Paarsisunut asannittunut maniguuttuugit pitseriartuullutit!

„Siulersortisi naalassigit peqqusaallu maleruarlugit [pitseriartuugitsilu, NV].“ — HEBRÆERIT 13:17.

1, 2. Allassimaffinni sorlerni erserpa Jehova Jiisusilu paarsisuusut asannittut?

JEHOVA GUUTI taassumalu ernera, Jiisusi Kristusi, paarsisuupput asannittut. Esaja ima siulittuivoq: „Guuti Naalagaq aggerpoq pissarsuulluni, taliminik naalakkersuivoq . . . Savaatini paarsisutut paarai, talerminik katersorpai; savaaqqat pakkuppai, savallu miluttunik piarallit siulersorlugit [qajassuullugit siulersorlugit, NV].“ — Esaja 40:10, 11.

² Pilersitseqqinnissamik siulittuut taanna siullermik eqquuppoq juutit kinguleruttut ukiumi 537-mi u.n.s. Judamut utermata. (2 Nalunaarsuutit 36:22, 23) Tamannalu eqquuteqqippoq Kyrosip annerup, tassa Jiisusi Kristusip, tanitat kinguleruttut 1919-imi ’Babylonersuarmit’ aniguisimmagit. (Saqqummersitat 18:2; Esaja 44:28) Taanna Jehovap ’taleraa’, tassa naalakkersuisuutippaa, savanik katersitippaa taakkununngalu paarsisuutillugu isumassuisoq. Jiisusi nammineq ima oqarpoq: „Uanga tassaavunga savanik paarsisoq ajunngitsoq. Savaatikka ilisimavakka, savaatimalu ilisimavaannga.“ — Johannesi 10:14.

3. Jehovap savaatimi qanoq pineqarnerannik asannilluni soqutiginninnini qanoq ersersippaa?

³ Siulittuummi Esaja 40:10, 11-miittumi erseqqissarneqarpoq Jehova innuttaminik paarsisutut qanoq isumassuitigalunilu qajassuussitigisoq. (Tussiaat 23:1-6) Jiisusi aamma nunarsuarmi kiffartornermini ajoqersukkaminik inunnillu allanik asannilluni isumassuivoq. (Matthæusi 11:28-30; Markusi 6:34) Jehovallu Jiisusillu naakkittaatsuuneq sukannersuunerlu, Israelimi paarsisut, imaluunniit siuttut, savaatiminnik kannguttaallutik sumiginnaallutillu atornerluisut ilisarnaatigisaat, assuaraat. (Ezekieli 34:2-10; Matthæusi 23:3, 4, 15) Jehova ima neriorsuivoq: „Savaatikka ikiussavakka ujajagassatut pineqassaarsillugit, eqqartuussissaangalu savaatit akornanni. Paarsisussaq ataasiinnaq taakkununnga ivertissavara, tassa kiffara Daavi; taassuma paarissavai, isumassortigalugulu paarsisigissavaat.“ (Ezekieli 34:22, 23) Ullumikkut naggatissap nalaani Jiisusi Kristusi, Daavi anneq, Jehovap kiffaminut nunarsuarmiittunut tamanut, kristumiunut tanitanut ’savanullu allanut’, paarsisunngortitaraa. — Johannesi 10:16.

Ilagiinnut Jehovamit tunissutit

4, 5. (a) Jehovap innuttani nunarsuarmiittut erlinnartumik sumik tunissuteqarfigai? (b) Jiisusip ilagiissini sunik tunissuteqarfigai?

⁴ Jehovap ’ataasiinnarmik’ — tassa Jiisusi  Kristusimik — kiffaminut nunarsuarmiittunut ’paarsisussanngortitsinermigut’ ilagiit kristumiut erlinnartumik tunissuteqarfigai. Siulersuisoq qilammiusoq tunissutaasoq taanna Esaja 55:4-mi ima siulittuutigineqarpoq: „Taanna inuiaqatigiinnut nalunaajaasunngortippara inuianni naalagaaninngortikkakku naalaganngortillugulu.“ Kristumiut tanitat ’amerlangaartunullu’ ilaasut inuiaqatigiinnit naggueqatigiinnillu inuiannillu immikkullu oqaasilinnit tamanit katersorneqarput. (Saqqummersitat 5:9, 10; 7:9) Taakku silarsuaq tamakkerlugu ilagiiupput, „savaatit katersat ataatsit“ ’paarsisumit ataatsimit’, Jiisusi Kristusimit, siulersorneqartut.

