Sooq ilumoortuussaagut?

MANFRED 18-inik ukioqarluni allaffimmiutut ilinniartuuvoq. * Suliffigisaanit isumagineqarpoq Manfred ilinniartullu allat sapaatip-akunneranut marloriarlutik niuernermut ilinniarfimmi atuartarnissaat. Ullut ilaanni atuartut soraajaarnerupput. Suliffimmi malittarisassat malillugit suliartoqqittussaagaluarlutik taamaaliornatik ilinniartut aliikkusiarput. Manfred kisimi suliartoqqippoq. Nalaatsornikkut ilinniartut nakkutilliisuat alakkaavoq. Manfred takugamiuk ima aperaa: „Sooq ullumikkut atuanngilatit? Naammi ilinniartut allat?“ Manfred qanoq akissava?

Manfred akunnattoortitaavoq. Ilumoortoq oqaluttuarissavaa, imaluunniit atuartut allat qanoq iliornerat isertuutissavaa? Ilumoortumik akiguni ajornartorsiulersissavai namminerlu nuannarineqarunnaarluni. Taama pisoqartillugu salluneq ajortuunngila? Illit qanoq iliorsimassagaluarpit? Manfred kingusinnerusukkut uterfigissavarput, sammeqqaariartiguli ilumoortoq oqaatigissanerlugu oqaatigissannginnerluguluunniit aalajangertussaatilluni suna periaaserineqarsinnaanersoq.

Ilumoortoq imaluunniit ilumuunngitsoq — tunngaviusumik akerleriissut

Inuiaat oqaluttuarisaanerata aallaqqaataani suut tamarmik ilumoortumik tunngaveqarput. Piviusut eqqunngitsumik isigineqanngillat, ilumoortorlu killormut pineqarani. Pinngortitsisoq, Jehova, tassaavoq „sallusuissutip Guutia“. Oqaasia sallusuissutaavoq; taanna sallusinnaanngilaq, aamma sallu sallusartullu assuarai. — Tussiaat 31:6, NV; Johannesi 17:17; Titusi 1:2.

Taavami sallu qanoq pilersimava? Jiisusi Kristusip upperisarsiornikkut akerlilersortini, imminik toqutsiniartut, assuarlerluni ima akivai: „Ataataq ilissi nagguigisarsi tassa Diaavulu, ataatassilu pilerigisai naammassiumavasi. Taanna pileqqaarneranniit toqutsisuuvoq, sallusuissummiinngilaq, taassuminnga ilumiugisaqannginnami. Sallugaangami imminerminit oqaluttarpoq, sallutuujugami sallumullu ataataagami.“ (Johannesi 8:44) Erseqqippoq Jiisusip Naatsiivimmi Edenimi pisimasoq pigaa, tassani Saatanip inuit siulliit marluk Guutimut naalanngitsillugit tammartippai, taamaalilluni taakkununnga ajortimik toqumillu kinguneqarpoq. — 1 Mosesi 3:1-5; Romamiut 5:12.

 Jiisusip oqaasiisa erseqqissumik takutippaat Saatani tassaasoq ’sallumut ataataq’, sallup pilerfia. Saatani suli tassaavoq ilumuunngitsumut pisuunerpaaq, aap, allaammi taannaavoq „silarsuarmik tamarmik tammartitsiniartoq“. Ullumikkut salluliornerit nalinginnaangaartut ajoqusiinerinut tamanut akisussaanerpaavoq. — Saqqummersitat 12:9.

Ilumoortup ilumuunngitsullu tunngaviusumik akerleriinnerat Saatanip aallartitaa suli akerleriissutaangaarpoq. Innuttaaqatigiinni qanorluunniit inissisimasut tamarmik sunnerneqarput inuillu ataasiakkaat attorneqarlutik. Inooriaaseq aalajangiisuusarpoq akerleriissummi sorleq tapersersornerlugu. Guutimik tapersersuisut taassuma oqaasia, Biibili, inooriaatsiminnut tunngaviutittarpaat. Sallusuissutip aqqutaatigut ingerlanngitsut tamarmik, nalullugu nalunaguluunniit, Saatanimut naalatsigitittarput, ’silarsuarmi tamarmi Ajortumut naalatsigitippoq’. — 1 Johannesi 5:19; Matthæusi 7:13, 14.

Salloqqajaasarnermut suna pissutaava?

’Silarsuup tamarmi’ Saatanimut naalatsigitinneranit paasivarput sooq inuit taama amerlatigisut sallusarnersut. Unali apeqqutaavoq: Sooq Saatani, ’sallumut ataataasoq’, sallulluni oqaluppa? Saatanip nalunngilaa Jehova pinngortitaminut tamanut, ilaatigut inunnut marlunnut siullernut, eqqortumik Kisimi Oqartussaasoq. Saatanilli inissisimaffik qutsissisitaq asseqanngilluinnartorlu, pisinnaatitaaffiginngisani, nammineq kissaatigaa. Piumatuneq namminissarsiortumillu anguniagaqarusussuseq pissutigalugit Jehova inissisimaffianit inangeriaraluarpaa. Tamanna anguniarlugu Saatanip sallu peqquserlunnerlu sakkugai. — 1 Timotheusi 3:6.

