„Mianersoritsi piumatussusermut sumulluunniit“

„Inuup inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ — LUKASI 12:15.

1, 2. (a) Ullumikkut inuit soqutigisaannut anguniagaannullu tunngasut suut maluginiarpigit? (b) Isummanit taama ittunit qanoq sunnerneqarsinnaavugut?

ANINGAASAT, pigisat, ataqqisaaneq, suliffiit aningaasarsiffiulluartut ilaquttallu — tamakku tassaapput inuit qanoq ingerlalluartiginermut aalajangiisutut siunissamullu toqqissisimanartumut qulakkeerutaasutut isigisartagaat. Erseqqippoq inuppassuit nunani pisooqarfiusuni piitsoqarfiusunilu pigisatigut iluanaarniarlutik aamma pissaqarnerulerniarlutik tamaviaartut. Anersaakkulli ittunik soqutiginnikkunik soqutiginnikkunnaariartupallapput.

² Pissutsit taamatorpiaq innissaat Biibilimi siulittuutigineqarpoq. Tassani ima allassimavoq: „Ullussani kingullerni [nalliukkumaarput] ullut atugarliungaarfissat. Taamanikkussamimi inuit tassaalerumaarput namminissarsiortut, aningaaserituut . . . inuulluarniutit Guutimit pingaarnerutillugit. Taakkua Guutimik mianerinninneq ileqqorisuusaaginnarpaat pissaanerali asiginnarlugu.“ (2 Timotheusi 3:1-5) Kristumiut ilumoortut inuit taamaattut akornanni ullut tamaasa inuusut eqqarsartaatsimut inooriaatsimullu tamatumunnga naleqqussarnissamut tatineqartuartarput. Silarsuup ’nammineq ilutsimisut iluseqalersinniarluta’ ilungersornerata akiornissaanut suna iluaqutigisinnaavarput? — Romamiut 12:2, The New Testament in Modern English J.B. Phillipsimit.

3. Jiisusip siunnersuutaa suna maanna sammissavarput?

³ ’Uppernerup aqqutissiuussisuatut naammassisitsisuatullu’ Jiisusip tamanna pillugu ilinniutissanik sunniuteqarluartunik tunivaatigut. (Hebræerit 12:2) Ilaanni Jiisusi inuppassuarnut anersaakkut qaammarsaataasunik oqalutsillugu angutip ima qinnuiginiarlugu akornuserpaa: „Ajoqersuisoq, qatanngutiga oqarfigiuk kingornussassatsinnik aviffigissagaanga.“ Tamatumunnga akissutitut Jiisusip angut taanna — tusarnaartullu allat tamaasa — pimoorunneqartariaqartunik siunnersorpai. Piumatussuseq pillugu paatsuugassaanngitsumik mianersoqqussuteqarpoq eqqarsalersitsisumillu assersuusiornermigut mianersoqqussutiminik pikkunarnerulersitsilluni. Tamatumani Jiisusip oqaasii eqqumaffigigutsigit siunnersuutaanillu malinninneq qanoq iluaqutigissaneripput eqqarsaatigigutsigu silatusaassaagut. — Lukasi 12:13-21.

Qinnuteqarneq naleqqutinngitsoq

4. Sooq angutip Jiisusimik akornusiinera ippinnarpa?

⁴ Angutip akornusiinera sioqqullugu Jiisusip ajoqersukkani allallu ilumoortuusaarnaveersaarnissaq, Inuup Erneranik nassuerutiginninnissamut sapiissuseqarnissaq anersaamillu illernartumik ikiorneqarnissaq pillugit oqaluuppai. (Lukasi 12:1-12) Ajoqersukkat pingaarutilinnik tamakkuninnga pigiliussinissartik pisariaqartilluinnarpaat. Oqalugiaatip imminut misissornissamut kajumissaarutaasup tamatuma nalaani angut taanna akornuseeriataarpoq Jiisusilu qinnuigalugu pigisanut tunngasunik ilaqutariittut isumaqatigiinngissutaarpasissunik aalajangeeqqullugu. Pisimasorli tamanna pingaarutilimmik ilinniarfigisinnaavarput.

