Makititaanissamik neriuut illit piviusutut isigaajuk?
Makititaanissamik neriuut illit piviusutut isigaajuk?
’Toqusut makikkumaarput.’ — APUSTILIT SULIAAT 24:15.
1. Sooq toqu avaqqunneqarsinnaarpasinngila?
„SILARSUARMI matumani toqu akileraarutillu avaqqunneqarsinnaanngitsutuaapput.“ Oqaaseqaat taanna, politikerip nuimasup Amerikamiup Benjamin Franklinip 1789-imi allataa, inuppassuit naatsukullaliatut pikkunartutut isumaqarfigaat. Inuilli ilaat akileraarnaveersaartarmata toqu avaqqunneqarsinnaannginnerorpasinnerusinnaavoq. Siunissaq ungasinnerusoq eqqarsaatigalugu arlaannattaluunniit nammineq ’malersuisoq’ taanna ingalassimasinnaanngilaa. Toqusut inaata, inuiaat ataatsimut ilerrata, asasavut iiorartutut ippai. (Ussatit 27:20) Mannali tuppallernangaartoq eqqarsaatigeriaruk.
2, 3. (a) Sooq toqu avaqqunneqarsinnaava? (b) Allaaserisami matumani suna sammissavarput?
2 Jehovap oqaasiani inuunermut makititaanissamik neriuut qularnaatsoq saqqummiunneqarpoq. Tamanna kissaatigisaanngilaq inornartoq, pissaanerullu suulluunniit Jehova neriuummik tamatuminnga piviusunngortitsiniarnerani akornusersinnaanngilaa. Ullumikkulli inuppassuit naluaat inuit ilaasa toqu avaqqussinnaagaat. Sooq toqu avaqqussinnaavaat? ’Amerlangaartut’ kisinneqarsinnaanngitsut „annikilliortitaangaarnermit“ qanittukkut nalliuttussamit aniguissammata. (Saqqummersitat 7:9, 10, 14) Aniguisut naassaanngitsumik inuunissartik qilanaarisinnaavaat. Taamaattumik taakkua toqu avaqqunneqarsinnaasutut isigaat. Allaammi toqu „suujunnaarsitaajumaarpoq“. — 1 Korinthimiut 15:26.
3 Apustilip Paulusip makititaanissamik qularutiginninnginneratut qularutiginninngitsigisariaqarpugut, taannami ima oqarpoq: ’Toqusut makikkumaarput — iluartut iluaatsullu.’ (Apustilit Suliaat 24:15) Makititaanissaq pillugu apeqqutit pingasut sammeriartigit. Siullermik: Sunaana pissutigalugu neriuut tamanna taama qularnaatsigisoq? Aappassaanik: Makititaanissamik neriuut uagut nammineq qanoq tuppallersaatigisinnaavarput? Pingajussaanillu: Neriuut tamanna maannakkorpiaq inuunitsinnut qanoq sunniuteqarsinnaava?
Makititsisoqarnissaa qularnaappoq
4. Sooq makititsinissaq Jehovap siunertaani pingaarnersaasut ilagaat?
4 Makititsisoqarnissaata qularnaanneranut pissutaasut arlaliupput. Pingaarnerpaamik makititsinissaq Jehovap siunertaani pingaarnersaasut ilagaat. Eqqaamajuk Saatanip pinngitsoorani toqumik kinguneqartussamik inuiaat ajortuliortikkai. Taamaattumik Jiisusi Saatani pillugu ima oqarpoq: „Taanna pileqqaarneranniit toqutsisuuvoq.“ (Johannesi 8:44) Jehovalli neriorsuutigaa ’arnaq’ pigisani, qilammi peqatigiissortani nuliatut ittut, ’kinguaassamik’, ’pulateriaarsutoqqap’ niaquanik aserorterisussamik, tassa suujunnaarsitsilluinnartussamik, pilersitsissasoq. (1 Mosesi 3:1-6, 15; Saqqummersitat 12:9, 10; 20:10) Jehovap ’kinguaassamut’ Missiarsimut siunertaminik paasinarsisitsiartuaarnerani erseqqissivoq kinguaassaq Saatanimik suujunnaarsitsiinnarnani aamma allamik iliuuseqassasoq. Guutip oqaasiani ima allassimavoq: „Manna pillugu Guutip ernera saqqummersinneqarpoq: Diaavulup suliai suujunnaarsissagamigit.“ (1 Johannesi 3:8) Toqu ajortimik Adamimit kingornussatsinnit pissuteqartoq Saatanip suliaasa pingaarnersaraat, Jehovallu siunertaraa toqup sunniutaasa Jiisusi Kristusi aqqutigalugu suujunnaarsinnissaat. Tamatumunnga tunngatillugu Jiisusip utertitsissutitut pilliutaa makititsinerlu pingaaruteqarluinnarput. — Apustilit Suliaat 2:22-24; Romamiut 6:23.
