’Anersaaq najortigalugu saqiuassavit’?
’Anersaaq najortigalugu saqiuassavit’?
’Anersaaq najortigalugu saqigitsi, uinngullu pilerissusii naammassinagit.’ — GALATIAMIUT 5:16, 1900/1961.
1. Anersaamut ajortuliussasoraluni annilaanganeq qanoq ajugaaffigineqarsinnaava?
JEHOVAP anersaavanut illernartumut ajortuliussasoraluni annilaanganeq ajugaaffigineqarsinnaavoq. Taamaaliortoqarsinnaavoq apustilip Paulusip siunnersuutaanik matuminnga maleruaanikkut: ’Anersaaq najortigalugu saqigitsi, uinngullu pilerissusii naammassinagit.’ (Galatiamiut 5:16, 1900/1961) Guutip anersaavanit siulersorneqartikkutta uinngup pilerissusipiluinit ajugaaffigineqarnavianngilagut. — Romamiut 8:2-10.
2, 3. Anersaaq najortigalugu saqiuarutta tamanna uagutsinnut qanoq sunniuteqassava?
2 ’Anersaaq najortigalugu saqiuarutta’ Guutip nukingata sulisup Jehovamut naalannissamut kajumissisissavaatigut. Anersaap illernartup sunniineratigut Jehovap pissusii kiffartornitsinni, ilagiinni, angerlarsimaffimmi sumiikkaluaraangattaluunniillu ilaarsinnaalissavavut. Anersaap inerititai malunnassapput aappatsinnut, meeqqatsinnut, uppeqatitsinnut allanullu pissusilersornitsinni.
3 ’Guutip isaanit isigalugu anersaamut naapertuuttumik inuugutta’ ajortuliornaveersaarsinnaassaagut. (1 Petrusi 4:1-6, NV) Anersaaq uagutsinnut sunniuteqarpat isumakkeerfigineqarsinnaanngitsumik ajortuliunngisaannassaagut. Anersaarli najortigalugu saqiuarutta tamanna uagutsinnut allatigut qanoq sunniuteqassava?
Guutimut Kristusimullu qanittumik attaveqarit
4, 5. Anersaaq najortigalugu saqinerput Jiisusimut isiginnittaatsitsinnut qanoq sunniuteqarpa?
4 Anersaaq illernartoq najortigalugu saqigatta Guutimut taassumalu erneranut qanittumik attaveqartuarsinnaavugut. Paulusip uppeqatini Korinthimiittut, siornatigut guutipilussiortuusimasut, tunissutit anersaakkut ittut pillugit ima allaffigai: „Taamaattumik ilisimatinniarpassi Guutip anersaavagut oqaluttoq kinaluunniit oqarnavianngitsoq: ’Jiisusi perloqqusaavoq!’ aamma aatsaat Anersaakkut Illernartukkut ima oqartoqarsinnaavoq: ’Jiisusi Naalagaavoq!’“ (1 Korinthimiut 12:1-3) Anersaaq sunaluunniit Jiisusimik perloqqusinissamut inunnik kajumissisitsisoq Saatani Diaavulumeersuusimassaaq. Kristumiuugattali anersaaq illernartoq najortigalugu saqisut qularutiginngilarput Jehovap Jiisusi toqusunit makitikkaa pinngortitanillu allanit tamanit qaffasinnerusumik inissisimaffileraa. (Filippimiut 2:5-11) Kristusip utertitsissutitut pilliutaa upperaarput Jiisusilu Guutip uagutsinnut Naalaganngortitaatut akueralugu.
5 Ukiuni hundredelinni siullerni kristumiuunerartoqarpoq Jiisusip uinikkut tikiunneranik miserratiginnittunik. (2 Johannesi 7-11) Taamatut eqqunngitsumik isumaqartut Jiisusi, Missiarsi, pillugu ajoqersuut ilumoortoq akueriumanngilaat. (Markusi 1:9-11; Johannesi 1:1, 14) Anersaaq illernartoq najortigalugu saqinerput taamatut tunussinnginnissamut illersuutigaarput. Kisianni aatsaat anersaakkut eqqumajuarutta Jehovap ajunngissusia pisassarinngisaraluaq iluaqutigiuarsinnaallugulu ’sallusuissummi inuujuarsinnaavugut’. (3 Johannesi 3, 4) Taamaattumik tunussinerup qanorluunniit ittup itigartinnissaa aalajangiusimatigu Ataatarput qilammiusoq qanimut attaveqarfigiuarsinnaaniassagatsigu.
