Anersaapiluit qanoq ililluta akiorsinnaavavut?

„Inngilit suliassaminnik pingaaqisunik nakkutiginninnatik inigisassaraluaminnik qimatsisut [Guutip] taartumi kalunnernik [qilersorsimajuartussanngortippai] ullussarsuarmi eqqartuussinissap tungaanut.“ — JUDASI 6.

1, 2. Apeqqutit Saatani Diaavulumut anersaapilunnullu tunngasut suut pilerpat?

APUSTILI Petrusi ima oqaaqqissaarivoq: „Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.“ (1 Petrusi 5:8) Apustili Paulusi anersaapiluit pillugit ima allappoq: „Ilissi anersaapilunnut peqatigiissuteqaqqunngilassi. [Jehovap] ermusia anersaapiluillu ermusiat tamaasa imerfigisarsinnaanngilasi. [Jehovallu] nerliutaa anersaapiluillu nerliutaat tamaasa ilangiiffigisarsinnaanngilasi.“ — 1 Korinthimiut 10:20, 21.

² Saatani Diaavulu anersaapiluillu kikkorpiaagamik? Qanga aamma qanoq pinngorpat? Guutimit pinngortinneqarpat? Inunnik qanoq sunniitigisinnaappat? Taakkununnga imminut illersorsinnaavugut, taamaappallu qanoq?

Saatani anersaapiluillu qanoq pinngorpat?

3. Guutip inngiliisa ilaat qanoq ililluni Saatani Diaavulunngorpa?

³ Inuit Naatsiivimmi Edenimi pinngortinneqarnerata kinguninngua Guutip inngiliisa ilaat pikitsitsivoq. Sooq? Jehovap aaqqissuussaani qilammiittumi inissisimaffini naammaginnginnamiuk. Adami Evalu pinngortinneqarmata, paasilerpaa taakku Guutimut ilumoortumut pinnatik imminut naalattunngortillugillu pallorfiginnittunngortinnissaannut periarfissaqartoq. Inngili taanna imminut Saatani Diaavulunngortippoq Guutimut pikitsitsinermigut aappariillu siulliit ajortuliortinnerisigut. Piffissap ingerlanerani inngilit allat taanna pikitsitseqatigilerpaat. Qanoq ilillutik? — 1 Mosesi 3:1-6; Romamiut 5:12; Saqqummersitat 12:9.

4. Inngilit pikitsitsiumatuut Noap nalaani ulersuaq sioqqullugu suppat?

⁴ Allakkani isumassarsiarititaasuni allassimavoq Noap nalaani ulersuaq sioqqullugu inngilit ilaasa arnat nunarsuarmiittut pissusissamisuunngitsumik soqutigileraat. Ajortumik pissuteqarlutik „guutit ernerisa [Guutip ernerisa, NV] [qilammiusut] inuit panii isigilerpaat pinnaralugit pileritsaassatillu nulissiuttarlugit“. Taakkua  aappariinnerat pinngortitat pissusiannut akerliuvoq, tamannalu inorujussuarnik, nefilimitut ilisimaneqartunik, akusanik kinguaassiornerannik kinguneqarpoq. (1 Mosesi 6:2-4) Pinngortitat anersaajusut Guutimut naalanngitsut Saatani Jehovamut pikitsitsinerani peqatigilerpaat.

5. Jehovap ulersuaq aseruisoq nunarsuarmut nalliutitimmagu pikitsitsisunut qanoq kinguneqarpa?

⁵ Jehovap Ulersuaq inuiannut nalliutitimmagu nefilimit taakkualu anaanaat ajunaarput. Inngilit pikitsitsiumatuut inuttut timitik qimattariaqalerpaat anersaallu silarsuaannut utertariaqalerlutik. Guutimili ’inigisaraluaminnut’ utersinnaanngillat. Itinersuarmut anersaakkut taggarissumut pisinneqarput. — Judasi 6; 2 Petrusi 2:4.

