Biibilimi sorpiaat ajoqersuutigineqarnerannik allat ilinniartikkit

„Inunnit inuiannit tamaneersunik ajoqersuganngortitsigitsi . . . ajoqersorsigillu.“ — MATTHÆUSI 28:19, 20, NV.

1. Biibili qanoq siaruarsimatigaa?

JEHOVAP OQAASIA, Biibili, atuagaavoq silarsuarmi pisoqaanerpaat siaruarsimanerpaallu ilaat. Oqaatsinut 2300-nit amerlanerusunut nutserneqarsimavoq tamakkerlugu imaluunniit tamakkernagu. Nunarsuup inuisa 90 procentiinit amerlanerusut ilitsoqqussaralugit oqaatsitik atorlugit atuarsinnaavaat.

2, 3. (a) Biibilimi ajoqersuutigineqartunut tunngatillugu sooq paatsiveerunnersuaqarpa? (b) Apeqqutit suut misissussavavut?

² Inuit millionillit ullut tamaasa Biibilimik atuartarput. Ilaasa arlaleriarlutik naallugu atuareerpaat. Upperisarsioqatigiit tusindillit ajoqersuutitik Biibilimik tunngaveqarnerarpaat, tamatumanili suut ajoqersuutigineqarnersut isumaqatigiinngissutigaat. Allaat upperisarsioqatigiinnut ataatsinut ilaasortaasut isumaqatigiinngittupilussuupput, tamannalu suli paatsiveerunnerulersitsivoq. Inuit ilaat Biibili, tamatuma pilerfia pingaaruteqassusialu pillugit qularput. Inuit ilarpassuisa atuakkatut illernartutut nalliuttorsiornernut ileqqulersornernullu, soorlu pingaartorsiorluni neriorsuinernut imaluunniit eqqartuussivinni uppernarsaanermut, atatillugu atorneqartussaannartut isigaat.

³ Biibilili Guutip inunnut oqaasianik, imaluunniit tusarliussaanik, kimittuunik imaqarpoq. (Hebræerit 4:12) Taamaattumik Jehovamut nalunaajaasuugatta kissaatigaarput inuit Biibilimi suut ajoqersuutigineqarnerannik ilisimasaqalernissaat. Jiisusi Kristusip ajoqersukkaminut suliassiissutigisaanik suliarinninnerput nuannaarutigaarput, taannami ima oqarpoq: „Aallaritsi inunnillu inuiannit tamaneersunik ajoqersuganngortitsigitsi . . . ajoqersorsigillu ilissinnut peqqussutikka tamaasa maleruaqqullugit.“ (Matthæusi 28:19, 20, NV) Tamanut oqaluussinitsinni inuit eqqortuliorusuttut upperisarsiornikkut paatsiveerunnermik silarsuarmi nalinginnaaqisumik eqqasuutiginnittut naapittarpavut. Pinngortitsisoq pillugu sallusuissut ilisimarusuppaat, aamma paaserusuppaat inuunerup siunertaa pillugu Biibilimi qanoq allassimasoqarnersoq. Apeqqutit pingasut inuppassuit eqqarsaatigisartagaat sammeriartigik. Taakkua tamaasa immikkut sammineranni maluginiaqqaartassavarput upperisarsiornikkut siuttut kukkusumik qanoq oqartarnerat. Tamatuma kingorna Biibilimi sorpiaat ajoqersuutigineqarnersut nassuiartassavarput. Apeqqutit makkuupput: (1) Guutip soqutigaatigut? (2) Sooq maaniippugut? (3) Toqugutta qanoq pisoqassava?

Guutip soqutigaatigut?

4, 5. Sooq inuit ilaat isumaqarpat Guutip soqutiginngikkaatigut?

⁴ Apeqqut una aallartissutigeriartigu: Guutip soqutigaatigut? Ajoraluartumik inuppassuit apeqqummut tamatumunnga akissut naamiusoraat. Sooq taama isumaqarpat? Pissutaasut ilaat tassaavoq silarsuup uumissuinermik, sorsunnernik naalliuutinillu ulikkaarnera. Ima eqqarsartarput: ’Guutip ilumut soqutigigunisigut, qularnanngilluinnartumik pisartut alianartut tamaasa pinngitsoortissagaluarpai.’

