„Nuannaaginnassaatit“

„Nalliussissaatit [Jehovamut]. . . . Nuannaaginnassaatit.“ — 5 MOSESI 16:15.

1. (a) Akerleriissutit suut Saatanip pilersippai? (b) Adamip Evallu pikitsitsinerata kingorna Jehovap suna siulittuutigaa?

SAATANIP Adami Evalu Pinngortitsisiminnut pikitsitsisikkamigit akerleriissutit pingaarutillit marluk pilersippai. Siullermik Jehovap sallusuissusia naalakkersueriaasialu apeqquserpai. Aappassaanik Saatanip oqaatigimisaarpaa inuit namminissarsiortumik pissuteqarnertik pissutigiinnarlugu Guutimut kiffartorumassasut. Akerleriissut eqqaaneqartoq kingulleq Jobip nalaani erseqqissumik oqaatigineqarpoq. (1 Mosesi 3:1-6; Jobi 1:9, 10; 2:4, 5) Jehovali pissutsit aaqqinniarlugit iliuuseqapallappoq. Adami Evalu suli Naatsiivimmi Edenimiitillugit Jehova siulittuivoq qanoq aaqqiissanerluni. Siulittuutigaa ’kinguaassamik kimmimmigut aserorterneqartussamik’ tamatumalu kingorna Saatanip niaquanik aserorterisussamik taassuminngalu piuneerussisussamik saqqummersoqarumaartoq. — 1 Mosesi 3:15, NV.

2. Jehovap siulittuummik Mosesimik allakkat siulliit 3:15-imiittumik qanoq eqquutititsiniarnini qanoq paasinarsisippaa?

² Piffissap ingerlanerani Jehovap siulittuut taanna paasinarsisikkiartuaarpaa taamaalillunilu ersersillugu tamatuma ullut ilaanni piviusunngorumaarnera qularnanngilluinnartoq. Assersuutigalugu Guutip Aaperaat nalunaarfigaa ’kinguaassaq’ taassuma kinguaavini saqqummerumaartoq. (1 Mosesi 22:15-18) Aaperaap erngutaa Jaaku Israelip naggueqatigiissortaanut aqqaneq-marlunnut ataatanngorpoq. 1513-imi u.n.s. naggueqatigiissortat taakkua inuiaqatigiinngormata Jehovap inatsisinik ukiumoortumik nalliuttunik assigiinngitsunik ilalinnik tunivai. Apustili Paulusi oqarpoq nalliuttut taakkua ’piumaartussap tarrarigai’. (Kolossemiut 2:16, 17; Hebræerit 10:1) Taakku Jehovap kinguaassaq pillugu siunertaminik qanoq naammassinnikkumaarneranut assersuutaapput. Nalliuttorsiornerit tamakkua Israelikkunnik assorsuaq nuannaartitsipput. Taakkuninnga misissuilaarneq Jehovap neriorsuutaasa uppernartuunerannik upperinninnitsinnut nakussatsissutaassaaq.

Kinguaassaq saqqummerpoq

3. Kinguaassaq neriorsuutigisaasoq kinaava, qanorlu taassuma kimmia aserorterneqarpa?

³ Jehovap siulittuutiginninneranit ukiut 4000-it qaangiutereersut kinguaassaq neriorsuutigisaq saqqummerpoq. Kinguaassaq tassaavoq Jiisusi. (Galatiamiut 3:16) Jiisusi inuttut naammalluinnartutut toqussi tikillugu assuarnaattuarpoq taamaalillunilu uppernarsarlugu Saatanip unnerluutiginnissutai eqqunngitsuusut. Aamma Jiisusi ajorteqannginnami, toqunermini pilliutaa naleqartorujussuuvoq. Pilliut tamanna iluaqutigalugu Jiisusip Adamip Evallu kinguaavisa aalajaatsut ajortimit toqumillu aniguisinneqarsinnaanissaat aqqutissiorpaa. Jiisusi nappakkami anniartitaaffimmi toqummat kinguaassap neriorsuutigisaasup ’kimmia aserorterneqarpoq’. — Hebræerit 9:11-14.

