Peqatigiilluta Jehovap aqqa qutsissisitsigu

„[Jehova] ataqqinartissiuk peqatigalunga, peqatigiilluta aqqa nersortigu!“ — TUSSIAAT 34:4.

1. Jiisusi nunami kiffartornermini qanoq maligassiuilluarpa?

UKIUMI 33-mi nisanip 14-iani unnukkut Jerusalemimi inimi Jiisusi apustilini peqatigalugit erinarsorluni Jehova unnersiutigaa. (Matthæusi 26:30) Naggammik erinarsoqatigiipput, katerisimaarnertillu taamatut naggasermagu naleqqulluarpoq. Nunami kiffartornermi aallaqqaataaniit naggataanut Ataatani unnersiutigisarpaa aallussilluarlunilu Taassuma aqqa nalunaajaatigisarlugu. (Matthæusi 4:10; 6:9; 22:37, 38; Johannesi 12:28; 17:6) Tussiaasiortup qamannga pisumik kajumissaarutaa una uteqqittutut ippaa: „[Jehova] ataqqinartissiuk peqatigalunga, peqatigiilluta aqqa nersortigu!“ (Tussiaat 34:4) Uagutsinnut maligassiuilluarpoq!

2, 3. (a) Qanoq nalunngilarput Tussiaat 34 aamma siulittuutaasoq? (b) Allaaserisami matumani tulliuttumilu suut sammissavavut?

² Apustili Johannesi, Jiisusi peqatigalugu erinalimmik unnersiutiginneqataasoq, nalunaaquttap-akunnialui qaangiuttut naalakkami pinerluttullu marluk nappakkani anniartitaaffinni toqutaanerannik isiginnittuuvoq. Romamiut sakkutuuisa pinerluttut marluk toqujaarniassammata niui napivaat. Johannesili kingusinnerusukkut allappoq Jiisusip niui napinngikkaat, tullinnguukkamikku toqoreersimammat. Johannesip iivangkiiliumini eqqaavaa pisimasup taannartaa Tussiaat 34-mi versip allap uuma eqquunnerigaa: „Saarngi nallorneqassanngillat.“ — Johannesi 19:32-36; Tussiaat 34:21.

³ Tussiaat 34-mi kristumiunut allanik soqutiginartorpassuaqarpoq. Taamaattumik allaaserisami matumani tulliuttumilu Daavip tussiaat taanna allakkamiuk pissutsit atugai taavalu tussiaatip imarisai qiimmaallannartut misissussavavut.

Daavi Saulimit qimaasoq

4. (a) Sooq Daavi Israelikkunnut kunnginngortussatut taninneqarpa? (b) Sooq Saulip Daavi „asangaalerpaa“?

⁴ Daavip inuusuttuunerata nalaani Sauli Israelikkunnut kunngiuvoq. Saulili naalakkunnaarami Jehovamit iluarisaajunnaarpoq. Taamaattumik pruffiiti Samuelip ima oqarfigaa: „[Jehovap] ullumi Israelimi kunngiussuseq ilinnit peersippaa allamullu ilinnit ajunnginnerusumut tunniullugu.“ (1 Samueli 15:28) Kingusinnerusukkut Jehovap Samueli peqquaa Daavi, Isajip ernera nukarleq, Israelikkunnut kunnginngortussatut taneqqullugu. Taamaannerani kunngi Sauli Guutip anersaavanik najorneqarunnaarsimasoq nikalloraluttuinnarpoq. Taamaattumik Daavi nipilersullaqqissuusoq Gibeamut aatinneqarpoq kunngimut kiffartoqqullugu. Daavip nipilersornera Saulip, ’taassuminnga asanningaalersup’, ilorraallaatigisarpaa. — 1 Samueli 16:11, 13, 21, 23.

5. Sooq Saulip Daavimut misigissusii allanngorpat, Daavilu susariaqalerpa?

⁵ Piffissap ingerlanerani erseqqissivoq Daavi Jehovamit najorneqartoq. Jehovap ikiuineratigut Daavi inorujussuarmut filisteriusumut Goliatimut ajugaasinnaasimavoq sakkutuutullu pikkorissunngorsinnaasimalluni Israelimi nersorneqartoq. Jehovalli Daavimik pilluaqqusinera Saulip sinngalissutigaa naggataatigullu Daavi uumigilerlugu. Kunngi Sauli Daavimit kukkilattariarsorfigineqartilluni marloriarluni taanna qalugiusaminik naakkiarpaa, Daavili nigoriartarami eqqortinneq ajorpoq. Saulip pingajussaanik  toqunniarmani Israelikkunnut kunnginngortussap paasivaa inuunini annaanniarlugu qimaasariaqarluni. Saulip tigusariniartuarmani toqunniartuarmanilu Daavi aalajangerpoq nunamut allamut qimaaniarluni. — 1 Samueli 18:11; 19:9, 10.

