„Ajortoq ajugaaffiginiaruk ajunngitsoq atorlugu“

„Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.“ — ROMAMIUT 12:21.

1. Sooq ajortumik ajugaaffiginnissinnaanerput qularutiginngilarput?

PALLORFIGINNINNEQ ilumoortoq sakkortuumik akerlilersorneqaraluartoq aalajaattoqarsinnaava? Pissaanerit nakooqisut silarsuarmut matumunnga guutiitsumut uagutsinnik utertitsiniarsarisut ajugaaffigineqarsinnaappat? Apeqqutinut taakkununnga akissut aappiuvoq! Sooq taamaappa? Apustilip Paulusip Romamiunut allakkamini oqaatigisai pissutigalugit. Ima allappoq: „Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.“ (Romamiut 12:21) Jehova tatigigutsigu silarsuarmillu ajugaaffigineqannginnissarput aalajangiusimagutsigu tamatuma ajussusianit ajugaaffigineqarnavianngilagut. Aammattaaq oqaatsini „ajortoq ajugaaffiginiaruk“-mi erserpoq ajortoq ajugaaffigisinnaagipput anersaakkut akiuunnermi pinertusaarutta. Mianersorunnaarlutik akiuukkunnaartut kisimik silarsuarmit guutiitsumit matumannga tamatumalu naalagaanit ajortumit, Saatani Diaavulumit, ajugaaffigineqassapput. — 1 Johannesi 5:19.

2. Sooq Nehemiap inuunerani pisimasut ilaat misissussavavut?

² Paulusip nalaa ukiut 500-t missiliorlugit sioqqullugu Guutimut kiffaasup Jerusalemimi najugaqartup ajortunik akiuineq pillugu Paulusip oqaasiisa ilumuussusiat erseqqissarpaa. Guutip kiffaa taanna tassaavoq Nehemia. Inuit guutiitsut akerlilersuinerat naammagalugu atuinnanngilaa, aammali ajortoq ajugaaffigaa ajunngitsoq atorlugu. Unamminiarnartunik sunik nalaataqarpa? Sunaana pissutigalugu tamakku naammagalugit atorsinnaasimagai? Taassuma maligassiaa qanoq ililluta malissinnaavarput? Apeqqutit taakkua akissutissarsiniarlugit Nehemiap inuunerani pisimasut ilaat misissussavavut. *

3. Nehemia qanoq ittunik avatangiiseqarluni inuua, suliarlu suna naammassivaa?

³ Nehemia kunngip Artaxerxesip illussaarsuani kiffartorpoq. Nehemia inuit Guutimik ilumoortumik pallorfiginninngitsut akornanni inuugaluarluni ’silarsuarmut naleqqussanngilaq’. (Romamiut 12:2) Judami pisariaqartitsisoqalermat inuuneq ilorrisimaarnartoq isumakkeerlugu ilungersunartumik angalalluni Jerusalemiliarpoq illoqarfiullu qarmarsuinik qarmaqqiinermik suliassarujussuaq suliariumallugu. (Romamiut 12:1) Nehemia Jerusalemimi naalagaatitaagaluarluni Israelikkoqatini ullut tamaasa suleruloqatigisarpai, „ullaakkut qaammalaalerneraniit unnukkut ullorissat takkunnerannut“. Tamatuma kingunerisaanik suliaq qaammatit marluk ingerlanerinnaanni naammassineqarpoq! (Nehemia 4:15; 6:15) Suliap tamatuma suliarineqarnera maluginiarnarpoq, sanaartortoqarneranimi Israelikkut assigiinngitsorpassuartigut akerlilersorneqarput. Nehemiap akerlilersortai kikkuuppat, sunalu anguniarpaat?

4. Nehemiamik akerlilersuisut suna anguniarpaat?

⁴ Nehemiap akerlilersortai pingaarnerit tassaapput Sanballati, Tobija Geshemilu, tamarmik angutaasut sunniuteqarluartut Judap eqqaani najugallit. Guutip innuttaanut akeraagamik, ’Nehemiap Israelikkut iluaqutissaannik suliaqarniarluni tikiussimanera nuannarinngeqaat’. (Nehemia 2:10, 19) Nehemiamut akeraasut sanaartornermut pilersaarutit maangaannartinnissaat aalajangiusimalluinnarpaat, allaallumi ajorluinnartunik  periaaseqarlutik akornusersuinialerput. Nehemia ’ajortumit ajugaaffigitissava’?

