Jehovap oqaasia uumavoq

Jeremiap allagaanit pingaarnersat

JEREMIAP ajunaarnersuit nunaqqatiminut oqaluussissutigisai annilaarnarsimassaqaat! Naalaffik alutornangaartoq ukiut 300-t sinnerlugit pallorfiginninnermi qitiusimasoq nungulluni ikuallanneqassaaq. Jerusalemi Judalu inuerutissapput innuttaasullu aallarussaassapput. Eqqartuussummik oqaluussissutit taakkua allallu Biibilip atuagartaasa takinerpaap tulliani, tassa Jeremiap allagaani, nalunaarsugaapput. Jeremiap aalajaalluni ukiuni 67-ini kiffartornermini nammineq misigisai atuakkami tassani aamma allassimapput. Atuakkami paasissutissat pisimaneri tulleriiaarnagit, allaaserineqartulli suuneri naapertorlugit tulleriinnilersugaapput.

Sooq Jeremiap allagai soqutigisariaqarpavut? Tassani siulittuutigineqartut eqquunneri Jehovap neriorsuutiminik piviusunngortitsisartuuneranik upperinninnitsinnik nakussatsitsimmata. (Esaja 55:10, 11) Jeremiap pruffiititut sulinera tusarliussaanullu inuit pissuseqarfiginninnerat nalitsinni pissutsinut assinngupput. (1 Korinthimiut 10:11) Jehovap innuttaminut qanoq periaaseqarneranik oqaluttuami pissusii aamma erseqqissarneqarput, killitsissutigingaartariaqarpavullu. — Hebræerit 4:12.

„AJORTUT MARLUK INNUTTAMA SULIARISIMAVAAT [ILIUUSERISIMAVAAT, NV]“

(Jeremia 1:1–20:18)

Judami kunngip Josijap ukiut naalakkersuiffiisa 13-ianni Jeremia pruffiititut toqqarneqarpoq, Jerusalemip ukiumi 607-imi u.n.s. aserugaanissaa ukiunik 40-nik sioqqullugu. (Jeremia 1:1, 2) Josijap naalakkersuinerata ukiuini 18-ini kingullerni nalunaarutigineqartut Judami ajussutsimik qulaajaapput Jehovallu nunamut eqqartuussutaanik ilaqarlutik. „Jerusalemi illukuinnanngortissavara,“ Jehova nalunaarpoq, „Judamilu illoqarfiit inuilaanngortissavakka inuerullugit.“ (Jeremia 9:10) Sooq? Ima oqarpoq: ’Ajortut marluk innuttama suliarisimammatigik [iliuuserisimammatigik, NV]’. — Jeremia 2:13.

Tusarliussamut aamma ilaavoq amiakkuusut peqqissimisut makeqqitsitaanissaat. (Jeremia 3:14-18; 12:14, 15; 16:14-21) Tusarliussisorli tikilluaqquneqanngilaq. „[Jehovap] illuani paarsisut naalagaata“ Jeremia persuttarpaa kiggitsivimmullu kiggisillugu unnuisillugu. — Jeremia 20:1-3.

Allassimaffiit pillugit apeqqutit akineqartut:

1:11, 12 — Sooq Jehovap oqaatsini pillugit nakkutilleeqqissaarnera ’orpiup qaqqortariallup [mandelequtip, NV] avalequtaanut’ attuumassuteqartinneqarpa? Mandelequtit ’orpinnit sikkertartunit siulliutik sikkertarput’. (Versi 11, Ny Verden Oversættelsen-imi quppernerup ataani ilanngussaq) Jehovap ullut tamaasa ’piaarluni’ (1900/1961) pruffiitini assersuutaasumik  aallartittarpai eqqartuussutini pillugit innuttaminik mianersoqqusiartortitsilluni, eqqartuussutillu eqquunnissaata tungaanut ’nakkutigeqqissaartarpai’. — Jeremia 7:25.

2:10, 11 — Israelikkut ilumuunngitsut iliuusiini sunaana taama eqqumiiginartigisoq? Kimmut Kittæerit kangianullu Kedarimi inuiaat Guutimik nalusut inuiaat allat guutii namminneq guutiminnut ilanngussinnaavaat, guutimilli allat guutiinit taarsivinnissaat eqqarsaatigisinnaanngilaalluunniit. Israelikkulli Jehova qimappaat Guutillu uumasup naalannassusia guutipilunnik uumassuseqanngitsunik taarserlugu.

