’Guutimi pisuujuit’?
’Guutimi pisuujuit’?
„Taama pisarpoq pisuussutinik katersisoq Guutimili pisuujunani.“ — LUKASI 12:21.
1, 2. (a) Inuit suut pillugit pilliuteqarujussuarumasimappat? (b) Kristumiunut unamminiarnartoq aamma navianartoq suua?
ERLINNARTUUTINIK ujarlertuusaarneq meeqqat nuannarisarpaat. Pinnguarnerinnaanngilarli, aammami pimoorussilluni erlinnartuutinik ujarlertoqartarsimavoq. Inuiaqatigiinni assigiinngitsorpassuarni piffissallu assigiinngitsut ingerlaneranni erlinnartuutinik ujarlertoqaqattaartarsimavoq. Assersuutigalugu 1800-kkunni Australiami, Sydafrikami, Canadami USA-milu kuultisiorusunnersuaq pilermat inupparpassuit nunani allani, ilaatigut akeqqersimaarfiusuni, pisuussutinik ujarlerniarlutik angerlarsimaffitik ilaquttatillu qimappaat. Aap, inuppassuit pisuussutit uummatimik pilerigisaat piumallugit navianartorsiorumasarlutillu pilliuteqarujussuarumasarput.
2 Ullumikkut inuit amerlanersaat ilumoortumik erlinnartuutinik ujarleqataaneq ajorput, inuussutissaqarumallutilli suleruloortariaqartarput. Pissutsit aaqqissuussaaneranni maanna atuuttumi tamanna ilungersunarsinnaavoq ilaannikkullu artornarlunilu qasunarluinnarsinnaalluni. Ajornanngitsuararsuuvoq nerisassaqarnissap, atisassaqarnissap illussaqarnissallu ima ulapputigitigilernissaat pingaaruteqarnerusut sumiginnarlugit imaluunniit puiorluinnarlugit. (Romamiut 14:17) Jiisusip inuit taamaaqqajaanerannik ersersitsilluartumik assersuusiorpoq. Taanna Lukasi 12:16-21-mi oqaluttuarineqarpoq.
3. Jiisusip assersuusiaa Lukasi 12:16-21-miittoq naatsumik oqaluttuariuk.
3 Jiisusip piumatussutsip mianersorfiginissaata qanoq pingaaruteqartiginera, allaaserisap matuma siuliani sammisarput, eqqartoqqammerlugu taanna assersuusiaraa. Jiisusip piumatussutsimut mianersoqqusereerluni angut pisooq quiminik ajunngitsorpassuarnik pigeriikkaminik ulikkaartunik naammaginninngitsoq oqaluttuaraa. Taassuma quini ingutserniarpai anginerusunillu sanalluni suli amerlanerusunik toqqortaqarsinnaajumalluni. Ilorrisimaarluni eqqissisimaarsinnaasorilersorlu Guutip oqarfigaa toqussasoq toqqortaalu tamarmik allamut tunniunneqassasut. Jiisusi ima naggasiivoq: „Taama pisarpoq pisuussutinik katersisoq Guutimili pisuujunani.“ (Lukasi 12:21) Assersuusiaq taanna qanoq ilinniutigisinnaavarput? Ilinniutigineqartoq nammineq inuunitsinni qanoq atorsinnaavarput?
Angut ajornartorsiutilik
4. Jiisusip inuk oqaluttuarisaa qanoq ittuua?
4 Jiisusip assersuusiaa taanna ilisimaneqarluarpoq. Malugisariaqarpoq Jiisusip oqaluttuaq aallarnermagu ima oqaannarluni: „Inoqarpoq pisuumik narsaatiminit pissarsilluarsimaqisumik.“ Jiisusi oqanngilaq angut pisuunngorsimasoq unneqqaserlunnermigut inatsisinulluunniit naapertuutinngitsumik niuerniarnermigut. Allatut oqaatigalugu inuttut ajortutut oqaluttuarineqanngilaq. Jiisusip oqaasii naapertorlugit tunngavissaqarluarpoq isumaqassalluni angut assersuusiami oqaluttuarineqartoq suleruloorsimasoq. Qanorluunniit pisimagaluarpat paasinarpoq angutaasoq siunissamut pilersaarusiortartoq sipaartartorlu, immaqa ilaquttami atugarissaarnissaat eqqarsaatigalugu. Taamaattumik silamiut isiginnittaasiannit isigalugu angutitut eqiasuitsutut ilungersorlunilu sulisutut pisussaaffimminillu pimoorussisutut isigineqarsinnaavoq.
