Alloriartarnitit Guutip oqaasianit siulersorneqartikkit

„Oqaatsitit naneruaraakka isikkannut, qaammaqqutigalugillu aqqutinni.“ — TUSSIAAT 119:105.

1, 2. Sooq inuit amerlanersaasa eqqissineq pilluarnerlu piviusoq nassaarinngitsoortarpaat?

ILLIT sukkuussanerlutit aperisariaqalerninnik eqqaamasaqarpit? Immaqa ornitat tikingajalerpat, aqqutissavilli sinnera nalornissutigivat. Imaluunniit imaassinnaavoq tammartajaartutit allarluinnakkullu ingerlasariaqalerlutit. Qanorluunniilli ikkaluarpat, ingerlaviginiakkannik eqqaanillu ilisimannilluartup ilitsersuussutaanik malinninnissaq silatusaarnerussaaq, ilaa? Inuup ilisimannilluartup ornitannut apuunnissannut ikiorsinnaassavaatit.

² Ukiuni tusindilinni inuit amerlanersaat Guutimit ikiorneqaratik inuuniarsarisimapput. Inuilli naammalluinnanngitsut nammineerunik ’tammartajaassapput’. Tassa eqqissinermut pilluarnermullu piviusumut aqqut nassaarisinnaanngilaat. Sooq anguniakkamik tamatuminnga angusisinnaasimanngillat? Ukiut 2500-t sinnerlugit matuma siorna pruffiiti Jeremia ima allappoq: „Ingerlasup alloriartarnini aqussinnaanngilai.“ (Jeremia 10:23, NV) Inuk kinaluunniit paasisimannittumit ikiorneqarani alloriartarnerminik nammineq aqutsiniartoq pinngitsoorani pakatsissaaq. Inuit ilitsersuunneqarnissartik pisariaqartilluinnarpaat!

3. Sooq Jehova Guuti inunnik ilitsersuillaqqinnerpaava, aamma suna neriorsuutigaa?

³ Jehova Guuti taamatut ilitsersuillaqqinnerpaavoq. Sooq? Inuit pissusiinik allanit tamanit paasinnilluarnerugami. Aamma nalunngilluinnarpaa inuiaat qanoq ilillutik tammarsimasut. Aamma nalunngilaa inuit eqqortumik ingerlaleqqissaannut suut pisariaqarnersut. Aammattaaq Jehovap Pinngortitsisuugami ilisimajuaannarpaa uagutsinnut suna pitsaanerpaanersoq. (Esaja 48:17) Taamaattumik taassuma neriorsuutaa Tussiaat 32:8-mi allanneqarsimasoq upperilluinnarsinnaavarput: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ Qularutissaanngilaq Jehovap pitsaanerpaamik ilitsersortaraatigut. Qanorli ilitsersortarpaatigut?

4, 5. Guutip oqaaserisaasa qanoq siulersorsinnaavaatigut?

⁴ Tussiaasiortoq Jehovamut qinunermini ima oqarpoq: „Oqaatsitit naneruaraakka isikkannut, qaammaqqutigalugillu aqqutinni.“ (Tussiaat 119:105) Guutip oqaaserisai oqaaqqissaarutaalu Biibilimiipput, taakkualu inuunitsinni akornutissat nalaassinnaasatta anigorniarnissaannut iluaqutigisinnaavavut. Aap, Biibili atuaraangatsigu tamatumunngalu siulersortikkaangatta Esaja 30:21-mi allaatigineqartoq nammineq misigisarparput: „Nammineq siutinnik tusassavat tununnit oqaaseq: ’Aajuna aqqusineq, taanna ingerlavigissavarsi!’“

⁵ Maluginiariarulli Tussiaat 119:105-imi Guutip oqaasiata sunniuteqariaasiisa marluk assigiipajaartut erseqqissarneqarnerat. Siullermik, isikkatsinnut naneruatut ippoq. Ulluinnarni unamminiagaqarlutalu ajornartorsiuteqaraangatta najoqqutassiat Biibilimiittut alloriartarnitsinnik siulersuissapput, taamaalillutalu isumatusaartumik aalajangiisassaagut silarsuullu matuma napiaaniutai ingalassimassallugit. Aappassaanik, Guutip oqaaqqissaarutai aqqutitsinnik qaammarsaapput, aamma paratiisimi Guutip neriorsuutigisaani naassaanngitsumik inuunissamik neriuutitsinnut naapertuuttumik aalajangiisarnissatsinnut iluaqutigaavut. Aqqutissarput qaammarsagaalluarpat toraakkamut aalajangersimasumukarneq ajunngitsumik ajortumilluunniit kinguneqassanersoq nalilersinnaassavarput. (Romamiut 14:21; 1 Timotheusi 6:9; Saqqummersitat 22:12) Sukumiinerusumik misissoriartigu Guutip oqaaserisai  Biibilimiittut qanoq ilillutik isikkatsinnut naneruaallutillu aqqutitsinnut qaammaqqutaasinnaanersut.

