Makititsineq ’siulleq’ maannakkut pivoq!

„Kristusimiillutik toqusut siulliullutik makikkumaarput.“ — 1 THESSALONIKAMIUT 4:16.

1, 2. (a) Toqusimasunut sumik neriuutissaqarpa? (b) Illit makititaanissamik upperinninnissannut sunik pissutissaqarpit? (Quppernerup ataani ilanngussaq takuuk).

’UUMASSUSEQARTUT nalunngilaat toqusussaallutik.’ Adamip ajortuliorneraniilli taamaassimavoq. Oqaluttuarisaanerup ingerlanerani inuit inunngorsimasut tamavimmik nalunngilaat naggataatigut toqusussaallutik, inuppassuillu apeqqutit makku isumaliutigisimavaat: ’Toqup kingorna susoqartarpa? Toqusut qanoq pisarpat?’ Biibilimi tamanna ima akineqarpoq: „Toqungasut sunnguamilluunniit ilisimasaqanngillat.“ — Oqaluussisartup oqaasii 9:5.

 ² Toqusimasunummi neriuutissaqarpa? Aap. Neriuutissaqartariaqarpoq Guutip inunnut aallaqqaammulli siunertaa eqquutissappat. Ukiut hundredellit ingerlaneranni Jehovamut kiffaasut aalajaatsut Taassuma kinguaassamik Saatanimik suujunnaarsitsiumaartumik Saatanillu ajoqusiinerinik iluarsiiumaartumik saqqummersoqarumaarnera pillugu neriorsuutaa upperaat. (1 Mosesi 3:15) Taakku amerlanersaat maanna toqoreerput. Neriorsuutip tamatuma Jehovallu neriorsuutigisimasaasa allat eqquunnerat takussagunikku toqusunit makititaasariaqarput. (Hebræerit 11:13) Taamatut pisoqarsinnaava? Aap. Apustili Paulusi ima oqarpoq: ’Toqusut makikkumaarput — iluartut iluaatsullu.’ (Apustilit Suliaat 24:15) Ilaanni Paulusip angut inuusuttoq Eutykosimik atilik, init quleriit pingajuannit nakkartoq ’kivinneqaramilu toqoreersimasoq’ makitippaa. Tamanna toqusunit makititsinerit qulingiluat Biibilimi oqaluttuarineqartut kingullersaraat. — Apustilit Suliaat 20:7-12. *

3. Jiisusip oqaasii Johannesi 5:28, 29-mi allanneqarsimasut illit inuttut qanoq tuppallersaatiginikuuigit, aamma sooq?

³ Toqusunit makititsinerit qulingiluat taakku pissutigalugit Paulusip oqaasiinik upperinninnissamut pissutissaqarpugut. Aamma Jiisusip neriorsuutaanik matuminnga upperinninnitsinnut nakussatsitsissutaapput: „Piffissaq nalliukkumaarpoq ilivermiittut tamarmik [Jiisusip] nipaanik tusarumaarfissaat ilivernillu aniumaarfissaat.“ (Johannesi 5:28, 29) Oqaatsit taakku qamuuna nuannaajallannangaaramik! Aamma inunnut millionilinnut asasaminnik toqusoorsimasunut tuppallersaataangaaramik!

4, 5. Makititsinerit assigiinngitsut suut Biibilimi oqaatigineqarpat, allaaserisarlu manna makititsinermut sumut tunngassava?

⁴ Makititaasimasut amerlanersaat nunarsuarmi maani inuuleqqissapput Guutip naalagaaffiata  pissutsit eqqissinartut atuutilersereerpagit. (Tussiaat 37:10, 11, 29; Esaja 11:6-9; 35:5, 6; 65:21-23) Tamakkuali pitinnagit makititsinerit allat pisussaapput. Siullermik Jiisusi Kristusi makitinneqartussaasimavoq, uagut iluaqutissatsinnut Guutimut pilliutimi nalinga sassaassinnaaniassagamiuk. Ukiumi 33-mi u.n.k. Jiisusi toquvoq aamma makitinneqarpoq.

⁵ Tulliutillugu ’Israelimut Guutip pigisaanut’ ilaasut tanitat qilammi naalannassuseqarlutik Naalakkamut Jiisusi Kristusimut ilaliutissapput tassanilu ’Naalagaq najortuinnarlugu’. (Galatiamiut 6:16; 1 Thessalonikamiut 4:17) Pisimasoq tamanna ’toqusunit makinnermik siullermik’, imaluunniit makititsinermik siullermik, taaneqarpoq. (Saqqummersitat 20:6) Makititsineq tamanna naammassineqarpat inuit millionillit makititaanissaannut Paratiisimilu naassaanngitsumik inuunissamik neriuuteqarlutik nunarsuarmi inuuleqqinnissaannut piffissanngussaaq. Taamaammat qilaliarnissamik neriuuteqaraluarutta nunarsuarmiluunniit inuunissamik neriuuteqaraluarutta makititsineq ’siulleq’ assut soqutigaarput. Makititsineq tamanna suugami? Aamma qaqugu pissava?

