Upperisamut ilumoortumut ilisarnaataasoq

UPPERISARSIORTUT amerlanersaasa ajoqersuutitik Guutimeersuunerartarpaat. Taamaattumik Jiisusip apustiliata Johannesip siunnersuutaa una malikkaanni silatusaarnerussaaq: „Asasakka, anersaat [oqaatsit isumassarsiarititaasut, NV] suulluunniit upperiinnaqinasigit, misilissigilli anersaat [oqaatsit isumassarsiarititaasut, NV] Guutimit pisuunersut, pruffiitioqqusersummi amerlaqisut silarsuarmut aallarsimammata.“ (1 Johannesi 4:1) Sunaluunniit Guutimeersuunersoq qanoq ’misilissinnaavarput’?

Guutimeersut tamarmik, taassuma kinaassusianik, ingammik pissusianik malunnarnerpaamik, asanninnermik, ersersitsisarput. Assersuutigalugu naatitat, naasut iffiukkalluunniit qalarlaap tikkanik naamasinnaasaqarnerput Guutip asanninneranut ersiutaavoq. Seqernup tarrilerneranik, pakkaluamik meerannguulluunniit qungujulaneranik takusaqarsinnaanerput Guutip uagutsinnik asanninneranik ersersitsivoq. Taamaapportaaq nipilersuummik nuannersumik, timmissap qitivinneranik, ikinngutilluunniit asasap nipaanik tusaasaqarsinnaaneq. Allaammi inuttut pissusivut, naammalluinnanngitsuugaluartut, Guutip asanninneranut ersiutaapput. Taamaammat Jiisusip oqaasiisa uku ilumoornerat misigisarparput: „Tunisineq pilluarnarneruvoq tigusinermit.“ (Apustilit Suliaat 20:35) ’Guuti assilillugu pinngortitaagatta’ asanninnermik ersersitsineq nuannaraarput. (1 Mosesi 1:27) Jehovap, pissusii amerlagaluartut, kinaassusiani asanninneq malunnarnerpaavoq.

Allakkat Guutimeersut taassuma asanninneranik ersersitsisariaqarput. Silarsuarmi upperisarsiortut allagatoqqanik amerlasuunik peqarput. Allakkat taamaattut Guutip asanninneranik qanoq ersersitsitigaat?

Ilumoortoq unaavoq upperisarsiornikkut allagatoqqat amerlanersaanni Guutip uagutsinnik asanninnera, uagulluunniit Guutimut asanninnitsinnik qanoq ersersitsisinnaanerput, eqqartorneqarpianngilaq. Taamaammat inuit millionilikkuutaat akineqarneq ajorput ima aperigaangamik: „Naak Guutip asannittuuneranut pinngortitarsuarmi uppernarsaatissaqaraluartoq sooq naalliunnartut ajussuserlu atuuttuarpat?“ Allakkani pisoqqani Biibili kisiartaavoq Guutip asanninneranik sukumiisumik allaaserinniffiusoq. Tassani aamma ilinniartinneqarpugut nammineq qanoq asannittuliorsinnaanersugut.

Atuagaq asanninnermik ersersitsisoq

Guutip oqaasiani, Biibilimi, erserpoq Jehova ’Guutiusoq asannittoq’. (2 Korinthimiut 13:11) Biibilimi allaaserineqarpoq Jehovap asanninneq kajumississutigalugu inuit siulliit marluk nappaammik toqumillu atugaqartinnagit inunngortikkai. Guutilli oqartussaaneranut pikitsitsineq inuiaat naalliunnerannik kinguneqarpoq. (5 Mosesi 32:4, 5; Romamiut 5:12)  Annaaneqarsimasorli pilerseqqinniarlugu Jehova iliuuseqarpoq. Oqaasiani ima allassimavoq: „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi 3:16) Allakkani Illernartuni Guutip asanninnera pillugu amerlanerusunik paasissutissaqarpoq taakkunani allassimagami Guuti qanoq ililluni inuiaat naalattut iluaqutissaannik eqqisseqatigiissitseqqittussanik naalakkersuisunik naammalluinnartunik Jiisusi Kristusimik siulersuisoqartunik pilersitsisoq. — Danieli 7:13, 14; 2 Petrusi 3:13.

