Jehovap oqaasia uumavoq

Ezekielip allagaanit pingaarnersat — II

DECEMBARIUVOQ 609-mi u.n.s. Babylonip kunngiata Jerusalemi inaarutaasumik ungusarissallugu aallarnisaleruttorpoq. Ezekielip Babylonimut aallarussaasunut tusarliussaa maannamut ataasiinnarmik pingaarnersaqarsimavoq: Illoqarfiup nuannaringaagaasa Jerusalemip ajorsartitaanissaa aserugaanissaalu. Maannali Ezekieli allanik siulittuilerpoq, tassa inuiannut guutimik nalusunut, Guutip innuttaasa ajunaarnerannik nuannaarutiginnikkumaartunut, eqqartuussutit siulittuutigilerpai. Qaammatit 18-it qaangiuttut Jerusalemi ajorsarmat Ezekieli suli allamik tusarliussaqarpoq, tusarliussarlu maanna tassaalerpoq pallorfiginninnerup ilumoortup pilerseqqinneqarnissaa nuanningaartoq.

Ezekieli 25:1-imiit 48:35-mut allassimasut inuiaat Israelikkut eqqaamiui pillugit Guutillu innuttaasa aniguisitaanissaat pillugu siulittuutaapput. * Ezekieli 29:17-20-mi allassimasut kisiisa pinnagit pisimaneri tulleriiaarlugit pineqartullu suuneri tulleriiaarlugit oqaluttuaq allataavoq. Versilli sisamat taakkua imarisamikkut tassaniinnerat naleqquppoq. Allakkat isumassarsiarititaasut ilaattut Ezekielip allagaasa imaraat tusarliussaq ’uumasoq sunniisinnaassuseqartorlu’. — Hebræerit 4:12.

’NUNA MANNA NAATSIIVITTUT EDENISUT ILERPOQ’

(Ezekieli 25:1–39:29)

Ammonikkut, Moabikkut, Edomikkut, Filisterit, Tyrusimiut Sidonimiullu Jerusalemip ajorsarneranut qanoq periaaseqarnissaannik ilisimannereersup Jehovap, taakkununnga Ezekieli siulittuisippaa. Egypteni inueruttussaavoq. „Farao Egyptenip kunngia nipiliortorpassuilu“ assersuunneqarput cederimut ’Babylonip kunngiata panaanit’ kipineqarumaartumut. — Ezekieli 31:2, 3, 12; 32:11, 12.

Jerusalemip ukiumi 607-imi u.n.s. aserugaanerata kingorna ukiup affaa qaangiuttoq ’qimaasoq’ tikippoq, Ezekielimullu ima oqarluni: „Illoqarfik tiguagaavoq!“ Maanna pruffiiti aallarussaaqqasunut ’oqajuitsuujunnaarpoq’. (Ezekieli 33:21, 22) Pilersitseqqinnissamik siulittuutinik nalunaarutissaqarpoq. Jehovap ’paarsisussaq ataasiinnaq taakkununnga ivertissavaa, kiffani Daavi’. (Ezekieli 34:23) Edomi inuerutissaaq, Judali ’naatsiivittut Edenisut ilissaaq’. (Ezekieli 36:35) Jehovap innuttani nutartikkat Gogip saassussinissaanut illersorniarlugit neriorsorpai. — Ezekieli 38:2.

Allassimaffiit pillugit apeqqutit akineqartut:

29:8-12 — Qanga Egypteni ukiuni 40-ni inoqanngila? Jerusalemip ukiumi 607-imi u.n.s. ajorsarnerata kingorna Judami amiakkuusut, Jeremia taamaalioqqusinngikkaluartoq, Egyptenimut qimaapput. (Jeremia 24:1, 8-10; 42:7-22) Tassunnarnertilli annaanneqaatiginngilaat, Nebukadnesarimi Egyptenimukarpoq nunalu tigusaralugu. Egyptenip ukiuni 40-ni inoqannginnera tiguaanerup tamatuma kingorna pisimassaaq. Jehova siulittuutinik eqquutitsitsisartuummat Biibilimi oqaluttuarineqartup ilumoornera qularissanngilarput — naak silamiut oqaluttuarisaaneranni Egyptenip inoqanngissimaneranik uppernarsaatissaqanngikkaluartoq. — Esaja 55:11.

29:18 — Qanoq ilillutik ’tamarmik nujaarutivippat tuiilu tamarmik atisaaruppat’? Nebukadnesarip illoqarfimmik nunavimmiittumik Tyrusimik ungusarinninnera qasukkaamissanani ilungersunangaarmat sakkutuui niaqorortinnaveeqquteqarnermik  nujaarussimapput, qisunnillu napasuliassanik pallittaalisaliassanillu ersukkaluarnermik atisaasa tuii nungullarsimapput. — Ezekieli 26:7-12.

