Sooq naalliuutit tamarmik qanittukkut qaangiukkumaartut

„Qaarsuuvoq . . ., naammalluinnartuupput suliai.“ — 5 MOSESI 32:4.

1, 2. (a) Sooq naassaanngitsumik inuulernissamik neriuut pingaartippiuk? (b) Sooq inuppassuit Guuti nuanningaartunik siunissamut neriorsuuteqartoq upperiuminaatsippaat?

PARATIISIMI inuulluni qanoq ikkumaarneranik takorluuineq nuannaraajuk? Immaqa takorloorpat nunarsuarput tupinnartoq misissorlugu uumassusillillu tassaniittut assigiinngitsorparpassuit pillugit ilinniarlutit. Immaqa nunarsuarmik nuannernerulersitseqataanerup nunarsuarlu tamakkerlugu naatsiivinngortitseqataanerup nalerisimaarnartua eqqarsaatigaat. Immaqa takorloorpat assilialiornermut, illuliortaatsinut, nipilersornermut allanulluunniit tunngatillugu piginnaaninnik ineriartortitsinissat, ullutsinni ulapaarfiusumi piffissaqarfigiuminaatsitat. Qularnanngilluinnarpoq Biibilimi ’inuunivittut’ eqqartorneqartumik — inuunermik Jehovap uagutsinnut eqqarsaatigisaatut ittumik, naassaanngitsumik inuunissamik neriuutitalimmik — inuulernissamik neriuut pingaartikkit. — 1 Timotheusi 6:19.

² Neriuut tamanna pillugu Biibilimi qanoq allassimasoqarneranik allanik oqaluttuussineq nuannerlunilu immikkut pisinnaatitaaffiuvoq, ilaa? Inuilli ilarpassui tusaajumanngillat neriuullu asuliinnaliuutitut, uppiasut takorluugaattut piviusorsiunngitsutut, suusupagisarlugu. Ilaasaluunniit Guuti Paratiisimi inuunermik naassaanngitsumik neriorsuuteqartoq upperiuminaatsippaat. Sooq? Ajussuseqarnera paasiuminaatsittaramikku. Isumaqarput Guuti piullunilu ajugaqanngitsuullunilu asannittuuppat, ajussuseq naalliuutillu nassuiarneqarsinnaanngitsut. Eqqarsartarput ajussuseqarmat Guuti piusinnaanngitsoq, imaluunniit isumaqarput Guuti piuguni ajugaqanngitsuusimassanngitsoq soqutigisimassanngikkaatigulluunniit. Tunngavilersuutit taama ittut inuppassuit isumaqatigisarpaat. Saatani inuit eqqarsaataannik tappiillisitsillaqqivissuuvoq! — 2 Korinthimiut 4:4.

3. Apeqqutip akiuminaatsup suup akissutissarsisinissaanut inuit ikiorsinnaavavut, aamma sooq ikiuinissatsinnut asseqanngitsunik periarfissaqarpugut?

³ Jehovamut nalunaajaasuugatta asseqanngilluinnartunik periarfissaqarpugut inunnik Saatanimit silarsuullu matuma ilisimassusianit salloqittarneqartunik ikiuinissatsinnut. (1 Korinthimiut 1:20; 3:19) Nalunngilarput sooq inuppassuit Biibilimi neriorsuutigineqartunik upperinninngitsut — tassa Jehova ilisarisimanngilluinnarpaat. Immaqa aqqa imaluunniit aqqata isumaa naluaat, aamma qularnanngitsumik taassuma pissusii qasseeriaqalunilu aalajangersimalluni neriorsuutiminik eqqortitsisarnera pillugit immannguaannaq ilisimasaqarput  ilisimasaqanngilluinnarlutilluunniit. Tamakkuninnga ilisimasaqarnerput pilluaqquneqaatigaarput. Iluaqutaassaaq ilaannikkut eqqarsaatigisarutsigu „isumamikkut taarsiortut“ qanoq ililluta ikiorsinnaanerlutigit inuit apeqqutigisartagaasa akiuminaannerpaartaannut matumunnga akissutissarsiorneranni: „Sooq Guutip ajussuseq naalliuutillu akuerai?“ (Efesosimiut 4:18) Qanoq akisinnaanersugut sammeqqaassavarput. Tamanna sammereerutsigu Jehovap ajussutsimut periaasiani pissusii suut ersertarnersut misissussavarput.

