Ilissi nuliaasusi, uisi ataqqingaarsigik

’Nuliaasusi uissinnut naalatsigitigitsi.’ — EFESOSIMIUT 5:22.

1. Sooq arnap uini ataqqiuminaatsittarpaa?

NUNARPASSUARNI arnaq ullormi katiffimmini pingaartorsiorluni neriorsuisarpoq uini ataqqingaarumallugu. Neriorsuutilli tamatuma qanoq eqqortikkuminaatsiginissaanut uiusup nuliaminut pinneriaasia aalajangiisuuvoq. Aappariinnermilli aaqqissuussineq nuanningaartumik aallartippoq. Guuti Adamimit, angummit siullermit, najungasumik tigusivoq arnarlu pinngortillugu. Adamilu ima oqarpoq: „Tamanna tassa saaneq saanerma ilaa uinillu uinimma ilaa.“ — 1 Mosesi 2:19-23.

2. Nalitsinni arnat aappariinnermut isiginnittaasiat qanoq ilisimava?

² Aappariinneq nuannersumik aallartikkaluartoq 1960-ikkut aallartilaarneranni arnanik nammineernerulernianik taagorneqartut USA-mi pilerput. Tamatuma nalaani arnaq ataaseq ilaquttaminik qimatsigaangat uiusut 300-riaammik amerlanerusut ilaquttaminnik qimatsisarput. 1960-ikkut naalerneranni arnaq ataaseq ilaquttaminik qimatsigaangat uiusut ilaquttaminnik qimatsisartut 100-riaataannanngorsimapput. Maanna arnat angutitulli oqaasipilutsigisarpasillutillu imertigisarpasillutillu pujortartigisarpasillutillu kinguaassiuutitigut inuunerlutsigisarpasipput. Tamanna arnat pilluarnerulernerannik kinguneqarpa? Naagga. Nunat ilaanni katittut affaata missaat avittarput. Arnat ilaasa aappariittut atukkaminnik pitsaanerulersitsiniarlutik ilungersornerat iluaqutaasimava ajoqutaasimavaluunniit? — 2 Timotheusi 3:1-5.

3. Ajornartorsiut suna aappariinnermut sunniuteqartarpa?

³ Ajornartorsiutaasoq suua? Ilaatigut tassaavoq ajornartorsiut Eva inngilimit pikitsitsiumatuumit, ’pulateriaarsutoqqamit Diaavulumik Saatanimillu taaneqartumit’, tammartitaammalli piusimasumut assingusoq. (Saqqummersitat 12:9; 1 Timotheusi 2:13, 14) Saatanip Guutip ajoqersuutai allatut isumaqalersippai. Assersuutigalugu aappariinneq naalagarsiornartutut akimmisaarnartutullu isikkoqalersippaa. Silarsuarmi matumani — taassuma naalagaaffigisaani — tusagassiuutitigut taamatut sunniiniarneranut siunertaasoq tassaavoq Guutip siunnersuutaasa naapertuilluanngitsutut ittangasutullu isumaqarfigineqalernissaat. (2 Korinthimiut 4:3, 4) Isummakkulli ammalluta arnap aappariinnermi inissisimaffia pillugu Guuti qanoq oqarnersoq misissorutsigu, paasissavarput Guutip oqaasia ilisimassutsimik qanoq imaqartigisoq qanorlu atoriaannaatigisoq.

Katikkumaguit eqqarsarluaqqaarit!

4, 5. (a) Sooq katinnialersaartut mianersoqquneqarnissaat pisariaqarpa? (b) Arnaq katinnissaminut akuersitinnani susariaqarpa?