5. Angutip qinnuteqarnerani taanna pillugu suna paasinarsiva?

⁵ Oqartoqarsimavoq „inuup pissusivia oqalugiaammik upperisarsiornermut tunngasumik tusarnaaraangami  eqqarsaatigisaanit qulaarneqarajuttartoq“. Jiisusi anersaakkut ittunik itisuunik oqaluuserisaqartillugu, angutip taassuma aningaasatigut iluanaarniarluni qanoq iliussanerluni eqqarsaatigisimagunarpaa. Kingornussassaq eqqarsaatigalugu naammagittaalliornissamut pissutissaqarnersoq eqqaaneqanngilaq. Immaqa Jiisusip oqartussaassuseqarnera eqqartuussisutullu silatuutut tusaamaneqarnera iluaqutiginiarsaraa. (Esaja 11:3, 4; Matthæusi 22:16) Sunaluunniilli pissutigigaluarpagu taamatut qinnuteqarnerata paasinarsisippaa uummammigut pissusia ajoquteqartoq — tassa anersaakkut ittunik pingaartitsinngilluinnartoq. Taamaattumik imminut misissortariaqarpugut, ilaa? Assersuutigalugu kristumiut ataatsimiinnerini eqqarsaativut allamut saaqqajaasinnaapput imaluunniit kingusinnerusukkut pisassavut eqqarsaatigeqqajaasinnaavavut. Taamaaliornatali oqaatigineqartut tusarnaaqqissaartariaqarpavut eqqarsaatigalugulu paasissutissat nammineq qanoq atorsinnaanerlutigit Ataatatsinnut qilammiusumut, Jehova Guutimut, uppeqatitsinnullu attaveqarluarnerusinnaaniassagatta. — Tussiaat 22:23; Markusi 4:24.

6. Sooq angutip qinnutigisaa Jiisusip akueriumanngilaa?

⁶ Angutip taassuma qinnuteqarneranut sunaluunniit pissutaasimagaluarpat Jiisusip akueriumanngilaa. Jiisusilli taanna ima oqarfigaa: „Inungaa, kia ilissinnut eqqartuussisunngortillungalu kingornussassanik agguaasussanngortikkaminga?“ (Lukasi 12:14) Taamatut oqarnermigut Jiisusip inuit ilisimalluagaat eqqaavaa, tassa Mosesip inatsisai naapertorlugit illoqarfimmi toqqakkanik eqqartuussisoqarnera tamakkununngarpiaq tunngasunik aalajangiisartunik. (5 Mosesi 16:18-20; 21:15-17; Ruthi 4:1, 2) Jiisusip pingaaruteqarnerusut — tassa Guutip naalagaaffia pillugu sallusuissummik nalunaajaaneq Guutillu piumasai pillugit inunnik ilinniartitsineq — ulapputigai. (Johannesi 18:37) Ulluinnarni ajornartorsiutit allamut saassutiginagit Jiisusip maligassiaa malikkutsigu piffissarput nukivullu nutaarsiassamik nuannersumik oqaluussissutiginninnermut ’inunnillu inuiannit tamaneersunik ajoqersuganngortitsiortornermut’ atussavavut. — Matthæusi 24:14; 28:19, NV.

Piumatussuseq mianersorfigiuk

7. Jiisusi qanoq isumatusaarluni maluginiaava?

⁷ Jiisusip inuit pissutiginiagaannik ilorlerpaanik naliliisinnaagami angutip namminermut tunngasunut akuliuteqqulluni qinnuiginninneranut pissutiviusut nalunngilai. Taamaattumik Jiisusip angutip taassuma qinnutigisaa itigartiinnarnagu pissutiviusoq ingerlaannaq ima oqaatigaa: „Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ — Lukasi 12:15.

8. Piumatussuseq qanoq paasisariaqarpa, piumatunerlu qanoq kinguneqarsinnaava?

⁸ Piumatussuseq tassaaginnanngilaq pisariaqartitarisinnaasanik aningaasaateqarusunneq aalajangersimasumilluunniit pigisaqarusunneq. Oqaatsinik qinerlerfissiaq naapertorlugu piumatussuseq tassaavoq „soqutigittaalluni pigiligaqarusussuataarneq“. Tamanna tassaasinnaavoq naammatsissinnaanani — immaqa allap piinik — pigisaqarusunneq taakku pigilerniaannarlugit, pisariaqartinnerlugit pisariaqartinnginnerlugilluunniit eqqarsaatiginagu aamma tamanna allanut qanoq sunniuteqassanersoq eqqarsaatiginagu. Piumatuup pilerigisani eqqarsartaatsiminut iliuutsiminullu ima naalagaatitsigisarpai pilerigisani guutigilertarlugillusooq. Eqqaamajuk apustilip Paulusip piumatooq guutipilussiortorlu, Guutip naalagaaffianik kingornussisussaanngitsoq, assigiissimmagit. — Efesosimiut 5:5; Kolossemiut 3:5.