’Naneruaq isikkannut’

6. Pissutsini qanoq ittuni Guutip oqaaserisai isikkatsinnut naneruaasinnaappat?

⁶ Ullut tamaasa aalajangigaqartarpugut. Aalajangigassat ilaat allanut naleqqiullugit soorpiartanngillat, ilaannikkulli ileqqussatigut, unneqqarissutsikkut kalluunnaveersaartuunikkullu misilinneqaatigisatsinnik nalaataqartarsinnaavugut. Taamatut misilinneqarnerit anigorsinnaajumallugit ’piginnaassutsitta atortuinnarnerisigut sungiussisariaqarpugut ajunngitsumik ajortumillu immikkoortitsisinnaalerluta’. (Hebræerit 5:14) Guutip oqaasia pillugu eqqorluartumik ilisimasaqalernitsigut najoqqutassianillu Biibilimiittunik paasinnilluarnitsigut nalunngeqatiginnissuterput sungiusartarparput Jehovamut nuannaarutaasumik aalajangiisarniassagatta. — Ussatit 3:21.

7. Oqaluttuariuk pissutsini qanoq ittuni kristumiu sunngiffimmini suleqatiminik uppinngitsunik peqateqarusulersinnaasoq.

⁷ Assersuuteqariarta. Inersimasuuit ilumoorluni Jehovap uummataanik nuannaartitsiniarsuataartoq? (Ussatit 27:11) Taamaappat nersualaarneqartariaqarputit. Takorlooriarulli suleqativit ilaasa timersorlutik unammisunut isiginnaariaqatiserigaatsit. Suliffinni ilaginissat nuannaraat aammattaaq sunngiffimmi ilagerusullutit. Immaqa taakkua inuttut ajunngitsuunerat qularutiginngilluinnarpat. Immaqa allaat imaassinnaavoq najoqqutassaalluartut malillugit inuusut. Qanoq pissavit? Ilaserinninnerannut akuersinissaq navianaateqassava? Isumatusaartumik aalajangernissannut Guutip oqaasia qanoq iluaqutigisinnaaviuk?

8. Kikkut peqatigisassanerlugit aalajangernissamut najoqqutassiat Biibilimiittut suut iluaqutigisinnaavavut?

⁸ Najoqqutassiat Biibilimeersut arlaqanngitsut eqqarsaatigeriakkit. Immaqa eqqaasat siulleq tassaavoq Korinthimiunut allakkat siulliit 15:33-miittoq: „Ikinngutipalaaqarneq ileqqorikkaluartunut aseruutissiisarpoq.“ Najoqqutassiaq taanna malinniarlugu uppinngitsunik peqateqanngilluinnartariaqarpit? Apeqqummut tamatumunnga akissut Biibilimik tunngaveqartoq naamiuvoq. Apustilimi Paulusi nammineq ’kikkunnik tamanik’, aamma uppinngitsunik, asannittumik isumassuivoq. (1 Korinthimiut 9:22) Kristumiussutsimi pingaarnersaasut tunngavigalugit piumasarineqarpoq inuit allat — aamma uppeqatiginngisavut — soqutigissagivut. (Romamiut 10:13-15) Aap, inunnit uagutsinnit ikiorneqarnissaminnik pisariaqartitsisunit avissaarsimaniarutta qanoq ililluta ’tamanut ajunngitsuliornissamik’ siunnersuut malissinnaassagatsigu? — Galatiamiut 6:10.