Pisussaaffivut suunersut Biibilimi ima eqikkarneqarput: „’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu, aappaatali taamaaqatigaa: ’Tullit ilittut asassavat.’ Inatsisit tamarmik pruffiitillu allagaasa inassutit taakkua marluk tunngavigaat.“ (Matthæusi 22:37-40) Biibilimi allassimavoq Biibili Guutimit isumassarsiarititaasoq. Tassani Guutip kinaassusia erseqqissumik ersersinneqarmat qularutigisariaqanngilarput asanninnerup Guutianit pilerfeqartoq. — 2 Timotheusi 3:16.

Najoqqutassaq ataaseq taanna tunngavigalugu paasilluarsinnaavarput allagatoqqat sorliit Guutimeersuunersut. Aammattaaq pallorfiginnittut ilumoortut asanninneq ilisarnaatigaat, asannittuliornikkut Guuti ilaaramikku.

Asanninneq qanoq ersersinneqartartoq

Kia Guuti asavinneraa takulertornarpoq ingammik maanna Biibilimi ’ullussanik kingullernik’ taaneqartuni inuutilluta. Inuit ’namminissarsiornerujartuinnarput, aningaaseritunerujartuinnarput . . . inuulluarniutillu Guutimit pingaartinnerujartuinnarpaat’. — 2 Timotheusi 3:1-4.

Guutimik asannittut suna ilisarnaatigaat? Biibilimi ima allassimavoq: „Guutimut asanninneq tassaavoq inassutai maleruaratsigit.“ (1 Johannesi 5:3) Guutimut asanninnerput ileqqussatigut najoqqutassianik Biibilimiittunik ataqqinninnissatsinnut kajumississutigisarparput. Assersuutigalugu Guutip oqaasiani atoqatigiinneq aappariinnerlu pillugit inatsiseqarpoq. Aappariit katissimasut kisimik atoqatigiissinnaapput, aappariinnerlu ataavartuusussaavoq. (Matthæusi 19:9; Hebræerit 13:4) Arnap Spaniami teologiimik ilinniartup Jehovap Nalunaajaasuisa ataatsimiinnerat Biibilimi ileqqussatigut najoqqutassiat pillugit uummaarissumik eqqartuiffiusoq najuuffigereerlugu ima oqarpoq: „Ataatsimiinneq pissarsivigaara oqalugiaatit Biibilimik tunngaveqartut pissutigiinnarnagit, aammali inuit taakkua ataasiussuseqarnerat, qutsissunik ileqqussatigut najoqqutaqarnerat pissuserissuunerallu pissutigalugit.“

Guutimut asanninnermik saniatigut kristumiut ilumoortut tullerminnut asannittuliornertik ilisarnaatigisussaavaat. Pingaarnerpaatut suliassaat tassaavoq inuiaat neriuutissatuaat, Guutip naalagaaffia, pillugu allanik oqaloqateqarnissaq. (Matthæusi 24:14) Inoqatip Guutimik ilisimasaqalernissaanik ikiuinermit allamik iluaqutaanerusoqanngilaq. (Johannesi 17:3) Kristumiut ilumoortut allatigut aamma asannittuliortarput. Inuit annikilliortut atortussatigut ikiortarpaat. Italiami nunap sajunnerani ajunaarnersuaqarmat taqqavani aviisimi Jehovap Nalunaajaasui allaaserineqarput ’silatusaartumik suleriaaseqartutut ajoqusersimasunillu, qanoq upperisaqarnerat eqqarsaatiginagu, ikiuiumasutut’.

