Jehovap ullussaa pinertusaarlutit utaqqiuk!

„Uppernissinnut ilanngussiuk . . . nikallujuinneq.“ — 2 PETRUSI 1:5, 6.

1, 2. Pinertusaarneq qanoq paasisariaqarpa, aamma sooq kristumiut pinertusaartariaqarpat?

JEHOVAP ullussarsua qanittuararsuuvoq. (Joeli 1:15; Sefania 1:14) Kristumiuugatta Guutimut assuarnaattuarnissarput aalajangiusimavarput, ullorlu Jehovap kisimi oqartussaanerata akitsisinneqarnissaa qilanaarluta utaqqivarput. Tamanna pinngikkallartillugu uumissorneqartarlutalu oqalorujuunneqartarlutalu malersorneqartarpugut, immaqalu allaat uppernerput pissutigalugu toqoriaannaasarpugut. (Matthæusi 5:10-12; 10:22; Saqqummersitat 2:10) Pissutsini taama ittuni nikallujuinnissaq, imaluunniit pinertusaarnissaq — artornartunik naammagittarluni atuisinnaanissaq — pisariaqarpoq. Apustilip Paulusip ilungersorluni ima siunnersorpaatigut: „Uppernissinnut ilanngussiuk . . . nikallujuinneq.“ (2 Petrusi 1:5, 6) Pinertusaarnissaq pisariaqartilluinnarparput, Jiisusimi ima oqarpoq: „Naggatissamut nikallujuitsuusoq annaanneqassaaq.“ — Matthæusi 24:13.

² Aamma nappaatinit, alianartunit misilinneqaatinillu allanit eqqorneqartarpugut. Tamakku pissutigalugit upperunnaaraluarutta Saatani qanoq nuannaartigissagaluarpa! (Lukasi 22:31, 32) Assigiinngitsunilli annikilliuuteqaraluarluta Jehovap ikiuineratigut pinertusaarsinnaavugut. (1 Petrusi 5:6-11) Maanna pisimasuinnik oqaluttuat pinertusaarluni uppernikillinanilu Jehovap ullussaanik utaqqisoqarsinnaaneranik ersersitsisut sammissavavut.

Nappaateqarnertik unissutiginngilaat

3, 4. Misigisaq nappaateqaraluarluta aalajaalluta Jehovamut kiffartorsinnaanitsinnik ersersitsisoq oqaluttuariuk.

³ Guuti ullumikkut tupinnartuliornikkut uagutsinnik ajorunnaarsitsineq ajorpoq, nappaatilli naammagittarluta atornissaanut nakussatsittarpaatigut. (Tussiaat 41:2-4) Sharon ima oqaluttuarpoq: „Silattorpunga issiavimmi kaassuartakkamiiginnavillunga. Inunnguuseralugu nukillaarsimasuunera pissutaalluni meeqqatut nuannaarutigisinnaasarpassuaraluakka misiginngitsoorpakka.“ Jehovamik taassumalu inunnik peqqilluinnartunngortitsinissaminik neriorsuutai pillugit ilinniarneq Sharonip neriuuteqalissutigaa. Oqalunnissani pisunnissanilu sapernartikkaluarlugit kristumiutut kiffartorneq nuannaarutigaa. Ukiut 15-it missaat qaangiuttut ima oqarpoq: „Timikkut sanngiittuassagunarpunga, Jehovamilli tatiginninnera taassumunngalu attaveqarnera inuussutigaakka. Taassuma innuttaasa akornanniinnera isumassuineratalu pakatsisitsinngisaannartup iluaqutiginera assorsuaq pilluaatigaakka!“

⁴ Apustilip Paulusip kristumiut Thessalonikamiittut kajumissaarpai ’nikallortunik tuppallersaaqqullugit’. (1 Thessalonikamiut 5:14, 1900/1961) Pakatserujussuarneq  nikallornermik isumatsangaarnermillu kinguneqarsinnaavoq. 1993-imi Sharon ima allappoq: „Iluatsinngitsoorluinnartutut misigaanga. . . . Ukiuni pingasuni isumatsarujussuarnermik [naalliuuteqarpunga]. . . . Utoqqaanertat siunnersorlungalu tuppallersarpaannga. . . . Napasuliaq Alapernaarsuiffik aqqutigalugu Jehovap isumatsarujussuarneq pillugu asannilluni paasisaqartippaanga. Aap, innuttani isumassorpai misigissutsivullu paasillugit.“ (1 Petrusi 5:6, 7) Sharon Jehovap ullussarsua utaqqitillugu aalajaalluni Guutimut suli kiffartorpoq.