„Kamangaalerpoq“

5, 6. (a) Nehemiamut akeraasut sanaartorneq qanoq periarfigaat? (b) Sooq Nehemiap akerlilersortini qunugilinngilai?

⁵ Nehemiap juutit sapiilluni ima kajumissaarpai: „Jerusalemip qarmarsui sanaqqinniartigit.“ Ima akipput: „Qarmaalluta aallartissaagut.“ Nehemia ima maluginiagaqarpoq: „Suliariniagartik ajunngitsoq tamaviaarlutik aallartippaat,“ akerlilersuisulli „mitaatigaatigut asissorlutalu oqarlutik: ’Sulerisusiuna? Kunngi pikitsitsiffiginiarpisiuk?’“ Nehemiap akerlilersuisut asissuinerat eqqunngitsumillu unnerluutiginninnerat qunulissutiginngilai. Ima oqarfigai: „Qilaap Guutiata ikiorluta iluatsitsisissavaatigut! Uagut taassumunnga kiffaasugut qarmaalluta aallartissaagut.“ (Nehemia 2:17-20) Nehemiap ’suliariniakkamik ajunngitsup’ ingerlatiinnarnissaa aalajangiusimavaa.

⁶ Akerlilersuisut ilaat, Sanballati, „kamangaalerpoq“, suli oqaatsikkut saassutarinninnerulerpoq. Illaruaatiginnilluni ima oqarpoq: „Taakku Judakkupalaat suniartunuku? Ujaqqat sikkigissakkat ujaraaluit akornanniittut . . . uumassuseqalersissinnaanerpaat?“ Tobijattaaq juutinik mitaatiginneqataalerpoq ima oqarluni: „Qarmagaq terianniap pissiffigalugu putusinnaavaa!“ (Nehemia 3:33-35) Nehemia qanoq periarpa?

7. Nehemiap akerlilersortimi pasilliutaat mitallernerallu qanoq periarfigaa?

⁷ Nehemiap mitallernerat soqutiginngitsuusaaginnarpaa. Guutip peqqussutaa malippaa akiniaaniarsarinanilu. (3 Mosesi 19:18) Jehovamut isumagisassanngortippaa imalu qinulluni: „Guuterput, tusaajuk qanoq asissugaasugut! Mitaatilliinerat qanortoq mitaatilliisunut uterili!“ (Nehemia 3:36) Nehemiap Jehovap neriorsuutaa una upperaa: „Akiniaanissaq akisinissarlu uanniipput.“ (5 Mosesi 32:35) Aamma Nehemiap innuttaasalu ’qarmarsuup suliarinera’ ingerlatiinnarpaat. Mitallernerat allamut saassutiginngilaat. Tassa qarmarsuaq suliaraat „illoqarfik tamaat kaajallallugu atasuinnanngorlugu affarmik portussuseqartillugu; inuillu suliap ingerlateqqinnissaanut kajumipput“. (Nehemia 3:38) Pallorfiginninnermut ilumoortumut akeraasut sanaartornermik unitsitsiniaanerat iluatsinngilaq! Nehemia qanoq ilaarsinnaavarput?

8. (a) Akerlilersuisut eqqunngitsumik unnerluutigigaangatigut Nehemia qanoq ilaarsinnaavarput? (b) Illit nammineq misiginikuusat allalluunniit misiginikuusaa akiniaannginnerup silatusaarneruneranik ersersitsisoq oqaluttuariuk.

