„Ajortoq akileqinasiuk ajortoqataanik“

„Ajortoq akileqinasiuk ajortoqataanik, inunnullu tamanut ajunnginnerusoq eqqarsaatigisarsiuk.“ — ROMAMIUT 12:17.

1. Qanoq pissusilersorneq nalinginnaava?

MEEQQAT ilarpassui qatanngutimik ilaannit ajanneqaraangamik ingerlaannaq akisinngitsoorsinnaaneq ajorput. Ajoraluartumilli pineqarnermik taamaaqataanik akisisartut meeraannaanngillat. Inersimasut ilarpassui aamma taama iliortarput. Arlaannit ajuallatsinneqaraangamik akiniaarusulertarput. Soorunami inersimasut amerlanerpaat allanik ajattaaneq ajorput, ilarpassuili malunnaarsaarlutik akiniaasarput. Immaqa ajuallatsitsisertik ajoquserniarlugu oqaatissuaatigisarpaat, imaluunniit taassuminnga nuanniilliortitsinissaminnut periusissarsisarput. Periaaseq qanorluunniit ittoq atorneqaraluarpat siunertarineqartoq ataasiuvoq — tassa akiniaanissaq.

2. (a) Sooq kristumiut ilumoortut akiniaarusussuseqarneq akiortarpaat? (b) Apeqqutit suut Biibilimilu kapitali sorleq misissussavavut?

² Akiniaarusussuseqarneq inuup pissusiani sorlaqarluarpoq, kristumiulli ilumoortut akiniaarusussuseqarneq akiortarpaat. Apustilip Paulusip kajumissaarutaa una malinniarlugu ilungersorput: „Ajortoq akileqinasiuk ajortoqataanik.“ (Romamiut 12:17) Najoqqutassiap qutsissup tamatuma maleruarnissaanut suna kajumississutigissavarput? Kikkut akiniarnaveersaartariaqarpavut? Akiniaannginnerput qanoq iluaqutaasumik kinguneqarsinnaava? Apeqqutit taakkua akissutissarsiniarlugit sumut atatillugu Paulusi taamatut oqarnersoq misissussavarput. Aamma Romamiunut allakkat kapitali 12-imi akiniaannginnerup annermik eqqortuullunilu asannittuliornerullunilu anneruniajuitsuliornerunera qanoq ersersinneqarnersoq misissussavarput. Taakkua pingasut ataasiakkaarlugit misissussavavut.

„Taamaattumik oqaaqqissaarniarpassi“

3, 4. (a) Paulusip Romamiunut allakkani kapitali 12-imiit sammisaa suua, aamma oqaatsimik „taamaattumik“-mik atuinera qanoq paasisariaqarpa? (b) Guutip nallittuinera kristumiunut Romamiittunut qanoq sunniuteqartussaava?

³ Romamiunut allakkani kapitali 12-imiit Paulusip sammilerpai kristumiunut tamanut pingaaruteqartut sisamat imminnut attuumassuteqartut. Jehovamut, uppeqatitsinnut, uppinngitsunut naalakkersuinikkullu oqartussaasunut attaveqarnerput allaatigaa. Paulusip eqqunngitsumik ilioqqajaanerup, aamma akiniaarusussuseqarnerup, akiornissaanut tunngaviusumik pissuteqarnera oqaatigimisaarpaa. Imami allappoq: „Taamaattumik oqaaqqissaarniarpassi, qatanngutikka, Guutip nallittuissusia pillugu.“ (Romamiut 12:1, 1900/1961) Oqaaseq „taamaattumik“ atorlugu Paulusip maanna oqaatigisani oqaatigeriikkaminut atassuserpai. Ima oqarporlusooq: ’Aatsaannguaq ilissinnut nassuiaatigisakka eqqarsaatigalugit ilungersorlunga qinnuigaassi maanna ilissinnut oqaatiginiakkakka iliuuserissagisi.’ Paulusimuna kristumiut Romamiittut taakkua sumik nassuiaassimagai?

