Inuuneq nuannaarutigiuk — Jehova mianeriuk
Inuuneq nuannaarutigiuk — Jehova mianeriuk
„[Jehova] mianerisiuk ilissi illernartortai, taassuminngami mianerinnittut amigaateqassanngillat.“ — TUSSIAAT 34:10.
1, 2. (a) Kristumiuunerartut Guutimik mianerinninneq pillugu isumaat assigiinngilluinnartut suuppat? (b) Apeqqutit suut maanna sammissavavut?
PALASIT Guutip mianerisassaaneranik ilinniartitsissutiginnittartut, Guuti ajortuliortunik anniarfimmi ikualasumi naassaanngitsumik naalliutsitsilluni pillaasarnerarpaat. Ajoqersuulli tamanna Jehovap Biibilimi Guutitut asannittutut naapertuilluartutullu allaatigineqarneranut akerliuvoq. (1 Mosesi 3:19; 5 Mosesi 32:4; Romamiut 6:23; 1 Johannesi 4:8) Kristumiuunerartut palasii allat paarlattorluinnaanik pipput. Guutip mianerisariaqarnera oqaluuserinngisaannarpaat, ilinniartitsissutigisarpaalli Guuti akuerinnittuusoq kikkullu tamarluinnangajaasa qanorluunniit inuugaluartut akuerisarai. Tamannattaarli Biibilimi ajoqersuutigineqartunut naapertuutinngilaq. — Galatiamiut 5:19-21.
2 Ilumoortorli mannaavoq: Guutimik mianerinninnissaq Biibilimi uagutsinnut kajumissaarutigineqarpoq. (Saqqummersitat 14:7) Tamanna pissutigalugu ima apererusulernarpoq: Sooq Guutip asannittup kissaatigaa mianerissagitsinni? Mianerinninnermik qanoq ittumik Guuti mianereqqua? Aamma Guutimik mianerinninneq qanoq iluaqutigisinnaavarput? Apeqqutit tamakkua sammissavavut Tussiaat 34-p nangillugu misissornerani.
Sooq Guuti mianerissagipput
3. (a) Guutimik mianerinninnissamik peqqussut qanoq isumaqarfigaajuk? (b) Sooq Jehovamik mianerinnittut pilluarpat?
3 Jehova qilammik nunamillu Pinngortitsisuummat taakkununngalu Kisimi Oqartussaasuummat mianerineqartariaqarpoq. (1 Petrusi 2:17) Guutimilli naakkittaatsumik siooraginnissuataarneq pineqanngilaq. Guutimik mianerinninneq tassaavoq Jehovamik ataqqinninneq taassuma pissusii angingaassusialu pissutigalugit. Aammattaaq taassuma iluarinngisaanik iliussasoraluni mianersorneruvoq. Taamatut Guutimik mianerinninneq nikallornarnani annilaarnarnanilu iluaqutaavoq pissusiullunilu kusanartoq. Jehovap, ’Guutip pilluartup’, kissaatigaa inuit pinngortitami inuuneq nuannaarutigissagaat. (1 Timotheusi 1:11) Nuannaarutigisinnaajumalluguli Guutip piumasaanut naapertuuttumik inuusariaqarpugut. Tamanna pissutigalugu inuppassuit inuunerminni allannguerujussuartariaqartarput. Pisariaqartunilli allannguisut tamarmik paasisarpaat tussiaasiortup Daavip allagaata matuma ilumoornera: „Ussersiuk takusiullu [Jehova] ajunngitsuusoq. Pilluarpoq taassumani qimarnguffissarsiortoq. [Jehova] mianerisiuk ilissi illernartortai, taassuminngami mianerinnittut amigaateqassanngillat.“ (Tussiaat 34:9, 10) Jehovamik mianerinnittut tamarmik Guutimut attaveqarluaramik naleqartuartumik amigaateqanngillat.
