Utoqqalilluni anersaakkut ineriartorneq

’Ikkunneqarsimasut Jehovap naalaffiani utoqqalingaarlutik allaat inerititaqassapput.’ — TUSSIAAT 92:14, 15.

1, 2. (a) Utoqqalineq eqqaaneqaraangat suut eqqarsaatigineqarajuppat? (b) Adamip ajortuliornerata sunniutaanut tunngatillugu Biibilimi suna neriorsuutigineqarpa?

UTOQQALINEQ — oqaaseq taanna tusaraangakku suut eqqarsaatigisarpigit? Ameq eqingasulittoq? Tutsarlunneq? Avatit sanngiitsut? Immaqaluunniit ’ullunut ajortunut’ Oqaluussisartup oqaasii 12:1-7-imi takorlooruminartumik allaatigineqartut ilaannut tunngasut allat eqqarsaatigilertarpigit? Taamaappat pingaaruteqarpoq eqqaamassallugu Oqaluussisartup oqaasiini kapitali 12-imi allaaserineqartoq Pinngortitsisup, Jehova Guutip, utoqqaliartorneq pillugu aallaqqaammut siunertarisaanik allaaserinninnerunngitsoq. Versinili taakkunani ajortip Adamimeersuup inuup timaanut sunniutaa oqaluttuarineqarpoq. — Romamiut 5:12.

² Utoqqalineq immini perloqqussutaanngilaq, inuutillunimi ukiut inuuffigisat amerliartunngitsoorsinnaanngillat. Ineriartornermi inerisimassuserlu uumassuseqartuni tamani pissuserineqartussatut kissaatigineqarput. Qanittukkut ajortip naammalluinnanngissutsillu ukiuni 6000-ini sunniutaat aserornartut qanganngorsimassapput, Guutimullu naalattut tamarmik inuuneq aallaqqaammut siunertarineqartutut ittoq — utoqqalinerup toqullu kingunerisaanik naalliunnartortaqaranilu annikilliornartortaqanngitsoq — nuannaarutigisinnaassavaat. (1 Mosesi 1:28; Saqqummersitat 21:4, 5) Taamanikkussamut „kinaluunniit oqassanngilaq: ’Napparsimavunga!’“ (Esaja 33:24) Utoqqaat ’inuusunnermik ulluinisut ileqqissapput’, timaallu ’inuusukkallarnermissut nukittorumaarput’. (Jobi 33:25) Maannakkulli tamatta ajorti Adamimit kingornussarput akiortariaqarparput. Taamaakkaluartorli Jehovamut kiffaasut utoqqaliartortillutik pilluaqqussutit immikkut ittut nuannaarutigisinnaavaat.

3. Kristumiut qanoq ilillutik ’utoqqalingaarlutik allaat inerititaqarsinnaappat’?

³ Guutip oqaasiani neriorsoqqissaarneqarpugut ’Jehovap naalaffiani ikkunneqarsimasut utoqqalingaarlutik allaat inerititaqassasut’. (Tussiaat 92:14, 15) Tussiaasiortup assersuutit atorlugit Guutimut kiffaasut aalajaatsut timikkut peqqiilliartoraluarlutik anersaakkut ineriartortuarsinnaallutillu siumukartuarsinnaanerat pillugu sallusuissut tunngaviusoq oqaluttuaraa. Biibilimi eqqartorneqartunik ullumikkullu inuusunik inuppassuaqarpoq sallusuissutip tamatuma ilumoorneranut uppernarsaataasunik.

