Qujamasunnerit ineriartortittuaannaruk
Qujamasunnerit ineriartortittuaannaruk
„Ilami eqqarsaativit erlinnassusii uannut, ila amerlangaassusii, Guuti!“ — TUSSIAAT 139:17.
1, 2. Sooq Guutip oqaasia qujamasuutigisariaqarparput, tussiaasiortullu qujamasunnini qanoq ersersippaa?
NASSAARINEQARNERA uissuumminarpoq. Jehovap naalaffia Jerusalemimiittoq iluarsaanneqarmat palasiunerup Hilkijap nassaaraa „mappersagaq [Jehovap] inatsisaanik [Jehovap] Mosesikkut nalunaarutigisimasaanik imaqartoq“, qularnanngitsumik inatsisit allassimaqqaarfiat ukiut 800-t missiliorlugit tamatuma siorna allallugit naammassineqartut. Takorloorsinnaaviuk kunngi Josija Guutimik mianerinnittoq qanoq misigisimasimassanersoq mappersakkat imminut aggiunneqarmata? Taassuma taakku erlinnartuutitut isigai, ingerlaannarlu naalagaaffimmi allattuuneq Shafani tassannga atuffassitippaa. — 2 Nalunaarsuutit 34:14-18.
2 Ullumikkut inuit milliardillit Guutip oqaasia tamakkerlugu imaluunniit Guutip oqaasiata ilaata atuarnissaanut periarfissaqarput. Tamannali pissutaalluni Biibili pingaaruteqannginnerulerpa? Soorunami naamik. Tamatumami imarai Ajugaqanngitsup eqqarsaatai uagutsinnut iluaqutissatut allanneqarsimasut. (2 Timotheusi 3:16) Tussiaasiortup Daavip Guutip oqaasianut misigissutsini ima allaatigai: „Ilami eqqarsaativit erlinnassusii uannut, ila amerlangaassusii, Guuti!“ — Tussiaat 139:17.
3. Sumi erserpa Daavi anersaakkut ittunik isumaliutiginneqqissaartartoq?
3 Daavi Jehovamik, taassuma oqaasianik pallorfiginninnermillu ilumoortumik aaqqissuussineranik qujamasuutiginnikkunnaanngisaannarpoq. Misigissutsini tussiaasiarpassuarmini nuannersuni ersersippai. Assersuutigalugu Tussiaat 27:4-mi ima allappoq: „Manna kisiat [Jehovamit] kissaatigaara, ataaseq kipitsavigaara: Ineqarumallunga [Jehovap] illuani inuunera tamaat, tipaatsuutigisinnaajumallugu [Jehovap] alutornassusia, akissutisiffigiumallugulu naalaffiani.“ Oqaatsit „akissutisiffigiumallugu naalaffiani“-mik Biibilimi dronningimit Margrethe II-mit atortussanngortinneqarsimasumi nutserneqartut allassimaqqaarfinni hebræerisuuni isumaliutiginninnermik, misissueqqissaarnermik, aamma nuannaarluni, iluarinnilluni alutorsarlunilu qimerluuinermik isumaqarput. Erseqqippoq Daavi anersaakkut ittunik isumaliutiginneqqissaartartoq Jehovallu tunissutaanik anersaakkut ittunik pingaartitsisoq. Sallusuissutit Guutip paasinarsisitai tamaviisa annikitsunnguugaluaraangataluunniit qujamasuutigisarpai. Daavip qujamasuutiginninneranik ilaarsinissamut pissutissaqarluarpugut. — Tussiaat 19:8-12.
Sallusuissummik Biibilimeersumik ilisimasaqarsinnaanerit qujamasuutigiuk
4. Sooq Jiisusi ’Anersaamit Illernartumit sunnigaalluni qiimmattarpa’?
4 Silassorissuseq silarsuarmiluunniit ilinniagaqarneq makitalersitseqqajaasartut Guutip oqaasianik paasinninnissamut aalajangiisuunngillat. Jehovalli ajunngissusia pisassarinngisaraluaq taassuma maniguuttunut eqqortuliorusuttunullu anersaakkut pisariaqartitaqarnerminnik nassuerutiginnittunut ersersittagaa paasinninnissamut aalajangiisuuvoq. (Matthæusi 5:3; 1 Johannesi 5:20) Jiisusi inuit naammalluinnanngitsut atiisa qilanni allanneqarsimanerat eqqarsaatigalugu „Anersaamit Illernartumit sunnigaalluni qiimmattarpoq oqarlunilu: ’Unnersiutigaakkit Ataataq qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut.’“ — Lukasi 10:17-21.
