Utoqqaat — inuusuttunut pilluaqqussutaasut

„Qimaqinanga, Guuti, utoqqanngoruma qeersuunngorumalu, oqaluttuarisinnaaqqullugu pissaassutsit kingulissatsinnut tamanut.“ — TUSSIAAT 71:18.

1, 2. Guutimut kiffaasut utoqqaat suna nalunngittariaqarpaat, maannalu suna misissussavarput?

UTOQQAANERTAP kristumiup Afrikap Kitaaniittup qatanngut angut tanitaq utoqqaq pulaaramiuk qanoq innersoq aperaa. Qatanngut angut ima akivoq: „Arpassinnaallungalu pisissinnaallungalu pisissaarsinnaallungalu naanngisarsinnaavunga“ — taamatullu oqarnermini oqaatigisani iliuuseriniarsarai. Taava ima oqarpoq: „Kisianni timmisinnaanngilanga.“ Oqaatiginiagaa erseqqippoq: ’Sapinngisakka iliuuserissallugit nuannaraakka; sapikkakkali iliuuserinngiinnartarpakka.’ Utoqqaanertaq taassumunnga pulaartoq nammineq maanna 80-it sinnerlugit ukioqarpoq, nuannaralugulu eqqaamavaa qatanngutip tanitap utoqqaap quiasaarnera ilumoorfiginninneralu.

² Qatanngutit utoqqaat angutit arnalluunniit pissusii anersaakkut ittut pitsaasut allanit puiunaatsinneqarsinnaapput. Kisianni soorunami ilisimassuseq kristumiutullu pissuserineqartussat utoqqaliartorneq ilutigalugu isumaminnik takkunneq ajorput. (Oqaluussisartup oqaasii 4:13) Biibilimi ima allassimavoq: „Nutsat qeersuusut tassaapput niaqorut kusanartoq, taanna iluarnerup aqqutaaniippoq.“ (Ussatit 16:31) Ukioqqortuguit, taava nalunngiliuk oqaatsitit iliuuserisatillu allat qanoq iluaqutigitigisinnaaneraat? Utoqqaat inuusunnerusunut qanoq pilluaqqussutaatigisimanerannik Biibilimi oqaluttuarineqartut eqqarsaatigeriakkit.

 Upperneq kingunertuumik sunniuteqartoq

3. Noap aalajaannera ullumikkut inuusunut tamanut qanoq iluaqutaava?

³ Noap uppernera pinertusaarneralu suli ullumikkut iluaqutigaavut. Noa umiarsualiorami, uumasunik katersuigami inoqatiminullu oqaluussigami 600-ngajannik ukioqarpoq. (1 Mosesi 7:6; 2 Petrusi 2:5) Guutimik mianerinninnini pissutigalugu nammineq ilaquttanilu Ulersuarmit aniguipput, Noalu ullumikkut nunarsuarmi inuusunut tamanut siuaasanngorpoq. Ilumoorpoq Noa inuusimasoq inuit inuuneqqortunerisa nalinginnaaffianni. Noali utoqqarujussuugaluarluni aalajaattuarpoq, tamannalu pilluaqqussuterpassuarnik kinguneqarpoq. Qanoq?

4. Noap pinertusaarnera ullumikkut Guutip kiffaasa qanoq iluaqutigaat?

⁴ Noa 800-ngajannik ukioqarpoq Nimrodi Jehovap inuit ’nunarsuarmik tamakkiinissaannik’ peqqussutaanut naalannani Babelimi napasulialiorluni aallartimmat. (1 Mosesi 9:1; 11:1-9) Noalli Nimrodi pikitsitseqatiginngilaa. Taamaattumik pikitsitsisut oqaasii paatsiveerutsinneqarmata ilimanarpoq Noap oqaasiisa allanngortinneqarsimannginnerat. Noap uppernera malartitassaannginneralu, utoqqalinerminiinnaanngitsoq aammali inuunini tamaat ersersitai, Guutip kiffaanut qanorluunniit ukioqaraluartunut ilumut ilaagassaqqipput. — Hebræerit 11:7.

Ilaquttaminnut sunniuteqarnerat

5, 6. (a) Aaperaat 75-inik ukioqarluni Jehovamit qanoq peqquneqarpa? (b) Aaperaat Guutip peqqussutaanut qanoq periarpa?