6. Guutip anersaavata pissuserineqartussat suut anersaaq najortigalugu saqisuni ineriartortittarpai?
6 Paulusip guutipilussiorneq immikkoorniarnerlu ’uinngup suliaasut’ eqqaavai kinguaassiuutitigut inuunerlunnermut ileqqorlunnermullu naligitillugit. Aammali ima nassuiaavoq: „Kristusi-Jiisusip pigisaasa uinik sanningasulimmut [nappakkamut anniartitaaffimmut, NV] kikiattorsimavaat kajungerisat pilerissusiilu tappullugit. Anersaami inuugutta aamma anersaami ingerlaniarta.“ (Galatiamiut 5:19-21, 24, 25) Guutip nukingata sulisup anersaami, imaluunniit anersaaq najortigalugu, inuullutillu ingerlasuni pissuserineqartussat suut ineriartortittarpai? Paulusi ima allappoq: „Anersaap inerititai tassaapput asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq [upperneq, saamaneq, NV] imminullu naalakkersinnaaneq.“ (Galatiamiut 5:22, 23) Maanna anersaap inerititai taakku sammissavavut.
’Asaqatigiissaagut’
7. Asanninneq nassuiaruk, tamatumunngalu ilisarnaataasut ilaannik eqqaasaqarit.
7 Asanninneq — anersaap inerititaasa ilaat — tassaagajuttarpoq tunniusimangaarneq namminissarsiornanilu allanik isumassuineq, taakku qanittumik attaveqarfigiitigalugit. Biibilimi allassimavoq ’Guuti tassaasoq asanninneq’, namminermi asannilluinnartuuvoq. Guutip taassumalu ernerata inunnik asanningaarnerat ilaatigut erserpoq Jiisusip Kristusip utertitsissutitut pilliutaatigut. (1 Johannesi 4:8; Johannesi 3:16; 15:13; Romamiut 5:8) Jiisusimut ajoqersugaagatta asaqatigiinnerput ilisarnaatigaarput. (Johannesi 13:34, 35) Aap, peqquneqarpugut ’asaqatigeeqqulluta’. (1 Johannesi 3:23) Aamma Paulusi allappoq asanninneq kamagittartuullunilu inussiarnersuusoq. Sinngasarinngilaq pingaakujuttarnanilu, kanngunartuliortarnanilu namminissarsiortanngilaq. Asanninneq puffassartarinngilaq puttarsisaqartarnanilu. Naapertuilluannginneq tipaatsuutiginagu sallusuissut tipaatsuutigisarpaa. Asanninneq tamatigut naammagittarlunilu upperlunilu neriullunilu ilalaarpoq. Aamma soraanngisaannarpoq. — 1 Korinthimiut 13:4-8.
8. Sooq uppeqativut asanninnermik ersersitsivigisariaqarpavut?
8 Guutip anersaava uagutsinni asanninnermik ineriartortitsisikkutsigu pissuseq taanna Guutimut tullitsinnullu attaveqarnitsinnut sunniuteqassaaq. (Matthæusi 22:37-39) Apustili Johannesi ima allappoq: „Asannittuunngitsoq toqumiittuartuuvoq. Kinaluunniit qatanngumminik uumiginnittoq toqutsisuuvoq, nalunngilarsilu toqutsisimasoq kinaluunniit inuunermik naassaanngitsumik immini pigisaqanngitsoq.“ (1 Johannesi 3:14, 15) Itsaq Israelimi toqutsisimasoq illoqarfimmut qimarnguimmukarluni isumannaatsumiilersinnaavoq toqutaasimasoq aatsaat uumissorsimanngikkuniuk. (5 Mosesi 19:4, 11-13) Anersaamut illernartumut siulersortikkutta Guutimut, uppeqatitsinnut allanullu asanninnerput ersersissavarput.
’Jehovami nuannaarneq ilissi nakuussutigaarsi’
9, 10. Nuannaarneq nassuiaruk, nuannaarnissamullu ilaatigut sunik pissutissaqarpugut?