5. Angutip Jiisusip assersuusiaani oqaluttuarineqartup suna ajornartorsiutigaa?
5 Pissutsit qanorluunniit ikkaluarpata Jiisusip angut assersuusiami oqaluttuarineqartoq pisuujunerarpaa, tassa angut naammattorsuarnik peqareersoq. Jiisusilli oqaluttuarneratut angut pisooq taanna ajornartorsiuteqarpoq. Nunaataa ilimagisaanit inerititaqarnerujussuuvoq, pisariaqartitaanit inissaqartitaanillu inerititaqarnerujussuulluni. Qanoq iliorsimasariaqaraluarpa?
6. Ullumikkut Guutip kiffaasa ilarpassui sunik aalajangigassaqartarpat?
6 Ullumikkut Jehovap kiffaasa ilarpassui pissutsinik angutip pisuup atugaanut eqqaanartupilussuarnik atugaqarput. Kristumiut ilumoortut sulisutut unneqqarissuunissartik, eqiasuitsuunissartik peqqissaarluartuunissartillu ilungersuutigaat. (Kolossemiut 3:22, 23) Allanik sullitaqaraluarunik namminnerluunniit suliffiuteqaraluarunik ingerlalluarajupput, aap allaat ingerlalluartupilussuusarput. Atorfimminni qaffatsinneqarnissaminnik neqeroorfigineqaraangamik periarfissanilluunniit nutaanik takkuttoqaraangat aalajangigassaqalertarput. Qaffatsinneqarnissaminnut akuersissappat aningaasarsiornerulerlutillu? Aamma inuusuttut Jehovamut nalunaajaasuusut ilarpassui atuarfimmi iluatsilluartarput. Taamaattumik immaqa ilinniarfinni tusaamasaalluartuni ilinniaqqinnissaminnik neqeroorfigineqartarput. Inuit amerlanersaasa iliuuserissagunagaattut iliorlutik imminnut neqeroorutigineqartunut eqqarsaqqaaratik akuersiinnassappat?
7. Angutip Jiisusip assersuusiamini oqaluttuarisaata ajornartorsiutini qanoq aaqqinniarpaa?
7 Maanna Jiisusip assersuusiaa uterfigeriartigu. Angut pisooq taanna qanoq iliorpa nunaatini inerititaqangaarmat katersukkanut toqqorsivissaarulluni? Aalajangerpoq quini ingutserniarlugit anginerusunillu sananiarluni karriutiminik tamanik perpassuarminillu tamanik katersuiffissaminik. Pilersaarut taanna ima toqqissisimanaritigalugulu nalerisimaarnaritigisimagunarpaa ima eqqarsarluni: „Imminut oqarfigissaanga: ’Uumaangaa, perpassuaqarputit ukiorpassuarnut naammattunik. Eqqasuutaarupputit, nerillutillu imerniarit inuulluataarlutillu!’“ — Lukasi 12:19.
Sooq ’sianiitsoq’?
8. Angutip Jiisusip assersuusiamini oqaluttuarisaata pingaarutilik suna arajutsivaa?
8 Jiisusilli uparuarpaa angutip pisuup taassuma pilersaarutini piviusuunngitsumik toqqissisimassutigigaa. Pilersaarut immaqa atorluarsinnaarpasikkaluarpoq, pilersaarummili tamatumani pingaarutilik eqqarsaatigineqanngilaq, tassa Guutip piumasaa. Angut taanna imminuinnaq eqqarsaatigivoq, tassa eqqarsaatigaa qanoq ililluni inuulluataarlunilu nerillunilu imerlunilu nuannaarsinnaanerluni. Isumaqarpoq ’perpassuaqarami’ aamma ’ukiorpassuarni’ inuussalluni. Taassumunngali ajoraluartumik taamatut pisoqanngilaq. Soorlu Jiisusi siusinnerusukkut oqartoq: „Inuup inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Unnuk taanna angutip ilungersuutigisimasai tamarmik taassumunnga naleeruteriasaarput, Guutimmi taanna ima oqarfigaa: „Sianiitsutit, unnuaru tarnit ilinnit qaaqquneqassaaq. Kiammi taava katersugarpassuatit pissavai?“ — Lukasi 12:20.