Ullumikkummi? Piumatussuseq namminissarsiortumillu anguniagaqarusussuseq pissutigalugit inuppassuit suli salluliortanngillat? Niuernerup silarsuaani piumatussuseq, politikkikkut peqquserlunneq upperisarsiornerlu eqqunngitsoq salluliuutinik, ilumuunngissusermik, nakutitsiniaanermik peqquserlunnermillu sunnertissimangaarput. Sooq? Inuit qaffakkumallutik, pisuunngorusullutilluunniit pissaaneqarusullutillu imaluunniit pisinnaatitaaffiginngisaminnik inissisimaffeqalerusullutik, piumatussuseq anguniagaqarusussuserlu iliuuseqarusussutigisarmassuk, ilaa? Itsaq Israelimi kunngi sianisooq Salomo mianersoqqusilluni ima oqarpoq: „Pisuussutinik piumatuallaartoq pillarneqanngitsoortussaanngilaq.“ (Ussatit 28:20) Aamma apustili Paulusi ima allappoq: „Aningaaserituujuneq ajortunut tamanut sorlaavoq.“ (1 Timotheusi 6:10) Naleqqutinngitsumik pissaaneqarusunnermut inissisimaffeqarusunnermulluunniit tunngatillugu aamma taamaappoq.

Sallumut pissutaasoq suli alla tassaavoq siooraneq — ilumoortoq oqaatigigaanni kingunerisassaanik imaluunniit inuit allat qanoq eqqarsassanerannik siooraneq. Inunnit allanit nuannarineqarusunneq akuerineqarusunnerluunniit pissusissamisuuginnarpoq. Taamatulli kissaateqarlutik ilumoortumik killormut saatitsisinnaapput, immaqa immannguaannaq, susinnaanngisatik paasineqatsaalillugit, annikitsualuit tulluusimaarnanngitsut isertorniarlugit iluareqqusaaginnarlutilluunniit. Salomo naleqquttumik ima allappoq: „Inunnik qunugisaqarneq napiaaniutinngortarpoq, [Jehovamilli] tatiginnittoq aarlerissutissaqanngilaq.“ — Ussatit 29:25.

Sallusuissutip Guutianut ilumoorfiginninneq

Manfred ittumi oqaaseqaqqummani qanoq akiva? Manfred eqqortumik akivoq. Ima oqarpoq: „Ilinniartitsisup ullumi soraajaartimmatigut suliartorpunga. Allat akissussinnaanngilakka. Nammineq aperiniarigit.“

Manfred peqqusersuumik salloqittaalluni akisimasinnaagaluarpoq, ilinniartunit allanit nuannarineqalissutigisaminik. Ilumoortumulli ilumoorfiginninnissaminut pissutissaqarluarpoq. Manfred Jehovap Nalunaajaasuisa ilagaat.  Ilumoortuunini pissutigalugu ilerasuuteqanngilaq. Taamaalilluni aamma sulisitsisuminit tatigineqalerpoq. Manfred ilinniarnerminut atatillugu pinnersaataarniarfimmut, ilinniartunik sulisoqarneq ajoraluartumut, nuutinneqarpoq. Tamatuma kingorna ukiut 15-it missaat qaangiuttut Manfred atorfimmini qaffatsitaammat akisussaaffeqarnerulermallu, pisortaq taanna pilluaqqusilluni sianerpoq pisimasumillu ilumoortumut ilumoorfiginnissimaneranik eqqaasillugu.

Jehova sallusuissutip Guutigimmagu, tassunga qanittumik attaveqarusuttut tamarmik ’salluliortarneq iperartariaqarpaat’, aamma ’ilumoortumik imminnut oqaluffigisariaqarput’. Guutimut kiffaasup ilumoorneq nuannarisariaqarpaa. „Nalunaajaatitaq ilumoortoq sallusarinngilaq,“ angut sianisooq allappoq. Sallu suugami? — Efesosimiut 4:25; Ussatit 14:5.

Sallu suua?

Sallunerit tamarmik ilumuunngitsuupput, ilumuunngitsulli tamarmik salluunngillat. Sooq taamaanngila? Oqaatsinik qinerlerfissiami salluneq nassuiarneqarpoq „piaaraluni eqqunngitsumik paasissutissiinertut, peqquserlunnissaq siunertaralugu“. Aap, salluneq tassaavoq piaaraluni allanik nakutitsineq peqqusersiorfiginninnerlu. Taamaattumik piaarinani eqqunngitsumik oqalunneq — assersuutigalugu paasissutissanik kisitsisinilluunniit eqqunngitsunik paasissutissiineq — sallunerunngilaq.