⁵ Utoqqaat ilaquttamik uppernerannut sunniuteqarsinnaanerat ataataanerpaat Noap kingorna inuusut pillugit oqaluttuani erserpoq. Aaperaat 75-it missiliorlugit ukioqarpoq Guutip ima oqarfigimmani: „Nunagisat eqqarlitit ataatavillu illua qimallugit nunamut ilinnut takutitassannut aallarit. Inuiassuanngortikkumaarpakkit pilluaqqullutillu.“ — 1 Mosesi 12:1, 2.

⁶ Takorlooriaruk peqquneqarlutit angerlarsimaffiit, ikinngutitit nunalu inunngorfigisat qimaqqullugit. Avatangiisit toqqissisimanartut ilaquttavit najugaat qimattussanngorpatit nunamullu nalusannut aallarlutit. Aaperaat taamatorpiaq ilioqquneqarpoq. „Aallarpoq soorlu [Jehovap] taama peqqugaani“, Kana’anillu nunaani takornartatut angalaannartutullu tuperni najugaqarluni. (1 Mosesi 12:4; Hebræerit 11:8, 9) Aaperaat Jehovamit ’inuiassuanngornissaminik’ neriorsorneqaraluarluni, kinguaami amerlasoorsuanngornerat sioqquterujussuarlugu toquvoq. Nuliata Sarap ataasiinnarmik, Iisaamik, ernertaappaa, tamannalu pivoq Aaperaat ukiuni 25-ni nunami neriorsuutigineqartumeereersoq aatsaat. (1 Mosesi 21:2, 5) Aaperaalli utaqqikatalinngilaq, illoqarfillu qimatani uterfigeqqinngilaa. Upperneq pinertusaarnerlu eqqarsaatigalugit uagutsinnut maligassaalluangaarami, ilaa?

7. Aaperaap pinertusaarnera erneranut Iisaamut qanoq sunniuteqarpa, inuiannullu qanoq kinguneqarpa?

⁷ Aaperaap pinertusaarnera erneranut Iisaamut, ukiuni inuuffigisamini 180-ini tamani Kana’anip nunaani takornartatut inuusumut, sunniuteqangaatsiarpoq. Iisaap Guutip neriorsuutaanik upperinninnini, upperneq angajoqqaami utoqqalisut pigiliutsitaat kingusinnerusukkullu Jehovamit oqaluunneqarami nakussatsinneqartoq, pinertusaassutigaa. (1 Mosesi 26:2-5) Iisaap aalajaannissaa pingaaruteqarluinnarpoq, Jehovami neriorsuisimavoq Aaperaap kinguaavi aqqutigalugit ’kinguaassaq’, inuiaat pilluaqquneqaatissaat, saqqummerumaartoq. Ukiut hundredellit tamatuma kingorna Jiisusi Kristusip, ’kinguaassamut’ ilaasup pingaarnerup, imminut uppertut tamaasa Guutimit saammaanneqarnissaanut naassaanngitsumillu inuusinnaalernissaannut periarfissippai. — Galatiamiut 3:16; Johannesi 3:16.

8. Jaakup upperluartuunini qanoq ersersippaa, tamannalu qanoq sunniuteqarpa?

⁸ Taava Iisaap ernini Jaaku upperluarnermik, utoqqalinermini nappatigisaminik, ineriartortitsiniarnerani ikiorpaa. Jaaku 97-inik ukioqarpoq pilluaqquneqarumalluni unnuaq naallugu inngili paagamiuk. (1 Mosesi 32:25-29) Jaakup 147-nik ukioqarluni toqunnginnermini ernini aqqaneq-marluk tamaasa immikkut pilluaqqujumallugit nukini tamaasa atorpai. (1 Mosesi 47:28) Oqaasii siulittuutaasut maanna  Mosesimik allakkat siulliit 49:1-28-mi allassimasut eqquupput sulilu eqquussorlutik.

9. Utoqqaat anersaakkut inersimalluartut ilaquttaminnut sunniuteqarnerat pillugu qanoq oqartoqarsinnaava?

⁹ Erseqqippoq Guutimut kiffaasut ilumoorfiginnittut utoqqaat ilaquttaminnut ineriartornartumik iluaqutaasumillu sunniuteqarsinnaasut. Siunnersuutit Biibilimeersut misilittagaqarnerlu pinertusaarnikkullu maligassiuineq inuusuttup upperluarluni peroriartornissaanut iluaqutaangaarsinnaapput. (Ussatit 22:6) Utoqqaat ilaquttaminnut iluaqutaasumik sunniuteqarsinnaanertik suusupaginngisaannartariaqarpaat.

