Inngilit inunnut inuunerannullu qanoq sunniuteqartartut

„Taava takuara inngili alla pissaanilissuaq qilammit aqqartoq . . . Taanna nipitoqisumik torlulaarpoq: ’Uppikaavoq, uppikaavoq Babylonersuaq.’“ — SAQQUMMERSITAT 18:1, 2.

1, 2. Sumi erserpa Jehovap piumasanik piviusunngortitsinissamut inngilit atortarai?

APUSTILI Johannesi utoqqalisimasoq qeqertamut Patmosimut aallarunneqarsimatilluni siulittuutaasunik takorruuisinneqarpoq. Pisussat pissanganartut qimerloorpai, ’anersaap sunniineratigut isumassarsisitaalluni Naalakkap ullussaani ikkami’. Ulloq taanna aallartippoq Jiisusi Kristusi 1914-imi kunnginngormat, taassumalu ukiuni tusindini naalakkersuinerata naanissaata tungaanut ingerlassaaq. — Saqqummersitat 1:10, NV.

² Jehova Guutip Johannesi toqqaannartumik nalunaarfiginngilaa, Saqqummersitat 1:1-imili allassimasutut nalunaarfigaa: „Jiisusi-Kristusip saqqummersitai, Guutip taassumunnga tunniussai qanittukkut piumaartussat kiffaminut takuteqqullugit, nalunaarutigisaalu inngilimigullu ingerlatitai kiffaminut Johannesimut.“ Jehovap Jiisusi aqqutigalugu inngili ’Naalakkap ullussaa’ pillugu paasissutissanik nuanningaartunik Johannesimut paasissutissiitippaa. Kingusinnerusukkut Johannesip takuaa „inngili alla pissaanilissuaq qilammit aqqartoq“. Inngilip taassuma suliassaa suua? „Taanna nipitoqisumik torlulaarpoq: ’Uppikaavoq, uppikaavoq Babylonersuaq.’“ (Saqqummersitat 18:1, 2) Inngilip pissaanilissuup taassuma upperisarsiornerup eqqunngitsup suujunnaarsinneqarsimaneranik nalunaarutiginninnissani immikkut pisinnaatitaaffigaa. Qularutissaanngilaq Jehovap piumasani piviusunngortinniarlugu inngilit iluaqutigingaatsiartarai. Inngilit Guutip siunertaanik piviusunngortitseqataanerat taakkualu uagutsinnut sunniuteqarnerat misissortinnagu, qanoq pinngorsimanerat misissussavarput.

Inngilit qanoq pinngorpat?

3. Inuit ilarpassui inngilit pillugit kukkusumik qanoq isumaqarpat?

³ Inuit millionillit inngileqarnera upperaat; ilarpassuili inngilit taakkualu pilerfiat pillugit kukkusumik isumaqarput. Assersuutigalugu inuit ilaat isumaqarput toqugaanni Guutimukartoqartartoq inngilinngorlunilu. Inngililli pinngortinneqarnerat, kikkuunerat sunalu siunertaralugu pinngortinneqarsimanerat pillugit Guutip oqaasiani qanoq allassimasoqarpa?

4. Inngilit pilerfiat pillugu Biibilimi qanoq allassimasoqarpa?

⁴ Inngili pissaaneqarnerpaallunilu oqartussaassuseqarnerpaasoq — inngilit akimanersaat — inngiliunermik Mikaelimik taaneqartarpoq. (Judasi 9) Taanna tassaavoq Jiisusi Kristusi nammineq. (1 Thessalonikamiut 4:16) Jehova qanga qangarsuaq Pinngortitsisunngorniarluni aalajangermat, erneq anersaajusoq taanna pinngortitaasa siullersaraat. (Saqqummersitat 3:14) Tamatuma kingorna Jehovap angajulliliani taanna ikiortigalugu anersaat allat tamaasa pinngortippai. (Kolossemiut 1:15-17) Jehovap pinngortitat anersaajusut taakkua ernermisut eqqartorpai ataataanerpaaq Jobi ima aperigamiuk: „Taamani uanga nuna tunngavilerakku illit sumiippit? Silaqassuseqaqiguit tamatuminnga oqaluttuutinnga . . . Kia inissippaa ujarak teqeqqussaq ullaap ulloriai tamarmik tipaatsutsillugit Guutillu erneri tamarmik nipertik illugalugu qiimmattartillugit?“ (Jobi 38:4, 7) Erseqqippoq inngilit Guutimit pinngortitaasut inuillu pinngortinneqarnerat sioqquterujussuarlugu pinngortitaasut.

