Meeqqanik perorsaaneq — Siunnersuutit tutsuiginartut

„19-inik ukioqarpunga, ilaquttakka ungasillugit najugaqarpunga piareersimanngivillungalu,“ Ruth naartoqqaarnini pillugu oqarpoq. Nammineq qitornatuaavoq anaanaanerlu pillugu iluamik eqqarsaatigisimanagu. Sumut siunnersortissarsiussava?

Akerlianik Jan, maanna pingasunik inersimasunik qitornalik, ima oqaluttuarpoq: „Aallaqqaammut imminut tatigisorujussuuvunga. Sivitsunngitsorli nassuerutigisariaqarpara misilittagakippallaarlunga.“ Ikiortissaaleqisutut misigineq ingerlaannaq kingusinnerusukkulluunniit takkukkaluarpat meeqqanik perorsaanermi sumut ikiortissarsiortoqarsinnaava?

Ullumikkut internetimi siunnersuutinik ujarlertartut amerliartuinnarput. ’Siunnersuutilli tassani nassaarineqartut qanoq tatiginartigaat?’ immaqa eqqarsarputit. Mianersornissamut pissutissaqarluarpoq. Internetikkut siunnersuisut kikkuusut nalunngiligit? Taakkua qitornaminnik iluatsittumik perorsaasimappat? Qularnanngitsumik illit ilaquttannut pingaarutillit mianersuukkusuppatit. Allaaserisap matuma siuliani ersersinneqarpoq allaat immikkut ilisimasallit siunnersuutaat pakatsinarsinnaasut. Taavami qanoq iliortoqartariaqarpa?

Meeqqanik perorsaanermik siunnersuilluarsinnaanerpaaq soorunami tassaavoq Jehova Guuti, ilaqutariinnik pilersitsisuusoq. (Efesosimiut 3:15) Kisiartaalluni tassaavoq ilumut immikkut ilisimasalik. Oqaatsimini, Biibilimi, tatiginartunik atoriaannaasunillu siunnersuivoq. (Tussiaat 32:8; Esaja 48:17, 18) Malikkumanerlugu nammineq aalajangertussaavugut.

Aappariit ilaat aperineqarput qitornamik inersimasutut oqimaaqatigiissaarilluarsinnaasunngortillugit Guutimillu mianerinnittunngortillugit perorsaanerminni qanoq misilittagaqarsimanersut. Iluatsittumik perorsaanerminnut pissutaanerpaasoraat najoqqutassianik Biibilimeersunik maleruaasarnertik. Paasisimavaat Biibilimi najoqqutassiat ullormi allanneqarfimminnisulli ullumikkut tatiginartigisut.

Meeqqat piffissaqarfigikkit

Catherine, marlunnik qitornalik, aperineqarami suna iluaqutiginerpaasimanerlugu ingerlaannaq Mosesimik allakkat tallimaat 6:7 innersuussutigaa, ima allassimavoq: „Erninnut [Biibilimi najoqqutassiat] nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Catherinep paasisimavaa siunnersuut taanna maleruassaguniuk qitornami ilaginissaannut piffissaqartariaqarluni.

’Taama ajornanngitsiginngilaq,’ immaqa eqqarsarputit. Angajoqqaat ulapittut, akissanik naammattusaariniarlutik marlunnik akissarsiorfeqartariaqartut, qitornatik qanoq piffissaqarfiginerusinnaagamikkik? Torlief, ilaqutaqalereersumik ernilik, oqarpoq Mosesimik allakkat tallimaanni siunnersuutip maleruarnera pingaaruteqartoq. Sumunnaraluaraangavilluunniit qitornatit ilagisakkit; taava oqaloqatigiilluarnissamut periarfissaqalissaaq. „Erneralu angerlarsimaffitsinni pilersaarusiukkanik peqatigiilluta suliaqartarpugut,“ Torlief oqaluttuarpoq imalu nangilluni: „Ilaqutariittut angalaaqatigiittarpugut, nereqatigiittuaannarlutalu. Taamaalilluni ernerput uummammiugisaminik aniatitsinissaminut nangaanngisaannarpoq.“