Najuuttuaannartut

4. Pruffiitip arnap utoqqalisup Annap qanoq ersersippaa Guutimut tunniusimalluni, qanorlu akissarsisinneqarpa?

⁴ Misissoriartigu pruffiiti arnaq Anna qanoq ilinniarfigisinnaaneripput. Taassuma 84-inik ukioqarluni „naalaffik qimanngisaannarpaa, Guutilu kiffartuuttarlugu unnuaq ullorlu iisinnginniartarluni qinusarlunilu“. Anna arnaagami Levikkuunngitsumik ’Asherimit naggueqartumik’  ataatalik naalaffimmi najugaqarsinnaanngilaq. Taamaammat takorlooriaruk qanoq iliuuseqartariaqartigisimassasoq ullut tamarluinnaasa ullaakkut pilliisoqarneraniit unnukkut pilliisoqarnerata tungaanut naalaffimmiinniarluni! Annali Guutimut tunniusimanini pillugu akissarsisinneqangaarpoq. Josefip Mariallu Jiisusi inoorlaaq Inatsisini piumasaqaatigineqartutut Jehovamut sassaanniarlugu naalaffimmukaammassuk najuunnini immikkut pisinnaatitaaffigaa. Annap Jiisusi takugamiuk ’Guuti unnersiutigilerpaa meerarlu pillugu Jerusalemip aniguisitaanissaanik utaqqisunut tamanut oqaaseqarluni’. — Lukasi 2:22-24, 36-38; 4 Mosesi 18:6, 7.

5, 6. Ullumikkut utoqqarpassuit qanoq ersersittarpaat Annatut isiginnittaaseqarlutik?

⁵ Ullumikkut utoqqarpassuit Annatut aallussilluartigipput. Ataatsimiigiartuarput, Jehova qamannga pisumik qinnuigisarpaat pallorfiginninnermik ilumoortumik siuarsaaqqullugu, aamma nutaarsiassamik nuannersumik oqaluussissutiginninnissamut piumassuseqangaarput. Qatanngut angut 80-it sinnerlugit ukiulik nuliani ilagalugu kristumiut ataatsimiinnerinut najuuttuaannartoq ima oqarsimavoq: „Ataatsimiigiartuarneq ileqquliupparput. Allamiinnissarput kissaatiginngilarput. Kissaatigaarput Guutip innuttaasa akornanniinnissarput. Taakkua akornanniilluta toqqissisimasarpugut.“ Maligassiaat tamatsinnut qiimmaallannangaarami, ilaa? — Hebræerit 10:24, 25.

⁶ „Anersaakkut ittunut tunngasunik peqataaffigisinnaasannik pisoqassagaangat peqataarusuttarpunga.“ Oqaatsit taakku tassa uillarnerup 80-it sinnerlugit ukiullip Jeanimik atillip oqaasinnaaralugillu najoqqutarisai. Taanna ima nangippoq: „Soorunalimi ilaannikkut aliasuttarpunga, kisianni sooq attaveqarfigisakka tamarmik aliasussappat uanga aliasukkuma?“ Nuannaarpaseqaluni oqaluttuarpoq aaqqissuussanut anersaakkut ittunik sammisaqarfiusunut ineriartornartunut peqataaniarluni nunanut allanut angalaneq qanoq nuannaritigalugu. Qanittukkut angalatilluni angalaqatini ima oqarfigai: „Illussaarsuit allat takornariarusunngilakka; oqaluussiartorusunneruvunga!“ Jean oqaatsit tamaani atorneqartut atorlugit oqalussinnaanngikkaluarluni tusarliussamik Biibilimiittumik soqutiginnilersitsivoq. Aamma ukiorpaalunni ilagiinnik ikiortarialinnik suleqateqarpoq, naak suleqatigissagunigit oqaatsit allat ilinniartariaqaraluarlugit ataatsimiigiassagunilu angalanermut siumut utimullu akunnerit marluk atortariaqaraluarlugit.

Qarasarsortuarit!