6. Sooq Saulip Nobimiut toqutaateqquai?

⁶ Israelimit aallariartorluni Daavip illoqarfik Nobi, Jehovap toqqata naapeqatigiittarfiup inissisimaffia, uniffigaa. Daavi angutinik inuusuttunik qimaaqateqarsimagunarpoq, Daavilu taakkua namminerlu nerisassaminnik pissarsiorpoq. Saulip paasivaa palasiunerup Daavi angutitaalu nerisassanik tunisimagai panarlu Daavip Goliatimit toqungasumit tigusaa tunniussimagaa. Kamaqaluni Saulip illoqarfimmiut tamaasa, ilaatigut palasit 85-it, toqutaatippai. — 1 Samueli 21:2, 3; 22:12, 13, 18, 19; Matthæusi 12:3, 4.

Daavip inuunini annaateqqikkaa

7. Sooq Gati toqqorfittut Daavimut isumannaatsuunngila?

⁷ Daavi Nobimiit kimmut 40 kilometerit filisterit nunaannut qimaavoq Goliatillu inunngorfia Gati annanniarfigalugu. Daavi eqqarsarsimasinnaavoq Gati Saulip ujarlerfissaasa kingullersarigaat. Sivitsunngitsorli Gatip kunngiata kiffaasa Daavi ilisaraat. Daavip paasigamiuk ilisarineqarsimalluni „Akishi Gatip kunngia ersigingaalerpaa“. — 1 Samueli 21:11-13.

8. (a) Daavip Gatimi misigisai pillugit Tussiaat 56-imi qanoq allassimava? (b) Daavi qanoq annaqqavippa?

⁸ Filisterit Daavi tigusaraat. Immaqa tamatuma nalaani Daavip qamannga pisumik tussiaasiami ilaat allappaa, tassanilu Jehovamut ima oqarluni: „Qullikka toqqortaraatit illit imiisivinni amiusumi.“ (Tussiaat 56:1, 9) Taamatut oqarnermigut ersersippaa tatigigini aliasuutini Jehovap puiussanngikkai, asannittumilli isumagiumaaraani sernissorumaaraanilu. Aamma silanngajaartuusaarluni filisterit kunngiat nakutinniarlugu isumassarsiaraa. Tamanna pissutigalugu kunngi Akiship kiffani avoqqaarai angut ’perlerortutut iliortoq’ imminukaammassuk. Erseqqippoq Daavip periaasia Jehovap pilluaqqugaa. Daavi illoqarfimmit anisinneqarluni annaqqaveqqippoq. — 1 Samueli 21:14-16.

9, 10. Sooq Daavip Tussiaat 34 allappaa, tussiaallu allakkamiuk kikkut eqqarsaatigisimasinnaavai?

 ⁹ Biibilimi allassimanngilaq Daavip tapersersortaasa Gatimut qimaaqatigisimaneraat eqqaaniluunniit Israelimi illoqarfeeqqani alapernaarsuisimanersut. Pissutsit qanorluunniit ikkaluarpata naapeqqikkamik Daavilu oqaluttuarmat Jehovap qanoq aniguiseqqikkaani nuannaarsimassaqaat. Pisimasoq tamanna Tussiaat 34-mut tunngavissiivoq, versi 1-imi allassimaneratut. Versi 2-miit 8-mut Daavip aniguisitaanini pillugu Guuti unnersiutigaa, tapersersortinilu kajumissaarpai peqatigaluni Jehova innuttaminik Aniguisitsisorsuartut qutsissiseqqullugu. — Tussiaat 34:4, 5, 8.

¹⁰ Daavi angutitanilu Israelip qaqqalittaasa ilaanni Adullamip qaarusuani, Gatimiit kangimut 15 kilometerisut ungasitsigisumiittumi, isumannaatsumi qimarnguissarsipput. Tassani Israelikkunnik, kunngi Saulip naalakkersuinerata nalaani pissutsinik naammaginninngitsunik, ilaliuffigineqarput. (1 Samueli 22:1, 2) Daavip oqaatsit Tussiaat 34:9-23-miittut allakkamigit inuit taamaattut eqqarsaatigisimasinnaavai. Versini taakkunani oqaaqqissaarutit aamma uagutsinnut ullumikkut inuusunut pingaaruteqarput, tussiaammillu nuannersumik tamatuminnga sukumiisumik misissuineq uagutsinnut pissarsiffiungaassaaq.

