Jehova Guutiuvoq qujamasuttoq

„Guutip iluaatsuunnginnami puiorsimanngilai suliasi asanninnersilu aqqanut takutissimasarsi.“ — HEBRÆERIT 6:10.

1. Jehovap qanoq ersersippaa Ruthi Moabikkuusoq qujamasuutigigini?

JEHOVAP kiffami piumasaminik iliorniarlutik ilumoorlutik ilungersornerat qujamasuutigingaarpaa, akissarsisingaartarpaalu. (Hebræerit 11:6) Boazip aalajaatsup Guutip pissusiisa ilaannik nuannersumik tamatuminnga ilisimanninnini ersersippaa. Taassuma Ruthi Moabikkuusoq, sakiminik uillarninngorsimasumik asannilluni isumassuisoq, ima oqarfigaa: „[Jehovap] akilerilisittoq qanoq iliorsimanitit pillugit. Qanortoq [Jehovap] . . . naammattumik akissarsitikkilisit.“ (Ruthi 2:12) Ruthi Guutimit pilluaqquneqarpa? Aap, pilluaqquneqangaarpoq! Taassuma oqaluttuarineqarnera Biibilimut ilanngunneqaannanngilaq, aammattaarli Boazi katippaa kunngimullu Daavimut Jiisusi Kristusimullu siuaasanngorluni. (Ruthi 4:13, 17; Matthæusi 1:5, 6, 16) Tamanna Biibilimi oqaluttuarpassuit Jehovap kiffaminik qujamasuutiginninneranut ersiutaasut ilaannaraat.

2, 3. (a) Sooq Jehovap qujamasunnera maluginiarnarpa? (b) Sooq Jehovap qujamasunnivimmik ersersitsivigaatigut? Assersuuteqarit.

² Jehovap qujamasunnerminik ersersitsisanngitsuuguni tamanna naapertuilluanngitsutut isigissagaluarpaa. Hebræerinut allakkat 6:10-mi ima allassimavoq: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.“ Maluginiariaruk Guutip uummatimikkut iluunngarlutik imminut kiffaasut ajortiliugaluartut naalannassutsiminillu peqanngikkaluartut qujamasuutigigai. — Romamiut 3:23.

³ Naammalluinnanngitsuugatta isumaqalersinnaavugut Guutimik asanninnerput pissutigalugu iliuuserisavut soqutaanngitsut Guutimillu pilluaqquneqarnissaat naleqqutinngitsoq. Jehovali pissutiginiakkatsinnik pissutsinillu atukkatsinnik paasinnilluinnartuuvoq, tarnikkullu iluunngarluta imminut kiffartornerput assut pingaartippaa. (Matthæusi 22:37) Tamanna assersuunneqarsinnaavoq anaanaasumut tunissutisiaminik ujamimmik akikitsumik nerriveeqqami siniffimmi sanianiittumi nassaartumut. Tunissutisiani naleqanngitsutut isigiinnarsinnaagaluarpaa igiinnarlugulu. Kortimili tunissummut ilanngunneqarsimasumi allassimavoq tunissut taanna paneeraaninngaanneersuusoq sipaakkani tamaasa atorlugit pisiarisimasaa. Maanna anaanaasup tunissutisiani allatut isigilerpaa. Nuannaarnermit qullililluni panini eqippaa oqaluttuullugulu tunissutisiani qanoq qujamasuutigitigalugu.

4, 5. Qujamasunnermik ersersitsineq eqqarsaatigalugu Jiisusip Jehova qanoq ilaarpaa?