5. Sooq oqarsinnaavugut makititsineq Jehovap aqqanik naalannarsisitsiumaartoq?
5 Jehovap aterminik illernartumik naalannarsisitsinissani aalajangiusimavaa. Saatani Guutip aqqanik mitaatiginnissimavoq salluliorsimallunilu. Salluvoq Adami Evalu oqarfigigamigit ’toqussanngivissut’, paarnamik aalajangersimasumik Guutip nereqqunngisaanik nerigaluarunilluunniit. (1 Mosesi 2:16, 17; 3:4) Taamanimiilli Saatani taamatupajaaq salluliortalerpoq, assersuutigalugu salluliuutigaa timip toqunerata kingorna tarnip inuuinnartarneranik ajoqersuut eqqunngitsoq. Jehovalli makititsineq iluaqutigalugu salluliuutit taamaattut qulaarluinnassavai. Inaarutaasumik uppernarsassavaa inuuinnartitsisuullunilu inuunermut makititsisuunini.
6, 7. Jehova makititsinissaq pillugu qanoq misigiva, qanorlu ililluta misigissusii nalunngilavut?
6 Jehovap makititsinissani qilanaaraa. Biibilimi erseqqippoq Jehova makititsinissaq pillugu qanoq misiginersoq. Assersuutigalugu eqqarsaatigeriakkit Jobip aalajaatsup isumassarsisitaalluni oqaaserisai uku: „Angut sorsugiarsinnaasoq toquguni uummaqqissinnaava? Ulluni pinngitsaaliissummik kiffartorninni tamani utaqqiumaarpunga, kingoraartissama takkunnissaata tungaanut. Torlorfigiumaarparma, uangalu akiumaarpakkit; assavit piliaat kipitsavigiumaarpat.“ (Jobi 14:14, 15, NV) Tassani allassimasut qanoq paasisariaqarpat?
7 Jobip nalunngilaa toqunermi kingorna toqumi sinilluni utaqqigallartussaalluni. Piffissaq taanna, tassa toqumi sininnini, ’pinngitsaaliissummik kiffartornertut’ isigaa, piffissaq aniguisitaanissaminik utaqqisariaqarfini. Taassumunnga aniguisitaanissaq tamanna qularnaappoq — kingoraartissaa takkukkumaarpoq. Sooq? Jehovap misigissusii nalunnginnamigit, aamma nalunnginnamiuk kiffami aalajaatsup takoqqinnissaa ’kipitsavigigaa’. Aap, Guutip naapertuilluartut tamaasa inuulerseqqinnissaat qilanaaraa. Aamma Jehovap allat paratiisimi nunarsuarmiittumi naassaanngitsumik inuulernissaannik periarfississavai. (Lukasi 23:43; Johannesi 5:28, 29) Guuti tamanna naammassiniarlugu aalajangersimappat, taava kia unitsissinnaagamiuk?
8. Jehovap neriuutitta piviusunngortinnissaanut ’uppernarsaataa’ suua?
8 Jiisusip makititaanera neriuutitta piviusunngornissaanut uppernarsaataavoq. Paulusi Athenimi oqalugiarnermini ima oqarpoq: „[Guutip] aalajangersimavaa ulloq silarsuarmik tamarmik naapertuilluartumik eqqartuussiffissani angutikkut tamatumunnga qinereersimasamigut; tamannalu tamanut upperisassanngortippaa [uppernarsarpaa, 1900/1961] toqusunit makitikkamiuk.“ (Apustilit Suliaat 17:31) Paulusip tusarnaartuisa ilaasa makititsisoqarnissaa pillugu tusaramik Paulusi mitaatigaat. Allalli uppertunngorput, immaqa neriuutip tamatuma piviusunngornissaata uppernarsarneqarsimanera maluginiaramikku. Jehovap Jiisusi makitikkamiuk tupinnartuliat tamarmik pingaarnerpaartaat tupinnartuliaraa. Ernini toqumit anersaatut pissarsuartut inuunermut makitippaa. (1 Petrusi 3:18) Jiisusi makititaasimasoq allaat nunarsuarmi inunngunngikkallarami inissisimaffimminit qaffasinnerusumik inissisimaffeqalerpoq. Toqujuitsuulluni taamaallaallu Jehovamut naalatsigitilluni Ataatami suliassiissutigisai nuanningaartut maanna suliarisinnaavai. Jehovap Jiisusi aqqutigalugu qilammi nunarsuarmiluunniit inuunermut makittussat makitissavai. Jiisusi nammineq ima oqarpoq: „Uanga makissutaallungalu inuussutaavunga.“ (Johannesi 5:25; 11:25) Jehovap ernerminik makititsinermigut uppernarsarpaa aalajaatsut tamarmik neriuutaat piviusunngorumaartoq.