Taavami ammasumik attaveqatigiinneq amigaataappat oqaloqatigiinnerillu ilungersunarpata? Meeqqat alliartortillugit ilaannikkut taamatut pisoqartarpoq. Tamatumani aamma ilaginissaannut piffissaqarnissaq pingaaruteqarpoq. Catherinep uiata, Kenip, eqqaamavaa panimmi inuusuttuaraalluni, inuusuttuararpassuartut allatulli, tusarnaartannginnerarluni assuarigaani. Qanoq iliorsinnaava? Ken ima oqaluttuarpoq: „Aalajangerpunga kisimeeqatiginissaanut piffissaqarneruniarlunga eqqarsaatai, uummammiugisai artorsaatigisaalu oqaloqatigiissutigisinnaaniassagatsigik. Iluaqutaavoq.“ (Ussatit 20:5) Ken isumaqarpoq tamatuma iluaqutaaneranut pissutaasoq ilaqutariittut oqaloqatigiittarnermik sungiusimannereernerat. „Panigalu ajunngitsumik  attaveqartuaannarnikuuvugut,“ oqarpoq, „taamaattumik saaffigeriaannaallunga misigisimavoq.“

Soqutiginarpoq qanittukkut misissuinermi ersermat inuusuttuaqqat angajoqqaanit pingasoriaammik amerlanerusut oqartartut ilagiinnissaminnut piffissamik naammattumik atuisarnatik. Taamaammat soormi Biibilimi siunnersuut maleruarukku? Sapinngisamik sivisunerpaamik qitornatit ilagisakkit — qasuersaaraangavit suliaqaraangavilluunniit, angerlarsimagaangavit angalagaangassiluunniit, ullaakkut unnukkullu. Ajornanngippat sumunnaraluaraangavilluunniit qitornatit ilagisakkit. Soorlu Mosesimik allakkat tallimaat 6:7-imi ersertoq qitornavit ilaginissaannut piffissaqarnissaq sumilluunniit taarserneqarsinnaanngilaq.

Pitsaasunik najoqqutassaqartikkit

Mariop, marlunnik qitornallip, aamma kajumissaarutigaa ’meeqqat asanninnermik ersersitsivigilluartarnissaat atuffattarnissaallu’. Meeqqalli eqqarsartaasiisigut kaammattornissaat apeqqutaaginnanngilaq. Ajunngitsumik ajortumillu immikkoortitsisinnaanermik ilinniartinneqartariaqarput, Biibilimillu atuaqatigineqartariaqarlutik.

Tamatumunnga atatillugu angajoqqaat Biibilimi ima eqqaasinneqarput: „Qitornasi kamatseqinasigit, perorsarsigilli anusinngorsartarlugit oqaaqqissaartarlugillu [Jehovamit] pisumik.“ (Efesosimiut 6:4) Ullumikkut angerlarsimaffippassuarni ileqqussatigut ilinniartitaaneq amigaataavoq. Ilaat isumaqarput meeqqat utoqqaanerulerunik namminneq aalajangersinnaalissagaat pingaartitassanut najoqqutassiat sorliit malikkusunnerlugit. Illit tamanna pissusissamisoorsoraajuk? Soorlu inuusuttup timaa nukittuunngussaguni peqqissuussagunilu inuussutissat eqqortut pisariaqartikkai, taamatuttaaq inuusuttup isumaa uummataalu ilinniartinneqartariaqarput. Angerlarsimaffissinni qitornatit ileqqussatigut najoqqutassianik ilinniartinngikkukkit, kammalaatimik ilinniartitsisumillu inuilluunniit tusagassiuutiniittartut isiginnittaasiattut isiginnittaaseqalernissaat ilimanarpoq.

