Anersaamut illernartumut ajortuliorsimavit?

„Ajortuliaqarpoq toqumik kinguneqartussaasunik.“ — 1 JOHANNESI 5:16.

1, 2. Qanoq ililluta nalunngilarput Guutip anersaavanut illernartumut ajortuliortoqarsinnaasoq?

„ANERSAAMUT illernartumut ajortuliorsimassasoralunga annilaangarsuataarpunga.“ Arnaq Tysklandimiu Guutimut kiffartortuugaluarluni taama allappoq. Kristumiuusorli ilumut Guutip anersaavanut illernartumut, imaluunniit nukinganut sulisumut, ajortuliorsinnaava?

² Aap, Jehovap anersaavanut illernartumut ajortuliortoqarsinnaavoq. Jiisusi Kristusi ima oqarpoq: „Ajortulianik mitallernernillu tamanik inuit isumakkeerfigineqassapput, Anersaamulli mitallernerit isumakkeerneqassanngillat.“ (Matthæusi 12:31) Aamma ima mianersoqquneqarpugut: „Sallusuissut ilisimalereeraluarlugu piaaraluta ajortuliorutta taava pilliutissaqarunnaassaaq ajortit pillugit, ilimagisassariligarpulli tassa eqqartuunneqarnissaq siooranangaartoq.“ (Hebræerit 10:26, 27) Aamma apustili Johannesi ima allappoq: „Ajortuliaqarpoq toqumik kinguneqartussaasunik.“ (1 Johannesi 5:16) Ingasattumilli ajortuliorsimasup ’toqumik kinguneqartussaasumik ajortuliaqarsimanerluni’ nammineq nalilertussaavaa?

Peqqissimineq allamillu isumataarneq isumakkeerfigineqarnermik kinguneqartarpoq

3. Ajortuliarput aliasuutigingaarutsigu suna ilimanarpa?

³ Jehova taannaavoq unioqqutitsisunik naggataatigut eqqartuussisussaq. Aap, tamatta taassumunnga akisussaavugut, naapertuilluartuaannarporlu. (1 Mosesi 18:25; Romamiut 14:12) Jehovap aalajangertarpaa isumakkeerfigineqarsinnaanngitsumik ajortuliorsimanersugut, aamma taannaavoq anersaaminik uagutsinnit peersisinnaasoq. (Tussiaat 51:13) Ajortuliarpulli aliasuutigingaarutsigu ilumoorluta peqqissimisimanerput imaluunniit allamik isumataarsimanerput ilimanarluinnarpoq. Ilumoorlunili allamik isumataarneq qanoq paasisariaqarami?

4. (a) Allamik isumataarneq illit qanoq nassuiassaviuk? (b) Tussiaat 103:10-14-imi allassimasut sooq taama tuppallernartigippat?

⁴ Allamik isumataarneq iliuuserisimasamik eqqunngitsumik iliuuseriniakkamilluunniit allatut isiginnilernertut paasisariaqarpoq. Iliuuserisimasamik aliasuutiginninnertut peqqissimissutiginninnertulluunniit ajortuliortarunnaarnertullu paasisariaqarpoq. Ajortuliorujussuarsimagutta, kisiannili ilumut allamik isumataarsimanerput ersersinniarlugu iliuuserineqartariaqartut iliuuserisimallugit, tussiaasiortup oqaasii uku tuppallersaatigisinnaavavut: „[Jehovap] iliorfiginngilaatigut ajortuliatta nalissaannik, akilernatalu pinerlunnitta taamaaqataanik. Soorlu qilak nunamit qutsinnerungaartoq, taama atsigaaq nallittuinera mianerinnitsiminut. Soorlu kangia kitaanit ungasissoq, taamatut unioqqutitsinivut ungasillisippai uatsinnit. Soorlu ataataasup qitornani nallittortarai, taamatut [Jehovap] nallittortarpai mianerinnitsini. Nalunngilaami pinngortitaasugut, eqqaamavaa pujualaasugut.“ — Tussiaat 103:10-14.

5, 6. Johannesip allagai siulliit 3:19-22-mi pingaarnersaq eqqaajuk, aamma apustilip oqaasiisa qanoq paasisariaqarnerat nassuiaruk.