Aamma paasissutissanik perusuttoq sukumiisumik akineqartariaqarnersoq eqqarsaatigisariaqarparput. Takorlooriartigu Manfred suliffimmi allami pisortaasumit taama aperineqarsimasoq. Manfred sunik tamanik oqaluttuarnissaminut pisussaava? Naamik. Pisortaasoq taanna tamakkuninnga paasitinneqartussaanngimmat, Manfredip paasissutissat tamakku paasissutissiissutiginissaat pisussaaffiginngilaa. Pisimasumi tamatumani sallulioruni soorunami aamma eqqunngitsuliussaaq.

Tamatumunnga tunngatillugu Jiisusi qanoq maligassiuiva? Ilaanni imminut uppertuunngitsut, angalanissaminulli pilersaarutiminik soqutiginnittut, oqaloqatigai. „Maanngaaniit aallarlutit Judæamukarniarit,“ siunnersorpaat. Jiisusi qanoq akiva? „Ilissi [Jerusalemimut] majuarniaritsi nalliussiartorlusi; uanga nalliuttoq taanna nalliussiartornianngilara, piffissara suli nalliutinngimmat.“ Kingusinnerulaartukkulli Jiisusi Jerusalemiliarpoq nalliussiartorluni. Sooq taamatut akiva? Sumerpiamiinnersoq paasissallugu piumasarisinnaanngilaat. Jiisusi sallunngilaq, ilaannakumilli akivai imminik ajoqersukkaminillu ajoqusiisinnaanerat killilersimaarniarlugu. Sallunngilaq, apustili Petrusimi Jiisusi pillugu ima allappoq: „Taanna ajortuliunngilaq, peqquserlunnermillu qanermiugisaqanngilaq.“ — Johannesi 7:1-13; 1 Petrusi 2:22.

Petrusimi? Jiisusi tigusaammat pingasoriarluni sallunngila ilisarisimannginnerarlugu? Aap, Petrusi inunnut qununini nakkaannarfigalugu salluvoq. Kinguninnguali „qiangaalerpoq“ peqqissimillunilu, ajortuliaminillu isumakkeerfigineqarpoq.  Aamma kukkunini ilinniarfigai. Ullualuit qaangiuttut Jiisusi pillugu tamanut oqalugiarpoq, Jerusalemimilu oqartussaasunit juutiusunit sioorasaarneqarami sapiilluni nipangerumanngilaq. Petrusip tammaraluarnera, eqqortumilli isiginnittaaseqaliaaqqinnera, uagutsinnut kaammattuutaasariaqarpoq, tamattami oqaatsikkut iliuutsikkulluunniit sanngiilliutsiarneq kukkullatsiarnerlu sapilissutigeriaannaavavut. — Matthæusi 26:69-75; Apustilit Suliaat 4:18-20; 5:27-32; Jaaku 3:2.

Ilumoortoq soraajuitsumik atasussaavoq

„Qarloq eqqortumik oqaluttoq atasussaavoq soraajuitsumik, oqarlu sallutooq sivikitsunnguaannarmik,“ Ussatit 12:19-imi allassimavoq. Aap, eqqortumik oqalunneq atajuaannartussaavoq. Inuillu attaveqatigiinnerat aalajaannerusarpoq nalerisimaarnarnerullunilu inuit eqqortumik oqaluttussaasutut misigigaangata oqaatsiminnullu naapertuuttumik iliuuseqaraangata. Aap, ilumoorneq ingerlaannaq iluaqutigineqartarpoq, ilaatigut ilerasuuteqannginnermik, tusaamasaalluarnermik aamma aappariinnermi, ilaqutariinni, ikinngutigiinni niuernermilu qanittumik ataqatigiinnermik.

Sallu naggataatigut qulaarneqassaaq. Oqaq eqqunngitsumik oqaluttoq sivikitsuinnarmik nakutitsisinnaavoq, eqqunngitsorli atangaarnavianngilaq. Aamma Jehovap, sallusuissutip Guutiata, killilersimavaa ilumuunngitsup sallumillu tapersersuisut qanoq sivisutigisumik akueriinnassanerlugit. Biibilimi Jehova neriorsuivoq Saatani Diaavulu, sallumut ataataasoq silarsuarmillu tamarmik tammartitsisoq, sunniisinnaajunnaartikkumallugu. Ungasinngitsukkut Jehovap sallu salluliortullu tamaasa nungutissavai. — Saqqummersitat 21:8. 

Oqiliallatsitsinassaqaaq „qarloq eqqortumik oqaluttoq“ naggataatigut soraajuitsumik atalerpat! (wE 2/1 07)

[Quppernerup ataani ilanngussaq]

[Qupp. 5-mi issuagaq]

Piumatuneq namminissarsiorlunilu anguniagaqarusussuseq pissutigalugu inuppassuit sallusarput

[Qupp. 6-mi issuagaq]

Sallunerit tamarmik ilumuunngitsuupput, ilumuunngitsulli tamarmik salluunngillat

[Qupp. 6-mi assiliartaq]

Petrusip Jiisusimik miserratiginninnera sumik ilinniarfigaarput?

[Qupp. 7-mi assiliartaq]

Ilumoortumik oqalunnikkut aalajaatsumik nalerisimaarnarnerusumillu ikinngutigiittoqalersinnaavoq