9. Siunnersuut Biibilimiittoq suna oqimaaqatigiissumik suleqatitsinnut attaveqarnissamut iluaqutigissavarput?

⁹ Suleqammulli inussiarnisaarneq aamma taassuminnga qanimut ikinnguteqarneq assigiinngilluinnartuupput. Matumani najoqqutassiaq Biibilimiittoq alla eqqarsaatigisariaqarpoq. Apustili Paulusip kristumiut mianersoqquai ima allalluni: „Uppinngitsut qamutinik uniaqatiginiaqinasigik.“ (2 Korinthimiut 6:14) Oqariartaaseq „qamutinik uniaqatiginiaqinasigik“ qanoq isumaqarpa? Biibilimik nutsikkat ilaanni ima nutserneqarsimavoq: „peqatigileqinagit“; „naligiittut  suleqatigiinniarsareqinasi“; aamma „naleqqutinngitsumik atassuteqarfigiunnaarsigit“. Suleqammut ikinngutinnersumik attaveqarneq qaqugukkut naleqqukkunnaartarpa? Qaqugukkut killissaq qaangerneqarlunilu qamutinik uniaqatigiittoqalertarpa? Pissutsini taama ittuni Guutip oqaasiata, Biibilip, alloriartarnitit aqussinnaavai.

10. (a) Jiisusi suut tunngavigalugit ikinngutissaminik toqqaasarpa? (b) Ikinngutinut tunngatillugu isumatusaartumik aalajangiinissamut apeqqutit suut iluaqutaasinnaappat?

¹⁰ Jiisusi, pinngortinneqarmatali inunnik nuannarinnissimasoq, ilinniarfigisinnaavarput. (Ussatit 8:31) Nunarsuarmiikkallarami ajoqersukkaminut qanimut attaveqarpoq. (Johannesi 13:1) Allaat allassimasoqarpoq taassuma angut upperisarsiornikkut tammartinneqarsimasoq ’asaleraa’. (Markusi 10:17-22) Jiisusili aamma qanimut ikinngutissaminik qinersinissaminut tunngatillugu erseqqissumik killiliivoq. Inuit Ataatami piumasaanik iliornissaminnik soqutiginnivinngitsut qanimut attaveqarfiginngilai. Ilaanni Jiisusi ima oqarpoq: „Inassutikka malillugit iliorussi tassaassaasi ikinngutikka.“ (Johannesi 15:14) Immaqa suleqatinnut aalajangersimasumut attaveqarlualersimavutit. Imminulli ima aperigit: ’Inuk taanna Jiisusip peqqusaatut iliornissaminut piumassuseqarpa? Jehova, Jiisusip uagut pallorfigisassatsitut oqaatigisaa, pillugu ilinniarnissani kissaatigaa? Taanna uanga kristumiutut ileqqussatigut najoqqutarisattut ittunik najoqqutaqarpa?’ (Matthæusi 4:10) Suleqatitit oqaloqatigigaangakkit najoqqutassianik Biibilimiittunik malinninnissat aalajangiusimasarukku, apeqqutinut taakkununnga akissutit paasinarsissapput.

11. Pissutsini qanoq ittuni alloriartarnivut Guutip oqaaserisaanit siulersorneqartariaqarpat?

¹¹ Aammattaaq pisuni allarpassuarni Guutip oqaaserisai isikkatsinnut naneruatut issinnaapput. Assersuutigalugu, kristumiu suliffissaaleqisoq immaqa suliffimmik pisariaqartilluinnakkaminik neqeroorfigineqarpoq. Suliffilli piffissartornartupilussuullunilu nukippassuarnik atuinassaaq, neqeroorullu akueriguniuk ataatsimiigianngitsoortaqattaassaaq sammisassanullu pallorfiginninnermut ilumoortumut tunngassuteqartunut allanut peqataanngitsoortassalluni. (Tussiaat 37:25) Kristumiu alla immaqa aliikkutassianik najoqqutassianut Biibilimiittunut erseqqissumik narrunarsaasunik isiginnaarnissaminut ussernartorsiortorujussuuvoq. (Efesosimiut 4:17-19) Allalu immaqa uppeqatimi naammalluinnanngissutaannik mamiatsaatiginniavoq. (Kolossemiut 3:13) Pisuni taama ittuni tamani Guutip oqaasia isikkatsinnut naneruaatittariaqarparput.  Najoqqutassianik Biibilimiittunik malinninnitsigut unamminiarnartut inuunitsinni nalaatatta qanorluunniit ittut anigorniarneranni iluatsissinnaavugut. Biibili ’iluaqutaavoq ajoqersuinermut, uppernarsaanermut, ilitsersuinermut iluarnermullu perorsaanermut’. — 2 Timotheusi 3:16.