5. Kristumiut isumakkut naalliuuteqangaarnermik naammagittarlutik atuisinnaanerannut sumik uppernarsaatissaqarpa?

⁵ Kristumiut ilaat siornatigut misigisimasatik pissutigalugit isumakkut naalliuuteqangaartarput. Assersuutigalugu sorsunnersuup aappaata nalaani Harley akiuunnerni peqqarniitsuni peqataasarsimavoq, tamatumalu kingorna ukiuni arlalinni eqqaassilluni akiuunnerit oqimangiutigisarpai. Sinimmini ima nilliagajuppoq: „Sianigitsi! Sianigitsi!“ Iteraangami kiagunnermik masattuinnaasarpoq. Piffissalli ingerlanerani Guutimik mianerinnilluni inuulerpoq, sinnattorisartagaalu akuttutsikkiartorlutillu peqqarniippallaarunnaariartorput.

6. Kristumiup misigissutsikkut ajornartorsiutit qanoq ililluni naammagalugit atorpai?

⁶ Kristumiup maniodepressiv psykosertup matumiit matumut oqaluussinissani sapernartittorujussuuaa. Pinertusaarporli, nalunnginnamiummi kiffartorneq imminut aamma tusarliussamut tusarnaartunut inuuinnarnissamut aalajangiisuusoq. (1 Timotheusi 4:16) Ilaannikkut matup silataani nikorfasarpoq sianeq toorneq sapileqqallugu, imali oqaluttuarpoq: „Qasuersilaareeraangama matumut tulliuttumut ingerlaqqissinnaasarpunga misileeqqillungalu. Oqaluussiuaannarnikkut anersaakkut peqqissutsinnut naleqquttumik anguniagaqartuarpunga.“ Aammattaaq qatanngummut angummut taassumunnga ataatsimiigiarnissaq unamminiarnangaarpoq, qularutiginngilluinnarpaali peqatigiittarneq anersaakkut ineriartornartoq pisariaqartillugu. Taamaattumik ataatsimiinnernut najuunniarluni iliuuserisariaqakkani iliuuserai. — Hebræerit 10:24, 25.

7. Inuit ilaasa katersorsimasuni oqalunnissartik ataatsimiinnernulluunniit najuunnissartik siooragigaluarlugu qanoq ilillutik pinertusaarnertik ersersissimavaat?

⁷ Kristumiut ilaasa pissutsit pisullu aalajangersimasut ingasattumik siooragisarpaat. Assersuutigalugu imaassinnaavoq katersorsimasuni oqalunnissartik imaluunniit allaat ataatsimiinnermut najuunnissartik annilaangagigaat. Takorlooriaruk kristumiut ataatsimiinnerini oqaaseqarnissaq Teokratiimilluunniit Ilinniarfimmi saqqummiussinissaq taakkununnga qanoq sapernartigissasoq! Taamaakkaluartorli pinertusaarput, ataatsimiigiartarnerat aamma ataatsimiinnerni peqataasarnerat assut qiimmassaatigaavut.

8. Misigissutsikkut ajornartorsiutit naammagalugit atussagaanni ingammik suna iluaqutaasarpa?

⁸ Sininnerusarlunilu qasuersaarnerusarneq misigissutsikkut naalliuutinik naammagittarluni atuinissamut immaqa iluaqutaasinnaapput. Nakorsamik oqaloqateqarnissaq pisariaqarsinnaavoq. Pingaartumilli iluaqutaasinnaasoq tassaavoq tatiginnilluinnarluni qinunikkut Guutimut saaffiginninneq. Tussiaat 55:23-mi ima allassimavoq: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ Taamaattumik pingaarnerpaamik ’Jehova tatigisariaqarpat uummatikkut iluunngarlutit’. — Ussatit 3:5, 6.