Daavimut pingaarnerpaasoq — aamma ilinnut pingaarnerpaava?

11, 12. Jehovap unnersiutigiuarnissaanut suut pissutissaraavut?

¹¹ „[Jehova] unnersiutigissavara sukkulluunniit, qanerma erinalimmik unnersiutigiuassavaa.“ (Tussiaat 34:2) Daavi eqqissiviitsutut inuutilluni inuussutissaqarniarnerup tungaatigut isumakuluuterpassuaqarsimassaaq, kisianni soorlu oqaatsinit taakkunannga ersertoq isumakuluutit Jehovamik unnersiutiginninniarluni aalajangiusimannikkunnaassutiginngilai. Atugarlioraangatta tamanna uagutsinnut maligassaalluarpoq. Atuaraangatta, suligaangatta, uppeqativut kristumiut ilagigaangatsigik oqaluussigaangattaluunniit Jehovamik unnersiutiginninneq kissaatiginerpaasariaqarparput. Unnersiutiginninnissamummi pissutissarpassuavut eqqarsaatigikkit. Assersuutigalugu Jehovap pinngortitarsuani tupinnartumi nutaanik paasisassaqartuaannarpugut nuannaarutissaqartuaannarlutalu. Eqqarsaatigikkillu Jehovap peqatigiissortami ilaa nunarsuarmiittoq aqqutigalugu naammassisimasai. Nalitsinni Jehovap inuit naammalluinnanngitsut aalajaatsulli sunniuteqarluartumik atorsimavai. Inuit silarsuarmi nuannaartorineqartut arlaannaalluunniit Guutip suliaanut naleqqiunneqarsinnaasunik naammassisaqarsinnaava? Qularnanngitsumik Daavi isumaqatigaat ima allattoq: „Guutini ilittut ittoqanngilaq, [Jehova], naammassisatillu assissaqanngillat.“ — Tussiaat 86:8.

¹² Jehovap suliai asseqanngitsut pillugit Taassuma unnersiutigiuarnissaanut Daavip kajumissuseqarneratut kajumissuseqarpugut. Aammattaaq Daavip naassaanngitsumik kingornussisuata, Jiisusi Kristusip, Guutip naalagaaffiani kunnginngorsimaneranik ilisimanninnerput nuannaarutigaarput. (Saqqummersitat 11:15) Tamanna isumaqarpoq pissutsit aaqqissuussaanerata matuma naggatissaa qanillisoq. Inuit 6 milliardit sinnillit siunissaat naassaanngitsoq navianartorsiorpoq. Guutip naalagaaffiata tamatumalu qanittukkut inuiannut sunik naammassisaqarumaarnerata allanut oqaluttuarinissaa peqatigalutalu Jehovamik unnersiutiginnilersillugit ikiornissaat aatsaat taama pisariaqartigaaq. Periarfissat tamaasa atorlugit allat kingusinaartinnagit ’Naalagaaffimmik nutaarsiassamik nuannersumik’ ilassinninnissaannik kajumissaarnissaat ilumut inuunitsinni pingaarnerpaasariaqarpoq. — Matthæusi 24:14, NV.

13. (a) Daavip kina usorsitsaatigaa, inuillu qanoq ittut tamanna killinneqaatigisarpaat? (b) Inuit qanilaartut ilagiinnut kristumiunut qanoq kajungilersinneqarpat?

