Kristusi taassumalu inussiaataa ilumoorlunilu silatooq ilumoorfigikkit

„Naalagaata . . . pigisaminut tamanut paarsisunngortissavaa.“ — MATTHÆUSI 24:45-47.

1, 2. (a) Biibili naapertorlugu Siulersorterput kinaava? (b) Sumi erserpa Kristusi ilagiinnik kristumiunik siulersuisoq?

„ILITSERSUISUMIK taagortissanngilasi, ataasermi ilitsersuisoraarsi, Kristusi.“ (Matthæusi 23:10) Jiisusip taamatut oqarluni ajoqersukkaminut erseqqissarpaa inuk nunarsuarmiittoq kinaluunniit ilitsersuisorissanngikkaat, imaluunniit siulersortigissanngikkaat. Taakkununnga Siulersortituaasussaq Siulersuisuussaaq qilammiusoq — Jiisusi Kristusi nammineq. Jiisusi taamatut inissisimaffeqartussatut Guutimit toqqarneqarpoq. Jehovap taanna „toqusunit [makitippaa] . . . sunullu tamanut niaquusoq ilagiinnuttaaq niaquulersippaa. Ilagiimmi tassaapput taassuma timaa“. — Efesosimiut 1:20-23.

² Kristusi ilagiinnut kristumiunut tunngasunut ’sunut tamanut niaquugami’ ilagiinni pisunut tamanut oqartussaassutsini atortarpaa. Ilagiinni pisut tamaviisa arajutsineq ajorpai. Ilagiit, imaluunniit kristumiut eqimattat, tamarmik immikkut anersaakkut pissutsinik qanoq ittunik atugaqarnersut maluginiaqqissaartarpaa. Tamanna erseqqilluinnarpoq ukiut hundredellit siulliit naalerneranni u.n.k. apustili Johannesimut saqqummersinneqartumi. Jiisusip ilagiinnut arfineq-marlunnut tusarliussamini tallimani toqqaannartumik oqaatigaa ilagiinni pineqartuni suliarineqartut, nukittuffigineqartut sanngiiffigineqartullu ilisimallugit, tamakkununngalu naapertuuttumik ilagiit tamaasa immikkut siunnersorlugillu kajumissaarpai. (Saqqummersitat 2:2, 9, 13, 19;  3:1, 8, 15) Kristusip Aasiaaqqami, Palæstinami, Syriami, Babyloniami, Grækenlandimi, Italiami sumiiffinnilu allani ilagiit allat anersaakkut pissutsit atugaat pillugit taamatulli ilisimasaqartigisimanissaata upperinissaanut pissutissaqarluarpugut. (Apustilit Suliaat 1:8) Ullumikkummi?

Inussiaq ilumoortoq

3. Missiarsip niaqqumut taassumalu ilagiissaasa timimut assersuunnissaat sooq naleqquppa?

³ Jiisusip makititaasimasup qilalianngitsiarnermini ajoqersukkani ima oqarfigai: „Qilammilu nunamilu pissaaneq tamarmi uannut tunniussaavoq.“ Aamma ima oqarpoq: „Takuat, ullut tamaasa najorpassi silarsuup naggatissaanut allaat.“ (Matthæusi 28:18-20) Taakkununnga Niaquugami najortuassavai. Apustili Paulusip kristumiunut Efesosimiittunut Kolossemiittunullu allakkamini ilagiit kristumiut ’timi’-mut, Missiarsip niaquuffigisaanut, assersuuppai. (Efesosimiut 1:22, 23; Kolossemiut 1:18) The Cambridge Bible for Schools and Colleges-imi allassimavoq assersuut taanna timip „Niaqqumut ataneranut inuunermut pingaaruteqarluinnartumut eqqaanaannarani, aammali Niaqqup avatit aqqutigalugit piumasaminik iliuuseqartarneranut eqqaanartoq. Taakku Taassuma sakkorai.“ Missiarsip 1914-imi Guutip naalagaaffiani pissaanermik tunineqarnerminiilli eqimattat kikkut sakkutut atorpai? — Danieli 7:13, 14.

