Biibili killiliivallaarpa?

„MEERAALLUNGA Biibilimi najoqqutassianik ilinniartitaanngilanga. Allaammi Guuti eqqaaneqanngisaannarpoq,“ Finlandimi angut inuusuttoq oqaluttuarpoq. Taamatut perorsagaaneq ullumikkut qaqutigoortuunngilaq. Inuppassuit, ingammik inuusuttut, isumaqarput Biibili qanganisaavallaarujussuartoq, siunnersuutillu tassaniittut killiliivallaartut. Biibilimik malinnikkumasut naqisimaneqartutut, inerteqqutinik peqqussutinillu nanertorneqarlutik inuusutut isigineqartarput. Taamaattumik inuppassuit isumaqarput Biibili ilisivimmiitiinnartariaqartoq allamullu siunnersortissarsiortoqartariaqartoq.

Biibilimik taamatut isiginnittaaseqartoqarneranut pissutaanerpaavoq kristumiuuneraqatigiit ilagiivi oqaluttuarisaanerup ingerlanerani inunnik naqisimannittarnerat. Assersuutigalugu oqaluttuarisaanermik ilisimatuut ukiunik akullernik taartunik taasaanni ilagiit katuullit inuit inuunerannut tunngasut tamangajaasa aqunniarsarisimavaat. Kinaluunniit sapiiserluni ilagiinnik isumaqatiginninngitsoq naalliutsitaariaannaavoq toqutaariaannaalluniluunniit. Upperisarsioqatigiit naaggaartut, kingusinnerusukkut pilersut, aamma inummut namminermut tunngasunik killilersuipput. Ullumikkut taaguutit soorlu „calvinikkuusoq“ imaluunniit „puritaneri“ eqqaaneqaraangat upperisarsiortunut aalajangersimasunut ilaasortaasut eqqarsaatigineqaannaratik, aammali taamatut upperisalinnut tunngatillugu ilinniartitaaneq sukannersoq eqqarsaatigineqartarpoq. Ukiut ingerlaneranni upperisarsioqatigiit naqisimanninnerat pissutigalugu inuit kukkullutik isummertarput Biibilimi ajoqersuutit aamma naqisimannittuusut.

Ukiuni hundredelikkuutaani kingullerni, nunat ilaanni, upperisarsioqatigiit inunnut sunniuteqarunnaarsimapput. Inuppassuit upperisarsioqatigiit nalinginnaasumik ajoqersuutaannik iluarinnikkunnarnerisa kingorna, isumaqartoqalersimavoq suut eqqortuunerannik suullu eqqunngitsuunerannik inuit namminneq aalajangiisussaatitaasut. Qanoq kinguneqartumik? Ahti Laitinen, kriminologiimi retssociologiimilu professoriusoq, ima oqarpoq: „Oqartussaasunik ataqqinninneq millisimavoq, suullu akuerineqarsinnaaneranik aamma suup akuerineqarsinnaannginneranik inuit paasinnittaasiat ersernerlussiartuinnarpoq.“ Allaat, killormut sammisutut ittumik, upperisarsioqatigiit siuttui isummamut tamatumunnga nakkaannarsimapput. Biskoppi lutherikkuusoq nuimasoq ima oqarpoq: „Ileqqussanut tunngasut Biibilimi upperisarsiornikkulluunniit oqartussaasuni siunnersuutissarsiornikkut aalajangiiffigineqarsinnaanerat isumaqatigilluanngilara.“

Killeqanngitsumik kiffaanngissuseqarneq kissaatiginarpa?