⁴ Biibilimi mianersoqqussuteqarpoq. Allassimavoq silarsuarmi matumani, Diaavulumit aqunneqartumi, aappariittut pilluaraluartut ’naalliuuteqartarumaartut’ (1900/1961). Tassa aappariinneq aaqqissuussaagaluartoq Guutimit pilersinneqarsimasoq, katinnialersaartut Biibilimi mianersoqquneqarput. Isumassarsisitaalluni Biibilimik allaqataasup arnaq uillarsimasoq taamaattumillu kateqqinnissaminut kiffaanngissuseqartoq ima allaatigaa: „Pilluarnerussaaq aappaneqqinngikkuni.“ Jiisusittaaq ’taamaaliorsinnaasut’ (NV) kajumissaarpai aappaneqqunagit. Aappartaarniarlunili aalajangeraanni aappanittariaqarpoq „Naalakkami“, tassa Guutimut kiffaasumik tunniulluinnarsimasumik kuisimasumillu. — 1 Korinthimiut 7:28, 36-40; Matthæusi 19:10-12.

⁵ Pingaartumik arnap kimut katinniarnerminik  eqqarsaatiginneqqissaartariaqarneranut pissutaasoq tassaavoq mianersoqqussut Biibilimiittoq manna: „Arnaq uilik inatsisitigut uiminut qilersugaavoq.“ Aatsaat uiusoq toquppat, imaluunniit kinguaassiuutitigut inuunerluppat tamannalu pissutigalugu aappariit avippata, taassuma ’inatsisaanit oqaasissaqarfigineerutissaaq’. (Romamiut 7:2, 3) Qiviatsiaannarluni asannilersoorneq sivikitsumik ajuutigiinnermik kinguneqarsinnaavoq, tamannali pilluarluni aappariinnissamut tunngavissaanngilaq naammattoq. Taamaammat arnaq aappaqanngitsoq imminut ima aperisariaqarpoq: ’Aappartaarumavunga angutillu taassuma inatsisaanut naalatsigitilerlunga?’ Tamanna eqqarsaatigineqartariaqarpoq aappaninnginnermi, aappanereeraanniunngitsoq.

6. Ullumikkut arnat amerlanersaasa suna namminneq aalajangersinnaavaat, aamma sooq tamanna taama pingaaruteqartigaa?

⁶ Ullumikkut nunarpaalunni arnap katikkumaneqarnerminut akuersissanerluni itigartitsissanerluniluunniit nammineq aalajangersinnaavaa. Tamatumunngali tunngatillugu isumatusaartumik aalajangernissaq aalajangigassaminit tamanit sapernarnerpaatissinnaavaa, kissaatigisupilussuusinnaavaami qanitariinneq asaqatigiinnerlu aappaqalernikkut anguneqarsinnaasut. Allaatiginnittartoq ima allappoq: „Arlaannik kissaateqarnerujartortilluta — kissaatigisarput katinnissaagaluarpat qaqqamilluunniit qaqisinissaagaluarpat — isummipallaqqajaanerujartuinnassallutalu paasissutissat tusarusutatsinnut tunngasut kisiisa eqqumaffigeqqajaanerujartuinnassavavut.“ Qaqqasiortoq silatusaarnani aalajangeruni toqusinnaavoq, taamatulli aappassamik silatusaarnani toqqaaneq ajunaarutaasinnaavoq.

7. Aappassarsiornermut tunngatillugu suna siunnersuutigineqarpa?

⁷ Arnap nuliarsarfigineqaruni eqqarsaatigeqqissaartariaqarpaa angutip imminik nuliarsarfiginnittup inatsisaanut naalatsigitinneq qanoq kinguneqassanersoq. Ukiualuit matuma siorna arnaq inuusuttoq Indiamiu maniguulluni ima nassuerpoq: „Angajoqqaavut uagutsinnit misilittagaqarnerullutillu silatunerupput, aamma uagutsitulli nakutikkuminartiginngillat. . . . Uanga kukkusumik aalajangertooriaannaavunga.“ Angajoqqaat allallu ikiuisinnaanerat pingaaruteqartorujussuuvoq. Angutip sianisuup ukiorpassuarni inuusuttut siunnersortarsimavai sakerilersinnaasatik ilisarisimallualeqqullugit aapparilerusutamillu angajoqqaaminut ilaquttaminullu allanut attaveqarnera maluginiaqqissaaqqullugu.

