularutissaanngitsumik Jehovap uummataa nuannaartarpoq takugaangamigit kiffani nunarsuarmiittut, 6,6 millionit missiliorlugit amerlassuseqartut, Jiisusip ajoqersuganngortitsiortoqqusissutaanut kajumillutik naalattut. (Ussatit 27:11) Erseqqippoq suliniarnerat Jehovap pilluaqqusaraa. Assersuutigalugu 2005-imi nutaarsiassaq nuannersoq nunani 235-ni oqaluussissutigineqarpoq, agguaqatigiissillugulu 6.061.500-t Biibilimik atuaqqissaaqatigineqarsimapput. Tamatuma kingunerisaanik inuppassuit Guutip oqaasia tusarpaat, tamannalu ’inuit oqaasiattut ilassinngilaat, kisianni pissusiviatut, tassa Guutip oqaasiatut’. (1 Thessalonikamiut 2:13) Ukiut marluk kingulliit ingerlaneranni ajoqersuganngorlaat millionit affaat sinnillit Jehovap najoqqutassiai malillugit inuulersimapput taassumunngalu tunniulluinnarsimallutik.

3. Allaaserisami matumani atuagaq Biibilimik atuaqqissaaqatigiissutissaq nutaaq pillugu apeqqutit suut sammissavavut?

³ Illit Biibilimik atuaqqissaaqateqarnerup nuannersua misigeqqammerpiuk? Silarsuaq tamakkerlugu suli inuppassuaqarpoq ’pitsaasumik ajunngitsumillu  uummateqartunik’ oqaatsimik tusareerlutik tamatuminnga ’piginniinnarumasunik pinertusaarlutillu inerititaqarumasunik’. (Lukasi 8:11-15, NV) Misissoriartigu ajoqersuganngortitsiortornermi atuagaq Biibilimik atuaqqissaaqatigiissutissaq nutaaq qanoq atorsinnaanerit. Apeqqutit pingasut uku sammissavavut: (1) Qanoq ilillutit Biibilimik atuaqqissaaqateqartalersinnaavit? (2) Ilinniartitseriaatsit suut sunniuteqarluarnerpaasarpat? (3) Ilinniartoq nammineq Guutip oqaasianik, Biibilimik, atuaqqissaartalernissaanut allanillu ilinniartitsisalersinnaanissaanut illit qanoq ikiorsinnaaviuk?

Qanoq ilillutit Biibilimik atuaqqissaaqateqartalersinnaasutit

4. Sooq inuit ilaat Biibilimik atuaqqissaarnissamut akuersinissaminnut nangaasinnaappat, aamma qanoq ilillutit kajuminnerulersissinnaavigit?

⁴ Qinnuigineqaruit kuuk ikaarlugu pisseqqullutit imaassinnaavoq pinaasertutit. Tummarfigineqarsinnaasunilli imminnut ungasippallaanngitsunik ujaraqartuuppat, qularnanngitsumik kuup ikaariarnissaa qunuginnginnerussagaluarpat. Taamatuttaaq inuk ulapittoq immaqa Biibilimik atuaqqissaarnissamut akuersinissaminut nangaassaaq. Immaqa isumaqarpoq piffissartornarpallaassallunilu ilungersunarpallaassasoq. Qanoq ilillutit kajuminnerulersissinnaaviuk? Sivikitsumik paasissutissaalluartumillu oqaloqatigisarneratigut atuagaq Hvad er det Bibelen virkelig lærer? atorlugu. Taamatut oqaloqatigiittarneq naggataatigut aalajangersimasumik Biibilimik atuaqqissaaqateqalernermik kinguneqarsinnaavoq. Piareersarluartaruit pulaaqqiinitit tamarmik ujaqqatut tummarfissatut issapput pulaakkap Jehovamut qaninnerulernissaanut iluaqutaasut.