5. Inngilit qanoq aaqqissuussaappat?

⁵ Korinthimiunut allakkat siulliit 14:33-mi ima allassimavoq: ’Guuti ularussinermut Guutiunngilaq,  eqqisseqatigiinnermulli.’ Taamaammat ernini anersaajusut aaqqissuuppai pingasunut immikkoortillugit: (1) serafit, Guutip issiavissaarsuata saniani kiffartortut, Guutip illernassusianik oqaluussissutiginnittut innuttaanillu anersaakkut minguitsuujuartitsisut; (2) kerubit, Jehovap naalannangaarsusianik qutsissisitsisut; aamma (3) inngilit allat piumasaanik naammassinnittut. (Tussiaat 103:20; Esaja 6:1-3; Ezekieli 10:3-5; Danieli 7:10) Pinngortitat anersaajusut taakku inunnut inuunerannullu qanoq sunniuteqartarpat? — Saqqummersitat 5:11.

Inngilit sunik suliaqartarpat?

6. Jehovap kerubit Naatsiivimmut Edenimut tunngatillugu sumik suliassippai?

⁶ Pinngortitanik anersaajusunik toqqaannartumik innersuussutiginninneq siulleq Mosesimik allakkat siulliit 3:24-miippoq, tassani ima allassimammat: „[Jehovap] inuk anisereeramiuk kerubit panalu innaallagissatut naaralaartoq naatsiiviup Edenip kangiani inissippai, orpimmut inuunartumut aqqutaasoq nakkutigeqqullugu.“ Kerubit taakkua Adami Evalu aallaqqaammut angerlarsimaffiannit paratiisiusumit qimagusimatippaat. Inuiaat oqaluttuarisaaneranni siusissukkut tamanna pivoq. Inngilit taamanimiilli sunik suliassaqartarsimappat?

7. Allassimaqqaarfinni oqaatsip „inngili“-mik nutserneqartup isumaani inngilit suliarisartagaasa ilaat pillugu suna erserpa?

⁷ Inngilit Biibilimi 400-t pallillugit eqqaaneqarput. Hebræerit oqaasiat aamma grækerit oqaasiat „inngili“-mik nutserneqartartoq „aallartitaq“-mik nutserneqarsinnaavoq. Aamma inngilit Guutip inuillu akornanni akunnermiliuttuusarsimapput. Immikkoortuni marlunni siullerni eqqaaneqartutut Jehovap inngili atorpaa tusarliussaminik apustili Johannesimut tusarliussitillugu.

8, 9. (a) Inngilip pulaarnera Manoamut nulianullu qanoq kinguneqarpa? (b) Manoap Guutip inngilianik naapitsinera angajoqqaat qanoq ilinniarfigisinnaavaat?

⁸ Aammattaaq inngilit Guutip kiffaanik nunamiusunik tapersersuisarlutillu qiimmassaasarput. Ilaatigut taamaaliortarsimapput Israelimi eqqartuussisoqarnerata nalaani. Manoap nuliatalu ernisuitsup meerartaarnissartik qamannga pisumik kissaatigaat, Jehovallu inngili aallartippaa Manoap nulia oqaluttuunniassammagu ernertaarumaartoq. Oqaluttuarineqarnera naapertorlugu ima oqarpoq: „Naartulissaatit ernertaassallutillu. Savik nujaajaat taassuma niaquanut attuutitinneqanngisaannassaaq; nukappiararmi ilumiuutillunili tassaariissaaq nasiræeri Guutimut pigititaq. Tassaassaaq Israelip filisterit assaannit aniguisitaanissaanut aallaqqaasiisussaq.“ — Eqqartuussisut 13:1-5.