6. Anersaapiluit inunnik qanoq salloqittaasarpat?

⁶ Inngilit ajortut ’inigisaraluartik’ annaagamikkuli anersaapiluullutik Saatani suleqatigilerpaat siunertapiluilu siuarsalerlugit. Taamanimiilli anersaapiluit inuttut timeqaleqqinnissamut pissaaneerupput. Angutilli arnallu pissusiusup paarlattuanik assigiinngitsunik atoqatigeeriaaseqarnissaannut nakutinniarsinnaavaat. Aammattaaq anersaapiluit inunnik salloqittaasarput anersaarsiorneq atorlugu, anersaarsiornermullu ilaasinnaapput angakkuarniartarneq, voodoo anersaanullu attaveqartarneq. (5 Mosesi 18:10-13; 2 Nalunaarsuutit 33:6) Inngilit ajortut Diaavulutut pineqassapput — naassaanngitsumik suujunnaarsitaassapput. (Matthæusi 25:41; Saqqummersitat 20:10) Taamatulli pisoqanngikkallarnerani qanorluunniit ilioraluarpata aalajaattariaqarpugut. Saatanip qanoq pissaaneqartiginera aamma taanna taassumalu anersaapilui qanoq akiorsinnaanerlugit paasiniarutsigu silatusaassaagut.

Saatani qanoq pissaaneqartigaa?

7. Saatani silarsuarmut qanoq pissaaneqartigaa?

⁷ Saatani ulloq manna tikillugu Jehovamik mamarliisarpoq. (Ussatit 27:11) Inuit silarsuarmiut amerlanersaannik sunniisimavoq. Johannesimik allakkat siulliit 5:19-imi ima allassimavoq: ’Silarsuaq tamarmi Ajortumut naalatsigitippoq.’ Taamaattuminguna Diaavulup Jiisusi usseraa ’nunarsuarmi naalagaaffinnut tamanut’ taakkualu alutornassusiinut pissaaneqarnissamik neqeroorfigineratigut. (Lukasi 4:5-7) Apustili Paulusi Saatani pillugu ima allappoq: „Iivangkiiliu tusarliussarput ulissimaguni taamaappoq tammarsimasuinnarnut, uppinngitsunut; silarsuummi matuma guutiata taakkua eqqarsaataat tappiillisippai qaamaneq iivangkiiliumit Kristusip Guutip assingata naalannassusianik nalunaaruteqartumit pisoq taakkununnga takoqqunagu.“ (2 Korinthimiut 4:3, 4) Saatani ’sallutuujuvoq sallumullu ataataalluni’, kisianni „qaamasumut inngiliunerarpoq“. (Johannesi 8:44; 2 Korinthimiut 11:14) Silarsuarmi naalakkersuisut taakkualu naalattaasa eqqarsaataannik tappiillisitsinissamut pissaaneqarlunilu periaaseqarpoq. Sunniiniutit upperisarsiornikkullu oqaluttuatoqqat salluliuutillu iluaqutigalugit inunnik salloqittaasarpoq.

8. Saatanip pissaaneqarnera pillugu Biibilimi qanoq allassimasoqarpa?

⁸ Saatanip pissaaneqarnera sunniuteqarneralu pruffiiti Danielip nalaani, 500-kkunni u.n.s., erseqqissorujussuuvoq. Inngili Jehovamit Danielimut qiimmaallannartumik tusarliussiartortinneqartoq anersaapilummit, ’Perserit naalagaaffiata naalagaaneranit’, akimmisaartinneqarpoq. Inngili aalajaatsoq taanna ’Mikaelimit naalagaanerit nuimanerit ilaannit’ ikiorneqarnissami tungaanut ulluni 21-ni mulutinneqarpoq. „Grækerit nunaata naalagaanera“ aamma oqaluttuarineqarpoq. (Danieli 10:12, 13, 20) Aamma Saqqummersitat 12:18–13:2-mi Saatani ’uumasorujuttut pissaanerminik issiavissaarsuarminik nakuussusersuarminillu’ nersummut naalakkersuisunut assersuutaasumut tunniussisutut oqaluttuarineqarpoq.

