Jehovap oqaasia uumavoq

Ezekielip allagaanit pingaarnersat — I

UKIOQ 613-iuvoq u.n.s. Pruffiiti Jeremia Judamiippoq qunusuillunilu Jerusalemip aserugaanissaata Judallu inuerunnissaata nalliulluinnalernera oqaluussissutigaa. Babylonip kunngiata, Nebukadnesarip, juuterpassuit aallarussaatereerpai. Aallarussaaqqasut ilagaat Danieli ikinngutaalu pingasut, Kaldæamiut kunngikkormiuini kiffartortut. Juutit aallarussaaqqasut amerlanersaat „Kaldæerit nunaanni“ kuup Kebarip eqqaani najugaqarput. (Ezekieli 1:1-3) Jehova aallarussaaqqasunut taakkununnga tusarliisussamik aallartitsinngitsuunngilaq. Ezekieli 30-nik ukiulik pruffiititut toqqarpaa.

Ezekielip allagai ukiumi 591-imi u.n.s. allallugit naammassineqarput, ukiullu 22-t ingerlaneranni pisimasut allaatigineqarput. Ezekieli peqqissaartumik eqqoqqissaartumillu allappoq. Siulittuutimi ukiumi sorlermi pinissaat taaginnartanngilai, aammali qaammammi ullormilu sorlermi pissanersut taasarpai. Ezekielip tusarliussaata immikkoortua siulleq Jerusalemip uppititaanissaanut aserugaanissaanullu tunngavoq. Immikkoortuata aappaat inuiannut eqqaamiuusunut eqqartuussutinik imaqarpoq, immikkoortorlu kingulleq Jehovamik pallorfiginninnermik pilersitseqqinnissamut tunngavoq. Allaaserisami matumani Ezekieli 1:1-imiit 24:27-mut pingaarnersat sammineqassapput, kapitalit taakkua imaraat Jerusalemip qanoq pineqarumaarneranik takorruukkat, siulittuutit isiginnaartitsinerillu.

„ISRAELIKKUNNUT ALAATSINAATTUNNGORTIPPAKKIT“

(Ezekieli 1:1–19:14)

Ezekieli Jehovap issiavissaarsua pillugu mianernangaartumik takorruuisitaareerluni suliassaminut piginnaatinneqarpoq. „Illit inuk, Israelikkunnut alaatsinaattunngortippakkit,“ Jehovap oqarfigaa, „uanga qaninnit oqaasersiguit uannit kalerrisaassavatit.“ (Ezekieli 3:17) Ezekieli peqquneqarpoq Jerusalemip ungusaajumaarneranik, tamatumalu kinguneriumaagaanik, siulittuutaasunik pantomimenik marlunnik isiginnaartitseqqullugu. Ezekieli aqqutigalugu Judap nunaa pillugu Jehova ima oqarpoq: „Panamik aallartitsivigalusi qattorngit pilliisarfisi piuneerutissavakka.“ (Ezekieli 6:3) Nunap inuinut ima oqarpoq: „Ajunaarnerit malittariiginnassapput!“ — Ezekieli 7:5.

612-imi u.n.s. Ezekieli takorruuinikkut Jerusalemimut pisitaavoq. Guutip naalaffiani maajunnartunik pisoqarpoq! Jehovap sakkutuuni qilammiut tunussisunut kamannini ersersinniarlugu eqqartuussutiminik naammassinnittussat (angutitut arfinilittut eqqaaneqartut) aallartippagit „qaamikkut nalunaaqutsigaasut“ kisimik asattuunneqassapput. (Ezekieli 9:2-6) Siullermilli illoqarfimmut siammarterneqassapput ’aamat’ — aseruinissaq pillugu Guutip tusarliussaa ikumasutut ittoq. (Ezekieli 10:2) ’Jehovap guutiitsut iliorfigissavai inuuserisaat naapertorlugu’, neriorsuivorli Israelikkut siammarsimasut tamaasa katersoqqikkumallugit. — Ezekieli 11:17-21.