Guutimut tullermullu asanninnermik ersersitsinerup saniatigut aamma asaqatigiipput. Jiisusi ima oqarpoq: „Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ — Johannesi 13:34, 35.

Kristumiut ilumoortut asaqatigiinnerat maluginiarnartumik allaanerua? Taama isumaqarpoq arnaq illumi kiffaasoq Ema. La Pazimi, Boliviami, inuiaassutsikkut assigiinngissutit pisuunik piitsunillu avissaartuutsitsiffiugajuttumi, sulivoq. Ima oqarpoq: „Siullerpaamik Jehovap Nalunaajaasuisa ataatsimiinnerannut najuukkama takuara angutip atisarissaartup arnaq indianeri oqaluukkaa. Aatsaat taamaattumik takuvunga. Ingerlaannaq paasivara Guutip innuttarisimassagai.“ Arnaq inuusuttoq Brasiliamiu Miriamimik atilik ima oqarpoq: „Misigissuseq nuannaarneq nalugaluarpara, ilaquttakkaluunniit ilagigaluaraangakkit. Iliuutsikkut asannittuliortoqarnera siullerpaamik  takuara Jehovap Nalunaajaasuisa akornanni.“ USA-mi tv-mi nutaarsiassanut ittuusoq Jehovap Nalunaajaasuinut ima allappoq: „Inuit amerlanerit upperisarsi malillugu inuugaluarpata, inuiaqatigiit ullumikkutut innavianngikkaluarput. Tusagassiortuuvunga, nalunngilaralu peqatigiiffissi asanninnermik Pinngortitsisumullu upperluarnermik tunngaveqartoq.“

Upperisaq ilumoortoq ujaruk

Asanninneq upperisami ilumoortumi allaassutaavoq. Jiisusip upperisamik ilumoortumik nanisineq aqqummik eqqortumik nanisinermut tassuunaqquunniarlunilu aalajangernermut assersuuppaa. Inuunermut naassaanngitsumut aqqutituaavoq. Jiisusi ima oqarpoq: „Isaaffikkut nerukitsukkut iseritsi; nerutoqaarmi tammarfimmut isaaffik tassungalu aqqutaa sileqaluni; amerlaqaallu tassuuna isaasut. Nerukeqaarli inuussummut isaaffik tassungalu aqqutaa ameqaluni; ikittuinnaappullu taassuminnga nanisisut!“ (Matthæusi 7:13, 14) Kristumiut ilumoortut eqimattat ataasiinnaat Guuti ataasioqatigalugu pallorfiginninnerup ilumoortup aqqutaatigoorput. Taamaattumik upperisamik sorlermik toqqaanerit pingaaruteqarpoq. ’Aqqut amitsoq’ nanigukku tassuunaqquunniarlutillu aalajangeruit inooriaaseq pitsaanerpaaq, asanninnerup aqqutaa, nanisimassavat. — Efesosimiut 4:1-4.

Pallorfiginninnerup ilumoortup aqqutaatigoornerit qanoq nuannaarutigisinnaanerit takorlooruk. Guutimik saqeqateqarnertut ippoq. Ilisimassuseqarneq asannittuliorsinnaanerlu Guutimit ilinniarsinnaavatit allanut ajunngitsumik attaveqarsinnaalerlutit. Taassumannga inuunerup siunertaa ilinniarsinnaavat, Guutillu neriorsuutai paasisinnaavatit siunissamut neriuuteqalerlutit. Upperisamik ilumoortumik toqqaanerit peqqissimissutiginngisaannassavat. (wE 3/1 07)

[Qupp. 5-mi assiliartaq]

Allagatoqqat upperisarsiornermut tunngasut amerlaqaat, Biibilimiinnarli Guutip asanninnera allaaserineqarpoq

[Qupp. 7-mi assiliartaq]

Kristumiut ilumoortut asanninnertik ilisarnaatigaat