⁵ Guutip uagutsinnik soqutiginninngissorineqarneranut pissutaasoq alla tassaavoq inuit ilaasa upperisarsiornikkut siuttunit taamatut isumaqalersinneqarsimanerat. Alianartunik pisoqaraangat palasit amerlanertigut qanoq oqartarpat? Arnaq biilimik ajutoortoqarnerani meeqqaminik  mikisunik marlunnik annaasaqarmat, palasiata ima oqarfigaa: „Guutip tamanna piumasaraa. Guuti inngilinik suli marlunnik atorfissaqartitsisimavoq.“ Palasit taamatut oqaaseqaraangamik, ilumoortumik Guuti pisartunut ajortunut pisuutittarpaat. Ajoqersugarli Jaaku ima allappoq: „Misilinneqarnermi ima oqartoqanngikkili: ’Guutimit misilinneqarpunga.’ Guutimi ajortumik misilinneqarsinnaanngilaq, namminerlu kimilluunniit ajortumik misiliisanngilaq.“ (Jaaku 1:13, NV) Jehova Guuti ajortunut pisuunngisaannarpoq. Aap, „Guuti ajortumik iliunngisaannarpoq.“ — Jobi 34:10.

6. Silarsuarmi matumani ajortunut naalliuutinullu tamanut kina pisuua?

⁶ Soormiuna silarsuaq ajussusermik naalliuutinillu ulikkaartoq? Tamatumunnga pissutaasut ilaat tassaavoq inuit amerlanersaasa Guutimik naalakkamissut narruginninnerat, taassuma inatsisaanut najoqqutassiaanullu naapertuilluartunut naalatsigitikkumannginnamik. Nalullugu Guutip akerlilersortaanut, Saatanimut, naalatsigitipput, ’silarsuarmi tamarmi Ajortumut naalatsigitippoq’. (1 Johannesi 5:19) Tamatuminnga ilisimanninneq sooq taama ajortoqartigineranik paasinarnerulersitsisarpoq. Saatani peqqarniitsuullunilu peqquserluttuullunilu naakkittaatsuuvoq. Taamaammat ilimagiinnarsinnaavarput silarsuup naalakkami pissusianik ersersitsinissaa. Tupinnanngilaq silarsuarmi taama ajortoqartigimmat!

7. Taama naalliuuteqartigineranut pissutaasut ilaannik eqqaasaqarit.

⁷ Taama naalliuuteqartigineranut pissutaasoq alla tassaavoq inuit naammalluinnanngitsuunerat. Inuit naammalluinnanngitsut pissaaneqarniuteqqajaasarput, tamannalu sorsunnermik, naqisimanninnermik naalliuutinillu kinguneqarajuppoq. Oqaluussisartup oqaasii 8:9-mi eqqorluartumik ima allassimavoq: „Inuit ilaat ataaseq inoqatiminut ajoqutaasumik pissaaneqarpallaartarpoq.“ Naalliuuteqarneranut pissutaasut allat tassaapput „piffissaq nalaatsornikkullu pisut“. (Oqaluussisartup oqaasii 9:11, NV) Inuit amerlanertigut ajunaartarput sumiiffimmi piffissamilu kukkusumiikkamik.

8, 9. Qanoq ililluta nalunngilarput Jehovap ilumut soqutigigaatigut?

⁸ Tuppallersaataavoq paasillugu Jehova naalliuutinut pisuunngitsoq. Inuunitsinnili pisartut Guutip soqutigai? Apeqqummut tamatumunnga akissut qiimmaallannartoq aappiuvoq! Nalunngilarput Jehovap soqutigigaatigut, oqaatsinimi aqqutigalugu oqaluttuuppaatigut sooq inuit ajortumik inuunerat akuerinerlugu. Matumani akerleriissutit marluk pineqarput, tassa taassuma kisimi oqartussaanera inuillu assuarnaassusiat pillugit akerleriissut. Jehova Pinngortitsisuugami ajugaqanngitsoq sooq naalliuuteqarneranik akuerinninnini pillugu uagutsinnik oqaluttuussinissaminut pisussaanngilaq. Taamaakkaluartorli oqaluttuuppaatigut soqutigigamisigut.