9 Nuannaarneq tassaavoq pilluarneq. Jehova pillugu allassimasoqarpoq tassaasoq ’Guuti pilluartoq’. (1 Timotheusi 1:11; Tussiaat 104:31) Ernerup Ataatami piumasaatut iliorneq nuannaarutigisarpaa. (Tussiaat 40:9; Hebræerit 10:7-9) Aamma ’Jehovami nuannaarneq uagut nakuussutigaarput’. — Nehemia 8:10.
10 Guutip piumasaatut iliorutta, allaat annikilliuuteqaraluarluta, aliasuuteqaraluarluta malersorneqaraluarlutalu, nalerisimaangaarsinnaavugut nuannaarneq Guutimit pisarput pissutigalugu. ’Guutimik ilisimasaqarneq’ uagutsinnik pilluaatissiingaarami! (Ussatit 2:1-5) Guutimut attaveqarnerput nuannaarnartoq eqqorluartumik ilisimasaqarnermik aamma taassumunnga Jiisusillu utertitsissutitut pilliutaanut uppernermik tunngaveqarpoq. (1 Johannesi 2:1, 2) Aamma qatanngutigiissuarnut nunanit tamalaneersunut ilumoortutuanut ilaaneq nuannaarutigaarput. (Sefania 3:9; Haggaji 2:7) Guutip naalagaaffia pillugu neriuuterput nutaarsiassamillu nuannersumik oqaluussissutiginninnermik immikkut pisinnaatitaaffeqarnerput nuannaarutigaarput. (Matthæusi 6:9, 10; 24:14) Taamatuttaaq aamma naassaanngitsumik inuunissamut periarfissaqarneq nuannaarutigisarparput. (Johannesi 17:3) Taama nuannertigisumik neriuuteqaratta ’nuannaaginnarsinnaavugut’. — 5 Mosesi 16:15.
Eqqissinermik nuannarisaqartuullutillu kamaginnittuugit
11, 12. (a) Eqqissineq illit qanoq nassuiassaviuk? (b) Eqqissineq Guutimit pisoq uagutsinnut qanoq sunniuteqartarpa?
11 Eqqissineq — anersaap inerititaasa ilaat alla — tassaavoq eqqissisimaneq aamma ernumassuteqannginneq. Ataatarput qilammiusoq eqqissinermut Guutiuvoq, aamma ima neriorsoqqissaarneqarpugut: ’Jehovap innuttani pilluaqqussavai eqqissisillugit.’ (Tussiaat 29:11, 1900/1961; 1 Korinthimiut 14:33) Jiisusip ajoqersukkani ima oqarfigai: „Eqqissinermik qimatsivigaassi, eqqissinermik uanga pinnik tunivassi.“ (Johannesi 14:27) Tamanna ajoqersugaanut qanoq iluaqutaassagami?
12 Eqqissineq Jiisusip ajoqersukkanut tunniussaa uummataannik isumaannillu eqqissisaavoq ersiunnaarsitsillunilu. Ingammik eqqissineq tamanna misigaat anersaaq illernartoq neriorsuutigineqartoq pigamikku. (Johannesi 14:26) Ullumikkut anersaap sunniineratigut qinnutitsinnullu akissutitut ’eqqissineq Guutimit pisoq’ asseqanngitsoq, isummatsinnik uummatsitsinnillu eqqissisaasoq, misigisarparput. (Filippimiut 4:6, 7) Aammattaaq Jehovap anersaava eqqissisimanissamut aamma uppeqatitsinnik allanillu eqqisseqateqarnissamut iluaqutigisarparput. — Romamiut 12:18; 1 Thessalonikamiut 5:13.
13, 14. Kamajasuunnginneq qanoq paasisariaqarpa, aamma sooq tamanna pissuserisariaqarparput?