4. Malakip siulittuutaa naapertorlugu Jehova Jiisusi Kristusilu naalaffimmut anersaakkut ittumut misissuiartorlutik tikiukkamik suna paasivaat?

⁴ Malakip siulittuutaani allassimavoq Jehova, „Naalagaq ilumoortoq“ „angeruseq pillugu aallartitaq“, ernini kunnginngortinneqaqqammersoq, Jiisusi Kristusi, peqatigalugu ’naalaffiutini’, imminik pallorfiginnittarfik anersaakkut ittoq, misissoriartorlugu eqqartuukkiartorlugulu tikiukkumaartoq. ’Guutip inoqutaanik eqqartuussinissap aallartinnissaanut’ piffissaq aalajangersagaq 1918-imi nalliutinnguatsiarpoq. * (Malaki 3:1, NV; 1 Petrusi 4:17) Guutimut nunarsuarmilu maani taassuminnga pallorfiginninnermut ilumoortumut sinniisuunerartut iluamik misissuiffigineqarput. Kristumiuuneraqatigiit ilagiivi, ukiut hundredelikkuutaat ingerlaneranni ajoqersuutinik Guutimut kanngunarsaataasunik ilaasortaminnik ilinniartitsisimasut sorsunnersuullu siulliup nalaani aammik kuisinernut peqataangaatsiarsimasut, ajattorneqarput. Kristumiut tanitat aalajaatsut kinguleruttut misilinneqarput, innermillusooq minguiarneqarlutik akuerineqarlutillu, Jehovamillu ’eqqortumik pilliutinik aatsisartutut’ isigineqalerput. — Malaki 3:3.

5. Jiisusip ’najuunnissani’ pillugu siulittuutaa naapertorlugu „inussiaq“ ilumoortoq kinaava?

⁵ Malakip siulittuutaa naapertorlugu nalunaaqummut katitikkamut, Jiisusip ajoqersukkami piffissaq ’najuuffissani pissutsillu aaqqissuussaanerata naggatissaa’ (NV) ilisarisinnaaniassammassuk taakkununnga oqaluuserisaanut, ilaavoq ’inussiaqatigiit’ kikkuunerannik paasinninneq. Jiisusi ima oqarpoq: „Kinaavami kiffaq [inussiaq, NV] ilumoortoq silatoorlu naalagaata inoqutiminut nerisassanik tunniussisaqqusaa piffissaq eqqorlugu? Pilluarpoq kiffaq taanna naalagaata taamaaliortillugu tikitaa. Ilumut oqarfigaassi: Pigisaminut tamanut paarsisunngortissavaa.“ (Matthæusi 24:3, 45-47) Kristusi „inussiaq“ taanna misissuiffiginiarlugu 1918-imi ’tikiukkami’, ajoqersukkat aalajaatsut tanitat kinguleruttut, anersaakkut ’nerisassanik piffissaq eqqorlugu’ pilersuiniarlutik atuagassiamik matuminnga atuakkanillu atuagassianillu Biibililersaarutinik allanik 1879-imiilli atuisimasut, nanivai. Taakku sakkumisut eqimattaasutut, ’inussiaatimisut’ akuerai, 1919-imilu pigisaminut tamanut paarsisunngortippai.

Kristusip pigisaanik nunarsuarmiittunik ingerlatsineq

6, 7. (a) Jiisusip oqaatsit allat atorlugit ’inussiaatini’ ilumoortoq qanoq eqqartorpaa? (b) Jiisusip oqaaseq „pilittaasoq“ atormagu qanoq paasisariaqarpa?

