Ilagiit Jehova unnersiutigilissuk

„Aqqit nalunaajaatigissavara uanga qatanngutinnut, ilagiinni unnersiutigissavakkit.“ — HEBRÆERIT 2:12.

1, 2. Ilagiit aaqqissuussaanerat sooq taama iluaqutaatigaa, ilagiillu suliassaat pingaarnerpaaq suua?

OQALUTTUARISAANERUP ingerlanerani inuppassuit ilaqutariit iluanni toqqissisimallutillu qanimut attaveqaqatigiittarsimapput. Biibilimili peqatigiinneq alla eqqartorneqarpoq, ullumikkut nunarsuaq tamakkerlugu inuit kisissaanngitsut ataqatigiinnermik toqqissisimanermillu asseqanngitsumik nuannaarutiginniffigisaat. Eqqartorneqartoq tassaavoq ilagiit kristumiut. Asannittunik tapersersuilluartunillu ilaqutaqaraluaruit ilaqutaqanngikkaluaruilluunniit Guutip ilagiit aaqqissuussaanerat aqqutigalugu tunniussai qujamasuutigisinnaallugillu qujamasuutigisariaqarpatit. Jehovap Nalunaajaasuisa ilagiivisa ilaannut ilaalereersimaguit, qularnanngitsumik tassani nuannersumik asannittumillu attaveqaqatigiittoqarnera toqqissisimanartuuneralu ilumoornerarsinnaavat.

² Ilagiit sukisaarsaarfiunngillat. Klubbiunngillat inuit assigiimmik tunuliaqutallit imaluunniit timersoriaatsimik aliikkutassamilluunniit aalajangersimasumik soqutigisaqaqatigiit naapeqatigiittarfigisartagaat. Ilagiilli aaqqissuussaanerata siunertaa pingaarneq tassaavoq Jehovamik unnersiutiginninnissaq. Itsarsuarli Guutip kiffai tamanna siunertaralugu katersuuttarsimapput, Tussiaatinilumi tamanna erseqqissarneqarpoq. Tussiaat 35:18-imi ima allassimavoq: „Qutsavigissavakkit katersorsimasorpassuarni, unnersiutigalutit inuppassuit akornanni.“ Aamma Tussiaat 107:31, 32-mi ima kajumissaarneqarpugut: „Taakkua qutsavigilissuk [Jehova] unneqqarissusia pillugu, inunnullu tupinnartuliai pillugit. Inunni katersorsimasuni nersornartillissuk.“

3. Paulusip oqaasii naapertorlugit ilagiit suna suliassaraat?

³ Apustilip Paulusip kristumiuusup ilagiit suliassaat pingaarutilik alla erseqqissarpaa ’Guutip illua — tassa Guutip uumasup ilagiissai, sallusuissutsip sukaralugulu tunngavigisaa’ eqqartoramiuk. (1 Timotheusi 3:15) Paulusimuna ilagiit sorliit eqqartorai? Biibilimi oqaaseq „ilagiit“ qanoq isumaqartillugu atorneqarpa? Aamma ilagiit inuunitsinnut siunissatsinnullu qanoq sunniuteqassappat? Siullermik misissoriartigu oqaaseq „ilagiit“ Guutip oqaasiani qanoq atorneqarnersoq.

4. Oqaaseq qahal’ Allakkani Hebræerisuuni amerlanertigut sumut tunngatillugu atorneqartarpa?

⁴ Allakkani Hebræerisuuni oqaaseq hebræerisooq qahal’, „eqimattat“-mik, „katersorsimasut“-mik „ilagiit“-millu nutserneqarsinnaasoq, atorneqarpoq. Oqaaseq taanna oqaatsimit „katersortitsineq“-mik imaluunniit „katersuineq“-mik isumaqartumit naggueqartumeersuuvoq. (5 Mosesi 4:10; 9:10) Tussiaasiortup oqaaseq qahal’ inngilinut qilammiittunut tunngatillugu atorpaa, aammattaaq inunnut ajortunut eqimattanut ataatsinut tunngatillugu atorneqarpoq. (Tussiaat 26:5; 89:6-8) Oqaaserli taanna Allakkani Hebræerisuuni amerlanertigut Israelikkunnut tunngatillugu atorneqartarpoq. Allassimaqqaarfinnit toqqaannartumik nutsikkat naapertorlugit Guutip Jaaku oqarfigaa ’inuiaqatigiissorpassuanngussasoq [hebræerisut: qahal’]’, tassa ilagiinngussasoq, taamatullu pisoqarpoq. (1 Mosesi 28:3; 35:11; 48:4) Israelikkut ’Jehovap katersorsimasuisut’, ’Guutip ilagiissaasut’, toqqarneqarput. — 4 Mosesi 20:4; Nehemia 13:1; Josva 8:35; 1 Samueli 17:47; Mika 2:5.