3:11-22; 11:10-12, 17 — Sooq Jeremiap avannamut naggueqatigiissortat quliusut naalagaaffiat tusarliussaminut ilannguppai uffa Samaria 740-mi u.n.s. uppitinneqareersoq? Jerusalemip 607-imi u.n.s. aserugaanissaa Israelikkunnut tamanut, Judakkunnuinnaanngitsoq, Jehovap eqqartuussutigimmagu. (Ezekieli 9:9, 10) Aammattaaq Guutip pruffiitiisa tusarliussaat suli aamma Israelikkunnut tunngatinneqarmata erserpoq naggueqatigiissortat quliusut naalagaaffiata soqutigisaat Jerusalemimi suli isumagineqartut.

4:3, 4 — Peqqussut taanna qanoq isumaqarpa? Juutit ilumuunngitsut uummatimik issortaat piareersartariaqarlugulu aqilisartariaqarlugulu minguiartariaqarpaat. Uummatimik ’kipineqanngissutaat’ peertariaqarpaat, tassa eqqarsaatitik, misigissutsitik pissutiginiakkatillu mingunnartut piiartariaqarpaat. (Jeremia 9:24, 25; Apustilit Suliaat 7:51) Inooriaasertik allanngortittariaqarpaat — ajortuliorunnaarlutik Guutimit pilluaqqusaanermik kinguneqartussanik iliuuseqartariaqarput.

4:10; 15:18 — Jehovap innuttani naalasseriitsut salloqittartarai qanoq paasisariaqarpa? Jeremiap nalaani pruffiitit ilaat „siulittuipput sallullutik“. (Jeremia 5:31; 20:6; 23:16, 17, 25-28, 32) Jehovap tammartitsiniarlutik tusarliisut pitsaaliunngilai.

16:16 — Jehova ’aalisartorpassuarnik pisissaartorpassuarnillu’ aggeqqusinera qanoq paasisariaqarpa? Pineqarsimasinnaapput akeqqat sakkutuui juutinik ilumuunngitsunik Jehovap eqqartuutassaanik ujaasiartortinneqartut. Jeremia 16:15-imili allassimasoq eqqarsaatigalugu versimi aamma pineqarsimasinnaavoq juutit peqqissimisut nassaarineqarumaarnerat.

20:7 — Jehova pissaavallaaqimmat Jeremia nakkaannartoq qanoq paasisariaqarpa? Jeremiap Jehovap eqqartuussutai oqaluussissutigimmagit inuit soqutiginninnatillu itigartitsillutillu malersuipput, Jeremialu immaqa misigaaq kiffartornermini ingerlaqqinnissaminut nukissaqarnani. Jehovalli pissaanini Jeremiap taamatut misigeqqajaaneranut atorpaa pinertusaarsinnaalersillugu. Taamaalilluni Jehovap Jeremia misiginngitsoortillugu pruffiitip nammineq sapersorisaanik iliuuseqarsinnaalersippaa.

Ilinniarfigisinnaasavut:

1:8. Ilaannikkut Jehovap innuttani malersorneqarnermit aniguisittarpai — immaqa naapertuilluartunik eqqartuussisoqarnissaa atorfillilluunniit akeqqersimaartut ingasaassiniannginnerusumik taarserneqarnissaat isumagalugu imaluunniit kiffani pinertusaarnissamut nukissaqartillugit. — 1 Korinthimiut 10:13.

2:13, 18. Israelikkut ilumuunngitsut ajortunik marlunnik iliuuseqarput. Jehova pilluarnerup, siulersorneqarnerup illersorneqarnerullu  pilerfia qimappaat. Aamma Egyptenimut Assyriamullu ilissarsiornermikkut nammineq imiisiviliorpullusooq. ’Puilasup imivimmik imillip imiisiviliamik ussiitsumik’ taarserneqarnera ullumikkut Guutimik ilumoortumik qimatsinermut inuillu isumaliutersuutaannik politikkikkullu isummanik tunaarinninnermut eqqaanarpoq.

6:16. Jehovap innuttani naalasseriitsut kajumissaarpai unikaallaqqullugit, imminut misissoqqullugit ’aqqusininnguatoqqanullu’ siuaasamik aalajaatsut aqqutigisaannut uteqqullugit. Aamma uagut ilumut Jehovap aqqutigeqqusaatigoornerluta ilaannikkut imminut misissortariaqarpugut, ilaa?

7:1-15. Juutit naalaffimmik tunaarinninnertik, soorlu tassa naalaffiup immini ajunaarnermut illersorsinnaagaatik, annaanneqaatiginngilaat. Isigisavut pinnagit upperisarput malillugu inuusariaqarpugut. — 2 Korinthimiut 5:7.