⁶ Jiisusip najuunnissaminut, tamatumunngalu atatillugu imminut sinniisunik nunarsuarmiittunik ’inussiaqartussaaneranut’, nalunaaqut pillugu siulittuinera qaammatialunnik sioqqullugu „inussiaq“ taanna pillugu oqaatsit allaanerulaartut, inussiap sunik akisussaaffeqarneranik paasinarsisitsisut, atorpai. Jiisusi ima oqarpoq: „Kinaavami pilittaasoq ilumoortoq silatoorlu naalagaata kiffaminut nerisassanik tunniussisaqqusaa piffissaq eqqorlugu? Ilumut oqarfigaassi:  Pigisaminut tamanut paarsisunngortissavaa.“ — Lukasi 12:42, 44.

⁷ Matumani inussiaq pilittaasumik taaneqarpoq, oqaaseq grækerit oqaasiannit „illumi sulinermik aqutsisumik imaluunniit pigisanik nakkutiginnittumik“ isumaqartumit nutserneqarsimasoq. Pilittaasoqatigiit tassaaginnanngillat ilinniarluarsimasut Biibilimeersunik soqutiginartunik nassuiaasartut. ’Pilittaasup ilumoortup’ „piffissaq eqqorlugu“ anersaakkut inuussutissanik pilersuisussaanermi saniatigut Kristusip kiffaanik paarsisussanngortitaallunilu Kristusip nunarsuarmi soqutigisaanik tamanik, ’pigisaanik tamanik’, isumaginnittussanngortitaasussaavoq. Kristusip pigisai suugamik?

8, 9. Inussiaq pigisanik sunik isumaginnittussanngortinneqarsimava?

⁸ Inussiap akisussaaffiinut ilaapput illunik atortunillu Jiisusip ajoqersugaasa kristumiutut sammisassanik aallutaqarniarlutik atortagaannik nakkutilliineq. Tamatumunnga ilaatigut ilaapput Jehovap Nalunaajaasuisa qullersaqarfii, immikkoortortaqarfii pallorfiginnittarfiilu — naalagaaffilersaarfii ataatsimeersuartarfiilu — silarsuarmi tamarmiittut. Suli pingaaruteqarnerusoq tassaavoq inussiap aamma sapaatip-akunneranoortumik ataatsimiinnerni aalajangersimasumillu ataatsimeersuaararnerni ataatsimeersuarnernilu Biibilimik atuaqqissaarnermut pilersaarutinik anersaakkut ineriartornartunik nakkutilliinera. Katerisimaarnerni taakkunani nassuiarneqartarpoq siulittuutit Biibilimeersut qanoq eqquuttarnersut, aamma najoqqutassiat Biibilimeersut ulluinnarni qanoq atorneqarsinnaanerat pillugu piffissaasukkut siunnersuisoqartarpoq.

⁹ Pilittaasup aamma akisussaaffigaa „Naalagaaffimmik nutaarsiassaq nuannersoq“ pillugu oqaluussinermik ’inunnillu inuiannit tamaneersunik ajoqersuganngortitsiortornermik’ pingaaruteqarluinnartunik nakkutilliineq. Nakkutigisassanut taakkununnga ilaavoq Missiarsip, ilagiinnut niaquusup, naggatissap nalaani iliuusereqqusaanik tamanik iliornissamik inunnik ilinniartitsineq. (Matthæusi 24:14; 28:19, 20, NV; Saqqummersitat 12:17) Oqaluussineq ilinniartitsinerlu ’amerlangaartut’, tanitanik kinguleruttunik ilumoorfiginnillutik suleqatiginnittut, katersorneqarnerannik kinguneqarsimavoq. ’Inuiaat erlinnangaartortaat’ taakkua qularnanngilluinnartumik Kristusip pigisaanut erlinnartunut inussiap ilumoortup akisussaaffigisaanut ilaapput. — Saqqummersitat 7:9; Haggaji 2:7, NV.

