„Qitornaasusi, angajoqqaasi naalassigit“

„Qitornaasusi, angajoqqaasi naalassigit Naalakkami, tamanna iluarmat.“ — EFESOSIMIUT 6:1.

1. Mianersoqqussutit malillugit iliorneq uagutsinnut qanoq illersuutaasinnaava?

MIANERSOQQUSSUTIT malillugit iliorsimanerput ullumikkut uagut inuunitsinnut immaqa pissutaavoq. Allat toqusimapput mianersoqqussutit malillugit iliorsimannginnamik. Mianersoqqussutit suut pineqarsinnaappat? Assersuutigalugu mianersoqqussutit uagut nammineq timitsinni ’tupinnangaartumik pinngortitaasumi’ malugisartakkavut. (Tussiaat 139:14) Iluliarsuaq aserortoq takullugulu tusaalerutsigu, tamanna isumannaatsumukarnissamik mianersoqqussutitut paasissavarput inuunerput navianartorsiortinnginniassagatsigu iluliarsuup aserortup malissui takkuppata.

2. Sooq meeqqat mianersoqquneqarnissartik pisariaqartippaat, aamma sooq angajoqqaatik naalattariaqarpaat?

² Ilissi meeqqat navianarsinnaasunut mianersoqquneqarnissarsi pisariaqartipparsi, mianersoqqunissarsilu angajoqqaassi akisussaaffigaat. Immaqa eqqaamavatit oqaaqqissaarutit soorlu imaattut: „Kissarsuut attussanngilat. Uunarpoq.“ „Sissaliassanngilatit. Ulorianarpoq.“ „Talerpimmut saamimmullu qiviaqqaarlutit aqqusineq ikaartassavat.“ Ajoraluartumik meeqqat ilaat ajoqusersimapput ilaallu allaat toqusimapput naalannginnertik pissutigalugu. Angajoqqaanut naalanneq ’iluarpoq’, tassa eqqortuullunilu naleqquppoq. Aammattaaq silatusaarneruvoq. (Ussatit 8:33) Allassimaffimmi allami allassimavoq tamanna Naalakkamut, Jiisusi Kristusimut, iluarinartoq. Aap, Guutip angajoqqaassinnut naalattooqquaasi. — Kolossemiut 3:20; 1 Korinthimiut 8:6.

Naalattuuneq qaqugorsuarmut iluaqutaasussaq

3. „Inuunivik“ amerlanersatsinnut qanoq isumaqarpa, tamannalu meeqqat qanoq ilillutik neriuutigilersinnaavaat?

³ Angajoqqaannut naalattuunerit illit inuuninnut illersuutaavoq, aammattaarli naalattuunerit pissutigalugu inuuneq ’piumaartussaq’, ’inuunivimmik’ taaneqartoq, misigisinnaanngussavat. (1 Timotheusi 4:8; 6:19) Amerlanersatsinnut inuunivik tassaavoq nunarsuarmi Guutip silarsuassaani nutaami naassaanngitsumik inuuneq, tamannalu Guutip aalajaallutik inatsisiminik maleruaasunut neriorsuutigaa. Inatsisit taakkua pingaarnersaasa ilaat tassaavoq: „’Ataatat anaanallu ataqqikkit!’ Tassa inassut neriorsuutitalik siulleq: ’atugarissaaqqullutit inuummersoqqullutillu nunami.’“ Tassa angajoqqaatit naalattarukkit pilluassaatit. Siunissat qulakkeerneqassaaq, nunarsuarmilu paratiisiusumi naassaanngitsumik inuulernissamut periarfissaqassaatit! — Efesosimiut 6:2, 3.