¹³ ’Tarnima [Jehova] usorsitsaatigissavaa, ilalaartut tamanna tusassavaat tipaatsullutillu.’ (Tussiaat 34:3, 1900/1961) Daavi nammineq naammassisaminik usorsitsaatiginninngilaq. Assersuutigalugu Gatip kunngianik nakutitsinini oqarissaarutiginngilaa. Paasivaa Gatimiitilluni  Jehovap sernissoraani taassumalu ikiuineratigut aniguilluni. (Ussatit 21:1) Taamaattumik Daavi imminut usorsitsaatiginani Jehova usorsitsaatigaa. Tamanna qanilaartut Jehovamut qanillissutigaat. Aammattaaq Jiisusip Jehovap aqqa unnersiutigisarpaa, inuillu qanilaartut ilinniarusussuseqartullu tamanna Jehovamut qanillissutigisarpaat. Ullumikkut qanilaartut inuiannit tamaneersut kristumiut tanitat nunanit tamalaaneersut ilagiissaat, Jiisusimik niaqoqartoq, kajungerfigaat. (Kolossemiut 1:18) Qanilaartut killinneqartarput Guutip aqqa taassuma kiffaasa maniguuttut naalannarsisikkaat tusaraangamikku tusarliussarlu Biibilimeersoq, Guutip anersaavanit illernartumit imminnut paasineqarsinnaanngortinneqartoq, tusarnaaraangamikku. — Johannesi 6:44; Apustilit Suliaat 16:14.

Ataatsimiinnerit uppernitsinnik nakussatsitsisut

14. (a) Daavip kisimiilluni Jehovamik unnersiutiginnittarnini naammagaa? (b) Ataatsimiinnernut najuunnermut tunngatillugu Jiisusi qanoq maligassiuiva?

¹⁴ „[Jehova] ataqqinartissiuk peqatigalunga, peqatigiilluta aqqa nersortigu!“ (Tussiaat 34:4) Daavip kisimiilluni Jehovamik unnersiutiginnittarnini naammaginngilaa. Ikinngutini asannittumik kajumissaartarpai peqatigaluni Guutip aqqanik qutsissisitseqqullugit. Taamatuttaaq Jiisusi Kristusip, Daavip annerup, kikkut tamarmik takkuanni — synagogini, Jerusalemimi Guutip naalaffiani nalliuttorsiornerni ajoqersukkanilu ilagigaangamigit — Jehovamik unnersiutiginninneq nuannaarutigisarpaa. (Lukasi 2:49; 4:16-19; 10:21; Johannesi 18:20) Uppeqativut peqatigalugit periarfissat tamaasa, ingammik maanna ’nalunnginnatsigu ullussaq qanillisoq’, Jehovamik unnersiutiginninnikkut Jiisusip maligassiaanik malinninneq immikkut pisinnaatitaaffigaarput nuannersoq. — Hebræerit 10:24, 25.

15. (a) Daavip misigisai angutitaanut qanoq sunniuteqarpat? (b) Ataatsimiinnernut najuuttarnerput qanoq iluaqutigisarparput?

¹⁵ „[Jehovap] ujaranni akivaanga, aniguisippaangalu siooqqatigisannit tamanit.“ (Tussiaat 34:5) Misigisaq tamanna Daavimut pingaaruteqaqaaq. Taamaattumik imminut pilluni ima oqarpoq: „Ikiortarialik torlormat tusarpaa [Jehovap], annikilliuutaanillu tamanit annaappaa.“ (Tussiaat 34:7) Uppeqativut ilagigaangatsigik periarfissarpassuaqartarpugut artornartunik atugaqartilluta pinertusaarnissatsinnut Jehovap  qanoq ikiuisimaneranik ersersitsisunik qiimmaallannartunik misigisalikkersaarnissatsinnut. Taamaaliortarutta uppeqatitta uppernikkut nakussatsissutigissavaat, soorlu Daavip oqaasii tapersersortaasa uppernikkut nakussatsissutigigaat. Daavip ikinngutaasa Jehova „tunaarigamikku nuannaarpaseqaat, kiinaallu kanngutsisinneqarsinnaanngillat“. (Tussiaat 34:6, NV) Kunngi Saulimit qimaasariaqaraluarlutik kanngusunngillat. Qularutiginngilaat Daavip Guutimit najorneqarnera, nuannaangaarnerallu kiinaasigut takuneqarsinnaavoq. Taamatulli soqutiginnilerlaat ukiorpassuarnilu kristumiuusut ilumoortut Jehova annertoqqutimissut tunaaraat. Ikiuinera nammineq misigisarpaat, taamaattumillu kiinaasigut nuannaarpasissukkut erserpoq aalajaattuarnissartik aalajangiusimagaat.