„Qanoq ittumik timeqarumaarnerpat“?

6, 7. (a) Kristumiut tanitat qilaliartinnagit qanoq pisoqaqqaartariaqarpa? (b) Qanoq ittumik timeqarlutik makititaassappat?

⁶ Paulusip Korinthimiunut allakkamini siullerni makititsineq siulleq pillugu ima aperivoq: „Qanoq ilillutik toqusut makissappat? Qanoq ittumik timeqarumaarnerpat?“ Taava apeqqut nammineq ima akivaa: „Naatsiiassaq illit ikkussat uummassanngilaq toqoqqaartinnani . . . Guutilli piumasani malillugu timitalertarpaa . . . Qilammiittut nunamiittullu assigiinngitsunik akisunneqarput.“ — 1 Korinthimiut 15:35-40.

⁷ Paulusip oqaasiini erserpoq kristumiut anersaamik illernartumik taninneqarsimasut qilammi akissarsiassamik pinnginnerani toqoqqaartariaqartut. Toqugaangamik timaat nunamiusut kingumut issunngortarput. (1 Mosesi 3:19) Piffissami Guutip aalajangigaani qilammi inuunermut naleqquttumik timeqarlutik makititaasarput. (1 Johannesi 3:2) Aammattaaq Guutip toqujuissusermik tunisarpai. Toqujuitsuuneq inunnguuserinngilaat, toqujuitsumik tarneqanngillat. Paulusi ima allappoq: „Toqujasoq manna toqujuissusermik atisitinneqassaaq.“ Toqujuissuseq Guutimit tunissutaavoq makititsinermi siullermi makititaasut ’atisagaat’. — 1 Korinthimiut 15:50, 53; 1 Mosesi 2:7; 2 Korinthimiut 5:1, 2, 8.

8. Qanoq ililluta nalunngilarput Guutip 144.000-it upperisarsioqatigiinnit assigiinngitsunit toqqanngikkai?

⁸ 144.000-iinnaat makititsinermi siullermi makititaasussaapput. Ukiumi 33-mi u.n.k. piinsip ulluani, Jiisusimik makititsinermi kinguninngua, Jehova taakkuninnga toqqartuilluni aallartippoq. Tamarmik ’qaamikkut allassimasoqarput Savaaqqap aqqanik Ataataatalu aqqanik’. (Saqqummersitat 14:1, 3) Tassa upperisarsioqatigiinnit assigiinngitsorpassuarnit toqqagaanngillat, tamarmilli Kristusimut ajoqersugaapput, tamarmillu Ataatap aqqa — Jehova — tulluusimaarlutik taaguutigaat. Makititaareerunik qilammi suliassinneqassapput. Guutimut taassuma eqqaani kiffartornissartik pissangagaat.

Makititsineq siulleq — maannakkut piva?

9. Makititsinerup siulliup qanga aallartinnerata missiliornissaanut Saqqummersitat 12:7 aamma 17:14 qanoq iluaqutigaavut?

⁹ Makititsineq siulleq qanga aallartippa? Tamatuma maannakkut pineranut uppernarsaatissaqarluarpoq. Assersuutigalugu kapitalit marluk Saqqummersitaniittut imminnut naleqqiuteriartigit. Siullermik kapitali 12 misissussavarput. Tassani allassimavoq kunnginngortinneqaqqammersoq, Jiisusi Kristusi, inngilini illernartut peqatigalugit Saatanimut taassumalu anersaapiluinut sorsuttoq. (Saqqummersitat 12:7-9) Soorlu atuagassiami matumani eqqaaneqartartoq, sorsunneq tamanna  1914-imi aallartippoq. * Maluginiariarulli eqqaaneqanngitsoq Kristusip ajoqersugaasa tanitat qilammi sorsunnermi tamatumani Jiisusimik akiuuteqateqarnerat. Maanna misissoriartigu Saqqummersitat kapitali 17. Tassani allassimavoq „Babylonersuaq“ piuneerunneqareerpat Savaaqqap inuiaat ajugaaffigiumaarai. Taava ima nangippoq: „Taannalu peqatigalugu ajugaajumaarput qaaqqusaasimasut qinigaasimasullu unneqqarissullu.“ (Saqqummersitat 17:5, 14) „Qaaqqusaasimasut qinigaasimasullu unneqqarissullu“ Jiisusi peqatigalugu Saatanip silarsuaanut inaarutaasumik ajugaaqataassagunik makititaareersimasariaqarput. Taamaattumik tunngavissaqarluartumik isummertoqarsinnaavoq tanitat Harmagedoninnginnerani toqusut 1914-ip Harmagedonillu akornanni makititaassasut.