9. Kristumiut kikkut akiorpaat?

⁹ Tupinnanngilaq Paulusi ima allammat: „Akiugassavut tassaanngillat aak uinillu, tassaallutilli naalakkersuisut, oqartussaasut, silarsuarmut naalagaasut taarsuarmi matumaniittut, anersaapiluit pissaanilissuit qilaap ilaaniittut.“ (Efesosimiut 6:12, NV) Ullumikkuttaaq anersaapiluit pissaanilissuit Saatanimit naalakkersorneqarlutik takussaanatik suleqataapput, naalakkersuisut nunamiusut inuiaallu ataatsimut isigalugit sunnerlugit. Allaat ingasalluinnartunik amiilaarnartuliortitsisarput, soorlu inuiannik toqoraasitsisarlutik, perulluliortitsisarlutik  toqutsisitsisarlutillu. Maanna misissoriartigu anersaat pissaanilissuit qanoq ililluta akiorsinnaanerivut.

Qanoq ililluta imminut illersorsinnaavugut?

10, 11. Saatani taassumalu inngilipilui qanoq ililluta akiorsinnaavavut?

¹⁰ Saatani Diaavulu taassumalu inngilipilui nammineerluta, uinikkut isumakkulluunniit, akiorsinnaanngilavut. Paulusi ima siunnersuivoq: ’Naalakkami nakuussusiatalu pissaaneqarnersuani nakussatsinniaritsi.’ (1900/1961) Guutimut illersortinniartariaqarpugut. Paulusi ima nangippoq: „Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi. . . . Guutip sakkutuussutai tamarmiusut atiniarsigit ullussami ajortumi akiuussinnaaqqullusi, suullu tamaasa ajugaaffigalugit atattuinnaqqullusi.“ — Efesosimiut 6:10, 11, 13.

¹¹ Paulusip uppeqatini kristumiut marloriarluni kajumissaarpai ’Guutip sakkutuussutaanik tamarmiusunik’ atiseqqullugit. Oqaatsini taakkunani erserpoq tamaviaarussinnginneq anersaapiluit saassussinerisa akiorsinnaanissaannut naammanngitsoq. Taavami anersaakkut sakkutuussutit assigiinngitsut inuunermut pingaarutillit, ullumikkut kristumiut anersaapiluit akiorniarlugit atigasuartariaqagaat, suugamik?

Qanoq ililluta ’aalajaassinnaavugut’?

12. Kristumiut qanoq ilillutik ’sallusuissut qiterutsiussinnaavaat’?

¹² Paulusi ima allappoq: ’Taava aalajaanniaritsi sallusuissut qiterutsiussiuk. Atiniarsiuk iluarneq saattuaasatut.’ (Efesosimiut 6:14) Matumani sakkutuussummut ilaasut marluk, tassa qiterut saattuaasarlu, eqqaaneqarput. Sakkutuup qiterutini sukangatittariaqarpaa makitsini illersorumallugit pannanilu nakkaqqunagu. Taamatuttaaq uagut sallusuissut Biibilimeersoq assersuutaasumik qiteruterput sukangatittariaqarparput, tamatuminnga maleruaalluta inuuniassagatta. Ullut tamaasa pilersaarusiukkamik Biibili atuartarparput? Ilaqutariinniittut tamarmik taamatut atuartarpat? Ilaqutariittut ullormut allassimaffimmik oqaloqatigiissutiginnittarneq ileqqoraarput? Aamma nassuiaatit ’kiffap ilumoorlunilu silatuup’ naqitikkatigut tunniuttagai malinnaavigaavut? (Matthæusi 24:45) Taamaaliortarutta Paulusip siunnersuutaa malinniarlugu sapinngisatsinnik iliorsimassaagut. Aammattaaq videut dvd-llu Biibilimeersunik siunnersuutitallit atorsinnaavavut. Sallusuissummik aalajangiusimanninnerput silatusaartumik aalajangernissamut iluaqutigissavarput ajortumillu iliunnginnissamut illersuutigissallutigu.

13. Uummaterput assersuutaasoq qanoq ililluta illersorsinnaavarput?

¹³ Saattuaasaq sakkutuup sakiaanut, uummataanut timillu pisataanut allanut pingaarutilinnut illersuutaavoq. Kristumiup uummatini assersuutaasoq, ilorlikkut pissusini, illersorsinnaavaa Guutip naapertuilluassusianut asanninnermik ineriartortitsinermigut Jehovallu najoqqutassiaanik naapertuilluartunik maleruaanermigut. Saattuaasaq assersuutaasoq Guutip oqaasianik kimikillisitsinnginnissamut illersuutigaarput. ’Ajortup uumiginissaa ajunngitsullu nuannarinissaa’ ilinniarutsigu, ’isikkavut aqqutinit ajortunit tamanit nigorsimatissavavut’. — Amosi 5:15; Tussiaat 119:101.