5. Grækerit oqaasiat „ilagiit“-mik nutserneqartartoq suua, oqaaserlu taanna qanoq atorneqarsinnaava?

⁵ Oqaaseq grækerisooq oqaatsimut tamatumunnga assingusoq tassaavoq ekklēsiʹa, oqaatsinit marlunnit pisoq, aappaa „-mit“-mik isumaqarpoq aappaalu „qaaqqusineq“-mik isumaqarluni. Oqaaseq taanna upperisarsiornermut tunngassuteqanngitsut  pillugit katersuussimasunut, soorlu ’katersorsimasunut’ Efesosimi Demetriosip Paulusimik kamaassilersitaanut, tunngatillugu atorneqarsinnaavoq. (Apustilit Suliaat 19:32, 39, 40b) Biibilimili ilagiinnut kristumiunut tunngatillugu atorneqarnerusarpoq. Biibilimik nutsikkat ilaanni oqaaseq „oqaluffik“-mik nutserneqartarpoq, The Imperial Bible-Dictionary-mili eqqaaneqarpoq oqaaseq taanna ’illumut kristumiut tamarmik takkuanni Guutimik pallorfiginninniarlutik katersuuffigisartagaannut atorneqanngisaannartoq’. Soqutiginarporli Kristumiut Allagaataanni Grækerisuuni oqaaseq „ilagiit“ minnerpaamik assigiinngitsunik sisamanik isumaqartillugu atorneqarmat.

„Guutip ilagiissai“ tanitat

6. Daavi Jiisusilu ilagiinni suppat?

⁶ Apustili Paulusip Daavip Jiisusi pillugu oqaasii Tussiaat 22:23-mi allassimasut issuarpai ima allalluni: „’Aqqit nalunaajaatigissavara uanga qatanngutinnut, ilagiinni unnersiutigissavakkit.’ Taamaattumik [Jiisusip] tamatigorluinnaq qatanngutini assigilertariaqarpai tassaalerumalluni Guutip saani palasiunerusoq naakkinnittoq unneqqarissorlu.“ (Hebræerit 2:12, 17) Daavi itsaq Israelimi ilagiinni Guutimik unnersiutiginnittarsimavoq. (Tussiaat 40:10) Paulusilli suna pivaa allakkami Jiisusi „ilagiinni“ Guutimik unnersiutiginnittoq? Ilagiit sorliit matumani pineqarpat?

7. Kristumiut Allagaataanni Grækerisuuni oqaatsip „ilagiit“-p isumaa pingaarneq suua?

⁷ Hebræerinut allakkat 2:12, 17-imi allassimasut maluginiarnarput. Tassami tamatumani erserpoq Kristusip ilagiit annerusumik isumaqartumik ilaasortaaffigigai, tassanilu Guutip aqqa qatanngutiminut nalunaajaatigaa. Qatanngutit taakku kikkuuppat? Taakku tassaapput ’Aaperaap kinguaavinut’ ilaasut, Kristusip qatanngutai tanitat ’qilammit qaaqqusissummik pisimasut’. (Hebræerit 2:16–3:1; Matthæusi 25:40) Aap, Kristumiut Allagaataanni Grækerisuuni oqaatsip „ilagiit“-p isumaa pingaarneq tassaavoq Kristusip ajoqersugai tanitat eqimattat ilaasortarpassuallit. 144.000-it taakku tassaapput „angajulliliat ilagiit qilanni allanneqarsimasut“. — Hebræerit 12:23.