10, 11. (a) Utoqqaanertat 24-t kikkuuppat, taakkualu ilaata Johannesimut suna saqqummersippaa? (b) Tamanna qanoq paasisaqarfigisinnaavarput?

¹⁰ Makititsinerup siulliup qanga aallartinnera eqqornerusumik oqaatigisinnaavarput? Tamanna Saqqummersitat 7:9-15-imi soqutiginartumik eqqaaneqarpoq, tassanimi apustili Johannesip ’inuppassuarnik amerlangaaramik kisinneqarsinnaanngitsunik’ takorruukkani oqaluttuaraa. Amerlangaartut taakku kikkuunerat Johannesimut saqqummersinneqarpoq utoqqaanertat 24-t ilaannit, utoqqaanertallu taakkua Kristusip kingornusseqatissaanut 144.000-inut qilammi naalannassuseqartunut assersuutaapput. * (Lukasi 22:28-30; Saqqummersitat 4:4) Johannesi nammineq qilaliarnissamik neriugisaqarpoq, taannali utoqqaanertat ilaannit oqaluunneqarami suli inuttut nunarsuarmiimmat, Johannesi takorruukkami tanitanut nunarsuarmiittunut qilammi akissarsiassaminnik suli pinngitsunut assersuutaasimassaaq.

¹¹ Amerlangaartut kikkuunerannik utoqqaanertat 24-t ilaata Johannesimik oqaluttuussisuunera qanoq paasisaqarfigisinnaavarput? Utoqqaanertat 24-t makititaasimasunut ilaasunut assersuutaasut ullumikkut sallusuissutinik Guutimeersunik paasissutisseeqataasartuugunarput. Sooq tamanna pingaaruteqarpa? Pissutigalugu amerlangaartut kinaassusiviat 1935-mi Guutip kiffaanut tanitanut nunarsuarmiittunut nalunaarutigineqarmat. Utoqqaanertat 24-t ilaat sallusuissummik pingaaruteqartumik tamatuminnga paasissutissiinermi atorneqarsimaguni kingusinnerpaamik 1935-mi qilammut makititaareersimasariaqassaaq. Taamaappallu makititsineq siulleq 1914-ip 1935-llu akornanni aallartissimassaaq. Aallartiffia suli eqqornerusumik oqaatigisinnaavarput?

12. Nassuiaruk sooq makititsineq siulleq 1918-imi upernaakkut aallartissimasinnaasoq.

¹² Matumani pisimasunik Biibilimi allaatigineqartunik tamatumunnga assingusutut isigineqarsinnaasunik misissuineq iluaqutaasinnaavoq. Jiisusi Kristusi ukiumi 29-mi u.n.k. ukiakkut Guutip naalagaaffiani kunnginngortussanngortinneqarpoq. Ukiut pingasut affarlu tamatuma kingorna, ukiumi 33-mi u.n.k. upernaakkut, anersaatut pissarsuartut makititaavoq. Taava imatut isummertoqarsinnaava, Jiisusi 1914-imi ukiakkut kunnginngortinneqarmat ukiut pingasut affarlu tamatuma kingorna, 1918-imi ukiakkut, taassuma ajoqersugaanik tanitanik aalajaatsunik makititsineq aallartittoq? Taamaassinnaanera soqutiginarpoq. Tamannalu Biibilimi toqqaannartumik uppernarsarneqarsinnaanngikkaluartoq, allassimaffinnut allanut, makititsinerup siulliup Kristusip najuutilernerata kinguninngua aallartinneranik ersersitsisunut, naapertuuppoq.

13. Thessalonikamiunut allakkat siulliit 4:15-17-imi qanoq ersersinneqarpa makititsineq siulleq Kristusip najuunnerani siusissukkut aallartittoq?