14. ’Eqqissinerup iivangkiiliuanik ingerlassisunik kamippaqarnerput’ qanoq paasisariaqarpa?

¹⁴ Romamiut sakkutuui ninngusuunik kamippaqarajuttarput nunaannarmi aqqusinertigut, Romamiut kaasareqarfianni tamani  tamaaniittutigut, kilometererpassuit pisussinnaaniassagamik. ’Eqqissinerup iivangkiiliuanik ingerlassisunik kamippaqarnerput’ uagutsinnut kristumiunut qanoq paasisariaqarpa? (Efesosimiut 6:15) Tamanna iliuuseqarnissatsinnut piareersimanitsitut paasisariaqarpoq. Periarfissani naleqquttuni tamani Guutip naalagaaffia pillugu nutaarsiassap nuannersup oqaluttuarinissaanut piareersimavugut. (Romamiut 10:13-15) Oqaluussisartutut kristumiutut suliniuteqarnerput Saatanip ’qoqassiiniarnerinut’ illersuutaavoq. — Efesosimiut 6:11.

15. (a) Uppernerup eqqortinnaveeqqutaata angisuup pingaaruteqartorujussuunera sumi erserpa? (b) ’Qarsut ikumasut’ suut uagutsinnik uppernikillisitsisinnaappat?

¹⁵ Paulusi ima nangippoq: „Tamani [Pingaarnerpaamik, NV] kivissimasarsiuk uppernerup eqqortinnaveeqqutaa, taassuminnga qamissinnaassagassigit Ajortup qarsui ikumasut.“ (Efesosimiut 6:16) Uppernerup eqqortinnaveeqqutaanik angisuumik kivitsinissamik siunnersuutip aallaqqaataatungaani oqaaseq „pingaarnerpaamik“ atorneqarmat paasinarpoq sakkutuussutip ilaa taanna pingaaruteqartorujussuusoq. Uppernikinnginnissarput pisariaqarpoq, uppernerpummi eqqornaveeqqutip angisuup illersuutigisinnaaneratut Saatanip ’qarsuinut ikumasunut’ illersuutigisinnaavarput. ’Qarsut’ nalitsinni suugamik? Tassaasinnaapput uagutsinnut akeraasut tunussisullu, uagutsinnik uppernikillisitsiniarsarisut, soqqusaatsumik ajuallatsitsisarnerat, salluliuutigisartagaat salluliuutaallu ilumoortortallit. ’Qarsut’ aamma pigisarpassuaqalerniarnissamut allaallu pigisatigut takoqqusaartumik inooriaaseqalersimasut unamminissaannut ussernartorsiornerusinnaapput. Immaqa anginerusunik  akisorpalunnerusunillu illusillutillu biilisisarput, imaluunniit pinnersaatitik akisuut atisatillu mutit nutaanerpaat malugeqqusaarutigisarpaat. Allalli qanorluunniit ilioraluarpata, ima upperluartigisariaqarpugut uppernerput ’qarsunit ikumasunit’ taakkunannga eqqortinnaveersaarsinnaallugu. Qanoq ililluta upperluartuarsinnaavugut, aamma qanoq ililluta upperluartuuneq ineriartortissinnaavarput? — 1 Petrusi 3:3-5; 1 Johannesi 2:15-17.

16. Upperluarnermik ineriartortitsiniarluta susinnaavugut?

¹⁶ Guutimut palligussinnaavugut aalajangersimasumik Biibilimik atuaqqissaartarnitsigut qamanngalu pisumik qinusarnitsigut. Aamma Jehova ilungersorluta qinnuigisinnaavarput upperluarneruleqqulluta taavalu qinnutivut naapertorlugit pisariaqartunik iliuuseqarluta. Assersuutigalugu akeqataanissarput siunertaralugu Napasuliaq Alapernaarsuiffik-up sapaatip-akunneranoortumik atuaqqissaaqatigiissutigineqarnissaanut peqqissaarluta piareersartarpugut? Biibilimik atuagassianillu atuakkanillu Biibililersaarutinik atuaqqissaartarnerput upperluartunnguutigissavarput. — Hebræerit 10:38, 39; 11:6.