⁹ Kingusinnerusukkut Manoap nuliata Samsoni ernertaaraa, taannalu Biibilip oqaluttuarisaanerani tusaamasanngorpoq. (Eqqartuussisut 13:24) Nukappiaqqap inunngunnginnerani Manoap inngilip takkuteqqinnissaa qinnutigaa nukappiaraq qanoq perorsassanerlugu ilinniartinniassammatik. Manoa ima aperaaq: „Nukappiaraq qanoq pissava qanorlu iliuuseqarfigissavarput?“ Jehovap inngiliata Manoap nulianut ilitsersuussutigisani uteqqippai. (Eqqartuussisut 13:6-14) Manoa qiimmaallassimassaqaaq! Ullumikkut inngilit inunnut ataasiakkaanut taamatut pulaarneq ajorput, angajoqqaalli Manoatut iliorlutik Jehovamut siunnersortissarsiorsinnaapput meeqqatik perorsaaraangamikkik. — Efesosimiut 6:4.

10, 11. (a) Elisa taassumalu kiffaa tamarmik immikkut qanoq periarpat Aramæerit sakkutuui takugamikkit? (b) Pisimasumik tamatuminnga eqqarsaatiginneqqissaarneq qanoq iluaqutigisinnaavarput?

 ¹⁰ Pruffiitip Elisap nalaani pisimasoq inngilit ikiuisarnerannut takussutissaalluarpoq. Elisa illoqarfimmi Israelimiittumi Dotanimiippoq, ullullu ilaanni taassuma kiffaa ullaannguaq makikkami silammullu alakkarluni takulerpaa illoqarfik sakkutuunit pissaaneqaqisunit hesteqartunit qamuteqartunillu unguneqarsimasoq. Taakku Aramip kunngiata Elisamik tigusarinneqqullugit aallartissimavai. Elisap kiffaa sua? Annilaaqaluni, immaqa allaat paatsiveerulluni, ima oqarpoq: „Alianaq, naalagaq, qanoq iliussaagut?“ Taassumunnga neriunartoqanngilluinnartutut isikkoqarpoq. Elisali ima akivoq: „Ersissanngilatit, uagut ilivut akeqqatta iliinit amerlanerupput!“ Sunaana pigaa? — 2 Kunngit 6:11-16.

¹¹ Elisap nalunngilaa inngilerpassuit imminik tapersersuiniarlutik najuuttut; kiffaali takusaqanngilaq. Taamaammat „Elisa qinuvoq: ’[Jehova], isai uisikkit isigisaqalersillugu!’ [Jehovap] angutip inuusuttup isai uisippai, taassumalu takuaa qaqqaq Elisa ungaqqullugu hestinik innerusunik qamutinillu innerusunik ulikkaartoq.“ (2 Kunngit 6:17) Maanna kiffap inngilerpassuit takusinnaavai. Uaguttaaq anersaakkut paasisimasaqarnitsigut paasisinnaavarput inngilit, tamarmik Jehovamit Kristusimillu siulersorneqartut, Jehovap innuttaanik tapersersuillutillu sernissuisut.

Inngilit Mariamik Jiisusimillu tapersersuillutillu qiimmassaapput

12. Maria inngilimit Gabrielimit qanoq qiimmaallatsinneqarpa?

¹² Aamma inngilip niviarsiaq Maria juutiusoq qiimmassarpaa matuminnga tusarleramiuk: „Naartulissaatit ernertaassallutillu, taannalu Jiisusimik atsissavat.“ Gabrieli, Guutimit aallartitaasoq, tusarliussap tupaallannartup tamatuma tusarliutinngitsiarnerani ima oqarpoq: „Erseqinak, Maria! Guutimut saammaannarsivutit.“ (Lukasi 1:26, 27, 30, 31) Mariap Guutimit iluarisaanerminik taamatut uppernarsaavigineqarnini qiimmaallaatigisimassallugulu nakussatsissutigisimassavaa.