4. Meeqqat qanoq ilillutik Guuti ataqqisinnaavaat tamatumalu iluaqutaanera misigalugu?

⁴ Angajoqqaatit naalannerisigut ataqqigaangakkit Guuti aamma ataqqisarpat, taannaavormi ilinnik taamaalioqqusisoq. Aamma illit nammineq iluaqutigisarpat. Biibilimi ima allassimavoq: „Uanga tassa [Jehova], Guutit, iluaqutaasunik ilinnik ajoqersuisoq.“ (Esaja 48:17; 1 Johannesi 5:3) Naalattuuneq ilinnut qanoq iluaqutaagami? Naalannerit ataatavit anaanavillu nuannaarutigissavaat, taava aamma illit nuannaartikkumassavaatsit. (Ussatit 23:22-25) Pingaarnerpaasorli tassaavoq naalakkaangavit Ataatannik qilammiusumik nuannaartitsisarnerit, assigiinngitsorpassuartigullu taassuma  akilerumaarpaatit! Misissoriartigu Jehovap Jiisusimik pilluaqqusillunilu sernissuinera, imminut ima oqaatigisumik: ’Tamatigut iluarisaanik iliortarpunga.’ — Johannesi 8:29.

Jiisusi eqiasuitsuuvoq

5. Suna pissutigalugu isumaqarpugut Jiisusi eqiasuilluni sulisimasoq?

⁵ Jiisusi Mariap angajulliliaraa. Ataatarsiaa, Josefi, sanasuuvoq, Jiisusilu aamma sanasunngorpoq. Josefip sanasutut ilinniartissimagunarpaa. (Matthæusi 13:55; Markusi 6:3; Lukasi 1:26-31) Takorloorsinnaaviuk Jiisusi sanasutut qanoq ittuusimassanersoq? Qilammiikkallarami, tupinnartuliornikkut niviarsiap Mariap illiaanut nuunneqanngikkallarami, ilisimassutsitut kinaassusilikkatut ima nassuiaavoq: ’Taamani [Guutip] sanianiippunga suliortuullunga nuannarisaallungalu ullut tamaasa.’ Guutip Jiisusip qilammi suliortutut pikkorissutut naammassisai assut nuannaarutigai. Jiisusi nunarsuarmi maani inuusuttuulluni sulisutut eqiasuitsuuniarluni sanasutullu pikkorissuuniarluni immikkut iliuuseqarsimassaaq, ilaa? — Ussatit 8:30, 1900/1961; Kolossemiut 1:15, 16.

6. (a) Sooq isumaqarpit Jiisusi meeraalluni angerlarsimaffimminni suliassaqartarsimasinnaasoq? (b) Meeqqat Jiisusi qanoq ilaarsinnaavaat?

⁶ Qularnanngilaq Jiisusi meeraalluni ilaannikkut pinnguartarsimassasoq, Biibilimmi nalaani pinnguarneq nalinginnaalluinnarpoq. (Zakaria 8:5, 1990; Matthæusi 11:16, 17) Qularutigissanngilalli Jiisusi, Josefimit sanasutut ilinniartinneqarnermi saniatigut, ilaqutariinni piitsuni qatanngutiminit angajullersaagami angerlarsimaffimminni suliassaqartarsimassasoq. Kingusinnerusukkut Jiisusi oqaluussisartunngorpoq inuunermillu ilorrisimaarnartunngortitsisinnaasut ilarpassui isumakkeerlugit. (Lukasi 9:58; Johannesi 5:17) Illit Jiisusi qanoq ilillutit ilaarsinnaaviuk? Angajoqqaavit ineeqqanni asaaqqusarpaatsit allanilluunniit suliaqaqqusarpaatsit? Kristumiut ataatsimiinnerinut najuunnikkut upperisannillu allanik oqaluttuussinikkut Guutimik pallorfiginninnermi peqataanissannut kajumissaartarpaatsit? Takorloorsinnaaviuk Jiisusi nukappiaraalluni taamatupajaaq kajumissaarneqarnerminut qanoq periartarsimassanersoq?

Allakkanik misissueqqissaartarpoq allanillu eqqarsalersitsisarluni

7. (a) Poorskisioriartoramik Jiisusip kikkut angalaqatigisimasinnaavai? (b) Jiisusip ilaqutai angerlamut aallarmata Jiisusi sumiippa, aamma sooq tassaniippa?