⁴ Jehovap pissutiginiakkavut  pisinnaasattalu killeqarnerat nalunngilluinnarpai, pitsaanerpaamillu tunigaangatsinni tamanna qujamasuutigisarpaa, tunniussarput annikikkaluarpat annertugaluarpalluunniit. Jiisusip Ataatami isiginnittaasia naammalluinnartumik ersersippaa. Uillarnerup aningaasannguaataanik oqaluttuaq Biibilimiittoq eqqarsaatigeriaruk. „Jiisusi qiviarami takulerpai pisoorsuit tunissutiminnik naalaffiup aningaasanik nakkaatitsivianut nakkaatitsisut. Takuaattaaq uillarneq piitsoq aningaasannguanik marlunnik ikisisoq, oqarporlu: ’Ilumut oqarfigaassi: Uillarneq una piitsoq tamanit annerusumik tunisivoq. Allammi tamarmik sinnerussaminnik ikisipput, uumali piitsuulluni pigisani inuuniutissaraluani tamaasa ikivai.’“ — Lukasi 21:1-4.

⁵ Aap, Jiisusip pissutsit arnap atugai ilisimavai, nalunngilaalu uillarnerusoq piitsoq. Tunissutaa qujamasuutigaa, nalunngilaami qanorpiaq naleqarnersoq. Jehovap aamma taamatut isigaa. (Johannesi 14:9) Pissutsit atukkavut qanoq ikkaluarpataluunniit Guutitsinnit taassumalu erneranit qujamasunnerminnik ersersitsisunit akuerineqarsinnaalluta nalunagu qiimmaallannangaarami, ilaa?

Jehovap Etiopiamiu Guutimik mianerinnittoq akissarsisippaa

6, 7. Sooq aamma qanoq Jehovap qujamasunnini Ebed-Melekimut ersersippaa?

⁶ Biibilimi arlaleriarluni erseqqissarneqarpoq Jehovap piumasaminik iliortunik qujamasuutiginninnera. Eqqarsaatigeriaruk Etiopiamiu Guutimik mianerinnittoq Ebed-Meleki, Jeremiap nalaani inuusoq Judamilu kunngimut Sidkijamut ilumuunngitsumut kiffaasoq, pillugu Jehova qanoq iliorsimanersoq. Ebed-Melekip paasivaa Judami naalagartat Jeremia pikitsitsisutut sallullutik unnerluutigisimagaat imiisiviliamullu igissimagaat perlerluni toquniassammat. (Jeremia 38:1-7) Ebed-Melekip nalunngilluinnarpaa Jeremia tusarliussaq oqaluussissutigisani pissutigalugu assut uumissugaasoq, Ebed-Melekilli inuunini navianartorsiortippaa kunngilu sapiilluni ima oqarfigalugu: „Naalagaq kunngi, angutit ukua Jeremiamut ajortulioqaat imiisiviliamut igikkamikku tassanilu perlerluni toqussaaq.“  Kunngip peqqusineratigut Ebed-Melekip angutit 30-t ilagalugit Guutip pruffiitia annaappaa. — Jeremia 38:8-13.

⁷ Jehovap takuaa Ebed-Meleki uppernini pissutigalugu iliuuseqartoq taamaalillunilu qununerup qanorluunniit ittup ajugaaffiginissaanut nukissaqalersoq. Taamaammat Jehovap qujamasunnini ersersippaa taannalu Jeremiamut ima oqarfigitillugu: „Siulittuutigisakka illoqarfimmut matumunnga eqquutitissavakka ajunaarutissaanik, pilluaatissarinngisaanik . . . Kisianni ullussami tassani annaatissavakkit, . . . angutinullu siooragisannut tunniunneqassanngilatit, annaatissagakkit; . . . inuuginnassaatit tatigigamma.“ (Jeremia 39:16-18) Aap, Jehovap Ebed-Meleki Jeremialu Judami naalagartanit iluaatsunit kingusinnerusukkullu Babylonimiunit, Jerusalemimik piuneerussilluinnartunit, aniguisippai. „[Jehovap] imminut upperluartut inuunerat paaraa aniguisissallugillu iluaatsunit.“ — Tussiaat 97:10.

’Ataatavit isertortumut isigisup akilissavaatit’

8, 9. Qinoriaatsit Jehovap pingaartitai pillugit Jiisusip oqaasii iliuusiilu sumik ilinniarfigaavut?