⁵ Jiisusittaaq ilagiissini nunarsuarmiittut erlinnartumik tunissuteqarfigai. Taassuma isumagisimavaa aalajaatsunik, savaatinik isumassuingaarnermikkut imminik Jehovamillu ilaarsisunik, paarsisoqarnissaa. Apustili Paulusip asannittumik tunissutigineqartut taakku kristumiunut Efesosimiittunut allakkamini eqqaavai. Ima allappoq: „’Qutsissumut qullarpoq, tiguakkat aallaruppai, inuit tunissuteqarfigai [tunisivorlu inunnik tunissutaasunik, NV].’ . . . Taassumalu ilaat apustilinngortippai, allat pruffiitinngortillugit, allat iivangkiiliulersaartunngortillugit allallu paarsisunngortillugit ajoqersuisunngortillugillu, illernartut piukkunnarsarumallugit kiffartortuunissamut Kristusip timaa ineriartortinneqassammat.“ — Efesosimiut 4:8, 11, 12.

6. Nakkutilliisut tanitat utoqqaanertaqatigiinni kiffartortut qanoq eqqartorneqarpat, utoqqaanertallu toqqakkat savanut allanut ilaasut qanoq oqaatigineqarsinnaappat?

⁶ ’Inuit tunissutaasut’ taakku nakkutilliisuupput, imaluunniit utoqqaanertaapput, anersaaq illernartoq aqqutigalugu Jehovamit erneranillu savanik asannillutik isumassuisussanngortitaasimasut. (Apustilit Suliaat 20:28, 29, NV) Aallaqqaammut nakkutilliisut taakkua tamarmik angutaapput kristumiut tanitat. Saqqummersitat 1:16, 20-mi tanitat ilagiissaanni utoqqaanertaqatigiit ’ullorissatut’ imaluunniit ’inngilitut’ Kristusip talerpianiittutut, tassa taassumannga oqartussaaffigineqarlutillu siulersorneqartutut, eqqartorneqarput. Ullumikkulli naggatissap nalaani, nakkutilliisut tanitat nunarsuarmiittut ikiliartuinnarfianni, ilagiinni utoqqaanertaasut kristumiut amerlanersaat savanut allanut ilaapput. Taakku Siulersuisoqatigiinnut sinniisuusunit anersaap illernartup siulersuineratigut toqqarneqarsimammata, taakkuttaaq paarsisuulluartup, Jiisusi Kristusip, talerpianiittutut, tassa taassumannga siulersorneqartutut, oqaatigineqarsinnaapput. (Esaja 61:5, 6) Utoqqaanertat ilagiitsinniittut Kristusimut, ilagiinnut niaquusumut, naalatsigitimmata uagut tamakkiisumik suleqatigisariaqarpavut. — Kolossemiut 1:18.

Naalattuullutillu pitseriartuugit

7. Nakkutilliisunut kristumiunut isiginnittaatsitsinnut tunngatillugu apustili Paulusip suna siunnersuutigaa?

⁷ Paarsisitta qilammiusut, Jehova Guutip Jiisusillu Kristusip, naalattuunissarput paarsisuutitaminnullu ilagiinni akisussaatitaasunut naalatsigitinnissarput piumasaraat. (1 Petrusi 5:5) Apustili Paulusi isumassarsisitaalluni ima allappoq: „Eqqarsaatiginiarsigit siulersortisi Guutip oqaasiinik  ilissinnut oqalussimasut, inuunerisalu naggatissaat eqqarsaatigisiuk [iliuusiisa kinguneri maluginiaqqissaartarlugit, NV] uppersuseqarnerisigullu assiginiarlugit. Siulersortisi naalassigit peqqusaallu maleruarlugit [pitseriartuugitsilu, NV], taakkuami tarnisi pigaappaat nalunnginnamikku taakku pillugit akisussaatitaajumaarlutik. Taamaaliorsinnaalit nuannaarlutik anersaarulunnatilli; taamaanngippammi ilissi tamanna atugarliuutigissavarsi.“ — Hebræerit 13:7, 17.