Killeqanngitsumik kiffaanngissuseqarnermik eqqarsaat kajungernarsinnaavoq, ingammik inuusuttunit. Nammineersinnaajunnaartitaanermik imaluunniit susinnaanermik susinnaannginnermillu malittarisassarpassuaqarnermik nuannarisallit amerlanngillat. Kikkulli tamarmik iluarisamittut iliornissamut kiffaanngissuseqartariaqarpat?  Apeqqut taanna akitinnagu assersuut tulliuttoq eqqarsaatigiuk. Takorlooruk illoqarfik angallannermut inatsiseqanngitsoq. Biilersinnaanermut allagartaqartariaqanngilaq misilitsittoqartariaqarnaniluunniit. Inuit piumasamittut biilersinnaapput, aamma aalakooraluarunik, sukkassusissallu killiligaanera, angallannermilu allagartat qulliillu assiinngitsut pisuinnaalluunniit ikaarfissaat eqqarsaatiginagit. „Kiffaanngissuseq“ taamaattoq kissaatiginassava? Naamerluinnaq. Ularussineq, uiverneq ajunaarnersuillu kingunerissagaluarpai. Angallannermut inatsisit inuit kiffaanngissusiannik killiliigaluartut biilertut pisuinnaallu illersuutigaat.

Tamatumunnga assingusumik Jehovap qanoq inuusariaqarnitsinnik siunnersorpaatigut, uagutsinnut iluaqutaasumik. Taamaaliunngippat misileraasariaqassagaluarpugut, taamaalillutalu immaqa imminut allanillu ajoqusiilluta. Ileqqussatigut taamatut inatsisaanneq illoqarfimmi angallannermut inatsiseqarfiunngitsumi angalanertulli navianartigalunilu kissaatiginanngitsigissaaq. Ilumoortoq unaavoq najoqqutassiat inatsisillu pisariaqartippavut. Inuit amerlanersaasa tamanna nassuerutigaat.

’Nammakkiussara oqeqaaq’

Angallannermut inatsisit aalajangersakkanik amerlasoorpassuarnik immikkuualuttorpassuarnillu ilaqarsinnaapput — nunat ilaanni biilinik inissiinermut najoqqutasiaannaat amerlasoorparujussuupput. Tamatumunnga allaanerulluinnartumik Biibilimi malittarisassarpassuaqarnani, najoqqutassiaqarpoq tunngaviusunik artornartuunatillu naqisimannittuunngitsunik. Jiisusi Kristusip inuit nalimini inuusut asannittumik ima kajumissaarpai: „Ornissinga tamassi suleruluttusi nanertugaasusilu, qasuertissavassi [nukissaqalerseqqissavassi, NV]. Nammaatarami iluaqaaq, nammakkiussaralu oqeqaluni.“ (Matthæusi 11:28, 30) Apustili Paulusi Korinthimi ilagiinnut kristumiunut ima allappoq: „[Jehovap] Anersaavata najuuffigisaaniippoq kiffaanngissuseq.“ — 2 Korinthimiut 3:17.

Kiffaanngissuserli taanna killeqanngitsuunngilaq. Jiisusip erseqqissarpaa Guutip piumasaqaatai paasiuminartunik inassutitaqartut. Assersuutigalugu Jiisusip ajoqersukkani ima oqarfigai: „Inassutiga tassa asaqatigiissasusi, soorlu uanga ilissi asagissi.“ (Johannesi 15:12) Inassut taanna inunnit tamanit malinneqaraluarpat inuuneq qanoq issagaluarpa! Tassa kristumiut kiffaanngissusiat killeqanngitsuunngilaq. Apustili Petrusi ima allappoq: „Kiffaanngitsuuvusi, tamannalu iluaatsuliornermut isertuiniutigissanngilarsi, Guutilli kiffaasut atussavarsi.“ — 1 Petrusi 2:16.

Kristumiut inatsisinik immikkuualuttorpassualinnik maleruaasussaanngikkaluarlutik, suup eqqortuunera suullu eqqunngitsuunera pillugu namminneq isumartik malinngilaat. Guutip kisimi siunnersuutigisinnaasaannik inuit siunnersorneqarnissartik pisariaqartippaat. Biibilimi toqqaannartumik ima allassimavoq: „Ingerlasup alloriartarnini aqussinnaanngilai.“ (Jeremia 10:23, NV) Guutip siunnersuutai malikkutsigik iluaqutigingaassavavut. — Tussiaat 19:12.