9. Piumatussuseq qanoq ersersinneqarsinnaava? Assersuuteqarit.

⁹ Soqutiginarpoq Jiisusip ’piumatussuseq sunaluunniit’ mianersorfigeqqummagu. Assigiinngitsorpassuartigut piumatusoqarsinnaavoq. Piumatoriaatsit ilaat Inatsisit Qulit kingullersaanni ima taagorneqarput: „Tullivit illua pileritsaatissanngilat. Pileritsaatissanngilatit tullivit nulia inussiaataaluunniit angut inussiaataaluunniit arnaq ussiutaaluunniit siutituujutaaluunniit suugaluartulluunniimmi tullivit pigisai.“ (2 Mosesi 20:17) Inuit arlaatigut piumatunertik pissutigalugu ingasattumik ajortuliorsimasut pillugit Biibilimi oqaluttuarpassuaqarpoq. Saatani siullerpaavoq allap pigisaanik pileriginnittoq, tassa naalannassuseq, ataqqinaat oqartussaassuserlu Jehovap kisimi pigisai pilerigigamigit. (Saqqummersitat 4:11) Evap nammineq naalagaasinnaaneq  pilerigaa, salloqittarneqartikkamilu inuiaat ajorteqalerlutillu toqusalerput. (1 Mosesi 3:4-7) Anersaapiluit inngiliupput „suliassaminnik pingaaqisunik“ naammaginninnatik „inigisassaraluaminnik qimatsisut“ pisussaaffiginngisatik piniarlugit. (Judasi 6; 1 Mosesi 6:2) Aamma eqqarsaatigeriakkit Bileami, Akani, Gehazi Judasilu. Inuunerminni atukkatik naammaginagit pigisanut pilerissuseq naleqqutinngitsoq ineriartortippaat. Tamanna pissutigalugu inissisimaffimminnik atornerluipput, tamannalu taakkununnga alianangaartumik kinguneqarpoq.

10. Sooq Jiisusip oqaaqqissaarineratut ’sissuertariaqarpugut’?

¹⁰ Naleqqulluinnarpoq Jiisusip piumatussusermut mianersoqqusinini aallarnermagu ima oqarluni: „Sissueritsi“! Sooq? Pissutigalugu inuit inuit allat piumatunerannik maluginneriaannaasarmata, namminnerli piumatunertik qaqutiguinnaq nassuerutigiumasarlugu. Eqqaamasariaqarparput apustilip Paulusip uparuarmagu ’aningaaserituujuneq ajortunut tamanut sorlaasoq’. (1 Timotheusi 6:9, 10) Ajoqersugaq Jaaku nassuiaavoq pilerissuseq eqqunngitsoq tamanna ’ilumileraangami ajortimik erniaqartartoq’. (Jaaku 1:15) Jiisusip mianersoqqussutaanut naapertuuttumik ’sissuertariaqarpugut’, inuit allat piumatunersut maluginiarnagu uagulli nammineq uummammiugisavut misissorniarlugit, ’piumatussusermut sumulluunniit mianersorsinnaaniassagatta’.

Naammattorsuarnik pigisaqarluni inuuneq

11, 12. (a) Jiisusi piumatussusermut qanoq mianersoqqusiva? (b) Sooq Jiisusip mianersoqqussutaa malillugu iliortariaqarpugut?

¹¹ Piumatussutsip mianersorfiginissaanut suli allamik pissutissaqarpoq. Jiisusip nangilluni oqaasii uku maluginiariakkit: „Inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Tamanna ilumut eqqarsaatiginnilluarnissamut kajumissaarutaavoq ulluni pigisanik pingaartitsiffiungaartuni makkunani, tassami ullumikkut inuit isumaqarput pigissaarlutillu naammattorsuarnillu peqarunik pilluassallutillu ingerlalluassallutik. Jiisusip oqaatsit taakku atorlugit uparuarpaa qanorluunniit pigisaqartigigaluaraanni pigisat siunertaqarluartumik nalerisimaarnartumillu inuunermut aalajangiisuunngitsut.

¹² Inuit ilaasa immaqa tamanna isumaqatiginngilaat. Immaqa isummerput pigisat inuunermik nuannernerulersitsillutillu ilorrisimaarnarnerulersitsisartut, taamaattumillu nalerisimaarnarnerulersitsisarlutik. Taamaattumik suliffik, inuulluaatissanik atortunillu elektroniskiusunik kissaatigisaminnik pisinissaminnut periarfissaqalissutigiumaagartik, tunniusimaffigilluinnartarpaat. Isumaqarput tamakku pilluarlutik inuulissutigissallugit. Taamatulli eqqarsaraanni Jiisusip suna pineraa paasineqarsimassanngilaq.