7. Mosesip utoqqalisup Guutimut attaveqarnerminik nakussatsitserusunnini qanoq oqaatigaa?

⁷ Piffissap ingerlanerani inuunermi misilittagaqarnerujartortoqartarpoq. (Jobi 12:12) Anersaakkulli ineriartorneq utoqqaliartorneq ilutigalugu isumaminik takkunneq ajorpoq. Taamaattumik Guutimut kiffaasut ilumoorfiginnittut siornatigut ilisimalersimasarpassuatik kisiisa tutsuigisanngilaat, ukiulli ingerlaneranni ’ilisimasartunerulernissartik’ ilungersuutigisarpaat. (Ussatit 9:9) Mosesi Jehovamit immikkut ittumik suliassinneqarami 80-inik ukioqarpoq. (2 Mosesi 7:7) Mosesip nalaani taama sivisutigisumik inuusoqartarnera nalinginnaasimagunanngilaq, imami allappoq: „Ukiut inuuffigisassavut 70-iusinnaapput . . . 80-it nukissaqassagutta.“ (Tussiaat 90:10) Mosesili misiginngisaannarpoq ilinniarnissaminut utoqqaavallaarluni. Ukiut qulikkuutaat arlallit Guutimut kiffartoreerluni aamma arlalinnik immikkut pisinnaatitaaffilerneqareerluni annertuunillu akisussaaffilerneqareerluni kimigiiserluni Jehova ima qinnuigaa: „Aqqutinnik nalunaarfiginnga ilisimaleqqullutit [ilisarisimaleqqullutit, NV].“ (2 Mosesi 33:13) Mosesip Jehovamut attaveqarnerminik nakussatsitsiuarnissani kissaatigaa.

8. Danieli 90-it sinnerlugit ukioqaraluarluni qanoq ililluni qarasarsortuarpa, tamannalu qanoq kinguneqarpa?

⁸ Pruffiiti Danieli, 90-it sinnerlugit ukioqarunaraluarluni, allakkanik illernartunik eqqarsaatiginneqqissaartarpoq. ’Mappersakkanik’ — immaqa Mosesimik allakkat pingajuinik aamma Esajap, Jeremiap, Hoseap Amosillu siulittuutaannik — atuaqqissaarnermini maluginiakkani pissutigalugit Jehova qamannga pisumik qinunikkut saaffigaa. (Danieli 9:1, 2) Danielip qinnutaa akineqarpoq Missiarsip tikiunnissaanik pallorfiginninnerullu ilumoortup siunissaanik paasissutissinneqarami. — Danieli 9:20-27.

9, 10. Inuit ilaat qarasarsorniarlutik qanoq iliorsimappat?

⁹ Mosesitut Danielitullu qarasarsortuarnissarput ilungersuutigisinnaavarput pisinnaatilluta anersaakkut ittunik sammisaqartarnitsigut. Inuppassuit  taama iliortarput. Utoqqaanertaq kristumiu Worthimik atilik maanna 80-it sinnerlugit ukioqartoq anersaakkut inuussutissanik ’kiffap ilumoorlunilu silatuup’ tunniussortagaanik piuarniarluni sapinngisaminik iliortarpoq. (Matthæusi 24:45) Taanna ima oqarpoq: „Sallusuissut pingaartittupilussuuara, sallusuissutillu qaamarnata qaammarissiartuinnavinnera qiimasuutigaara.“ (Ussatit 4:18) Aamma Fred, ukiut 60-it sinnerlugit piffissaq tamaat kiffartortuusimasoq, eqqaasinnaavarput. Biibilimut tunngasunik uppeqatinilu oqaloqatigiissuteqartarnertik anersaakkut ineriartuutigisarpaa. Ima oqarpoq: „Biibilimut tunngasut eqqarsaatigiinnavittariaqarpakka. Biibili uummaarissutut isigilersinnaagukku — ilinnut soqutiginarsisillugu — ilikkakkavillu ’oqaatsinut peqqissinartunut najoqqutassianut’ naapertuunnerat takusinnaagukku, taava paasissutissanik imminnut ataqatigiissunik peqalersimassaatit. Takusinnaassavat paasissutissat tamarmik immikkut inissavimminni uisorilasutullusooq ittut.“ — 2 Timotheusi 1:13, NV.