⁹ Guutip uagutsinnik soqutiginninneranut uppernarsaat alla misissoriartigu. Noap nalaani nunarsuaq ajussusermik ulikkaarmat Guuti „aliasulerpoq“. (1 Mosesi 6:5, 6) Ullumikkut allatut misigisarpa? Naamik, taannami allanngorneq ajorpoq.  (Malaki 3:6) Naapertuilluannginneq uumigaa, inuillu naalliunnerat nuannarinngilluinnarpaa. Biibilimi ajoqersuutigineqarpoq inuit aqutsinerata Diaavulullu sunniuteqarnerata ajoqusiinerannik Guutip qanittukkut aaqqiiumaarnera. Guutip uagutsinnik soqutiginninneranut uppernarsaatit qularunnaarnat, ilaa?

10. Jehovap inuit naalliuttut takugaangamigit qanoq misigisarpa?

¹⁰ Upperisarsiornikkut siuttut Guuti eqqunngitsumik isigineqalersittarpaat oqaraangamik alianartunik nalaataqaraangatta taassuma piumasaa pisartoq. Jehovalli inuit naalliukkunnaarsinnissaat erinigaa. Petrusip allagai siulliit 5:7-imi ima allassimavoq: ’Isumassorpaasi.’ Tassa tamakkorpiaat Biibilimi ajoqersuutigineqarput!

Sooq maaniippugut?

11. Upperisarsiornerit ilarpassuini inuup nunarsuarmi inuunera pillugu qanoq oqartoqartarpa?

¹¹ Maanna apeqqut alla inuit ilarpassuisa eqqarsaatigisartagaat sammeriartigu: Sooq maaniippugut? Upperisarsiornerit ilarpassuini ajoqersuutigineqarpoq nunarsuarmiikkallaannartugut. Nunarsuaq allami inuunermut ingerlaqqinniarluni uniffigitsiagassaannartut isigineqarpoq. Ullut ilaanni Guutip nunarsuaq aserorumaaraa palasit ilaasa kukkusumik ajoqersuutigisarpaat. Taamatut ajoqersuuteqarnerup kingunerisaanik inuppassuit isummertarput maannakkut sapinngisaq tamaat inuulluataarniaannarsinnaallutik, toqu siunissatuarigamikku. Biibilimili sooq maaniinnerput pillugu sorpiaat ajoqersuutigineqarpat?

12-14. Guutip nunarsuarmut inunnullu siunertaa pillugu Biibilimi suut ajoqersuutigineqarpat?

¹² Guuti nunarsuarmut inunnullu nuanningaartumik siunertaqarpoq. Allassimasoqarpoq taassuma nunarsuaq ’soqanngitsussanngorlugu pinngortinngikkaa, kisianni najugaqarfissanngortillugu’. (Esaja 45:18) Aammattaaq Jehovap ’nuna aalajaatsumik tunngavilerpaa naassaanngitsumik patajaallisillugu’. (Tussiaat 104:5) Guutip nunarsuarmut inunnullu siunertaanut tunngasut tamakkua paasigatsigit, sooq maaniinnerluta paasilluarnerusinnaavarput.

¹³ Mosesimik allakkat siulliit kapitali 1-imi 2-milu oqaluttuarineqarpoq Jehova peqqissaaqqissaartoq nunarsuaq inunnut najugassatut piareersaramiuk. Ullut pinngortitsiffiit arfinillit naggataatungaanni suut tamarmik ’ajunngingaarput’. (1 Mosesi 1:31) Guutip angut arnarlu siulliit, Adami Evalu, Naatsiivimmut Edenimut alianaatsumut inissippai nerisassanillu mamartunik naammangaartunik nerisassaqartillugit. Guutip taakku ima oqarfigai: „Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu.“ Naammalluinnartunik meerartaartussaapput, Paratiisi allilertussaavaat naggataatigut nunarsuaq tamakkerlugu, uumasunullu asannittumik naalagaasussaapput. — 1 Mosesi 1:26-28.