⁴ Paulusip allakkami kapitaliini aqqanilinni siullerni eqqartorpaa juutit juutiunngitsullu periarfissaat nuannersoq, tassa Guutip naalagaaffiani Kristusimik naalakkersueqateqalersinnaanerat  — neriuut uinikkut Israelikkut ilassinngitsuugaat. (Romamiut 11:13-36) Taamaallaat ’Guutip nallittuinera’ pissutigalugu tamanna immikkut pisinnaatitaaffigineqarsinnaanngorpoq. Kristumiut Guutip ajunngingaassusersua pisassarinngisaraluaq qanoq periarfigisariaqarpaat? Uummatimikkut qujamasungaalissutigisariaqarpaat Paulusip oqaasiisa tulliuttut iliuuserinissaannut kajumissillutik, tassa ’timitik sassaallugit pilliutitut uumasutut illernartutullu Guutip iluarinartitaatut, tamanna tassaassalluni anersaakkut guutisiornerat’. (Romamiut 12:1) Kristumiulli taakkua qanoq ilillutik Guutimut „pilliutitut uumasutut“ sassaassinnaagamik?

5. (a) Qanoq ililluni Guutimut „pilliutitut uumasutut“ imminut sassaattoqarsinnaava? (b) Kajumissaarut suna kristumiut tamarmik malittariaqarpaat?

⁵ Paulusi ima nangippoq: „Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ (Romamiut 12:2) Kristumiut eqqarsartaasertik silarsuup anersaavanit ilusilersortinnagu isumartik nutaanngortittussaavaat eqqarsartaasertik Kristusip eqqarsartaasianut naapertuutilersillugu. (1 Korinthimiut 2:16; Filippimiut 2:5) Kristumiut ilumoortut tamarmik kajumissaarummit tamatuminnga ulluinnarni siulersortittariaqarput — tamannalu ullumikkut aamma uagutsinnut atuuppoq.

6. Paulusip Romamiunut allakkamini 12:1, 2-mi erseqqissaanera naapertorlugu suna akiniaannginnissamut kajumississutigisinnaavarput?

⁶ Paulusip Romamiunut allakkat 12:1, 2-mi erseqqissaanera ullumikkut qanoq iluaqutigaarput? Kristumiut tanitat Romamiittut pisimanerattut Guutip uagutsinnik ullut tamarluinnaasa amerlasoorpassuartigut nallittuiuarnera qujamasuutigingaarparput. Taamaattumik kajumissisinneqarpugut nukitta, piginnaanitta periarfissattalu Guutimut kiffartornermi sapinngisamik pitsaanerpaamik atornissaannut. Aamma tamanna kissaatigingaaratsigu silarsuup eqqarsartaasianik ilaarsinata, Kristusitulli eqqarsarniarluta sapinngisarput tamaat iliuuseqarnissamut tamanna kajumississutigaarput. Aamma Kristusitut eqqarsartaaseqarnerput inoqatitsinnik — uppeqatitsinnik allanillu — qanoq pinnittarnitsinnut sunniuteqartarpoq. (Galatiamiut 5:25) Assersuutigalugu, Kristusip eqqarsartarsimaneratut eqqarsartarutta akiniaarusussuseqarneq akiussavarput. — 1 Petrusi 2:21-23.