Guutip anersaavata Ezekieli Kaldæamut oqquppaa. Ezekielip kunngi Sidkijap inuillu Jerusalemimit qimaanerat allaatigaa. Pruffiitioqqusersut angutit arnallu assuarai. Guutipilussiortut ajattorneqarput. Juda viinneqummut atorfissaqanngitsumut assersuunneqarpoq. Nattoralik viinnequllu pillugit nalorsitsaarummi Jerusalemip Egyptenimut ikiortissarsiornerata kingunipilui ersersinneqarput. Nalorsitsaarut naggaserneqarpoq ’Jehovap avaleqummik naarlaannguamik qaqqarsuarmut ikkussiumaarneranik’ neriorsuummik. (Ezekieli 17:22) Judamili „kunngip tigumiassaanik“ soqassanngilaq. — Ezekieli 19:14.

Allassimaffiit pillugit apeqqutit akineqartut:

1:4-28 — Qamutit qilammiittut sumut assersuutaappat? Jehovap peqatigiissortaasa ilaat qilammiittut pinngortitat anersaajusut aalajaatsut  qamutinut qilammiittunut assersuunneqarput. Jehovap anersaavata illernartup ingerlatippai. Qamutit ingerlatitsisuat, tassaasoq Jehova, oqaatigineqarsinnaanngitsumik naalannassuseqarpoq. Eqqissisimaneq ilisarnaatigisaa neriusaamut alianaatsumut assersuunneqarpoq.

1:5-11 — Uumasorsuartut ittut sisamat kikkuuppat? Ezekielip qamutit qilammiittut pillugit takorruukkami aappaanni uumasorsuartut ittut sisamat kerubiunerarpai. (Ezekieli 10:1-11; 11:22) Tassani ussittut kiinalik „kerubip kiinaanik“ kiinalittut eqqartorpaa. (Ezekieli 10:14) Taamatut taaneqarnera naleqqulluarpoq ussimmi pissaanermut assersuutaasarpoq, kerubillu anersaajupput pissaaneqangaartut.

2:6 — Sooq Ezekieli ’illit inummik’ taaneqaqattaarpa? Jehovap Ezekieli taamatut oqaluuppaa pruffiiti eqqaasinniarlugu uiniliullunilu aattaliusoq, taamaalilluni tusarliisup nunarsuarmiuusup tusarliussallu pilerfiata, Jehovap, assigiinngissutaat erseqqissarneqarpoq. Jiisusi Kristusi iivangkiiliuni 80-ingajariarluni inuup erneranik taaneqarpoq, taamatullu taaneqartarneranit erserluarpoq Guutip ernera inuttut tikiuttoq tassaananilu anersaaq timitaligaq.

2:9–3:3 — Sooq mappersagaq kappialaataasoq anersaaruluutaasorlu tungusunnitsuutitut mamartigisutut Ezekielip mamaraa? Ezekielip suliassaminut isiginnittaasia pissutaalluni mappersagaq tungusunnitsuutitut mamaraa. Ezekielip pruffiititut Jehovamut kiffartorsinnaanini nuannaarutigaa.

4:1-17 — Jerusalemip ungusaanissaanut qanillisumut assersuutaasoq ilumut Ezekielip isiginnaartitsissutigaa? Ilumut Ezekielip taamatut isiginnaartitsisimanera erserpoq qisussatut innersuussutigineqaqqaartunik allaanerusunik qisoqarsinnaanerminik Jehovamut qinuneranit, Jehovallu akuersineranit. Ezekieli saamimmut nalavoq naggueqatigiissortat quliusut naalagaaffiata ukiuni 390-ini — naalagaaffiup 997-imi u.n.s. pilersinneqarneraniit 607-imi u.n.s. Jerusalemip aserugaanissaata tungaanut — ajortuliaat pillugit. Talerpimmut nalavoq Judap ukiuni 40-ni — 647-miit u.n.s. Jeremiap pruffiititut toqqarneqarneraniit 607-imut u.n.s. — ajortuliai pillugit. Ulluni 430-ni taakkunani Ezekielip nerisassamininnguit imimininnguarlu inuussutigai taamaalillunilu siulittuutaasumik ersersillugu Jerusalemip ungusaaqqanerani kaannersuaqarumaartoq.