15:16, 17. Jeremiatulli nikallunganeq akiorsinnaavarput. Taamaaliorsinnaavugut siunertaqarluartumik Biibilimik atuaqqissaarnermik nuannaarutiginninnikkut oqaluussinermilu Jehovap aqqanik qutsissisitsinikkut aamma „nuannattut [oqaruserumatuut, NV]“ ilaginaveersaarnerisigut.

17:1, 2. Judakkut ajortuliortaramik pilliutaat Jehovamit iluarineqanngillat. Aamma uagut ileqqussatigut minguttuujugutta pilliutivut qujaniutaasut akuerineqarsinnaassanngillat.

17:5-8. Inuit aqqissuussinerillu suulluunniit aatsaat tatigisinnaavavut Guutip piumasaa najoqqutassiaalu naapertorlugit iliuuseqartarpata. Annaanneqarnissaq aamma eqqissineq isumannaassuserlu piviusut pineqaraangata silatusaassaagut Jehova tatigilluinnarutsigu. — Tussiaat 146:3.

20:8-11. Soqutiginninnginneq, akerlilersorneqarneq malersorneqarnerluunniit Guutip naalagaaffianik oqaluussinitsinni aallussinikillissutigissanngilavut. — Jaaku 5:10, 11.

„BABYLONIP KUNNGIATA NAMMAATSERFIA QUNGATSISSINNUT ATITINNIARSIUK“

(Jeremia 21:1–51:64)

Jeremiap Judami kunnginut sisamanut kingullernut pruffiitioqqusersunullu, paarsisunut paarsinerluttunut palasinullu peqquserluttunut eqqartuussutit oqaatigai. Amiakkuusut aalajaatsut figenitut ajunngitsutut eqqaariarlugit Jehova ima oqarpoq: „Isigiumaarpakka iluanaartillugit [iluaralugit, 1990].“ (Jeremia 24:5, 6) Eqqartuussutit kapitalit tulliuttut ilaanni sukumiinerusumik allaatigineqartut siulittuutini pingasuni kapitali 25-miittuni eqikkarneqarput.

Palasit pruffiitillu Jeremia toqunniarlugu pilersaarutigilerpaat. Jeremiap tusarlerpai Babylonip kunngia kiffartuutilissagaat. Jeremia kunngi Sidkijamut ima oqarpoq: „Babylonip kunngiata nammaatserfia qungatsissinnut atitinniarsiuk.“ (Jeremia 27:12) Kisianni ’Israelikkunnik siammarterisup kingumut katersorumaarpai’. (Jeremia 31:10, 1900/1961) Pissutissaqarluartumik Rekabikkut neriorsorneqarput. Jeremia „illussaarsuup silarliani paarsisut inaanni“ parnaarussaavoq. (Jeremia 37:21) Jerusalemi aserugaavoq innuttaasullu amerlanerit aallarussaapput. Jeremia allatsialu Baruki aallarussaanngitsut ilagaat. Amiakkuusut taakkua siooralerput Egypteniliarlutillu naak Jeremiap taamaalioqqunatik mianersoqqugaluaraatik. Kapitalini 46-miit 51-imut Jeremiap inuiannut tusarliussai allassimapput.

Allassimaffiit pillugit apeqqutit akineqartut:

22:30 — Taamatut aalajangersagaqarmat Jiisusi Kristusip Daavip issiavissaarsuaniissinnaatitaanera atorunnaarpa? (Matthæusi 1:1, 11) Naagga, atorunnaanngilaq. Aalajangersakkap tamatuma Jojakinip kinguaavi ’Daavip issiavissaarsuani . . . Judami’ ingittoqarnissaa pitsaalivaa. Jiisusi qilamminngaaniit, Judami  issiavissaarsuarmit pinnani, naalakkersuisussaavoq.

23:33, 1990 — „[Jehovap] oqaasia nanertuisoq“ suua? Jeremiap nalaani Jerusalemip aserugaanissaa pillugu taassuma tusarliussai pingaarutillit nunaqqataanut nanertuutaapput. Aamma inuit naalasseriitsut taakkua Jehovamut nanertuutaangaarmata naloriunniarpai. Taamatulli kristumiuunerartut piuneerunneqarnissaannik Biibilimi tusarliussaq kristumiuunerartunut nanertuutaavoq, tusarliussamillu soqutiginninnginnerat Guutimut nanertuutaavoq qasunartoq.

31:33 — Guutip inatsisai uummataannut allassimanerat qanoq paasisariaqarpa? Inuup Jehovap inatsisai ima nuannaritigippagit piumasaatut iliornissani kissaatigingaarlugu oqartoqarsinnaavoq Guutip inatsisai uummataanut allassimasut.