Jiisusi qanoq naalatsigitittoq

8, 9. (a) Guutimut naalatsigitinneq Jiisusip qanoq isigaa? (b) Naalatsigitinneq qanoq kinguneqarluarsinnaava?

⁸ Naalatsigitinneq unamminiarnarsinnaagaluartoq arnat tamanna ataqqinaatitut isigisinnaavaat, soorlu Jiisusip taamatut isigisimagaa. Jiisusip Guutimut naalatsigitinnera naalliunnermik, allaat nappakkami anniartitaaffimmi toqumik, kinguneqarpoq, taamaakkaluartorli naalatsigitikkami nuannaarpoq. (Lukasi 22:41- 44;  Hebræerit 5:7, 8; 12:3) Arnat Jiisusi maligassamittut isigisinnaavaat, Biibilimimi ima allassimavoq: ’Arnap angut niaqoraa, Kristusillu niaqua Guutiuvoq.’ (1 Korinthimiut 11:3) Malugisariaqarporli imaanngimmat arnat aatsaat katikkunik angutit siulersuinerannut naalatsigitissasut.

⁹ Biibilimi nassuiarneqarpoq arnat, aappaqaraluarunik aappaqanngikkaluarunilluunniit, angutinut piumasaqaatinik anersaakkut ittunik eqqortitsisunut, ilagiinnik kristumiunik nakkutilliisunut, naalatsigitittussaasut. (1 Timotheusi 2:12, 13; Hebræerit 13:17) Arnat Guutip tamatumunnga tunngatillugu siunnersuutaanik malinnikkaangamik Guutip peqatigiissortaani inngilinut maligassiisarput. (1 Korinthimiut 11:8-10) Aammattaaq arnat aappallit utoqqaanerusut maligassiuilluarnermikkut iluaqutaasinnaasunillu siunnersuuteqarnermikkut arnanik inuusuttunik ’uiminnut naalatsigitinnissaannik’ ilinniartitsisinnaapput. — Titusi 2:3-5.

10. Jiisusi naalatsigitinnermut tunngatillugu qanoq maligassiuiva?

¹⁰ Jiisusip naleqqulluaraangat naalatsigitinnissap pingaaruteqassusia nalunngilaa. Ilaanni Petrusi unnersuuppaa marluullutik akileraarutissatik oqartussaasunut nunamiusunut tunniuttaqqullugit, Petrusillu tamatumunnga aningaasassaqarnissaa allaat isumagaa. Kingusinnerusukkut Petrusi ima allappoq: „Naalagaq pillugu naalatsigitigitsi inuit aaqqissuussaannut sunulluunniit.“ (1 Petrusi 2:13; Matthæusi 17:24-27) Jiisusip naalatsigitinnermut tunngatillugu maligassiaa asseqanngitsoq pillugu ima allassimasoqarpoq: „Iperarpaa [qilammi naalannassutsini anersaajuninilu] kiffap isikkua atillugu inuillu assigilerlugit; saqqummerami inuttut nikanartippoq naalalluni toqumut . . . allaat.“ — Filippimiut 2:5-8.

11. Sooq Petrusip nuliaasut allaat uiminnut uppinngitsumut naalatsigiteqqullugit kajumissaarpai?

¹¹ Petrusip kristumiut silarsuarmi matumani oqartussaasunut sukannerlutillu naapertuilluanngitsunut naalatsigiteqqullugit kajumissaaramigit ima nassuiaavoq: „Tamatumunngami qaaqqusaavusi Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.“ (1 Petrusi 2:21) Jiisusip qanoq naalliutsiginera taamaakkaluartorlu naalatsigittuarnera allaatigereerlugu, Petrusip arnat uppinngitsumik uillit ima kajumissaarpai: „Taamatuttaaq ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.“ — 1 Petrusi 3:1, 2.

