Jehovap naalannerput qujamasuutigisarpaa

„Ernera, ilisimasuuniarit taamalu uummatiga nuannaartillugu.“ — USSATIT 27:11.

1. Ullumikkut inuiaqatigiit anersaamit sumit sunnerneqarluinnarsimappat?

ULLUTSINNI silarsuaq siulersorneqarumanngissutsip naalannginnerullu anersaavannit sunnerneqarluinnarsimavoq. Apustilip Paulusip tamatumunnga pissutaasoq kristumiunut Efesosimiittunut allakkamini eqqaavaa: „Siornatigut . . . inuunersi [aalajangerneqartittarparsi] silarsuup matuma pissuserisaanit silaannarsuullu naalagaaffiani naalagaasumit, naalasseriitsut qitornaannut sunniuteqartuartumit.“ (Efesosimiut 2:1, 2) Aap, Saatani Diaavulup, ’silaannarsuup naalagaaffiani naalagaasup’, silarsuaq tamaat naalannginnerup anersaavanik tunillassimavaalusooq. Ukiuni hundredelinni siullerni tunillaavoq, sorsunnersuullu siulliup nalaani qilammit igitaagamili suli tunillaaniarnerulerpoq. — Saqqummersitat 12:9.

2, 3. Suut pissutigalugit Jehovamut naalattariaqarpugut?

² Uagulli kristumiuugatta nalunngilarput Jehova Guuti qamannga pisumik naalanneqartariaqartoq Pinngortitsisigigatsigu, Inuuinnartitsisigigatsigu, Kisimi Oqartussaasuummat asannittoq aamma Aniguisitsisigigatsigu. (Tussiaat 148:5, 6; Apustilit Suliaat 4:24; Kolossemiut 1:13; Saqqummersitat 4:11) Mosesip nalaani Israelikkut nalunngilaat Jehova Inuunermik Tunisisoralugulu Annaassisigalugu. Taamaattumik Mosesip taakkua ima oqarfigai: „[Jehovap] Guutissi ilissinnut peqqussutigisai maleruaqqissaarniarsigit.“ (5 Mosesi 5:32) Aap, Jehova taakkunannga naalanneqartariaqarpoq. Sivitsunngitsorli Kisimi Oqartussaasoq naalakkunnaarpaat.

³ Qilammik nunarsuarmillu Pinngortitsisup naalannissarput qanoq pingaartitsigaa? Ilaanni Guutip pruffiiti Samueli kunngimut Saulimut ima oqartippaa: „Naalanneq pilliutinit pitsaaneruvoq.“ (1 Samueli 15:22, 23) Sooq taamaappa?

Sooq naalanneq ’pilliutinit pitsaanerusoq’

4. Jehova sumik tunisinnaavarput?

⁴ Jehova Pinngortitsisuugami pigisatsinnik tamanik piginnittooreerpoq. Taamaappat uagut taassumunnga arlaannik tunissuteqarsinnaavugut? Aap, erlinnangaartumik tunisinnaavarput. Sumik? Kajumissaarummi matumani tamanna akissutissarsisinnaavarput: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ (Ussatit 27:11) Tassa naalannerput Guutimut tunissutigisinnaavarput.  Pissutsit atukkavut qanorluunniit ikkaluarpata qanorluunniillu tunuliaqutaqaraluarutta tamatta immikkut naalannitsigut inuit misilinneqarunik Guutimut ilumoorfiginnittuarnaviannginnerannik Saatanip oqarnera ilumuunnginnerassavarput. Tamanna immikkut pisinnaatitaaffiuvoq!

5. Inuit naalannginnerat Jehovamut qanoq sunniuteqartarpa? Assersuuteqarit.

⁵ Guutip aalajangertakkavut soqutigai. Naalanngikkutta, tamanna taassumunnga sunniuteqassaaq. Qanoq? Sianiilliortoqaraangat aliasuutigisaqaa. (Tussiaat 78:40, 41) Takorlooriaruk sukkortoq peqqissartutut immikkut nerisassanik iluaqutissaminik nakorsami nereqqusaanik neriumanani peqqinnanngitsunik neriuartoq. Nakorsaa isumassuisoq qanoq misigissagaluarpa? Qularutigissanngilarput Jehovap inuit naalanngikkaanganni aliasuutigisaraa, ’nakorsaatissiissutiminimmi’, ajunngitsumik inuunissamut najoqqutassiaminik, sumiginnaanerup kinguneri nalunngilai.