Angajoqqaat qitornaminnik ajunngitsumik ajortumillu immikkoortitsisinnaanermik ilinniartitsinermi Biibili iluaqutigisinnaavaat. (2 Timotheusi 3:16, 17) Jeffip, kristumiup utoqqaanertaasup misilittagaqarluartup meeqqanik marlunnik perorsaasimasup, kajumissaarutigaa pingaartitassanut najoqqutassianik eqqortunik meeqqanik ilinniartitsinermi Biibilip atorneqarnissaa. Ima oqarpoq: „Biibili atoraanni meeqqat paasisinnaassavaat pineqartoq pillugu Pinngortitsisoq qanoq isumaqarnersoq, anaanap ataatallu isumaat kisiisa pinnagit. Malugisarput tassaavoq Biibilip isummamut uummamullu asseqanngitsumik sunniisinnaanera. Eqqunngitsumik pissusilersorneq eqqarsartaaseqarnerluunniit pillugit arlaat oqaloqatigissagaangatsigu allassimaffimmik naleqquttumik ujarlertarpugut. Taava meeraq kisimeeqatigileraangatsigu versi atuartittarparput. Imerlaarsinermik allaat qianermik kinguneqarajuppoq. Tupaallattarpugut. Biibilimi allassimasut kimittunerupput uagut oqaaserisinnaasatsinnit iliuuserisinnaasatsinnilluunniit.“

Hebræerinut allakkani 4:12-imi ima allassimavoq: „Ilumut Guutip oqaasia uumavoq sunniisinnaassuseqarlunilu . . . uummatip eqqarsaatai isumaalu eqqartuuttarlugit.“ Biibilimi tusarliussaq inuit Guutip allatsitut atugaasa isiginnittaaserinngilaat misigisarinaguluunniit. Tassaavorli ileqqussat tungaasigut Guutip isiginnittaasia. Taamaammat siunnersuutit tassaniittut siunnersuutinit allanit tamanit allaanerulluinnarput. Qitornannik ilinniartitsininni Biibilip atortarneratigut Guutip isiginnittaasiatut isiginnittaaseqalernissaannik ikiussavatit. Ilinniartitsinerit sunniuteqarnerussaaq, meeqqallu uummataa killinnerusinnaassavat.

Catherine, siusinnerusukkut eqqaaneqartoq isumaqataalluni ima oqarpoq: „Pissutsit ajornerujartortillugit Biibilimi siunnersuutinik ujaasinerusarpugut — iluatsittarpugullu!“ Qitornavit ajunngitsumik ajortumillu immikkoortitsisinnaanissaannik ilinniartitsininni Biibili atornerusinnaaviuk?

Ingasaassinianngitsuugitsi

Najoqqutassiaq pingaarutilik alla meeqqanik perorsaanermi atorluarneqarsinnaasoq apustilip Paulusip erseqqissarpaa. Uppeqatini ima kajumissaarpai: „Qanilaarsusersi [Ingasaassinianngitsuunersi, NV] ilisimaneqalerli inunnit tamanit.“ (Filippimiut 4:5) Imaappoq qitornavit takusariaqarpaat ingasaassiniartuunngitsutit. Eqqaamajullu ingasaassinianngitsuuneq ’ilisimassusermut pavannga pisumut’ ersiutaammat. — Jaaku 3:17.

 Ingasaassinianngitsuuneq meeqqanik perorsaanermut qanoq tunngagami? Soorunami meeqqat ikiorusunnartarput iliuuserisaat tamaasa nakkutiginngikkaluarlugit. Mario, Jehovap Nalunaajaasuisa ilaat, siuliani eqqaaneqartoq ima oqaluttuarpoq: „Kuisinneq, piffissaq tamaat kiffartorneq anersaakkullu anguniakkat allat pillugit qitornavullu oqaloqatigiissutigiuaannarpavut. Erseqqissaatigaarpulli piffissaq nalliuppat nammineq aalajangertariaqartut.“ Qanoq kinguneqarpa? Maanna qitornaat marluullutik piffissaq tamaat oqaluussisartuupput.