Ilinniarfigisinnaasavut:

29:19, 20. Nebukadnesari Tyrusimi ujajaanermini pissarsiaqarpallaanngilaq, illoqarfimmiummi pisuussutimik amerlanersaat nassarlugit illoqarfimminnut qeqertamiittumut qimaapput. Nebukadnesari silamiut kunngerigaluaraat makitasooq imminuinnarlu eqqarsaatigisoq, suliarisimasai pillugit Jehovap akissarsitikkumasimavaa Egypteni taassumunnga tunniullugu ’sakkutuuminik akissarsisitsisinnaaniassammat’. Guuti ilumoortoq ilaarniassannginnerparput oqartussaasut suliaat uagutsinnut iluaqutaasut pillugit taakkununnga akileraartarluta? Oqartussaasut silamiut pissusilersornerat akileraarutitsinnilluunniit atuinneriaasiat pisussaaffimmik tamatuminnga pisussaaffiianngilaatigut. — Romamiut 13:4-7.

33:7-9. Ullutsinni ’alaatsinaattut’ — tanitat kinguleruttut — taakkualu suleqataat Kristusip naalagaaffia pillugu nutaarsiassamik nuannersumik oqaluussinissartik ’naalliunnartoqangaarnissarlu’ pillugu inunnik mianersoqqusinissartik tunuarsimaarutiginngisaannartariaqarpaat. — Matthæusi 24:21.

33:10-20. Ileqqut ajortut tunullugit Guutip piumasaatut iliornerput annaanneqarnissatsinnut aalajangiisuuvoq. Jehovammi aqqutigeqqusaa eqqortuuvoq.

36:20, 21. Israelikkut ilisimaneqaatigisaminnik, tassa ’Jehovap innuttaatut’ ilisimaneqarnerminnik, eqqortitsinnginnamik Guutip aqqa inuianni narrunarsarpaat. Uagut Guutimut kiffaaneq taaguutigiinnanngisaannartigu.

36:25, 37, 38. Anersaakkut paratiisi uagut ullumikkut peqataaffigisarput, ’savaatinik illernartitanik’ (1900/1961) innuttaqarpoq. Taamaammat minguitsuutinniartariaqarparput.

38:1-23. Gogi Magogimiup saassussineranit Jehovap innuttaminik annaassiumaarnera nalunagu toqqissisimanarpoq. Saatani Diaavulup, ’silarsuup matuma naalagaanerata’, ateq Gogi aterilerpaa qilammiit igitaagami. Magogi sumiiffiuvoq nunarsuup eqqaaniittoq Saatanip anersaapiluisalu qimassinnaanngisaat. — Johannesi 12:31; Saqqummersitat 12:7-12.

„ILINNUT TAKUTITASSAKKA MALUGINIAKKIT“

(Ezekieli 40:1–48:35)

Illoqarfiup Jerusalemip tiguagaaneraniit ukiut 14-issaraat. (Ezekieli 40:1) Suli ukiut 56-it aallarussaaqqassapput. (Jeremia 29:10) Maanna Ezekieli 50-ingajannik ukioqarpoq. Takorruuinikkut Israelimut pisinneqarpoq. Ima oqarfigineqarpoq: „Illit inuk, isitit atorluarlugit tusarnaarluarlutillu ilinnut takutitassakka maluginiakkit.“ (Ezekieli 40:2-4) Ezekielip naalaffik nutaaq takorruukkani killitsissutigisimassaqaa!

Naalaffik alutornangaartoq Ezekielip takusaa arfinilinnik isaaffeqarpoq, 30-nik nerisarfinnik ineeraqarpoq, pilliiveqarpoq qisummik sanaamik, aamma ikikkaavimmik pilliiveqarpoq, tassaniippullu Illernartoq aamma Illernarnerpaaq.  Naalaffimminngaaniit imeq kuussuanngortoq pikialavoq. (Ezekieli 47:1) Ezekielimut aamma takorroortinneqarpoq naggueqatigiissortanut nunap agguaanneqarnera — nunaatigineqalersullu tamarmik kangianiit kimmut isorartussuseqarput Judakkut Benjaminikkullu nunaataasa akornanni ingerlatsiveqarluni. Tassaniipput „[Jehovap] illernartua“ aamma „illoqarfik“, „[Jehova] maaniippoq“-mik taaguutilik. — Ezekieli 48:9, 10, 15, 35.