Asasamik toqusoqaraangat pinertusaarneq

9-11. (a) Asasatsinnik toqusoqarneranik aliasuutiginninnerup naammagalugu atornissaanut suna iluaqutigisinnaavarput? (b) Annap maligassiaa toqusoqarneranut tunngatillugu aliasunnerup naammagalugu atornissaanut qanoq ililluta iluaqutigisinnaavarput?

⁹ Toqu ilaqutariinnik avissaartitsigaangat qimagaasut aliasungaarnerannik kinguneqarsinnaavoq. Aaperaat nuliani asasani, Sara, toqummat qiavoq. (1 Mosesi 23:2) Allaat inuk naammalluinnartoq Jiisusi „qissaserpoq“ ikinngutini Lazarusi toqummat. (Johannesi 11:35) Taamaammat qanitatsinnik toqusoqaraangat aliasuttarneq pissusissamisoorluinnarpoq. Kristumiulli nalunngilaat makititsineqarumaartoq. (Apustilit Suliaat 24:15) Taamaattumik ’aliasuttanngillat inuttut neriuutissaqanngitsutut’. — 1 Thessalonikamiut 4:13.

¹⁰ Asasatsinnik toqusoqaraangat qanoq ililluta aliasunnerput naammagalugu atorsinnaavarput? Assersuut una eqqarsaatigeriaruk. Ikinngut sivisuumik peqarniarnani aallaraangat amerlanertigut sivisuallaanngitsumik aliasuttarpugut, uteqqippammi takoqqinnissaa ilimagigatsigu. Kristumiup aalajaatsup toquneranut taamatupajaaq  isiginnittaaseqarutta tamanna aliasunnginnerunissamut iluaqutaasinnaavoq, nalunngilarpummi makititaajumaartoq. — Oqaluussisartup oqaasii 7:1.

¹¹ „Guuti tuppallersaajuartoq“ tatigilluinnarutsigu tamanna toqusoqarsimaneranik aliasuutiginninnerup naammagalugu atornissaanut iluaqutigissavarput. (2 Korinthimiut 1:3, 4) Aamma uillarnerup Annap ukiuni hundredelinni siullerni inuusup iliuuserisimasaanik eqqarsaatiginninneq iluaqutaasinnaavoq. Taanna ukiuni arfineq-marluinnarni katissimareerluni uillarninngorpoq. 84-inilli ukioqarluni naalaffimmi Jehovamut illernartumik suli kiffartorpoq. (Lukasi 2:36-38) Taamatut Guutimik mianerinnilluni inuunini qularnanngitsumik aliasunnermi kiserliornermilu ajugaaffiginissaannut iluaqutigaa. Kristumiutut sammisassanut, ilaatigut Guutip naalagaaffianik oqaluussissutiginninnermut, peqataajuarneq asasamik annaaseqarnerup naammagalugu atornissaanut iluaqutigisinnaavarput.

Misilinneqarnerni allani pinertusaarneq

12. Kristumiut ilaasa ilaqutariittut inuunerminni misilinneqarneq suna naammagalugu atorsimavaat?

¹² Kristumiut ilaasa misilinneqarnerit ilaqutariittut inuunermut tunngassuteqartut naammagalugit atortariaqarpaat. Assersuutigalugu eqqarsaatigeriaruk aappaq allasioraangat tamatuma qanoq aseruitigisarnera. Tupanneq aliasunnerlu pissutigalugu aappaq ilumuunngitsuliorfigineqartoq immaqa sinissinnaananilu qiasaqattaartuarpoq. Suliassat ajornannginnerpaalluunniit ima artornartigisinnaapput kukkusaqattaarlunilu ajutooqattaarluni. Aappaasoq pisuussuteqanngitsoq immaqa aamma nerisinnaanngilaq. Imaassinnaavoq sanigortoq misigissutsikkullu paatsiveerulluinnartoq. Aamma kristumiutut sammisassanut peqataanissaq artornarsinnaavoq. Aamma eqqarsaatigeriaruk meeqqanut qanoq sunniuteqartigisinnaanera!