¹⁴ Jehovap siunertaraa inuiaat naammalluinnartut naassaanngitsumik nunarsuarmi najugaqarnissaat. Guutip oqaasiani ima allassimavoq: „Iluartut nuna kingornutissavaat najugaqassallutillu tassani naassaanngitsumik.“ (Tussiaat 37:29) Aap, inuit paratiisimi nunarsuarmiittumi naassaanngitsumik inuunissaat siunertaavoq. Tassa Guutip siunertaa pillugu Biibilimi tamannarpiaq ajoqersuutigineqarpoq!

Toqugutta qanoq pisoqassava?

15. Toqugutta qanoq pisoqarnissaa pillugu silarsuarmi upperisarsiornerit amerlanersaasa suut ajoqersuutigisarpaat?

¹⁵ Apeqqut suli alla inuit ilarpassuisa  eqqarsaatigisartagaat sammeriartigu: Toqugutta qanoq pisoqassava? Silarsuarmi upperisarsiornerit amerlanersaasa timip toqunerata kingorna inuuinnartartumik inuup iluaniittoqarnera ajoqersuutigisarpaat. Upperisarsioqatigiit ilaat suli isumaqarput Guuti ajortunik anniarfimmi ikualasumi naassaanngitsumik anniartitsinermigut pillaasartoq. Tamannali ilumoorpa? Toqu pillugu Biibilimi sorpiaat ajoqersuutigineqarpat?

16, 17. Toqungasut pillugit Biibilimi suut ajoqersuutigineqarpat?

¹⁶ Guutip oqaasiani ima allassimavoq: „Uumassuseqartut nalunngilaat toqusussaagamik, toqungasulli sunnguamilluunniit ilisimasaqanngillat! Pissarsiassaqanngillat.“ Toqungasut ’sunnguamilluunniit ilisimasaqannginnamik’ tusaasinnaanatillu takusaqarsinnaanatillu oqalussinnaanatillu malugisaqarsinnaanatillu eqqarsarsinnaanngillat. Aamma akissarsiorsinnaajunnaartarput. Qanoq ilillutik taamaaliorsinnaassagaluaramik? Sulerisinnaanngilluinnarpummi! Aamma „asanninnerigaluat uumissuinerigaluallu sinnganerigaluallu qangarsuarli piujunnaareersimapput“, misigissutsinimmi ersersitsisinnaanngilluinnarput. — Oqaluussisartup oqaasii 9:5, 6, 10.

¹⁷ Biibilimi allassimasut tamatumunnga tunngasut paasiuminarlutillu erseqqipput — toqusimasut arlaanni inuuinnarneq ajorput. Toqunermi timimik qimatsisoqarneq ajorpoq timimi allami ernioqqittartumik, soorlu toqup kingorna inooqqittarnermik upperisallit taamaanneraasut. Immaqa ima erseqqissarneqarsinnaavoq: Inuunerput soorlumi tassa naneruutip ikumarna. Naneruut supineqarpat ikumarna qamissaaq allamut pinnani. Peerutiinnassaaq.

18. Biibilimik atuaqqissaartartoq qanoq isummersinnaava paasiguniuk toqusimasut ilisimanngitsut?

¹⁸ Sallusuissutip paasiuminartup, kimittoqisulli, tamatuma isumaa eqqarsaatigeriaruk. Biibilimik atuaqqissaartartup paasiguniuk toqusimasut ilisimanngitsut, isummeriaannaasinnaassaaq siuaasami toqusimasut erloqisissinnaanngikkaanni, inuugallaramik qanoq kamatsigisimagaluarunilluunniit. Aamma paasipallassinnaassavaa ilaquttami ikinngutimilu toqusimasut tusaasinnaajunnaarsimallutillu takunnissinnaajunnaarsimallutillu oqalussinnaajunnarsimallutillu malugisaqarsinnaajunnaarsimallutillu eqqarsarsinnaajunnaarsimanerat. Taamaammat uneriffimmiissinnaanatilluunniit anniarfimmi ikualasumi anniarsinnaanngillat. Biibilimili ajoqersuutigineqarpoq toqusimasut Guutip eqqaamasai makititaajumaartut. Neriuut nuanningaarami! — Johannesi 5:28, 29.