4. Jiisusip pilliutaa qanoq siumut assersuunneqarpa?

⁴ Jiisusi ukiumi 33-mi u.n.k. nisanip 14-iani toquvoq. * Israelimi nisanip 14-iat ulluuvoq nuannaangaarluni poorskisiorfiusartoq. Ukiut tamaasa ilaqutariit ulloq taanna nereqatigiittarput, ilaatigullu savaaraq innarluuteqanngitsoq nerisarpaat. Taamaalillutik eqqaaniartarpaat savaaqqap poorskisiutissap aavata Israelikkut angajulliliaannut annaassissutaasimanera, toqup inngilia Egyptenimiut angajulliliaannik ukiumi 1513-imi u.n.s. nisanip 14-iani toqoraammat. (2 Mosesi 12:1-14) Savaaraq poorskisiutissaq Jiisusimut siumut assersuutigineqarpoq, taannalu pillugu apustili Paulusi ima oqarpoq: ’Poorskisiutissarput, tassa Kristusi, toqunneqarpoq.’ (1 Korinthimiut 5:7) Savaaqqap poorskisiutissap aavata inuppassuarnut annaassissutaasimaneratut Jiisusip aava kuineqartoq inuppassuarnut annaassissutaavoq. — Johannesi 3:16, 36.

 ’Sinippaartut inereqqaataat’

5, 6. (a) Jiisusi qanga makititaava, pisimasorlu tamanna Mosesip inatsisaani qanoq siumut assersuutigineqarpa? (b) Jiisusip makititaanera pissutigalugu siulittuut Mosesimik allakkat siulliit 3:15-imiittoq qanoq ililluni eqquussinnaanngorpa?

⁵ Jiisusi toqunermi kingorna ullut pingajuanni makititaavoq pilliutimi nalinga Ataataminut sassaassinnaaqqullugu. (Hebræerit 9:24) Nalliuttoq alla, tassa seernarsaateqanngitsumik timiusartorfiup nalliussineqarnera, taassuma toqusunit makititaaneranut siumut assersuutaavoq. Nalliussineq tamanna aallartittarpoq nisanip 14-iata aqaguani. Nalliussinerullu ulluisa aappaanni, nisanip 16-iani, karrinik suaasiassanik killukkat inereqqaataasut, Israelimi karrit inerittut siulliit, qilertanngorlugit palasimukaanneqartarput, taassumalu taakkua Jehovap kiinaata saani nittarterutigisarpai. (3 Mosesi 23:6-14) Ukiumi 33-mi u.n.k., ullormi tamatumanerpiaq, Saatanip Guutip ’nalunaajaasuanik ilumoorlunilu sallusuitsumik’ peqqarniitsumik naassaanngitsumut nipangersitseriaraluarneranik Jehovap akornusiinera naleqqutingaarami! Taamaalilluni Jehovap ukiumi 33-mi u.n.k. nisanip 16-iani Jiisusi toqusunit anersaatut toqujuissusermut makitippaa. — Saqqummersitat 3:14; 1 Petrusi 3:18.

⁶ Jiisusi ’sinippaartuni inereqqaartunngorpoq’. (1 Korinthimiut 15:20) Siusinnerusukkut toqusunit makititaasimasutut pinnani Jiisusi toqoqqinngilaq. Qilaliarporli Jehovap talerpiata tungaani issianiarluni tassanilu utaqqissalluni Jehovap naalagaaffiani qilammiittumi kunnginngortinneqarnissami tungaanut. (Tussiaat 110:1; Apustilit Suliaat 2:32, 33; Hebræerit 10:12, 13) Maanna Jiisusi kunnginngortinneqareerami akerarsuarmi, Saatanip, niaquanik ataasiaammik aserorterisinnaavoq taassumalu kinguaassaanik suujunnaarsitsisinnaalluni. — Saqqummersitat 11:15, 18; 20:1-3, 10.

Aaperaap kinguaavinut suli allat ilanngunneqarput

7. Nalliussivik suugami?

⁷ Jiisusi tassaavoq kinguaassaq Edenimi neriorsuutigineqartoq Jehovallu ’Diaavulup suliaanik suujunnaarsitsinissamut’ atorniagaa. (1 Johannesi 3:8) Jehovalli Aaperaat oqaluukkamiuk oqaatigimisaarpaa Aaperaap ’kinguaassai’ inummit ataatsimit amerlanerussasut. Taakku ’qilaap ulloriaasut sioqqatullu sissamiittutut amerlatigilersussaapput’. (1 Mosesi 22:17) Nalliuttoq nuannersoq alla allat Aaperaap ’kinguaassaanut’ ilaalersussaanerannut siumut assersuutaavoq. Ullut 50-it nisanip 16-iata kingorna Israelikkut nalliussivik nalliuttorsiutigisarpaat. Nalliussivik tamanna pillugu Inatsisini ima allassimasoqarpoq: „Ullut 50-ianni, tassa sabbatit arfineq-aappaata aqaguani, naatitanit inererlaanit tunissutitut pilliutissat [Jehovamut] sassaatissavasi. Angerlarsimaffissinnit nassassavasi timiusat marluk nittarterutigineqartussat. Taakku seernarsaaserlugit timiusaliugaassapput qajuusanit aseqqorissunit efap qulerarterutaanit marlunnit. Tassa inereqqaanit [Jehovamut] pigitinneqartussat.“ * — 3 Mosesi 23:16, 17, 20.