Siulersuisoqatigiit inussiaqatigiinnut sinniisuusut

10. Ukiuni hundredelinni siullerni aalajangiisartussanngortinneqartut kikkuuppat, ilagiinnullu qanoq sunniuteqarpat?

¹⁰ Soorunami inussiap ilumoortup akisussaafferujussuinut ilaapput aalajangigassarpassuit. Ilagiinni kristumiuni siullerni apustilit utoqqaanertallu Jerusalemimiittut inussiaqatigiinnut sinniisuupput ilagiillu kristumiut tamaasa sinnerlugit aalajangiisarlutik. (Apustilit Suliaat 15:1, 2) Ukiuni hundredelinni siullerni siulersuisoqatigiit aalajangigaat allakkatigut nakkutilliisullu angalasartut aqqutigalugit ilagiinnut nalunaarutigineqartarput. Kristumiut siulliit taamatut paasiuminartumik siunnersorneqartarnertik nuannaarutigaat, siulersuisoqatigiinnillu suleqateqarusussuseqarnerat  eqqissinermik ataasiussuseqarnermillu siuarsaavoq. — Apustilit Suliaat 15:22-31; 16:4, 5; Filippimiut 2:2.

11. Kristusip ullumikkut kikkut ilagiissiminik siulersuinissamut atortarpai, kristumiullu tanitat eqimattat taakkua qanoq isigisariaqarpavut?

¹¹ Kristumiut siulliit nalaannisulli nakkutilliisut tanitat ikittunnguit ullumikkut Kristusip ajoqersugaanut nunarsuarmiittunut Siulersuisoqatigiiupput. Missiarsip, ilagiinnut niaquusup, ’talerpini’, tassa pissaanini, iluaqutigalugu angutit aalajaatsut taakkua Guutip naalagaaffiata sulineranik nakkutilliigaangata siulersortarpai. (Saqqummersitat 1:16, 20) Albert Schroeder, ukiorpassuarni Siulersuisoqatigiinnut ilaasortaasoq qanittukkut nunarsuarmi inuujunnaartoq, ima misigisalikkersaarpoq: „Pingasunngornerit tamaasa Siulersuisoqatigiit ataatsimiittarput Jehovap anersaavanit siulersorneqarnissamik qinnummik tamatigut aallarnerneqartartumik. Suliarineqartut tamarmik aalajangerneqartullu tamarmik Guutip oqaasianut, Biibilimut, naapertuulluinnarnissaat qulakkeerniarlugu sapinngisaq tamaat iliuuseqartoqartarpoq.“ * Kristumiut tanitat aalajaatsut taakku tatigisinnaavavut. Apustili Paulusip oqaaqqissaarutaa una, ingammik Siulersuisoqatigiinnut tunngatillugu, malillugu iliortariaqarpugut: „Siulersortisi naalassigit peqqusaallu maleruarlugit [pitseriartuugitsilu, NV], taakkuami tarnisi pigaappaat.“ — Hebræerit 13:17.

Inussiaq ilumoortoq ataqqineqartariaqarneratut ataqqiuk

12, 13. Inussiaqatigiinnik ataqqinninnermik ersersitsinissamut Biibilimeersunik sunik pissutissaqarpa?

¹² Inussiaqatigiinnik ilumoortunik ataqqineqarnissaattut ataqqinninnissamut pissutissaalluartoq tassaavoq taakkuninnga ataqqinninnitsigut Naalakkamik, Jiisusi Kristusimik, ataqqinnittarnerput. Paulusi tanitat pillugit ima allappoq: „Inussiaataanani qaaqqusaasoq Kristusip inussiaatigaa.“ Imalu nangippoq: „Akisuumimmi pisiarineqarpusi.“ (1 Korinthimiut 7:22, 23; Efesosimiut 6:6) Taamaammat inussiamut ilumoortumut tamatumalu Siulersuisoqatigiivinut ilumoorfiginnilluta naalatsigitikkaangatta Kristusimut, inussiap Naalagaanut, naalatsigitittarpugut. ’Jiisusi-Kristusip Guutip Ataatap ataqqinaatissaanik Naalagaaneranik’ ammasumik ’nassuerutiginneriaatsitta’ ilaat tassaavoq sakkumik Kristusip pigisaminik nunarsuarmiittunik isumaginninnissamut atortagaanik ataqqinningaarnermik ersersitsineq. — Filippimiut 2:11.