5. Sooq atuagaq Biibilimik atuaqqissaaqatigiissutissaq nutaaq nammineq atuartariaqarpiuk?

⁵ Allalli Hvad er det Bibelen virkelig lærer?-mik iluaqutiginninnissaannut ikiorsinnaajumallugit atuagaq taanna illit nammineq nalunngilluartariaqarpat. Atuagaq tamaat atuarnikuuiuk? Aappariit feeriarlutik atuagaq taanna nassarpaat sissamilu eqqissisimaartillutik atuartarlugu. Arnap takornarianut tuniniaasartup aappariit taakku qanilligamigit atuakkap qulequtaa malugaa: Hvad er det Bibelen virkelig lærer? Taassuma aappariit oqaluttuuppai nalunaaquttap-akunneri arlaqanngitsut tamatuma siorna Guuti qinnuigisimallugu apeqqut taannarpiaq akeqqullugu. Aappariit arnaq taanna atuakkamik taamaattumik nuannaarlutik tunivaat. Atuakkap, immaqa aappassaanik, soorlu utaqqininni imaluunniit suliffinni atuarfimmiluunniit pauserninni, atuarnissaanut ’piffissamik pisinikuuit’? (Efesosimiut 5:15, 16, NV) Taamaaliortaruit atuagaq nalunngilluarnerulissavat immaqalu allat taanna pillugu oqaloqatiginissaannut periarfissarsiorsinnaalissallutit.

6, 7. Atuagaq Hvad er det Bibelen virkelig lærer? iluaqutigalugu qanoq ilillutit atuaqqissaaqateqalersinnaavit?

⁶ Atuagaq oqaluussinermi neqeroorutigigaangakku, assitai, allassimaffiit apeqqutillu qupperneq 4-6-imiittut atorluartakkit. Assersuutigalugu oqaloqateqarniarlutit ima aallarniisinnaavutit: „Ullumikkut inuiaat ajornartorsiuterpassuaqarput. Sumi tutsuiginartunik siunnersortissarsiortoqarsinnaava? Illit qanoq isumaqarpit?“ Pulaakkavit akissutaa tusarnaarluareerukku Timotheusimut allakkat aappaat 3:16, 17 atuarsinnaavat nassuiarlugulu inuiaat ajornartorsiutaannut aaqqiissutissavik Biibilimi allassimasoq. Taava qupperneq 4 aamma 5 pulaakkannut takutikkit imalu aperalutit:  „Ajornartorsiut quppernerni ukunani takutinneqartoq sorleq illit isumakuluutiginerpaaviuk?“ Pulaakkap taakkua ilaat tikkuarpagu, atuagaq tigummitissinnaavat allassimaffiup tikkuagaanut tunngasup illit Biibilinni atuarnerani. Taava qupperneq 6 atuarsinnaavat imalu aperalutit: „Apeqqutit arfinillit ukua quppernerup matuma ataatungaaniittut ilaat sorleq illit akineqartikkusussagaluarpiuk?“ Apeqqutit ilaat tikkuarpagu kapitali apeqqummut tamatumunnga akissutaasoq takutissinnaavat. Tamatuma kingorna atuagaq tunniussinnaavat apeqqutillu oqaloqatigiissutiginissaanut aggeqqinnissannik isumaqatigalugu.

⁷ Taamatut saqqummiussineq minutsit tallimat missiliorlugit sivisussuseqarpoq. Minutsialunnguilli taakkua ingerlaneranni pulaakkavit suna isumakuluutigineraa paasissavat. Allassimaffiit marluk atuassavatit takutillugulu qanoq atorsinnaanerai pulaaqqiinissannullu tunngaviliillutit. Pulaakkat oqaloqatigilaarpat, imaalluarsinnaavorlu pulaakkat qangarsuarli taama qiimmaallannartigisumik tuppallernartigisumillu oqaloqatigineqarsimasoq. Tamatuma kingunerisaanik ulapikkaluartulluunniit minutsialunni oqaloqatiginissat qularnanngitsumik qilanaarissavaa. Taava immaqa ikiorsinnaassavat ’inuussummut aqqutaasumut’ piniarluni iliuuserisassami tulliuttup iliuuserinissaanut. (Matthæusi 7:14) Pulaagaq soqutiginninnerujartortillugu sivisunerusumik atuaqatigiittoqartalersinnaavoq. Assersuutigalugu siunnersuutigisinnaavat piffissami isumaqatigiissutigisimasassinni ingillusi atuaqatigiinnissarsi.

Ilinniartitseriaatsit pitsaanerpaat

8, 9. (a) Biibilimik atuaqqissaaqatigisartakkat misilinneqarnerit qanorluunniit ittut naammagalugit atornissaannut qanoq ilillutit piareersarsinnaaviuk? (b) Atortussat ikuallajanngitsut upperluarnermik ineriartortitsisussat sumi nassaassaappat?