4. Daavi Jiisusilu qanoq neriorsueqqissaarpat?
4 Maluginiariaruk Daavip angutitani ataqqigai ’illernartortatut’ eqqartorlugit. Taamatut taaneqarsinnaasimapput Guutip inuiaqatigiissortaanut illernartunut ilaagamik. Aamma Daavimik malinninniarlutik inuunerminnik navianartorsiortitsipput. Kunngi Saulimit qimaajuartariaqarput, Daavilli qularinngilaa Jehovap pisariaqartitaminnik isumagiuarumaaraatik. Daavi ima allappoq: „Løvit nerisassaaleqisinnaasarput kaallutillu, [Jehovamilli] ujarlersut ajunngitsumik sumilluunniit ajorsaateqassanngillat.“ (Tussiaat 34:11) Jiisusip ajoqersukkani tamatumunnga assingusumik neriorsoqqissaarpai. — Matthæusi 6:33.
5. (a) Jiisusip ajoqersugaasa ilarpassui qanoq tunuliaqutaqarpat? (b) Jiisusip taakku qanoq siunnersorpai?
5 Jiisusip tusarnaartuisa ilarpassui juutiupput piitsuullutillu inuinnaasut. Jiisusip „nalligingaalerpai paarinerlugaallutillu naakkinarsisimangaarmata savatut paarsisoqanngitsutut“. (Matthæusi 9:36) Inuinnaat taakkua Jiisusimik malinninnissamut sapiissuseqarpat? Sapiissuseqarumallutik inunnut qununatik Jehovamik mianerinninnermik ineriartortitsisariaqarput. Jiisusi ima oqarpoq: „Ersigeqinasigit timimik toqutsisut kingornalu allamik iliorsinnaasarnatik. Nalujunnaarsissavassi ersigisassassinnik: Ersigisiuk toqutsereerluni Anniarfimmut [grækerisut: Gehennamut] igitsissalluni pissaaneqartoq. Ilumut oqarfigaassi: Taanna ersigissavarsi. Qupaloraarsuit tallimat skillinginik marlunnik akilersillugit tunineqartannginnerpat? Taamaattorli taakkua ilaat ataaserluunniit Guutimit puiorneqanngilaq. Ilami ilissi nutsasiluunniit tamarmik kisissimapput. Erseqinasi, qupaloraarsuppassuarnit pingaarneruvusi.“ — Lukasi 12:4-7.
6. (a) Jiisusip qanoq oqarnera kristumiut nakussatsissutigisarsimavaat? (b) Sooq Jiisusi Guutimik mianerinninnermik ersersitsineq eqqarsaatigalugu maligassiuilluarnerpaava?
6 Jehovamik mianerinnittut imminnut akeraasunit Guutimut kiffartorunnaarnissaminnut tatineqaraangamik, Jiisusip oqaasii ukua immaqa eqqarsaatigisarpaat: „Kinaluunniit inunnut uannik nassuerutiginnittoq Inuup Ernerata Guutip inngiliisa saavanni nassuerutigissavaa. Inunnulli uannik miserratiginnittoq Guutip inngiliisa saavanni miserratigineqassaaq.“ (Lukasi 12:8, 9) Tamatumani allassimasut kristumiut nakussatsissutigisarsimavaat, pingaartumik nunani pallorfiginninnermik ilumoortumik inerteqqutiginniffiusuni. Nunani taamatut inerteqqutiginniffiusuni kristumiut ataatsimiinnerni tamanullu oqaluussinermi malunnaarsaarlutik Jehovamik unnersiutiginnittuarput. (Apustilit Suliaat 5:29) Jiisusi ’Guutimik mianerinninneq’ eqqarsaatigalugu maligassiuilluarnerpaavoq. (Hebræerit 5:7) Guutip oqaasiani siulittuutaasumi taanna ima siulittuutigineqarpoq: „Najussavaa [Jehovap] anersaavata . . . Guutimik mianerinnitsitsisup. Kajungerissavaa [Jehovamik] mianerinninneq.“ (Esaja 11:2, 3) Taamaammat Jiisusi Guutimik mianerinninnerup iluaqutissartai pillugit uagutsinnik ilinniartitsinissamut piukkunnarluinnartuuvoq.
