Anorersuaq anigorsinnaavat

ULLUNI ernumanartorsiorfiusuni makkunani inuppassuit anorersuartut ittunik annikilliuuteqarput. Kristumiulli Guutimut asanninnertik najoqqutassiaanullu ilumoorfiginninnertik pinertusaarnissaminnut iluaqutigaat. Qanoq? Tamanna Jiisusip assersuusiaani akineqarpoq. Ajoqersukkani naalattut ’angummut silatuumut qaarsumi illuliortumut’ assersuuppai. Ima oqarpoq: „Siallersorsuanngorpoq kuussuillu imartusillutik; anorersuillu pitorarlutik illu taanna eqqorpaat, uppinngilarli qaarsumut tunngavilerneqarsimagami.“ — Matthæusi 7:24, 25.

Malugiuk assersuusiami angut silatuujugaluarluni — sialussuartut, kuussuartut anorersuartullu eqqaaneqartunik — atugarliuuteqartoq. Tassa Jiisusip oqaatiginianngilaa ajoqersukkani ajornartorsiutinik nalaataqanngitsuuillutik eqqissilluinnarlutik inuussasut. (Tussiaat 34:20; Jaaku 4:13-15) Oqarporli Guutip kiffai aalajaatsut annikilliuutit ernumanartullu anorersuartut ittut naammagalugit atornissaannut piareersarsinnaasut.

Jiisusip assersuusiani ima aallartippaa: „Kialuunniit oqaaserisannik tamakkuninnga tusartup maleruaasullu assigissavaa angut silatooq qaarsumi illuliortoq.“ Soorunami Jiisusip illuimmik illuliorneq pinngilaa, inuunermili ineriartorneq eqqartorpaa. Jiisusip oqaasiinut naalattut silatuujupput siuneqassuseqarluarnermillu ersersitsillutik. Ilikkakkaminnik iliuuserinninnermikkut pissutiginiakkatik iliuutsitsillu qaarsumik aalajaatsumik, tassa Jiisusip ajoqersuutaanik, tunngaveqartippaat. Soqutiginarpoq qaarsoq assersuutaasoq nunap qaavaniinngimmat. Assersuusiami angutip qaarsoq taanna nassaarissaguniuk „itisuumik“ assaasariaqarpoq. (Lukasi 6:48) Taamatuttaaq Jiisusip ajoqersugaasa pissuserineqartussat Guutimut qaninnerulersitsisut ilungersorlutik sulissutigiuartariaqarpaat. — Matthæusi 5:5-7; 6:33.

Kristusip ajoqersugaasa tunngavigisaat annikilliuutinik silapiluttut ittunik misilinneqaraangami susarpa? Paasinarsisarpoq kristumiutut pissuserisatik Kristusillu ajoqersuutaanut kajumillutik naalannertik atugarliorfiusuni taamaattuni nakussatsitsissutigisaraat, pingaarnerpaamillu Harmagedonimi anorersuarnissaani nakussatsissutigiumaarpaat. (Matthæusi 5:10-12; Saqqummersitat 16:15, 16) Aap, inuppassuit misilinneqarnerit silapiluttut ittut Kristusip ajoqersuutaanik maleruaanermikkut anigorsimavaat. Illit aamma taamaaliorsinnaavutit. — 1 Petrusi 2:21-23. (wE 1/1 07)