¹³ Assersuutigalugu Paulusi ima allappoq: „Uagut inuusugut sulilu maaniilluta Naalakkap tikiunnissaanik angumerinnikkumaartugut sinippaartunit [siulliussanngilagut]. Peqquserpalunneq  inngiliunerullu nipaa Guutillu qarlortaassuata qarlortarpalunnera tutsiuppata Naalagaq nammineq qilammit aqqarumaarpoq, Kristusimiillutillu toqusut siulliullutik makikkumaarput. Taava uagut inuusugut sulilu maaniittugut taakku ilagalugit nuissatigut aallarunneqarumaarpugut Naalagaq parsiarlugu silaannarmi, Naalagarlu najortuinnalissavarput.“ (1 Thessalonikamiut 4:15-17) Allassimaqqaarfiit grækerisuut naapertorlugit oqaatsit ’Naalakkap tikiunnissaa’ ’Naalakkap najuunnissaa’-nik isumaqarpoq. Malugiulli Paulusip eqqartunngikkaa najuunnerata naggataatungaa. Tassa kristumiut tanitat Kristusip najuutilinnginnerani toqusut siulliullutik qilammi inuunermut makititaapput, tamatumalu kingorna Kristusip najuunnerani toqusut qilammi inuunermut makititaasalerput. Tassa imaappoq makititsineq siulleq Kristusip najuunnerani siusissukkut aallartissimassaaq najuunneranilu ingerlaannarsimassalluni. Makititsineq siulleq ataatsikkut makititsinerunngilaq, piffissalli ingerlanerani pivoq.

„Tamarmik immikkut atisamik qaqortumik atisassinneqarput“

14. (a) Takorruukkat Saqqummersitat kapitali 6-imi allaatigineqartut qanga eqquuppat? (b) Saqqummersitat 6:9-miittut sumut assersuutaappat?

¹⁴ Aamma eqqarsaatigikkit Saqqummersitat kapitali 6-imi uppernarsaatit. Matumani Jiisusi kunngitut ajugaasutut hestersutut allaatigineqarpoq. (Saqqummersitat 6:2) Inuiaat sorsunnernut peqqarniitsunut akuliunneqarput. (Saqqummersitat 6:4) Kaannersuaqarpoq. (Saqqummersitat 6:5, 6) Nappaatit toqoraataasut inuiannik perlussiortitsipput. (Saqqummersitat 6:8) Siulittuutigineqarsimasut tamakku tamarmik 1914-imiilli silarsuarmi pisartunut naapertuulluinnarput. Allanilli aamma pisoqarpoq. Pilliivik uagutsinnut malugeqquneqarpoq. Pilliiviup tamatuma toqqaviata saniani takussaapput „Guutip oqaasia nalunaajaallu aalajangiussartik pillugit toqutaasut tarningi“. (Saqqummersitat 6:9) ’Uinngup uumassutaa aammiimmat’ tarnit pilliiviup toqqaviata sanianiittut Jiisusip kiffaasa, nakimaallutik aallussilluarlutillu oqaluussinertik pissutigalugu toqutaasut, aavannut assersuutaapput. — 3 Mosesi 17:11.

15, 16. Nassuiaruk sooq Saqqummersitat 6:10, 11-mi allassimasut makititsinermut siullermut tunnganersut.

¹⁵ Abelip naapertuilluartup aavata torlorfiginninneratut kristumiut uppernertik pillugu toqutaasimasut taakku aavisa naapertuilluarneq torlulaatigaat. (1 Mosesi 4:10) „Nipitoqisumillu  torlulapput oqarlutik: ’Naalagaasutit illernartoq sallusuitsorlu, qaqugu eqqartuussiniarpit aappullu kuisaasoq pillugu nunarsuarmi najugaqartunut akiniulluta?’ Tamarmik immikkut atisamik qaqortumik atisassinneqarput oqarfigineqarlutillu suli sivikitsumik qasuersaarallaqqullugit kiffartortoqatimik qatanngutimillu immissut toqunneqartussat amerlassusissaat naammatsitserlugu.“ — Saqqummersitat 6:10, 11.

¹⁶ Atisat qaqortut taakku aammut pilliiviup toqqaviata sanianiittumut tunniunneqarpat? Soorunami naamik! Atisat inunnut ataasiakkaanut aavi pilliivimmut kuineqarsimasunullusooq tunniunneqarput. Taakku Jiisusip aqqani inuunertik pilliutigisimavaat maannalu anersaatut makititaasimallutik. Tamanna qanoq ililluta nalunngilarput? Saqqummersitat aallaqqaataatungaani ima allassimavoq: „Ajugaasoq qaqortunik atisitinneqassaaq, aqqalu inuunerup mappersagaanit piianngisaannassavara.“ Aammattaaq eqqaamajuk utoqqaanertat 24-t ’qaqortunik atisaqartut kuultiusunillu niaqoruteqartut’. (Saqqummersitat 3:5; 4:4) Tassa 144.000-it ilaat toqusimasut — aattut pilliiviup toqqaviata sanianiittutut eqqartorneqartut — sorsunnerup, kaannersuup nappaassuillu nunarsuarmik perlussiortitsilernerata kingorna qilammi inuunermut makititaapput takisuunillu qaqortunik assersuutaasunik atisaqarlutik.

