Unneqqarissuuneq imminut akilersinnaavoq

UNNEQQASERLUNNEQ Adamip Evallu nalaanniilli piuvoq. Kulturinili innuttaaqatigiinnilu amerlanerni unneqqarissuuneq pingaartinneqarpoq, salluliornerlu peqquserlunnerlu akuerineqarsinnaanngitsutut assuarnartutullu isigineqarput. Tatiginartutut ilisimaneqarneq tulluusimaarutissaavoq. Taamaattoq inuit amerliartuinnartut isumaqarput innuttaaqatigiinni muteerniusuni imminut napatissagaanni unneqqaserluttuusariaqartoq. Illit qanoq isumaqarpit? Unneqqarissuuneq imminut akilersinnaava? Suna unneqqarissuunersoq sunalu unneqqaserluttuunersoq aalajangissagaangakku suna tunngavilersuutigisarpiuk?

Guutimut iluarisaassagutta oqaatsitsigut inooriaatsitsigullu unneqqarissuusariaqarpugut. Apustili Paulusip kristumioqatini ima oqaaqqissaarpai: ’Ilumoortumik immissinnut oqaluffigisaritsi.’ (Efesosimiut 4:25) Paulusi aamma ima allappoq: ’Tamatigut eqqortumik iliorumasarpugut.’ (Hebræerit 13:18) Allanit nersualaarneqarusunneq unneqqarissuunissamut kajumississutiginngilarput. Pinngortitsiserput ataqqigatsigu nuannaartikkusukkatsigulu unneqqarissuuvugut.

Kinaassutsit isertoqinagu

Inuppassuit periarfissaqarnerujumallutik kinaassusertik pillugu eqqunngitsumik paasissutissiisarput. Allagartanik soraarummeersimanermulluunniit uppernarsaatinik imaluunniit kinaassutsimut allagartanik eqqunngitsunik pissarsisarput unioqqutitsillutik nunamut allamut iserniarlutik piginnaaneqarfiginngisartilluunniit suliffigilerumallugu. Angajoqqaat ilaasa qitornamik inunngornermut allagartaat peqquserlullutik allanngortittarpaat meeqqat sivisunerusumik atuartuusinnaaqqullugit.

Guutimilli iluarisaajumasoq salluliornanilu peqquserluttuliussanngilaq. Biibilimi allassimavoq Jehova tassaasoq „sallusuissutip Guutia“, piumasaraalu imminut qanimut ikinngutaasut ilumoortuussasut. (Tussiaat 31:6, NV) Jehovamut qanimut attaveqartuaannarumagutta „sallutuut“, inuit peqquserluttut, ilaarusussanngilavut. — Tussiaat 26:4.

Aamma kukkussuteqarneq pillugu avoqqaarineqarumanani ilumoortumik isertuineq nalinginnaasupilussuuvoq. Allaat kristumiu ilumoortoq taamaaliorsinnaavoq. Assersuutigalugu angutip inuusuttup ilagiinniittup ajortuliorsimanini miserratiginngilaa. Aammali tillissimanini nassuerutigiumanngilaa, naak taamaaliorsimanerminut uppernarsaatissaqaraluartoq. Paasineqarmat ilagiinnut  ilaajunnaarsinneqartariaqarpoq. Jehovamut erlinnartumik attaveqaqqilerumalluni aallaqqaammulli unneqqarissuusimagaluaruni silatusaarsimassagaluarpoq, ilaa? Biibilimimi ima allassimavoq: „[Jehovap] perorsaanera asiginnaqinagu, avoqqaarinninneri nikalluutiginiaqinagit, [Jehovap] asasani anusinngorsartarmagu.“ — Hebræerit 12:5, 6.

Ilaannikkut qatanngutip angutip kristumiup ilagiinni annerusumik akisussaaffeqalerumalluni ajornartorsiutini siornatigulluunniit ajortuliarisimasani isertorniarsinnaavai. Assersuutigalugu kiffartornermi immikkut pisinnaatitaaffik piumallugu qinnuteqaat immersortariaqaruniuk imaassinnaavoq peqqissutsiminut ileqqorissaarnerminullu tunngasut naammaginartumik akinngikkai, isumaqarami taakkununnga tunngatillugu ilumoortoq pissutaalluni atorsinnaanngitsutut nalilerneqassalluni. Immaqa ima eqqarsarpoq: ’Salluliornerunngilaq.’ Taamaakkaluartoq oqartoqarsinnaava isertuaranilu unneqqarissuusoq? Biibilimi allassimasoq una malugiuk: „Peqquserluttuliortoq Jehovap maajugaa, peqqusersuitsorli anngigisaqarfiginngilaa.“ — Ussatit 3:32, NV.

Unneqqarissuuneq, pingaarnerpaamik, imminut unneqqarissuuneruvoq. Nammineq uppererusutarput upperigajuttarparput suna eqqortuunersoq ilumoortuunersorluunniit  apeqqutaatinnagu. Nammineq kukkussutigisap allamut pisuutitsissutiginissaa ajornanngeqaaq! Assersuutigalugu kunngi Sauli imminut illersorniarpoq naalanngissimanerminut allanik pisuutitsilluni. Taamaaliornera pissutigalugu Jehovap kunngiujunnaarsippaa. (1 Samueli 15:20-23) Kunngi Daavimit, Jehovamut ima qinusumit, allaanerussusia: „Ajortuliannik anngiiarfigaakkit isertorunnaarlugulu kukkussutiga. Oqarpunga: Unioqqutitsinikka anngiiaatigissavakka [Jehovamut], ajortuliannillu isumakkeerfigaarma.“ — Tussiaat 32:5.