8. Ukiumi 33-mi u.n.k. piinsip ulluani maluginiarnartumik sumik pisoqarpa?

⁸ Jiisusi nunarsuarmiikkallarmat nalliussivik piinsitut ilisimaneqarpoq (oqaaseq piinsi grækerit oqaasiannit pentēkostēʹ-mit, „50-iat“-nik isumaqartumit, naggueqarpoq). Ukiumi 33-mi u.n.k. piinsip ulluani palasiunerup annerup, Jiisusi  Kristusip, anersaaq illernartoq ajoqersukkanut 120-nut Jerusalemimi katersuussimasunut kuivaa. Taamaalillutik ajoqersukkat taakkua Guutimit ernerineqalerput tanitat Jiisusi Kristusimullu qatanngutaalerlutik. (Romamiut 8:15-17) Inuiaqatigiinngorput nutaat, „Israeli Guutip pigisaa“. (Galatiamiut 6:16) Naggataatigut Guutimit ernerineqartut tanitat ikittunnguit taakkua 144.000-inngussapput. — Saqqummersitat 7:1-4.

9, 10. Piinsip ullua kristumiut tanitat ilagiissaannut qanoq ililluni siumut assersuutaava?

⁹ Timiusat marluk seernarsaatillit palasip piinseraangat tamatigut Jehovap saani issartittagai kristumiut tanitat ilagiissaannut siumut assersuutaapput. Timiusat seernarsaateqarnerat kristumiut tanitat ajortip seernarsaataanik suli pigisaqarumaarnerannut assersuutaavoq. Taamaakkaluartorli Jiisusip utertitsissutitut pilliutaa tunngavigalugu Jehovamut qanillisinnaapput. (Romamiut 5:1, 2) Sooq timiusat marluuppat? Guutimit ernerineqartut tanitat eqimattanit marlunnit — siullermik uinikkut juutinit kingusinnerusukkullu juutiunngitsunit — piffissap ingerlanerani immikkoortinneqarumaarnerannut assersuutaasimasinnaavoq. — Galatiamiut 3:26-29; Efesosimiut 2:13-18.

¹⁰ Timiusat taakku marluk piinsip ulluani pilliutigineqartut qajuusiassat inereqqaataanneersuupput. Tamatumunnga assingusumik kristumiut anersaakkut kinguaassiarititaasut Guutip ’pinngortitaani inereqqaataasutut’ taaneqarput. (Jaaku 1:18) Taakku siulliullutik Jiisusip aava kuineqartoq tunngavigalugu ajortiminnik isumakkeerfigineqarput, tamannalu pissutigalugu qilammi, Jiisusimik taassuma naalagaaffiani naalakkersueqateqarfissaminni, toqujuitsunngortitaasinnaapput. (1 Korinthimiut 15:53; Filippimiut 3:20, 21; Saqqummersitat 20:6) Guutip ernerimmatik qilammiusut qanittukkut ’kunngisut tigumiaq saviminiusoq atorlugu [inuiaqatigiit] paarissavaat’ ’Saatanilu isikkamik ataanni sequmisinneqartoq’ takussallugu. (Saqqummersitat 2:26, 27; Romamiut 16:20) Apustili Johannesi ima oqarpoq: „Savaaraq sumulluunniit aallaraangat malittarpaat, inunnillu immikkoortinneqarsimapput inereqqaataasutut Guutimut Savaaqqamullu akiliunneqarlutik.“ — Saqqummersitat 14:4.

Ulloq aniguisinneqarnissamik eqqarsaatiginnilersitsisoq

11, 12. (a) Ullormi saammaannartitsivimmi susoqartarpa? (b) Nersummik angutivissamik savaasanillu angutivissanik marlunnik pilliuteqartoqartarnera Israelikkut qanoq iluaqutigaat?