5. Sooq Jiisusip ajoqersugaasa Guutip naalagaaffia pillugu sallusuissutit imminnut saqqummersinneqartut taamaattussaannartut isigisussaasimanngilaat?
5 Jiisusi taamatut qamannga pisumik qinoreerami ajoqersukkani saaffigai ima oqarluni: „Pilluarput isit ilissi takusassinnik takunnittut. Oqarfigaassimi: Pruffiitit kunngillu amerlaqisut takusarsi takorusukkaluarpaat takunaguli, tusaasarsilu tusaarusukkaluarpaat, tusaanaguli.“ Aap, Jiisusip ajoqersukkani aalajaatsut kajumissaarpai Guutip naalagaaffia pillugu sallusuissutit erlinnartut saqqummersinneqartut taamaattussaannartut isigeqqunagit. Sallusuissutit taakkua Guutip kiffaanut siornatigut saqqummersinneqarsimanngillat, Jiisusillu nalaani „ilisimasunut sianisuunullu“ saqqummersinneqanngilluinnarput! — Lukasi 10:23, 24.
6, 7. (a) Sallusuissummik Guutimeersumik qujamasuutiginninnissamut sunik pissutissaqarpugut? (b) Upperisarsiornerup ilumoortup eqqunngitsullu suna assigiinngissutigaat?
6 Ullumikkut inuusugut sallusuissummik Guutimeersumik qujamasuutiginninnissamut suli annerusumik pissutissaqarpugut, Jehovammi „kiffaq ilumoortoq silatoorlu“ iluaqutigalugu innuttani oqaatsiminik suli paasinninnerulersippai. (Matthæusi 24:45; Danieli 12:10) Naggatissap nalaa pillugu pruffiiti Danieli ima allappoq: „Paasisimasaqarneq annertusiartussaaq.“ (Danieli 12:4) Illit aamma isumaqanngilatit ullumikkut Guuti pillugu ilisimasaqarneq ’annertusisimasoq’ aamma Jehovap kiffai anersaakkut inuussutissanik naammangaartunik pisartut?
7 Guutip innuttaasa anersaakkut atugarissaarnerata Babylonersuarmilu upperisarsiornikkut paatsiveerunnersuup assigiinngilluinnarnerat erseqqippoq. Taamaammat upperisarsiornermik eqqunngitsumik pakatsissutiginnittut iluarinninngitsulluunniit ilarpassui pallorfiginninnermut ilumoortumut ornigussorput. Savat assersuutaasut taakkua Babylonersuup ’ajortuliornerini peqataajumanatilluunniit’ ’perluutaanit eqqorneqarumanngillat’. Jehovap taassumalu kiffaasa taama misigisut tamaasa ilagiinnut kristumiunut ilumoortunut ilaanissaannut qaaqquaat. — Saqqummersitat 18:2-4; 22:17.
Qujamasuttut Guutimut ornigussorput
8, 9. Haggaji 2:7-imi allassimasut ullumikkut qanoq ilillutik eqquuppat?
8 Jehova illu imminik pallorfiginnittarfik anersaakkut ittoq pillugu ima siulittuivoq: „Inuiaat tamaasa aalatikkumaarpakka, inuiaallu tamarmik erlinnangaartortaat takkutissapput; illulu manna tamakkerlugu alutornarsisikkumaarpara.“ (Haggaji 2:7, NV) Siulittuut tupinnartoq taanna Haggajip nalaani eqquuppoq Guutip innuttai kinguleruttut utermata naalaffik Jerusalemimiittoq qarmaqqikkiartorlugu. Ullumikkut Haggajip oqaasii eqquuteqqipput Jehovap naalaffissuanut anersaakkut ittumut tunngatillugu.