13, 14. (a) Salomop naalaffiup atoqqaartinneqarnerani qinnutaanik atuarneq qanoq qiimmassaatigaarput? (b) Sooq anersaaq illernartoq qinnutigisarparput?

¹³ Taamatut misilinneqaraangatta Jehovap pisariaqartitatsinnik ikiortarpaatigut. (Tussiaat 94:19) Jehovap innuttami qinnutaat tusartarpai, soorlu kunngip Salomop naalaffiup atoqqaartinneqarnerani qinnutaani tamanna ersertoq: „Qilammi najugarisanni tusakkit, inuup innuttannut Israelikkunnut ilaasup uummatimigut eqqorneqartutut misigisimalluni assanilu illumut tassunga isatsillugit qinnutai suulluunniit. Qinusoq isumakkeerfigisaruk, taamaattorli kinaluunniit qanoq inuuseqarnera naapertorlugu pineqartittaruk akillugulu iliuuseqarfigalugu — illit uummammiugisai nalunngilatit, illimmi kisivit inuit tamarmik uummammiugisaat  ilisimagakkit. Taamaaliortarit nunami siuaasatsinnut tunniussanni inuutillutik mianereqqullutit.“ — 1 Kunngit 8:38-40.

¹⁴ Iluaqutaasinnaalluartut ilaat tassaavoq anersaamik illernartumik qinnutiginnittuarneq. (Matthæusi 7:7-11) Anersaap inerititaanut ilaapput nuannaarneq eqqissinerlu. (Galatiamiut 5:22, 23) Ataatatta qilammiusup qinnutivut akigaangagit iluaallannallaraangami — aliasunneq nuannaarninngortarpoq, isumarpullu eqqissinermik, siooranermiunngitsoq isumakulunnermiunngitsorlu, ulikkaartarpoq!

15. Allassimaffiit suut isumakulunnginnerunissamut iluaqutigisinnaavavut?

¹⁵ Assut tatineqaraanni isumakuluuteqarneq pissusissamisoorluinnarpoq. Isumakuluuteqarunnaamisinnaavugulli Jiisusip oqaasii ukua eqqaamagutsigit: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi. . . . Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ (Matthæusi 6:25, 33, 34) Apustilip Petrusip kajumissaarpaatigut ’isumakuluutivut tamaasa Guutimut piseqqullugit isumassormatigut’. (1 Petrusi 5:6, 7) Soorunami ajornartorsiutivut aaqqinniarlugit iliuuseqassaagut. Sapinngisatsinnilli iliuuseqareerutta isumakulunnissaq iluaqutaanavianngilaq. Qinunerli kisimi iluaqutaassaaq. Tussiaasiortoq ima allappoq: „Aqqutigisassatit [Jehovamut] isumagitikkit, tatigiuk, taava akuliukkumaarpoq.“ — Tussiaat 37:5.

16, 17. (a) Sooq isumakuluuteqanngilluinnarsinnaanngilagut? (b) Kajumissaarut Filippimiunut allakkat 4:6, 7-imiittoq malikkutsigu suna misigissavarput?

¹⁶ Paulusi ima allappoq: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ (Filippimiut 4:6, 7) Adamip kinguaavi naammalluinnanngitsut soorunami isumakuluutaarulluinnarsinnaanngillat. (Romamiut 5:12) Esauip nuliai Hittikkuusut Esauip angajoqqaavinut Guutimik mianerinnittunut, Iisaamut Rebekkamullu, ’aliasuutaangaarput’. (1 Mosesi 26:34, 35) Nappaateqarneq kristumiunut, soorlu Timotheusimut Trofimusimullu, isumakuluutaasimassaaq. (1 Timotheusi 5:23; 2 Timotheusi 4:20) Aamma Paulusip uppeqatini ernumagai. (2 Korinthimiut 11:28) ’Qinnutitsinnilli tusartartoq’ asasiminik ikiuinissamut piareersimajuaannarpoq. — Tussiaat 65:3.