⁷ Ilaqutariit Israelikkuusut angutitaat tamarmik peqquneqarsimapput juutit nalliuttorsuini pingasuni Jehova pallorfiginiarlugu naalaffimmukartaqqullugit. (5 Mosesi 16:16) Jiisusi aqqaneq-marlunnik ukioqartoq ilaqutariit immaqa tamarmik Jerusalemimukarsimapput poorskisioriartorlutik. Affarmik nukai najaalu immaqa ilaapput. Jiisusip ilaqutaasalu angalaqataat tassaasimasinnaapputtaaq Salome, Mariamut qatanngutaasimasinnaasoq, Salomellu uia Zebedæusi, taakkualu erneri Jaaku Johannesilu,  kingusinnerusukkut apustilinngortut. * (Matthæusi 4:20, 21; 13:54-56; 27:56; Markusi 15:40; Johannesi 19:25) Utimut aallaramik Josefi Marialu isumaqarsimasinnaapput Jiisusip eqqarlitik ilagigai, taamaammat peqannginnera aallaqqaammut maluginngilaat. Ullulli pingasut qaangiummata Mariap Josefillu Jiisusi kiisami nanivaat naalaffimmiittoq, „naalaffimmi ajoqersuisut akornanniittoq taakku tusarnaarlugit aperisarlugillu“. — Lukasi 2:44-46.

8. Jiisusi naalaffimmi suleriva, aamma sooq inuit tupigusuutigaat?

⁸ Jiisusip naalaffimmi ajoqersuisut apersueriaaseq qanoq ittoq atorlugu apersorpai? Alapernaannini piinnarlugu imaluunniit paasissutissanik piniaannarluni apersorunanngilai. Oqaaseq grækerisooq ’aperisarlugit’-mik nutserneqarsimasoq ilaatigut killisiunermut tunngatillugu atorneqartarpoq taamaammallu apeqqarissaarnermut tunngasinnaalluni. Aap, Jiisusip inuusuttuullunili Allakkat ima misissoqqissaartigisarsimavai upperisarsiornikkut ilinniartitsisut ilinniarluarsimasut tupigusutsillugit. Biibilimi ima allassimavoq: „Tusarnaartut tamarmik ilisimassusia akissutaalu ajasoorutigeqaat.“ — Lukasi 2:47.

9. Biibilimik atuaqqissaarnermut tunngatillugu Jiisusip maligassiaa qanoq ilillutit malissinnaaviuk?

⁹ Qanoruna ililluni Jiisusi meeraalluni ilinniartitsisunik misilittagalinnik allaat Allakkat pillugit ilisimasaminik tupigusutsitsisinnaasoq? Soorunami Guutimik mianerinnittunik, naalungiarsuunerminiilli Guutip siunnersuutai pillugit ilinniartitsisunik, angajoqqaaqarnini iluaqutigaa. (2 Mosesi 12:24-27; 5 Mosesi 6:6-9; Matthæusi 1:18-20) Qularutiginngilarput Josefip Jiisusi synagogimukaqatigisarsimassagaa Allakkat atuffassissutigineqarnerat oqaloqatigiissutigineqarnerallu tusarnaariarlugu. Aamma illit ima iluanaartigaat ilinnik Biibilimik atuaqqissaaqatiginnittartunik ilinnillu kristumiut ataatsimiinnerinut ataatsimiigiaqatiginnittartunik angajoqqaaqarlutit? Ilungersorlutik iliuuserisaat qujamasuutigaagit, soorluttaaq Jiisusip angajoqqaami iliuuserisaat qujamasuutigigai? Allat ilikkakkatit pillugit oqaluttuuttarpigit, soorluttaaq Jiisusi taamatut iliortarsimasoq?

Jiisusi naalatsigitippoq

10. (a) Sooq angajoqqaavisa Jiisusi sumi nanissanerlugu nalunngittariaqaraluarpaat? (b) Jiisusi meeqqanut qanoq maligassaalluarpa?