9 Millionillit naalaffimmut anersaakkut ittumut ornigussoreerput Guuti pallorfiginiarlugu „anersaakkut ilumoornikkullu“, aamma ukiut tamaasa ’inuiaat erlinnangaartortaat’ hundrede-tusindinit amerlanerusut ornigussorput. (Johannesi 4:23, 24) Tamanna erserpoq ukiumut kiffartorfiusumut 2006-imut nalunaarusiami, tassani allassimagami 248.327-t Jehovamut tunniulluinnarsimanerminnut assersuutaasumik kuisissimasut. Tassa agguaqatigiissillugu ullormut nutaat 680-it ilannguttarput! Sallusuissummik nuannarinninnerat Guutillu naalagaaffianik oqaluussissutiginnittutut Jehovamut kiffartorusunnerat Guutimit ilumut kajungilersinneqarsimanerannut uppernarsaataavoq. — Johannesi 6:44, 65.
10, 11. Misigisaq inuit ilaasa sallusuissummik Biibilimeersumik qanoq ilillutik qujamasuutiginnilersimanerannik ersersitsisoq oqaluttuarilaaruk.
10 Eqqortuliorusuttut taakkua ilarpassui sallusuissummut kajungilerput ’iluartoq iluanngitsumit, tassa Guutimik kiffartuussisoq kiffartuussisuunngitsumit, immikkoortissinnaasimagamikku’. (Malaki 3:18) Tamanna Waynemut Virginiamullu, aappariinnut naaggaartut oqaluffiannut ilaasortaasimasunut, apeqquterpassuarminnulli akissutisisimanngitsunut pisimavoq. Sorsunneq uumigaat, palasillu sakkutuunik sakkunillu pilluaqqusisarnerat paatsiveqartinnagulu isumakuluutigaat. Utoqqaliartortillutik naalagiartartunit allanit soqutigineqanngitsutut misigipput, naak Virginia ukiuni arlalinni sapaatikkut meeqqanik upperisamik ilinniartitsisarsimagaluartoq. Taakku ima oqaluttuarput: „Pulaarneqarneq ajorlutalu anersaakkut qanoq innitsinnik soqutiginnittoqanngilaq. Ilagiit aningaasaativut kisiisa soqutigaat. Pakatseqaagut.“ Oqaluffimminni suiaassuseqammik atoqateqartarneq assuarineqarunnaarmat suli pakatsinerulerput.
11 Tamatuma nalaani Waynep Virginiallu ernutaat tamatumalu kingorna paniat Jehovamut nalunaajaasunngorput. Wayne Virginialu tupaqqaaraluarput, kingusinnerusukkulli isumartik allanngortippaat Biibilimillu atuaqqissaaqatigineqarnissaminnut akuersillutik. Wayne ima oqaluttuarpoq: „Qaammatit pingasuinnaat ingerlaneranni ukiuni 70-ini qaangiuttuni Biibili pillugu ilikkakkatsinnit amerlanerusunik ilikkagaqarpugut! Tusarnikuunngisaannarparput Guuti Jehovamik ateqartoq, aamma Guutip naalagaaffia nunarsuarmilu Paratiisi pillugit ilisimasaqanngilagut.“ Sivitsunngitsoq aappariit eqqortuliorusuttut taakku kristumiut ataatsimiinnerinut najuuttalerput oqaluusseqataasalerlutillu. „Kikkut tamaasa sallusuissut pillugu oqaluttuukkusuppavut,“ Virginia oqarpoq. Marluullutik 80-it sinnerlugit ukioqarput 2005-imilu kuisillutik. Taakku ima oqarput: „Kristumiut ilumoortut angerlarsimasutut misigiffigisavut nanivavut.“