Apeqqut qanoq ililluta iluamik akissagipput

4, 5. Sooq Guuti ajussutsimik akuerinninnersoq apeqqutigineqaraangat aallaqqaammulli sunissaq pisariaqarsinnaava? Akissutit tunngavilersoruk.

⁴ Sooq Guutip naalliuuteqarnera akuerineraa aperisoqarpat qanoq akissaagut? Immaqa Naatsiivimmi Edenimi pisut aallartissutigalugit sunnguit tamaasa ilanngullugit nassuiaaniapallaqqajaasarpugut. Taamaaliorneq ilaatigut immaqa ajornavianngilaq. Mianersoqquneqarnissarpulli naleqqulluarpoq. Tunngavilersuinissarmi amerlanertigut pisariaqartarpoq. (Ussatit 25:11, 1900/1961; Kolossemiut 4:6) Immikkoortut pingasut sukumiinerusumik nassuiaannginnitsinni aperisumik ikiuinissatsinnut iluaqutigisinnaasavut misissoriartigik.

⁵ Siullermik, inuk silarsuarmi ajussutsip taama nalinginnaatigineranik isumakuluutiginnivippat, ilimanarpoq nammineq ilaqutaasaluunniit ilaat ajussusermik misigisaqarsimassasoq. Taamaattumik silatusaassaagut aallaqqaammulli ilumoorluta misiginneqataagutta. Apustilip Paulusip kristumiut ima siunnersorpai: ’Qiasut qiaqatigisigit.’ (Romamiut 12:15) Misiginneqataanerput kajumississutaasinnaavoq. (1 Petrusi 3:8) Paasiguniuk ilumoorluta soqutigigitsinni tusarnaarusunnerussavaatigut.

6, 7. Sooq inuk anersaakkut ittunut tunngasut isumakuluutigisani pillugit aperisoq pissutissaqarluarluta nersualaarsinnaavarput?

⁶ Aappassaanik, aperisoq aperinera pillugu nersualaarsinnaavarput. Inuit ilaat isumaqartarput tamakkuninnga eqqarsaateqartarneq uppernikinnermut Guutimilluunniit ataqqinninnginnermut ersiutaasoq. Allaat imaassinnaavoq palasi taama oqartoq tusarsimagaat. Taamaattariaqanngilarli. Inuimmi aalajaatsut Biibilip nalaani inuusut apeqqummut tamatumunnga assingusunik aperisarput. Assersuutigalugu tussiaasiortoq Daavi ima aperivoq: „Sooq taama ungasitsigaat, [Jehova]? Sooq isertorpit ulluni annikilliorfiusuni?“ (Tussiaat 10:1) Pruffiiti Habakkuki taamatupajaaq aperivoq: „[Jehova], qanoq sivisutigisumik kappialassanerpunga ilinnit tusarneqarnanga? Qanoq sivisutigisumik nilliassutigissanerpakka nakuusernerit ilinnit annaanneqarnanga? Sooq iluaatsuliorfigineqarnermik misigisaqartippinga perlutsitaaneralu isiginnaaginnarlugu? Qunutitsineq nakuusernerlu isima saanniipput, unnerluussut tutsiuppoq, pillagassaatitsineqalerpoq.“ — Habakkuki 1:2, 3.

⁷ Daavi Habakkukilu angutaapput aalajaatsut Guutimik ataqqinningaartut. Isumakuluutigisatik pillugit aperigamik naveerneqarpat? Naamerluinnaq. Jehovap taakkua ilumoorlutik apeqqutaasa oqaatsimini allanneqartinnissaat kissaatigisimavaa. Ajussutsip taama nalinginnaatigineranik akuerinnissinnaanngitsoq immaqa anersaakkut kaappoq apeqqutillu taamaallaat Biibilimi akissutissarsineqarsinnaasut akineqarterusuppai. Eqqaamajuk Jiisusip anersaakkut kaattut imaluunniit „anersaakkut pisariaqartitaqarnerminnik miserratiginninngitsut“ ajunngitsumik eqqartorai. (Matthæusi 5:3, NV) Inunnik taakkunatut ittunik Jiisusip neriorsuutigisaatut pillualernissamut ikiuineq immikkut pisinnaatitaaffiuvoq.