¹¹ Qaammatip etanimip (kingusinnerusukkut  tisjri-mik taaneqartartup) * ulluisa qulinganni Israelikkut ulloq saammaannartitsivik, Jiisusip ajortit matoorneqaatissaattut pilliutaata iluaqutissartaasa qanoq atorneqarumaarnerannut siumut assersuutaasoq, nalliuttorsiutigisarpaat. Ullormi tamatumani Israelikkut ajortuliatik saammaanneqaqqullugit sinnerlutik pilliuteqartitsiniarlutik katersuuttarput. — 3 Mosesi 16:29, 30.

¹² Ullormi saammaannartitsivimmi palasiunerup nersuteeraq angutiviaq toquttarpaa, Illernarnerpaamilu taassuma aavata ilaa illerfiup matuanut arfineq-marloriarluni serpartaattarpaa, taamaalillunilu assersuutaasumik aak Jehovap kiinaata saani pilliutigisarpaa. Pilliut tamanna pilliutigineqartarpoq palasiuneq taassumalu ’inoqutai’, tassa palasit Levikkullu, saammaannarteqqullugit. Taava palasiunerup savaasat angutivissat marluk tigusarpai. Aappaa „Israelikkunnut tunngatillugu“ ajortaaruteqqussutitut pilliutissatut toquttarpaa. Aamma taassuma aavata ilaa Illernarnerpaami illerfiup matuata sioraani serpartaanneqartarpoq. Tamatuma kingorna palasiunerup assani illuttut savaasap angutivissap aappaata niaquanut tutsittarpai qulangerlugulu Israelikkut ajortuliarisimasaat tamaasa nassuerutigisarlugit. Taava savaasaq angutiviaq angummut tunniuttarpaa, angutillu taassuma savaasaq inoqajuitsumukaattarpaa inuiaqatigiit ajortuliaat tamaasa assersuutaasumik aallarunniassammagit. — 3 Mosesi 16:3-16, 21, 22.

13. Ullormi saammaannartitsivimmi pisut Jiisusip pilliutaanut qanoq siumut assersuutaappat?

¹³ Iliuutsini taakkunani siumut assersuutigineqartutut ajortuliat isumakkeerfigineqarsinnaaqqullugit palasiunerup annerup, Jiisusip, nammineq aammi nalinga atorpaa. Siullermik taassuma aavata nalinga kristumiut tanitat 144.000-it ’illuannut’ anersaakkut ittumut iluaqutaasumik atorneqarpoq. Taamaalillutik taakku naapertuilluartuutitaasinnaallutillu Jehovap isaani minguitsuusinnaapput. (1 Petrusi 2:5; 1 Korinthimiut 6:11) Tamanna nersummik angutivissamik pilliinermi siumut assersuutigineqarpoq. Taamaalilluni tanitat qilammi kingornussarsinissaat aqqutissiuunneqarpoq. Tulliullugu Jiisusip aavata nalinga inunnut millionilinnut allanut Kristusimik upperinninnerminnik ersersitsisunut iluaqutaasumik atorneqarpoq, savaasamik angutivissamik pilliinermi assersuutigineqartutut. Taakku nunarsuarmi maani inuuneq naassaanngitsoq, kingornussassaq Adamip Evallu annaasaat, pilluaqquneqaatigissavaat. (Tussiaat 37:10, 11) Jiisusip aani kuineqartoq tunngavigalugu inuit ajortuliaat aallaruppai, soorluttaaq savaasap uumasup Israelikkut ajortuliaat inoqajuitsumut assersuutaasumik aallarukkai. — Esaja 53:4, 5.

 Jehovap kiinaata saani nuannaarneq

14, 15. Tupiusaliorfiup nalliussineqarnerani susoqartarpa, tamatumanilu Israelikkut sumik eqqaasinneqartarpat?

¹⁴ Ullup saammaannartitsiviup kingorna Israelikkut tupiusaliorfik nalliussisarpaat, juutit ukiumoortumik nalliuttorsiutigisartagaannit tamanit tipaatsunnarnerpaaq. (3 Mosesi 23:34-43) Etanimip 15-ianit 21-ata tungaanut tupiusaliorfik nalliussineqartarpoq, tamannalu naggaserneqartarpoq qaammatip ulluisa 22-anni nalliuttorsiorluni katersuunnermik. Nalliuttorsiorneq katersuiffiup qaangiussimaneranut ersiutaavoq, nunallu inerititaanik katersuineq nalliuttorsiutigineqartarpoq Guutilu ajunngingaassusersua pillugu qutsavigineqartarluni. Taamaammat Jehovap nalliuttorsiortut ima peqquai: „[Jehovap] Guutivit pilluaqqussavaatit naatitatit suliarisatillu tamaasa ilanngullugit. Taamaattumik nuannaaginnassaatit.“ (5 Mosesi 16:15) Piffissaasimassaaq nuannaarfiungaartoq!