5:1-3 — Ezekielip nujaajarnerlukut anorimut teqqalatitassat ilamernginik tigusaminik qallersaammi nuuanut nermussinera sumut assersuutaava? Nunap ukiuni 70-ini inoqannginnerata kingorna amiakkuusut Judamut uterumaarnerat ilumoortumillu pallorfiginneqqilernissaat tamatumani ersersinneqarpoq. — Ezekieli 11:17-20.

17:1-24 — Nattoralissuit marluk kikkuuppat, cederillu nutaaliornera qanoq nusunneqarpa, avalequllu „naarlaannguaq“ Jehovap ikkussaa kinaava? Nattorallit taakkua marluk Babylonimiut Egyptenimiullu naalakkersuisuinut assersuutaapput. Nattoralik siulleq pivoq cederip kaarfanut, tassa Daavip kinguaavini kunngikkormiuni kunngiussusermut naalagaasumut. Nattorallip cederip nutaaliornera nusuppaa Judakkunnut kunngiusup Jojakinip peersinneratigut Sidkijammimillu taarserneratigut. Naak Sidkija Babylonimiut naalakkersuisuanut ilumoorfiginnikkumalluni neriorsuisimagaluarluni nattoralimmut allamut, Egyptenimiut naalakkersuisuanut, ikiortissarsiorpoq, iluaqutaanngitsumilli. Sidkija tigusarineqassaaq Babylonimilu toqussalluni. Aamma Jehova nusutaqarpoq tassa avalequt „naarlaannguaq“,  Missiarsitut kunngiusoq. Taanna ikkunneqarpoq „qaqqarsuarmut kingittumut“, qaqqamut Zionimut qilammiittumut, tassani ’cederinngussaaq alutornaqisoq’, aap, nunarsuarmut tamarmut pilluaqqussutaangaassaaq. — Saqqummersitat 14:1.

Ilinniarfigisinnaasavut:

2:6-8; 3:8, 9, 18-21. Inuit guutiitsut annilaarutigalugit Guutip tusarliussaa, taakkununnga mianersoqqussummik ilaqartoq, oqaluussissutiginngitsuussanngilarput. Inuit soqutiginninnginnermik ersersitsigaangata akerlilersuigaangataluunniit diamantitut manngertigisariaqarpugut. Mianersuutigisariaqarparpulli naakkittaatsunngunnginnissaq, misigittaatsunngunnginnissaq soqutigittaatsunngunnginnissarluunniit. Jiisusip oqaluussiffigisani misiginneqatigisarpai, aamma uagut taamaattariaqarpugut. — Matthæusi 9:36.

3:15. Ezekieli suliassaminut piginnaatitaareerluni ulluni arfineq-marlunni — ’annilaarsimangaarluni’ — Tel-Abibimiippoq tusarliussaq oqaluussissutigisassani eqqarsaatigilluarniarlugu. Anersaakkut sallusuissutit itisuut paasilluarumallugit, aamma uagut eqiasuilluta atuaqqissaarnissamut atuakkatsinnillu eqqarsaatiginneqqissaarnissamut piffissaqartariaqarpugut, ilaa?

4:1–5:4. Ezekielip pantomimet siulittuutaasut marluk taakkua isiginnaartitsissutigissagunigit maniguuttuusariaqarlunilu sapiissuseqartariaqarpoq. Qanorluunniit ittumik Guutimit suliassinneqaraangatta aamma uagut maniguuttuullutalu sapiitsuusariaqarpugut.

7:4, 9; 8:18; 9:5, 10. Jehovap iluarisaanngitsutut eqqartuussai nalligisariaqanngilagut, misiginneqatigisariaqarnagilluunniit.