Biibilimi Kolossemiunut allakkani 3:21-mi ataatat ima mianersoqquneqarput: „Ataataasusi qitornasi narrassaassanngilasi qunuleqqunagit.“ Catherinep versi taanna nuannaraa. Naammagittarunnaalernermi kamaqqajaanarsisarpoq piumasaqarnarsisarluniluunniit. Oqarporli „nammineq imminut ilimasuffiginninnermit annerusumit qitornaq piumaffigineqassanngitsoq.“ Catherine aamma Jehovap Nalunaajaasuisa ilagaat, imalu nangippoq: „Jehovamut kiffartorneq nuannersunngortiguk.“

Jeff siusinnerusukkut eqqaaneqartoq ima maluginiagaqarsimavoq: „Qitornavut alliartortut ikinngutigilluakkatta oqarfigaatigut paasisimallugu qitornani piumasaqaraangata qasseriarluni itigartitsisariaqarsimanerluni. Tamanna pakatsinareqaat misigippullu soqqusaanngivillutik. Pakatseqqunagit siunnersorpaatigut suut akuersaarsinnaanerlutigik paasiniassagipput.“

„Siunnersuut nuannaarutigeqaarput,“ Jeff oqarpoq. „Tamatuma kingorna pissutsini uagut akuerisinnaasatsinni qitornatta allanik sammisaqaqatigiiffigisinnaasaannik eqqumaffiginnittalerpugut. Taava tamanna nammineerluta qitornatsinnut eqqartortarparput soorlu ima oqarluta: ’Nalunngiliuk taanna taannalu imatut imatullu aaqqissuussisut? Soormi peqataaguit!’ Imaluunniit qitornatta arlaannut peqatiserigaangatigut, qasoqqagaluaraangattaluunniit immitsinnut pinngitsaalilluta peqataasarpugut. Taamaaliortarpugut itigartitsinnginniaannarluta.“ Tamannarpiaavoq ingasaassinianngitsuuneq — nakerisarsiunnginneq, soqutigittartuuneq Biibilimilu najoqqutassianut akerliusumut nakkaannarani akuersiinnarsinnaaneq.

Siunnersuutit tunngaveqarluartut atortakkit

Angajoqqaat allaaserisami matumani eqqartukkatta amerlanersaat maanna aataajullutillu aanaajupput. Angajoqqaat taakkua nuannaarutigaat takullugu qitornamik Biibilimi najoqqutassiat taakkua namminneq qitornaminnik perorsaanerminni iluaqutigigaat. Siunnersuutit Biibilimeersut illit aamma iluaqutigisinnaavigit?

Ruth, allaaserisap matuma aallaqqaataani eqqaaneqartoq, uinilu meerartaaramik ilaatigut misigisarput ikiortissaaleqillutik. Imminiiginnarneqanngillalli. Iluaqutiginerpaasinnaasartik, tassa Guutip oqaasia, Biibili, pigaat. Jehovap Nalunaajaasuisa atuakkat Biibililersaaruterpassuit pitsaasut saqqummersissimavaat angajoqqaanut iluaqutissatut, ilaatigut ukua: Inuk inuit inuusimasut pingaarnerpaartaat, Biibilimik oqaluttuaatikka, Lyt til den store lærer aamma Unge spørger — Svar der duer. Torlief, Ruthip uia, ima oqarpoq: „Ullumikkut siunnersuuterpassuaqarpoq Biibilimeersunik angajoqqaat atoriaannagaannik. Atortuugunikkik meeqqat alliartorneranni inuunermi sutigut tamatigut iluaqutissaqassagaluarput.“ (wE 11/1 06)

 [Qupp. 5-mi ungalusaq/​assiliartaq]

IMMIKKUT ILISIMASALLIT isumaat . . . BIIBILIMI qanoq allassimasoq

Asanninnermik ersersitsineq pillugu:

Dr. John Broadus Watsonip atuakkiamini The Psychological Care of Infant and Child-imi (1928) angajoqqaat ima siunnersorpai: „[Qitornatit] kuninngisaannakkit pakkutinngisaannarlugillu. Sarliartassanngilatit.“ Ukiut arlalialuit matuma siorna dr. Vera Lane aamma dr. Dorothy Molyneaux atuagassiap Vores børn-ip tuluttuuani marsi 1999-imoortumi ima allapput: „Misissuinerit takutippaat meeqqat timikkut attaveqarsimanatillu asaneqarsimanngitsut ingerlanerliortartut.“