Inngilit ikiuinerat qujamasuutigiuk

16. Jehovap inngilini aqqutigalugit qanoq ’aniguisissimavaatigut’?

¹⁶ „[Jehovap] inngilia taassuminnga mianerinnittut eqqaanni inississaaq, aniguisissavaalu.“ (Tussiaat 34:8) Daavi isumaqanngilaq Jehovap tanitaa, Israelikkunnut kunnginngortussaq, tassa nammineq, kisimi Jehovamit aniguisinneqarsinnaalluni. Nalunngilaa Jehovap inngilini aqqutigalugit pallorfiginnitsini aalajaatsut, nuimasuujugaluarpata nuimasuujunngikkaluarpataluunniit, tamaasa nakkutigigai. Nalitsinni pallorfiginnittut ilumoortut Jehovap sernissuinera aamma misigisarpaat. Tysklandimi nazistit nalaanni, Angolami, Malawimi, Mocambiquemi nunanilu allarpassuarni oqartussaasut Jehovap Nalunaajaasuinik nungusaaniaraluarput, iluatsinngitsumilli. Nunani taakkunani Jehovap kiffai peqatigiillutik Guutip aqqanik qutsissisitsitillutik amerliartortuarput. Sooq? Jehovap inngilini illernartut aqqutigalugit innuttani sernissorlugillu siulersormagit. — Hebræerit 1:14.

17. Guutip inngiliisa qanoq ikiortarpaatigut?

¹⁷ Aammattaaq Jehovap inngiliisa pisut aqussinnaavaat kinaluunniit allanik naakkiutsitsisoq Jehovap innuttaanit peersinneqartillugu. (Matthæusi 13:41; 18:6, 10) Guutimut kiffartornitsinni akornutaasunik inngilit piiaasarput, ilaannikkullu sianiginngikkaluaripput taamaaliortarput. Jehovamullu attaveqarnitsinnik navianartorsiortitsisinnaasunut sernissortarpaatigut. Pingaarnerpaamik, „nutaarsiassamik nuannersumik atajuartussamik“ inuiannut tamanut, ilaatigut sumiiffinni oqaluussiffigalugit navianartorsiorfiusartuni, oqaluussinermi siulersortarpaatigut. (Saqqummersitat 14:6, NV) Atuagassiani atuakkanilu Jehovap Nalunaajaasuinit saqqummersinneqartuni oqaluussisartut inngilinit ikiorneqartarnerannik ersersitsisunik oqaluttuaqartarpoq. * Misigisat taamaattut amerlavallaarput nalaatsornerinnakkut pisimanerarlugit suusupaginissaannut.

18. (a) Inngilinit ikiorneqassagutta suna pisariaqarpa? (b) Allaaserisami tulliuttumi apeqqutit suut sammineqassappat?

¹⁸ Inngilit siulersuinerat sernissuinerallu iluaqutigiuassagutsigik Jehovap aqqa qutsissisittuartariaqarparput, aamma akerlilersorneqaraangatta. Eqqaamajuk Jehovap inngilia taassuminnga ’mianerinnittuinnaat eqqaanni inissittartoq’. Tamanna qanoq paasisariaqarpa? Guutimik mianerinninneq suua, qanorlu ineriartortissinnaavarput? Sooq Guutip asannittup mianerissagitsinni kissaatigaa? Apeqqutit taakku allaaserisami tulliuttumi sammineqassapput.

[Quppernerup ataani ilanngussaq]

Qanoq akissavit?

• Inuusuttuulluni Daavip annikilliuutit suut naammagalugit atorpai?

• Daavip pingaarnerpaatitsineratut suna pingaarnerpaatipparput?

• Kristumiut ataatsimiinneri qanoq isigaavut?

• Jehovap inngilini uagutsinnik ikiuinermini qanoq atortarpai?

[Atuaqqissaarnermi apeqqutit]

[Qupp. 13-mi assiliartaq]

(Allassimasut qanoq inissisimanersut naqitami takuneqarsinnaavoq)

Rama

Gati

Siklagi

Gibea

Nobi

Jerusalemi

Betlehemi

Adullami

Ke’ila

Hebroni

Zifi

Horeshi

Karmeli

Maoni

En-Gedi

Imaq Tarajuusoq

[Suminngaanneernera]

Nunap assinga: Nunap assingi Pictorial Archive (Near Eastern History) Est. and Survey of Israel-imit pigineqartut tunngavigalugit suliarineqarsimasoq

[Qupp. 13-mi assiliartaq]

Allaat qimaasutut inuugallarami Daavip Jehovap aqqa qutsissisittarpaa

[Qupp. 15-mi assiliartaq]

Kristumiutut katerisimaarnitsinni ineriartornartunik misigisalikkersaartut tusarnaaraangatsigik uppernikkut nakussatsittarpugut