’Aqqutinni qaammaqqutit’

12. Guutip oqaasiata aqqutitsinni qaammaqqutaanera qanoq paasisariaqarpa?

¹² Aammattaaq Tussiaat 119:105-imi allassimavoq Guutip oqaasia aqqutitsinni qaammaqqutigisinnaagipput, tassa aqqutissatsinnik qaammarsaasinnaasoq. Siunissamut tunngatillugu taartumi satsilluta ingerlanngilagut, Biibilimimi nassuiarneqarpoq silarsuarmi pissutsit alianartut qanoq isumaqarnerat pisullu qanoq kinguneqarumaarnerat. Aap, pissutsit aaqqissuussaanerata ajortup maanna atuuttup ’ulluini kingullerni’ inuulluta nalunngilarput. (2 Timotheusi 3:1-5) Siunissami qanoq pisoqarumaarneranik ilisimanninnerput maanna inooriaatsitsinnut malunnangaartumik sunniuteqartariaqarpoq. Apustili Petrusi ima allappoq: „Tamakku tamarmik suujunnaartussaammata taava tamatigut illernartuullusilu Guutimillu mianerinnillusi inuusariaqarpusi, Guutip ullussaata nalliunnissaa utaqqillugu piaarnerusumillu nalliunnissaa ilungersuutigalugu.“ — 2 Petrusi 3:11, 12.

13. Piffissap inuuffigisatta ilungersunarnera eqqarsartaatsitsinnut inooriaatsitsinnullu qanoq sunniuteqartariaqarpa?

¹³ Eqqarsartaaserput inooriaaserpullu ’silarsuup piumatussusiatalu nungujartornerannik’ qularutiginninngilluinnarnitsinnut ersiutaasariaqarput. (1 Johannesi 2:17) Biibilimi najoqqutassianik malinninnerput siunissami anguniakkatsinnut tunngatillugu isumatusaartumik aalajangertarnissatsinnut iluaqutigissavarput. Assersuutigalugu Jiisusi ima oqarpoq: „Guutip naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ (Matthæusi 6:33) Inuusuttorpassuit piffissaq tamaat kiffartornermikkut Jiisusip oqaasiinik upperinninnerminnik ersersitsinerat pillugu nersortariaqarput! Allat — aamma ilaqutariikkuutaat — nunanut allanut Guutip naalagaaffianik oqaluussissutiginnittartunik pisariaqartitsiffiungaartunut namminneq kajumissutsiminnit nuussimapput.

14. Ilaqutariit kristumiuusut kiffartornermi iliuuseqarneruniarlutik susimappat?

¹⁴ Assersuutigalugu ilaqutariit kristumiut sisamanik inoqutillit USA-miit Dominikanske Republikimut nuupput illoqarfimmi 50.000-inik inulimmi ilagiinni kiffartorniarlutik. Ilagiit 130-nik oqaluussisartoqarput, apriililli aqqaneq-aappaani 2006-imi inuit 1300-t missaanniittut Kristusip toquneranik eqqaaniaalluni nalliuttorsiornermut  najuupput! Aap, sumiiffimmi tamatumani ilumut narsaatit ’qaqortissimapput katersuiffigeriaannanngorlutik’, qaammatillu tallimaannaat tamatuma kingorna ilaqutariit taakkua, tassa ataataasoq, anaanaasoq, ernerat paniallu, katillugit 30-nik Biibilimik atuaqqissaaqateqartarput. (Johannesi 4:35) Ataataasoq ima oqaluttuarpoq: „Qatanngutit angutit arnallu 30-t ilagiitsinnut nuussimapput ikiuukkiartorlutik. Taakkua ilaat 20-t missaanniittut USA-meersuupput sinneri Bahamasimeersuullutillu Canadameersuullutillu Italiameersuullutillu New Zealandimeersuullutillu Spaniameersuusut. Tikittarput kajumissuseqartupilussuullutik, oqaluusseqataanissaminnut pilerillutik, aamma qatanngutinut tamaani najugalinnut assorsuaq qiimmassaataapput.“

15. Inuuninni Guutip naalagaaffiata soqutigisaanik pingaarnerpaatitsinerit pissutigalugu sunik pilluaqqussutisisimavit?

¹⁵ Soorunami ilarpassuavut nunami allami pisariaqartitsiffiunerusumi kiffartorniarlutik nuussinnaanngillat. Nuussinnaasulli — imaluunniit atorneqarsinnaaniassagamik pissutsinik atukkaminnik naleqqussaasinnaasut — qularnanngilluinnartumik pilluaqqutisiarpassuaqassapput. Sumiluunniillu kiffartoraluaruit nuannaarneq, nukitit tamakkerlugit Jehovamut kiffartoruit misigilersinnaasat, misiginngitsoorniaqinagu. Guutip naalagaaffiata soqutigisai inuuninni pingaarnerpaatikkukkit Jehovap neriorsorpaatit ’pilluaatissanik killeqanngitsunik kueraaffigiumaarlutit’. — Malaki 3:10.