Angusattta ilagissavaat nuannaarneq. Angut inuusuttoq, allaaserisap matuma aallaqqaataani eqqaaneqartoq, siornatigut tillittartuullunilu sallusartuullunilu kinguaassiuutitigut inuunerluttuuvoq. Biibilimili najoqqutassiat qutsissut  ilikkaramigit taakkununnga naapertuuttumik inooriaaseqalerpoq. Ima oqarpoq: „Naak ingerlaannaq Biibilimi najoqqutassiat tamaasa maleruarsinnaanngikkaluarlugit, paasivara iluaqutaangaartut. Siornatigut inooriaaserisannut sanilliullugu maannakkut pilluarneroqaanga. Biibilimi najoqqutassiat malillugit inuugaanni inuuneq pisariinnerusarpoq. Inuuninni sumut ingerlanerlutit, suullu eqqortuunera aamma suup eqqunngitsuunera nalunngilatit.“

Inuit millionilikkuutaat assingusumik misigisaqarsimapput. Biibilimi siunnersuutinik maleruaanermikkut ilaatigut inunnut allanut pitsaanerusumik attaveqalersimapput, suliffik pillugu oqimaaqatigiissumik isiginnittaaseqalersimapput ileqqunillu ajoqutaasunik taamaatitsisimallutik. Taamaalillutillu pilluarnerulersimapput. Markusip, * angutip inuusuttup Biibilimi najoqqutassianut naapertuuttumik naapertuutinngitsumillu inuusimasup, inuunini pillugu ima oqarpoq: „Biibili malillugu inuunikkut imminut ataqqinerulerpunga.“ *

Suna qinerpiuk?

Oqarsinnaavugut Biibili killilersuisoq? Aap, killiliivoq — tamatsinnut iluaqutaasumik. Killilersuivallaarpali? Tassunga naameertariaqarpugut. Killeqanngitsumik kiffaanngissuseqarneq ajornartorsiortitsiinnartarpoq. Biibilimi najoqqutassiat oqimaaqatigiissuupput, aamma nuannaarnerulissutigalutigillu pilluarnerulissutigaavut. Markus ima oqarpoq: „Piffissap ingerlanerani paasivara inuunermi Guutip oqaasianik maleruaaneq qanoq silatusaarnerutigisoq. Inuunera amerlasuutigut inuit inuunerannit allaanerugaluartoq eqqarsalinngisaannarpunga inuunermi pingaarutilimmik annaasaqarlunga.“

Biibilimi najoqqutassianut naapertuuttumik inuunerup qanoq iluaqutaatiginera misigisalerukku Guutip oqaasia pingaartinnerulissavat. Suli pilluarnarnerusumik kinguneqassaaq — Biibilimik atuakkiortoq, Jehova Guuti, asalissavat. „Guutimut asanninneq tassaavoq inassutai maleruaratsigit, inassutaalu artornartuunngillat.“ — 1 Johannesi 5:3.

Jehova Pinngortitsisigaarput Ataatagalutigulu qilammiusoq. Uagutsinnut suna pitsaanerunersoq nalunngilaa. Guutip killilersorujussuanngilaatigut, asannittumilli iluaqutaasumillu siunnersorpaatigut. Taalliortorpalaartumik Jehovap tamatta ima kajumissaarpaatigut: „Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ — Esaja 48:18. (wE 10/1 06)

[Quppernerup ataani ilanngussa]

[Qupp. 9-mi assiliartaq]

Jiisusi oqarpoq Guutip piumasaqaatai nukissaqalersitsisartut

[Qupp. 10-mi assiliartaq]

Guutip siunnersuutaanut naalanneq pilluarnermik imminullu ataqqinermik kinguneqartarpoq