7. (a) Kristumiut qaaqqusissummut Daavip qaaqqusissutaanut assingusumut akuersinerat qanoq paasisariaqarpa? (b) Daavip maligassiuilluarnera angajoqqaat qanoq ilillutik malissinnaavaat?
7 Jiisusip maligassiaanik malinnittut ajoqersuutaanillu maleruaasut tamarmik qaaqqusissummut Daavip qaaqqusissutaanut assingusumut akuersipput: „Qaaniaritsi tusarnaariarlunga qitornakka, Guutimik mianerinninnermik ajoqersussagassi.“ (Tussiaat 34:12) Daavip angutitani ’qitornamisut’ taasarpai, tamannalu pissusissamisoortutut isigaa, taakkuami Daavi siulersortimissut isigaat. Aammattaaq Daavip malinnitsini anersaakkut ikiortarpai ataasiussuseqarsinnaaniassammata Guutimillu iluarisaanertik nuannaarutigisinnaaniassammassuk. Angajoqqaanut kristumiunut maligassiuilluangaarami! Jehovap taakku piginnaatippai meeqqaminnik ’perorsaanissaannut Jehovap ileqqoreqqusai oqaaqqissaarutaalu malillugit’. (Efesosimiut 6:4, NV) Angajoqqaat meeqqatik anersaakkut ittut pillugit ullut tamaasa oqaloqatigisarunikkit aalajangersimasumillu Biibilimik atuaqqissaaqatigisarunikkit, Jehovamik mianerinnillutik inuunermik nuannaarutiginninnissaannik ilinniartissavaat. — 5 Mosesi 6:6, 7.
Guutimik mianerinninneq iliuuseqarnikkut qanoq ersersissagipput
8, 9. (a) Sooq Guutimik mianerinnilluni inuunissaq kajuminnarpa? (b) Oqqatta ajortumik oqalutsinnginnissaa qanoq paasisariaqarpa?
8 Eqqaaneqareersutut Jehovamik mianerinninneq nuannaarunnaassutiginavianngilarput. Daavi ima aperivoq: „Kia inuunissaq kajumigaa ullussanik piumagaluarluni ajunngitsoq takujumallugu?“ (Tussiaat 34:13, 1900/1961) Erseqqippoq inuunermik sivisuumik ’ajunngitsumik takunniffiusumik’ nuannaarutiginnissagaanni Jehovamik mianerinnittuusariaqartoq. Guutimik mianerinnittuunerarnissaq ajornanngeqaaq. Allarluinnaavorli pissusilersornikkut tamatuma uppernarsarnissaa. Taamaattumik Daavip Guutimik mianerinninnermik qanoq ililluta ersersitsisinnaanerput versini tulliuttuni nassuiarpaa.
9 „Sianigissavat oqqat ajortumik oqalussanngimmat qarlutillu peqquserluutinik aniatitaqassanngimmata.“ (Tussiaat 34:14) Apustili Petrusi Tussiaat 34-p ilaanik tamatuminnga issuaanissamut isumassarsisinneqarpoq, qatanngutigiittut tunniusimaqatigiinnissamik kristumiunik kajumissaarereernermi kingorna. (1 Petrusi 3:8-12) Oqqatta ajortumik oqalutsinnginnissaa allanik ajoqutaasumik oqallisiginninnaveersaarnissatsitut paasisariaqarpoq. Allanilli oqaloqateqaraangatta ineriartornartuuniartuaannassaagut. Aammattaaq sapiitsuuniarlutalu ilumoortumik oqalunniartassaagut. — Efesosimiut 4:25, 29, 31; Jaaku 5:16.
10. (a) Ajortumik nigorsimanninneq qanoq paasisariaqarnersoq nassuiaruk. (b) Ajunngitsuliornermut suut ilaappat?