12. Jiisusip naalatsigitinnera qanoq kinguneqarluarpa?

¹² Mitaatigineqaraluarluni peqqarniitsumillu pineqaraluarluni naalatsigitikkaanni, tamanna sanngiinnermut ersiutitut isigineqarsinnaavoq. Jiisusilli tamanna taamatut isiginngilaa. Petrusi ima allappoq: „Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq.“ (1 Petrusi 2:23) Jiisusip naalliunneranik takunnittut ilaat uppissuseqalerput. Taakku ilagaat piiaasoq Jiisusip kikiattugaaqataa sakkutuullu naalagaat Jiisusip toqutaaneranik takunnittoq. (Matthæusi 27:38-44, 54; Markusi 15:39; Lukasi 23:39-43) Taamatuttaaq Petrusip oqaatigimisaarpaa uiusut uppinngitsut — allaat peqqarniillutillu soqutigittaatsut — ilaat nuliamik maniguunnerat maluginiareerlugu kristumiunngorumaartut. Ullumikkut taamatut pisoqartarnera nalunngilarput.

Nuliaasut uitik qanoq ilataarisinnaagaat

13, 14. Nuliaasut uiminnut uppinngitsumut naalatsigitinnerat qanoq kinguneqarsimava?

¹³ Nuliaasut uppertunngorsimasut ilaasa kristumiutut inooriaaseqarnermikkut uitik ilataarisimavaat. Qanittukkut Jehovap Nalunaajaasuisa ataatsimeersuarnerisa ilaanni uiusoq nuliani kristumiuusoq pillugu ima oqarpoq: „Peqqarniingaatsiartumik pisarsimannguatsiarpara. Taamaakkaluartorli ataqqisupilussuuaanga. Nikanarsanngisaannarpaanga. Aamma pinngitsaalillunga upperisani uannut upperilersinniarsarinngilaa. Asannilluni isumassorpaanga. Ataatsimeersuariassagaangami nerisassiuutereersimasarpaanga illumilu suliassat suliarereersimasarlugit. Pissusia Biibilimik soqutiginnilissutigaara. Maannalu tassa nalunaajaasuuvunga!“ Aap,  ’oqaluffigineqanngikkaluarluni’ nuliami inuusaasia pissutigalugu ’ilannguppoq’.

¹⁴ Petrusip erseqqissaaneratut nuliaasup oqaasii apeqqutaavallaarnatik iliuuserisai kinguneqarluartarput. Tamanna paasinarsivoq arnap Agnesimik atillip sallusuissut Biibilimeersoq paasimmagu kristumiullu ataatsimiinnerinut najuuttarniarluni aalajangermat. Taassuma uia ima suaarpoq: „Agnes, matukkut ugguuna aniguit uteqqissanngilatit!“ Taava Agnes ’matukkut tassuuna’ aninngilaq, allakkulli anivoq. Tullianik ataatsimiigiartussaasoq uiata ima sioorasaarpaa: „Uteruit maaniinnavianngilanga.“ Taamaapporlumi — ullut pingasut peqanngilaq. Angerlarmalli nuliata inussiarnersumik ima aperaa: „Arlaannik nererusuppit?“ Agnesi allaat annikitsutigut Jehovamut tunniusimajuaannarpoq. Naggataatigut uia Biibilimik atuaqqissaaqatigineqarnissaminut akuersivoq, Guutimut tunniulluinnarpoq kingusinnerusukkullu nakkutilliisutut toqqarneqarluni akisussaaffippassuaqalerlunilu.