„Asanninneq pisuusaarnerunngikkili“

7. Romamiunut allakkani kapitali 12-imi asanninneq qanoq ittoq eqqartorneqarpa?

⁷ Akiniaasannginnitsinnut pissutaasoq tassaaginnanngilaq tamatuma eqqortuliornerunera, tamatumali aamma asannittuliornerunera pissutaavoq. Maluginiariaruk apustilip Paulusip versini tulliuttuni asanninnerup kajumississutaasussaaneranik uparuaanera. Romamiunut allakkani Paulusip oqaaseq ’asanninneq’ (grækerisut: agaʹpē) Guutip Kristusillu asanninnerat pillugu atoqattaarpaa. (Romamiut 5:5, 8; 8:35, 39) Kapitalimili 12-imi Paulusip oqaaseq agaʹpē allatut atorpaa — tassa inunnut allanut asanninneq pillugu. Paulusip uppertut tunissutinik anersaakkut ittunik assigiinngitsunik tunineqarsimanerat eqqaareerlugu, pissuseq kristumiut tamarmik ineriartortittariaqagaat eqqaavaa. Ima allappoq: „Asanninneq pisuusaarnerunngikkili.“ (Romamiut 12:4-9) Allanut asanninneq kristumiut ilumoortut ilisarnaatigaat. (Markusi 12:28-31) Paulusip kajumissaarpaatigut asanninnerup tamatuma kristumiutut ersersittakkatta ilumoortuullunilu piviusuunera qulakkeeqqullugu.

8. Qanoq ililluta asanninnermik pisuusaarnerunngitsumik ersersitsisinnaavugut?

⁸ Paulusip asanninnerup pisuusaarnerunngitsup  qanoq ersersinneqartarnera nangilluni eqqaavaa. Ima allappoq: „Ajussuseq maajugisiuk, ajunngitsoq aalajangerfigisiuk.“ (Romamiut 12:9) ’Maajuginninneq’ ’aalajangerfiginninnerlu’ oqaasiupput sakkortullutillu kimittuut. Grækerit oqaasiat ’maajuginninneq’-mik nutserneqarsimasoq aamma „uumissuingaarneq“-mik nutserneqarsinnaavoq. Ajortup kinguneri kisiisa uumiginagit aammali ajortorpiaq uumigisariaqarparput. (Tussiaat 97:10) Oqaaseq ’aalajangerfiginninneq’ grækerit oqaluutaannit nutsiinnavillugu „nippunneq“-mik isumaqartumit nutsigaavoq. Kristumiu allanik ilumoortumik asannittoq pissuserineqartussamut ajunngissusermut ima ’nippulluartigisimassaaq’, imaluunniit ima atalluinnartigissaaq, pissuserilivillugu.

9. Paulusip suna kajumissaarutigisaqattaarpaa?

⁹ Paulusip asanninnermik ersersitseriaaseq aalajangersimasoq eqqaaqqeqattaarpaa. Ima allappoq: „Ilissinnik qinuginnittut pilluaqqusigit, pilluaqqusigitsi perloqqusinasi.“ „Ajortoq akileqinasiuk ajortoqataanik.“ „Nammineerlusi akiniaaqinasi, asasakka.“ „Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.“ (Romamiut 12:14, 17-19, 21) Paulusip erseqqissorujussuarmik oqaatigaa uppinngitsut, uagutsinnik akerlilersuigaluartulluunniit, qanoq pisariaqarivut.

„Ilissinnik qinuginnittut pilluaqqusigit“

10. Uagutsinnik malersuisut qanoq ililluta pilluaqqusinnaavavut?

¹⁰ ’Uagutsinnik qinuginnittunik pilluaqqusinissamik’ Paulusip kajumissaarutaa qanoq ililluta malissinnaavarput? (Romamiut 12:14) Jiisusip ajoqersukkani ima oqarfigai: „Akeqqasi asasigit, ilissinnillu qinuginnittut qinnussigit.“ (Matthæusi 5:44; Lukasi 6:27, 28) Uagutsinnik qinuginnittut, imaluunniit malersuisut, pilluaqqusinnaavavut ilaatigut qinnunnerisigut, Jehova qinnuigalugu ilisimasaqannginnertik pissutigalugu uagutsinnik malersuisut isaannik uisitseqqullugu sallusuissut paasisinnaaniassammassuk. (2 Korinthimiut 4:4) Nassuerutigisariaqarpoq uagutsinnik malersuisunik Guutip pilluaqqusinissaanik qinnuiginissaa eqqumiippalussinnaasoq. Eqqarsartaaserpulli Kristusip eqqarsartaasianut assingunerujartortillugu uagutsinnut akeraasut asanninnermik ersersitsivigisinnaanerujartuinnassavavut. (Lukasi 23:34) Taamatut asanninnermik ersersitsineq qanoq kinguneqarsinnaava?