10 „Ajortoq nigorsimassavat ajunngitsuliorlutillu, eqqissineq ujassavat piniarlugulu.“ (Tussiaat 34:15) Guutip assuarisai, soorlu kinguaassiuutitigut inuunerlunneq, tillinneq, anersaarsiorneq, nakuuserneq, imigassamik ikiaroornartumillu atornerluineq, ileqqorinaveersaarpavut. Aamma aliikkusersuutit ileqqupilunnik maajunnartunik tamakkuninnga salliutitsisut, soorlu pornografii, akuersaanngilavut. (Efesosimiut 5:10-12) Piffissarpulli ajunngitsuliornermut atortarparput. Iliuuserisinnaasarput pitsaanerpaaq tassaavoq aalajaalluni Guutip naalagaaffianik oqaluussissutiginninneq ajoqersuganngortitsiortornerlu, allat annaanneqarsinnaalernissaannut ikiorlugit. (Matthæusi 24:14; 28:19, 20) Ajunngitsuliornermuttaaq ilaavoq piareersarluarsimalluni kristumiut ataatsimiinnerinut najuuttarneq, silarsuaq tamakkerlugu suliamik tapersiisarneq, naalagaaffilersaarfimmik aserfallatsaaliueqataaneq kristumiunillu immikkut pisariaqartitsisunik isumassuineq.
11. (a) Daavi eqqissineq pillugu ilinniartitsissutigisaminut naapertuuttumik sua? (b) Ilagiinni ’eqqissineq piniarlugu’ susinnaavugut?
11 Daavi eqqissinermik piniarnermut tunngatillugu maligassaalluarpoq. Saulimik toqutsinissaminut marloriarluni periarfissaqaleraluarpoq. Pisimasunili taakkunani marlunni nakuusinngilaq, kingusinnerusukkullu kunngi ataqqinnilluni oqaluuppaa eqqisseqatigiileqqinnissartik neriuutigalugu. (1 Samueli 24:9-12; 26:17-20) Ullumikkut qanoq iliorsinnaavugut ilagiinni eqqisseqatigiinneq navianartorsiortinneqarpat? ’Eqqissineq ujartariaqarlugulu piniartariaqarparput.’ Assersuutigalugu misigigutta uppeqatitta ilaannut attaveqarnerput sukanganarsisoq, Jiisusip siunnersuutaa una malissavarput: „Qatanngutit saammaakkiartoqqaarallaak.“ Taamaalioreerutta taava pallorfiginninnermut ilumoortumut tunngasut allat suliareqqissinnaanngussavavut. — Matthæusi 5:23, 24; Efesosimiut 4:26.
Guutimik mianerinninneq pilluaqquneqangaarnermik kinguneqartarpoq
12, 13. (a) Guutimik mianerinninneq qanoq iluaqutaava? (b) Jehovamik pallorfiginnittut aalajaatsut qanittukkut qanoq pilluaqqusaangaassappat?
12 „[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ (Tussiaat 34:16) Oqaatsit taakkua ilumoornerannut uppernarsaataavoq Guutip Daavimut iliuuserisaanik oqaluttuaq. Ullumikkut Jehovap uagutsinnik piggassinera nalunnginnatsigu nuannaangaarneq qamuunalu eqqissineq misigisarparput. Qularutiginngilarput pisariaqartitatsinnik isumagiuaannarumaaraatigut, aamma tatineqangaarnitsinni. Nalunngilarput ilumoortumik pallorfiginnittut tamarmik siulittuutigineqartutut qanittukkut Gogimit Magogimeersumit saassunneqarumaartut „[Jehovallu] ullussaa . . . siooranangaaqisoq“ misigiumaaraat. (Joeli 2:11; 3:4; Ezekieli 38:14-18, 21-23) Qanorluunniit nalaataqaraluarutta Daavip oqaasii uku uagutsinnut eqquutissapput: „Iluartut kappialagaangata [Jehovap] tusartarpai aniguisittarlugillu annikilliuutigisaannit tamanit.“ — Tussiaat 34:18.