’Ajunngitsuliornernut tamanut piareersarneqartarnerput’ qujamasuutigiuk
12. Jehovap kiffani qanoq ikiortuaannarpai, ikiuineralu iluaqutiginiarlugu susariaqarpugut?
12 Jehovap kiffani piumasaminik iliornissaannut ikiortuaannarpai. Assersuutigalugu Noa qanoq umiarsualiornissaq — sananissamik pilersaarut misiliinermi siullermi eqqortumik naammassineqartussaq — pillugu ilitsersoqqissaarneqarpoq! Misiliinermilu siullermi eqqortumik naammassineqarpoq. Sooq? Noa ’Guutip peqqusineratorluinnaq iliormat’. (1 Mosesi 6:14-22) Ullumikkuttaaq Jehovap kiffani piumasaminik iliornissaannut piareersarluartarpai. Suliassarput pingaarnerpaaq soorunalimi tassaavoq Guutip naalagaaffia pilersinneqareersoq pillugu nutaarsiassamik nuannersumik oqaluussissutiginninneq qinngaqqunnanngitsullu Jiisusimut ajoqersuganngornissaannut ikiornissaat. Noallu pisimaneratut naalattariaqarpugut suliarput iluatsissappat. Naalassaagullu Jehovap oqaatsini peqatigiissortanilu aqqutigalugit siunnersuutaanik maleruaanitsigut. — Matthæusi 24:14; 28:19, 20.
13. Jehovap ilinniartinneqarsinnaaqqulluta qanoq pilersorpaatigut?
13 Suliassaq tamanna suliarissagutsigu atortutta pingaarnerpaap, Guutip oqaasiata, eqqortumik atornissaa ilinniartariaqarparput. Biibili ’iluaqutaavoq ajoqersuinermut, uppernarsaanermut, ilitsersuinermut iluarnermullu perorsaanermut, inuk Guutip pigisaa inerilluinnaqqullugu ajunngitsuliornernut tamanut piginnaanngorsagaalluni [piareersarluagaaqqullugu, NV]’. (2 Timotheusi 2:15; 3:16, 17) Jehovap ukiuni hundredelinni siullerni iliorsimanermisut ilagiit kristumiut aqqutigalugit naleqangaartumik ilinniartippaatigut. Sapaatip-akunneri tamaasa Teokratiimik Ilinniarfik oqaluussinermullu tunngasumik ataatsimiinneq silarsuarmi tamarmi ilagiinni 99.770-ini ingerlanneqartarput oqaluussinermik ilinniartinniarluta. Ataatsimiinnernik pingaarutilinnik taakkuninnga qujamasuutiginninnerit ersersittarpiuk aalajaallutit taakkununnga najuuttarnikkut ilikkakkavillu atornerisigut? — Hebræerit 10:24, 25.
14. Jehovamut kiffaasut taassumunnga kiffartornermik immikkut pisinnaatitaaffeqarnerminnik qujamasuutiginninnertik qanoq ersersippaat? (Oqaaseqarfigiuttaaq nalunaarusiaq Vagttårnet 1. februaari 2007-imoortumi qupp. 27-30-miittoq).
14 Nunarsuarmi tamarmi Guutimut kiffaasut millionillit taamatut ilinniartinneqarnerminnik qujamasuutiginninnerminnik ersersitsipput pimoorussillutik oqaluussinermikkut. Assersuutigalugu ukiup kiffartorfiusup 2006-ip ingerlanerani oqaluussisartut 6.741.444-t nalunaaquttap-akunneri katillugit 1.333.966.199-it oqaluusseriaatsinut tamanut atorpaat, ilaatigut 6.286.618-inik Biibilimik atuaqqissaaqateqarnermikkut. Taakku ukiumut nalunaarusiami allassimasut qiimmaallannartut ilaannaraat. Kajumissaarpatsigit nalunaarusiaq misissoqqullugu qiimmassaatigalugulu, soorluttaaq ukiuni hundredelinni siullerni qatanngutitta taamanikkut oqaluussinerup siumukarneranik nalunaarusiat qularnanngitsumik assut qiimmassaatigisaraat. — Apustilit Suliaat 1:15; 2:5-11, 41, 47; 4:4; 6:7.
15. Sooq tarnikkut iluunngarlutik Jehovamut kiffartortut nikallunganissamut pissutissaqanngillat?
15 Nipituumik unnersiutiginninneq tamanna ukiut tamaasa Guutimut annguttartoq, Jehovap kiffaasa Jehovamik ilisarisimanninnermik taassuminngalu nalunaajaatiginninnermik immikkut pisinnaatitaaffeqarnerminnik qanoq qujamasuutiginnitsiginerannut ersiutaavoq. (Esaja 43:10) Ilumoorpoq qatanngutit angutit arnallu utoqqaat, napparsimasut innarluutillillu ilaasa qujaniutitut pilliutigisinnaasaasa uillarnerup aningaasannguataanut assersuunneqarsinnaanerat. Puiussanngilarpulli Jehovap taassumalu ernerata uummatikkut iluunngarlutik kiffartortut sapinngisartillu tamaat iliuuseqartut ilumoorlutik qujamasuutigigaat. — Lukasi 21:1-4; Galatiamiut 6:4.