⁸ Jehovap tunniusimanerput pissutigalugu iliuuserisartakkatsinnik qujamasuutiginnillunilu pingaartitsineranut uppernarsaatit suli allat tassaapput qinuneq pillugu Biibilimi allassimasut. „Peqqusersuitsut qinnutaat [Guutip] iluarisaraa,“ angut ilisimasoq taama oqarpoq. (Ussatit 15:8) Jiisusip nalaani upperisarsiornikkut siuttut ilarpassui kikkut tamarmik takkuanni qinusarput, imaanngitsoq Guutimik mianerinnittuugamik, allanilli malugineqarumagamik. Jiisusi ima oqarpoq: „Taakkua akissarsiassartik pereerpaat.“ Nangillunilu ajoqersukkani ima ilinniartippai: „Illilli qinunialeruit ininnguannut iserit matulu matullugu, Ataatannullu isertortumiittumut qinugit. Ataatavillu isertortumut isigisup akilissavaatit.“ — Matthæusi 6:5, 6.

⁹ Soorunami Jiisusip allat isigitillugit qinusarneq assuarinngilaa, namminermi arlaleriarluni taamaaliorpoq. (Lukasi 9:16) Jehovap allanit malugineqarnissarput siunertarinagu uummatitsigut ilumoorluta qinnuigigaangatsinni qujamasuutigisaqaa. Nammineq qinnutivut Guutimik qanoq asannitsiginitsinnut qanorlu tatiginnitsiginitsinnut ersiutaalluartarput. Taamaammat paasinarpoq Jiisusip qinuniaraangami amerlanertigut eqqissisimanartumiinniartarnera. Ilaanni qinuvoq „ullaaralaannguaq suli taartoq“. Piffissami allami „qaqqamut majuarpoq kisimiilluni qinujartorluni“. Aamma apustiliminik aqqaneq-marlunnik toqqaannginnermini unnuaq naallugu kisimiilluni qinuvoq. — Markusi 1:35; Matthæusi 14:23; Lukasi 6:12, 13.

10. Ilumoorluta ilungersorlutalu qinugaangatta suna qularissanngilarput?

¹⁰ Takorlooriaruk Jehova ernermi qamannga pisumik qinnutaanut qanoq tusarnaaqqissaarsimatigissasoq! Allaat Jiisusi qinusarsimavoq ’nillingaarluni qullilillunilu, qinnutaalu tusarneqartarpoq Guutimik mianerinnittuummat’. (Hebræerit 5:7; Lukasi 22:41-44) Taama ilumoortigaluta ilungersortigalutalu qinugaangatta qularissanngilarput Ataatarput qilammiusoq qujamasulluni tusarnaaqqissaassasoq. Aap, „[Jehova] qanippoq . . . tamanut ilumoorlutik imminut torlorfiginnittunut.“ — Tussiaat 145:18.

11. Kisimiilluta iliuuserisartakkavut Jehovap qanoq qujamasuutigitigai?

¹¹ Jehovap isertortumi imminut qinusarnerput qujamasuutigisaruniuk, qanorli isertortumi imminut naalattarnerput qujamasuutigitigissavaa! Aap, allanit isigineqarnata suliavut suunersut Jehovap nalunngilai. (1 Petrusi 3:12) Kisimiikkaangatta aalajaallutalu naalattarnerput ’uummatikkut iluunngarluta’, minguitsumik pissutiginiagalimmik eqqortunillu aalajangiussisumik uummateqarluta, Jehovamut kiffartornitsinnut ersiutaalluarpoq. (1 Nalunaarsuutit 28:9) Tamanna Jehovap uummataanik nuannaartitsisarpoq! — Ussatit 27:11; 1 Johannesi 3:22.

12, 13. Qanoq ililluta isumarput uummaterpullu paarisinnaavarput ajoqersukkatullu aalajaatsutut Nathanaelitut illuta?