6. Guutimut naalanneq qanoq ililluta ilinniarsinnaavarput?

⁶ Tamatta immikkut qanoq ililluta naalanneq ilinniarsinnaavarput? Tamatta immikkut pissutissaqarluarpugut Guutip ’naalattumik uummateqaqqulluta’ qinnuiginissaanut, Salomop iliorsimaneratut. Taama ittumik uummateqarnissani qinnutigaa Israelikkoqatiminut eqqartuussisuussagaangami ’ajunngitsunik ajortunillu immikkoortitsisinnaaniassagami’. (1 Kunngit 3:9, NV) Silarsuarmi naalannginnerup anersaavanit sunnerneqarluinnarsimasumi ajunngitsunik ajortunillu immikkoortitsissagutta ’naalattumik uummateqarnissarput’ pisariaqartipparput. Guutip oqaatsini, kristumiut ataatsimiinneri, utoqqaanertat isumassuisut Biibilimillu atuaqqissaarnissamut iluaqutissat uagutsinnut asannilluni tunniuppai ’uummammik naalattumik’ ineriartortitsisinnaaniassagatta. Tunissutit tamakkua atorluartarpavut?

7. Sooq Jehovap naalanneq pilliutinit pingaarnerutippaa?

⁷ Tamatumunnga tunngatillugu eqqaamasariaqarparput Jehovap itsaq innuttani ilisimatikkai naalanneq uumasunik pilliutinit pingaarnerutillugu. (Ussatit 21:3, 27; Hosea 6:6; Matthæusi 12:7) Jehovap nammineq kiffani peqqusimagunigit tamakkuninnga pilliisaqqullugit, sooq naalanneq pingaarnerutippaa? Pilliinissamut pissutiginiakkamik misissuinissaq pingaaruteqarmat. Pilliisoq Guutimit iluarisaaniarluni pilliiva? Imaluunniit ileqqulersuutaannartut isigalugu taamaaliorpa? Pallorfiginnittup Guutimit iluarisaanissani ilumoorluni kissaatigiguniuk taassuma peqqussutai tamaasa naalaqqissaarniassavai. Guutip uumasunik pilliutit pisariaqartinngilai; naalannissarpulli pingaartingaarpaa.

Mianersoqqussut

8. Saulip Guutimit iluarisaajunnaarneranut pissutaasoq suua?

⁸ Kunngi Sauli pillugu oqaluttuaq Biibilimiittoq naalannissap qanoq pingaaruteqartigineranut erseqqissaataavoq. Aallaqqaammut Sauli naalakkersuisuuvoq maniguullunilu anneruniajuitsoq, ’nikanartutut imminut isigisoq’. Piffissalli ingerlanerani makitanera kukkusumillu isummertarnera aalajangigaanut sunniuteqartalerput. (1 Samueli 10:21, 22; 15:17) Ilaanni Sauli filisterinut akiuuttussaasoq Samuelip utaqqeqquaa Jehovamut pilliuteqaqqaartussaagami sulilu allanik ilitsersuussuteqartussaagami. Samuelili ilimagineqartutut takkutiaartiginngilaq, inuillu siammakaalerput. Siammakaalermata Saulip pilliut ikikkagassaq pilliutigaa. Jehovap tamanna iluarinngilaa. Samueli kiisami takkummat Saulip Samuelip mulunera naalannginnerminut patsisiliuppaa. Taamaattumik Saulip Jehovamit iluarineqarniarluni pilliut ikikkagassaq ’sapiiserluni’ pilliutigaa. Kunngip pilliuteqarnissaq pruffiitip pilliuteqarnissaata utaqqinissaa pillugu peqqussummut naalannissaminngarnit pingaaruteqarnerusutut isigaa. Samuelip taanna ima oqarfigaa: „Sianiitsuliorputit! [Jehovap] Guutivit ilinnut peqqussutaa [maleruarsimanngilat].“ Sauli Jehovamut naalannginnini pissutigalugu kunngitut taassumannga iluarisaajunnaarpoq. — 1 Samueli 10:8; 13:5-13.