Uppeqatiminnut sunniuteqarnerat

10. Josefip ’saanini’ pillugit peqqussutaa qanoq paasisariaqarpa, qanorlu sunniuteqarpa?

¹⁰ Utoqqaat aamma uppeqatiminnut sunniuteqarluarsinnaapput. Jaakup ernera Josefi utoqqalinermini uppernikkut iliuuseqarpoq pisariitsumik, toqunermi kingorna ilumoortumik pallorfiginnittunut millionilinnut pingaaruteqangaartumik. 110-nik ukioqarpoq ’toquguni saanermi qanoq pineqarnissaannik peqqussuteqarami’, tassa imaappoq Israelikkut peqqugamigit Egypteni qimalerunikku timini aanaveersarneqarsimasoq nassassagaat. (Hebræerit 11:22; 1 Mosesi 50:25) Josefip toqunerata kingorna ukiorpassuit ingerlaneranni Israelikkut inussiatut sulerulunnerminni peqqussut taanna neriuuteqalissutigaat, ilumut aniguisinneqarumaarnerminnut uppernarsaatitut isigalugu.

11. Mosesi utoqqalisoq Josvamut qanoq sunniuteqarsimagunarpa?

¹¹ Josefip uppernerminut ersiutitut peqqussutaanik nakussatsissutiginnittut ilaat tassaavoq Mosesi. Mosesip 80-inik ukioqarluni Josefip saarnginik nassarluni Egyptenimit aninini immikkut pisinnaatitaaffigaa. (2 Mosesi 13:19) Tamatuma nalaani Josva, imminit nukarliunerungaartoq, ilisarisimasarilerpaa. Ukiuni 40-ni tulliuttuni Josva Mosesimut kiffaavoq. (4 Mosesi 11:28) Josvap Mosesi Qaqqamut Sinajimut qanivaa Nalunaajaatillu allaffissiai nassarlugit qaqqamit aternissaata tungaanut utaqqillugu. (2 Mosesi 24:12-18; 32:15-17) Josvap Mosesip utoqqalisimallunilu inersimalluartup ilisimassusia siunnersuutaalu iluaqutigingaarsimassavai.

12. Josva inuutilluni Israelikkunnut qanoq sunniuteqarluarpa?

¹² Taamaalilluni Josvap inuunini naallugu Israelikkut kajumissaarsinnaasimavai. Eqqartuussisunik allakkat 2:7-imi ima allassimavoq: „Inuit [Jehova] kiffartuuppaat Josva inuutillugu utoqqaallu Josvamit inuummersornerusut [Jehovallu] Israelimut qanoq iliornerinik angeqisunik tamanik takunnissimasut suli inuutillugit.“ Josvalli utoqqaanertallu toquneranniit Samuelip pruffiititut saqqummernissaata tungaanut ukiut 300-t ingerlaneranni Israelikkut aalajangersinnaanatik pallorfiginninneq ilumoortoq pallorfiginninnerlu eqqunngitsoq uteqattaarfigiuarpaat.

Samueli ’iluartumik iliorpoq’

13. Samueli ’iluartumik iliorniarluni’ susimava?

¹³ Samueli toqugami qanoq utoqqaatiginersoq Biibilimi allassimasoqanngilaq, pisimasulli Samuelimik allakkani siullerni allaatigineqartut ukiut 102-t ingerlaneranni pipput, Samuelilu taakkua amerlanersaannik takunnittuuvoq. Hebræerinut allakkat 11:32, 33-mi allassimavoq  eqqartuussisut pruffiitillu naapertuilluartut ’iluartumik iliortut’. Aap, Samuelip sunniuteqarluarnera taamani inuusut ilaasa eqqunngitsuliortarunnaassutigaluguluunniit eqqunngitsuliornernik akuerinnikkunnaassutigaat. (1 Samueli 7:2-4) Sooq? Samueli inuunini naallugu Jehovamik ilumoorfiginnimmat. (1 Samueli 12:2-5) Aamma allanik, allaat kunngimik, oqaaqqissaarinissani qunuginngilaa. (1 Samueli 15:16-29) Aammattaaq Samueli ’utoqqalilluni qeersuunngorlunilu’ allanik qinnussineq eqqarsaatigalugu maligassaalluarpoq. Oqarpoq Israelikkoqatini ’Jehovamut qinnukkunnaarniarnagit ajortuliorumannginnami’. — 1 Samueli 12:2, 23.