Allassimaffiit pillugit apeqqutit akineqartut:

40:3–47:12 — Ezekielip takorruugaani naalaffik sumut assersuutaava? Naalaffik taanna Ezekielip takorruugaa angisoorujorujussuaq sananeqanngisaannarpoq. Taanna Guutip naalaffigivaa anersaakkut ittoq — ullutsinni pallorfiginninnermik minguitsumik aaqqissuussaa naalaffittut ittoq. (Ezekieli 40:2; Mika 4:1; Hebræerit 8:2; 9:23, 24) Naalaffimmik takorruugaq taanna ’ullussat kingulliit’ ingerlaneranni, katersat palasiusut minguiarneqarnerisa kingorna, eqquukkiartuaarpoq. (2 Timotheusi 3:1; Ezekieli 44:10-16; Malaki 3:1-3) Paratiisimili inaarutaasumik eqquutissaaq. Naalaffimmilli takorruugaq juutinut aallarussaasunut neriorsuutaavoq pallorfiginninnerup ilumoortup pilerseqqinneqarumaarneranik, juutillu ilaqutariit tamarmik nunaammik kingornuttaqattaagaqalernissaannik.

40:3–43:17 — Naalaffiup uuttortarneqarnera qanoq isumaqarpa? Naalaffiup uuttortarneqarnera pallorfiginninnermut minguitsumut atatillugu Jehovap siunertaata ilumut piviusunngorumaarneranut qulakkeerutaavoq.

43:2-4, 7, 9 — ’Kunngiisa timaat toqungasut’ naalaffimmit peerneqartussat suuppat? Tassani pineqarunarput guutipiluit. Jerusalemimi kunngit tassanilu innuttaasut Guutip naalaffia mingutsisimavaat guutipilunnik — kunnginngortillugillusooq.

43:13-20 — Pilliivik Ezekielip takorruukkamini takusaa sumut assersuutaava? Pilliivik assersuutaasoq tassaavoq Jiisusi Kristusip utertitsissutitut pilliutaanut tunngatillugu Guutip piumasaa. Pilliut taanna tunngaviuvoq tanitat naapertuilluartuunerannut ’amerlangaartullu’ Guutip isaani minguitsutut isigineqarsinnaanerannut. (Saqqummersitat 7:9-14; Romamiut 5:1, 2) Tamanna pissutaasimasinnaavoq Ezekielip takorruukkamini „eqqiarfik Imaq“-imik — imiisivissuarmik palasit eqqiarfigisartagaannik — naalaffimmi Salomop sanatitaaniittumik takunninnginneranut. — 1 Kunngit 7:23-26.

44:10-16 — Palasit kikkunnut assersuutaappat? Palasit ullutsinni katersanut kristumiunut tanitanut assersuutaapput. Taakku minguiarneqarput 1918-imi Jehova naalaffimmini anersaakkut ittumi soorlulusooq ’sølvimik aatsitsillunilu akuiaammat’. (Malaki 3:1-5) Minguitsuusut, imaluunniit peqqissimisut, kiffartornermi immikkut pisinnaatitaaffitsik pisinnaatitaaffigiuarsinnaavaat. Tamatuma kingorna ilungersuutigisariaqarpaat silarsuarmit mingutsitaannginnissartik ’amerlangaartunullu’, naggueqatigiissortanut palasiunngitsunut assersuunneqartunut, maligassiuinissartik. — Jaaku 1:27; Saqqummersitat 7:9, 10.

45:1; 47:13–48:29 — Nuna tamatumalu agguarneqarnera sumut assersuutaappat? Nuna tassaavoq Jehovap innuttaasa kiffartorfiat. Jehovamut kiffaasoq sumiikkaluaruniluunniit pallorfiginninnermik ilumoortumik tapersersuiuartilluni nunami pilerseqqitamiissaaq. Nunap agguarneqarnera silarsuassami  nutaami inaarutaasumik eqquutissaaq, aalajaatsoq kinaluunniit nunamik kingornussissagami. — Esaja 65:17, 21.

45:7, 16 — Inuit palasinut naalagaanermullu tunissutaat sumut assersuutaappat? Naalaffimmi anersaakkut ittumi tapersersuineq tamanna pingaarnerpaamik anersaakkut ittuuvoq — ilaatigut tassaalluni ikiuineq, suleqataaneq piumassuseqarlunilu naalatsigitinneq.

47:1-5 — Ezekielip takorruugaani kuup ernga sumut assersuutaava? Kuup ernga assersuutaavoq Jehovap pilersitaanut inuunartunut anersaakkut ittunut, ilaatigut Jiisusi Kristusip utertitsissutitut pilliutaanut Guutilu pillugu Biibilimiittunik ilisimasaqarnermut. (Jeremia 2:13; Johannesi 4:7-26; Efesosimiut 5:25-27) Pallorfiginninnermut ilumoortumut ilannguttut nutaat amerliartortillugit kuup ernga itisiartorpoq. (Esaja 60:22) Kristusip ukiuni tusindini naalakkersuinerani kuup erngata inuunartup kuunnera suli sakkortunerulissaaq, ernganullu ilaavoq „mappersakkat“ taamanikkussamut mapperneqartut naapertorlugit paasisaqarnerulerneq. — Saqqummersitat 20:12; 22:1, 2.