¹⁰ Utoqqaligaanni imaattariaqanngilaq nutaanik ajornakusoortunillu ilinniartoqarsinnaanngitsoq. Inuit 60-it, 70-it allaallu 80-it sinnerlugit ukiullit atuarsinnaannginnerminnik allassinnaannginnerminnillu iliuuseqarfiginnissimallutilluunniit oqaatsinik allanik ilinniarsimapput. Jehovap Nalunaajaasuisa ilaat taamatut iliuuseqangaarsimapput inunnut assigiinngitsunik inuiaassusilinnut nutaarsiassaq nuannersoq oqaluussissutigisinnaajumallugu. (Markusi 13:10) Harry nulialu angalaarfigisartakkami Portugalimiusut oqaluffiusumi ikiuunniarlutik aalajangeramik 70-it pallillugit ukioqarput. Harry ima oqarpoq: „Nassuerutigisariaqarparput utoqqaliartortilluni suliassat suulluunniit suliarinissaat ajornakusoornerujartortartoq.“ Taamaakkaluartoq pinertusaarnertik eqiasuinnertillu iluaqutigalugit Portugalimiusut Biibilimik atuaqqissaaqateqarsinnaalerput. Maannalu ukiorpassuanngortuni Harry ataatsimeersuarnerni Portugalimiusut oqalugiartarpoq.

11. Utoqqaat aalajaatsut naammassisaannik eqqarsaatiginninnissaq sooq iluaqutaassava?

¹¹ Soorunami inoqarpoq peqqiilliornertik pissutsillu atukkatik pissutigalugit unamminiarnartunik taama ittunik iliuuseqarfiginnissinnaanngitsunik. Taavami sooq utoqqaat ilaasa sunik naammassisaqarsimanerat misissussavarput? Kikkut tamarmik taakkunatut naammassisaqarniaqqunissaat siunertarineqanngilluinnarpoq. Apustilip Paulusip kristumiunut hebræeriusunut iliuusereqqusaatut iliuuseqarsinnaanissarput siunertarineqarpoq. Taanna utoqqaanertat aalajaatsut ilagiinniittut pillugit ima allappoq: „Inuunerisa naggatissaat eqqarsaatigisiuk [Iliuusiisa kinguneri maluginiaqqissaartarlugit, NV] uppersuseqarnerisigullu assiginiarlugit.“ (Hebræerit 13:7) Utoqqaat aallussilluartut maligassiaat misissorutsigit, tamanna upperluarnerannik, Guutimut kiffartornerminni kaammattuutigisartagaannik, ilaarsinissatsinnut kajumississutigisinnaavarput. Harry, maanna 87-inik ukiulik, suna kajumississutigisarnerlugu oqaluttuarpoq: „Ukiut inuuffigisakka kingulliit isumatusaartumik atorusuppakka, aamma Jehovamut kiffartornermi sapinngisannik ikiuutaarusuppunga.“ Fredip, siusinnerusukkut eqqaaneqartup, Betelimi kiffartornini nalerisimaarutigeqaa. Ima oqarpoq: „Paasiniartariaqarpat illit qanoq ilillutit Jehova pitsaanerpaamik kiffartorfigisinnaanerlugu, paasigukkulu inooriaaseriuarnissaa aalajangiullugu.“

Pissutsit atukkatik allanngoraluartut aalajaatsut

12, 13. Barzillajip pissutsit atukkani allanngorsimagaluartut qanoq ililluni ersersippaa Guutimut tunniusimasuulluni?

¹² Timip allanngoriartornera akueriuminaassinnaavoq.  Taamatulli allanngortoqaraluartoq Guutimut tunniusimanermik ersersitsisoqarsinnaavoq. Barzillaji Gileadikkuusoq tamatumunnga tunngatillugu maligassaalluarpoq. Taassuma 80-inik ukioqarluni Daavi sakkutuuilu immikkut ittumik inoroorsaarfigai Absalomip pikitsitsinerata nalaani nerisassaqartillugit unnuiffissaqartillugillu. Daavi Jerusalemimut utertussanngormat Barzillajip Daavip angutitai kuussuarmut Jordanimut qaniorpai. Daavip Barzillaji kunngikkormiuminut ilanngunnissaanik neqeroorfigaa. Barzillaji qanoq akiva? „Maanna 80-inik ukioqarama . . . nerisakka imikkakkalu mamassuseerutitippakka, aammalu angutit arnalluunniit erinarsortut nipaat tusaasinnaajunnaarpara. . . . Aajuna ernera Kimhami; taassuma ilagilisit, naalagaq kunngi, taannalu iluarisannik iliorfigiuk.“ — 2 Samueli 17:27-29; 19:32-41.