8. Ajoqersuutit paatsiveerunnartut suut pissutigalugit inuit ilaat isumaqalersimappat Guuti naalliuutinut akisussaasuusoq, taakkualu qanoq ikiorsinnaavavut?

⁸ Pingajussaanik, immaqa aperisoq paasitissinnaavarput Guuti ajussutsimut silarsuarmi nalinginnaaqisumut akisussaanngitsoq. Inuppassuit ilinniartinneqarsimapput Guuti silarsuarmut inuuffigisatsinnut naalakkersuisuusoq, uagutsinnut qanoq pisoqassaneranik qangarsuarli aalajangeereersimasoq, aamma nalulluinnakkatsinnik pissuteqarluni inuiannik atugarliortitsisoq. Tamakku ajoqersuutaapput eqqunngitsut, Guutimut narrunarsaataasut silarsuarmilu ajussutsimut naalliuutinullu taassumunnga pisuutitsissutaasut. Taamaattumik suna ilumoortuunersoq erseqqissarniarlugu Guutip oqaasiata atornissaa pisariaqarsinnaavoq. (2 Timotheusi 3:16) Silarsuarmik aaqqissuussaanermut ajortunngorsimasumut matumunnga Jehova naalakkersuisuunngilaq — Saataniuna Diaavulu naalakkersuisuusoq. (1 Johannesi 5:19) Jehovap pinngortitami  sianissusillit qanoq pinissaat siumut aalajangereerneq ajorpaa. Taakkua tamaasa immikkut ajunngitsumik ajortumilluunniit, eqqortumik eqqunngitsumilluunniit, qinersinissamut kiffaanngissusilerlugillu periarfissippai. (5 Mosesi 30:19) Jehova ajortunut pissutaanngisaannarpoq. Ajussuseq uumigaa naapertuilluanngitsumillu naalliuttut isumassorlugit. — Jobi 34:10; Ussatit 6:16-19; 1 Petrusi 5:7.

9. Sooq Jehova Guuti naalliuutinik akuerinninnersoq inuit paasiniassammassuk iluaqutissanik ’kiffamit ilumoorlunilu silatuumit’ saqqummersinneqarsimasunik eqqaasaqarit.

⁹ Taamatut tunngavilersuereerutta immaqa oqaluttuarisinnaassavarput sooq Guutip naalliuunnartut akuerigallarnerai. ’Kiffap ilumoorlunilu silatuup’ arlalinnik tamatumunnga iluaqutissaqarnissarput isumagisimavaa. (Matthæusi 24:45-47) Assersuutigalugu 2005-imi ataatsimeersuarnermi „Guutimut naalanneq“-mik qulequtalimmi naqitaaraq Qanittukkut naalliunnartuerutissaaq!-mik qulequtalik saqqummersinneqarpoq. Soormi naqitaaraq taanna atuarluarukku? Aamma atuakkami Hvad er det Bibelen virkelig lærer?-imi, maanna oqaatsinut 157-inut nutserneqarsimasumi, kapitalimi ataatsimi apeqqut tamanna pingaarutilik sammineqarpoq. Tamakkua sapinngisannik atorluarniartakkit. Taakkunani Biibili atorlugu erseqqissumik nassuiarneqarput qilammi nunamilu oqartussaaneq pillugu akerleriissut Naatsiivimmi Edenimi qanoq pilersinneqarsimanersoq, aamma sooq Jehova ajornartorsiummut periarnermisut periarnersoq. Eqqaamajuttaaq oqaloqatigiinnissinni oqaloqatigisat ilisimaneqarsinnaasunit tamanit pingaaruteqarnerpaanik, tassa Jehova taassumalu pissusii nuanningaartut pillugit ilisimasaqarnermik, paasisaqartissagakku.

Jehovap pissusii maluginiaqqusakkit

10. Guutip ajortunik akuerinninneranut tunngatillugu inuppassuit suna paasiuminaatsippaat, sunalu paasigunikku iluaqutigisinnaavaat?