32:10-15 — Pisinermut uppernarsaatip assigiitsillugit marlunngorlugu allanneqarneranut suna siunertaava? Uppernarsaatip aappaa matuneqanngitsoq atuarneqariaannaavoq. Aappaa, naqissusigaq, matuneqanngitsup qanoq eqqortuutiginera qularutigineqalissagaluarpat uppernarsaatissatut atorneqassaaq. Jeremia eqqarlini uppeqatinilu niueqatigigamiuk isumatusaartumik inatsisinullu naapertuuttumik periaaseqarami uagutsinnut maligassiuilluarpoq.

33:23, 24 — „Eqqarleriit marluit“ uani eqqaaneqartut kikkuuppat? Aappaat tassaapput Daavip eqqarlii kunngikkormiut aappaallu tassaallutik palasikkormiut, Aronip kinguaavi. Jerusalemi Jehovallu naalaffia aserugaammata Jehova eqqarleriinnik taakkunannga marlunnik ajattuisutut nunarsuarmullu naalagaaffeqarnissani imminilluunniit pallorfiginninnermik pilersitseqqittoqarnissaanik piumasaqarunnaarsimasutut isikkoqarpoq.

46:22 — Sooq Egyptenip nipaa pulateriaarsuup nipiliorneranut assersuunneqarpa? Pineqarsimasinnaavoq pulateriaarsuup uteriaraangami seerpalunnera imaluunniit Egypteni ajunaarnersuarmik eqqorneqarami nipaqanngingajattumik tusarsaanera. Aamma taamatut assersuussinermi ersersinneqarpoq Egyptenimiut faraoisa pulateriaarsuup illernartitaasup assinganik nasarmioqartarnerat neriullutik pulateriaarsummut guutiutitap arnap Uatchitip illersussagaatik qanoq iluaqutaanngitsigisoq.

Ilinniarfigisinnaasavut:

21:8, 9; 38:19. Allaat kingusissorujussuakkut Jehovap Jerusalemimiut allamik isumataarsimanngitsut, taamaattumillu toqusariaqartut, qinigassippai. Aap, ’nallittuissusia angingaarpoq’. — 2 Samueli 24:14; Tussiaat 119:156.

31:34. Tuppallernarpoq nalunagu Jehovap ajortuliavut isumakkiikkani eqqaaqqissanngikkai, ima paasillugu assuariniarluta pillarniarlutalluunniit eqqaaqqissanngikkai!

38:7-13; 39:15-18. Jehovap puiussanngilaa aalajaalluta kiffartornerput, ilaatigut ’illernartunik kiffartuussisimanerput’. — Hebræerit 6:10.

45:4, 5. Judap naalagaaffiata ulluini kingullernisulli uagutsinnut pissutsit aaqqissuussaanerata maanna atuuttup ’ullussaani kingullerni’ inuusunut ’angisuunik’, soorlu pisuussutinik, ataqqisaanermik pigisatigulluunniit isumannaatsuunermik, noqqaassuteqarnissamut piffissaanngilaq. — 2 Timotheusi 3:1; 1 Johannesi 2:17.

„ILLOQARFIUP QARMARSUA PUTUNEQARPOQ“

(Jeremia 52:1-34)

Ukioq 607-iuvoq u.n.s. Sidkijap naalakkersuiffiisa aqqanilissaraat. Nebukadnesarip Babylonip kunngiata qaammatini 18-ini kingullerni Jerusalemi ungusareqqavaa. Nebukadnesarip naalakkersuiffiisa 19-ianni qaammatit tallimaata ulluisa arfineq-aappaanni Nebuzar’adani, kunngimik paarsisut naalagaat, Jerusalemimut „tikiuppoq“. (2 Kunngit 25:8) Immaqa illoqarfiup qarmarsuisa avataanni tammaarfimminiit pissutsit qanoq innersut paasiniarpai pilersaarusiorlunilu. Ullut pingasut qaangiuttut, qaammatip ulluisa qulinganni, Jerusalemi iserfigaa. „Illoqarfiullu qarmarsua putuneqarpoq.“ — Jeremia 52:6, 12.

Jeremiap Jerusalemip aserugaanera sukumiisumik allaatigaa. Allaatiginninnera upputinut tunngaviuvoq. Erinniat taakkua Biibilip atuagartaasa tullianiipput — Upputini. (wE 3/15 07)

[Qupp. 28-mi assiliartaq]

Jeremiap tusarliussaanut ilaatigut ilaapput Jehovap Jerusalemimut eqqartuussutai

[Qupp. 29-mi assiliartaq]

’Jehovap pissaanini Jeremiamut’ qanoq atorpaa?

[Qupp. 30-mi assiliartaq]

„Judamit aallarussaasut . . . ajunngitsutut isigaakka figenitut taakkunatut ajunngitsutut.“ — Jeremia 24:5.