Qanoq ilillutit ingerlalluarsinnaasutit

SOORLU angajoqqaat qitornatik isumassortaraat ingerlalluarnissaallu kissaatigalugu, taamatuttaaq Ataatatta qilammiusup isumassorpaatigut ingerlalluarnissarpullu kissaatigalugu. Asannittumik uagutsinnik isumassuinini ilaatigut ersersippaa suna ingerlalluarnermik sunalu ingerlalluannginnermik kinguneqartarnersoq pillugu paasissutissilluta. Assersuutigalugu Guutip siunnersuutaanik eqqumaffiginnittoq pillugu Biibilimi naatsumik erseqqissumillu ima oqaatigineqarpoq: „Qanoq iliornermini tamani iluatsitsisaraaq.“ — Tussiaat 1:3.

Qanoruna ilillutik inuppassuit pilluarunnaarlutillu nalerisimaarunnaartartut? Tussiaat taanna misissorluarnerullugu akissutissarsissaagut paasissavarpullu qanoq ililluta ingerlalluarsinnaasugut.

„Iluaatsut siunnersuutaat“

„Iluaatsut siunnersuutaat“ malillugit inuunerup navianaatai tussiaasiortup mianersoqqussutigai. (Tussiaat 1:1) Iluaatsuunerpaaq tassaavoq ’ajortoq’, Saatani Diaavulu. (Matthæusi 6:13) Biibilimi allassimavoq taanna tassaasoq „silarsuup matuma naalagaanera“ aamma „silarsuaq tamarmi Ajortumut naalatsigitittoq“. (Johannesi 16:11; 1 Johannesi 5:19) Taamaattumik tupaallannanngilaq silarsuarmi kajumissaaruterpassuit siunnersuuterpassuillu ’ajortup’ eqqarsartaasianik ersersitsimmata.

Guutiitsut qanoq ittunik siunnersuuteqartarpat? Amerlanertigut guutiitsut Guutimut ataqqinninngitsuliortarput. (Tussiaat 10:13) Taamaattumik siunnersuutaat, sumi tamaani naammattoortakkavut, Guutimut ataqqinngitsuunerannik ersersitsisarput. Innuttaaqatigiit nalitsinni inuusut ’uinngup pilerigisaanik, isit pilerigisaannik nunallu piinik usorsisimaaruteqarnermik’ siuarsaapput. (1 Johannesi 2:16) Tusagassiuutit aqqutigalugit isumaqalersinniarneqartuarpugut pigisanik pingaartitsilluta inuunerput sapinngisamik pissarsiffiginerpaassagipput. Silarsuaq tamakkerlugu suliffiit tunisassiaatiminnik piseqqusaariniarnerminni — atuisunit pisariaqartinneqarpata pisariaqartinneqanngippataluunniit — ukiumut dollarit 500 milliardit sinnerlugit ussassaarutinut atortarpaat. Ussassaarutillu taakkua inuit pisiarisartagaannik allannguisitsiinnanngillat; aamma ingerlalluarneq pillugu silarsuarmiittunik eqqunngitsumik isiginnittaaseqalersitsipput.

Naak inuppassuit ukiualunnguit matuma siorna sinnattoriinnarsimasaminnik peqalersimagaluarlutik ussassaarutinit sunnerneqarlutik timikkut iluaqutissanik suli amerlanerusunik noqqaassuteqartuarput. Isumaqarput aatsaat taakku pigilerunikkik pilluartutut ingerlalluartutullu misigissallutik.  Taamatulli eqqarsarneq, ’Ataatamit pisuunngitsoq, silarsuarmit pisuusoq’, eqqunngitsuuvoq. — 1 Johannesi 2:16.

Pinngortitsisup nalunngilaa qanoq ingerlalluarsinnaanersugut. Siunnersuutai ’iluaatsut siunnersuutaannit’ allaanerulluinnarput. Taamaattumik Guutimit iluarisaaneq anguniaatigalugu silarsuarmi matumani ingerlalluarniarsarinerup, assigaa aqqusernit assigiinngitsut marluk ataatsikkut ingerlaviginiarsarinerat. Taamaaliortoqarsinnaanngilaq. Tupinnanngilaq Biibilimi ima mianersoqqussuteqarmat: „Silarsuarmut matumunnga naleqqussarniaqinasi.“ — Romamiut 12:2.