7:19. Jehovap pissutsit aaqqissuussaanerannut matumunnga eqqartuussutini naammassippagu aningaasat naleerulluinnarsimassapput.

8:5-18. Tunussineq anersaakkut toqunarpoq. „Guutiitsup tullini qanermigut ajoqutissarsisarpaa.“ (Ussatit 11:9) Tunussisunik tusarnaarnissamik eqqarsaateqarnerinnarluunniit itigartikkutsigu silatusaassaagut.

9:3-6. ’Naalliunnartoqangaarnissamit’ aniguissagutta pingaaruteqarluinnarpoq nalunaaquteqarnissarput — tassa Guutimut kiffaasutut tunniulluinnarsimanitsinnut, kuisissimanitsinnut kristumiutullu pissuseqalersimanitsinnut ilisarnaateqarnissarput. (Matthæusi 24:21) Kristumiut tanitat, angutitut ’allaffissiamik siffiarmiulittut’ eqqaaneqartut, taamatut nalunaaqutsersuinermi, tassa Guutip naalagaaffia pillugu oqaluussinermi ajoqersuganngortitsiortornermilu, siuttuupput. Nalunaaquterput pigiinnarumagutsigu suliamik tamatumannga aallussilluarluta ikiortariaqarpavut.

12:26-28. Ezekielip tusarliussaminik mitaatiginnittut allaat ima oqarfigissavai: „Ungasikkunnaarpoq! Oqaatsikka tamarmik eqquutissapput, oqarpoq Guuti [Jehova].“ Pissutsit aaqqissuussaanerat manna Jehovamit atuukkunnaarsinneqartinnagu inuit allat Jehovamik tatiginnilersinniarlugit sapinngisarput tamaat ikiortariaqarpavut.

14:12-23. Annaanneqarnissarput nammineq akisussaaffigaarput. Allat annaanneqartissinnaanngilaatigut. — Romamiut 14:12.

18:1-29. Iliuuserisatta kingunerisaat nammineq akisussaaffigaavut.

„PIUNEERUSSAANEQ, PIUNEERUSSAANEQ, PIUNEERUSSIARTORPUNGA“

(Ezekieli 20:1–24:27)

Ukiumi 611-mi u.n.s., aallarussaaqqanerup ukiuisa arfineq-aappaanni, angutit Israelip utoqqaanertaasa ilaat Ezekielimukarput „[Jehova] siunersioriartorlugu“. Ezekielip Israelikkut pikitsitseqattaarnerat taakkununnga oqaluttuaraa mianersoqqullugillu ’Jehovap panani puuanit amujumaaraa’ nungutillugillu. (Ezekieli 20:1; 21:8) Israelip naalagaaneranut (Sidkijamut) Jehova ima oqarpoq: „Nasartaataasat peeruk niaqorutaarlutillu! Pissutsit taamaattuaannassanngillat; nikanartoq ataqqinarsissaaq ataqqinartorlu nikanarsilluni! Piuneerussaaneq, piuneerussaaneq, piuneerussiartorpunga.“ (Ezekieli 21:31, 32a) Jehovalu ima nangippoq: ’Tamannaluunniit atassanngilaq; kisianni piginnittussaq [Jiisusi Kristusi] tikiuppat, taassumunnga tunniukkumaarpara.’ — Ezekieli 21:32b, 1900/1961.

Jerusalemi unnerluussaavoq. Oholap (Israelip) aamma Oholibap (Judap) pisuussutaat qulaarneqarput. Ohola ’Assyriamiunut tiinngavigisaanut tunniunneqareerpoq’. (Ezekieli 23:9) Oholiba piuneerussaangajalerpoq. Jerusalemip qaammatini 18-ini ungusaaqqanera 609-mi u.n.s.  aallartippoq. Naggataatigut illoqarfik aserugaappat juutit tupaqqanermik aliasunnertik ersersissinnaassanngilaat. Ezekieli, illoqarfiup aserugaanera pillugu ’qimaatitamit’ nalunaarfigineqartinnani, Guutip qanoq oqarnera pillugu aallarussaasunut oqaqqusaanngilaq. — Ezekieli 24:26, 27.