9. Ilumut toqusunit makititsisoqarumaarnera Biibilimi qanoq uppernarsarneqarpa?
9 Pisimasuni arlalinni isiginnittoqartillugu makititsisoqartarsimavoq taakkualu Guutip oqaasiani oqaluttuarineqarput. Toqusimasut inuttut nunarsuarmi uummarteqqinneqarnerannik tupinnartuliat arfineq-pingasut Biibilimi sukumiisumik oqaluttuarineqarput. Makititsinerit taakku isertuanngitsumik tamanut ammasumik pipput, amerlanertigullu isiginnittoqartillugu pisarput. Jiisusip Lazarusi, ulluni sisamani toqungasimasoq, makitimmagu inuppassuit aliasuttut — qularnanngitsumik aamma Lazarusip ilaqutai, ikinngutai eqqaamiuilu — najuupput. Jiisusip Guutimit aallartitaaneranut uppernarsaat tamanna ima kimittutigaaq, Jiisusimut upperisarsiornikkut akeraasut tamatuminnga miserratiginninngisaannarlutik. Aalajangiuppaalli Jiisusi kisiat toqunnagu aammali Lazarusi toqunniarlugu! (Johannesi 11:17-44, 53; 12:9-11) Aap, makititsisoqarumaarnera qularutiginngilluinnarparput. Guutip tuppallersarniarluta uppernerpullu nakussatsinniarlugu siornatigut toqusunit makititsisimanerit allanneqartippai.
Makititaanissamik neriuut tuppallersaatigiuk
10. Makititaasimasut pillugit oqaluttuat Biibilimiittut tuppallersaatiginiarlugit susinnaavugut?
10 Tuppallersarneqarnissat pisariaqartippiuk immaqa toqungajalernerit pissutigalugu? Taava qularnanngitsumik tuppallersaatigisinnaavatit toqusunit makititaasimasut pillugit oqaluttuat Biibilimiittut. Oqaluttuat taakku atuartarukkit, eqqarsaatigisarlugit qanorlu pisimanerat takorloortarlugu makititaanissamik neriuut piviusutut isiginerulersinnaavat. (Romamiut 15:4) Oqaluttuaannaanatillu takorluugaannaanngillat. Inunnut piviusunut uagutsitut ittunut ilumut pisimapput. Makititsineq Biibilimi oqaluttuarineqartoq siulleq sammilaariartigu.
11, 12. (a) Uillarneq Sareptamiu alianartumik sumik nalaataqarpa, aallaqqaammullu qanoq periarpa? (b) Oqaluttuariuk Jehovap pruffiitini Elia uillarneq pillugu susinnaanngortinneraa.
11 Pisimasoq takorlooriaruk: Pruffiitip Eliap uillarneq Sareptamiu sapaatip-akunnialuini inisimasuuffigisimavaa, qaliani najugaqarluni. Pissutsit nikallunganarput. Nunap ilaa tamanna panernersuaqarfiullunilu kaannersuaqarfiuvoq. Inuppassuit toqujartorput. Jehova uillarneq piitsoq uppernera pillugu akissarsisinniarlugu Elia aqqutigalugu sivisuumik sunniuteqartumik tupinnartulioreerpoq. Uillarneq erneralu kaannermik toqoqqajaapput nerisassatillu nunngutaartussanngorlugit Guutip Elia tupinnartuliorsinnaanngortimmagu uillarnerup qajuusaatai uuliaataalu nungussinnaajunnaartillugit. Maannali uillarneq alianartumik nalaataqarpoq. Ernera napparsimaleriataarpoq, sivitsunngitsorlu anerningerpoq. Uillarneq isumatsappoq! Ikiuisinnaasumik pilersuisinnaasumillu ueqarnani artornareeqaaq, maannali qitornatuani annaavaa. Aliasunnermit Elia taassumalu Guutia, Jehova, allaat pisuutippai! Pruffiiti qanoq piva?