¹³ Barzillaji pissutsit atukkani allanngorsimagaluartut kunngimik Jehovap toqqagaanik tapersersuiniarluni sapinngisaminik iliorpoq. Nassuerutigaa siornatigutut tutsaritsiginanilu mamassutsimut malussaritsigiunnaarsimanini, tamannali narrutsaatiginngilaa. Barzillajip Kimhamip ajunngitsunik neqeroorutigineqartunik pinissaa innersuussutigigamiuk, ersersippaa inuttut qanoq pitsaatiginini. Ullumikkut utoqqarpassuit Barzillajitut ersersittarpaat namminissarsiortuunatillu tukkortuunertik. Pallorfiginninneq ilumoortoq tapersersorniarlugu sapinngisaminnik iliortarput, nalunnginnamikku ’pilliutit taama ittut Guutip iluarisarigai’. Uppeqatinik ilumoorfiginnittunik akornatsinniittoqarnera pilluaqqussutaangaarpoq! — Hebræerit 13:16.

14. Daavip ukioqqortusineranik paasissutissaq sooq Tussiaat 37:23-25-mi allassimasunik isumaqarnerulersitsiva?

¹⁴ Pissutsit atukkani ukiut ingerlanerini arlaleriarlutik allanngoraluartut, Daavip qularutiginngisaannarpaa Jehovap kiffani ilumoorfiginnittut isumassortuarumaarai. Daavip toqungajalerluni ullumikkut Tussiaat 37-tut ilisimaneqartoq erinarsuusiaraa. Takorlooriaruk Daavi eqqarsarpalulluni erinarsuutigaluni kukkilattariarsortoq. Ima erinarsorpoq: „[Jehovamit] ingerlatinneqartarput angutip allorarneri, nakussatsittarpaa nuannaarutigisarlugulu inuuserisaa. Naakkaluaruni orluissanngilaq [Jehovap] najummimmani. Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik qitornaanilluunniit nerisassanik qinnuuloortunik.“ (Tussiaat 37:23-25) Jehovap tussiaammi isumassarsiarititaasumi tamatumani Daavip utoqqalisimanerata eqqaaneqarnissaa naleqquttutut isigisimavaa. Utoqqalisimanerataana eqqaaneqarnera Daavip qamannga pisumik oqaatigisaanik isumaqarnerulersitsisoq!

15.  Pissutsit atukkani allanngoraluartut utoqqaligaluarlunilu apustili Johannesi aalajaannermigut qanoq maligassaalluarpa?

¹⁵ Aamma pissutsit atukkatik allanngoraluartut utoqqaligaluarlutillu aalajaatsunut maligassiuilluarnerpaanut ilaavoq apustili Johannesi. Ukiuni 70-ingajanni Guutimut kiffartoreerluni Johannesi qeqertamut Patmosimut aallarunneqarpoq „Guutip oqaasia Jiisusillu nalunaajaataa pissutigalugit“. (Saqqummersitat 1:9) Suliassanili suli naammassinngilaa. Allakkammi Biibilimut ilaalersut ukiuni inuuffigisamini kingullerni aatsaat allappai. Patmosimiitilluni saqqummersitanik takorruukkanik mianernartunik peqqissaarluni allaatigisaminik takorruuisinneqarpoq. (Saqqummersitat 1:1, 2) Kaasarip Nervap naalakkersuinerata nalaani iperagaasimasorineqartarpoq. Kingusinnerusukkut iivangkiiliuni allakkanilu aterminik taaguutillit pingasut allappai. Ukiup 98-ip u.n.k. missaaniusimassaaq, tamatumalu nalaani Johannesi 90-it 100-lluunniit missiliorlugit ukioqarsimagunarpoq.