9. Sumit erserpa Saulip Guutimut naalanngittarneq ileqquliussimagaa?

⁹ Kunngip misigisani tamanna ilinniutigaa? Naagga. Kingusinnerusukkut Jehovap Sauli  peqquaa Amalekikkunnik, inuiaqatigiinnik pissutissaqaratik Israelimik saassussisimasunik, nungutitseqqullugu. Aamma Sauli nersutaatinilluunniit asattuussisussaanngilaq. Jehova naalappaa ’Amalekikkut artorsartillugillu malersorlugit Havilamit Shuri tikivillugu’. Samuelip naapikkiartorluni tikiummat kunngi ajugaasimaarpalulluni ima oqarpoq: „[Jehovap] pilluaqqulisit! [Jehovap] peqqussutigisaa malillugu iliorsimavunga.“ Saulilli angutitaasalu imminnut unnersuussutigineqartunut paasiuminartunut akerliusumik iliorlutik kunngi Agagi „savaatillu nersutaatillu nersutaatillu puallarsakkat savaaqqallu akornanni pitsaanerit, tassami pitsaanerit suut tamaasa“ asattuussimavaat. Saulip naalannginnini eqqortutut isigineqalersinniarsaraa ima oqarluni: „[Inuit] savaatit nersutaatillu pitsaanersaat [asattuuppaat] [Jehovamut] Guutinnut pilliutigiumallugit.“ — 1 Samueli 15:1-15.

10. Saulip ilinniutissaq suna paasinngilaa?

¹⁰ Taava Samuelip Sauli ima oqarfigaa: „[Jehovap] pilliutissat ikikkagassat toqutassallu naalanneqarnissamisut pingaartitsiginerpai? Naaggali, naalanneq pilliutinit pitsaaneruvoq, naalaarnerlu pitsaaneruvoq savat angutivissat tunnuannit.“ (1 Samueli 15:22) Jehovap uumasut taakkua toqunneqarnissaat aalajangiussimammagu pilliutitut akuerineqarsinnaanngillat.

Tamatigut naalattarit

11, 12. (a) Jehovamit iluarisaaniarluta iliuuserisartakkavut taassuma qanoq isigai? (b) Qanoq ililluni imminut salloqittartoqarsinnaava isumaqarluni Guutip piumasaatut iliorluni uffa naalanngilluni?

¹¹ Jehovap kiffani ilumoorfiginnittut malersugaanerminni pinertusaartut, inuit amerlanersaat soqutiginninngikkaluartut Guutip naalagaaffianik oqaluussissutiginnittut sulingaatsiartinniarsarineqaraluarlutillu kristumiut ataatsimiinnerinut ataatsimiigiartut takullugit nuannaartaqaaq! Anersaakkut inuunitsinnut attuumassuteqartunut pingaaruteqartunut tamakkununnga tunngatillugu naalanneq Jehovap uummataanik nuannaartitsisarpoq! Kiffartorfiginiarlugu iliuuserisartakkavut erlinnartutut isigisarpai, asanninneq iliuuseqarnitsinnut kajumississutigigutsigu. Inuit immaqa iliuuserisavut arajutsisarpaat, Guutilli uummatikkut iluunngarluta pilliutigisavut malugisarlugillu eqqaamavai. — Matthæusi 6:4.

¹² Guutimilli tamakkiisumik iluarisaajumalluta inuunermi sutigut tamatigut naalattariaqarpugut. Immitsinnut salloqittanngisaannartariaqarpugut isumaqarluta Guutip piumasaqaataasa ilaat sumiginnarsinnaallugit allanut tunngatillugu piumasaatut iliortartilluta. Assersuutigalugu inuk imminut salloqittarsinnaavoq isumaqarluni aalajangersimasumik qallikkuinnaq kiffartortaruni kingunerlutsitsinani inuunerluttuliorsinnaalluni imaluunniit ingasattumik allanik unioqqutitsisinnaalluni. Tamanna kukkorujussuarnerussaaq! — Galatiamiut 6:7, 8.