8. Jiisusip ilagiit kristumiut pilersinneqarumaarnerat qanoq oqaatigimisaarpaa?

⁸ Jiisusip oqaatigimisaarpaa „ilagiit“ kristumiut taakku pilersinneqartussaasut. Toqunissani ukiup ataatsip missaanik sioqqullugu apustilit ilaat ima oqarfigaa: „Petrusiuvutit, qaarsumullu taassumunnga tunngavilerumaarpakka ilagiissikka, toqusullu inaata isaaffiisa ajugaaffigissanngilaat.“ (Matthæusi 16:18) Petrusillu Paulusillu paasivaat Jiisusi nammineq qaarsuusoq siulittuutigisaq. Petrusip „ujaqqattut uumasutut“ qaarsup, tassa Kristusip, qaani anersaakkut ittumik illuliarineqartut ima allaffigai: „Ilissi tassaavusi . . . innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.“ — 1 Petrusi 2:4-9; Tussiaat 118:22; Esaja 8:14; 1 Korinthimiut 10:1-4.

9. Guutip ilagiissaasa aallarnisarneqarnerat qanga aallartippa?

⁹ Inuiaat taakku ’innuttassarsiaasussat’ ilagiittut kristumiutut aaqqissuussaasumik aallarnisarneqarnerat qanga aallartippa? Tamanna pivoq ukiumi 33-mi piinsip ulluani Guutip anersaaq illernartoq ajoqersukkanut Jerusalemimi katersuussimasunut kuimmagu. Ullormi tamatumani kingusinnerusukkut Petrusi juutinut juutillu upperisaannut ilanngussimasunut sunniuteqarluartumik oqalugiarpoq. Ilarpassuisa Jiisusimik toqutseqataasimanertik uummatimikkut anniutigaat; allamik isumataarput kuisillutillu. Biibilimi oqaluttuarineqarpoq 3000-it taamatut iliuuseqarsimasut taamaalillutillu Guutip ilagiissaanut nutaamut alliartortumullu ilaalerlutik. (Apustilit  Suliaat 2:1-4, 14, 37-47) Alliartorpoq juutit juutillu upperisaannut ilanngussimasut amerligaluttuinnartut uinikkut Israelikkut Guutimit ilagiissigiunnaarneqarnerat akuerimmassuk. Guutilli ilagiissaanut ilumoortunut maanna ilaasut tassaapput kristumiut tanitat, „Israeli Guutip pigisaa“ anersaakkut ittoq. — Galatiamiut 6:16; Apustilit Suliaat 20:28.

10. Jiisusi Guutip ilagiissaanut qanoq ittumik attaveqarpa?

¹⁰ Biibilimi Jiisusi tanitallu immikkoortinneqartarput, soorlu imatut: „Kristusi ilagiillu“. Jiisusi kristumiut tanitat ilagiissaannut niaquuvoq. Paulusi allappoq Guutip ’sunut tamanut niaquusoq Jiisusi ilagiinnuttaaq niaquulersikkaa. Ilagiimmi tassaapput taassuma timaa.’ (Efesosimiut 1:22, 23; 5:23, 32; Kolossemiut 1:18, 24) Ullumikkut tanitat ilagiissaannut tamatumunnga ilaasut kinguleruttut nunarsuarmiittut ikittuinnaapput. Qularutiginngilarpulli taakkununnga niaquusup, Jiisusi Kristusip, taakku asagai. Taakkununnga misigissusii Efesosimiunut allakkat 5:25-mi ima allaatigineqarput: „Kristusip ilagiit [asavai] imminullu tunniulluni taakku pillugit.“ Asavai „qujaniutinik, tassa qarlut aqqanik nassuerutiginnittut inerititaannik“ Guutimut ’pilliuteqarnissaq’ ulapputigimmassuk. Jiisusip nunarsuarmiikkallarami aamma tamanna ulapputigisimavaa. — Hebræerit 13:15.