Atuagaq nutaaq oqaluussinermi atugassaq

19, 20. Kristumiuugatta uagut suna akisussaaffigaarput, atuagarlu Biibilimik atuaqqissaaqatigiissutissaq suna oqaluussinermi atugassatut naatsorsuussaava?

¹⁹ Apeqqutit inuit ilarpassuisa eqqarsaatigisartagaasa ilaat pingasuinnaat sammereerpavut. Taakkua tamaasa immikkut sammineranni Biibilimi ajoqersuutigineqartut erseqqillutillu paasiuminarput. Inunnik Biibilimi suut ajoqersuutigineqarnerat pillugu paasinnerusuttunik sallusuissutinik tamakkuninnga avitseqateqarsinnaaneq nuannersorujussuuvoq! Allarpassuarnilli apeqquteqarpoq pingaarutilinnik, taakkualu inuit eqqortuliorusuttut naammaginartumik akineqarnissaat pisariaqartippaat. Kristumiuugatta inuit apeqqutinut tamakkununnga akissutissarsiniarneranni ikiornissaat akisussaaffigaarput.

²⁰ Biibilimi sallusuissutit pillugit paasiuminartumik kajumissinartumillu ilinniartitsineq unamminiarnartuuvoq. Unamminiarnartup tamatuma iliuuseqarfiginissaanut iluaqutissatut ’inussiaq aalajaallunilu silatooq’ atuakkamik oqaluussinermi atugassatut naatsorsuussaasumik piareersaasimavoq.  (Matthæusi 24:45-47, NV) Atuagaq taanna 224-nik quppernilik ima qulequtaqarpoq: Hvad er det Bibelen virkelig lærer?

21, 22. Atuakkami Hvad er det Bibelen virkelig lærer-imi suut maluginiarnartuuppat?

²¹ Atuagaq 2005-imi Jehovap Nalunaajaasuisa ataatsimeersuarneranni „Guutimut naalanneq“-mik qulequtaqartumi saqqummersinneqarpoq. Atuakkami tassani maluginiarnartorpassuaqarpoq, soorlu siulequt tallimanik quppernilik. Paasinarsisimavorlu taanna Biibilimik atuaqqissaaqateqalerniarnermi iluaqutaangaarsimasoq. Qularnanngitsumik assit allassimaffiillu siuleqummiittut eqqartoruminartissavatit. Aamma siulequt atorlugu ilinniartoq takutissinnaavat Biibili qanoq ililluni ujarlerfigisinnaaneraa.

²² Atuagaq nutaaq oqaatsit paasiuminartut atorlugit allanneqarsimavoq. Ilinniartup uummataa anguniarlugu iliuuseqangaatsiartoqarsimavoq periarfissat tamaasa atorlugit peqataatinniarneratigut. Kapitalit tamarmik aallaqqaataatungaanni apeqquteqarpoq, kapitalillu naaneranni ungalusaqarpoq „Biibilimi ajoqersuutigineqartut“-mik qulequtalimmik. Ungalusami allassimaffeqarpoq apeqqutinut aallaqqaataatungaaniittunut akissutaasunik. Assit taakkualu oqaasertaat allaaserisamilu assersuutigineqartut ilinniartup paasinnittaatsinik nutaanik paasinnilluarnerunissaminut iluaqutigissavai. Allaaserisap pingaarnersaa paasiuminartupilussuuvoq, atuakkalli naggataatungaani tapiliussaqarpoq, tassanilu sammisassat assigiinngitsut 14-it annertunerusumik nassuiarsinnaavatit ilinniartoq paasisaqarnerorusuppat.