Allassimaffiit pillugit apeqqutit akineqartut:

21:8 — ’Pana’ Jehovap puuanit amusaa suua? ’Pana’ Jehovap Jerusalemimut Judamullu eqqartuussumminik naammassinnitsisisua paasinarsivoq tassaasoq Babylonip kunngia, Nebukadnesari, taassumalu sakkutuui. Imaalluarsinnaavoq aamma taakkununnga ilaasut Guutip peqatigiissortai qilammiittut, pinngortitat anersaajusut pissaanillit.

24:6-14 — Igap manngertornia sumut assersuutaava? Jerusalemi ungusaaqqasoq igamut assersuunneqarpoq. Manngertorneq illoqarfiup ileqqussatigut ajortunngorsimaneranut — minguttuujuneranut, kannguttaatsuliorneranut aammillu kuisinermut illoqarfiup pisuussuteqarneranut — assersuutaavoq. Illoqarfik ima minguttutigaaq iga imaqanngitsoq aamanut inissinneqaraluarami kissalluarneqaraluaramilu manngertorneerunnani.

Ilinniarfigisinnaasavut:

20:1; 21:5. Angutit Israelip utoqqaanertaasa ilaasa Ezekielimut akissutaannit erserpoq Ezekielip oqaasii upperiuminaatsikkaat. Guutip siulittuutaasa eqquukkumaarnerat qularutigilinngisaannartigutoq.

21:23-27. Nebukadnesari siulittuigaluartoq taamaattoq naalakkersuisut silamiut Jerusalemimut saassussinissaannut Jehova isumaginnittuuvoq. Tamatuma ersersippaa Jehovap siunertaa naammassillugu taassuma eqqartuussutaanik naammassinnittussat allaat anersaapiluit akornusersinnaanngikkaat.

22:6-16. Jehovap kannguttaatsuliornerit, pissaanermik atornerluinerit akilersillunilu peqquserlunnerit maajugai. Eqqunngitsuliornerit taamaattut ingalassimanissaat aalajangiusimalluinnartariaqarparput.

23:5-49. Israelip Judallu politikkikkut ilaqalernertik iligilikkaminnik guutipilussioqateqalernerannik kinguneqarpoq. Upperunnaassutigilersinnaasatsinnik silamiunik qanimut attaveqalinngisaannarta. — Jaaku 4:4.

Tusarliussaq uumasoq sunniisinnaassuseqartorlu

Ezekielip allagaani kapitalinit 24-nit siullernit ilikkakkavut ilumut naleqangaarput. Najoqqutassianit saqqummiunneqartunit erserput suut Jehovamit iluarisaajunnaassutaasarnersut, qanoq taassumannga nallittorneqarsinnaanersugut aamma sooq guutiitsut mianersoqqusariaqarivut. Jerusalemip aserugaanissaanik siulittuummit paasinarluarpoq Jehova Guutiusoq ’naalersut puttutinnginneranni nutaanik innuttaminut saqqummiussisartuusoq’. — Esaja 42:9.

Siulittuutit Ezekieli 17:22-24-mi aamma 21:31, 32-mi allassimasut naalagaaffiup Missiarsikkoortup qilammiittup pilersinneqarneranut tikkuussipput. Qanittuararsuakkat naalagaaffiup tamatuma Guutip piumasaata pinissaa isumagissavaa. (Matthæusi 6:9, 10) Upperluarluta qulanngilluinnarlutalu Guutip naalagaaffiata pilluaqqussutissartai qilanaarisinnaavavut. Aap, „Guutip oqaasia uumavoq sunniisinnaassuseqarlunilu“. — Hebræerit 4:12. (wE 7/1 07)

[Qupp. 10-mi assiliartaq]

Qamutit qilammiittut sumut assersuutaappat?

[Qupp. 12-mi assiliartaq]

Aallussilluarluta oqaluusseqataasarnikkut ’nalunaaquterput’ pigiinnarsinnaavarput