17. Atisanik takisuunik qaqortunik tunineqartut ’qasuersaartariaqarnerat’ qanoq paasisariaqarpa?

¹⁷ Makititaaqqammersut taakku ’qasuersaartariaqarput’. Ulloq Guutip akiniaaffissaa naammagittarlutik utaqqisariaqarpaat. Taakku ’kiffartortoqataat’, kristumiut tanitat suli nunarsuarmiittut, misilinneqarnerminni assuarnaassutsiminnik ersersitsisariaqarput. Guutip eqqartuussutaanik naammassinninnissamut piffissanngorpat ’qasuersaarunnaassapput’. (Saqqummersitat 7:3) Taamanikkussamut makititaasimasut Naalagaq Jiisusi Kristusi peqatigalugu ajortunik, ilaatigut kristumiut pisuussuteqanngitsut aavannik kuisisimasunik, piuneerussissapput. — 2 Thessalonikamiut 1:7-10.

Tamatuma uagutsinnut qanoq pingaaruteqarnera

18, 19. (a) Suut tunngavigalugit isummersinnaavugut makititsineq siulleq maannakkut pisoq? (b) Makititsinermik siullermik paasinninnerit ilinnut qanoq pingaaruteqarpa?

¹⁸ Makititsinerup siulliup qangarpiaq aallartinnera Guutip oqaasiani saqqummersinneqanngilaq, ersersinneqarporli makititsineq tamanna piffissap ingerlanerani, Kristusip najuunnerani, pisoq. Makititaasut siulliit tassaapput kristumiut tanitat Kristusip najuunnerata aallartinnginnerani toqusut. Kristumiut tanitat aalajaatsut Kristusip najuunnerani nunarsuarmi inuunerminnik naammassinnittut „uisorernerinnaq“ anersaanngortinneqartarput pissarsuit. (1 Korinthimiut 15:52) Tanitat tamarmik Harmagedonimi sorsunnissaq pitinnagu qilammi akissarsiassartik pissavaat? Naluarput. Nalunngilarpulli 144.000-it tamarmik piffissaq Guutip aalajangigaa nalliuppat Qaqqami Zionimi qilammiittumiikkumaartut.

¹⁹ Nalunngilarputtaaq 144.000-it amerlanersaasa Kristusi ataasioqatigilereeraat. Taakkua ilaat ikittuinnaat suli nunarsuarmiipput. Guutip eqqartuussutaata naammassineqarnissaata qanilliartorasuarneranut uppernarsaat kimittungaarami! Qanittukkut Saatanip silarsuarmik aaqqissuussinera tamarmi piuneerunneqassaaq, Saatanilu nammineq itinersuarmut iginneqassaaq. Tamatuma kingorna nunarsuarmi makititsineq aallartissinnaanngussaaq, inuillu aalajaatsut, Jiisusip utertitsissutitut pilliutaa tunngavigalugu, Adamip annaasimasaatut ittumik naammalluinnartunngoriartuaartinneqarsin- naanngussapput. Jehovap siulittuutaata Mosesimik allakkat siulliit 3:15-imi allanneqarsimasup eqquukkiartuaarnera takullugu nuannivippoq. Ulluni makkunani inuuneq ilumut immikkut pisinnaatitaaffiuvoq nuanningaartoq! (wE 1/1 07)

[Quppernerup ataani ilanngussat]

Uku nassuiarsinnaavigit?

Makititsinerup ’siulliup’ qaqugukkut pissaneranik paasinninnissamut allassimaffiit ukua qanoq iluaqutigaavut?

• Saqqummersitat 12:7; 17:14

• Saqqummersitat 7:13, 14

• Korinthimiunut allakkat siulliit 15:23; Thessalonikamiunut allakkat siulliit 4:15-17

• Saqqummersitat 6:2, 9-11

[Atuaqqissaarnermi apeqqutit]

[Qupp. 18-mi assiliartat]

Inuiaat ataatsimut isigalugit toqusunit makititaannginneranni makititsinerit suut pippat?

[Qupp. 21-mi assiliartaq]

Toqumi sinippaartut takisuumik qaqortumik atisassinneqarnerat qanoq paasisariaqarpa?