Jehovap siulersuinera iluaqutigiuk

16. Guutip oqaasianit siulersortinnerput qanoq iluaqutigissavarput?

¹⁶ Soorlu misissoreeripput, Jehovap oqaaserisai marlutsigut uagutsinnik siulersuisarput. Isikkatsinnut naneruatut ipput sammivikkut eqqortukkut siumut ingerlasinnaaniassagatta, aamma aalajangigassaqaraangatta siulersortarpaatigut. Aammattaaq aqqutitsinnik qaammarsaapput siunitsinniittunik takunnilluarsinnaaniassagatta. Tamanna Petrusip kajumissaarutaanik matuminnga maleruaanissamut iluaqutigissavarput: „Eqqumaniaritsi isummassigullu piareersimallusi qiterusersimallusi, saammaannerlu Jiisusi-Kristusi saqqummersinneqarpat ilissinnut tunniunneqartussaq kisiat neriuutigisiuk.“ — 1 Petrusi 1:13.

17. Biibilimik atuaqqissaartarneq Guutip siulersuinera malillugu iliornissamut qanoq iluaqutigissavarput?

¹⁷ Qularutissaanngilaq Jehovap siulersorneqarnissarput isumagisaraa. Apeqqutaaginnarpoq illit siulersuinera malillugu iliorusunnersutit. Jehovap siulersuinera paasiumallugu aalajangertariaqarputit ullut tamaasa Biibili atuartarniarlugu. Atuakkatit eqqarsaatigeqqissaartakkit, Jehova pissutsinut qanoq isiginnittaaseqarnersoq paasiniarsariuk, aamma atuakkatit illit nammineq inuuninni qanoq atorsinnaanerlugit eqqarsaatigiuk. (1 Timotheusi 4:15, 1900/1961) Taava aamma ilinnut tunngasunik aalajangiissagaangavit siuneqassutsit atortaruk. — Romamiut 12:1, 1900/1961.

18. Guutip oqaasianit siulersortikkutta suut pilluaqqussutisiarissavavut?

¹⁸ Akuerigutsigu, najoqqutassianit Guutip oqaasianiittunit qaammarsarneqassaagut aamma taakku iluaqutigalugit pisariaqartumik siulersorneqassaagut ingerlavissamut eqqortumut tunngatillugu aalajangissagaangatta. Qularutiginngilarput Jehovap oqaasii allanneqarsimasut ’misilittagakitsunik ilisimasunngortitsisartut’. (Tussiaat 19:8) Biibilimit siulersortikkaangatta ilerasuuteqannginneq Jehovamillu nuannaartitsinermik pissuteqartumik nalerisimaarneq pilluaqquneqaatigisarpavut. (1 Timotheusi 1:18, 19) Guutip oqaasia alloriartarnitsinnik ullut tamarluinnaasa siulersuisikkutsigu Jehovap pilluaqqussutinit tamanit annerpaajusumik — inuunermik naassaanngitsumik — pilluaqqussavaatigut! — Johannesi 17:3. (wE 5/1 07)

Eqqaamavigit?

• Alloriartarnitta Jehova Guutimut siulersortinnissaat sooq pingaaruteqarpa?

• Guutip oqaaserisaasa isikkatsinnut naneruaasinnaanerat qanoq paasisariaqarpa?

• Guutip oqaasii qanoq ilillutik aqqutitsinni qaammaqqutaasinnaappat?

• Biibilimik atuaqqissaartarneq Guutip siulersuinera malillugu iliornissamut qanoq iluaqutigissavarput?

[Atuaqqissaarnermi apeqqutit]

[Qupp. 4-mi assiliartaq]

Uppinngitsumut attaveqarneq qaqugukkut mianersuaalliorninngortarpa?

[Qupp. 5-mi assiliartaq]

Jiisusip qanimut ikinngutai Jehovap piumasaanik iliortuupput

[Qupp. 6-mi assiliartat]

Inooriaatsitsigut erserpa Guutip naalagaaffiata soqutigisai pingaarnerpaatikkivut?