Ingerlalluarnermut suna tunngavilersuutigisarpiuk?

JESSE LIVERMOREP, Wall Streetimi børsimi niuernikkut iluanaaruteqarniartut iluatsitsilluarnerpaartaattut inuit ilaannit isigineqartup, pisoorsuannguutigisaminik niuernikkut isumatusaartumik aalajangiisarnini ilisimaneqaatigai. Angutit attariivi kusanarnerpaat mersortartumit sanaat atisarisarpai, akimarpaluttumik 29-nik initalimmik illoqarpoq biileraalu Rolls-Royce qernertoq immikkut ingerlatitsisulik.

David * aamma taamatut inuuvoq. Suliffissuarmi (grafikinut tunngasunik suliaqarfiusumi) pisortaavoq siulersuisunilu ilaasortaalluni, immikkoortortaqarfimminilu angisuumi pisortaaninngornissaa ilimanarluni. Pisoorsuuneq ataqqisaanerlu siunissaraa. Davidili aalajangerpoq atorfimminit soraarniarluni. „Nalunngilara qaffasissumik atorfineqqinnaviarnanga,“ oqarpoq. Isumaqarpit David kukkusumik aalajangertoq?

Inuppassuit isumaqarput pisuujuneq, nuannarineqarneq ataqqisaanerlu ingerlalluarnermut ilisarnaataasut. Pigissaangaaraluarluni misigisoqarsinnaavoq inuuneq imaqanngitsuullunilu siunertaqanngitsuusoq. Jesse Livermore taama misigisimagunarpoq. Aningaasaaterpassuaqaraluarluni uummatikkut anniaaterpassuaqarlunilu aliasuuterpassuaqarpoq alianartunillu nalaataqartarluni. Nikallorujussuaqqavoq, arlaleriarluni avinnikuuvoq erniminullu attaveqarnera pitsaasuunani. Aningaasaaterpassuami ilarpassui annaareerlugit ullut ilaanni hotellip akimarpaluttup imerniartarfiani issiavoq nalaatani aliasuutigalugit. Imigassaminik pisivoq, allattaavimminullu amermik qallikkamut nuliaminut naggammik inuulluaqqusilluni allalluni. Taamaalioreerami  immiartorfini imaariarlugu, atisaasivimmut tarrajuttumukariarluni imminorpoq.

Soorunami imminoornermut assigiinngitsorpassuarnik pissuteqartoqarsinnaavoq, pisimasulli matuma Biibilimi allassimasup matuma ilumoornera uppernarsarpaa: ’Inuit pisuunngorumasut . . . imminnut amerlasuunik erloqissutissiorput.’ — 1 Timotheusi 6:9, 10.

Imaassinnaava inuit isumaqartut pisuussutit, atorfikkaajuneq ataqqisaanerlu ingerlalluarnermut tunngavilersuutaassasut, kukkusumik tunngavilersuuteqartut? Illit inuunerit iluarisimaarpiuk? Sooq? Suna tunngavilersuutigaajuk? Ingerlalluarnermut illit isiginnittaatsit sumit sunnerneqarpa? Allaaserisami tulliuttumi sammineqassapput siunnersuutit atoreerneqarsimasut inuit millionillit inuunerminni ingerlallualernerminnut iluaqutigisimasaat. Siunnersuutit taakkua aamma illit qanoq pillualersissinnaaneraatsit misissoriartigu.

[Quppernerup ataani ilanngussaq]