13 Jehova aterminik angingaartumik naalannarsisitsisoq takullugu alutornassaqaaq! Qamuuna aatsaat taama mianerinnitsigalutalu ataqqinnitsigissaagut, akerlilersuisullu tamarmik nikanarsaataasumik suujunnaarsinneqassapput. „[Jehovap] kiinaa pinerluttuliortunut sammivoq, taakkua aqqi nunami eqqaamaneerutitissavai.“ (Tussiaat 34:17) Tupinnangaartumik aniguisitaanerup tamatuma misiginissaa Guutillu silarsuassaanut nutaamut naapertuilluassuseqarfiusumut isernissaq pilluaqqussutaangaassaaq!
Neriorsuutit pinertusaarnissamut iluaqutigisavut
14. Ajunaarnernik eqqorneqaraluarluta pinertusaarnissamut suna iluaqutigissavarput?
14 Silarsuarmili matumani ajortunngorsimallunilu akeqqersimaarfiusumi Jehovamut naalattuassagaanni pinertusaartariaqarpoq. Guutimik mianerinninneq naalannermik ineriartortitsinissamut iluaqutaangaartarpoq. Ullut ernumanartorsiorfiit inuuffigisavut pissutaallutik Jehovap kiffaasa ilaasa misilinneqarnerit sakkortuut ’uummatiminnik sequmiisullusooq’ aamma ’anersaaminnik aserorterisullusooq’ atortarpaat. Qularutiginngilluinnarpaalli Jehova tunaarigunikku taassuma pinertusaarnissaminnut ikiorumaaraatik. Daavip oqaasii uku tuppallernangaarput: „[Jehovap] qanippai sequmissimasumik uummatillit, annaattarpai aserortersimasumik anersaallit.“ (Tussiaat 34:19) Daavi qiimmaallannangaartumik ima nangippoq: „Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa.“ (Tussiaat 34:20) Ajunaarnernik qanorluunniit amerlatigisunik eqqorneqaraluarutta Jehova uagutsinnik annaassinissaminut naammattorsuarmik nukeqarpoq.
15, 16. (a) Daavip Tussiaat 34-mik allareernermi kinguninngua suna tusarpaa? (b) Misilinneqarnerit naammagalugit atornissaannut suna iluaqutigissavarput?
15 Daavip Tussiaat 34-mik allareernermi kinguninngua tusarpaa Saulip Nobimi innuttaasut palasillu amerlanersaat toqorarsimagai. Nobimut tikeraarnermi Saulimik kamalersitsisimanera eqqarsaatigigamiuk qamuuna anniaatigisimassaqaa. (1 Samueli 22:13, 18-21) Qularnanngitsumik Daavi ikioqqulluni Jehovamut saaffiginnissimassaaq, qularnanngivissumillu ’iluartut toqusunit makikkumaarnerannik’ qilanaarinninnini tuppallersaatigisimassavaa. — Apustilit Suliaat 24:15.
16 Uaguttaaq makititaanissamik neriuut nakussatsissutigisarparput. Nalunngilarput uagutsinnut akeraasut aaqqinneqarsinnaanngitsumik ajoqusersinnaanngikkaatigut. (Matthæusi 10:28) Daavip taamatut isumaqarluni ersersippaa ima oqarluni: „[Naapertuilluartup] saarni tamaasa paarai ataaserluunniit nallorneqassanngilaq.“ (Tussiaat 34:21) Versi taanna Jiisusimut tunngatillugu eqquuppoq. Naakkittaatsumik toqutaavoq, saarngili ’nallorneqanngillat’. (Johannesi 19:36) Tussiaat 34:21-mi aamma neriorsoqqissaarneqarpugut tanitat taakkualu suleqataat, ’savat allat’, qanorluunniit misilinneqaraluarlutik aaqqinneqarsinnaanngitsumik ajoquserneqanngisaannassasut. Taakkua saarngi aserorneqanngisaannassappullusooq. — Johannesi 10:16.