Unneqqarissuuneq pilluaqqussutissartaqarpoq

Unneqqarissuuneq unneqqaserluttuunerluunniit allanit qanoq isigineqarninnut sunniuteqarpoq. Allat — ataasiaannarlutilluunniit — peqqusersiorfigisimagitit paasigunikku taamaaliorfigisimasavit tatigiunnaassavaatsit ilinnillu tatiginnileqqinnissaat imaannaanngilaq. Tamatigulli ilumoortumik oqaluttaruit unneqqarissuujuaannarlutillu assuarnaatsuusutut, tatigineqarluinnarsinnaasutut, ilisimaneqalissaatit. Jehovap Nalunaajaasui taamaattuusutut tusaamaneqalersimapput. Assersuutit tulliuttut eqqarsaatigikkit.

Suliffimmi pisortap paasigamiuk sulisut ilarpassui suliffimmut peqquserluttuliorsimasut politiilersuuppai. Tusaramiuk sulisoq ataaseq, Jehovap Nalunaajaasuisa ilaat, aamma parnaarussaasimasoq, politiinut saaffiginnippoq ingerlaannaq iperagaateqqullugu. Sooq? Pisortap nalunnginnamiuk taanna sulisartuusoq unneqqarissoq pisuussuteqanngitsorlu. Allat soraarsitaasut oqaluussisartoq soraarsitaanngilaq. Pissuserinnerata Jehovap aqqanut ataqqinaataanera uppeqataasa nuannaarutigingaarpaat.

Pissuserinneq malugineqanngitsoorneq ajorpoq. Afrikap nunataasa ilaanni nunamik paqqersaaniarluni kussiaq qulaallugu ikaartarfik iluarsaanneqartariaqalersimavoq qisuttaasa ilaat tillinneqarsimammata. Taqqavanimiut aalajangerput qisunnut nutaanut akissaminnik aningaasanik katersiniarlutik, kinali aningaasanik nakkutiginnittuutissinnaavaat? Tamarmik isumaqarput tassaassasoq Jehovap Nalunaajaasuisa ilaat.

Afrikami nunat ilaanni politikkikkut inuiannullu tunngasutigut pikitsitsisoqarmat Jehovamut nalunaajaasuusup nunarsuaq tamakkerlugu suliffeqarfimmi naatsorsuuserisuusup inuunera navianartorsiormat allamut nuunnissaa suliffianiit isumagineqarpoq. Pissutsit toqqissisimanarnerulernissaata tungaanut suliffiata akiliullugu nunami allami qaammaterpassuarni suliffeqartippaa. Sooq? Tamatuma siorna oqaluussisartoq suliffimmut peqquserlunnissamut peqataajumasimanngimmat. Pisortaasut nalunngilaat unneqqarilluinnartuusutut ilisimaneqartoq. Sulisoq taanna unneqqarippallaanngitsutut ilisimaneqaraluaruni ikiorumaneqarsimassagaluarpa?

Ussatit 20:7-imi ima allassimavoq: „Iluartuuvoq assuarnaalluni inuusoq.“ Inuk unneqqarissoq assuarnaatsuuvoq. Allanut peqqusersusaarnanilu peqquserlunneq ajorpoq. Illit aamma taamatut pineqarnissat kissaatigaat, ilaa? Unneqqarissuuneq pallorfiginninnermi ilumoortumi pingaaruteqarluinnarpoq. Guutimut tullermullu asanninnitsinnut ersersitsineruvoq. Unneqqarissuunitsigut takutittarparput Jiisusip inuunermi najoqqutassiaa una maleruarusullutigu: „Inunnut qanorluunniit iliorfigeqqugussi ilississaaq taamatut iliorfigisigit.“ — Matthæusi 7:12; 22:36-39.

Unneqqarissuuneq ajornartorsiulersitsisinnaavoq, taamaaliornikkulli ilerasuuteqannginneq qanorluunniit akeqaraluarpat imminut akilersinnaavoq. Siunissaq eqqarsaatigalugu unneqqarissuuneq ilumoortuunerlu iluaqutaanerpaajupput. Jehovamut ajunngitsumik attaveqarneq nalissaqanngilluinnarpoq. Sooq attaveqarneq taamaattoq ajoqusissavarput inunnit ataqqisaajunnaarumanngiinnarluta namminerluunniit iluaqutissarsiniaannarluta? Qanorluunniit unamminiagaqaraluarutta tussiaasiortup oqaasii uku tatigisinnaavavut: „Pilluarpoq [Jehovamik] qimarnguffeqartoq saanngitsorlu anersaapilunnut guutinullu sallutuunik ujarlersunut.“ — Tussiaat 40:5. (wE 12/1 06)

[Qupp. 10-mi assiliartat]

Kristumiut ilumoortut allagartanik uppernarsaatinik eqqunngitsunik pissarsinatilluunniit atuineq ajorput