13. Jehovamut naalannerput allanit isigineqartinnata qanoq misilinneqarsinnaava?

 ¹³ Taamaattumik imminut ima aperinissatsinnut pissutissaqarluarpugut: ’Ulluinnarni Jehovamut naalattarpunga, aamma uannuinnaq tunngasuusorinartut eqqarsaatigalugit?’ Jiisusi ima oqarpoq: „Annikitsutigut ilumoortoq annertuutiguttaaq ilumoorpoq. Annikitsutigut peqquserluttoq annertuutiguttaaq peqquserluppoq.“ (Lukasi 16:10) ’Uummatikkut assuarnaalluta inuuvugut’, aamma ’illutsinni’ allanit isigineqarfiginngisatsinni? (Tussiaat 101:2) Aap, ilumoorfiginninnerput angerlarsimaffitsinni misilinneqarsinnaavoq. Nunarpassuarni inoqutigiit amerlanersaanni qarasaasiaqarpoq, assillu kinguaassiuutitigut inuunerlunnermut tunngasut iserfigineqariaannaapput. Ukiualuinnaat matuma siorna sapiiserluni aliikkusersuutinik inuunerlunnermut tunngasunik neqerooruteqarfiusartunukaraanni aatsaat tamakkua takuneqarsinnaapput. Jiisusip oqaasii naalalluta pigiliukkumavavut? Taanna ima oqarpoq: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ Taamaattumik assit kinguaassiuutitigut inuunerlunnermut tunngasut isigiumanngilavulluunniit? (Matthæusi 5:28; Jobi 31:1, 9, 10; Tussiaat 119:37; Ussatit 6:24, 25; Efesosimiut 5:3-5) Tv-mimi aallakaatitat nakuusernertallit? Guutitut ’nakuusernermik nuannarisaqartumik uumiginnittutut’ isiginnittaaseqarpugut? (Tussiaat 11:5) Kisimiikkaangattami ingasattumik imigassartorneq? Biibilimi aalakoorneq assuarineqarpoq, aammattaarli ’imerajuttunngornissaq’ kristumiunut mianersoqqussutigineqarpoq. — Titusi 2:3; Lukasi 21:34, 35; 1 Timotheusi 3:3.

14. Qanoq ililluta ersersissinnaavarput aningaasanut tunngatillugu Guutimut naalattuulluta?

¹⁴ Aamma aningaasanut tunngatillugu mianersortariaqarpugut. Assersuutigalugu pisuunngupallanniutaasumik, peqquserlunnertaqartumilli, niuernikkut ingerlatseqataassagaluarpugut? Akileraarutinut tunngatillugu peqquserlunnissamut ussernartorsiorpugut? Imaluunniit ilaatigut akileraarnikkut ’uagutsinnit pisassaqartut tamaasa pisassaannik tuninissaannik’ peqqussut naalaqqissaartarparput? — Romamiut 13:7.

Asanninneq kajumississutigalugu naalanneq

15. Sooq Jehovap peqqussutai naalattarpigit?

¹⁵ Guutip unnersuussutaanut naalanneq pilluaqqusaanarpoq. Assersuutigalugu tupatortanngikkutta, ileqqussatigut minguitsumik inuugutta aallu illernassusianik ataqqinnikkutta aalajangersimasunik nappaateqalernissaq pinngitsoorsinnaavarput. Aamma Biibilimi siunnersuutinik inuunermut attuumassuteqartunik allanik malinninnerput aningaasatigut, inuttut atugarisatigut ilaqutariittullu inuunermi iluaqutigisinnaavarput. (Esaja 48:17) Iluaqutit erseqqissut tamakkua tamaasa pilluaqqussutitut Guutip inatsisaanik ilumut maleruaasoqarsinnaaneranut aamma taakkuninnga maleruaanerup iluaqutaaneranut uppernarsaataasutut pissutissaqarluarluta isigisinnaavavut. Jehovamulli naalannitsinnut pissutaasoq pingaarnerpaaq tassaavoq taassuminnga asanninnerput. Namminissarsiortunik pissuteqarnata Guutimut kiffartorpugut. (Jobi 1:9-11; 2:4, 5) Kimut naalakkumanerluta nammineq aalajangernissamut Guutip kiffaanngissuseqartippaatigut. Jehovamut naalanniarluta aalajangerpugut taassumannga iluarisaarusukkatta aamma eqqortumik iliorniaratta. — Romamiut 6:16, 17; 1 Johannesi 5:3.

16, 17. (a) Jiisusip uummatikkut iluunngarluni asanninnini kajumississutigalugu Guutimut naalanneq qanoq ersersippaa? (b) Jiisusi qanoq ilaarsinnaavarput?