¹⁰ Sooq Jehovap inuit Saatanimit sunnerneqarlutik namminneq naalakkersuinissaannik akuerinninneranik inuit paasinninnissaannut ikioraangakkit, Jehovap pissusii nuanningaartut maluginiaqqusakkit. Inuit ilarpassuisa nalunngilaat  Guuti pissaaneqangaartoq, aamma Guutitut ajugaqanngitsutut eqqartorneqartarnera sungiusimavaat. Kisiannili immaqa pissaanini angingaartoq naapertuilluannginnermik naalliuutinillu ingerlaannaq piuneerutitsinissamut sooq atunnginneraa paasiuminaatsippaat. Ilimanarpoq Jehovap pissusii allat, soorlu illernassusia, naapertuilluassusia, ilisimassusia asanninneralu — pissutsit naammalluinnartumik oqimaaqatigiissumillu ersersittagai — ilisimasaqarfigerpianngikkaat. Jehova pillugu Biibilimi ima allassimasoqarpoq: „Naammalluinnartuupput suliai.“ (5 Mosesi 32:4) Apeqqutit apeqqutigineqakulasut akigaangakkit qanoq ilillutit taassuma pissusii erseqqissarsinnaavigit? Assersuutit misissoriartigik.

11, 12. (a) Sooq Jehovap Adamip Evallu ajortuliornerannik isumakkeerfiginninnissaa ajornavippa? (b) Sooq Jehovap ajorti naassaanngitsumik akueriinnarnavianngilaa?

¹¹ Jehovap Adami Evalu isumakkeerfigiinnarsimasinnaannginnamigit? Taakkununnga tunngatillugu isumakkeerfiginninnissaq ajornarluinnarpoq. Adami Evalu naammalluinnartuupput, piaaralutillu Jehovap kisimi oqartussaassusianik itigartitsipput Saatanimillu siulersortillutik. Tupinnanngitsumik pikitsitsisut peqqissiminerannut takussutissaqanngilaq. Tamatumunngali tunngatillugu Jehova sooq isumakkeerfiginnissimannginnersoq inuit aperigaangamik immaqa eqqarsaatigisagaat tassaavoq sooq Jehovap najoqqutassiani qasukkartiinnarsimannginnerai aamma sooq ajortuliornerup pikitsitsinerullu piviusuunerat akueriinnarsimannginneraa. Apeqqummut tamatumunnga akissut pissutsimut Jehovap kinaassusianut ilaalluinnartumut, tassa illernassusianut, attuumassuteqarpoq.

¹² Jehovap illernassusia hundredelippassuariarluni Biibilimi erseqqissarneqarpoq. Ajoraluartumilli silarsuatsinni ajortunngorsimasumi ikittuinnaat nalunngilaat illernassuseq qanoq paasisariaqarnersoq. Jehova minguitsuuvoq ajortiliussutsimillu tamarmit avissaaqqalluni. (Esaja 6:3; 59:2) Isumagisimavaa ajortip isumakkeerfigineqarnissaa soraarsinneqarumaarnissaalu, naassaanngitsumilli akueriinnarnavianngilaa. Jehovap ajorti naassaanngitsumik akueriinnartuuppagu neriuutissaqassanngikkaluarpugut. (Ussatit 14:12) Jehovap piffissaq aalajangikkani nalliuppat pinngortitat tamaasa illernassuseqalerseqqissavai. Tamanna pinngitsoorani pissaaq, Illernartummi tamanna piumasaraa.

13, 14. Sooq Jehovap Naatsiivimmi Edenimi pikitsitsisut piuneerutinngilai?