¹⁰ Maria Josefilu ullut pingasut qaangiuttut Jiisusi kiisami naalaffimmiittoq nanigamikku qanoq issimassasoraagit? Qularnanngitsumik oqiliallassimassapput. Jiisusilli tupaallaatigaa angajoqqaami sumiinnini nalummassuk. Tamarmimmi tupinnartuliornikkut inunngornera nalunngilaat. Aamma siunissami annaassisuunissaata Guutillu naalagaaffiani naalakkersuisuunissaata annikitsualuttortaanik tamanik ilisimanninngikkaluarlutik, tamatumunnga tunngasunik ilisimasaqarsimassapput. (Matthæusi 1:21; Lukasi 1:32-35; 2:11) Taamaammat Jiisusip ima aperai: „Sooq ujarpisinga? Nalugassiuk Ataatanniittariaqartunga [Ataatama illuaniittariaqartunga, NV]?“ Taamaakkaluartorli Jiisusip naalalluni angajoqqaani Nazaretimut angerlaqatigai. Biibilimi ima allassimavoq: „Taakkununnga naalatsigitittuarpoq.“ (NV) „Anaanaatalu oqaatsit tamakku tamaasa uummamminut toqqorpai.“ — Lukasi 2:48-51.

11. Naalanneq pillugu Jiisusip maligassiaa sumik ilinniarfigisinnaaviuk?

¹¹ Angajoqqaannut tamatigut naalannissaq eqqarsaatigalugu Jiisusi ilaaruminartittarpiuk? Imaluunniit misigisarpit pissutsit qanoq innerinik amerlanertigut paasinnittanngitsut, aamma misigisarpit illit taakkunannga ilisimaqarnerullutit? Imaassinnaavormi aalajangersimasut — soorlu immaqa oqarasuaatit angallattakkat, qarasaasiat nutaalialluunniit allat — pillugit ilisimaqarnerusutit. Eqqarsaatigeriarulli Jiisusi, ilinniartitsisunik misilittagalinnik allaat ’ilisimassutsiminik akissutiminillu’ tupigusutsitsisoq. Nassuerutigissagunarpat taassumunnga naleqqiullutit illit ilisimasaqarpallaarnak. Taamaakkaluartorli Jiisusi angajoqqaaminut naalatsigitippoq. Tamanna ima paasisariaqanngilaq aalajangiineri tamatigut isumaqatigisarai. Inuusuttuaraaninili tamaat „taakkununnga naalatsigitittuarpoq“. Taassuma maligassiaa qanormita ilinniarfigisinnaaviuk? — 5 Mosesi 5:16, 29.

 Naalattuunissaq unamminiarnartoq

12. Naalattuuneq inuunermik qanoq ililluni annaassisinnaava?

¹² Naalattuunissaq ajornaatsuujuaannanngilaq. Ukiualuit matuma siorna niviarsiaqqat marluk pisuinnaat ikaartarfiatigoornatik motorveji biilinit sanileriinnit arfinilinnit ingerlavigineqartartoq arpallutik ikaarumallerpaat. „John, qaaniarit“, kammalaatertik pisuinnaat ikaartarfiata tungaanukartoq suaartarpaat. „Aqqusineq ikaarlugu arpaqatigissavatsigut, ilaa?“ Nangaammat niviarsiaqqat aappaata mitaatigalugu ima nilliaffigaa: „Qunutooq!“ John aqqusernup ikaarnissaa qunuginngikkaluarlugu ima oqarpoq: „Anaanaga naalattariaqarpara.“ Kingunitsianngua pisuinnaat ikaartarfiatigoortilluni qiarsuttumik bremserpaluk tusaavaa, ammullu qiviarami niviarsiaqqat biilimit aportittut takuai. Niviarsiaqqat aappaa toquvoq, aappaalu ima aqqunartitersimatigaaq illuanik niuersittariaqarluni. Niviarsiaqqat anaanaat, tamatigut pisuinnaat ikaartarfiatigoortaqqullugit erseqqissaasarsimasoq, kingusinnerusukkut Johnip anaanaanut ima oqarpoq: „Illit ernittut naalatsigisimassagaluaramik.“ — Efesosimiut 6:1.

13. (a) Sooq angajoqqaatit naalattariaqarpigit? (b) Meeqqat angajoqqaamik iliuusereqqusaannik iliunnginnissaat qaqugukkut pissusissamisuussava?