14, 15. Qinunermut tunngatillugu utoqqaat ullumikkut Samueli qanoq ilaarsinnaavaat?

¹⁴ Samuelip iliuuserisimasaani erseqqissarneqarpoq utoqqaat uppeqatiminnut ajunngitsuliorniarlutik periaaserisinnaasaat pingaarutilik. Ukioqqortusisimasut peqqiillioraluarlutik allanillu akornuteqaraluarlutik allanik qinnussisinnaapput. Ilissi utoqqaasusi nalunngilisiuk qinnutigisartakkasi ilagiit qanoq iluaqutigitigigaat? Kristusip aavanut kuineqartumut uppernersi pissutigalugu akuerisaasumik Jehovamut attaveqarpusi, aamma pinertusaarnersi pissutigalugu uppernissi piviusuunera uppernarsarneqarpoq. (Jaaku 1:3; 1 Petrusi 1:7) Puiunngisaannaruk ’iluartup qinnutaa sunniisaqisoq kimittoqigami’. — Jaaku 5:16.

¹⁵ Oqaluussinerup ilagiillu siumukarnissaannik qinnutiginnittarnissarsi pisariaqartinneqarpoq. Qatanngutitta ilaat kristumiutut kalluunnaveersaartuunertik pissutigalugu parnaarussaaqqapput. Allat pinngortitami ajunaarnersuarnit, sorsunnernit pikitsitsinernillu nalaanneqarsimapput. Sulilu allat nammineq ilagiitsinniittut ussernartorsiortarlutillu akerlilersorneqartarput. (Matthæusi 10:35, 36) Aamma oqaluussinermi siuttuullutillu ilagiinni nakkutilliisutut kiffartortut ilissinnit qinnunneqartuarnissartik pisariaqartippaat. (Efesosimiut 6:18, 19; Kolossemiut 4:2, 3) Pingaaruteqartupilussuuvoq Epafrasitut uppeqatissinnik qinnussisarnissarsi! — Kolossemiut 4:12.

Kinguaariinnik takkuttussanik ilinniartitsineq

16, 17. Tussiaat 71:18-imi suna siulittuutigineqarpa, qanorlu eqquuppa?

¹⁶ ’Savat allat’, nunarsuarmi naassaanngitsumik inuunissamik neriugisallit, ’savarpannguanut’ ilaasunik aalajaatsunik, qilammut qaaqquneqartunik, suleqateqarnermikkut asseqanngitsumik ilinniartinneqarput. (Lukasi 12:32; Johannesi 10:16) Taamatut ilinniartitsisoqarumaarnera Tussiaat 71:18-imi ima siulittuutigineqarpoq: „Qimaqinanga, Guuti, utoqqanngoruma qeersuunngorumalu, oqaluttuarisinnaaqqullugu pissaassutsit kingulissatsinnut tamanut.“ Tanitat suleqatimik savanut allanut ilaasut Jiisusi Kristusi peqatigalugu naalannarsisitaaniarlutik qimannginneranni annerusunik akisussaaffeqalernissaannik ilinniartinnissaat ilungersuutigisimavaat.

¹⁷ ’Kingulissanik tamanik’ ilinniartitsinissaq pillugu Tussiaat 71:18-imi allassimasut aamma savanut allanut, Guutip tanitaanit ilinniartinneqarsimasunut, tunngatinneqarsinnaapput. Jehovap utoqqaat pallorfiginninnermik ilumoortumik maanna ilassinnittunut imminik pilluni oqaluussinissamik immikkut pisinnaatitaaffilerpai. (Joeli 1:2, 3) Savat allat tanitanit ilikkakkatik nuannaarutigeqaat Biibililu tunngavigalugu imminnut ajoqersuutigineqarsimasunik Jehovamut kiffartorusuttut allat ilangiisinnissaannut kajumissisinneqangaarlutik. — Saqqummersitat 7:9, 10.

18, 19. (a) Jehovamut kiffaasut utoqqaat paasissutissanik pingaarutilinnik sunik ingerlatitseqqissinnaappat? (b) Kristumiut utoqqaat suna qularutigissanngilaat?