¹³ Naatsiivimmi Edenimi pikitsitsisut Jehovap piuneerutiinnarsimasinnaannginnamigit aallaqqaataaniillu aallartilluni? Taamaaliornissaminut pissaaneqarnera qularnanngivippoq, qanittukkullu pissaanini guutiitsunik tamanik piuneerutitsinissaminut atussavaa. Ilaalli ima aperiumassapput: ’Kisianni sooq qilammi nunarsuarmilu unioqqutitsisut pingasuinnaagallarmata taamaaliunngila? Piuneerussimasuuppagimmi ajorti siaruarsimananilu silarsuarmi taama ajoqusiitigisimassanngikkaluarpoq.’ Sooq Jehova taamaaliorniarnani aalajangerpa? Mosesimik allakkat tallimaat 32:4-mi ima allassimavoq: „Naapertuilluartuupput aqqutigisai tamarmik.“ (1990) Naapertuilluarneq pingaartingaarpaa. Aap, ’Jehovap naapertuilluarneq iluaraa’. (Tussiaat 37:28, 1990) Naapertuilluarnermik nuannarisaqarnini pissutigalugu Naatsiivimmi Edenimi pikitsitsisut piuneerutinngilai. Sooq?

¹⁴ Saatani pikitsitsimmat Guutip eqqortumik kisimi oqartussaanera apeqquserneqarpoq. Jehovap naapertuilluarnermik misigissusia pissutigalugu Saatanip unnerluutiginnissutaa naapertuilluartumik akineqartariaqarpoq. Naapertuilluartumik akineqarsimassanngikkaluarpoq unioqqutitsisut ingerlaannaq toqutaasimasuuppata, naak tamanna eqqortumik pillaatisiassarigaluaraat. Ingerlaannaq toqutissimasuugunigit Jehovap pissaaneqarnerunini uppernarsarsimassagaluarpaa, pissaaneqarnerunerali kimilluunniit apeqquserneqanngilaq. Aamma Jehovap siunertani Adamimut Evamullu nalunaarutigereerpaa. Meeqqiortussaapput nunarsuarlu ulikkaartussaallugu imminnullu naalatsigitillugu pinngortitarsuarlu tamaat naalagaaffigalugu. (1 Mosesi 1:28) Jehovap Adami Evalu piuneerutiinnarsimasuuppagit inunnut siunertarisamisut oqaatigisai asuliinnaasimassagaluarput. Jehovap naapertuilluassutsini pissutigalugu tamanna akuerinngisaannassavaa, siunertaami piviusunngortuaannarput. — Esaja 55:10, 11.

15, 16. Ajornartorsiutinut Naatsiivimmi Edenimi pilersunut „aaqqiissutissanik“ allanik saqqummiussisoqaraangat qanoq oqarsinnaavugut?

¹⁵ Arlaata qilammiittup nunarsuarmiittulluunniit pikitsitsineq Jehovamit ilisimassuseqarnerulluni iliuuseqarfigisinnaasimagaluarpaa? Inuit ilaat  immaqa ajornartorsiutinut Naatsiivimmi Edenimi pikitsitsinermi pilersunut namminneq „aaqqiissutissaminnik“ saqqummiussissapput. Inuilli taamatut saqqummiigaangata assigiinnartanngilaa oqartut ajornartorsiut pitsaanerusumik iliuuseqarfigisinnaallugu? Pissutiginiagaat immaqa ajunngilaq, Jehovalli ilisimassusianik mianernartumik eqqarsaataanillu paasinninngillat. Apustilip Paulusip kristumiunut Romamiittunut allakkamini Guutip ilisimassusia, ilaatigut Guutip naalagaaffik Missiarsikkoortoq atorlugu inunnik aalajaatsunik utertitsiumaarneranik aterminillu qutsissumik illernarsisitsiumaarneranik ’anngigisaq illernartoq’ (NV), sukumiisumik nassuiarpai. Guutip tamatuminnga pilersaarusiortup ilisimassusia Paulusip qanoq isumaqarfigaa? Apustilip allakkat ima naggaserpai: „Guuti taanna ilisimasutuaasoq Jiisusi-Kristusikkut naalannartitaali naassaanngitsumik! Amen.“ — Romamiut 11:25; 16:25-27.

¹⁶ Aap, Paulusip paasivaa Jehova qilammi nunarsuarmilu ilisimassuseqarnerpaasoq. Inuit naammalluinnanngitsut akornanni kina ajornartorsiummut suugaluartumulluunniit — ingammik Guutip ilisimassusianut misilinneqataanerpaasimasumut — aaqqiissutissamik pitsaanerusumik isumassarsisinnaagami? Taamaattumik inuit ikiortariaqarpavut Guutimik uummammigut ilisimassuseqartumik uagut nammineq mianerinninnitsitut mianerinnilernissaannut. (Jobi 9:4) Jehovap ilisimassusia paasilluarnerujartortillugu periaasiata pitsaanerpaanera qularutiginnginnerujartuinnassavarput. — Ussatit 3:5, 6.