⁸ Ullumikkut atuarfimmi, suliffimmi imaluunniit allaat angerlarsimaffimmi akerlilersuisunit immaqa mitallerpaluttumik oqalorujuffigineqartarlutalu pasillerneqartarpugut. Amerlanertigulli taamatut eqqunngitsumik unnerluutigineqaraanni iliuuserisinnaasaq pitsaanerpaaq tassaasarpoq najoqqutassamik tunngaviusumik Biibilimiittumik matuminnga maleruaaneq: „Nipangersimaffissaqarpoq.“ (Oqaluussisartup oqaasii 3:1, 7) Taamaattumik oqaatsit annernartut atorlugit akiuinaveersaassaagut, soorlu Nehemia akiuinaveersaarsimasoq. (Romamiut 12:17) Guuti qinunikkut saaffigaarput neriorsuutaa una upperalugu: „Akiniut pigaara, uanga akiliiumaarpunga.“ (Romamiut 12:19; 1 Petrusi 2:19, 20) Taamaalilluta akerlilersortitta suliassamit ullumikkut suliarineqartussamit  — tassa nutaarsiassamik nuannersumik oqaluussissutiginninnermit ajoqersuganngortitsiortornermillu — uagutsinnik allamut saasaanerat akornutaatissanngilarput. (Matthæusi 24:14; 28:19, 20) Akerlilersorneqarneq unissutigiumanagu oqaluusseqataanivut tamaasa ersersittarparput Nehemiatut aalajaatsigaluta.

’Toqorassavassi’

9. Nehemiamut akeraasut sanaartorneq qanoq ilillutik akerlilersorpaat, Nehemialu qanoq periarpa?

⁹ Nehemiap nalaani pallorfiginninnermik ilumoortumik akerlilersuisut tusaramikku „Jerusalemip qarmarneqarnera ingerlalluartoq“, pannatik amuaat „Jerusalemi sorsuffigiartorniarlugu“. Pissutsit juutinut neriulluarnanngillat. Samariamiut avannaatungaaniipput, Ammonikkut kangiatungaaniipput, Arabiamiut kujataatungaaniipput Asdodimiullu kitaatungaaniillutik. Jerusalemi ungusaavoq, sanaartoqataasullu qimaariarfissaarussorinarput! Qanoq pissappat? Nehemia ima oqarpoq: „Uagut Guutitsinnut qinuvugut.“ Akeraasullu ima sioorasaaripput: „Toqorassavavut sulinerallu kipitillugu.“ Taava Nehemiap sanaartoqataasut illoqarfimmik illersuisussanngortippai „panalerlugit, qalugiusalerlugit pisissilerlugillu“. Inuit isiginnittaasiat naapertorlugu juutit ikittunnguit akeraasut sakkutoorpassuinut pissaaneqarnerorpaseqisunut ajugaasinnaanngillat, Nehemialli taakku ilungersorluni oqarfigai: „Ersigeqinasigit! [Jehova] eqqarsaatigisiuk taanna angingaarmat annilaarnangaarlunilu.“ — Nehemia 4:1-3, 5, 7, 8.

10. (a) Nehemiamut akeraasut akornanni pissutsit allanngoriataarnerannut suna pissutaava? (b) Nehemia sillimaniarluni qanoq piareersarpa?

¹⁰ Maanna pissutsit tupaallannartumik allanngoriataarput. Akeraasut saassussinissartik taamaatippaat. Sooq? Nehemia ima oqaluttuarpoq: ’Pilersaarutaat Guutip atortussaajunnaarsippaa.’ Nalunngilluinnarpaali akeraasut suli ulorianartorsiortitsisinnaasut. Taamaattumik silatusaarluni sanaartortut suleriaasiat naleqqussarpaa. Taamanimiilli „assammik illuinnaa sullisigaat illuanik qalugiusaq tigumiaramikku“. Aamma Nehemia angummik ataatsimik ’sulluartaammik qarlortartussanngortitsivoq’ akeraasut saassussissappata sanaartortunik mianersoqqusisussamik. Pingaarnerpaamilli Nehemiap inuiaat ima neriorsoqqissaarpai: „Guuti sorsukkumaarpoq illersorluta!“ (Nehemia 4:9-14) Nehemiap oqaasii qiimmaallaatigalugit saassussisoqarnissaanullu piareersimallutik sanaartoqataasut suliartik ingerlatiinnarpaat. Oqaluttuaq taanna sumik ilinniarfigisinnaavarput?

11. Kristumiut ilumoortut nunani oqaluussinermik inerteqquteqarfiusuni suna pissutigalugu ajortoq akiorsinnaanngortarpaat, qanorlu ilillutik ajortoq ajunngitsoq atorlugu ajugaaffigisarpaat?