¹³ Sooq Guuti ima oqarpa: „Qitornaasusi, angajoqqaasi naalassigit“? Angajoqqaanut naalannerup assigiinnarmagu Guutimut naalanneq. Angajoqqaatit ilinnit misilittagaqarnerupput. Assersuutigalugu Johnip anaanaa ikinnguteqarsimavoq ukiut tallimaannaat ajunaarneq eqqaaneqareersoq sioqqullugu motorveji taannarpiaq ikaariaraluarlugu toqusimasumik ernilimmik! Soorunami imaassinnaavoq angajoqqaannut naalannissat ilinnut ajornaatsuujuaannanngitsoq, kisianni Guuti oqarpoq naalattariaqartutit. Angajoqqaavilli allalluunniit sallutikkusuppatsit, tillitsikkusullutilluunniit Guutilluunniit iluarinngisaanik allamik iliuuseqartikkusuppatsit ’Guuti inunnit naalannerusariaqarpat’. Taamaattuminguna meeqqat ’angajoqqaaminnut naalattuunissaat’ pillugu Biibilimi allassimaffiup nanginnerani allassimasoq naalassasut „Naalakkami“. Tassa imaappoq angajoqqaatit naalattariaqarpatit Guutip inatsisaanut naapertuuttunut tamanut tunngatillugu. — Apustilit Suliaat 5:29.

14. Sooq naalannissaq inummut naammalluinnartumut ajornannginnerua, taamaakkaluartorli sooq ilinniarneqartussaava?

¹⁴ Immaqa ima eqqarsarputit: „Jiisusitut naammalluinnartuugaluaruma angajoqqaannut naalannissara ajornassanngikkaluarpoq.“ Naammalluinnartuugaluaruit — tassa ’minguitsuugaluaruit, ajortilinnit immikkoortitaallutit’ — ajortumik ilioqqajaassanngikkaluarputit, soorlu maannakkut ajortumik ilioqqajaasartutit. (Hebræerit 7:26; 1 Mosesi 8:21; Tussiaat 51:7) Allaalli Jiisusip naalanneq ilinniartariaqarpaa. Biibilimi ima allassimavoq: „Ernerugaluarluni naalliuutimigut naalanneq ilinniartariaqarpaa.“ (Hebræerit 5:8) Jiisusip naalliuutit naalannerup — qilammi ilinniartariaqanngisaannakkami — ilinniarnissaanut qanoq iluaqutigai?

15, 16. Jiisusip naalanneq qanoq ilinniarpaa?

 ¹⁵ Jehovap siulersuineratigut Josefip Mariallu Jiisusi meeraagallarmat navianartunut sernissorpaat. (Matthæusi 2:7-23) Ilaannili Guutip Jiisusi tupinnartuliornikkut sernissorunnaarpaa. Biibilimi allassimavoq Jiisusi isumakkut timikkullu ima naalliutsigisoq ’nillingaarluni qullilillunilu qinulluni torlulallunilu’. (Hebræerit 5:7) Tamanna qanga piva?

¹⁶ Tamanna pivoq ingammik Jiisusip nunarsuarmi inuunerani nalunaaquttap-akunnerini kingullerni Saatani taanna assuarnaakkunnaarsinniarlugu tamaviaalermat. Jiisusi Guutimut mitallersuusorineqarluni toqunissami Ataataminik tusaamanerlugaalersitsinissaa eqqarsaatigiinnarlugu naallioqaaq. Jiisusi annilaangalluni Naatsiivik Getsemanemi Ataataminut qinunermini ima ilungersortigaaq „kiagunneri soorlu aap kuserneri nunamut nakkaasut“. Akunnialuit tamatuma kingorna Jiisusi nappakkami anniartitaaffimmiitilluni ima naalliutsigaaq „nillingaarluni qullilillunilu“ Guutimut qinulluni. (Lukasi 22:42-44; Markusi 15:34) Taamaalilluni ’naalliuutimigut naalanneq ilinniarpaa’ taamalu Ataatami uummataa nuannaartillugu. Maanna Jiisusi qilammiilluni misigeqatigisarpaatigut naalattuunniarluta ilaannikkut akiuuttariaqaraangatta. — Ussatit 27:11; Hebræerit 2:18; 4:15.