Silarsuarmut naleqqussarniaqinak

Silarsuup Saatanip naalagaaffigisaata qanoq ingerlanerput soqutigisuusaarpaa. Mianersortariaqarpugulli. Eqqaamajuk Saatanip arnaq siulleq Eva salloqittaraa nammineq soqutigisani namminissarsiortut siuarsarniarlugit. Tamatuma kingorna Adami ajortuliortinniarlugu Eva sakkugaa. Ullumikkuttaaq Saatanip tammarsaarinermini inuit atortarpai.

Assersuutigalugu David, allaaserisap matuma siuliani eqqaaneqartoq, ilimasuffigineqarpoq suliffimmini qaangiuttoortassasoq suliffimminullu tunngatillugu angalakulasassasoq. „Akulikitsumik ataasinngornermi ullaaralaakkut aallartarpunga sisamanngornermilu unnukkut utertarlunga,“ oqaluttuarpoq. Davidip ikinngutai, ilaqutai suleqataalu isumaqaramik David atorfimmini angusarissaassaguni taamatut pilliuteqartariaqartoq kajumissaarpaat „ilaquttani pillugit“ taamaalioqqullugu. Naatsorsuutigaat angusarissaalernissami tungaanut ukiualuinnarni taamaassasoq. David ima oqarpoq: „Isumaqarput akissarsiarissaarnerulissagama — suliffinnilu angusarissaarnerunissannut iluaqutigissagakku — ilaquttannut iluaqutaassasoq. Naak angerlarsimarpiarneq ajortunga, ikinngutima isumaqalersippaannga taamaaliornera ilaquttannut iluaqutaasoq.“ Inuppassuit Daviditulli suleruluttarput namminneq isumartik naapertorlugu ilaquttatik atorfissaqartitaannik tamanik tuniniarlugit. Siunnersuutinilli taamaattunik maleruaaneq ajunngitsumik kinguneqartarpa? Ilaquttat suna pisariaqartinnerpaavaat?

Tamanna Davidip suliffimminut tunngatillugu angalatilluni paasivaa. Ima oqaluttuarpoq: „Paniga Angelica telefonikkut oqaluutsillugu ima aperivoq: ’Ataata, sooq angerlarsimaqatigerusunneq ajorpitigut?’ Sakkortuumik eqqortippunga.“ Davidip suliffimminit soraarneranut paniata oqaasii pissutaaqataapput. Aalajangerpoq ilaquttani pisariaqartitaviannik tuniniarlugit — tassa imminut tunniunniarluni.

Guutip siunnersuutaanik maleruaaneq pilluarnermik kinguneqartarpoq

Sunniiniarnerit ajortut taama amerlatigisut qanoq akiorsinnaavavut? Tussiaasiortoq oqarpoq inuk „[Jehovap] inatsisaanik nuannarisaqartoq“ aamma ’inatsisaanik eqqarsaatiginnittartoq ullukkullu unnuakkullu’ ingerlalluartartoq. — Tussiaat 1:1, 2.

Guutip Josva Israelikkunnik siulersuisussatut toqqaramiuk ima oqarfigaa: „[Guutip oqaasia] eqqarsaatigiuaannaruk ullukkut unnuakkullu.“ Aap, pingaartorujussuuvoq Guutip oqaasiata atuarnissaa eqqarsaatiginissaalu, Josvalli aamma oqaatsimi ’tassani allassimasut tamaasa maleruaqqissaartariaqarpai’. Soorunami Biibilip  atuarnerinnaatigut pillualertoqarsinnaanngilaq. Aamma atuarsimasat naapertorlugit iliuuseqartoqartariaqarpoq. Josvami ima oqarfigineqarpoq: „Taava iluatsitsilluassaatit pilluarumaarlutillu.“ — Josva 1:8.