13. Inuunermut pigisanullu oqimaaqatigiissumik isiginnittaaseqarneq qanoq paasisariaqarpa?

 ¹³ Naammattorsuarnik pigisaqarneq ajunnginnersoq ajornersorluunniit samminerunagu Jiisusip erseqqissarpaa inuup ’pigisai’, tassa pigeriigai, inuuneranut aalajangiisuunngitsut. Tamatumunnga tunngatillugu tamatta nalunngilarput inuuinnarniarluni iliuuseqangaatsiartoqartariaqanngitsoq. Inuuniarluni pisariaqartut tassaapput nerisassaqalaaginnarnissaq, atisassaqarnissaq siniffissaqarnissarlu. Pisuut tamakkuninnga naammattorsuarnik peqartut, piitsut immaqa pisariaqartitamik pinissaat ilungersuutigisariaqartarpaat. Qanorluunniilli assigiinngissuteqartigigaluarpata toqugaangamik naligiilertarput — taava suut tamarmik naleeruttarput. (Oqaluussisartup oqaasii 9:5, 6) Taamaattumik pigisaqarneq pigisaqalerniarnerluunniit inuunermik siunertaqalersitsisinnaanatillu naleqalersitsisinnaanngillat. Aamma isumaqassanngilagut tamakkua inuunitsinnik siunertaqalersitsisinnaasut. Eqqarsaat tamanna erseqqississaaq oqaatsip ’inuunerup’ Jiisusip eqqartugaata isumaa misissorutsigu.

14. Oqaaseq ’inuunermik’ nutserneqartoq Lukasi 12:15-imi atorneqartoq sumik ilinniarfigisinnaavarput?

¹⁴ Jiisusi oqarpoq ’inuup inuuneranut aalajangiisuunngitsoq sumik pigisaqarnera’. Oqaatsimi Lukasip iivangkiiliuani versimi tamatumani ’inuunermik’ (grækerisut: zōēʹ-mik) nutserneqartumi inuup inooriaasia pineqanngilaq, pineqartorli tassaavoq inuunerpiaq. * Jiisusi oqarpoq arlaannattaluunniit, pisuujugaluarutta piitsuugaluaruttaluunniit, pisaarluta inuugaluarutta naalliullutaluunniit inuussutissarsiortariaqaraluarutta, aqussinnaanngikkaa qanoq sivisutigisumik inuunissani imaluunniit qulakkeersinnaanngikkaa aqagu inuussanerluni. Qaqqami oqaluutsimini Jiisusi ima oqarpoq: „Kia arlassi isumakuluuteqarnermigut ullut inuuffigisassani ataasiinnarmilluunniit ilasinnaanerpai?“ (Matthæusi 6:27) Biibilimi erseqqissumik allassimavoq Jehova kisimi tassaasoq „inuunerup puilaffia“, aamma taassuma kisimi inuit aalajaatsut ’inuunivimmik’, imaluunniit ’inuunermik naassaanngitsumik’, inuunermik naaffeqanngitsumik, qilammi nunarsuarmiluunniit inuusinnaalersissinnaavai. — Tussiaat 36:10; 1 Timotheusi 6:12, 19.

15. Sooq inuppassuit pigisat isumalluutigisarpaat?

¹⁵ Jiisusip oqaasiini erseqqippoq inuunermut kukkusumik isiginnittaaseqalernissaq qanoq ajornanngitsigisoq. Inuit tamarmik pisuujugaluarunik piitsuugaluarunilluunniit naammalluinnanngitsuupput aamma assigiimmik naggatissaqarput. Mosesi ima oqarpoq: „Ukiut inuuffigisassavut 70-iusinnaapput imaluunniit 80-it, nukissaqassagutta, ajugaasimaarutissartaalli tamarmi tassa naalliunnartoq ajunaarnerlu; ingerlalertorput, timmisutullu qimaguppugut.“ (Tussiaat 90:10; Jobi 14:1, 2; 1 Petrusi 1:24) Taamaattumik inuit Guutimut attaveqarluarnermik ineriartortitsisimanngitsut apustilip Paulusip ima eqqartugaatut inuunermut isiginnittaaseqarajupput: „Nerillutalu erngutiinnarniarta, aqagu toqussagatta.“ (1 Korinthimiut 15:32) Inuit allat misigipput inuuneq sivikeqalunilu nalorninartuusoq, taamaammat pigisat atorlugit siunissamut eqqanaarsarniarsarisarput. Immaqa misigipput tigussaasunik pigisarpassuaqarneq arlaatigut inuunermik toqqissisimanarnerulersitsisartoq. Pigissaarumallutik pigisarpassuaqalerumallutillu suliuarput, kukkusumik eqqarsarlutik tamakkua pigunikkit pilluassallutillu toqqissisimassallutik. — Tussiaat 49:7, 12, 13.