Jehovap pissusianik pingaaruteqarnerpaamik paasinnilluarneq

17. Jehovap asanninneranik paasinnilluarneq taassuma ajortunik akuerinninneranik isumakuluutiginnittut qanoq iluaqutigisinnaavaat?

¹⁷ „Guuti tassaavoq asanninneq.“ (1 Johannesi 4:8) Oqaatsit kimittuut taakkua atorlugit Jehovap pissusiisa tamarmik pingaaruteqarnerpaartaralugulu nuannernerpaartarisaat, ajussutsip taama nalinginnaatigineranik isumakuluutiginnittunut tuppallersaataanerpaasartoq, Biibilimi allaatigineqarpoq. Jehova ajortip pinngortitaminik ajoquseerujussuarneranik iliuuseqarfiginneriaatsimini sutigut tamatigut asanninnermik ersersitsisimavoq. Jehovap asanninnini kajumississutigalugu Adamip Evallu kinguaavi ajortillit neriuutissippai, imminut qanillinissaannut akuerisaasumillu imminut attaveqalernissaannut periarfissillugit. Aamma Guutip asanninnini kajumississutigalugu inuit ajortiminnik isumakkeerfigineqarluinnarnissaannik naammalluinnartuullutillu naassaanngitsumik inuulernissaannik aqqutissiuussisumik utertitsissuteqarnissaa isumagaa. (Johannesi 3:16) Aamma Jehova inuiannut asanninnini kajumississutigalugu erinitsajuippoq sapinngisamillu amerlanerpaat imminik Kisimi Oqartussaasutut toqqaanissaannut Saatanimillu itigartitsinissaannut periarfissillugit. — 2 Petrusi 3:9.

18. Uagut sumik ilisimasaqarneq pilluaqquneqaatigaarput, allaaserisamilu tulliuttumi suna sammineqassava?

¹⁸ Ullormik peqqarniisaarniat naakkittaatsumik saassussiffiannik eqqaaniaaniarlutik katersorsimasunut palasi ima oqarpoq: „Guutip ajussuseqaannarnissaanik naalliunnartoqaannarnissaanillu akuerinninneranut pissutaasoq naluarput.“ Ila alianassusia! Uagut tamatumunnga pissutaasumik ilisimanninnerput nuanningaarami, ilaa? (5 Mosesi 29:28) Aamma Jehova ilisimasuullunilu naapertuilluartuullunilu asannittuummat, nalunngilarput qanittukkut naalliuutit atuutitikkunnaassagai. Taamaaliornissanimi neriorsuutigereerpaa. (Saqqummersitat 21:3, 4) Ukiummi hundredellit ingerlaneranni toqusimasut tamarmik? Jehovap taakku eqqarsaatiginagit Naatsiivimmi Edenimi ajornartorsiut iliuuseqarfigaa? Naamik. Asanninnini kajumississutigalugu taakkuattaaq isumassorumaarpai toqusunit makitsitsinermigut. Allaaserisami tulliuttumi tamanna sammissavarput.

Qanoq akissavit?

• Sooq Guutip naalliuutinik akuerinninnera pillugu aperisut qanoq oqarfigisinnaavavut?

• Sooq oqarsinnaavugut Jehovap Naatsiivimmi Edenimi pikitsitsisunut iliuuseqarfiginneriaasia illernartuuneranik naapertuilluartuuneranillu erseqqissaasoq?

• Sooq allat Jehovap asanninnerata qanoq paasisariaqarneranik paasinninnerunissaannut ikiortariaqarpavut?

[Atuaqqissaarnermi apeqqutit]

[Qupp. 22-mi assiliartaq]

Silarsuarmi naalliuutinik isumakuluutiginnittut ikiorniarsarikkit

[Qupp. 24-mi assiliartat]

Angutit aalajaatsut, soorlu Daavip Habakkukillu, Guuti ilumoorlutik aperaat