Naalanneq qanoq ilinniarneqartartoq

17. Perorsagaaneq, imaluunniit naqqinneqarneq, qanoq isigisariaqarparput?

¹⁷ Ataatavit anaanavillu perorsaraangamitsit ersersittarpaat pitsaanerpaamik kissaallutit asallutillu. Biibilimi ima apeqquteqarpoq: „Kina ernerineqartoq angutaata perorsartarinnginnerpaa?“ (1900/1961) Angajoqqaatit ilinnik ima asanninnikitsigippata ilinnik siunnersuinissartik naammattumik piffissaqarfiginagu aamma siunnersorniarlutit pisariaqartumik iliuuseqarnatik ajussagaluaqaaq, ilaa? Aammattaaq Jehovap asagamisit naqqittarpaatit. „Perorsagaaneq sunaluunniit atuutsilluni iluaaginartuusaraluarpoq nuannersortaqarnani, kingunerisarpaali eqqissineq iluarnerlu.“ — Hebræerit 12:7-11.

18. (a) Asannittumik perorsagaaneq sumut uppernarsaataava? (b) Taamatut perorsaanerup allanut ajunngitsumik sunniuteqarsimaneranik takusaqarnikuuit?

¹⁸ Itsaq Israelimi kunngip, ilisimassusersua pissutigalugu Jiisusip eqqaasaata, eqqartorpaa angajoqqaat meeqqaminnik asannillutik perorsaanissaat qanoq pingaaruteqartigisoq. Salomo ima allappoq: „Unataammik atuiumanngitsup ernini uumigaa, ernerminilli asannittup meerannguuneraniilli sukannersumik perorsartarpaa.“ * Salomo allaat oqarpoq inuup asannittumik naqqinneqarnerminik akuerinnittup tarnini toqumit annaanneqartissinnaagaa. (Ussatit 13:24; 23:13, 14; Matthæusi 12:42) Arnaq kristumiu oqaluttuarpoq meeraalluni kristumiut ataatsimiinneranni iluamik pinngikkaangami ataatami oqarfigisaraani angerlarunik naveersikkumaarluni. Maanna tunniusimangaarluni ataatani eqqaasarpaa, asannilluni perorsaanera naqqiisarneralu inuunerminut sunniuteqarluarmat.

19. Angajoqqaavit naalannissaannut pissutaasoq pingaaruteqarnerpaaq suua?

¹⁹ Angajoqqaaqaruit ilinnik ima asannitsigisunik ilinnik asannittumik perorsaanissamut perorsaatissiinissamullu piffissamik nukinnillu atuisartunik, tamanna qujamasuutigiuk. Naalattakkit, soorluttaaq Naalakkatta Jiisusi Kristusip angajoqqaani, Josefi Marialu, naalattarai. Ingammilli naalattakkit Ataatavit qilammiusup, Jehovap, ilinnik taamaalioqqusinera pissutigalugu. Taamaalillutit imminut iluaqutississaatit, ’atugarissaassaatit inuummersorlutillu nunami’. — Efesosimiut 6:2, 3. (wE 2/15 07)

[Quppernerup ataani ilanngussat]

Qanoq akissavit?

• Meeqqat angajoqqaaminnut naalannertik qanoq iluaqutigissavaat?

• Jiisusi meeraalluni angajoqqaanut naalannermut tunngatillugu qanoq maligassiuiva?

• Jiisusip naalanneq qanoq ilinniarpaa?

[Atuaqqissaarnermi apeqqutit]

[Qupp. 24-mi assiliartaq]

Jiisusip aqqaneq-marlunnik ukioqarluni Allakkat nalunngilluarpai

[Qupp. 26-mi assiliartaq]

Jiisusip naalliunnermigut naalannermik ilinniarnera qanoq paasisariaqarpa?