8. Paulusip suna ’maluginiaqqissaaqqullugu’ kajumissaarpaatigut, aamma sooq ’naalattuusariaqarpugut’?

⁸ Maluginiaruk Paulusip kajumissaarmatigut utoqqaanertat iliuusiisa kinguneri ’maluginiaqqissaartaqqullugit’ uppernerannillu ilaarseqqulluta. Aammattaaq siunnersorpaatigut angutinut toqqakkanut taakkununnga naalattuussasugut pitseriartuulluta. Biibilimik misissueqqissaartartoq R.T. France nassuiaavoq grækerit oqaasiata matumani „naalassigit“-mik nutserneqartup nagguia tassaanngitsoq „oqaaseq naalanneq pillugu nalinginnaasumik atorneqartartoq; isumavia tassaavoq ’qularutiginninnginneq imaluunniit qularunnaarsinneqarneq’, taakkua siulersuinerannik kajumilluni akuerinninnermik kinguneqartartoq“. Utoqqaanertat naalattarpavut Guutip oqaasiani taamatut peqquneqarnerput pissutigiinnarnagu, aammali Guutip naalagaaffiata soqutigisaanik uagullu soqutigisatsinnik soqutiginninnerat qularutiginnginnatsigu. Taakkua siulersuinerat kajumilluta akuerigutsigu tamanna iluaqutigissavarput.

9. Sooq naalattuuinnarnata aammattaaq ’pitseriartuunissarput’ pisariaqarpa?

⁹ Taavami pisumi aalajangersimasumi utoqqaanertat unnersuussutaannik maleruaanissap silatusaarnerpaajunissaa qularutigigutsigu? Taamaattoqartillugu pitseriartuunissaq pisariaqarpoq. Suut tamarmik paasinaraangata unnersuussutigineqartullu isumaqataaffigigaangatsigit naalannissaq ajornartanngilaq. Ilumulli pitseriartuulluta ersersissavarput siunnersuutigineqartoq paasilluanngikkaluarlutigu unnersuunneqarnitsitut iliorutta. Petrusip, kingusinnerusukkut apustilinngortup, ersersippaa taamatut isiginnittaaseqarluni. — Lukasi 5:4, 5.

Kajumilluni suleqataanissamut pissutissat sisamat

10, 11. Ukiuni hundredelinni siullerni ullumikkullu nakkutilliisut kristumioqatiminnut ’Guutip oqaasiinik oqalussimanerat’ qanoq paasisariaqarpa?

¹⁰ Hebræerinut allakkat 13:7, 17-imi, siuliani issuarneqartumi, apustili Paulusip nakkutilliisunut kristumiunut naalattuusariaqarnitsinnut pitseriartuusariaqarnitsinnullu pissutissat sisamat eqqaavai. Siulleq tassaavoq taakku ’Guutip oqaasiinik uagutsinnut oqalunnerat’. Eqqaamajuk Jiisusip ’inuit tunissutaasut’ taakkua tunniukkai „illernartut piukkunnarsarumallugit“. (Efesosimiut 4:11, 12) Taassuma ukiuni hundredelinni siullerni kristumiut piukkunnarsarpai eqqarsartaasiannik pissusilersornerannillu naqqiisarnermigut. Naqqittarpai paarsisuutitat aalajaatsut ikiortigalugit, taakkualu ilaat ilagiinnut allannissaminnut isumassarsisitaapput. Nakkutilliisut tanitat taakkunatut ittut kristumiunik siullernik siulersuinissamut ineriartortitsinissamullu atorpai. — 1 Korinthimiut 16:15-18; 2 Timotheusi 2:2; Titusi 1:5.

¹¹ Ullumikkut Jiisusip „kiffaq ilumoortoq silatoorlu“, Siulersuisoqatigiinnik utoqqaanertanillu toqqakkanik sinniiseqartoq, ikiortigalugu siulersorpaatigut. (Matthæusi 24:45) „Savaatinut paarsisuunerpaaq“, Jiisusi Kristusi, ataqqigatsigu Paulusip siunnersuutaa una malipparput: ’Ilungersorlutik akornassinni sulisut Naalakkamilu akornassinni siulersuisut ilitsersuisuusullu qujamasuutigisigit.’ — 1 Petrusi 5:4; 1 Thessalonikamiut 5:12; 1 Timotheusi 5:17.