⁵ Aamma apustilip Johannesip oqaasii tuppallersaatigisinnaavavut: „Tamatumuuna ilisimasinnaavarput sallusuissummit pisuunerput, taassumalu saani uummativut eqqissisissinnaavavut uummatitta qanoq-ittumilluunniit pillagassaatikkaluarpatigut; Guutimi uummatitsinnit anneruvoq suullu tamaasa ilisimallugit. Asasakka, uummatitta pillagassaatinngippatigut Guutimut nakimassanngilagut, sumillu qinnutigisaqarutta tunissavaatigut inassutai maleruaratsigit iluarisaanillu iliorluta.“ — 1 Johannesi 3:19-22.

⁶ Nalunngilarput ’sallusuissummit pisuulluta’ qatanngutigiittut asaqatigiikkatta ajortuliortarnerlu ileqquliutinnginnatsigu. (Tussiaat 119:11) Arlaannik pissuteqarluta pillagassaasutut misigigutta  ’Guutip uummatitsinnit anneruneranik sunillu tamanik ilisimanninneranik’ eqqaamanninnissaq pitsaassaaq. Jehova uagutsinnik nallittuivoq nalunnginnamiuk ’qatanngutigiittut ilumoortumik asaqatigiillutalu’ ajortimut akiuullutalu piumasaatut iliornissarput ilungersuutigigipput. (1 Petrusi 1:22) Jehova tatigigutsigu, qatanngutigiittut asaqatigiikkutta piaaralutalu ajortuliortuanngikkutta uummatitta ’pillagassaatinnavianngilaatigut’. ’Guutimut qinugaangatta nakimasarnavianngilagut’, inassutaanillu maleruaasaratta akissavaatigut.

Anersaamut ajortuliortut

7. Ajortuliap isumakkeerfigineqarsinnaaneranut isumakkeerfigineqarsinnaannginneranulluunniit suut aalajangiisuuppat?

⁷ Ajortuliat suut isumakkeerfigineqarneq ajorpat? Apeqqut taanna akissutissarsiumallugu oqaluttuanik Biibilimeersunik misissuissaagut. Tamanna tuppallersaatigissavarput ingasattumik ajortuliorsimanerput peqqissimissutigigaluarlugu suli annikilliuutigigutsigu. Oqaluttuanimi erserpoq inuup suna ajortuliarisimaneraa apeqqutaavallaanngitsoq; ajortulialli isumakkeerfigineqarsinnaaneranut isumakkeerfigineqarsinnaannginneranulluunniit aalajangiisuusussat tassaapput pissutiginiagaq, uummatikkut pissuseq qanorlu piaaritigineq.

8. Ukiuni hundredelinni siullerni juutit upperisarsiornikkut siuttuisa ilaat qanoq ilillutik anersaamut illernartumut ajortuliorpat?

⁸ Juutit upperisarsiornikkut siuttui ukiuni hundredelinni siullerni Jiisusimik ajorluinnartumik akerlilersuisut anersaamut illernartumut ajortuliorput. Guutip anersaavata Jiisusi aqqutigalugu sulinera takusarpaat taanna Jehovamut  ataqqinaataasumik tupinnartulioraangat. Jiisusimulli akeraasut taakkua tupinnartuliorsinnaaneq tamanna Saatani Diaavulumit pisuunerarpaat. Jiisusi naapertorlugu taakku taamaaliornermikkut Guutip anersaava illernartoq mitallerpaat taamaalillutillu ajortuliorlutik „silarsuarmi matumani piumaartussamiluunniit“ isumakkeerfigineqarnavianngitsumik. — Matthæusi 12:22-32.

9. Mitallerneq suua, tamannalu pillugu Jiisusi qanoq oqarpa?

⁹ Mitallerneq tassaavoq ajortumik oqalunneq, ingutsineq ajortitsiniaanerlu. Anersaaq illernartoq Guutimeersuummat taassuma anersaavanik akerlilersuinerup assigiinnarpaa Jehovamik akerlilersuineq. Taamaalioraanni allamik isumataarnani, taava tamanna isumakkeerfigineqarsinnaanngilaq. Taamatut ajortuliorneq pillugu Jiisusip oqaaseqarnerani erserpoq Guutip anersaavata illernartup sulineranik piaaralutik akerlilersuisut Jiisusip pigai. Akerlilersuisut Jehovap anersaava Jiisusi aqqutigalugu sulisoq takugaluarlugu pissaaneq tamanna Diaavulumit pisuuneraramikku anersaaq mitallerpaat. Taamaattumik Jiisusi ima nalunaarpoq: „Anersaamut Illernartumut mitallertoq naassaanngitsumik isumakkeerfigineqanngisaannassaaq, ajortuliarli naassaanngitsoq pisuussutigissavaa.“ — Markusi 3:20-29.