¹³ Biibili tunngavigalugu inussiamik ilumoortumik ataqqinninnermik ersersitsinissamut pissutissaq alla tassaavoq kristumiut tanitat nunarsuarmiittut ’naalaffittut’ Jehovap „Anersaakkut“ inigisaatut assersuutaasumik eqqartorneqarnerat. Taamaammat ’illernartuupput’. (1 Korinthimiut 3:16, 17; Efesosimiut 2:19-22) Katersanununa naalaffimmut ilaasunut illernartunut taakkununnga Jiisusip pigisani nunarsuarmiittut tamaasa paarisassanngortikkai, taava imaappoq ilagiinni kristumiuni pisinnaatitaaffiit pisussaaffiillu ilaat inussiaqatigiinnit taakkunannga taamaallaat isumagineqartussaapput. Tamanna pissutigalugu ilagiinniittut tamarmik inussiap ilumoortup tamatumalu Siulersuisoqatigiivisa siunnersuutaannik maleruaanissartik tapersersuinissartillu pisussaaffimmittut illernartutut isigaat. ’Savat allat’ Naalakkap soqutigisaanik isumaginninneq eqqarsaatigalugu inussiaqatigiinnik ikiuinertik immikkut pisinnaatitaaffittut angisuutut isigaat. — Johannesi 10:16.

Inussiaqatigiit ilumoorfiginnillutit tapersersukkit

14. Esajap siulittuutaa naapertorlugu savat allat ’sulisutut akilerneqanngitsutut’ inussiaqatigiinnik tanitanik malinninnerat qanoq paasisariaqarpa?

¹⁴ Savat allat Israelikkunnut anersaakkut ittunut ilaasunut tanitanut maniguullutik naalatsigitinnissaat Esajap ima siulittuutigaa: „Ima oqarpoq [Jehova]: ’Egypteni pisoorsuaq [Egyptenimi sulisut akilerneqanngitsut, NV], Nubia pigissaartoq, Sabamiut angutitaat anguterujussuit ornissavaatsit ilinnit pigineqalerlutik, malissavaatsit kalunnernik qilersorsimallutik. Pallorfigissavaatsit ilinnullu ima qinullutik: „Ilinniinnaq Guuti ippoq, allamik naami, allamik Guuteqanngilaq.“’“ (Esaja 45:14) Ullumikkut savat allat inussiaqatigiit taakkualu Siulersuisoqatigiivi assersuutaasumik malippaat, taakkua siulersuinerat malillugu iliornermikkut. ’Sulisut akilerneqanngitsut’ savat allat nukitik aningaasaatitillu kajumillutik atortarpaat silarsuaq tamakkerlugu oqaluussinermik, Kristusip ajoqersukkaminut tanitanut  nunarsuarmiittunut suliareqqusaanik, tapersersuiniarlutik. — Apustilit Suliaat 1:8; Saqqummersitat 12:17.

15. Siulittuut Esaja 61:5, 6-imiittoq naapertorlugu savat allat Israelikkullu anersaakkut ittut attaveqaqatigiinnerat qanoq issava?

¹⁵ Savat allat inussiaqatigiinnit taakkualu Siulersuisoqatigiivinit nakkutigineqarlutik Jehovamut kiffartornertik pilluaatigalugulu qujamasuutigaat. Tanitat ’Israelimut Guutip pigisaanut’ ilaanerat akueraat. (Galatiamiut 6:16) Assersuutaasumik ’takornartatut’ ’allamiuusutullu’ anersaakkut Israelimik suleqatiginnittutut nuannaarlutik ’narsaatini viinnequteqarfinnilu sulisutut’ kiffartorput tanitanit, ’Jehovap palasiinit’ aamma ’Guutip kiffaanit’, siulersorneqarlutik. (Esaja 61:5, 6) Guutip naalagaaffia pillugu nutaarsiassamik nuannersumik aallussilluarlutik oqaluussissutiginneqataallutillu inunnik inuiannit tamaneersunik ajoqersuganngortitsiortoqataapput. Inussiaqatigiit uummatikkut iluunngarlutik ikiorlugillu tapersersorpaat savanik anersaakkut ittunik nanineqarlaanik paarsinermikkut isumassuinermikkullu.