11. (a) Stefanusimik oqaluttuaq qanoq ilinniarfigisinnaavarput? (b) Paulusimik oqaluttuami paasisatsitut akerlilersuisut qanoq allanngorsinnaappat?

¹¹ Stefanusi malersuisiminik qinnussisut ilagaat, qinulussinnanngilarlu. Ukiumi 33-mi u.n.k. piinsip ulluata kinguninngua Stefanusi ilagiinnik kristumiunik akerlilersuinit tigusarineqarpoq; uniarlugu Jerusalemip avataatungaanukaanneqarpoq ujaqqanillu milloorneqarluni. Toqunnginnerminili ima nillerpoq: „[Jehova], ajortuliamut tamatumunnga pisuuteqinagit.“ (Apustilit Suliaat 7:58–8:1) Angutit Stefanusip ulloq taanna qinnussaasa taakkua ilaat Saulusiuvoq, Stefanusip toqutaaneranik takkunnittuullunilu iluarinnittoq. Kingusinnerusukkut Jiisusi makititaasimasoq Saulusimut takutippoq. Malersuisuusimagaluaq taanna Kristusimut ajoqersuganngorpoq, piffissallu ingerlanerani apustilinngorpoq Paulusi Romamiunut allakkanik allattoq. (Apustilit Suliaat 26:12-18) Stefanusip qinnutaa malillugu Jehovap Paulusi ajortuliaanik, kristumiunik malersuisimaneranik, isumakkeerfigisimannguatsiarpaa. (1 Timotheusi 1:12-16) Taamaammat tupinnanngilaq Paulusip kristumiut ima kajumissaarmagit: „Ilissinnik qinuginnittut pilluaqqusigit“! Misigisaminimmi nalunngilaa Guutip kiffaanik malersuisut ilaat ilaanni Guutimut kiffartortunngorumaartut. Ullumikkuttaaq malersuisut Jehovap kiffaasa eqqissisimasumik pissusilersornerat pissutigalugu uppertunngorsimapput.

„Inuit tamaasa eqqisseqatiginiarsigit“

12. Paulusip Romamiunut allakkat 12:9, 17-imi oqaaqqissaarutai marluk imminnut qanoq attuumassuteqarpat?

¹² Paulusip uppeqatinik uppinngitsunillu qanoq pinnittoqarnissaanik oqaaqqissaarutaa tulliuttoq imaappoq: „Ajortoq akileqinasiuk ajortoqataanik.“ Oqaasiisa taakkua siusinnerusukkut oqaatigisaanut ukununnga atassuteqarnerat paasinarpoq: „Ajussuseq maajugisiuk.“ Aap, qanoq ililluni oqartoqarsinnaagami ajortoq ilumut maajugalugu allat ajortumik akisaraanni? Tamanna ’pisuusaarnerunngitsumik’ asannittuliornerup akerlerluinnaanik iliornerussagaluarpoq. Paulusi ima nangippoq: „Inunnut tamanut ajunnginnerusoq  eqqarsaatigisarsiuk.“ (Romamiut 12:9, 17) Oqaatsit taakkua qanoq ililluta maleruarsinnaavavut?

13. Inuit suut maluginiartarpaat?

¹³ Siusinnerusukkut Paulusip Korinthimiunut allakkamini eqqaavaa apustilit malersorneqarnerat. Ima allappoq: „Silarsuarmut inngilinullu inunnullu isiginnaagassiaannanngorpugut. . . . Oqalorujuffigineqaraangatta pilluaqqusisarpugut, qinugineqaraangatta naammagittartarpugut, ajortumik oqaluuserineqartaraangatta inussiarnersumik akisarpugut.“ (1 Korinthimiut 4:9-13) Ullumikkuttaaq kristumiut ilumoortut silarsuaq tamakkerlugu inunnit maluginiarneqartarput. Naapertuilluanngitsumik pineqartaraluarluta iliuuserisavut ajunngitsut inuit takugaangamikkit kristumiutut tusarliussatsinnut pitsaanerusumik periarsinnaasarput. — 1 Petrusi 2:12.