16. Ilinniartitsinermut atortut ukiut ingerlanerini Guutip uagutsinnut tunniussai suuppat?
16 Jehovap oqaluussinermik ilinniartiinnanngilaatigut, aammali peqatigiissortani aqqutigalugu ilinniartitsinissamut atortussanik pitsaasunik pilersorpaatigut. Ukiut ingerlanerini atuakkat soorlu sagdlusuíssut inûnigssamut nâgssáungitsumut sangmisok’, pâratîsime nuname nâgssáungitsumik inûsínauvutit, Ilisarsineq inuunermut naassaanngitsumut sammisoq maannakkullu Hvad er det Bibelen virkelig lærer? atorpavut. Iluaqutissanik taakkuninnga qujamasuutiginnivissut oqaluussinermi atorluartarpaat.
Atuagaq Hvad er det Bibelen virkelig lærer? atorluaruk
17, 18. (a) Hvad er det Bibelen virkelig lærer?-imi immikkoortut sorliit oqaluussinermi atussallugit nuannaraagit? (b) Ilagiinnik nakkutilliisoq atuagaq pillugu qanoq oqarsimava?
17 Atuagaq Hvad er det Bibelen virkelig lærer? 19-inik kapitalilik, sukumiisumik tapiliussartalik aamma erseqqissunik paasiuminartunillu oqaasertalik oqaluussinermi iluaqutissaavoq pitsassuaq. Assersuutigalugu kapitalit aqqaneq-aappaanni sammineqarpoq „Inooriaaseq Guutip nuannarisaa“. Tamatumani ilinniartup paasissavaa qanoq ililluni Guutimut ikinngutaalersinnaanerluni, inuppassuit Guutimut ikinngutaasinnaanertik eqqarsaatigisimanngisaannaraluarlugulu ilimagisimanngisaannaraluaraat. (Jaaku 2:23) Atuagaq Biibilimik atuaqqissaaqatigiissutissaq taanna qanoq igineqarpa?
18 Ilagiinnik nakkutilliisoq Australiamiittoq oqaluttuarpoq atuagaq Hvad er det Bibelen virkelig lærer? „oqaluussiffigisat ingerlaannaq nuannarilertaraat tamannalu pissutigalugu oqaloqatigilernissaat ajornannginnerusartoq“. Nangilluni allappoq atuagaq atoruminangaarmat „oqaluussisartorpassuit oqaluussinermi imminut tatigileqqillutillu nuannaaleqqissimasut. Tupinnanngilaq ilaasa atuagaq „erlinnartuut“-mik taasarmassuk!“
19-21. Misigisat Hvad er det Bibelen virkelig lærer?-ip pingaaruteqarneranik erseqqissaasut oqaluttuarilaakkit.
19 „Guutip aallartitarisimassavaasi,“ arnap Guyanamiittup pioneri matumi silataaniittoq taama oqarfigaa. Arnap angutaataata taanna meeqqatillu mikisut marluk qimaqqammersimavai. Pionerip Hvad er det Bibelen virkelig lærer?-imi kapitali 1 qupperpaa immikkoortorlu 11 nipituumik atuarlugu. Taanna „Naapertuilluanngitsuliorfigineqarnivut Guutip qanoq isigai?“-mik qulequtaaraqarpoq. Pioneri ima oqaluttuarpoq: „Tassani allassimasut taassuma killinneqaatigingaarpai. Allaat pisiniarfiutimi tunuatungaanukartariaqalerpoq qianiarluni.“ Arnaq qatanngummit arnamit tamaani najugalimmit aalajangersimasumik Biibilimik atuaqqissaaqatigineqarnissaminik neqeroorummut akuersivoq sulilu siumukarluni.