¹² Taamaattumik kristumiut aalajaatsut isumamik uummammillu ajortunngortitsisartunik isertorlutik ajortuliornaveersaartarput, assersuutigalugu pornografiimik nakuusertunillu isiginnaarnaveersaartarput. Ajortuliat ilaat inunnut isertorneqarsinnaagaluarput, uagulli nalunngilarput  ’suut tamarmik Guutip isaanut uleersimallutillu saqqumisut. Taannaavorlu iliornivut pillugit akisussaaffigisassarput’. (Hebræerit 4:13; Lukasi 8:17) Jehovap iluarinngisai nigorsimaniarlugit sapinngisatsinnik iliortarutta ilerasuuteqanngittuassaagut aamma Guutimit akuerisaanitsinnik ilisimanninnerput nuannaarutigisinnaassavarput. Qularnanngilaq Jehova ’assuarnaalluni inuusumik, innarluitsumik iliortumik ilumoortumillu uummammit pisumik oqaluttumik’ ilumut qujamasuutiginnittoq. — Tussiaat 15:1, 2.

¹³ Isumarput uummaterpullu silarsuarmi ajortunngorsimasumi qanoq ililluta paarisinnaavarput? (Ussatit 4:23; Efesosimiut 2:2) Iluaqutissanik anersaakkut ittunik Jehovap uagutsinnut tunniussaanik tamanik atorluaaginnarata, aamma ajortoq itigartinniarlugu ajunngitsuliorniarlutalu sapinngisarput tamaat iliuuseqartariaqarpugut. Iliuuseqapallattariaqarpugut kissaatigisapiluit ’iluminnginniassammata ajortimillu erniaqarlutik’. (Jaaku 1:14, 15) Eqqarsaatigeriaruk qanoq pilluartigissagaluartutit Jiisusip Nathanaelimik ima eqqartuinermisut eqqartortuuppatit: „Aajuna [inuk] peqquserlunneq ajortoq.“ (Johannesi 1:47) Kingusinnerusukkut Nathanaelip, aamma Bartholomæusimik taaneqartartup, Jiisusip apustiliinut aqqaneq-marlunnut ilaalernini immikkut pisinnaatitaaffigilerpaa. — Markusi 3:16-19.

„Palasiunerusoq naakkinnittoq unneqqarissorlu“

14. Jiisusi isersimasut allat assiginagit Mariap iliuusianut qanoq periarpa?

¹⁴ Jiisusi tassaagami „Guutip takussaanngitsup assinga“, minguitsumik uummateqarlutik Guutimut kiffartortunik qujamasuutiginninnermigut Ataatani tamatigut naammalluinnartumik ilaartarpaa. (Kolossemiut 1:15) Assersuutigalugu qujamasuutiginninnini ersersippaa ullut tallimat qaangiuppata toqusussaalluni ajoqersukkami ilai ilagalugit Betaniami Siimuumut pulaarami. Unnuup ingerlanerani Mariap, Lazarusimut Martamullu qatanngutaasup, „uulia nardusi akuitsoq akisoorsuaq pundi ataaseq“ (ukiumi ataatsimi aningaasarsiatut naleqartigisoq) tiguaa Jiisusillu niaquanut isigaanullu kuillugu. (Johannesi 12:3) „Sooq taama kuilussinnaarneqarpa?“ ilaat aperipput. Jiisusilli Mariap iliuusia allatorluinnaq isigaa. Tukkornertut aamma toqungajalernerminut ilisaangajalernerminullu piareersaatitut pingaaruteqangaartutut isigaa. Taamaattumik Maria isornartorsiunngilaa, nersorpaali imalu oqarluni: „Silarsuarmi sumiluunniit tamarmi iivangkiiliu taanna oqaluussissutigineqaraangat taassumattaaq qanoq iliornera oqaluttuarineqartassaaq taanna eqqaaniarlugu.“ — Matthæusi 26:6-13.