⁸ Ilinniartoq Biibilimi ajoqersuutigineqartunik maleruaaleraangami qularnanngitsumik siumukarnissaminut akornutaasinnaasunik misilinneqartassaaq. Apustili Paulusi ima allappoq: „Guuti mianeralugu Kristusi-Jiisusimi inuujumasut tamarmik qinugineqartarput.“ (2 Timotheusi 3:12) Paulusip taamatut misilinneqarnerit innermut illuliornermi atortussanik pitsaanngitsunik aseruisussamut, atortussanilli soorlu kuultimik, sølvimik ujaqqanillu erlinnartunik ajoqusiisinnaanngitsumut, assersuuppai. (1 Korinthimiut 3:10-13; 1 Petrusi 1:6, 7) Ilinniartoq misilinneqarnerit qanorluunniit ittut naammagalugit atornissaannut pissuserineqartariaqartunik ineriartortitsinissamut ikiorniarlugu, atortussat ikuallajanngitsut atorlugit sanasariaqarputit.

⁹ Tussiaasiortup ’Jehovap oqaasii’ ’sølvimut akuiakkamut, nunap iluani arfineq-marloriarluni sukuluiakkamut’ assersuuppai. (Tussiaat 12:7) Aap, ’atortussat erlinnartut’ tamarmik upperluarnermik ineriartortitsinissamut atorneqarsinnaasut Biibilimiipput. (Tussiaat 19:8-12; Ussatit 2:1-6) Atuakkamilu nutaami ersersinneqarpoq Biibili qanoq atorluarsinnaanerit.

10. Qanoq ilillutit Biibilimi allassimasut ilinniartumut malugeqqusinnaavigit?

¹⁰ Atuaqqissaaqatigiikkaangassi allassimaffiit kapitalimi sammisassinniittut ilinniartumut malugeqqusakkit. Aperisarit ilinniartoq allassimaffinnik pingaarnernik paasinninnissaanut taakkuninngalu inuunermini atuinissaanut ikiorniarlugu. Oqarfiginaveersaaruk qanoq iliussanersoq. Jiisusip maligassiaa maliguk. Allakkanik ilisimasup aperimmani, Jiisusi ima akivoq: „Inatsisini qanoq allassimava? Suut taakkunani atuarpigit?“ Angut Allakkanit issuaavoq, Jiisusillu taanna ikiorpaa najoqqutassiamik tassani allassimasumik inuunermini qanoq atuisinnaanerminik paasinninnissaanut. Jiisusip aamma assersuusiaq atorpaa allassimaffiup tamatuma taassuma inuuneranut qanoq sunniuteqartariaqarneranik taanna paasitinniarlugu. (Lukasi 10:25-37) Atuagaq Hvad er det Bibelen virkelig lærer? assersuutinik paasiuminartunik ilinniartoq najoqqutassianik Biibilimeersunik inuunermini atuinissaanut ikiorniarlugu atorsinnaasannik ulikkaarpoq.

11. Sammisassat qanoq takitigisukkuutaarlugit sammineqartassappat?

¹¹ Atuakkami tamatumani Guutip oqaasia nassuiarniarlugu oqaatsit paasiuminarlutillu toqqaannartut atorneqarput, soorluttaaq Jiisusip paasiuminaatsut paasiuminartumik nassuiartarai. (Matthæusi 7:28, 29) Jiisusip maligassiaa maliguk. Paasiuminartumik, erseqqissumik eqqorluartumillu ilinniartitsigit. Sammisassasi sukkavallaamik sammeqinasigit. Ilinniartup piginnaaneri pissutsillu atugai immikkoortut atuaqqissaagassassi qassiusassanerannut aalajangiisuutikkit. Jiisusip ajoqersukkami pisinnaasaasa killeqarnerat eqqarsaatigisaramiuk paasissutissanik tamatuma nalaani  pisariaqartitaannit amerlanerusunik artukkersortanngilai. — Johannesi 16:12.

12. Tapiliussat qanoq atorneqassappat?

¹² Atuagaq Biibilimik atuaqqissaaqatigiissutissaq nutaaq tapiliussartaqarpoq, sammisassallu 14-iupput. Ilinniartup pisariaqartitai naapertorlugit illit ilinniartitsisutut tapiliussat qanoq ilillutit pitsaanerpaamik atorsinnaanerlugit aalajangertariaqarpat. Assersuutigalugu ilinniartoq siornatigut upperisimasani pissutigalugit paasiuminaatsitaqarpat immikkulluunniit ittunik apeqquteqarpat, paasiuminaatsitaanut apeqqutaanulluunniit tunngasup tapiliussamiittup innersuunnera naammassinnaavoq taassumunngalu nammineq atuartillugu. Aamma imaassinnaavoq pitsaanerussasoq marluullusi misissorussiuk. Tapiliussami sammineqarput Biibilimut tunngasut pingaarutillit, soorlu „Oqaatsit ’tarnip’ aamma ’anersaap’ isumaviat“ aamma „’Babylonersuup’ suunera paasineqarpoq“. Immaqa ilinniartitallu taakku oqaloqatigiissutiginissaat pitsaassaaq. Tapiliussat apeqqutitaqanngimmata tassani allassimasut nalunngilluartariaqarpatit, illit nammineq isumaqarluartunik aperisarsinnaaniassagavit.