9. Angut Jiisusip assersuusiamini oqaluttuarisaa sooq sianiitsuunerarneqarpa?
9 Maanna Jiisusip assersuusiaani pingaarnersaq tikipparput. Guutip angut sianiitsuunerarpaa. Testamentitaaq pillugu nassuiaataasunik oqaatsinik qinerlerfissiami (Exegetical Dictionary of the New Testament) nassuiarneqarpoq grækerit oqaasiat ’sianiitsoq’-mik nutserneqartartoq atorneqaraangat tamatigut isumaqartartoq „inuk paasinnissinnaanngitsoq“. Oqaatsinik qinerlerfissiami maluginiaqquneqarpoq Guutip assersuusiami oqaaseq taanna atoraa „pisuut siunissamut pilersaarusiaasa asuleernerunerat“ ersersinniarlugu. Oqaatsimi tamatumani pineqanngilaq silaqanngitsoq, eqqarsarsinnaanngitsoq, pineqartorli tassaavoq „Guutimik pinngitsuuisinnaannginnerminik miserratiginnittoq“. Jiisusip angummik pisuumik oqaluttuarinninnera ukiuni hundredelinni siullerni kristumiunut Laodikeami ilagiinniittunut kingusinnerusukkut oqaaserisaanut ukununnga eqqaanarput: „Ima oqaravit: ’Pisuujuvunga, pigisarpassuaqarpunga amigaateqarnangalu;’ illillu nalugakku tassaallutit inukuluk, nallinnartoq, piitsoq, tappiitsoq tamaqanngitsorlu.“ — Saqqummersitat 3:17.
10. Sooq ’perpassuaqarneq’ „ukiorpassuarni“ inuunissamut qulakkeerutaanngila?
10 Silatusaassaagut tamanna qanoq ilinniutigisinnaanerlutigu eqqarsaatigigutsigu. Angutitut assersuusiami oqaluttuarineqartutut ilisinnaavugut — ’perpassuaqarnissarput’ qulakkeerniarlugu suleruloorluta, „ukiorpassuarnili“ inuunissamik neriuuteqarumalluta iliuuserineqartariaqartut iliuuserinngitsoorlugit? (Johannesi 3:16; 17:3) Biibilimi ima allassimavoq: „Pisuussutit iluaqutaasanngillat kamannerup ullussaani,“ aamma „pisuussutiminik toqqammaveqartoq orlusussaavoq“. (Ussatit 11:4, 28) Taamaattumik Jiisusip assersuusiani oqaaqqissaaraluni ima naggaserpaa: „Taama pisarpoq pisuussutinik katersisoq Guutimili pisuujunani.“ — Lukasi 12:21.
11. Pigisanik isumalluuteqarneq toqqissisimassuteqarnerlu sooq sumulluunniit iluaqutaanngila?
11 Oqaatsit „taama pisarpoq“ atorlugit Jiisusip uparuarpaa angummut pisuumut assersuusiami oqaluttuarineqartumut pisut, pigisaniinnaq inuunerminni qitiutitsisunut — isumalluuteqarlutillu toqqissisimassuteqartunut — tamanut piumaarnerat. Kukkussutaasoq tassaanerunani ’pisuussutinik katersineq’ tassaaneruvoq ’Guutimi pisuujunnginneq’. Ajoqersugaq Jaaku tamatumunnga assingusumik mianersoqqusivoq ima allakkami: „Maanna ilissi oqartartusi: ’Ullumi aqaguluunniit illoqarfiit arlaannukassaagut ukioq ilivitsoq tassaniilluta niuerniassalluta iluanaarniassallutalu,’ ilissi inuunissi aqagu qanoq innissaanik ilisimasaqanngitsusi, tassaaginnarpusi pujoq ersersimatsiaannariarluni peeruttoq.“ Taakku susariaqarpat? Jaaku ima akivoq: „Ima oqartariaqarnerugaluarpusi: ’[Jehovap] peqquppatigut inuussaagut ima imalu iliorsinnaassalluta.’“ (Jaaku 4:13-15) Qanorluunniit pisuujutigigaluaraanni, qanorluunniillu pigisaqartigigaluaraanni, Guutimi pisuujunngikkaanni tamanna sumulluunniit iluaqutaanavianngilaq. Guutimi pisuujuneq qanoq paasisariaqarami?
Guutimi pisuujugit
12. Qanoq ililluta Guutimi pisuunngorsinnaavugut?
12 Jiisusip Guutimi pisuujuneq pigisanik katersuinerup, imaluunniit imminut pisuunngorsarnerup, akerliatut eqqaavaa. Taamaalilluni Jiisusip oqaatigaa uagutsinnut pingaaruteqarnerpaaq tassaassanngitsoq nunap piisigut pisuussutinik katersineq imaluunniit pigisatsinnik nuannaarutiginninneq. Pigisavulli Jehovamut attaveqarnitsinnut pitsanngorsaatissatut, imaluunniit nakussatsissutissatut, atortariaqarpavut. Tamanna qularnanngivissumik Guutimi pisuunnguutigissavarput. Sooq? Tamanna pilluaqqutissarpassuarnut ammaassisinnaammat. Biibilimi ima allassimavoq: „[Jehovap] pilluaqqusinera pisuunngortitsisarpoq, suleruloorneq pisuunerulersitsisanngilaq.“ — Ussatit 10:22.