¹⁶ Jiisusi Jehovamik uummatikkut iluunngarluni asanninnini kajumississutigalugu taassumunnga naalanneq eqqarsaatigalugu naammalluinnartumik maligassiuivoq. (Johannesi 8:28, 29) Jiisusip nunarsuarmiitilluni ’naalliuutimigut naalanneq ilinniarpaa’. (Hebræerit 5:8, 9) Qanoq? ’Nikanartinnermigut naalalluni toqumut, sanningasulimmi [nappakkami anniartitaaffimmi, NV]toqumut allaat’. (Filippimiut 2:7, 8) Jiisusi qilammiillunili naalattooreeraluarluni nunarsuarmi maani naalannera suli annerusumik misilinneqarpoq. Qularutigissanngilarput Jiisusip anersaakkut qatanngutiminut  uppertunullu allanut palasiunertut kiffartornissaminut sutigut tamatigut piukkunnarluartuunera. — Hebræerit 4:15; 1 Johannesi 2:1, 2.

¹⁷ Uagummi? Jiisusi ilaarsinnaavarput Guutimut naalannermik taassumalu piumasaatut iliornermik pingaartitsinitsigut. (1 Petrusi 2:21) Inuttut nalerisimaalersinnaavugut naalannginnissamut tatineqarlutalu ussernartorsioraluarluta Jehovamik asanninnerput taassuma piumasaatut iliornissamut kajumississutigigaangatsigu. (Romamiut 7:18-20) Tamatumunnga ilaavoq pallorfiginninnermi ilumoortumi siuttuusut unnersuussutaannut naalannissamut piumassuseqarnerput, naak taakku naammalluinnanngitsuugaluartut. (Hebræerit 13:17) Kisimiitsilluta Jehovap peqqussutaanut naalattarnerput Jehovap erlinnartutut isigaa.

18, 19. Uummammit pisumik Guutimut naalannerput qanoq kinguneqartarpa?

¹⁸ Aamma malersorneqarnermi ilumoorfiginnittuarnitsigut Jehovamut naalannitsinnik ersersitsinissarput pisariaqalersinnaavoq. (Apustilit Suliaat 5:29) Aamma Guutip oqaluussinissamik ilinniartitsinissamillu peqqussutaanut naalassagutta pissutsit aaqqissuussaanerata maanna atuuttup naggatissaa tikivillugu pinertusaartariaqarpugut. (Matthæusi 24:13, 14; 28:19, 20) Silarsuarmit tatineqaraluarluta qatanngutivut naapeqatigiuarumallugit pinertusaartariaqarpugut. Guutitta asannittup tamakkununnga tunngatillugu naalanniarluta iliuuserisartakkavut tamaasa nalunngilai. Naalattuulluinnassaguttali uinipput ajortiliusoq akiortariaqarparput ajunngitsunillu nuannarinninnerput ineriartortiitigalugu ajortut alartariaqarlutigit. — Romamiut 12:9.

¹⁹ Asanninneq kajumississutigalugu qujamasungaarlutalu Jehovamut kiffartorutta nammineq misigissavarput taassuma ’ujarlersiminik akissarsisitsisarnera’. (Hebræerit 11:6) Eqqortunik pilliuteqartarnerput pisariaqarlunilu Jehovamut nuannaarutaasarpoq, taassumali iluarinerpaasaa tassaavoq naalalluinnarneq taassumunnga asanninnermik aallaavilik. — Ussatit 3:1, 2. (wE 6/15 07)

Qanoq akissavit?

• Jehova sumik tunisinnaavarput?

• Saulip suut kukkussutigai?

• Naalannerup pilliutinit pitsaaneruneranik upperinninnerit qanoq ilillutit ersersissinnaaviuk?

• Jehovamut naalannissannut suna illit kajumississutigisarpiuk?

[Atuaqqissaarnermi apeqqutit]

[Qupp. 28-mi assiliartaq]

Nakorsaq isumassuisoq qanoq misigissagaluarpa napparsimasup siunnersuutini sumiginnarpagit?

[Qupp. 30-mi assiliartaq]

Sooq kunngi Sauli Jehovamit iluarisaajunnaarpa?

[Qupp. 32-mi assiliartat]

Guutip peqqussutai kisimiikkaangavit naalattarpigit?