12 Eliap uillarneq tunngavissaqanngitsumik unnerluutiginninnera pillugu naviinngilaa, imali oqaannarpoq: „Ernerit qaaguk.“ Nukappiaraq toqungasoq qalianukaappaa uummaqqinnissaalu qinnutigisaqattaarlugu. Taava Jehova akuliuppoq! Takorlooriaruk Elia qanoq nuannaartigisimassasoq takugamiuk nukappiaqqap ilummut anersaarnerani sakiaa qaffaamisoq. Nukappiaraq inuummarippaseqaluni uippoq. Eliap nukappiaraq anaanaanut aqquppaa imalu oqarluni: „Takuat, ernerit uumavoq!“ Anaanaa nuannaangaarluni ima akivoq: „Maanna nalujunnaarpara Guutip kiffarigaatit [Jehovallu] illit aqqutigalutit oqaasii upperisassaasut.“ (1 Kunngit 17:8-24) Jehovamut taassumalu aallartitaanut aatsaat taama upperluartigilerpoq.
13. Eliap uillarnerup erneranik makititsinera pillugu oqaluttuaq sooq ullumikkut uagutsinnut tuppallersaataava?
13 Qularnanngivissumik oqaluttuanik tamakkuninnga eqqarsaatiginnittarneq tuppallersaatigingaassavat. Aap, Jehovap akeqqatsinnik toqumik ajugaaffiginnissinnaanera erseqqeqaaq! Takorluuinnariaruk ulloq nuannaarnerup, uillarnerup misigisaata, toqusimasorpassuit makititaappata amerlanerungaartunit misigineqarfissaa! Aamma qilammi nuannaartoqangaassaaq Jehovap ernini nunarsuarmi tamarmi makititsinermik naammassinneqquppagu. (Johannesi 5:28, 29) Illit qanigisannik toqusoqarsimava? Jehovap toqusimasunik makititsisinnaallunilu makititsiumaarnera ilisimallugu nuanningaarami!
Neriuut maannakkut inuuninnut qanoq sunniuteqarsinnaasoq
14. Makititaanissamik neriuut illit inuuninnut qanoq sunniuteqarsinnaava?
14 Makititaanissamik neriuut maannakkut inuuninnut qanoq sunniuteqarsinnaava? Annikillioraangavit, ajornartorsiuteqaraangavit, malersorneqaraangavit navianartorsioraangavillu neriuut tamanna nakussatsissutigisinnaavat. Saatanip kissaatigaa toqunissat ima annilaangatigissagit toqqissisimanissamik neriorsuutit asuliinnaasut pillugit ilumoorfiginnikkunnaariaannaallutit. Eqqaamajuk Saatanip Jehova ima oqarfigigaa: „Inuup pigisani tamaasa akigeriaannaasarpai inuunini annaajumanagu.“ (Jobi 2:4) Saatani taama oqarnermigut tamatsinnik, aamma ilinnik, mamarliivoq. Ilumoorpa sioorasaarneqaruit Guutimut kiffartorunnaassasutit? Makititaanissamik neriuummik eqqarsaatiginninnikkut Ataatavit qilammiusup piumasaatut iliortuarnissat aalajangiusimanerulersinnaavat.
15. Navianartorsiortinneqaraangatta Jiisusip oqaasii Matthæusi 10:28-miittut qanoq tuppallersaatigisinnaavavut?
15 Jiisusi ima oqarpoq: „Ersigeqinasigit timimik toqutsisut tarnimilli toqutsisinnaanatik. Ersigisiulli tarnimik timimillu Anniarfimmi [hebræerisut: Gehennami] aserortitsisinnaasoq.“ (Matthæusi 10:28) Saatani taassumalu nunarsuarmi ikiortai ersigisariaqanngilavut. Ilumoorpoq taakkua ilaat ajoqusiisinnaasut allaallu toqutsisinnaasut. Taakkuali ajoqusiineri ajornerpaat allaat atuukkallaannarput. Jehovap kiffami aalajaatsut misigisariaqagaat misigisariaqarsimasaallu ajortut atorunnaarsissinnaallugillu atorunnaarsikkumaarpai. Allaat toqusunit makitissinnaavai. Jehova kisimi ersigisariaqarpoq, tassa imaappoq mianerineqartariaqarlunilu ataqqineqartariaqarpoq. Taanna kisimi inuujunnaarsitsinissamut aamma tarnimik timimillu Gehennami suujunnaarsitsinermigut siunissami inuunissamik neriuutaarutitsilluinnarnissamut pissaaneqarpoq. Qujanartumilli Jehovap kissaatigaa ilinnut taamatut pisoqassanngitsoq. (2 Petrusi 3:9) Makititaanissamik neriuut pissutigalugu Guutimut kiffaasutut qularutiginngisaannarparput isumannaatsumiinnerput. Aalajaattuartilluta inuuneq naassaanngitsoq siunissarissavarput, tamannalu Saatanip taassumalu tapersersortaasa akornusersinnaanngilaat. — Tussiaat 118:6; Hebræerit 13:6.