15. Nuliaasut kristumiut qanoq ittumik ’pinnissuseqaqquneqarpat’?

¹⁵ Apustili Petrusip nuliaasut kajumissaarpai arnat matuma siuliani eqqartorneqartut pinnissusiattut ’pinnissuseqaqqullugit’, kisianni qallikkut pinnissusermik, ’perlaajanik atisanilluunniit’, ingasaassillutik soqutiginninnermikkuunngitsoq. Petrusi ima oqarpoq: „[Pinnissusersi] ersiuteqartissavarsi uummammi, inummi isertugaasumi, anersaap piuaatsup qanilaartullu kusanassusiani aserortussaanngitsumi, Guutip isaani erlinnaqisumi.“ Taamatut isiginnittaaseqarneq ersersinneqartarpoq saamasuunikkut qajassuussisuunikkullu, sorraannikkuunngitsoq piumasaqarpallaarnikkuunngitsorlu. Taamaalilluni nuliaasup kristumiup uini ataqqingaartarpaa. — 1 Petrusi 3:3, 4.

Oqaluttuat ilinniarfissaalluartut

16. Sara nuliaasunut kristumiunut qanoq maligassaalluarpa?

¹⁶ Petrusi ima nangippoq: „Taamani arnat illernartut Guutimut neriuttut taama pinnersartarput, uiminnut naalatsigitillutik.“ (1 Petrusi 3:5) Arnat taakku paasisimavaat oqaasianik maleruaallutik Jehovamik nuannaartitsinermikkut ilaqutariittut pillualissallutik naassaanngitsumillu inuulerumaarlutik. Petrusip Aaperaap nulia pinnersoq, Sara, eqqaavaa maluginiarlugulu taassuma ’uini Aaperaat naalattaraa naalakkaminillu taasaraa’. Sarap uini Guutimik mianerinnittoq, Guutimit nunami allami kiffartortussanngortitaasoq, tapersersorpaa. Inooriaaseq ilorrisimaarnartoq isumakkeerpaa allaallu inuunini navianartorsiortillugu. (1 Mosesi 12:1, 10-13) Petrusip Sara sapiitsuunera pillugu nersualaarpaa imalu oqarluni: „Ilissi ajunngitsumik iliorussi sumillu siooranartumik ersigisaqarasi taava taassumunnga qitornanngorsimassaasi.“ — 1 Petrusi 3:6.

17. Sooq Petrusip Abigajili nuliaasunut kristumiunut maligassatut eqqarsaatigisimasinnaavaa?

¹⁷ Arnaq qunusuitsoq Guutimik neriuffiginnittoq  alla tassaavoq Abigajili, Petrusillu aamma taanna eqqarsaatigisimasinnaavaa. Taanna „silassorissuuvoq“, uiali, Nabali, „peqqarniitsuuvoq inupiluullunilu“. Nabali Daavimik taassumalu angutitaanik ikiuiumanngimmat, taakku Nabali taassumalu ilaqutai tamaasa piuneerunnialersaarpaat. Abigajilili akuliuppoq inoqutini annaanniarlugit. Nerisassat siutituunut nammakkiutitippai aqqutaanilu Daavi taassumalu angutitai sakkulisartut naapillugit. Taassuma Daavi takugamiuk ingerlaannaq siutituumit aqqarluni isigaasa sioraannut pallorpoq kimigiiserfigalugulu isumaallioqqunagu. Daavi killitseqaaq. Ima oqarpoq: „Qujanarsili [Jehova] Israelip Guutia, ullumi uannukartikkamisit! Qujanarlu silatusaallaqqissuugavit.“ — 1 Samueli 25:2-33.

18. Nuliaasup angummit allamit soqutigineqaleruni kia maligassiaa eqqarsaatigisinnaavaa?

¹⁸ Nuliaasunut maligassaalluartoq alla tassaavoq arnaq inuusuttoq Shulamimiu savanik paarsisumut inuinnaasumut aappassiaminut ilumoorfiginnittuartoq. Taanna taassumunnga asanningaartuarpoq kunngip pisoorsuup ajuutiginnilluni soqutigileraluaraani. Arnap taassuma savanik paarsisumut inuusuttumut misigissutsini ima oqaatigai: „Ivertinnga naqissutitut illit uummatinni, naqissutitut illit talinni; asanninnermi toqutut nakuutigaaq . . . Imersuit asanninneq qamitissinnaanngilaat, kuussuit suppussinnaanngilaat.“ (Erinarsugassiat Pingaarnersaat 8:6, 7) Qanortoq arnat tamarmik katinnissaminnut akuersisut, uiminnut ilumoorfiginnittuarnissartik taassuminngalu ataqqinningaarnissartik taamatulli aalajangiusimatigilissuk.