14. Eqqisseqateqarniarluta qanoq iliuuseqartigisariaqarpugut?

¹⁴ Eqqissinermilli siuarsaaniarluta qanoq iliuuseqartigisariaqarpugut? Sapinngisaq tamaat iliuuseqartariaqarpugut. Paulusip qatanngutini kristumiut ima allaffigai: „Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.“ (Romamiut 12:18) Oqaatsit „ajornanngippat“ aamma „aalajangiisuusinnaagussi“ ersersitsipput immaqa tamatiguunngitsoq allanik eqqisseqateqartoqarsinnaaneranik. Assersuutigalugu inuk alla eqqisseqatiginiaannarlugu Guutip peqqussutaanik unioqqutitsinavianngilagut. (Matthæusi 10:34-36; Hebræerit 12:14) Ingasaassinatali — najoqqutassianut naapertuilluartunut akerliusunut akuersiinnarnata — sapinngisarput tamaat iliuuseqartarpugut „inuit tamaasa“ eqqisseqatiginiarlugit.

„Akiniaaqinasi“

15. Akiniaannginnissamut pissutissaq suna Romamiunut allakkat 12:9-mi eqqaaneqarpa?

¹⁵ Paulusi akiniaannginnissatsinnut pissutaasumik pingaarutilimmik suli allamik eqqaasaqarpoq: Akiniaannginneq anneruniajuitsuunermut ersiutaavoq. Ima allappoq: „Nammineerlusi akiniaaqinasi,  asasakka, Guutilli kamaassinera periarfississiuk — allassimasoqarmat: ’Akiniut pigaara, uanga akiliiumaarpunga,’ oqarpoq [Jehova].“ (Romamiut 12:19) Kristumiu akiniaaniarsarisoq makitavoq. Guutimmi suliassaa suliariniarsaraa. (Matthæusi 7:1) Aamma nammineq iliuuseqarniarnermigut qulaarpaa Jehovamik ima oqartumik tatiginnippiarnani: „Akiniut pigaara, uanga akiliiumaarpunga.“ Kristumiulli ilumoortut qularinngilaat Jehovap ’qinikkani naapertuilluartumik pineqartikkumaarai’. (Lukasi 18:7, 8; 2 Thessalonikamiut 1:6-8) Taakku anneruniajuillutik Guutip ajortunik akiniaasussaanera akueraat. — Jeremia 30:23, 24; Romamiut 1:18.

16, 17. (a) Allap niaquanut ’aamarsuarnik aamaartunik katersuineq’ qanoq paasisariaqarpa? (b) Inussiarnisaarnerup uppinngitsup uummataanik aqilisitsisinnaanera illit nammineq misiginikuuiuk? Taamaappat assersuuteqarit.

¹⁶ Akeraasoq akiniaraanni qularnanngitsumik tamanna taassuma uummataanik manngertitsissaaq, inussiarnisaarfigigaannili tamanna uummataanik aqilisitsisinnaavoq. Sooq? Paulusip kristumiunut Romamiittunut oqaasii maluginiariakkit. Ima allappoq: „Akeqqat kaappat nerleruk, imerusuppallu immiguk; taamaalioruit aamarsuit aamaartut niaquanut katersorumaarpatit.“ (Romamiut 12:20; Ussatit 25:21, 22) Tamanna qanoq paasisariaqarpa?