¹¹ Ilaannikkut kristumiut ilumoortut peqqarniitsumik akerlilersorneqartarput. Nunat ilaanni pallorfiginninnermik ilumoortumik akerlilersuisut peqqarniitsut akeqqatut sakkutoorpassuartut amerlalluinnartutut ipput. Inuit isiginnittaasiat naapertorlugu uppeqativut nunani taakkunaniittut qanoq ilioriusissaqanngillat. ’Guutilli illersorlutik sorsukkumaarnera’ upperaat. Uppernertimmi pissutigalugu malersorneqartut Jehovap qinnutiminnik akisisarnera akeraasullu pissaanillit pilersaarutaannik maangaannartitsisarnera misigisaqattaarsimavaat. Allaat nunani oqaluussinermik inerteqquteqarfiusuni kristumiut nutaarsiassamik  nuannersumik oqaluussissutiginnittuarnissamut periarfissarsisarput. Soorlu Jerusalemimi sanaartortut suleriaatsiminnik naleqqussaasimasut, taamatuttaaq ullumikkut Jehovap Nalunaajaasuisa saassunneqarnerminni oqaluusseriaatsitik silatusaarlutik naleqqussartarpaat. Soorunami sakkuinnik sakkulersorneq ajorput. (2 Korinthimiut 10:4) Nakuuserfigineqarnissamik sioorasaarneqaraluarlutilluunniit oqaluussiunnaanngillat. (1 Petrusi 4:16) Qatanngutilli angutit arnallu taakkua sapiitsut ’ajortoq ajugaaffigaat ajunngitsoq atorlugu’.

’Qaallutit naapitsigut’

12, 13. (a) Nehemiamut akeraasut suna pilersaarutigaat? (b) Sooq Nehemiap imminut akeraasunik naapeqateqarnissamut qaaqqusissut itigartippaa?

¹² Nehemiamut akeraasut paasigamikku toqqaannartumik saassussinertik iluatsinngitsoortoq malunnaarsaarnerullutik akerlilersuilerput. Aap, periaatsit assigiinngitsut pingasut atorlugit misiliipput. Periaatsit taakkua suuppat?

¹³ Siullermik, akeraasut Nehemia nakuteriaraluarpaat. Ima oqarfigaat: „Qaallutit Keferimimi Onop Qooruani naapitsigut.“ Ono Jerusalemip Samariallu akornanniippoq. Tassa akeraasut Nehemia siunnersorpaat aqqutaata qiteqqunnerani naapissinnaallutik isumaqatigiinngissutit aaqqinniassagamikkit. Nehemia ima eqqarsarsimasinnaagaluarpoq: ’Tamanna silatusaarnerussaaq. Oqaloqatigiinnermi akiuunnerminngarnit pitsaaneruvoq.’ Neqeroorutaalli Nehemiap itigartippaa. Sooq taamaaliornerluni ima nassuiarpaa: „Taakku ajortumik iliorfiginiarlunga pilersaarusiorput.“ Pilersaarutipiloqarnerat malugaa, nakutitaanngilarlu. Akerlilersortini sisamariarluni ima oqarfigai: „Tasamunnarsinnaanngilanga. Suliara univittussaassaaq qimaannarlugu ilissi ornikkussi.“ Akeraasut Nehemiamik isumaqatigiissuteqarniarsarinerat iluatsinngilaq. Taassuma sanaartorneq kiserluinnaat aalluppaa. — Nehemia 6:1-4.