16. Savat allat inussiamik ilumoorlunilu silatuumik ilumoorfiginnillutik tapersersuinissaminnut suna kajumississutigaat?

¹⁶ Savat allat nalunngilaat inussiap ilumoortup anersaakkut inuussutissanik piffissaasukkut pilersuiniarluni eqiasuilluni iliuuserisimasai iluaqutigingaarsimallugit. Maniguullutik miserratiginngilaat ilumoorlunilu silatuumik inussiaqanngitsuuppat sallusuissutit Biibilimeersut erlinnartut pillugit ilisimasaqalaaginnarsimassagaluarlutik imaluunniit ilisimasaqanngilluinnarsimassagaluarlutik. Assersuutigalugu Jehovap kisimi oqartussaanera, aqqanik illernarsisitsineq, Guutip naalagaaffia, qilaat nutaat nunalu nutaaq, tarneq toqugaannilu qanoq pisoqartarnera pillugit sallusuissut ilisimasimassanngikkaluarpaat, aamma Jehovap, taassuma ernerata anersaallu illernartup kinaassusiviat paasisimassanngikkaluarpaat. Savat allat tamakkuninnga tamanik qujamasuutiginninnertik pissutigalugu ilumoorfiginninnerminnullu ersiutitut ullumikkut naggatissap nalaani Kristusip ’qatanngutai’ tanitat nunarsuarmiittut asannittumik tapersersorpaat. — Matthæusi 25:40.

17. Siulersuisoqatigiit qanoq iliornissartik pisariaqartutut isigaat, apeqqullu suna allaaserisami tulliuttumi sammineqassava?

¹⁷ Tanitat ikiliartoramik Kristusip pigisaasa isumagilluarneqarnerat qulakkeerniarlugu ilagiit tamaasa najorsinnaanngilaat. Taamaattumik Siulersuisoqatigiit angutinik savanut allanut ilaasunik Jehovap Nalunaajaasuisa immikkoortortaqarfiini, nunat immikkoortuini, ilageeqatigiinni ilagiinnilu nakkutilliisutut kiffartortunngortitsisarput. Kristusip paarsisuutitaanut taakkununnga isiginnittaaserput Kristusimut taassumalu inussiaataanut ilumoortumut ilumoorfiginninnitsinnut sunniuteqarpa? Allaaserisami tulliuttumi tamanna sammineqassaaq.

[Quppernerup ataani ilanngussat]

Uteqqiineq

• Kina Siulersortigaarput, sumilu erserpa pissutsit ilagiit ataasiakkaat atugaasa qanoq innerat nalunngikkaa?

• ’Naalaffik’ misissuiffigineqarmat inussiaq ilumoortoq kinaava, pigisallu taakkununnga paarisassanngortinneqartut suuppat?

• Inussiaqatigiinnik ilumoorfiginnilluni tapersersuinissamut pissutissat Biibilimeersut suuppat?

[Atuaqqissaarnermi apeqqutit]

[Qupp. 14-mi assiliartat]

Kristusip pigisaanut, ’inussiallu’ nakkutigisaanut, ilaapput timikkut pigisat, anersaakkut ittunik ilinniartitsissutiginninneq oqaluussinerlu

[Qupp. 16-mi assiliartaq]

’Savanut allanut’ ilaasut inussiaqatigiit ilumoortut tapersersorpaat aallussilluarlutik oqaluussinermikkut