Esaja 66:12-imili erserpoq Guuti innuttaminik asanninnerminik ersersitsisartoq. Versimi tassani oqaaseq atorneqartoq anaanaasup qitornaataalu attaveqatigiinnerannut tunngavoq. Aamma Jiisusip ajoqersukkani avoqqaarai inuit qitornaminnik mikisunik Jiisusimukaassiniartut akornuserniarmatigik, ima oqarpoq: „Meerannguit uannut qaaginnarlit, akornuseqinasigillu.“ Taava allassimavoq Jiisusip ’pakkullugillu assamminik patikkai pilluaqqullugillu’. — Markusi 10:14, 16.

Pingaartitassanut najoqqutassiat pillugit:

1969-imi dr. Bruno Bettelheim-ip New York Times Magazine-mi allaaserisami erseqqissaatigaa meeraq „nammineq isummersinnaatitaasoq, [angajoqqaat] sukannersumik [oqaaqqissaarutaannit] sunnerneqarani, namminerli misilittakkani tunngavigalugit“. Ukiulli 30-ngajaat tamatuma kingorna dr. Robert Coles, The Moral Intelligence of Children-imik (1997) atuakkiortuusoq, ima nassuerpoq: „Meeqqat [angajoqqaamik inersimasulluunniit allat akuerisinnaasaannik] aalajangersimasumik siunertaqarnissaq, maleruarsinnaasaminnik, najoqqutassianik pisariaqartitsingaartut“.

Ussatit 22:6-imi angajoqqaat ima oqarfigineqarput: „Nukappiaraq ingerlavissammigut ingerlaannarnissaanut kajumissaaruk; utoqqaligaluaruniluunniit tamanna nigussanngilaa.“ Hebræerit oqaasiat „kajumissaaruk“-mik nutserneqartoq aamma isumaqarsinnaavoq „aallartiguk“ uanilu pineqarpoq meeqqap ilinniartitaaleqqaarnera. Imaappoq angajoqqaat kajumissaarneqarput meeqqatik mikineraniilli najoqqutassianik peqqinnartunik ilinniartissagaat. (2 Timotheusi 3:14, 15) Ukiuni ineriartorfiusuni taakkunani ilikkakkatik eqqaamajuassagaat ilimanarpoq.

Ilitsersuineq pillugu:

Meeqqat qanoq ilitsersorneqarnissaat isumaqatigiinngissutaajuarsimavoq. 1978-imi dr. James Dobsonip timikkut annersitsilluni pillaaneq ajunngitsutut allaaseraa: „Anaanaasup ataataasulluunniit asannittup timikkut annersitsilluni pillaanera ilinniartitsinermi sakkuuvoq ajoqutaasumik iliuuseqarnermik killilersimaartitsisoq.“ (The Strong-Willed Child) Tamatuma akerlianik atuakkap nuannarineqartup Baby and Child Care-p (1998) arfineq-aappassaanik saqqummernerani dr. Benjamin Spock ima oqarpoq: „Patitsinikkut meeqqat ilikkartarpaat inuk annerpaaq nukittunerpaarlu, eqqortulioraluaruni eqqunngitsulioraluaruniluunniit, piumasamisut iliornissaminut pissaaneqartoq.“

Soqutiginarpoq Biibilimi eqqaaneqarmat allatut ilitsersueriaaseqarnera. Tunngavilersuisoqarsinnaavoq silaqassutsimillu killiiniartoqarsinnaalluni. Ussatit 17:10-mi ima allassimavoq: „Sioorasaarutit [Naveernerit, NV] silassorissumut sunniuteqartarput anaasinerit 100-t sianiitsumut sunniutaannit annerusumik.“

[assiliartaq]

Biibili atorlugu meeqqap uummataa killittaruk

[Qupp. 7-mi assiliartaq]

Angajoqqaat silatuut qitornamik aliikkutaqarnermik pisariaqartitsinerat eqqumaffigisarpaat