14. Nehemiap akerlilersortimi eqqunngitsumik unnerluutiginnissutaat qanoq periarfigai?

¹⁴ Aappassaanik, akeraasut Nehemia eqqunngitsumik oqallisigaat kunngimut Artaxerxesimut ’pikitsitsiniassamaarnerarlugu’. Ima kajumissaareqqipput: ’Isumaqatigiinniaqatigiartorniartigut.’ Nehemia itigartitseqqippoq, nalunnginnamiummi akeraasut suniarnersut. Ima nassuiaavoq: „Tamarmimmi taamaaliorlutik ersilersinniaraluarpaatigut ima isumalioramik: ’Assatik sarliaannalerpatigit suliaq naammassineqanngitsuussaaq.’“ Maannali Nehemia akerliliivoq. Ima oqarpoq: „Illit oqaatigisattut ittumik pisoqarsimanngilaq! Illinuna nammineq piumasarsorlutit taamaanneraasutit!“ Aamma Nehemiap Jehova ikioqqulluni saaffigaa. Ima qinuvoq: ’Maanna assakka pissatsikkit.’ (1900/1961) Qularutiginngilaa Jehovap ikiuineratigut peqatigiinniapiluttut akornusersinnaallugit suliarlu ingerlatiinnarsinnaallugu. — Nehemia 6:5-9.

15. Pruffiitioqqusersup Nehemia soqqullugu siunnersorpaa, aamma sooq Nehemia siunnersuut taanna malillugu iliorumanngila?

¹⁵ Pingajussaanik, Nehemiamut akeraasut Nehemia Guutip inatsisaanik unioqqutitsiseriaraluaramikku killuussisoq, Shemaja Israelikkuusoq, atorpaat. Shemajap Nehemia ima oqarfigaa: „Guutip illuani naapitta naalaffiup iluani; matui parnaartigit, toqunniarlutit takkunniarmata, unnuaru aggersoqarniarpoq ilinnik toqutsiniartunik!“ Shemaja oqarpoq Nehemia toqutaaratarsinnaasoq inuuninilu annaassinnaagaa naalaffimmi toqqornermigut. Nehemiali palasiunngilaq. Guutip illuani toqqoruni ajortuliussaaq. Inuunerminik annaassiniarluni Guutip inatsisaanik unioqqutitsissava? Nehemia ima akivoq: „Angut uattut ittoq qanoq ililluni naalaffimmut isersinnaava inuuginnarlunilu? Naamik, tassunnarnianngilanga!“ Sooq Nehemia uukapaatitaanngila? Nalunnginnamiuk Shemaja Israelikkoqatigigaluarlugu „Guutimit aallartitaanngitsoq“. Pruffiitimmi ilumoortup Guutip inatsisaanik unioqqutitseqqullugu siunnersornavianngilaa. Pisimasumi tamatumanissaaq Nehemia imminut akeraasunut ajortunut ajugaaffigitinngilaq. Tamatuma kinguninngua ima nalunaaruteqarsinnaasimavoq: „Qaammatip elulip ulluisa 25-anni qarmarsuaq inerpoq ulluni 52-ini suliarineqareerluni.“ — Nehemia 6:10-15; 4 Mosesi 1:51; 18:7.

16. (a) Ikinngutaasuusaartut, eqqunngitsumik unnerluutiginnittut qatanngutaasuusaartullu qanoq periaaseqarfigissavavut? (b) Angerlarsimaffimmi, atuarfimmi suliffimmiluunniit uppernerit aalajangiusimaannarniarlugu qanoq ilillutit ersersissinnaaviuk?

¹⁶ Ikinngutaasuusaartut, eqqunngitsumik  unnerluutiginnittut qatanngutaasuusaartullu uagutsinnik akerlilersuisinnaapput, soorlu Nehemia taama pineqarsimasoq. Ilaat immaqa aqqutaata qiteqqunnerani naapigiaqqusinnaappullusooq. Immaqa qularunnaarsinniarsarissavaatigut aallussinikinnerugutta Jehova kiffartorfigiitigalugu silarsuarmi matumani anguniagaqarsinnaanitsinnik. Guutilli naalagaaffia inuunitsinni pingaarnerpaajummat eqqortuusup akerlianut akuersiinnarumanngilagut. (Matthæusi 6:33; Lukasi 9:57-62) Aamma akerlilersuisut eqqunngitsumik unnerluutigisinnaavaatigut. Nunat ilaanni naalagaaffimmut navianartuunerarneqartarpugut, soorluttaaq Nehemia kunngimut pikitsitsiniarnerarlugu unnerluutigineqartoq. Unnerluutiginnissutit ilaat eqqartuussivinni ilumuunnginnerarneqarsimapput. Pisulli ataasiakkaat qanorluunniit kinguneqassagaluarpata Jehova isumalluarluta qinnuigaarput pissutsit piumasaminut naapertuuttumik aqoqqullugit. (Filippimiut 1:7) Aamma Jehovamut kiffartortuusaartunit akerlilersorneqarsinnaavugut. Soorlu juutit ilaata Nehemia inuunini annaanniarlugu Guutip inatsisaanik unioqqutitsinissamut akuersisinniarsarigaa, taamatuttaaq siornatigut Jehovamut nalunaajaasuusimasut tunussisimasut arlaatigut eqqortuusup akerlianut akuersiinnartinniarsarisinnaavaatigut. Tunussisulli itigartittarpavut, nalunnginnatsigumi inuunerput annaanneqassasoq Guutip inatsisaanik maleruaanitsigut, unioqqutitsinitsiguunngitsoq. (1 Johannesi 4:1) Aap, Jehovap ikiuineratigut ajortut suulluunniit ajugaaffigisinnaavavut.