12. Nakkutilliisut tarnitsinnik pigaassinerat qanoq paasisariaqarpa?

¹² Nakkutilliisunik kristumiunik suleqatiginninnissamut pissutaasut aappaat tassaavoq taakku uagut ’tarnitsinnik pigaassinerat’. Isiginnittaatsitsinni pissusilersornitsinniluunniit anersaakkut peqqissutsitsinnik navianartorsiortitsisinnaasumik paasisaqarunik pisariaqartumik siunnersupallattarpaatigut piukkunnarsarnissarput siunertaralugu. (Galatiamiut 6:1) Grækerit oqaasiat „pigaappaat“-mik nutserneqartoq toqqaannartumik nutserlugu isumaqarpoq „sinissaarupput“-mik, „sininnaveersaarput“-mik. Biibilimik misissueqqissaartartoq naapertorlugu „savanik paarsisup qasusuilluni eqqumanera  pineqarpoq“. Utoqqaanertat qasusuillutik anersaakkut eqqumajuarnermik saniatigut, uagut anersaakkut peqqissuserput isumakuluutigalugu sinissaarussinnaasarput. Paarsisuutitat asannittut taakku, ’savaatinik paarsisuunerusup’, Jiisusi Kristusip, qajassuussilluni isumassuineranik ilaarsiniarlutik sapinngisartik tamaat iliuuseqartut, kajumilluta suleqatigiumasariaqarpavut, ilaa? — Hebræerit 13:20.

13. Nakkutilliisut kristumiullu allat tamarmik kimit aamma suna pillugu akisussaatinneqassappat?

¹³ Nakkutilliisunik kajumilluta suleqatiginnittariaqarnitsinnut pissutaasut pingajuat tassaavoq ’akisussaatitaasussatut’ uagutsinnik pigaassinerat. Nakkutilliisut nalunngilaat paarsisuutitaallutik paarsisunit qilammiusunit, Jehova Guutimit Jiisusi Kristusimillu, siulersorneqarlutik kiffartortut. (Ezekieli 34:22-24) Jehova savanik piginnittuuvoq. „Nammineq ernermi aavanik [pissarsiarai]“, nakkutilliisullu toqqakkat akisussaatippai savaatiminik pinneriaasiat pillugu, tassalu ’qajassuartumik’ pisussaavaat. (Apustilit Suliaat 20:28, 29, NV) Taamaattumik tamatta Jehovap siunnersuutiminut qanoq periarnerput pillugu akisussaatissavaatigut. (Romamiut 14:10-12) Aamma utoqqaanertanut toqqakkanut naalannerput Kristusimut, ilagiinnut niaquusumut, naalatsigitinnitsinnut uppernarsaataavoq. — Kolossemiut 2:19.

14. Suna nakkutilliisut kristumiut kiffartornerminni ’anersaaruluttalernerannik’ kinguneqarsinnaava, tamatumalu suna kingunerissavaa?

¹⁴ Paulusip nakkutilliisunut kristumiunut maniguulluta naalatsigitittariaqarnitsinnut pissutaasut sisamaat eqqaavaa. Ima allappoq: „Taamaaliorsinnaalit nuannaarlutik anersaarulunnatilli; taamaanngippammi ilissi tamanna atugarliuutigissavarsi.“ (Hebræerit 13:17) Utoqqaanertat kristumiut ilinniartitsinermut, paarsisutut kiffartornermut, oqaluussinermi siuttuunermut, ilaquttaminnik isumaginninnermut ilagiinnilu ajornartorsiutinik aaqqiiniarnermut tunngatillugu akisussaaffeqarnerujussuartik pissutigalugu oqimaatsumik nammataqarput. (2 Korinthimiut 11:28, 29) Suleqatiginngikkutsigit nammataannik oqimaannerulersitsiinnassaagut. Tamanna ’anersaaruluutigissagaluarpaat’. Suleqataajumasanngikkutta tamanna Jehovap iluarinavianngilaa, tamannalu uagutsinnut ajoqutaalersinnaavoq. Ataqqineqartariaqarnerattulli ataqqigutsigik kajumillutalu suleqatigigutsigik, utoqqaanertat  akisussaaffitik nuannaarlutik naammassisinnaavaat, tamannalu ataasiussuseqalersitseqataassaaq Guutillu naalagaaffianik oqaluussissutiginninnermik pingaarnerpaatitsinissamut ilagiinniittunut tamanut iluaqutaassalluni. — Romamiut 15:5, 6.

Pitseriartuunerit ersersiguk!