17. ’Annassummik niaqorornaveeqquserneq’ qanoq paasisariaqarpa?

¹⁷ Paulusip anersaakkut sakkutuussutinik allaatiginninnini naggaserpaa ima siunnersuilluni: „Niaqorornaveeqquseritsi annassummik panalerlusilu Anersaap panaanik, tassa Guutip oqaasianik.“ (Efesosimiut 6:17) Niaqorornaveeqqut sakkutuup niaquanut, qarasaanullu aalajangigassanik aalajangiiffiusartumut, illersuutaavoq. Taamatulli kristumiutut neriuuterput eqqarsartaatsitsinnut illersuutaavoq. (1 Thessalonikamiut 5:8) Isumarput anguniakkanik silamiorpaluttunik pigisaleritunermillu immernagu, Jiisusitut eqqarsaativut neriuutitsinnut Guutimeersumut sammitittariaqarpavut. — Hebræerit 12:2.

18. Sooq aalajangersimasumik Biibilimik atuartarnerput sumiginnassanngilarput?

¹⁸ Saatanip taassumalu anersaapiluisa sunniuteqarnerannut illersuutitta ilaa kingulleq tassaavoq Guutip oqaasia, imaluunniit tusarliussaa, Biibilimi allanneqarsimasoq. Tamanna tassaavoq aalajangersimasumik Biibilimik atuartarnitsinnik sumiginnaannginnissamut pissutaasoq suli alla. Guutip oqaasianik eqqorluartumik ilisimasaqarneq Saatanip salluliuutaanut, anersaapiluit sunniiniutaannut tunussisullu kamallutik mamarliinerannut illersuutigaarput.

’Periarfissat tamaasa qinusaritsi’

19, 20. (a) Saatani taassumalu anersaapilui qanoq pineqassappat? (b) Suna anersaakkut nakussatsissutigisinnaavarput?

¹⁹ Qanittukkut Saatani, taassuma anersaapilui silarsuarlu ajortoq suujunnaarsinneqassapput. Saatani, ’piffissakissutsiminik’ ilisimannittoq, kamappoq „Guutillu inassutaanik Jiisusillu nalunaajaataanik aalajangiussisut“ sorsuffigalugit. (Saqqummersitat 12:12, 17) Taamaattumik Saatanip taassumalu anersaapiluisa akiornissaat pingaaruteqarluinnarpoq.

²⁰ Guutip sakkutuussutaanik tamarmiusunik atisinissamik kajumissaarutip qujamasuutiginissaanut pissutissaqarpugut. Anersaakkut sakkutuussummik eqqartuereerami Paulusi ima kajumissaarivoq: „Qinujuarnissinni torlulanissinnilu tamatigut [periarfissat tamaasa, NV] Anersaakkut qinusassaasi taamaaliornissamullu eqqumaniarlusi tamatigullu nikallujuillusi illernartut tamaasa qinnullugit.“ (Efesosimiut 6:18) Qinuneq anersaakkut nakussatsissutigisinnaallugulu eqqumaniartuarnissamut iluaqutigisinnaavarput. Paulusip oqaaqqissaarutaa maleruartigu qinujuarlutalu, tamannami Saatanip taassumalu anersaapiluisa akiornissaannut iluaqutigissavarput. (wE 3/15 07)

Suna ilikkarpiuk?

• Saatani taassumalu anersaapilui qanoq ilillutik pinngorpat?

• Diaavulu qanoq pissaaneqartigaa?

• Qanoq ililluta Saatanimut taassumalu anersaapiluinut imminut illersorsinnaavugut?

• Guutip sakkutuussutai tamarmiusut qanoq ililluta atisinnaavavut?

[Atuaqqissaarnermi apeqqutit]

[Qupp. 27-mi assiliartaq]

’Guutip ernerisa inuit panii isigilerpaat’

[Qupp. 29-mi assiliartaq]

Anersaakkut sakkutuussutitsinnut atasut arfinillit ilaannik eqqaasaqarsinnaavit nassuiarlugulu?

[Qupp. 30-mi assiliartaq]

Sooq sammisassanik makkuninnga ulapputeqartarneq Saatanimut taassumalu anersaapiluinut illersuutaava?