13. Jehovap pilluaqqusinera qanoq pisuunngortitsisarpa?
13 Jehovap kiffani pilluaqqugaangamigit tamatigut pitsaanerpaamik tunisarpai. (Jaaku 1:17) Assersuutigalugu Israelikkut najugassikkamigit ’nunamut immummik tungusunnitsuummillu kuuttumut’ najugassippai. Egypteni aamma taamatut allaatigineqarsimavoq, nunali Jehovap innuttaminut tunniussaa pingaarutilimmik minnerpaamik ataatsimik allaassuteqarpoq. Mosesip oqarneratut, ’nunaavoq Jehovap isumassugarisaa’. Allatut oqaatigalugu Israelikkut ingerlalluassapput Jehovamit isumassorneqaramik. Jehovamut aalajaattuartillutik taassumannga pilluaqquneqangaartarput inooriaaserlu inuiaat eqqaminni najugaqartut tamarmik inooriaaserisaannit pitsaanerungaartoq nuannaarutigisinnaasarlugu. Aap, Jehovamuna pilluaqqusinera ’pisuunngortitsisartoq’! — 4 Mosesi 16:13; 5 Mosesi 4:5-8; 11:8-15.
14. Guutimi pisuujusut suna nuannaarutigaat?
14 Oqariartaaseq ’Guutimi pisuujuneq’ aamma „Guutip isaani pisuujuneq“-mik nutserneqarpoq. (The New Testament in Modern English J.B. Phillipsimit) Nunap piisigut pisuujusut allanit qanoq isigineqarnertik isumakuluutigigajuttarpaat. Tamanna inooriaasianni ersertarpoq. Biibilimi ’nunap piinik usorsisimaaruteqarnertut’ taaneqartumik allanit iluarineqarusupput. (1 Johannesi 2:16) Guutimili pisuujusut Guutimit akuerineqarlutillu iluarisaallutillu pisassarinngisaraluamik ajunngisaarfigineqangaarput, taassumunngalu namminneq qanittumik attaveqarput. Guutimik ikinnguteqarnertik erlinnartoq tamanna nunap piisigut pisuussutit nalerisimaalersitsisinnaanerannit toqqissisimalersitsisinnaanerannillu annerungaartumik nalerisimaalissutigalugulu toqqissisimalissutigaat. (Esaja 40:11) Taava manna apeqqutaalerpoq: Guutip isaani pisuujuniarluta qanoq iliortariaqarpugut?
Guutip isaani pisuujuneq
15. Guutimi pisuujuniarluta qanoq iliortariaqarpugut?
15 Angut Jiisusip assersuusiaani oqaluttuarineqartoq siunissamut pilersaarusiorpoq eqiasuillunilu sulilluni imminut pisuunngorsarnissani kisiat eqqarsaatigalugu, sianiitsuunerarneqarporlu. Taamaattumik Guutimi pisuujujumagutta sammisassanik Guutip isaani naleqavissunik eqiasuilluta ulapputiginninnissarput ilungersuutigisariaqarparput. Tamatumunnga ilaavoq Jiisusip peqqussutaanik matuminnga naammassinninnissaq: „Taamaattumik aallaritsi inunnillu inuiannit tamaneersunik ajoqersuganngortitsigitsi.“ (Matthæusi 28:19, NV) Nammineq soqutigisat siuarsarnagit oqaluussinermi ajoqersuganngortitsiortornermilu piffissamik, nukinnik piginnaanernillu atuineq ileqqaarnermut assersuunneqarsinnaavoq. Taamaaliorsimasut taamaaliornertik anersaakkut iluaqutigingaarsimavaat, soorlu misigisalikkersaarutini tulliuttuni tamanna ersertoq. — Ussatit 19:17.
16, 17. Misigisat inooriaatsip qanoq ittup Guutip isaani pisuunngortitsisarneranik ersersitsisut oqaluttuarikkit.