Oqaatsip „ilagiit“-p isumai allat

11. Allakkani Grækerisuuni oqaaseq „ilagiit“ allaanerusumik isumaqartillugu qanoq atorneqarpa?

¹¹ Biibilimi ilaannikkut oqaaseq „ilagiit“ allatut isumaqartillugu atorneqartarpoq. Tamatumani kristumiut tanitat 144.000-it tamarmiusut ’Guutip ilagiissigisai’ pineqartanngillat. Assersuutigalugu Paulusip kristumiorpaaluit ima allaffigai: „Juutinilluunniit grækerinilluunniit Guutilluunniit ilagiissaanik mamiatsatsitsiniaqinasi.“ (1 Korinthimiut 10:32) Itsaq Korinthimi kristumiu assuarnartulioruni soorunami allanut mamiatsassutaasinnaavoq. Tamannali grækerinut, juutinut imaluunniit tanitanut tamanut taamanikkumiit ulloq manna tikillugu mamiatsassutaasinnaava? Soorunami naamik. Tamanna pillugu versimi tamatumani oqariartaaseq „Guutip ilagiissai“ kristumiunut piffissami aalajangersimasumi qanoq ilineratigulluunniit inuusunut tunngatinneqarunarpoq. Taamaattumik Guutip ilagiinnik, tassa imaappoq kristumiunik tamanik qanoq ilisukkulluunniit inuusunik aamma sumiikkaluartunilluunniit, siunnersuinera, isumassuinera pilluaqqusineralu pineqarsinnaavoq. Imaluunniit nuannaarneq eqqissinerlu ullumikkut Guutip ilagiissaani, tassa qatanngutigiissuarni kristumiuni, nalinginnaasoq pineqarsinnaavoq.

12. Oqaaseq „ilagiit“ Biibilimi aamma allatut isumaqartillugu qanoq atorneqarpa?

¹² Pingajuattut, oqaaseq „ilagiit“ Biibilimi kristumiunut tamanut sumiiffimmi aalajangersimasumiittunut tunngatillugu atorneqarpoq. Ima allassimavoq: „Ilagiit Judæami tamarmi Galilæamilu Samariamilu maanna eqqissisimalerput.“ (Apustilit Suliaat 9:31) Nunami isorartuumi tamatumani kristumiut eqimattat ataasiinnaanngillat, eqimattalli Judæamiittut, Galilæamiittut Samariamiittullu tamaasa ataatsimut isigalugit „ilagiit“-tut eqqartorneqarput. Ukiumi 33-mi piinsip ulluani tamatumalu kinguninngua kuisittut amerlassusiat eqqarsaatigalugu, immaqa aamma allaat Jerusalemimi eqqaanilu eqimattanik ataasiinnaanngitsunik aalajangersimasumik ataatsimiittoqartarsimassaaq. (Apustilit Suliaat 2:41, 46, 47; 4:4; 6:1, 7) Herodesi Agrippa I ukiumi 44-mi toqussi tikillugu Judæamut naalakkersuivoq. Thessalonikamiunut allakkat siulliit 2:14-imi erseqqippoq kingusinnerpaamik ukiumi 50-imi Judæami arlalinnik ilageeqarsimasoq. Aamma Herodesip ’ilagiit ilaannik’ naalliutsitsisimanera allaatigineqarmat, ilagiit arlallit Jerusalemimi katersuuttartut pineqarsimasinnaapput. — Apustilit Suliaat 12:1.

13. Oqaatsip „ilagiit“-p atorneqartarnera nalinginnaasupilussuaq suua?

¹³ Sisamaattut, oqaaseq aamma allatut sulilu nalinginnaanerusumik isumaqartillugu atorneqartarpoq kristumiunut ilagiinnut ataatsinut immaqalu angerlarsimaffinni ataatsimiittartunut tunngatillugu. Paulusip ’ilagiit Galatiamiut’ eqqaavai. Romamiut pigisaanni isorartuumi tassani ilagiit ataasiinnaanngillat. Paulusip oqaaseq qasseersiut ilagiinnut arlalinnut tunngassuteqartoq Galatiamut tunngatillugu marloriarluni atorpaa, tassa ilagiit Antiokiamiittut, Derbemiittut, Lystramiittut Ikonionimiittullu pisimassavai. Ilagiinni taakkunani piumasaqaatinik eqqortitsisunik utoqqaanertanngortitsisoqarpoq,  imaluunniit nakkutilliisunngortitsisoqarpoq. (1 Korinthimiut 16:1; Galatiamiut 1:2; Apustilit Suliaat 14:19-23) Biibililu naapertorlugu ilagiit taakkua tamarmik tassaapput ’Guutip ilagiissai’. — 1 Korinthimiut 11:16; 2 Thessalonikamiut 1:4.