13 Kamajasuunnginneq eqqissinermillu nuannarinninneq imminnut attuumassuteqarluinnarput, kamajasuunnginnermi ajortisaarinernik eqqunngitsuliorfigisaanernillu naammagittarluni atuineruvoq pissutsit pitsanngoriarnissaat neriuutigalugu. Guuti kamaginnittuuvoq. (Romamiut 9:22-24) Jiisusittaaq pissuseq tamanna ersersippaa, tamannalu uagutsinnut iluaqutaasinnaavoq, Paulusimi ima allappoq: „Tamannarpiaq pissutigalugu nallittorneqarpunga Kristusi-Jiisusip kamajuissuserminik takutitsiffigisaani siullersaasinnaaqqullunga, uppertunngorumaartunut inuunermillu naassaanngitsumik pissarsisussanut maligassatut.“ — 1 Timotheusi 1:16.
14 Kamajasuunnginneq iluaqutigisarparput pinertusaarnissamut allat inussiarniitsumik imaluunniit isumaatsumik oqaaseqarlutilluunniit iliuuseqaraangata. Paulusip uppeqatini ima kajumissaarpai: ’Tamanut kamajuigitsi.’ (1 Thessalonikamiut 5:14, 1900/1961) Tamatta naammalluinnanngitsuullutalu kukkusaratta allat kukkuffigigaangatsigit naammagittarfigissagaatigut, imaluunniit uagutsinnik kamaginnissasut, soorunalimi kissaatigisarparput. Taamaattumik tamatta immikkut nuannaarluta ’kamagittartuunissarput’ ilungersuutigisigu. — Kolossemiut 1:9-12.
Inussiarnersuullutillu ajunngitsuugit
15. Inussiarnisaarnerup qanoq paasisariaqarnera nassuiaruk, aamma inussiarnisaarsimasunik assersuuteqarit.
15 Inussiarnisaarneq tassaavoq ajunngisaarneq kiinneraartuunerlu, taakkuninnga oqaatsikkut iliuutsikkullu ersersitsiitigaluni. Jehova inussiarnersuuvoq, aamma taassuma ernera inussiarnersuuvoq. (Matthæusi 5:45; Lukasi 9:11) Inussiarnersuunissaq Guutimut Kristusimullu kiffaasunut piumasaqaataavoq. (2 Timotheusi 2:24) Allaat inuit Guutimut qanittumik attaveqanngitsut allanut ’assut inussiarnisaarsimapput’. (Apustilit Suliaat 27:3; 28:2) Taamaattumik ’anersaaq najortigalugu saqiuarutta’ uaguttaaq inussiarnisaarsinnaassaagut!
16. Pissutsini qanoq ittuni inussiarnisaartuusariaqarpugut?
16 Allat oqaasii annernartut imaluunniit soqutigittaatsumik pissusilersornerat pissutissaqarluarluta kamaatigigaluarutsiguluunniit inussiarnisaartoqarsinnaavoq. Paulusi ima allappoq: „Kamassimariannguaritsi, kisiannili ajortuliornasi. Seqineq tarrisinnaveersiuk narrutsassimanissinni. Diaavululu inissaqarteqinasiuk. . . . Immissinnulli ajunngitsuliorfigigitsi [inussiarnisaarfigisaritsi, NV] nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.“ (Efesosimiut 4:26, 27, 32) Ingammik misilinneqartunut inussiarnernissaq pingaaruteqarpoq. Kisianni soorunami inussiarnisaarnerussanngilaq utoqqaanertap kristumiup uppeqatimi annersinnissaa annilaangagalugu Biibili tunngavigalugu siunnersunngikkuniuk ’ajunngitsunit, iluartunit ilumoortunillu’ tamanit nigoriaannaagaluartoq. — Efesosimiut 5:9.
17, 18. Ajunngissuseq qanoq nassuiarneqarpa, pissuserlu taanna inuunitsinni qanoq pingaaruteqartigaa?
17 Ajunngitsuuneq tassaavoq ileqqorissuuneq, ileqqussatigut pitsaalluassuseq, ajunngitsumik pissuseqarneq. Guuti ajunngilluinnartuuvoq. (Tussiaat 25:8; Zakaria 9:17) Jiisusi aamma ajunngitsuullunilu ileqqorissuuvoq, ajunngitsuugaluarlunili ’ajoqersuisumik ajunngitsumik’ taaneqarami ’ajunngitsutut’ taaneqarnissani akueriumanngilaa. (Markusi 10:17, 18) Nalunanngitsumik tamatumunnga pissutaasoq tassaavoq Guuti ajunngitsuuneq eqqarsaatigalugu maligassaalluarnerpaatut akuerigamiuk.