13. Uppernermik nakussatsitsinissaq eqqarsaatigalugu qinuneq qanoq pingaaruteqarpa?

¹³ Tussiaat 127:1-imi ima allassimavoq: „[Jehovap] illu qarmanngippagu illuliortut sulilussinnassapput.“ Taamaattumik Biibilimik atuaqqissaaqateqarnissannut piareersaraangavit Jehova qinnuigisariaqarpat ikioqqullutit. Atuannginnermi atuareernermilu qinnutitit Jehovamut asannittumik attaveqarninnut ersiutaatikkit. Ilinniartoq kajumissaaruk Jehova qinnuigeqqullugu oqaasiata paasinissaanut ilisimassusermik oqaasiatalu maleruarnissaanut nakussatsinneqarnissamik. (Jaaku 1:5) Taamaalioruni misilinneqarnerit akiornissaannut upperluarnermillu ineriartortitsiuarnissaminut nakussatsinneqassaaq.

Biibilimik atuaqqissaartut allanik ilinniartitsinissaannut ikiukkit

14. Biibilimik atuaqqissaaqatigisartakkavut susinnaanngortariaqarpat?

¹⁴ Ilinniartitatta Jiisusip ajoqersukkaminut peqqussutai „tamaasa“ naalassappatigit, Guutip oqaasianik namminneq atuaqqissaartarnissaat naammanngilaq. Aamma anersaakkut siumukartariaqarput allanik ilinniartitsisinnaaniassagamik. (Matthæusi 28:19, 20; Apustilit Suliaat 1:6-8) Ilinniartoq taamatut siumukarnissaanut illit qanoq ilillutit ikiorsinnaaviuk?

15. Sooq ilinniartitat ataatsimiigiartarnissaanut kajumissaartariaqarpiuk?

¹⁵ Ilinniartoq atuaqatigeeqqaarnissinniilli ataatsimiigiaqatiserisaruk. Nassuiaaguk illit ataatsimiinnerni Guutip oqaasianik ilinniartitsissutiginninneq ilinniartarlugu. Sapaatip-akunnialuisa ingerlaneranni Biibilimik atuaqqissaaqatigiinnissi naammassingajalerneri tamaasa minutsialunni oqaluttuuttarsinnaavat ataatsimiinnitsinni ataatsimeersuarnitsinnilu anersaakkut ilinniartinneqartarnitsinnik. Taakkua illit qanoq iluaqutigitiginerlugit angorniorlutit eqqartoruk. (Hebræerit 10:24, 25) Ilinniartoq ataatsimiinnernut aalajangersimasumik najuuttaleruni Guutip oqaasianik ilinniartitsissutiginnissinnaanngornissaa ilimanarluinnarpoq.

16, 17. Ilinniartup anguniagarisinnaasai pitsaasut suuppat?

¹⁶ Ilinniartoq angusinnaasaminik imminut anguniagassinnissaanut ikioruk. Assersuutigalugu kajumissaarsinnaavat ilikkakkaminik ikinngutini ilaquttaniluunniit oqaluttuuteqqullugu. Aamma Biibilip tamakkerlugu atuarnissaanut imminut anguniagasseqqullugu siunnersorsinnaavat. Biibilimik atuartarnermik ileqquliussinissaanut ikiorukku, kuisinnermi kingunerujussuanut tamanna iluaqutigissavaa. Aamma soormi siunnersorukku allassimaffik, atuakkami Hvad er det Bibelen virkelig lærer?-imi kapitalini tamani apeqqutinut  pingaarnernut akissutaasut ilaat, minnerpaamik ataaseq eqqaamaqqullugu? Taamaaliornermigut ’sulisunngussaaq kanngusuutissaqanngitsoq, oqaatsimik sallusuissutaasumik eqqortumik atuisoq’. — 2 Timotheusi 2:15, NV.