10. Sooq Judasi ’tammarnerup erneranik’ taaneqarpa?

¹⁰ Aamma eqqarsaatigeriakkit pisimasut Judasi Iskariotimut tunngasut. Aningaasaasivimmit akisussaaffigilikkaminit tillinnermigut ilumuunngitsuliorpoq. (Johannesi 12:5, 6) Ilaanni Judasip juutit siuttui saaffigai isumaqatigalugillu sølvinik 30-nik akilersilluni Jiisusi killuutigissallugu. Judasi Jiisusimik killuutiginnereerluni ilerasuppoq, piaaralunili ajortuliani peqqissimissutiginngisaannarpaa. Taamaattumik Judasi makititaanissaminut naleqqutinngilaq. Taamaattumik Jiisusip taanna ’tammarnerup erneranik’ taavaa. — Johannesi 17:12, 1900/1961; Matthæusi 26:14-16.

Anersaamut illernartumut ajortuliunngitsut

11-13. Kunngi Daavi Batsebamut tunngatillugu qanoq ajortuliorpa, Guutillu taakkuninnga iliuuseqarfiginneriaasia qanoq tuppallersaatigisinnaavarput?

¹¹ Ilaannikkut kristumiut ingasattumik ajortuliaminnik nassuerutiginnereeraluarlutik ilagiinnilu  utoqqaanertanit anersaakkut ikiorneqareeraluarlutik iliuuserisimasatik aliasuutigiuartarpaat. (Jaaku 5:14) Nammineq inuttut tamakkuninnga ajornartorsiuteqarutta, qularnanngitsumik ajortuliaminnik isumakkeerfigineqartut pillugit Biibilimi qanoq allassimasoqarneranik misissuineq iluaqutigissavarput.

¹² Kunngi Daavi Uriap nulianut, Batsebamut, tunngatillugu ingasattumik ajortuliorpoq. Daavip arnaq pinnersoq taanna qaliaminit isiginnaareerlugu illussaarsuarminukaatitippaa innaallugulu. Kingusinnerusukkut paasigamiuk naartulersimasoq, taassuma uiminit, Uriamit, innaanneqarnissaa pilersaarusiorpaa allasiorneq isertorniarlugu. Pilersaarulli iluatsinngimmat Uriap sorsunnermi toqunneqarnissaa kunngip isumagaa. Tamatuma kingorna Daavip Batseba nuliarilerpaa, taassumalu ernertaappaa toqusumik. — 2 Samueli 11:1-27.

¹³ Jehovap susoqarsimanera nalunngilaa, tamannalu iliuuseqarfigaa. Daavi isumakkeerfigaa, ilaatigut peqqissiminera naalagaaffillu pillugu angerfigeqatigisimanera eqqarsaatigisimagunarlugit. (2 Samueli 7:11-16; 12:7-14) Batseba peqqissimisimagunarpoq, Salomomummi anaananngornini Jiisusi Kristusimullu siuaasanngornini immikkut pisinnaatitaaffigilerpai. (Matthæusi 1:1, 6, 16) Ajortuliorsimagutta eqqaamassallugu pitsaassaaq Jehovap peqqissiminitsinnik maluginnittarnera.

14. Kunngimut Manassemut pisimasut Guutip qanoq isumakkeerfiginnittartiginera pillugu sumik ersersitsippat?

¹⁴ Jehovap qanoq isumakkeerfiginnittartigisarnera aamma Judami kunngimik Manassemik oqaluttuami erserpoq. Taanna Jehovap isaani ajortumik iliorpoq. Manasse Ba’alimut pilliiviliorpoq, „qilaallu perpassui tamaasa“ pallorfigalugit allaallu naalaffiup silarliini marlunni guutipilunnut pilliiviliorluni. Ernini innikkoortippai, anersaarsiornissamut kajumissaarisarluni Judamilu Jerusalemimilu innuttaasut „inuiannit [Jehovap] Israelikkut pillugit nungutissimasaanit ajornerusumik iliortillugit“. Mianersoqqussutit Guutip pruffiitiisa oqaluussissutigisaat malillugit iliortoqanngilaq. Naggataatigut Manasse Assyriamiut kunngiannit tigusarineqarpoq. Manasse tigusaaqqanermini allamik isumataarpoq maniguullunilu Guutimut qinujuarluni, taassumanngalu isumakkeerfigineqarlunilu Jerusalemimi kunnginngorteqqinneqarpoq, tassanilu pallorfiginninnermik ilumoortumik siuarsaavoq. — 2 Nalunaarsuutit 33:2-17.