¹⁷ Jehovap ullussarsua utaqqitillugu ’eqqissinerup Guutianit’ tuppallersarneqartarlutalu annertoqqusersorneqartarpugut. (Filippimiut 4:9) Jehova ’nallittuisuullunilu saammaasuuvoq’, ’ajunngitsuullunilu isumakkeerfiginnikkumasarpoq’, aamma „eqqaamavaa pujualaasugut“. (2 Mosesi 34:6; Tussiaat 86:5; 103:13, 14) ’Kissaatigisavut saqqummiukkutsigit’ ’eqqissineq Guutimit pisoq’ — isumakkut eqqissineq inuit paasinnissinnaassusiannik qimmuisoq — pissavarput.

18. Jobi 42:5-imi eqqaaneqartutut Guuti qanoq ’takuneqarsinnaagami’?

¹⁸ Qinnutivut akineqaraangata naluneq ajorparput Guutip najoraatigut. Jobip misilinneqarnini tamaasa naammagalugit atoreerlugit Jehovamut ima oqarpoq: „Siornatigut allat pillutit oqaaserisaat tusallatsiaannarsimavakka, maannali nammineq isinnik takuakkit.“ (Jobi 42:5) Paasinnilluta, upperluta qujamasullutalu Jehovap uagutsinnik isumassueriaasia eqqarsaatigeqqissaarutsigu aatsaat taama ’takulluartigisinnaassavarput’. Jehovamik taamatut qanimut ikinnguteqarnerput isumatsigut uummatitsigullu eqqississutigissavarput.

19. ’Isumakuluutivut tamaasa Jehovamut pisikkutsigit’ qanoq pisoqassava?

¹⁹ ’Isumakuluutivut tamaasa Jehovamut pisikkutsigit’ uummatitsinnut isumatsinnullu illersuutaasumik qamuuna eqqissisimalluta misilinneqarnerit naammagalugit atorsinnaavavut. Uummaterput eqqissisimalissaaq, annilaangajunnaarluni isumakuluutaarullunilu, isumarpullu isumakuluuteqarnerup kingunerisaanik eqqarsaatigilikkanit nanertuutaasunit eqqissiunnaarsinneqarnanilu oqimaaqatigiissaarilluarsinnaajunnaarsinneqassanngilaq.

20, 21. (a) Malersorneqarnermi eqqissineq suna misigineqarsinnaava, soorlu Stefanusimik oqaluttuami ersertoq? (b) Misilinneqarnerni eqqissisimasoqarsinnaaneranik ullutsinneersumik assersuuteqarit.

²⁰ Ajoqersukkap Stefanusip eqqissisimanera malunnarpoq uppernini ingasattumik misilinneqarmat. Naggammik nalunaajaannginnerani Killisiuisoqatigiinniittut tamarmik takuaat ’kiinaa soorlu tassa inngilip kiinaa’. (Apustilit Suliaat 6:15) Aap, kiinaata isikkua inngilip, Guutimit aallartinneqartup, kiinaata isikkuatut  eqqissisimarpalutsigaaq. Stefanusip eqqartuussisut Jiisusip toquneranut tunngatillugu pisuunerat qulaarmagu taakkua „uummatimikkut eqqorneqarput qorsaqqorfigalugulu“. „Stefanusi Anersaamik Illernartumik ilumioqangaarluni qilannut aarlorsimavoq, takuaalu Guutip naalannassusia Jiisusilu Guutip talerpiata tungaani qeqartoq.“ Takorruugaq tamanna Stefanusip nakussatsissutigaa, aalajaallunilu toquvoq. (Apustilit Suliaat 7:52-60) Ullumikkut uagut takorruuisinneqartanngikkaluarluta malersorneqaraangatta eqqissineq Guutimit pisoq pigisinnaavarput.