13. Inngilit Jiisusi qanoq ikiorpaat?

¹³ Pisimasumi allami inngilit ikiuipput Jiisusip inoqajuitsumi Saatanip usseeriaraluarneri pingasut akiormagit. Oqaluttuarineqarpoq misileereernermi kingorna ’Diaavulup Jiisusi qimakkaa; takuallu, inngilit ornippaat kiffartorfigalugulu’. (Matthæusi 4:1-11) Tamatumunnga assingusumik pisoqarpoq Jiisusip toqunissaanut aqaguttoq unnuakkut. Annilaangangaarluni seeqqummerpoq imalu qinulerluni: „’Ataataq, piumaguit ermuseq manna uannit peeruk. Taamaattorli uanga piumasara pinnani illit piumasat pili.’ Taava inngili qilammit taassumunnga takutippoq nakussatsillugulu.“ (Lukasi 22:42, 43) Ullumikkulli inngilit uagut qanoq tapersersortarpaatigut?

 Inngilit nalitsinni ikiuisarnerat

14. Nalitsinni Jehovap Nalunaajaasuisa malersugaaneq qanoq ittoq naammagalugu atortariaqarsimavaat, tamannalu qanoq kinguneqarpa?

¹⁴ Ullutsinni Jehovap Nalunaajaasuisa oqaluussinerat eqqarsaatigigaangatsigu, inngilit ikiuisarnerat erseqqippoq, ilaa? Assersuutigalugu Jehovap kiffaasa nazistit sorsunnersuup aappaa sioqqullugu tamatumalu nalaani Tysklandimi Europallu Kippasissuata ilarujussuani peqqarniitsumik saassussineri naammagalugit atorpaat. Katuullit fascistillu Italiami, Spaniami Portugalimilu naalakkersuineranni malersugaaneq suli sivisunerusoq naammagalugu atortariaqarsimavaat. Aamma Sovjetunioniusimasumi naalagaaffinnilu tamatumannga naalagaaffigineqartuni ukiorpassuarni malersugaapput. Aammattaaq Jehovap Nalunaajaasui nunarpassuarni Afrikamiittuni malersugaasimapput. * Ukiuni kingulliunerusuni Jehovap kiffaasa Georgiami peqqarniitsumik nakuuserfigineqartarnitik naalliuutigisarsimavaat. Saatani sapinngisani tamaat iliorsimavoq Jehovap Nalunaajaasuisa sulinerat unitsinniarlugu. Peqatigiissortatulli akerlilersorneqarneq anigorsimavaat siumukarlutillu. Tamatumunnga pissutaasoq ilaatigut tassaavoq inngilinit sernissorneqarsimanerat. — Tussiaat 34:8; Danieli 3:28; 6:23.

15, 16. Inngilit Jehovap Nalunaajaasuisa silarsuaq tamakkerlugu oqaluussinerat siuarsarniarlugu susarpat?

¹⁵ Jehovap Nalunaajaasuisa Guutip naalagaaffia pillugu nutaarsiassamik nuannersumik nunarsuaq tamakkerlugu oqaluussissutiginninnissartik soqutiginnittunillu Biibilimi qanoq allassimasoqarneranik sumi tamaani ilinniartitsinikkut ajoqersuganngortitsiortornissartik pimooruppaat. (Matthæusi 28:19, 20) Nalunngilluinnarpaalli inngilinit ikiorneqaratik suliassaq tamanna naammassisinnaanagu. Taamaattumik Saqqummersitat 14:6, 7-imi allassimasut qiimmassaatigiuarpaat. Apustili Johannesi ima allappoq: „Takuara inngili  alla pavani qilaap ataani timmisoq. Nalunaarutigiartorpaa iivangkiiliu atajuartussaq nunarsuarmi najugaqartunut, inuiaqatigiinnut naggueqatigiinnullu, immikkut oqaasilinnut inuiannullu tamanut, inngililu nipitoqisumik oqarpoq: ’Guuti mianerisiuk naalannartillugulu, eqqartuussinissaa nalliummat. Pallorfigisiuk taanna qilammik nunamillu immamillu ermullu puilaffiinik pinngortitsisoq.’“

¹⁶ Tamatumani allassimasuni erseqqippoq Jehovap Nalunaajaasuisa silarsuaq tamakkerlugu oqaluussinerat inngilinit tapersersorneqarlunilu siulersorneqartoq. Jehovap inngilit ikiortigalugit inuit eqqortuliorusuttut nalunaajaasuminut siulersortarpai. Aammattaaq inngilit oqaluussisartut inunnut orninneqartariaqartunut siulersortarsimavaat. Taamaammanuna Jehovap Nalunaajaasuisa ilaat inummik anersaakkut ikiorneqarnissaminik pisariaqartitsilluinnartumik piffissaq eqqorlugu taama naapitsikulatigisut — taakkualu nalaatsoornerinnakkut pisimasutut oqaatiginissaannut amerlavallaarput.