20 Josép, Spaniami najugaqartup, nuliani angallannikkut ajunaarnermi annaasimavaa. Ikiaroornartumik atornerluineq tuppallersaatigaa, aamma psykologinik oqaloqateqartarpoq. Apeqqulli Josép eqqarsaatiginerusartagaa akisinnaanngilaat: „Sooruna Guutip nuliara toqutikkaa?“ Ullut ilaanni Josép suleqatini Francesc oqaloqatigilerpaa, taassumalu siunnersuutigaa Hvad er det Bibelen virkelig lærer?-imi kapitali 11, „Sooq naalliuunnartut atuunnerat Guutip akueraa?“-mik qulequtalik, oqaloqatigiissutigissagitsik. Biibilimi nassuiaatigineqartut aamma ilinniartitsisumik atuartumillu assersuusiaq Josép killinneqaatigingaarpai. Atuaqqissaarnini pimoorutilerpaa. Ataatsimeersuaararnermut najuutereerpoq maannalu naalagaaffilersaarfimmi najukkaminiittumi ataatsimiinnernut najuuttarluni.
21 Roman, niuertoq Polenimiu 40-nik ukiulik, Guutip oqaasianik ataqqinnittuaannartuuvoq. Ilaannili suliffini ulapputigingaaramiuk Biibilimik atuaqqissaarnermini siumukarunnaarpoq. Taavali ataatsimeersuarnermut najuuppoq atuakkamillu Hvad er det Bibelen virkelig lærer?-imik pilluni. Taamanimiilli malunnartumik siumukalerpoq. Taanna ima oqarpoq: „Atuakkap Biibilimi ajoqersuutigineqartut tunngaviusut tamaasa assiliamut ataatsimut kattutitittutut ippai, soorlu pinnguaatit katitertakkat.“ Maanna Roman aalajangersimasumik Biibilimik atuaqqissaartarpoq siumukarluarlunilu.
Qujamasunnerit ineriartortittuaruk
22, 23. Neriuummik siunitsinniittumik qujamasuutiginninnerput qanoq ililluta ersersittuarsinnaavarput?
22 Soorlu ataatsimeersuarnermi pissanganartumi „Aniguisitaanissaq qanillivoq!“-mik qulequtalimmi eqqaaneqartoq, kristumiut ilumoortut ’naassaanngitsumik utertinneqaatissinneqarnissaq’, Guutimit neriorsuutigineqarsimasoq Jiisusillu Kristusip aavanit kuineqartumit ajornarunnaarsinneqarsimasoq, qilanaaraat. Neriuummik erlinnartumik tamatuminnga qamannga pisumik qujamasuutiginninnitsinnut ersiutaasoq pitsaanerpaaq tassaassaaq ’sulianit toqungasunit eqqiartuarneq Guutimut uumasumut kiffartorsinnaaniassagatta’. — Hebræerit 9:12, 14.
23 Aap, namminissarsiornissamut aatsaat taama kajumissaarisoqartigigaluartoq Guutip naalagaaffianik oqaluussissutiginnittartut 6 millioninit amerlanerusut Guutimut kiffartornermi aalajaallutik pinertusaarnerat ilumut tupinnartuliaavoq. Aamma pinertusaarnerput Jehovap kiffaasa, ’suliniarnermik Naalakkami asuliinnaannginneranik’ ilisimaarinnillutik, Taassumunnga kiffartornerup ataqqinaataaneranik qujamasuutiginningaarnerannut uppernarsaataavoq. Qanortoq tamatuminnga qujamasuutiginninneq ineriartortuarili! — 1 Korinthimiut 15:58; Tussiaat 110:3. (wE 2/1 07)
Qanoq akissavit?
• Guutimut qujamasunneq taassumalu tunniuttagaanik anersaakkut ittunik qujamasuutiginninneq pillugit tussiaasiortoq qanoq ilinniarfigaarput?
• Haggaji 2:7-imi allassimasut ullumikkut qanoq ilillutik eqquuppat?
• Jehovap kiffani sunniuteqarluartumik kiffartorsinnaaqqullugit sunik tunisimavai?
• Jehovap ajunngissusianik qujamasuutiginninnerit qanoq ilillutit ersersissinnaaviuk?
[Atuaqqissaarnermi apeqqutit]
[Qupp. 11-mi assiliartat]
Jehovap piumasaminik iliornissatsinnut piareersarluarpaatigut