¹⁵ Nalliuttorsiornerup tamatuma nalaani Israelikkut ulluni arfineq-marlunni tupiusani najugaqartarput. Taamaalillutik eqqaasinneqartarput inuiaqatigiit inoqajuitsumi tuperni najugaqarsimanerannik. Nalliuttorsiorneq pissutigalugu Jehovap imminnik ataatatut isumassuilluarneranik eqqarsaatiginneqqissaarnissamut periarfissaqarluartarput. (5 Mosesi 8:15, 16) Israelikkullu tamarmik, pisuut piitsullu, tuperni assigiinni najugaqaramik, eqqaasinneqarput nalliuttorsiornerup nalaani tamarmik naligiillutik. — Nehemia 8:14-16.

16. Tupiusaliorfik sumut siumut assersuutaava?

¹⁶ Tupiusaliorfik nalliuttorsiorneruvoq katersukkanik nuannaarutiginniffiusoq, tamannalu Jiisusi Kristusimik upperinninnerminnik ersersitsisunik katersuinermut nuannersumut siumut assersuutaavoq. Katersuineq tamanna ukiumi 33-mi u.n.k. piinsip ulluani, Jiisusip ajoqersugai 120-t ’palaseqatigiinnut illernartunut’ ilaasussatut taninneqarmata, aallartippoq. Israelikkut ullualunni tupiusani najugaqartarnerattut, tanitat nalunngilaat silarsuarmi guutiitsumi matumani ’najugaqarallaannarlutik’. Taakku qilaliarnissamik neriugisaqarput. (1 Petrusi 2:5, 11, NV) Kristumiunik tanitanik katersuineq ’ulluni kingullerni’ makkunani, 144.000-it ilaasa kingulliit katersorneqarfianni, naammassineqassaaq. — 2 Timotheusi 3:1.

17, 18. (a) Jiisusip pilliutaata kristumiunut tanitanuinnaanngitsoq iluaqutaanera sumi erserpa? (b) Tupiusaliorfik assersuutaasoq ullumikkut kikkut iluaqutigaat, qaqugulu nalliuttorsiornerup nuannersup tamatuma nuannernerpaaffissani nallissavaa?

 ¹⁷ Maluginiarnarpoq itsaq tupiusaliorfiup nalliussineqarnerani nersutinik angutivissanik 70-inik pilliisoqartarnera. (4 Mosesi 29:12-34) Kisitsit 70 kisitsisinit 7-imit 10-millu amerlisagaavoq. Biibilimi kisitsit 7 atorneqaraangat qilammi naammalluinnassuseq pineqartarpoq, 10-lu atorneqaraangat nunarsuarmi naammalluinnassuseq pineqartarpoq. Taamaalilluni Jiisusip pilliutaa eqqarleriit 70-it Noakkunnit naggueqartut kinguaavinut aalajaatsunut tamanut iluaqutaassaaq. (1 Mosesi 10:1-29) Tamatumunnga naapertuuttumik ullutsinni inuit inuiannit tamaneersut Jiisusimik upperinninnerminnik ersersitsisut nunarsuarmilu paratiisiusumi inuulernissaminnik neriugisaqartut katersorneqarput.

¹⁸ Apustili Johannesi katersuineq ullutsinni pisussaq tamanna pillugu takorruuisinneqarpoq. Siullermik 144.000-it ilaasa kingulliit naqissuserneqarsimanerata nalunaarutigineqarnera tusarpaa. Taava takuai „inuppassuit amerlangaaramik kisinneqarsinnaanngitsut“ Jehovap Jiisusillu saavanni qeqartut „palmit avalequtaannik tigumiaqarlutik“. Taakku ’annikilliortitaangaarnermit aniguissapput’ silarsuassamullu nutaamut isissallutik. Taakkuattaaq pissutsinik aaqqissuussaanitoqqami matumani najugaqarallaannarput, piffissarlu ’Savaaqqamit paarineqarfissartik puilasunullu inuussutaasunut ingerlatinneqarfissartik’ isumalluarlutik qilanaaraat. Taamanikkussamut „Guutip qulliit tamaasa isaannit allarterumaarpai“. (Saqqummersitat 7:1-10, 14-17) Tupiusaliorfiup assersuutaasup nuannernerpaaffissani nallerumaarpaa Kristusip ukiuni tusindini naalakkersuinera naappat amerlangaartullu toqusunit makititaasimasut aalajaatsut naassaanngitsumik inuusussanngortitaappata. — Saqqummersitat 20:5.