16 Eqqarsaatigeriakkit angutip kristumiup Kangiamiup nalaatai. Akissarsiarissaarluni computerteknikeritut sulivoq. Piffissaajarnartupilussuuvorli, tamannalu pissutigalugu misigilerpoq anersaakkut piitsuulluni. Taamaattumik atorfimmini qaffanniarsarinani soraarniarluni naggataatigut aalajangerpoq sikuliortalerlunilu aqqusinermi tuniniartakkaminik. Taamaalilluni anersaakkut pisariaqartitami akisussaaffimmilu isumaginissaannut piffissaqarnerulerpoq. Suleqatiginikuusaasa ilaasa illaruaatigaat, qanorli ingerlava? Ima oqaluttuarpoq: „Computerinik suliaqarninnit aningaasatigut ingerlalluarneruvunga. Aamma nuannaarnerulerpunga suliffikunniikkallarnittut stressernangalu isumakuluuteqannginnama. Pingaarnerpaamillu, maanna misigivunga Jehovamut qaninnerullunga.“ Angut kristumiu taanna allannguigami piffissaq tamaat kiffartorsinnaalerpoq, maannalu nunamini Jehovap Nalunaajaasuisa immikkoortortaqarfianni kiffartorpoq. Jehovap pilluaqqusinera ilumut „pisuunngortitsisarpoq“.
17 Oqaluttuarineqarsinnaasoq alla tassaavoq arnaq ilaqutariinni ilinniagaqarnissamik assut pingaartitsisuni peroriartortoq. Frankrigimi, Mexicomi Schweizimilu universitetini ilinniarpoq, qaffasissumillu atorfeqalernissaa ilimanarpoq. Ima oqaluttuarpoq: „Ingerlalluaqaanga, ataqqisaallunga amerlasuunillu immikkut pisinnaatitaaffilerneqarlunga, qamuunali misigaanga imaqanngilluinnarlunga nalerisimaanngeqalungalu.“ Taava Jehova pillugu ilinniarpoq. Ima oqaluttuarpoq: „Anersaakkut siumukariartortillunga Jehovap nuannaartinnissaa uannullu tunniussaasa ilamininnguinilluunniit akillugu tuninissaa kissaatigisupilussuanngorpara, tamannalu qanoq inooriaaseqarnissama paasinissaanut iluaqutigaara — tassa piffissaq tamaat taassumunnga kiffartorusullunga.“ Suliffimminit soraarpoq, sivitsunngitsorlu kuisippoq. Ukiuni 20-ni kingullerni nuannaarluni piffissaq tamaat kiffartorpoq. Ima oqaluttuarpoq: „Inuit ilaat isumaqarput piginnaanikka maangaannartikkikka, nassuerutigisariaqarpaalli nuannaarlungalu pilluartunga, najoqqutassiallu malitakka nuannareqaat. Jehova ullut tamaasa qinnuigisarpara maniguunnissannut ikioqqullunga taassumannga akuerineqarsinnaaniassagama.“
18. Qanoq ililluta Paulusitut Guutimi pisuunngorsinnaavugut?
18 Saulusip, kingusinnerusukkut apustilinngortup Paulusip, qaffasissumik atorfeqalernissaa ilimanaraluarpoq. Kingusinnerusukkulli ima allappoq: „Ilumummi suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq.“ (Filippimiut 3:7, 8) Paulusip Kristusi pillugu ilisimasaqarnermigut pisuussutigiligai silarsuup neqeroorutigisinnaasaanik tamanik qimmuipput. Uaguttaaq namminissarsiorluta anguniagaqarunnaarnitsigut Guutimullu tunniusimalluta inuunitsigut Guutip isaani pisuunngorsinnaavugut. Guutip oqaasiani ima neriorsoqqissaarneqarpugut: „Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu inuunerlu.“ — Ussatit 22:4. (wE 1/8 07)
Uku nassuiarsinnaavigit?
• Angutip Jiisusip assersuusiamini oqaluttuarisaata suna ajornartorsiutigaa?
• Sooq angut assersuusiami oqaluttuarineqartoq sianiitsuunerarneqarpa?
• Guutimi pisuujuneq qanoq paasisariaqarpa?
• Qanoq ililluta Guutimi pisuunngorsinnaavugut?
[Atuaqqissaarnermi apeqqutit]
[Qupp. 17-mi assiliartaq]
Sooq angut pisooq sianiitsuunerarneqarpa?
[Qupp. 18-mi assiliartaq]
Qaffatsinneqarnissamik neqeroorfigineqarneq qanoq ililluni uppernikkut misilinneqaatinngorsinnaava?
[Qupp. 20-mi assiliartaq]
„[Jehovap] pilluaqqusinera pisuunngortitsisarpoq“