¹⁷ Ilinniartoq allassimaffinnik alanngaarinissaanik pingaarnersiuinissaanilluunniit ilinniartiinnarnagu, kajumissaaruk uppernini pillugu apeqqutinik akisissagaangami allassimaffinnik qanoq atuisinnaanerminik nassuiaaqqullugu. Sungiusaqatiginera iluaqutaasinnaavoq. Immaqa illit ilaqutaasuusaarlutilluunniit suleqataasuusaarsinnaavutit qanoq upperisaqarneranik paasisaqarusuttoq. Ilinniartup qanoq iliorniarnerluni takutereerpagu illit oqaluttuutissavat ’saamalluni ataqqinnilluinnarlunilu’ qanoq akisoqartarnersoq. — 1 Petrusi 3:15, NV.

18. Ilinniartoq oqaluussisartunngorpat kuisimanngitsoq qanoq ilillutit aamma ikiorsinnaaviuk?

¹⁸ Piffissap ingerlanerani immaqa ilinniartoq oqaluusseqataanissamut piukkunnarsissaaq. Erseqqissaruk suliami tamatumani peqataasinnaatitaaneq immikkut pisinnaatitaaffiusoq. (2 Korinthimiut 4:1, 7) Utoqqaanertat aalajangereerpassuk ilinniartoq oqaluussisartunngorsinnaasoq kuisimanngitsoq, ajornanngitsumik saqqummiussinissamut piareersarnissaanut ikiortariaqarpat. Tamatuma kingorna angalaaqatigisariaqarpat. Oqaluusseriaatsit assigiinngitsut atorlugit aalajangersimasumik suleqatigiuartaruk, ilinniartillugulu sunniuteqarluartumik pulaaqqiinissaminut piareersartarnissaanik. Illit nammineq maligassiuilluarnerit taassumunnga sunniuteqarluassaaq. — Lukasi 6:40.

’Imminut annaassinnaavutit tusartitillu annatsissinnaallugit’

19, 20. Suna anguniagarisariaqarparput, aamma sooq?

¹⁹ Qularnanngilaq allap ’sallusuissummik eqqorluartumik ilisimasaqalernissaanut’ ikiuiniarluni assut iliuuseqarnissaq pisariaqartoq. (1 Timotheusi 2:4, NV) Inuunermili ikittuinnaapput Biibilimi ajoqersuutigineqartunik maleruaanissamut allamik ikiuinerup nuannaarutissiisarnerata taamaaqataanik nuannaarutissiisartut. (1 Thessalonikamiut 2:19, 20) Aap, silarsuaq tamakkerlugu ilinniartitsinermi tamatumani ’Guutimut suleqataanerput’ immikkut pisinnaatitaaffiuvoq angingaartoq! — 1 Korinthimiut 3:9.

²⁰ Jiisusi Kristusi ingilillu pissaaneqangaartut ikiortigalugit Jehovap qanittukkut ’Naalakkamik Jiisusimik iivangkiiliumut naalakkumanngitsut’ iluarisaanngitsutut eqqartuutissavai. (2 Thessalonikamiut 1:6-8) Inuit inuunerat pineqarpoq. Atuagaq Hvad er det Bibelen virkelig lærer? atorlugu minnerpaamik ataatsimik Biibilimik atuaqqissaaqateqartalernissat anguniagarisinnaaviuk? Suliami tamatumani suleqataaguit ’imminut annaannissannut tusartivillu annatsinnissaannut’ periarfissaqassaatit. (1 Timotheusi 4:16) Inunnik allanik Biibilimi ajoqersuutigineqartunik maleruaanissamut ikiuinissaq maanna aatsaat taama pingaaruteqartigaaq. (wE 1/15 07)

[Quppernerup ataani ilanngussaq]

Suna ilikkarpiuk?

• Atuakkap Hvad er det Bibelen virkelig lærer-ip atuakkiarineqarneranut suna siunertaava?

• Atuagaq taanna iluaqutigalugu qanoq ilillutit Biibilimik atuaqqissaaqateqartalersinnaavit?

• Ilinniartitseriaatsit sunniuteqarluarnerpaat suuppat?

• Ilinniartoq allanik Guutip oqaasianik ilinniartitsinissaanut qanoq ikiorsinnaaviuk?

[Atuaqqissaarnermi apeqqutit]

[Qupp. 28-mi assiliartaq]

Atuagaq una atorluartarpiuk?

[Qupp. 29-mi assiliartaq]

Oqaloqatigiilaarneq Biibili pillugu ilisimasaqarnissamut kajuminnerulissutaasinnaavoq

[Qupp. 31-mi assiliartaq]

Biibilimi allassimasut ilinniartumut malugeqquniarlugit qanoq iliorsinnaavit?

[Qupp. 32-mi assiliartaq]

Ilinniartoq siumukarnissaanut ikioruk