16. Inuunermut isiginnittaaserput pingaarnersiuinitsinnut qanoq sunniuteqarpa?
16 Makititaanissamik neriuut piviusutut isigigutsigu, tamanna inuunermut isiginnittaatsitsinnut sunniuteqarsinnaavoq. Paasilluarparput inuugaluarutta toqugaluaruttaluunniit ’Jehovap pigigaatigut’. (Romamiut 14:7, 8) Taamaattumik aalajangiiniaraangatta inuunitsinni suut pingaarnerutissanerlugit, Paulusip siunnersuutaa una malillugu iliortarpugut: „Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ (Romamiut 12:2) Inuit ilarpassui kissaatigisatik tamaasa piniarlugit, anguniakkatik isumassarsiareriataakkatillu tamaasa naammassiniarlugit ingasattumik ulapittarput. Inuuneq sivikitsutut isigaat, taamaammallu aliikkusersuutinik noqqaassutiginnipput soorlu allamut saariarfissaarutivissut. Upperisaqarunik, upperisaat ’Guutip piumasaanut naammalluinnartumut’ naapertuutinngilluinnarpoq.
17, 18. (a) Inuunerup sivikissusia pillugu Jehovap oqaasiani piviusorsiortumik qanoq allassimasoqarpa, Guutilli uagut pilluta suna kissaatigaa? (b) Ullut tamaasa Jehovamik unnersiutiginninnissamut suna kajumississutigaarput?
17 Inuunerup ilumut sivikinnera nassuerutigisariaqarpoq. Ukiut inuuffigisavut „ingerlalertorput, timmisutullu qimaguppugut,“ immaqa ukiut 70-it 80-illuunniit ingerlaneranni. (Tussiaat 90:10) Inuit inunngortarput ivikkatullu qorsuusutut, tarratut nungujartortutut, suiallannerinnartut peeruttarlutik. (Tussiaat 103:15; 144:3, 4) Guutilli siunertarinngilaa ukiut 20-30-t peroriartornissamut, ilisimassuseqalernissamut misilittagaqalernissamullu atussagivut tamatuma kingorna ukiorpaaluit ingerlaneranni sanngiilliartorniassagatta naggataatigullu napparsimalerlutalu toquniassagatta. Jehovap inuk pinngortippaa naassaanngitsumik inuunissamik kissaateqartillugu. Biibilimi ima allassimavoq: „Ittuinnartoqarnera uummataanut tunniuppaa.“ (Oqaluussisartup oqaasii 3:11, 1900/1961) Guutip taamatut kissaateqalersippaatigut taavalu kissaaterput naakkittaalluni piviusunngortissinnaajunnaarsillugu? Naamerluinnaq, „Guutimi tassaavoq asanninneq“. (1 Johannesi 4:8) Makititsineq iluaqutigalugu toqusimasut naassaanngitsumik inuusinnaalersissavai.
18 Makititaanissamik neriuut iluaqutigalugu siunissamut isumalluarsinnaavugut. Ulapinnissatsinnut periarfissatsinnillu tamanik maannakkut atorluaasariaqartutut misiginissatsinnut pissutissaqanngilagut. Silarsuarmik toqujartortumik „tamakkiisumik“ (NV) atuinissatsinnut pissutissaqanngilagut. (1 Korinthimiut 7:29-31; 1 Johannesi 2:17) Neriuummik piviusumik upperinninngitsut pinerattut pinnata, uagut Jehova Guutimut aalajaattuarutta naassaanngitsumik taassuminnga unnersiutiginnillutalu inuunermik nuannaarutiginnissinnaanitsinnik ilisimanninnerput nuannaarutigeqaarput. Taamaattumik Jehova, makititaanissaq pillugu qularnaatsumik neriuutissiisoq, unnersiutiginiarlugu ullut tamaasa sapinngisatsinnik iliorta! (wE 5/15 07)
Qanoq akissavit?
• Makititaanissaq pillugu qanoq misigisariaqarpugut?
• Suut pissutigalugit makititaanissamik neriuut qularnaappa?
• Makititaanissamik neriuut qanoq tuppallersaatigisinnaavarput?
• Makititaanissamik neriuut maannakkut inuunitsinnut qanoq sunniuteqarsinnaava?
[Atuaqqissaarnermi apeqqutit]
[Qupp. 29-mi assiliartaq]
Jobip nalunngilaa Jehovap naapertuilluartunik makititsinissani qilanaarigaa
[Qupp. 30-mi assiliartaq]
„Takuat, ernerit uumavoq!“