Sakkortuumik akerlilersuisoqaraluartoq nutaarsiassaq nuannersoq oqaluussissutigiuk

17, 18. (a) Saatanip taassumalu ikiortaasa suna anguniarsaraat? (b) Illit suna aalajangiusimaviuk, aamma sooq?

¹⁷ Guutip oqaasiani Kristusip qatanngutai tanitat pillugit ima allassimasoqarpoq: „[Saatani] ajugaaffigaat . . . nalunaajaassutigisamikkut.“ (Saqqummersitat 12:11) Taamaattumik Saatanimik — ajussutsimut pilerfiusumik — ajugaaffiginninneq Guutillu naalagaaffia pillugu tusarliussamik oqaluussissutiginninneq imminnut attuumassuteqarluinnarput. Tupinnanngilaq Saatani tanitanik kinguleruttunik ’amerlangaartunillu’ akerlilersuinissamut pilerisaarinermigut kipisuitsumik saassussimmat! — Saqqummersitat 7:9; 12:17.

¹⁸ Soorlu sammereeripput, oqaatsikkut saassutarinninnikkut aamma nakuusernissamik sioorasaarinikkut allatigulluunniit malunnaarsaarnerusumik akerlilersuisoqarsinnaavoq. Saatanilli periaatsit atugai suugaluarpataluunniit anguniagaa ataasiujuaannarpoq — tassa oqaluussinermik unitsitsinissaq. Saperluinnassaarli, ullumikkummi Guutip kiffaasa ’ajunngitsoq atorlugu ajortup ajugaaffiginissaa’ Nehemiatut aalajangiusimavaat. Taamaattumik Jehovap oqaluussinermik naammassineraanissaata tungaanut nutaarsiassaq nuannersoq oqaluussissutigiuassavaat! — Markusi 13:10; Romamiut 8:31; Filippimiut 1:27, 28. (wE 7/1 07)

[Quppernerup ataani ilanngussaq]

Eqqaamavigit?

• Itsaq Guutip kiffai ullumikkullu kristumiut qanoq akerlilersorneqartarpat?

• Nehemiamut akeraasut suna anguniarpaat, ullumikkullu Guutimut akeraasut suna anguniagaraat?

• Qanoq ililluta ajunngitsoq atorlugu ajortoq ajugaaffigiuarsinnaavarput?

[Atuaqqissaarnermi apeqqutit]

[Qupp. 10-mi assiliartaq]

Nehemiap allagaanit ilinniarfigisinnaasavut

Guutimut kiffaasut

• mitallerneqartarput

• sioorasaarneqartarput

• peqqusersusaarfigineqartarput

Peqquserluttut tassaasinnaapput

• ikinngutaasuusaartut

• eqqunngitsumik unnerluutiginnittut

• qatanngutaasuusaartut

Guutip kiffaasa ajortoq ajugaaffigisarpaat

• Guutimit imminnut suliassiissutigineqartumik aalajangiusimanninnermikkut

[Qupp. 9-mi assiliartaq]

Nehemiap suleqataasalu Jerusalemip qarmarsua qarmaqqippaat sakkortuumik akerlilersuisoqaraluartoq

[Qupp. 12-mi assiliartaq]

Kristumiut ilumoortut nutaarsiassaq nuannersoq qunusuillutik oqaluussissutigaat