15. Naalattuunerput pitseriartuunerpullu qanoq ililluta ersersissinnaavarput?

¹⁵ Nakkutilliisut toqqakkat assigiinngitsorpassuartigut suleqatigisarsinnaavavut. Utoqqaanertat angalaartarfinni pissutsit allanngornerat pissutigalugu ullunik piffissanillu katersuuffiusartussanik allanik pilersaarusiorsimappat uagut sungiusimasatsinnik allannguisariaqalerluta? Taamaappat pilersaarusiat nutaat tapersersorniarlugit iliuuseqarniarta. Tamanna ilimaginngisaraluamik pilluaqqussutisinermik kinguneqarsinnaavoq. Kiffartornermik nakkutilliisoq atuakkamik atuaqqissaaqatigiittarfitsinnut pulaarpa? Sapaatip-akunnerani tamatumani sapinngisarput tamaat oqaluusseqataasa. Teokratiimik Ilinniarfimmi saqqummiussassinneqarpugut? Najuunniarluta saqqummiussiniarlutalu sapinngisarput tamaat iliuuseqartariaqarpugut. Atuakkamik atuaqqissaaqatigiinnitsinni nakkutilliisup nalunaarutigisimavaa naalagaaffilersaarfimmi asaasussaasugut? Tamakkiisumik tapersersortigu, peqqissuserput qanorlu nukissaqartiginerput apeqqutaatillugu. Tamakkunuunatigut allarpassuartigullu angutinut, Jehovap taassumalu ernerata savaatinik isumaginnittussanngortissimasaannut, naalatsigitinnerput ersersittarparput.

16. Utoqqaanertaq siunnersuutigineqartumik maleruaanngippat sooq tamanna oqaatseriitsunngornissatsinnut patsisiginiarneqarsinnaanngila?

¹⁶ Immaqa ilaannikkut utoqqaanertaq inussiaqatigiit aalajaatsut taakkualu Siulersuisoqatigiivisa unnersuussutaannik maleruaaneq ajorpoq. Taamatut piuarpat Jehovamit ’tarnitsinnik paarsisuusumit nakkutilliisuusumillu’ akisussaatinneqassaaq. (1 Petrusi 2:25) Utoqqaanertalli ilaat sunilluunniit kukkussuteqaraluarpata, tamanna oqaatseriitsunngornissatsinnut patsisiginiarneqanngisaannassaaq. Jehova naalannginnermik pikitsitsinermillu pilluaqqusineq ajorpoq. — 4 Mosesi 12:1, 2, 9-11.

Kajumilluta suleqataagaangatta Jehova uagutsinnik pilluaqqusisarpoq

17. Uagutsinnik nakkutilliisuutitaasunut qanoq isiginnittaaseqartariaqarpugut?

¹⁷ Jehova Guutip nalunngilaa angutit nakkutilliisunngortitani naammalluinnanngitsuusut. Taamaakkaluartorli atorpai, innuttanilu nunarsuarmiittut anersaaminik siulersorpai. ’Pissaanerup asseqanngitsup uatsinnit pinnani Guutimit pisuunera’ utoqqaanertanut — aamma tamatsinnut — atuuppoq. (2 Korinthimiut 4:7) Taamaattumik Jehova qutsavigisariaqarparput nakkutilliisuvut aalajaatsut atorlugit naammassisai pillugit, aamma suleqataajumassuseqartariaqarpugut.

18. Nakkutilliisutsinnut naalatsigitinnerput sumut ersiutaava?

¹⁸ Nakkutilliisut sapinngisartik tamaat iliuuseqarput Jehovap ulluni kingullerni savaatiminut paarsisunngortitaasut ima oqaatigisaatut ikkumallutik: „Paarsisoqartikkumaarpassi uummamma iluarisaanik, taakkualu paarissavaasi ilisimannillutik paasisimannillutillu [inuussutissanik ilisimassusiusumik siuneqarsusiusumillu tunissavaasi, NV].“ (Jeremia 3:15) Qularnanngilluinnarpoq utoqqaanertat ilagiitsinniittut ilinniartitsiniarlutik Jehovallu savaataanik illersuiniarlutik nersortarialimmik iliuuseqartut. Taakkua iliuuserisaannik qujamasuutiginninnerput ersersittuartigu, kajumilluta suleqatiginerisigut aamma naalattuunitsigut pitseriartuunitsigullu. Taamaaliornerput paarsisunut qilammiusunut, Jehova Guutimut Jiisusi Kristusimullu, qujamasunnitsinnut ersiutaassaaq. (wE 4/1 07)

Uteqqiineq

• Jehovap aamma Jiisusi Kristusip qanoq ersersippaat paarsisuullutik asannittut?

• Naalattuuinnarnani aammattaarli pitseriartuunissaq sooq pisariaqarpa?

• Qanoq ersersissinnaavarput pitseriartuulluta?

[Atuaqqissaarnermi apeqqutit]

[Qupp. 18-mi assiliartaq]

Utoqqaanertat kristumiut Kristusip siulersuineranut naalatsigitipput

[Qupp. 20-mi assiliartat]

Jehovap paarsisunngortitaanut naalatsigitinnerput assigiinngitsorpassuartigut ersersissinnaavarput