Takorlooruk meeraq qungujulasoq anaanaminit ataataminilluunniit sarliarneqartoq, oqaluttuarlu meeqqap nuannarinerpaasaasa ilaat atuaraat. Oqaluttuarlu qasseriarlutilluunniit atuarsimagaluarunikku piffissaq taamaattoq pingaartippaat. Taamatuttaaq Guutimik asannittup ullut tamaasa Biibilimik atuarneq nuannaringaarpaa, taamaalillunilu Ataatami qilammiusup piffissaqarfiginera iluarusuutigalugu. Jehovap siunnersuutaanik siulersuineranillu maleruaanermigut assigilerpaa ’orpik kuunnguup killingani ikkunneqarsimasoq; inerititaqarfissamigut inerititaqartartoq toqujuitsunillu pilutaqartoq. Qanoq iliornermini tamani iluatsitsisaraaq’. — Tussiaat 1:3.

Orpiup tussiaasiortup eqqaasaata alliartornera inerititaqalerneralu nalaatsornerinnakkut pinngilaq. Erngup puilasup sinaani ikkunneqarsimavoq naasorissaasumillu paarineqarluni. Taamatuttaaq Ataatatta qilammiusup eqqarsartaaserput naqqittarpaa siunnersuutit oqaatsimini Biibilimiittut aqqutigalugit. Tamatuma kingunerisaanik ingerlalluarlutalu anersaakkut inerititaqarluartarpugut.

„Taamatulli inngillat iluaatsut“. Immaqa isumaqarnarsinnaavoq guutiitsut ingerlalluartut, naggataatigulli inuunerat ingerlanerliulissaaq. Taakkua „eqqartuussummi atassanngillat“. „Piujunnaassaaq aqqutaat.“ — Tussiaat 1:4-6.

Taamaattumik silarsuup anguniagaanut naleqartitaanullu naleqqussaqinak. Naak immaqa piginnaanertuujugaluarlutit silarsuarmilu ingerlalluarnissannut periarfissaqaraluarlutit, mianersuutigisariaqarpat piginnaanivit qanoq atornissaat silarsuarmillu qanoq atortinneritit. Piunngitsuunerup, pigisanik pingaartitsinerup inuk ’toquliortissinnaavaa’. Paarlattuanilli Guutimut ajunngitsumik attaveqarneq ingerlalluarnermik pilluarnermillu piviusumik kinguneqartarpoq.

Qanoq ingerlallualersinnaasutit

Sooq Guutip siunnersuutaanik maleruaasoq qanoq iliornermini tamani iluatsitsisarpa? Silarsuarmi matumani ingerlalluarneq tussiaasiortup pinngilaa. Inuup Guutimik mianerinnittup ingerlalluarnera Guutip piumasaatut iliorneranut atassuteqarpoq — Guutillu piumasaa tamatigut iluatsittarpoq. Misissoriartigu Biibilimi najoqqutassianik maleruaaneq ingerlalluarnissannut pilluarnissannullu qanoq iluaqutigisinnaagit.

Ilaqutariit: Biibilimi uiusut oqaaqqissaarneqarput ’nuliatik asassagaat namminneq timimittut’ nuliaasullu kristumiup ’uini mianerissagaa’. (Efesosimiut 5:28, 33) Angajoqqaat kajumissaarneqarput qitornamik ilaginissaannut piffissaqaqqullugit, aliikkusersoqatigeqqullugit inuunermilu pingaarutilinnik ilinniarteqqullugit. (5 Mosesi 6:6, 7; Oqaluussisartup oqaasii 3:4) Guutip oqaasiani angajoqqaat aamma ima siunnersorneqarput: „Qitornasi kamatseqinasigit.“ Siunnersuut taanna maleruarneqarpat meeqqat ’angajoqqaaminnut naalannissartik’ aamma ’ataatamik anaanamillu ataqqinissaat’ ajornannginnerutissavaat. (Efesosimiut 6:1-4) Siunnersuutinik Guutimeersunik taakkuninnga maleruaaneq ingerlalluarluni pilluarlunilu ilaqutariittut inuunermik kinguneqarsinnaavoq.