15, 16. Jiisusip nunarsuarmi inuusimanera inuttullu Guutimut kiffartorsimanera uagut qanoq iluaqutigaavut?

¹⁵ Jiisusimik taamatut qujamasunnermik ersersitsisartumik siulersorteqarnerput nuanningaarami! Jiisusip nunarsuarmi maani inuttut inuunini Jehovap imminut suliassiissutaanut — siullermik tanitat ilagiissaannut taavalu silarsuarmut tamarmut palasiunertut kunngitullu kiffartornissaminut — piareersaatigaa. — Kolossemiut 1:13; Hebræerit 7:26; Saqqummersitat 11:15.

¹⁶ Jiisusip nunarsuarmut pinngikkallaramili inuit soqutigisupilussuuai assullu nuannaralugit. (Ussatit 8:31) Inuttut inuunermigut Guutimut kiffartornitsinni misilinneqaatigisartakkavut suli paasilluarnerulerpai. Apustili Paulusi allappoq Jiisusip „tamatigorluinnaq qatanngutini [assigilertariaqarai] tassaalerumalluni Guutip saani palasiunerusoq naakkinnittoq unneqqarissorlu. Nammineq usserneqarlunilu naalliutsitaagami usserneqartut ikiorsinnaavai.“ Jiisusi ’qajannassutsitsinnik naakkiginnissinnaavoq’ ’tamatigut uagutsitut usserneqarsimagami, ajorteqaranili’. — Hebræerit 2:17, 18; 4:15, 16.

17, 18. (a) Aasiaaqqami ilagiinnut arfineq-marlunnut allakkani Jiisusip ajoqersukkami naalliuutaannik paasinninnera pillugu suna erserpa? (b) Kristumiut tanitat sumut piareersarneqarpat?

¹⁷ Jiisusip ajoqersukkami misilinneqartarnerinik paasinninnerulersimanera makititaanerata kingorna erseqqissivoq. Tamanna erserpoq ilagiinnut arfineq-marlunnut Aasiaaqqamiittunut allagaani apustili Johannesimit allanneqartuni. Jiisusip Smyrnami ilagiit ima oqarfigai: „Ilisimavakka annikilliortarnitit piitsuussutsillu.“  Ima oqarporlusooq: ’Ajornartorsiutisi paasilluinnarpakka. Qanoq atugaqarnersusi nalunngilluinnarpara.’ Taava nammineq toqumut allaat naalliuttariaqarsimanerminik pissuteqartumik misiginneqataallunilu neriorsueqqissaarpoq ima nangilluni: „Toqumut allaat ilumoorit, taava ajugaasumut niaqorusiussassaq inuussutaasoq ilinnut tunniukkumaarpara.“ — Saqqummersitat 2:8-10.

¹⁸ Ilagiinnut arfineq-marlunnut allakkani allassimasorpassuaqarpoq Jiisusip ajoqersukkat atugarliortarnerinik ilisimasaqarluarneranik taakkualu ilumoorfiginnittuarnerannik ilumoorluni qujamasuutiginninneranik ersersitsisunik. (Saqqummersitat 2:1–3:22) Eqqaamajuk Jiisusip saaffigisai tassaasut kristumiut tanitat, qilammi taassuminnga naalakkersueqateqarnissaminnik neriugisallit. Naalakkamik tumaanik malinninnermikkut suliassaminnut nersornartumut, tassa Kristusip inuiannut naalliuttunut utertitsissutitut pilliutaata sunniutaanik iluaqutaasunik misiginneqataangaarlutik iluaqutaalersitseqataanissaminnut, piareersarneqarput. — Saqqummersitat 5:9, 10; 22:1-5.

19, 20. ’Amerlangaartut’ Jehovamut taassumalu erneranut qujamasunnerminnik qanoq ersersitsisarpat?