Pinertusaarnermut uppernarsaatit puiunaatsut

16. Siornatigutut allanut attaveqarsinnaajunnaarsimasut qanoq ilillutik ersersissinnaavaat Jehovamut tunniusimallutik?

¹⁶ Utoqqalineq ilutigalugu timikkut pisinnaasat  assigiinngitsorpassuartigut killeqalersinnaapput, timikkullu pisinnaasat killeqarnerat ilungersunarnerusinnaavoq ilungersunannginnerusinnaalluniluunniit. Allaat utoqqaat ilaat allanut attaveqarsinnaajunnaartarput. Taamaakkaluartorli Guutip asanninnera ajunngissusialu pisassarinngisaraluaq pillugit nuannersunik eqqaamasaqarput. Qanerminnik oqaatigisinnaasatik killeqaraluartut uummatimikkut Jehova ima oqarfigaat: „Ilami inatsisitit nuannareqaakka, eqqarsaatinniipput ulloq tamaat.“ (Tussiaat 119:97) Jehovap ’aterminik eqqarsaatiginnittartut’ ilisarisimavai. Aamma inunnit amerlanerpaanit, aqqutigeqqusaminik soqutiginninngitsunit, allaanerulluinnarnerat qujamasuutigaa. (Malaki 3:16, NV; Tussiaat 10:4) Jehovap uummatitta eqqarsaataanik nuannaarutiginninnera nalunagu tuppallernangaarami! — 1 Nalunaarsuutit 28:9; Tussiaat 19:15.

17. Jehovamut sivisuumik kiffartorsimasut asseqanngitsumik sumik angusaqarsimappat?

¹⁷ Arajutsineqassanngilaq ukiuni qulikkuutaani Jehovamut kiffartorsimasut pinertusaarnermikkut asseqanngilluinnartumik allatullu anguneqarsinnaanngitsumik angusaqarsimasut — tassa taakkua inuunerannik oqaluttuat tassaalersimapput pinertusaarnermut uppernarsaatit puiorneqartussaanngitsut. Jiisusi ima oqarpoq: „Pinertusaarnissigut inuunersi pigittuinnassavarsi.“ (Lukasi 21:19) Aap, naassaanngitsumik inuusinnaalissagaanni pinertusaarnissaq pingaaruteqarluinnarpoq. Ilassi ’Guutip piumasaanik iliorsimasut’ inuunerminnilu ilumoorfiginnittuunerminnik uppernarsaasimasut ’neriorsuutigineqartup pissarsiarinissaa’ qilanaarisinnaavaat. — Hebræerit 10:36.

18. (a) Utoqqarnut tunngatillugu Jehovap suna nuannaarutigaa? (b) Allaaserisami tulliuttumi suna sammissavarput?

¹⁸ Jehovap uummatikkut iluunngarlutit kiffartornerit qujamasuutigaa, iliuuserisinnaasatit qanorluunniit annertutigigaluarpata annikitsigigaluarpataluunniit. Utoqqaliartortillutit ’inuusermut qallermut’ tunngatillugu qanorluunniit pisoqassagaluarpat, ’ilorleq’ ullut tamaasa nutaanngoriartorsinnaavoq. (2 Korinthimiut 4:16) Qularnanngitsumik siornatigut naammassisimasatit Jehovap pingaartippai, aamma qularnanngilluinnarpoq atini pillugu maannakkut iliuuserisatit qujamasuutigigai. (Hebræerit 6:10) Allaaserisami tulliuttumi sammissavarput taamatut aalajaannerup qanoq pingaaruteqarsinnaatiginera.

Qanoq akissavit?

• Anna ullumikkut utoqqarnut kristumiunut qanoq maligassaalluarpa?

• Sooq utoqqaassuseq naammassisinnaasanik killiliisariaqanngila?

• Utoqqaat Guutimut tunniusimanerminnik qanoq ersersitsiuarsinnaappat?

• Jehovap utoqqaat imminut kiffartornerat qanoq isigaa?

[Atuaqqissaarnermi apeqqutit]

[Qupp. 15-mi assiliartaq]

Danielip utoqqalisup ’mappersakkani’ maluginiarpaa Juda qanoq sivisutigisumik aallarussaaqqassanersoq

[Qupp. 17-mi assiliartat]

Utoqqarpassuit ataatsimiigiartuarnermut, aallussilluarluni oqaluussinermut ilinniarususseqarnermullu tunngatillugu maligassaalluarput