47:12 — Orpiit paarnallit sumut assersuutaappat? Orpiit assersuutaasut Guutip pilersitaanut anersaakkut ittunut inuit naammalluinnartunnguutissaannut assersuutaapput.

48:15-19, 30-35 — Illoqarfik Ezekielip takorruugaa sumut assersuutaava? Illoqarfik „[Jehova] maaniippoq“ ’illernartuunngitsumiimmat’ paasinarpoq arlaannut nunamiittumut assersuutaasimassasoq, tassaagunarluni nunarsuarmi ingerlatsineq ’nuna nutaamut’ ilaalerumaartut tamarmik iluaqutissaat. (2 Petrusi 3:13) Illoqarfiup sammivinnut tamanut isaaffeqarnera iserfigineqariaannaaneranut assersuutaavoq. Guutip innuttaasa nakkutilliisui ammasuusariaqarlutillu ilassiortuusariaqarput.

Ilinniarfigisinnaasavut:

40:14, 16, 22, 26. Naalaffiup isaariaasa iigaat palmiusanik pinnersagaanerannit erserpoq ileqqussatigut anersaakkullu assuarnaatsuinnaat isersinnaatitaasut. (Tussiaat 92:13) Tamatumannga ilinniarparput aatsaat assuarnaatsuugutta pallorfiginninnerput Jehovamit akuerineqarsinnaasoq.

44:23. Ullumikkut katersat palasiusut kiffartornerat qujamasuutigisariaqarparput. „Kiffaq ilumoortoq silatoorlu“ piffissaq eqqorlugu anersaakkut inuussutissanik pilersuinermi siuttuuvoq Jehovap isaani suna mingunnartuunersoq sunalu mingunnaatsuunersoq immikkoortissinnaaniassagatsigu. — Matthæusi 24:45.

47:9, 11. Ilisarsineq — erngup assersuutaasup ilaa pingaarutilik — ullutsinni nuanningaartumik ajorunnaarsitsisimavoq. Inuit sumi tamaaniittut ilisarsinermik tamatumannga ilassinnittut anersaakkut uummartarput. (Johannesi 17:3) Imermik inuunartumik ilassinninngitsut ’taratsup pigissavai’ (1900/1961) — naassaanngitsumik piuneerussaassapput. Taamaattumik pingaaruteqarpoq ’oqaatsimik sallusuissutaasumik eqqortumik atuisutut sapinngisatsinnik iliornissarput’. — 2 Timotheusi 2:15, NV.

’Atera angingaartoq illernartissavara’

Daavip kinguaavini kunngip kingulliup peersinneqarnerata kingunerujussuatigut aatsaat Guutip ilumoortup kunngiussutsimik ’piginnittussaq’ tikiutippaa. Guutilli Daavimut angerutsini unioqqutinngilaa. (Ezekieli 21:32, 1900/1961; 2 Samueli 7:11-16) Ezekielip siulittuutaani eqqaaneqarpoq „kiffara Daavi“, taanna tassaalissaaq „paarsisoq“ aamma ’kunngi’. (Ezekieli 34:23, 24; 37:22, 24, 25) Taanna tassaavoq Guutip naalagaaffiani kunngitut pissaaneqartussaq Jiisusi Kristusi. (Saqqummersitat 11:15) Jehovap ’atini angingaartoq illernarsisissavaa’ naalagaaffik Missiarsikkoortoq aqqutigalugu. — Ezekieli 36:23.

Qanittuararsuakkut Guutip aterminik kangunarsaasut piuneerutitissavai. Jehovamilli akuerineqarsinnaasumik pallorfiginninnikkut atermik tamatumannga illernarsisitsisut naassaanngitsumik inuussapput. Taamaattumik imeq inuunartoq ullumikkut naammangaartumik kuuttoq tamakkiisumik iluaqutigisigu, pallorfiginninnerlu ilumoortoq inuunitsinni pingaarnerpaatitsigu. (wE 8/1 07)

[Quppernerup ataani ilanngussaq]

[Qupp. 25-mi assiliartaq]

Naalaffik alutornangaartoq Ezekielip takorruugaa

[Qupp. 26-mi assiliartaq]

Ezekielip takorruugaani kuuk inuunartoq sumut assersuutaava?

[Qupp. 26-mi suminngaanneernera]

Pictorial Archive (Near Eastern History) Est.