15. Apustilip Petrusip inuunerani pisimasut suut ersersippaat Jehova isumakkeerfiginningaartartoq?

¹⁵ Ukiut hundredellit tamatuma kingorna apustili Petrusi ingasattumik ajortuliorpoq Jiisusi miserratigigamiuk. (Markusi 14:30, 66-72) Jehovalli Petrusi isumakkeerfigingaarpaa. (Esaja 55:7) Sooq? Petrusi ilumoorluni allamik isumataarmat. (Lukasi 22:62) Ullut 50-it qaangiuttut piinsip ulluani tamanut erseqqippoq Guutip Petrusi isumakkeerfigisimagaa, ullormimi tamatumani taassuma nakimaalluni Jiisusi pillugu nalunaajaaneq immikkut pisinnaatitaaffigaa. (Apustilit Suliaat 2:14-36) Ullumikkut kristumiunik ilumoorlutik peqqissimisunik Guutip isumakkeerfiginnippiartanngissorinissaanut pissutissaqarpa? Tussiaasiortoq ima erinarsorpoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]? Illilli isumakkeerfiginnittarputit.“ — Tussiaat 130:3, 4.

Jehovap isumakkeerfiginnittarnera upperiuk isumakkullu eqqissillutit

16. Guutimit isumakkeerfigineqarumalluta susariaqarpugut?

¹⁶ Oqaluttuat sammeriikkavut anersaamut illernartumut ajortuliornissap annilaangaginnginnerunissaanut iluaqutaasussaapput. Taakkunani erserpoq Jehova ajortuliortunik peqqissimillutillu allamik isumataartunik isumakkeerfiginnittartoq. Qamannga pisumik Guutimut qinunissarput allanit tamanit pingaaruteqarnerpaavoq. Ajortuliorsimagutta Jiisusip utertitsissutitut pilliutaa, Jehovap nallittuisuunera, naammalluinnanngissuseq kingornussarput aalajaallutalu kiffartorsimanerput tunngavigalugit isumakkeerfigineqarnissarput qinnutigisinnaavarput. Jehovap ajunngissusia pisassarinngisaraluaq nalunnginnatsigu isumakkeerfigineqarnissarput qularinagu isumakkeerfigineqarumasinnaavugut. — Efesosimiut 1:7.

17. Ajortuliorsimagutta anersaakkullu ikiorneqarnissarput pisariaqartillugu susariaqarpugut?

¹⁷ Taavami ajortuliorsimagutta, Jehovamulli qinusinnaanata ajortuliarput anersaakkut napparsimalissutigisimagatsigu? Tamatumunnga atatillugu ajoqersugaq Jaaku ima allappoq: „Akornassinni  napparsimasoqaruni taassuma ilagiit utoqqaanertaat qaaqqussavai, taakkualu [Jehovap] aqqani uuliamik tanissavaat qinnullugulu. Uppernikkut qinnutaasup napparsimasoq annaatissavaa, [Jehovallu] ajorunnaarsissavaa; ajortulisimagunilu isumakkeerfigineqassaaq.“ — Jaaku 5:14, 15.

18. Ilagiinnut ilaajunnaarsitaasimasoqarpat, sooq imaattariaqanngila isumakkeerfigineqarsinnaanngitsumik ajortuliorsimasoq?

¹⁸ Unioqqutitsisimasoq aallaqqaammut allamik isumataanngikkaluarpalluunniit tamannalu pissutigalugu ilagiinnut ilaajunnaarsitaasimalluni, imaattariaqanngilaq isumakkeerfigineqarsinnaanngitsumik ajortuliorsimasoq. Kristumiu tanitaq Korinthimiittoq ajortuliorsimasoq ilagiinnullu ilaajunnaarsitaasimasoq pillugu Paulusi ima allappoq: „Aliasutsitsisup amerlanernit pillagaanera naammappoq pillaanerup akerlianik isumakkeerfigalugulu tuppallersarniarsiuk aliasunnermit suli annerusumit sapilersinneqaqqunagu.“ (2 Korinthimiut 2:6-8; 1 Korinthimiut 5:1-5) Unioqqutitsisulli anersaakkut ingerlallualeqqikkumallutik utoqqaanertanit kristumiunit Biibilimik tunngaveqartumik ikiorneqarnissartik akuerisariaqarpaat, aamma suliamikkut ersersittariaqarpaat ilumut allamik isumataarsimallutik. ’Allamik isumataarnermut naapertuuttunik inerititaqartariaqarput’. — Lukasi 3:8.