14. Oqaatsip „ilagiit“-p allassimaffinni ikittunnguani atorneqarnera tunngavigalugu qanoq isummersinnaavugut?

¹⁴ Eqimattat kristumiut ataatsimiinnerinut katersuuttarsimasut ikittunnguusarsimassapput, angerlarsimaffimmiissinnaasunimmi amerlanerusimanngillat. Taamaakkaluartorli oqaaseq „ilagiit“ eqimattat ikittunnguakkuutaat taakkua ilaannut atorneqarpoq. Eqimattat ikittunnguakkuutaat ilisimasaqarfigisavut ilagiiupput Priskap Akvilallu angerlarsimaffianni, aamma Nymfakkunni Fiilimuukkunnilu ataatsimiittartut. (Romamiut 16:3-5; Kolossemiut 4:15; Fiilimuut 2) Tamanna qiimmassaataangaarsinnaavoq ullumikkut ilagiinnut ikittunnguanik ilaasortalinnut immaqa aamma angerlarsimaffimmi aalajangersimasumik ataatsimiittartunut. Jehovap ukiuni hundredelinni siullerni ilagiit ikittunnguanik ilaasortallit taakkutut ittut pingaartippai, qularnanngilluinnartumik aamma ullumikkut ilagiit ikittunnguanik ilaasortallit pingaartippai, anersaaminik pilluaqqusarlugit.

Ilagiit Jehovamik unnersiutiginnipput

15. Anersaap illernartup sunniuteqarnera ilagiit kristumiut siulliit ilaanni qanoq takuneqarsinnaasimava?

¹⁵ Eqqaaneqareersutut Tussiaat 22:23-mi allassimasup eqquunneratut Jiisusip Guuti ilagiinni unnersiutigaa. (Hebræerit 2:12) Ajoqersugai aalajaatsut aamma taamaaliortussaasimapput. Ukiuni hundredelinni siullerni kristumiut ilumoortut Guutimut ernerusussatut taamalu Kristusimut qatanngutaasussatut anersaamik illernartumik taninneqarmata, anersaaq illernartoq taakkua ilaannut immikkut ittumik sunniuteqarpoq. Anersaap tunissutaanik tupinnartuliortitsisinnaasunik tunineqarput. Tunissutit taakkunatut ittut malunniutaat tassaapput ilisimassuseqarluni imaluunniit ilisimasaqarluni immikkut ittumik oqalussinnaaneq, ajorunnaarsitsisinnaaneq siulittuisinnaanerluunniit, imaluunniit allaat oqaatsit ilisimanngisatik atorlugit oqalussinnaaneq. — 1 Korinthimiut 12:4-11.

16. Anersaap tunissutaasa tupinnartuliortitsisinnaasut siunertaasa ilaat suua?

¹⁶ Oqqanik oqalunnermut tunngatillugu Paulusi ima allappoq: „Anersaakkut [Anersaap tunissutai atorlugit, NV] erinalimmik unnersiutiginnikkumavunga, kisianni aammattaaq silaqassusera atorlugu erinalimmik unnersiutiginnikkumavunga.“ (1 Korinthimiut 14:15) Nalunngilaa  allat oqaatsiminik paasinninnissaat taamaalillutillu ilinniartinneqarnissaat qanoq pingaaruteqartigisoq. Paulusip ilagiinni Jehovamik unnersiutiginninnissaq anguniagarisimavaa. Anersaap tunissutaanik tunineqarsimasut allat kajumissaarpai ’ilagiinnut’, tassa ilagiinnut najukkaminnut anersaap tunissutaanik taakkuninnga atuiffigisaminnut, ’ineriartuutaasunik [anersaap tunissutaanik] peqangaarnissaq noqqaassutigeqqullugu’. (1 Korinthimiut 14:4, 5, 12, 23) Erseqqippoq Paulusip ilagiit tamaasa immikkut soqutigigai aamma nalunngikkaa kristumiut ilagiinni tamaniittut Guutimik unnersiutiginnissinnaassasut.