¹⁷ Oqariartaaseq ’aamarsuarnik aamaartunik niaquanut katersuineq’ assersuutaavoq Biibilip nalaani saviminermik aatsitseriaatsimit pisoq. Saviminissaq aatsitsivimmi aamarsuarnut aamaartunut ilineqartarpoq, saviminissarlu aamarsuarnik aamaartunik qallerneqartarportaaq. Aamarsuit aamaartut qaavanut ilineqartut suli kissarnerulersitsisarput, taamaalillunilu saviminissaq manngersoq aattarpoq minguiarneqartarlunilu. Tamatumunnga assingusumik uagutsinnut akeraasoq ajunngisaarfigineratigut immaqa ’aqilisarsinnaavarput’ pissusiilu ajunngitsut ineriartortillugit. (2 Kunngit 6:14-23) Maanna kristumiunut ilagiinnut ilaasut ilarpassuisa pallorfiginninneq ilumoortoq kajungerilersimavaat Jehovap Nalunaajaasuisa ilaannit inussiarnersumik pineqartaramik.

Sooq akiniaaneq ajortugut

18. Sooq akiniaannginneq eqqortuliornerullunilu asannittuliornerullunilu anneruniajuitsuliornerua?

¹⁸ Romamiunut allakkat kapitali 12-ip sammilaarnerani ’ajortup ajortoqataanik akilinnginnissaanut’ pissutaasorpaaluit pingaarutillit paasivavut. Siullermik, akiniaasannginnerput eqqortuliorneruvoq. Guutip uagutsinnik misiginneqatiginninnera eqqarsaatigalugu Jehovamut iluunngarmik pigitinnissarput taassumalu peqqussutaanut — aamma uagutsinnut akeraasunut asanninnissamik peqqussutaanut — kajumilluta naalannissarput eqqortuullunilu silatusaarneruvoq. Aappassaanik, akiniaajumannginneq asanninnermut ersiutaavoq. Asannilluta akiniaanata eqqissinermik siuarsaanitsigut neriuppugut sakkortuumik akerlilersuisut allaat Jehovamik pallorfiginnittunngornissaannut ikiorsinnaallugit. Pingajussaanik, akiniaasannginnerput anneruniajuinnermut ersiutaavoq. Akiniaaneq makitanermut ersiutaassaaq, Jehovami ima oqarpoq: „Akiniut pigaara.“ Guutip oqaasiani aamma ima mianersoqqussuteqarpoq: „Makitassutsip kanngunassuseq kingunerisarpaa, qanilaartulli [anneruniajuitsulli, NV] ilisimassuseq pigaat.“ (Ussatit 11:2) Silatusaarluta Guutip ajortunik akiniaasussaanera akuerigutsigu, tamanna anneruniajuitsuunitsinnut ersiutaassaaq.

19. Allaaserisami tulliuttumi suut sammissavavut?

¹⁹ Paulusip allanik qanoq pinnittariaqarnerput pillugu siunnersuutini kajumissaarilluni ima eqikkarpai: „Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.“ (Romamiut 12:21) Nukiit ajortut suut ullumikkut akiortariaqarpavut? Qanoq ililluta ajugaaffigisinnaavavut? Apeqqutit taakkua aamma apeqqutit taakkununnga assingusut allaaserisami tulliuttumi akineqassapput.

Uku nassuiarsinnaavigit?

• Romamiunut allakkat kapitali 12-imi qanoq kajumissaarneqaqattaarpugut?

• Suna akiniaannginnissamut kajumississutigissavarput?

• ’Ajortumik ajortoqataanik akiliinnginnerput’ qanoq ililluni uagutsinnut allanullu iluaqutaassava?

[Atuaqqissaarnermi apeqqutit]

[Qupp. 3-mi ungalusaq]

Romamiunut allakkat kapitali 12-imi allaatigineqarpoq kristumiup ukununnga attaveqarnera

• Jehovamut

• uppeqatiminut

• uppinngitsunut

[Qupp. 4-mi assiliartaq]

Paulusip Romamiunut allagai kristumiunut siunnersuutinik atorluarsinnaasunik imaqarput

[Qupp. 6-mi assiliartaq]

Ajoqersukkamik Stefanusimik oqaluttuaq sumik ilinniarfigisinnaavarput?