²¹ Kristumiut ilaat sorsunnersuup aappaata nalaani toqutaasimasut qanoq eqqarsarlutillu misigisarsimanersut misissoriartigu. Taakkua ilaat eqqartuussivimmi misigisani pillugu ima oqaluttuarpoq: „Toqumut eqqartuussut nalunaarutigineqarpoq. Tusarnaarpunga, oqaatsillu ’toqumut allaat aalajaagit’ aamma Naalakkap oqaasii allat oqaatigereerlugit suut tamarmik qaangiupput. Ernumassanngilasili. Takorloorsinnaagunanngisassinnik qamuuna eqqissisimavunga!“ Kristumiup inuusuttup niaquerneqarluni toqutaasussap angajoqqaani ima allaffigai: „Unnuap qeqqa qaangereerpaa. Isummannik allanngortitsinissamut suli piffissaqarpunga. Kisianni silarsuarmi matumani pillualeqqissinnaassaanga Naalagarput miserratigereerlugu? Soorunalimi naamik! Maannali qularutigissanngilarsi silarsuaq manna pilluarlunga eqqissisimallungalu qimakkiga.“ Qularnanngilaq Jehovap kiffani ilumoorfiginnittut annertoqqusersorlugillu ikiortarai.

Pinertusaarsinnaavutit!

22, 23. Jehovap ullussaata pinertusaarlutit utaqqinerani suna qularutigissanngiliuk?

²² Immaqa unamminiarnartut sammeriikkatta ilaannaannik nalaataqassaatit. Jobili Guutimik mianerinnittoq ilumoorpoq ima oqarami: „Inuk arnamit erniusoq inuunikittarpoq eqqissinaatsorsiortaqalunilu.“ (Jobi 14:1) Immaqa ataataavutit anaanaallutilluunniit meeqqannik anersaakkut perorsaalluarniarluni ilungersortoq. Taakku atuarfimmi uppernermikkut assigiinngitsutigut misilinneqartarput, qularutissaanngilarli illit nuannaartartutit Jehovamik taassumalu najoqqutassiaanik naapertuilluartunik aalajangiussigaangata. Immaqa illit nammineq suliffimmi ajornartorsiuteqarlutillu misilinneqartarputit. Pissutsilli taakkua pissutsillu allat naammagalugit atorneqarsinnaapput ’Jehovap ullut tamaasa nammaannik tigumiuttarmatit’. — Tussiaat 68:20, NV.

²³ Immaqa illit inuttut nalinginnaalluinnartutut imminut isigivutit, eqqaamajulli Jehovap suliatit asanninnerlu taassuma aqqanut illernartumut ersersissimasat puiunngisaannassagai. (Hebræerit 6:10) Taassuma ikiuineratigut uppernikkut misilinneqarnerit naammagalugit atorsinnaavatit. Taamaattumik Guutip piumasaata pinissaa qinnutigiuaruk, aamma inuunerit piumasaanut naapertuuttumik pilersaarusioruk. Taava qularutigissanngilat illit Jehovap ullussaata pinertusaarlutit utaqqinerani Guutip pilluaqqullutillu annertoqqusersorumaaraatit. (wE 7/15 07)

Qanoq akissavit?

• Sooq kristumiut pinertusaartariaqarpat?

• Nappaammit eqqorneqaraangatta asasatsinnilluunniit toqusoqaraangat pinertusaarnissamut suna iluaqutigisinnaavarput?

• Qinuneq misilinneqarnerit naammagalugit atornissaannut qanoq iluaqutigisarparput?

• Sooq Jehovap ullussaa pinertusaarluni utaqqineqarsinnaava?

[Atuaqqissaarnermi apeqqutit]

[Qupp. 30-mi assiliartaq]

Jehovamik tatiginninneq pissutigalugu asasatsinnik toqusoqarneranik aliasuutiginninneq naammagalugu atorsinnaanngortarparput

[Qupp. 32-mi assiliartaq]

Qamannga pisumik qinuneq uppernikkut misilinneqarnermi pinertusaarnissamut iluaqutigisarparput