 Siunissaq toqqissisimanartoq

16. Inuunerup nalivianut suut aalajangiisuunngillat?

¹⁶ Imaassinnaavoq pissaqarneruneq — naammattorsuarnik nerisassaqarneq atisassaqarnerlu, najugassaqarneq inuulluaatissaqarnerlu — inuunermik ilorrisimaarnarnerulersitsisinnaasoq imaluunniit allaat pitsaanerusumik nakorsartinnissamut taamaalillunilu ukiualunnik sivisunerusumik inuunissamut periarfissaqalersitsisinnaasoq. Taamatulli inuuneq ilumut siunertaqarluarnerullunilu toqqissisimanarnerua? Qanoq sivisutigisumik inuuneq qanorlu pigisaqartigineq imaluunniit pigisanik qanoq nuannaaruteqartigineq inuunerup nalivianut aalajangiisuunngillat. Apustilip Paulusip tamakkuninnga isumalluutiginnippallaarnerup navianaataa uparuarpaa. Timotheusi ima allaffigaa: „Silarsuarmi matumani pisuut peqqusiffigissavatit makitaniaqqunagit pisuussutitilluunniit allanngujasut isumalluutigeqqunagit, isumalluutigeqqulluguli Guuti pisariaqakkatsinnik naammattunik tunniussisoq.“ — 1 Timotheusi 6:17.

17, 18. (a) Pigisanut isiginnittaaseq eqqarsaatigalugu kikkut maligassiaat asseqanngitsut uagutsinnut malitassaqqippat? (b) Assersuusiaq suna allaaserisami tulliuttumi sammissavarput?

¹⁷ Pisuussutit isumalluutiginissaat silatusaarnerunngilaq, taakkua ’allanngujammata’. Ataataanerpaaq Jobi pisoorsuuvoq, ajunaarnermilli eqqorneqariataarami pisuussutini iluaqutigisinnaanngilai; imaaliallaannaq peerupput. Misilinneqarnermini annikilliornerminilu tamani inuuinnassutigisaa tassaavoq Guutimut qanittumik attaveqarnini. (Jobi 1:1, 3, 20-22) Aaperaap pigisarpassuani Jehovap suliassiissutigisaata imaannaanngitsup suliarinissaanut akornutaatinngilai, ’inuiaqatigiippassuarnullu ataatanngornini’ pilluaqquneqaatigaa. (1 Mosesi 12:1, 4; 17:4-6) Taakkua allallu maligassiaat uagutsinnut malitassaqqipput. Inuusuttuugutta utoqqaaguttaluunniit, inuunitsinni sorpiaat pingaartinnerlugit suullu isumalluutiginerlugit paasiniarlugu imminut misissornissarput pisariaqartipparput. — Efesosimiut 5:10; Filippimiut 1:10.

¹⁸ Piumatussuseq inuunermullu eqqortumik isiginnittaaseqarneq pillugit Jiisusip oqaasii ikittunnguit taakku isumaqarluarlutillu ilinniarfissaalluartorujussuupput. Jiisusili suli allanik uummammioqarpoq, taamaattumillu nangeqqippoq angummik pisuumik sianiitsumik assersuusiaq oqaluttuaralugu. Taanna ullumikkut inuunitsinnut qanoq tunngassuteqarpa, aamma sumik ilinniarfigisinnaavarput? Apeqqutit taakku allaaserisami tulliuttumi akineqassapput.

[Quppernerup ataani ilanngussaq]

Qanoq akissavit?

• Jiisusip angutip inuppassuit akornanniittup qinnutigisaanik itigartitsinera sumik ilinniarfigisinnaavarput?

• Sooq piumatussuseq mianersorfigisariaqarparput, aamma qanoq ililluta mianersorfigisinnaavarput?

• Sooq pigisat inuunermut aalajangiisuunngillat?

• Suna inuunermik ilumut toqqissisimanartunngortitsisinnaallunilu nalerisimaarnartunngortitsisinnaava?

[Atuaqqissaarnermi apeqqutit]

[Qupp. 14-mi assiliartaq]

Sooq angutip qinnutigisaa Jiisusip itigartippaa?

[Qupp. 14-mi assiliartaq]

Piumatussuseq ajunaarutaasinnaavoq

[Qupp. 16-mi assiliartaq]

Aaperaap qanoq ersersippaa pigisanut eqqortumik isiginnittaaseqarluni?