17. Ullumikkut ilagiinnut tunngatillugu suna qularutiginngilarput?

¹⁷ Jehovap ilagiissini atortuarlugillu annertoqqusersortuarpai. Ullumikkut kristumiut tanitat eqimattat ilaasortarpassuallit nunarsuarmiittut pilluaqquai. Tamanna takuneqarsinnaavoq anersaakkut inuussutissanit naammattorsuarnit Guutip innuttaasa pisartagaannit. (Lukasi 12:42) Jehovap qatanngutigiissuit nunarsuarmi tamarmiittut ataatsimut isigalugit pilluaqquai. Aamma ilagiit tamaasa immikkut, pissusilersornitsigut anersaakkullu ineriartornartunik akissuteqartarnitsigut Pinngortitsisitsinnik unnersiutiginniffigisartakkavut, pilluaqquai. Taakkunani ilinniartinneqartarpugut ilagiinni ataasiakkaani najuutinngikkaluarluta aamma Guuti unnersiutigisinnaaniassagatsigu.

18, 19. Kristumiut eqqortuliorusuttut ilagiinni tamaniittut sunissartik kissaatigaat?

¹⁸ Eqqaamajuk apustili Paulusip kristumiut Filippimi Makedoniamiittumi ilagiinniittut ima kajumissaarai: „Qinnutigaara . . . inerititanik iluartunik Jiisusi-Kristusikkut inerittartunik ilumioqangaaleqqullusi Guutip ataqqinaatissaanik unnersiutigineqaatissaanillu.“ Tamatumunnga ilaavoq Jiisusimut uppernerminnik neriuutiminnillu nuanningaartumik ilagiit kristumiut avataaniittunut oqaluttuarinninnissaat. (Filippimiut 1:9-11; 3:8-11) Taamaattumik Paulusip uppeqatini kristumiut ima kajumissaarpai: „Guuti [Jiisusikkut] pilliivigiuartigu qujaniutinik, tassa qarlut aqqanik nassuerutiginnittut inerititaannik.“ — Hebræerit 13:15.

¹⁹ Jiisusip pisimaneratut „ilagiinni“ Guutimik unnersiutiginninnerit, aamma suli taassuminnga ilisarisimannilersimanatillu unnersiutiginnilersimanngitsunut qarlutit atorlugit Jehovamik unnersiutiginnissinnaanerit nuannaarutigaajuk? (Hebræerit 2:12; Romamiut 15:9-11) Ilagiinnut tamatumalu Guutip siunertaani inissisimaffianut isiginnittaaserput apeqqummik tamatuminnga nammineq qanoq akisinitsinnut ilaatigut aalajangiisuusinnaavoq. Allaaserisami tulliuttumi misissussavarput Jehovap ilagiit najukkatsinniittut qanoq siulersortarlugillu atortarnerai, aamma ilagiit inuunitsinni qanoq pingaaruteqartigisariaqarnersut.

Eqqaamavigit?

• „Guutip ilagiissai“, kristumiunik tanitanik ilaasortallit, qanoq pilersinneqarpat?

• Oqaatsip „ilagiit“-p isumai allat pingasut suut Biibilimiippat?

• Daavi, Jiisusi kristumiullu siulliit ilagiinnut tunngatillugu sorusuppat, tamannalu uagutsinnut qanoq sunniuteqartariaqarpa?

[Atuaqqissaarnermi apeqqutit]

[Qupp. 23-mi assiliartaq]

Jiisusi ilagiinnut sorlernut tunngaviua?

[Qupp. 25-mi assiliartaq]

Kristumiut eqimattakkuutaat ’Guutip ilagiissigai’

[Qupp. 26-mi assiliartaq]

Beninimi kristumiut pisarnerattut Jehova ilagiinni katersorsimasuni unnersiutigisinnaavarput