Qanittukkut misinnangaartumik akuliutissapput

17. Inngilip ataasiinnaap Assyriamiut saassummagit qanoq kinguneqarpa?

¹⁷ Inngilit aallartitaasarnermik Jehovamillu pallorfiginnittunik nakussatsitsisarnermik saniatigut allanik suliaqartarput. Itsaq Guutip eqqartuussutaanik naammassinnittarput, assersuutigalugu Jerusalemi 700-kkunni u.n.s. Assyriamiut sakkutoorpassuinit sioorasaarneqarmat. Jehova sua? Ima oqarpoq: „Illoqarfik manna sernissorlugu annaatissavara uanga pillunga kiffaralu Daavi pillugu.“ Tamatuma kingorna qanoq pisoqarnera Biibilimi ima oqaluttuarineqarpoq: „Unnuaq taanna [Jehovap] inngilia aallarpoq Assyriamiullu tammaarfianni angutit 185.000-it toqullugit; aqaguani ullaannguaq tamarmik toqungasut nassaarineqarput.“ (2 Kunngit 19:34, 35) Aap, inuit sakkutuui inngilimut ataasiinnarmut naleqqiullugit soriarsinnaanngilluinnarput!

18, 19. Inngilit qanittukkut misinnangaartumik qanoq akuliutissappat, tamannalu inuiannut qanoq kinguneqassava?

¹⁸ Aamma qanittukkut inngilit Guutip eqqartuussutaanik naammassinnissapput. Qanittuararsuakkut Jiisusi „inngilini pissaasut“ ilagalugit „innermi ikualasorsuarmi“ takkutissaaq. Aallassapput „aggiullugu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut“. (2 Thessalonikamiut 1:7, 8) Pisoq tamanna inunnut misinnangaassaaq! Guutip naalagaaffia pillugu nutaarsiassamik nuannersumik, maanna nunarsuaq tamakkerlugu oqaluussissutigineqartumik, itigartitsisut suujunnaarsinneqassapput. ’Jehovamik ujarlersut, iluarsusermik noqqaassutiginnittut maniguunnermillu noqqaassutiginnittut’ kisimik ’ullormi Jehovap kamaffissaani qimarnguissarsiumaarput’ ullorlu taanna ajoratik anigorumaarlugu. — Sefania 2:3.

¹⁹ Jehovap nunarsuarmi maani pallorfiginnitsiminik tapersersuinissamut nakussatsitsinissamullu inngiliminik pissaasunik atuisarnerata qujamasuutiginissaanut pissutissaqarpugut. Inngilit Guutip siunertaanik naammassinneqataanerannik ilisimaarinninnerput immikkut nakussatsinnarpoq, nalunnginnatsigumi inngileqartoq Jehovamut pikitsitsisimasunik Saatanimullu naalatsigitilersimasunik. Allaaserisami tulliuttumi sammineqassaaq kristumiut Saatani Diaavulup taassumalu anersaapiluisa sunniuteqangaarnerannut imminut illersorniarlutik qanoq iliorsinnaanersut.

[Quppernerup ataani ilanngussaq]

Suna ilikkarpiuk?

• Inngilit qanoq pinngorpat?

• Inngilit Biibilip nalaani sunik suliaqartarpat?

• Saqqummersitat 14:6, 7-imi allassimasumi inngilit ullumikkut sulinerat pillugu suna paasinarsiva?

• Inngilit qanittukkut misinnangaartumik qanoq akuliutissappat?

[Atuaqqissaarnermi apeqqutit]

[Qupp. 23-mi assiliartaq]

Manoa taassumalu nulia inngilimit qiimmassarneqarput

[Qupp. 24-mi assiliartaq]

„Uagut ilivut akeqqatta iliinit amerlanerupput“