18 Ajorti kingornussarput ajunngitsuliorsinnaanitsinnut akornutaasarpoq. (Romamiut 5:12) Guutili qinnuigigutsigu ajunngissusermik ilinniarteqqulluta pissuseq taanna pissuserisinnaassavarput. Paulusip uppeqatini Romamiittut ima allaffigai: „Qatanngutikka! Qularinngilara peqangaartusi ajunngissusermik paasisimasaqassusermillu.“ (Romamiut 15:14) Nakkutilliisoq kristumiu ’ajunngitsumik pingaartitsisuusariaqarpoq’. (Titusi 1:7, 8) Guutip anersaavanit siulersorneqartikkutta ajunngissuserput ilisimaneqaatigilissavarput, ajunngitsuliavullu pillugit Jehovap ’eqqaamassavaatigut iluanaaqutissatsinnik’. — Nehemia 5:19; 13:31, 1900/1961.
’Upperneq piviusoq’
19. Hebræerinut allakkat 11:1 naapertorlugu uppernerup qanoq paasisariaqarnera nassuiaruk.
19 Upperneq — anersaap inerititaasa ilaat suli alla — tassaavoq „neriugisamik tatiginnilluinnarneq, takunngisamik qularuteqannginneq“. (Hebræerit 11:1) Upperutta Jehovap neriorsuutigisaasa tamarmik eqquunnissaat qularutigissanngilarput. Piviusut takussaanngitsut pillugit uppernarsaat qularunnaarnartoq ima sakkortutigaaq upperneq uppernarsaammut tamatumunnga assingusutut oqaatigineqarluni. Assersuutigalugu pinngortinneqarsimasut piunerata qularunnaarsippaatigut Pinngortitsisoqartoq. Upperneq taama ittoq ersersissavarput anersaaq najortigalugu saqiuarutta.
20. ’Ajorti uagutsinnik tigumminninniartoq’ suugami, ajortilu tamanna uinngullu suliai qanoq ililluta ingalassimasinnaavavut?
20 Uppernikinneq tassaavoq ’ajorti uagutsinnik tigumminninniartoq’. (Hebræerit 12:1) Uinngup suliai pigisaleritunerlu aamma ajoqersuutit eqqunngitsut upperunnaarsitsisinnaasut ingalassimaniarlugit Guutip anersaava ikiortigisariaqarparput. (Kolossemiut 2:8; 1 Timotheusi 6:9, 10; 2 Timotheusi 4:3-5) Ullumikkut Guutip anersaava Jehovap kiffaani uppernermik, nalunaajaasut kristumiut sioqqullugit inuusut inuillu Biibilimi oqaluttuarineqartut allat uppernerattut ittumik, ineriartortitsisarpoq. (Hebræerit 11:2-40) ’Uppernerlu piviusoq’ pigisarput allat uppernerannut nakussatsissutaasinnaavoq. — 1 Timotheusi 1:5; Hebræerit 13:7.
Saamallutillu imminut naalakkersinnaagit
21, 22. Saamaneq qanoq nassuiarneqarpa, aamma sooq saamasuusariaqarpugut?
21 Saamaneq sallaatsumik periaaseqarnertut innimittartuunertullu paasisariaqarpoq. Saamaneq Guutip pissusiisa ilagaat. Tamanna nalunngilarput Jiisusi saamasuummat, taassumalu Jehovap kinaassusia naammalluinnartumik ersersippaa. (Matthæusi 11:28-30, NV; Johannesi 1:18; 5:19) Taava uagut Guutimut kiffaasugut sumik piumaffigineqarpugut?
22 Kristumiuugatta ’saamasuunissarput inoqatitsinnillu tamanik qanilaartumik pissuseqarfiginninnissarput’ piumasarineqarpoq. (Titusi 3:2) Oqaluussinermi tamanna atuuppoq. Piumasaqaatinillu anersaakkut ittunik eqqortitsisut kajumissaarneqarput kristumiumik unioqqutitsisimasumik ingerlallualeqqinnissaanut ’saamallutik’ ikiueqqullugit. (Galatiamiut 6:1, NV) Tamatta kristumiutut eqqissinermik ataasiussusermillu siuarsaaqataasinnaavugut ’qanilaartuunitsigut saamasuunitsigullu’. (Efesosimiut 4:1-3) Taamaaliorsinnaavugut anersaaq najortigalugu saqiuarnitsigut imminullu naalakkersinnaajuarnitsigut.