19. ’Uppersutsitsigut peqqissuujuarnissamut’ suut iluaqutigisinnaavavut?

¹⁹ Anersaamut illernartumut ajortuliorsimasorinermut suna pissutaasinnaava? Assersuutigalugu nalunngeqatiginnissut ingasattumik malussarissoq imaluunniit timikkut sianissutsikkulluunniit sanngiinneq pissutaasinnaapput. Pissutsini taama ittuni Jehovamut qinuneq qasuersaarnerusarnerlu iluaqutaasinnaapput. Ingammik Saatanimit nikallortinneqarnaveersaartariaqarpugut, taassumami nikallortinniarsaraatigut Guutimut kiffartorunnaarniassagatta. Jehovap guutiitsut toqunerat iluarinnginnamiuk soorunami kiffami ilaannik annaasaqarnini iluarinngilluinnarpaa. Taamaattumik anersaamut illernartumut ajortuliorsimasoraluta annilaangagutta Guutip oqaasianik, ilaatigut Tussiaatineersunik tuppallersaataangaarsinnaasunik, inuussutissalersortuartariaqarpugut. Ilagiit ataatsimiinnerinut najuuttuarlutalu oqaluusseqataajuartariaqarpugut. Taamaaliornerput ’uppersutsitsigut peqqissuunissamut’ isumakkeerfigineqarsinnaanngitsumillu ajortuliorsimasoraluta annilaangajunnaarnissamut iluaqutigissavarput. — Titusi 2:2.

20. Apeqqutit suut anersaamut illernartumut ajortuliorsimannginnermik paasinninnissamut iluaqutaasinnaappat?

²⁰ Anersaamut illernartumut ajortuliorsimasoralutik annilaangasut tamarmik imminut ima aperisariaqarput: ’Anersaamut illernartumut mitallersimavunga? Ajortuliara ilumut peqqissimissutigaara? Guutip isumakkeerfiginnittarnera upperaara? Tunussisuuvunga anersaakkut qaamanermik ilassinnikkumanngitsoq?’ Apeqqutit taakku iluaqutigalugit qularnanngitsumik taakku paasissavaat Guutip anersaava illernartoq mitallersimanagu imaluunniit tunussisunngorsimanatik. Peqqissimisimapput, aamma Jehovap isumakkeerfiginnittarnera upperalugulu qularinngilaat. Taamaappat Jehovap anersaavanut illernartumut ajortuliorsimanngillat.

21. Apeqqutit suut allaaserisami tulliuttumi sammineqassappat?

²¹ Anersaamut illernartumut ajortuliorsimannginnermik qularutiginninnginneq tuppallersaataangaarlunilu qiimmaallannangaarpoq! Tamatumunngali tunngatillugu apeqquteqarpoq allaaserisami tulliuttumi sammineqartussanik. Assersuutigalugu tamatta immikkut imminut ima aperisinnaavugut: ’Guutip anersaavanit illernartumit ilumut siulersortippunga? Anersaap inerititaanik inerititaqarnera erseqqippa?’

Qanoq akissavit?

• Sooq oqartoqarsinnaava anersaamut illernartumut ajortuliortoqarsinnaasoq?

• Allamik isumataarneq qanoq paasisariaqarpa?

• Jiisusi nunarsuarmiikkallarmat kikkut anersaamut illernartumut ajortuliorpat?

• Isumakkeerfigineqarsinnaanngitsumik ajortuliorsimasoraluni annilaanganeq qanoq ajugaaffigineqarsinnaava?

[Atuaqqissaarnermi apeqqutit]

[Qupp. 15-mi assiliartaq]

Inuit Jiisusimik Saatanip pissaaneratigut tupinnartuliorneraasut Guutip anersaavanut illernartumut ajortuliorput

[Qupp. 16-mi assiliartaq]

Petrusi Jiisusimik miserratiginnikkaluarluni isumakkeerfigineqarsinnaanngitsumik ajortuliunngilaq