Ikinngutit: Amerlanersavut ikinnguteqarusupput. Aamma eqqarsartaatsikkut misigissutsikkullu asannissinnaavugut asanninnermillu tigusisinnaalluta. Jiisusip kristumiut ’asaqatigeeqquai’. (Johannesi 13:34, 35) Qatanngutit kristumiut  taakkua ilaannik ikinngutitaarsinnaavutit asasinnaasannik tatigisinnaasannillu — aamma allaat eqqarsaatinnik misigissutsinnillu itinerpaanik oqaluttuussinnaasannik. (Ussatit 18:24) Tamanilli pingaarnerpaavoq Biibilimi najoqqutassiat maleruarnerisigut ’Guuti qanillisinnaagakku’ aamma, Aaperaatulli, allaat ’Guutip ikinngutaanik’ taaneqarsinnaagavit. — Jaaku 2:23; 4:8.

Inuunerup siunertaa: Biibili naapertorlugu ingerlalluartutut oqaatigineqartut, misigisimanngillat inuunertik imaqaranilu siunertaqanngitsoq, akerlianilli inuunerup siunertaa paasisimavaat. Pissutsit aaqqissuussaanerat maanna atuuttoq tutsuiginanngitsoq inuunerminni tunngaviginngilaat. Inuunerup siunertavianik pingaarnerpaatitsigamik ilumoortumik ataavartumillu nalerisimaalertarput. Suup inuuneq siunertaqalersittarpaa? Oqaluussisartup oqaasii 12:13-imi ima allassimavoq: „Guuti mianeruuk inatsisaalu maleruarlugit, inuit tamarmik taamaaliortussaapput!“

Neriuut: Guutimik ikinnguteqarnitta aamma siunissamut neriuuteqalersippaatigut. Apustili Paulusip kristumiut kajumissaarpai „pisuussutit allanngujasut isumalluutigeqqunagit, isumalluutigeqqulluguli Guuti“. Taassumunnga neriunnikkut katersisinnaassapput „pisuussutinik siunissami toqqaviusinnaasunik ajunngitsunik inuunivik pigilersinnaaqqullugu“. (1 Timotheusi 6:17-19) Tassa Guutip naalagaaffiata qilammiittup nunarsuaq Paratiisiusoq pilerseqqippagu qanittukkut inuunivik piviusunngussaaq. — Lukasi 23:43.

Naak Biibilimi najoqqutassiat maleruaraluarlugit ajornartorsiunngivissinnaanngilatit, guutiitsulli imminnut aliasuutissiissuterpassuinut ajornartorsiortitsinerpassuinullu asattuunneqarputit. Davidip allaaserisap matuma siuliani eqqaaneqartup inuillu millionillit allat paasisimavaat Biibilimi najoqqutassiat maleruarnerisa pingaaruteqassusiat. Piffissakkut naleqqunnerusukkut suliffittaareerluni David ima oqarpoq: „Qujamasoqaanga nuliannut qitornannullu ajunngitsumik attaveqarama ilagiinnilu utoqqaanertatut Jehova Guutimut kiffartorneq immikkut pisinnaatitaaffigigakku.“ Tupinnanngilaq Guutip siunnersuutaanik eqqumaffiginnittut pillugit tussiaammi ima allassimasoqarmat: „Qanoq iliornermini tamani iluatsitsisaraaq.“ (wE 1/1 07)

[Qupp. 6-mi nalunaarsukkat]

SIUNNERSUUTIT PITSAASUT TALLIMAT

1 Silarsuup naleqartitaanut naleqqussaqinak.

Tussiaat 1:1; Romamiut 12:2

2 Guutip oqaasia ullut tamaasa atuartaruk eqqarsaatigisarlugulu.

Tussiaat 1:2, 3

3 Biibilimi siunnersuutit atortakkit.

Josva 1:7-9

4 Guutimut ikinngutaalerit.

Jaaku 2:23; 4:8

5 Guuti ilumoortoq mianeruuk inatsisaalu maleruarlugit.

Oqaluussisartup oqaasii 12:13

[Qupp. 7-mi assiliartat]

Siunnersuutit taakkua ingerlalluarnermik kinguneqartartut maleruartarpigit?