17. Jehovap innuttaanik uumissuiuartut ajunaarnermit sumit eqqorneqassappat?
17 Pissutsit iluaatsut, imaluunniit guutiitsut, atugassaat allarluinnaapput. Taakku qanittukkut siaruartikkatik ajortut katersussavaat. „Iluaatsoq perluit toqussavaat, pillarneqassappullu iluartup akerartortai.“ (Tussiaat 34:22) Guutip innuttaanik akerlilersuiuartut tamarmik ajunaarnermit ajornerpaamit eqqorneqarumaarput. Jiisusi saqqummersitaappat „naassaanngitsumik suujunnaarsitaaneq pillaatisiarissavaat“. — 2 Thessalonikamiut 1:9.
18. ’Amerlangaartut’ aniguisinneqareernerat qanoq paasisariaqarpa, taakkununngalu ilaasut siunissami suut misigissavaat?
18 Daavip tussiaasiaa tuppallersaataangaartumik ima naavoq: „[Jehovap] kiffani aniguisissavai, pillarneqassanngillat taassumani qimarnguffissarsiortut.“ (Tussiaat 34:23) Daavi ukiut 40-t naalakkersuinermi naangajalernerani ima oqarpoq: ’Jehova navianartunit tamanit uannik aniguisitsisimavoq.’ (1 Kunngit 1:29) Jehovamik mianerinnittut tamarmik Daavitut qanittukkut kingumut qiviarsinnaassapput ajortiminnillu misilinneqarnerminnillu tamanit aniguisinneqarnertik nuannaarutigalugu. Kristumiut tanitat amerlanersaasa qilammi akissarsiassartik pereerpaat. ’Amerlangaartut’ inuiaqatigiinnit tamaneersut Guutimut kiffartornermi Jiisusip qatanngutaanut kinguleruttunut ilaliupput taamaattumillu Jehovap isaani minguitsuullutik. Minguitsuusinnaapput Jiisusip aavata kuineqartup utertitsissutaaneranik upperinninnertik ersersikkamikku. Kristusip ukiuni tusindini naalakkersuiffissaani utertitsissutitut pilliut tamakkiisumik iluaqutigilissavaat, naammalluinnartunngussappullu. — Saqqummersitat 7:9, 14, 17; 21:3-5.
19. ’Amerlangaartunut’ ilaasut suna aalajangiusimavaat?
19 Guutimik pallorfiginnittut ’amerlangaartut’ sooq tamakkuninnga tamanik pilluaqquneqassappat? Jehovamik mianerinnittuarnissartik aamma ataqqinningaarlutik, nersorinnillutik maniguullutillu naalallutik taassumunnga kiffartortuarnissartik aalajangiusimagamikku. Aap, Jehovamik mianerinninneq maanna ilumut inuunermik nuannaarutiginnilersitsivoq, ’inuuniviullu pigilernissaanut’ — tassa Guutip silarsuassaani nutaami naassaanngitsumik inuulernissamut — iluaqutigissavarput. — 1 Timotheusi 6:12, 18, 19; Saqqummersitat 15:3, 4. (wE 3/1 07)
Eqqaamavigit?
• Sooq Guuti mianerisariaqarparput, taassuminngalu mianerinninneq qanoq paasisariaqarpa?
• Guutimik mianerinninneq pissusilersornitsinnut qanoq sunniuteqartariaqarpa?
• Guutimik mianerinninneq qanoq iluaqutaava?
• Neriorsuutit suut pinertusaarnissatsinnut iluaqutigaavut?
[Atuaqqissaarnermi apeqqutit]
[Qupp. 18-mi assiliartaq]
Jehovamik mianerinnittut suliartik inerteqqutaagaangat malunnaarsaarlutik taassumunnga kiffartortarput
[Qupp. 20-mi assiliartaq]
Inoqatitsinnut iliuuserisinnaasarput pitsaanerpaaq tassaavoq Guutip naalagaaffia pillugu nutaarsiassamik nuannersumik taakkununnga oqaluussineq