23, 24. Imminut naalakkersinnaaneq suua, pissuserlu taanna qanoq iluaqutigaarput?
23 Imminut naalakkersinnaaneq pissutigalugu eqqarsaativut, oqaatsivut iliuutsivullu aqussinnaanngortarpavut. Jehova Babylonimiunut Jerusalemimik piuneerussisunut akuliutsinnani sivisuumik ’nunusimavoq’. (Esaja 42:14) Ernerata ’maligassamik qimatsivigaatigut’ naalliunnermini imminut naalakkersinnaanermigut. Aamma apustilip Petrusip kristumioqatini siunnersorpai ’ilisarsinerminnut imminut naalakkersinnaaneq ilannguteqqullugu’. — 1 Petrusi 2:21-23; 2 Petrusi 1:5-8.
24 Utoqqaanertat kristumiut imminut naalakkersinnaanissaat piumasarineqarpoq. (Titusi 1:7, 8) Anersaamilli illernartumit siulersortittut tamarmik imminut naalakkersinnaapput, taamaalillutillu kinguaassiuutitigut inuunerlunnaveersaarsinnaallutillu oqaatsikkut pissusilunnaveersaarsinnaallutillu Jehovamut iluarisaajunnaarnermik kinguneqarsinnaasut suulluunniit tamaasa pinngitsoorsinnaavaat. Guutip anersaava imminut naalakkersinnaanermik immitsinni ineriartortitsisikkutsigu tamanna allanit malugineqassaaq. Oqaloriaatsitsinni pissusilersornitsinnilu malugineqarsinnaassaaq.
Anersaaq najortigalugu saqiuarit
25, 26. Anersaaq najortigalugu saqinerput maanna inuunitsinnut siunissamullu neriuutitsinnut qanoq sunniuteqassava?
25 Anersaaq najortigalugu saqigutta aallussilluarluta Guutip naalagaaffia oqaluussissutigissavarput. (Apustilit Suliaat 18:24-26) Ilakkuminartuussaagut, pingaartumillu Guutimik mianerinnittut uagutsinnik peqateqarnertik nuannaarutigissavaat. Anersaamit illernartumit siulersortikkutta uaguttaaq uppeqatitsinnut anersaakkut qiimmassaataassaagut. (Filippimiut 2:1-4) Kristumiummi tamarmik ilaminnut qiimmassaataarusupput, ilaa?
26 Silarsuarmi matumani Saatanip naalakkersugaani anersaaq najortigalugu saqinissaq imaannaanngilaq. (1 Johannesi 5:19) Taamaakkaluartorli ullumikkut inuit millionillit anersaaq najortigalugu saqipput. Jehova anersaaminik illernartumik asannilluni uagutsinnut tunniussisartoq uummatikkut iluunngarluta tatigigutsigu inuuneq maanna nuannaarutigisinnaassallugulu aqqutigeqqusaasigut naapertuilluartukkut naassaanngitsumik ingerlasinnaassaagut. — Tussiaat 128:1; Ussatit 3:5, 6. (wE 7/15 07)
Qanoq akissavit?
• ’Anersaaq najortigalugu saqinerput’ Guutimut taassumalu erneranut attaveqarnitsinnut qanoq sunniuteqarpa?
• Anersaap inerititai pissuserineqartussanik sunik ilaqarpat?
• Qanoq ililluta ersersissinnaavarput Guutip anersaavata inerititaanik inerititaqarluta?
• ’Anersaaq najortigalugu saqinerput’ maannakkut inuunitsinnut siunissamullu neriuutitsinnut qanoq sunniuteqarpa?
[Atuaqqissaarnermi apeqqutit]
[Qupp. 21-mi assiliartaq]
Jehovap anersaava illernartoq uppeqatitsinnut asanninnermik siuarsaavoq
[Qupp. 22-mi assiliartaq]
Inussiarnersuuneq oqaatsikkut iliuutsikkullu ersertarpoq