¹⁹ Soorunami Jiisusip ajoqersukkani tanitat kisiisa asanngilai, aammali asavai ’savaatini allat’ ilumoorfiginnittut. Taakku millioninik arlalinnik amerlassuseqarput, ’amerlangaartunullu inuiaqatigiinnit tamanit pisunut’ „annikilliortitaangaarnermit“ nalliuttussamit aniguisussanut ilaalersinnaanissartik qilanaaraat. (Johannesi 10:16; Saqqummersitat 7:9, 14) Taakku maanna Jiisusimut ornigussorput taassuma utertitsissutitut pilliutaa naassaanngitsumillu inuulernissaminnik neriuuteqalersimanertik qujamasuutigigamikkit. Qujamasunnertik qanoq ilillutik ersersittarpaat? Guutimut ’kiffartornermikkut ullukkut unnuakkullu’. — Saqqummersitat 7:15-17.

²⁰ Ukiumut kiffartorfiusumut 2006-imut nalunaarusiami, Vagttårnet 1. februaari 2007-imoortumi qupp. 27-30-miittumi, ersersinneqarpoq kiffat aalajaatsut taakkua ilumut Jehovamut ’kiffartortut ullukkut unnuakkullu’. Ukiup ataatsip tamatuma ingerlanerani taakku kristumiullu tanitat ikittunnguit kinguleruttut nalunaaquttap-akunneri katillugit 1.333.966.199-it oqaluussinermi atorsimavaat. Taakkua ukiunut sanilliutissagaanni ukiut 150.000-it sinningaatsiarpaat!

Qujamasunnerit ersersittuaruk

21, 22. (a) Sooq kristumiut ingammik ullumikkut qujamasunnerminnik ersersitsisariaqarpat? (b) Allaaserisami tulliuttumi suna sammissavarput?

²¹ Aap, Jehovap taassumalu ernerata inuit naammalluinnanngitsut qujamasungaarnerminnik ersersitsivigaat. Ajoraluartumilli amerlanersaasa Guuti eqqarsaatigerpiartanngilaat namminnerlu soqutigisatik pingaarnerutittarlugit. Paulusip inuit ’ulluni kingullerni’ makkunani inuusut ima allaatigai: „Inuit imminuinnavik eqqarsaatigilerumaarput, aningaaserituunngorumaarput . . . Qujasuilluinnarumaarput.“ (2 Timotheusi 3:1-5, Phillips) Taakku kristumiunit ilumoortunit allaanerulluinnarput, kristumiummi ilumoortut Guutip imminik pillutik iliuuserisimasaanik tamanik qujamasuutiginninnerminnik ersersitsipput qamannga pisumik qinusarnermikkut, kajumillutik naalannermikkut tarnikkullu iluunngarlutik taassumunnga kiffartornermikkut. — Tussiaat 62:9; Markusi 12:30; 1 Johannesi 5:3.

²² Allaaserisami tulliuttumi sammissavavut Jehovap uagutsinnut asannilluni tunniussarpassuisa ilaat anersaakkut ittut. Qanortoq ’tunissutit ajunngitsut’ tamakkua eqqarsaatigigaangatsigit suli qujamasunnerulertarisa! — Jaaku 1:17.

Qanoq akissavit?

• Jehovap qanoq ililluni ersersippaa Guutiulluni qujamasuttoq?

• Kisimiitsilluta Jehovap uummataa qanoq ililluta nuannaartissinnaavarput?

• Jiisusi qujamasunnermik qanoq ersersitsisarpa?

• Jiisusip inuttut inuusimanini naalakkersuisutut misiginneqataasuunissaminut qujamasuttuunissaminullu qanoq iluaqutigaa?

[Quppernerup ataani ilanngussaq]

[Qupp. 3-mi assiliartaq]

Angajoqqaat meeqqaminnit tunissutisiamininnguaminnik nuannaarutiginnittarnerattut Jehova pigisatsinnik pitsaanerpaanik tunigaangatsinni qujamasuttarpoq