23. Biibilimik atuaqqissaaqateqaraanni atuagaq nutaaq qanoq atorneqarsinnaava?

²³ Atuagaq Hvad er det Bibelen virkelig lærer? inunnik assigiinngitsunik ilinniagaqarsimasunik upperisarsiornikkullu allamik tunuliaqutaqartunik ilinniartitsinissamut iluaqutigissavarput. Ilinniartoq Biibili pillugu ilisimasaqanngippat immaqa kapitalikkaarlugu sammineqarsinnaanngilaq. Allaaserisat sukkavallaamik samminagit ilinniartup uummataa anguniarsariuk. Atuakkami assersuutigineqartut ilaat paasinngippagu nassuiaruk, imaluunniit assersuut alla atoruk. Piareersarluartarit, atuagaq sapinngisannik atorluarniartaruk, Guutillu ikiuinissaa qinnutigiuk ’oqaaseq sallusuissutaasoq eqqortumik atorsinnaaniassagakku’. — 2 Timotheusi 2:15, NV.

Immikkut pisinnaatitaaffitit erlinnangaartut qujamasuutigikkit

24, 25. Jehovap innuttani erlinnangaartunik sunik immikkut pisinnaatitaaffilerpai?

²⁴ Jehovap innuttani erlinnangaartunik immikkut pisinnaatitaaffilerpai. Imminik pilluni sallusuissummik ilinniarnissamut periarfissaqalersippaatigut. Tamanna taamaattussaannartut isiginngisaannartariaqarparput! Guutip siunertani makitasuunut isertorpai, maniguuttunulli saqqummersippai. Tamatumunnga atatillugu Jiisusi ima oqarpoq: „Unnersiutigaakkit Ataataq, qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut.“ (Matthæusi 11:25) Maniguuttut qilammi nunamilu kisimi oqartussaalluni Naalagaasumut, Jehovamut, kiffartortut ilaattut isigineqarneq ataqqinaataangaarpoq.

²⁵ Aamma Guutip imminik allanik ilinniartitsinissamik immikkut pisinnaatitaaffilerpaatigut. Eqqaamajuk Guutimik salluliuutiginnittut taassuminnga kukkulluinnartumik isiginnilersitsisimanerat. Taamaattumik inuppassuit Jehova kukkulluinnartumik isigaat isumaqarlutillu naakkittaatsuusoq uagutsinnillu soqutiginninngitsuusoq. Illit paatsuuinernik taakkuninnga naqqiinissamut piumassuseqarpit, aap allaat pilerivit? Inuit eqqortuliorusuttut sumiluunniit ittut Guuti pillugu sallusuissummik ilinniarnissaat kissaatigaajuk? Taamaappat sapinngisat tamaat iliorit Guutimut naalannerit ersersinniarlugu aallussilluarlutit oqaluussinikkut inunnillu allanik apeqqutit pingaarutillit pillugit Biibilimi qanoq allassimasoqarneranik ilinniartitsinikkut. Inuit sallusuissummik ujarlersut Biibilimi sorpiaat ajoqersuutigineqarnerannik paasinninnissartik pisariaqartippaat.

Qanoq akissavit?

• Qanoq ililluta nalunngilarput Guutip soqutigigaatigut?

• Sooq maani nunarsuarmiippugut?

• Toqugutta qanoq pisoqassava?

• Atuakkami Hvad er det Bibelen virkelig lærer?-imi ingammik suna nuannaraajuk?

[Atuaqqissaarnermi apeqqutit]

[Qupp. 24-mi assiliartat]

Biibilimi ajoqersuutigineqarpoq Guuti naalliunnartuerutitsiumaartoq

[Suminngaanneernerat]

Qulleq talerperleq, niviarsiaraq: © Bruno Morandi/age fotostock; saamerleq, arnaq: AP Photo/Gemunu Amarasinghe; alleq talerperleq, qimaasut: © Sven Torfinn/Panos Pictures

[Qupp. 25-mi assiliartaq]

Naapertuilluartut Paratiisimi naassaanngitsumik inuussapput