¹⁸ Jehovamut kiffaasut utoqqaat maanna  suli inuusut, tanitanut savanulluunniit allanut ilaagaluarunik, oqaluttuarisaanermi pisimasut pingaarutillit namminneq misiginikuusatik oqaluttuarisinnaavaat. „Skabelsens Fotodrama“-p takutinneqarnerani najuussimasut ilaat ikittunnguit suli inuupput. Ilaasa qatanngutit siuttuusut 1918-imi parnaarussaasut ilisarisimasarisimavaat. Allat Napasuliaq Alapernaarsuiffiup radioqarfiata WBBR-ip aallakaatitsinerani peqataasarsimapput. Ilarpassuisa piffissaq Jehovap Nalunaajaasuisa eqqartuussiviit qullersaanni upperisarsiornikkut kiffaanngissutsiminnik sorsuutiginniffiat oqaluttuarisinnaavaat. Sulilu allat kisermaassilluni naalakkersuisoqarnerata nalaani pallorfiginninneq ilumoortoq pillugu aalajaassimapput. Aap, utoqqaat oqaluttuarisinnaavaat sallusuissummik paasinninnerup qanoq ililluni saqqummersinneqariartuaarsimanera. Biibilimi kajumissaarneqarpugut misigisarpassuit tamakkua iluaqutigeqqullugit. — 5 Mosesi 32:7.

¹⁹ Kristumiut utoqqaat kajumissaarneqarput inuusunnerusunut maligassaalluaqqullugit. (Titusi 2:2-4) Pinertusaarnerpit, qinnutivit siunnersuutivillu allanut qanoq sunniuteqarnerat maannakkorpiaq immaqa takusinnaanngilat. Aamma Noap, Aaperaap, Josefip, Mosesip allallu aalajaannermik kinguaariinnut takkuttussanut qanoq pingaaruteqartigiumaarnera tamakkiisumik ilisimanngilaat. Upperneralli assuarnaassusiallu allanut ilumut pingaaruteqangaarpoq; aamma illit maligassiat pillugu taama oqartoqarsinnaavoq.

20. Naggatissap tungaanut neriuttuartut sunik pilluaqqussutisissappat?

²⁰ ’Naalliunnartussarsuarmi’ inuuinnartinneqassagaluaruit makititaanikkulluunniit inuuleqqissagaluaruit, eqqarsaatigeriaruk ’inuuniviup’ misiginissaa qanoq nuannertigissasoq! (Matthæusi 24:21; 1 Timotheusi 6:19) Kristusip ukiuni tusindini naalakkersuinerani Jehovap utoqqaliartornerup paarlattuanik inuusussiartulersitsiffissaa takorlooriaruk. Timi iliuuseqarfigineqarsinnaanngitsumik aseroriartorunnaarluni ullaat tamarluinnaasa itertassaagut inuummarinnerulersimallutalu peqqinnerulersimalluta — nukissaqarnerulluta, tappinnerulluta, tutsarinnerulluta isikkorinnerullutalu! (Jobi 33:25; Esaja 35:5, 6) Guutip silarsuassaani nutaami inuunermik pilluaqquneqartut naassaanngitsussaq eqqarsaatigalugu inuusuttuujuaannassapput. (Esaja 65:22) Taamaattumik qanortoq tamatta naggatissap tungaanut neriuttuarta, tarnikkullu iluunngarluta Jehovamut kiffartortuarta. Jehovap neriorsuutigisaasa tamarmik eqquukkumaarnerat ilimagisinnaasatsinnillu tamanik qimmuingaarumaarnerat qularinngilarput. — Tussiaat 37:4; 145:16. (wE 6/1 07)

Qanoq akissavit?

• Noap utoqqalisup aalajaannera qanoq ililluni inuiannut pilluaqqussutaava?

• Ataataanerpaat uppernerat kinguaavinut qanoq sunniuteqarpa?

• Josefi, Mosesi, Josva Samuelilu utoqqalinerminni qanoq ilillutik uppeqatiminnut nakussatsissutaappat?

• Utoqqaat kingornussaq suna ingerlateqqissinnaavaat?

[Atuaqqissaarnermi apeqqutit]

[Qupp. 18-mi assiliartaq]

Aaperaap pinertusaarnera Iisaamut sunniuteqangaarpoq

[Qupp. 20-mi assiliartaq]

Mosesip inersimalluartup siunnersuutai Josvap nakussatsissutigai

[Qupp. 21-mi assiliartaq]

Allanik qinnussisarnerit iluaqutaangaarsinnaavoq

[Qupp. 22-mi assiliartaq]

Inuusuttut utoqqarnut aalajaatsunut tusarnaartarnertik iluaqutigingaartarpaat