19. Israelimi nalliuttorsiutigineqartarsimasunik misissuinerput qanoq iluaqutigaarput?

¹⁹ Uaguttaaq ’nuannaanngitsoorsinnaasanngilagut’ itsaq juutit nalliuttorsiutigisartagaasa isumaat eqqarsaatigeqqissaaraangatsigit. Jehovap Naatsiivimmi Edenimi siulittuutigisami qanoq ililluni eqquukkumaarneranik siumut assersuutit atorlugit paasititsisimanera nalunagu nuanneqaaq. Eqquukkiartuaarneralu malinnaaffigalugu pissanganarpoq. Ullumikkut nalunngilarput kinguaassaq saqqummereersoq aamma kimmia aserorterneqareersoq. Maanna taanna qilammi kunngiuvoq. Aamma 144.000-it amerlanersaat toqumut allaat aalajaattuarnerminnik ersersitsereerput. Taava allanik sunik pisoqassava? Siulittuutip naggataatungaa qanoq sukkatigisumik eqquutissava? Allaaserisami tulliuttumi tamanna sammineqassaaq.

[Quppernerup ataani ilanngussat]

Uku nassuiarsinnaavigit?

• Savaaraq poorskisiutissaq sumut siumut assersuutaava?

• Piinsip ullua katersuinermut sumut siumut assersuutaava?

• Ullormut saammaannartitsivimmut tunngasut ilaat suut Jiisusip pilliutaata atorneqarneranut tikkuussippat?

• Tupiusaliorfik kristumiunik katersuinermut qanoq ililluni siumut assersuutaava?

[Atuaqqissaarnermi apeqqutit]

[Qupp. 14, 15-mi nalunaarsukkat]

(Tekstens opstilling ses i den trykte publikation)

Poorski

Nisanip 14-iat

Pisimasoq:

Savaaraq poorskisiutissaq pilliutigineqarpoq

Siumut assersuutigineqartoq:

Jiisusi pilliutigineqarpoq

Nalliussivik seernarsaate qanngitsumik timiusartorfik (nisanip 15-ianit 21-anut)

Nisanip 15-iat

Pisimasoq:

Sabbati

Nisanip 16-iat

Pisimasoq:

Karrit suaasiassat qilertat pilliutigineqarput

Siumut assersuutigineqartoq:

Jiisusi makitinneqarpoq

Ullut 50-it

Nalliussivik (piinsi)

Sivanip ulluisa arfernat

Pisimasoq:

Timiusat marluk pilliutigineqarput

Siumut assersuutigineqartoq:

Jiisusip qatanngutini tanitat Jehovamut sassaappai

Ulloq saammaannartitsivik

Tisjrip ulluisa qulingat

Pisimasoq:

Nersut angutiviaq savaasallu angutivissat marluk pilliutigineqarput

Siumut assersuutigineqartoq:

Jiisusip aammi nalinga inuiannut tamanut iluaqutaasumik sassaappaa

Tupiusaliorfik (katersuiffik)

Tisjrip 15-ianit 21-anut

Pisimasoq:

Israelikkut tupiusani najugaqarnertik aamma katersuineq nuannaarutigaat; nersutit angutivissat 70-it pilliutigineqarput

Siumut assersuutigineqartoq:

Tanitanik ’amerlangaartunillu’ katersuineq

[Qupp. 13-mi assiliartat]

Savaaqqap poorskisiutissap aavata inuppassuarnut annaassissutaaneratut Jiisusip aava kuineqartoq inuppassuarnut annaassissutaavoq

[Qupp. 14-mi assiliartat]

Karrinik suaasiassanik killukkat inereqqaataat nisanip 16-iani pilliutigineqartut Jiisusip makititaaneranut siumut assersuutaapput

[Qupp. 15-mi assiliartat]

Timiusat marluk piinsip ulluani pilliutigineqartut kristumiut tanitat ilagiissaannut siumut assersuutaapput

[Qupp. 16-mi assiliartat]

Tupiusaliorfik tanitanik ’amerlangaartunillu’ inuiannit tamaneersunik katersuinermut nuannersumut siumut assersuutaavoq