Siunnersuutit Guutimeersut suli allat

19, 20. (a) Sooq nuliaasut uiminnut naalatsigitittariaqarpat? (b) Nuliaasunut kina maligassaalluarpa?

¹⁹ Naggataatigut misissussavarput Efesosimiunut allakkani versit ataqatigiinneri allassimaffik qulequtarineqartoq una pillugu sumik ersersitsinersut: ’Nuliaasusi uissinnut naalatsigitigitsi.’ (Efesosimiut 5:22) Sooq tamanna pisariaqarpa? Versimi tulliuttumi ima allassimavoq: „Uiusoq nuliaminut niaquummat soorlu Kristusi ilagiinnut niaquusoq.“ Taamaattumik nuliaasut ima kajumissaarneqarput: „Soorlu ilagiit Kristusimut naalatsigititaasut taamatut aamma ilissi nuliaasut tamatigut uissinnut naalatsigitissaasi.“ — Efesosimiut 5:23, 24, 33.

²⁰ Peqqussut tamanna naalanniarlugu nuliaasut Kristusip ilagiissaasa tanitat maligassiaat maluginiaqqissaartariaqarlugulu malittariaqarpaat. Korinthimiunut allakkat aappaat 11:23-28 atualaariaruk eqqarsaatigalugulu ilagiinnut taakkununnga ilaasortaasut ilaata, apustili Paulusip, ’niaqquminut’, Jiisusi Kristusimut, aalajaanniarluni suut naammagalugit atorsimanerai. Paulusitulli, ilagiinniittut tamarmik, aamma arnat, ilumoorfiginnillutik Jiisusimut naalatsigitittariaqarput. Arnat aappallit Jiisusimut naalatsigitinnertik ersersittarpaat uiminnut naalatsigitinnermikkut.

21. Nuliaasut uiminnut naalatsigitinnissaminnut suna kajumississutigisinnaavaat?

²¹ Ullumikkut arnarpassuit aappallit naalatsigitinnissaq eqqaaginnarlugu kamaammertarput, arnalli sianisuup tamatuma iluaqutissartai suunersut eqqarsaatigeqqissaartarpai. Uiusoq uppertuunngippat, nuliaasup Guutip inatsisaanik najoqqutassiaanillu akerliunngitsunut tamanut tunngatillugu taassumunnga naalatsigitinnera ’uiminik annaassineranik’ kinguneqarsinnaavoq. (1 Korinthimiut 7:13, 16) Aamma inooriaatsimi Jehovamit akuerineqarneranik Jiisusillu maligassiaanik malinninnini pillugu Taassumannga akissarsisinneqarumaarnerminik ilisimanninnini nalerisimaarutigisinnaavaa.

Eqqaamavigit?

• Nuliaasup uiminik ataqqinninnissaa sooq unamminiarnarsinnaava?

• Katikkumaneqarnermut akuersitinnani sooq eqqarsaatigeqqissaaqqaartariaqarpa?

• Jiisusi nuliaasunut qanoq maligassaava, taassumalu maligassiaanik malinninneq qanoq iluaqutaasinnaava?

[Atuaqqissaarnermi apeqqutit]

[Qupp. 19-mi assiliartaq]

Katinniarluni aalajangernissaq sooq pimoorunneqartariaqarpa?

[Qupp. 21-mi assiliartaq]

Inuit Biibilimi oqaluttuarineqartut, soorlu Abigajili, nuliaasut qanoq ilinniarfigisinnaavaat?