Silarsuarmi ajornartorsiorfiusumi qanoq neriuuteqartoqalersinnaasoq

„INUINNAAT ajunngitsuliornissamut ataatsimullu ajornartorsiutimik aaqqinnissaannut oqaluttuarisaanermi ullumikkut aatsaat taama periarfissarissaartigipput.“ Taama oqarpoq USA-mi præsidentiusimasoq Bill Clinton ataatsimiinnermi Ottawami Canadamiittumi marsi 2006-imi. Oqarpoq 2004-mi tsunamip kingorna inuit nunanit tamalaaneersut ikiuiumatunerulersimasut, isumalluarpasillunilu nangilluni oqarpoq silarsuup maanna misigigaa „piffissaq inuit imminnut pinngitsoorsinnaanngiffigisaat nalissaqanngitsoq“.

Ilimagisinnaanerparput pinngortitami ajunaarnersuit inuit sumi tamaaniittut siunissamik pitsaanerusumik pilersitsiniarlutik suleqatigiissutigissagaat? „Inuit imminnut pinngitsoorsinnaanngiffigisaat nalissaqanngitsoq“ siunissamut eqqissinermut piviusumut isumannaassusermullu ataavartumut tunngavissaalluarpa?

Neriuut sumi nanineqarsinnaasoq

Oqaluttuarisaanerup takutippaa ukiuni 6000-init amerlanerusuni inuiaat iliuuserisimasaat pakatsissutaaginnarsimasut. Taamaattumik Allakkani isumassarsiarititaasuni ima siunnersorneqarpugut:  „Tatigeqinasigit naalagartat inuit annaassisinnaanngitsut.“ (Tussiaat 146:3) Silarsuarmi peqatigiiffiit assigiinngitsut, pigisat sinnattulluunniit tunaartarigutsigik pakatsiinnassaagut. Sooq? ’Silarsuaq piumatussusialu nungussammata.’ — 1 Johannesi 2:17.

Ukiulli hundredelikkuutaat ingerlaneranni Guuti tassaasimavoq inuit eqqortuliorusuttut qularnaatsumik neriuffigisaat. Biibilimi Guuti taaneqarpoq „[itsaq] Israelip neriuutaa“ aamma „[Israelikkut] siuaasaasa neriuffigisaat“, aamma Guutip oqaasiani arlaleriarlugit Guutimik neriuffiginninneq, tatiginninneq isumalluarfiginninnerlu eqqartorneqarpoq. (Jeremia 14:8; 17:13; 50:7) Aap, Biibilimi kajumissaarneqarpugut ’Jehova neriuffigeqqullugu’. — Tussiaat 27:14.

Ussatit 3:5, 6-imi ima kajumissaarneqarpugut: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Pissutissaqarluarpoq neriorsuutip taamaattup tatigilluinnarnissaanut, Jehova Guutimi allanngujuillunilu tatiginartuullunilu neriorsuutiminik eqqortitsiuaannarpoq. (Malaki 3:6; Jaaku 1:17) Guutip pitsaanerpaamik kissaappaatit, oqaasialu, Biibili, maleruartuaannarukku piffissami siooraffiusumi siulersorluarneqassaatit. — Esaja 48:17, 18.

Uummatikkut iluunngarluni Guutip siunnersuutaanik maleruaasup neriorsuut una tatigisinnaavaa: „Siooraqinak ilagigakkit, erseqinak, uangaagama illit Guutit. Nakussatsippakkit ikiorlutillu, assannik ajugaasartumik najummivakkit.“ (Esaja 41:10) Jehova Guutimik asannittut tuppallersaatigingaartarpaat qamannga pisumik taassumunnga qinuneq neriorsuummillu tamatumannga eqqarsaatiginninneq, ajornartorsiutimmi isumakuluutillu iliuuseqarfiginissaannut iluaqutigisaramikku.

Andrea Jehovap Nalunaajaasuisa ilaat anaanaq marlunnik meeralik assersuutissaqqippoq. Ima oqarpoq: „Piffissani nalorninartorsiorfiusuni qinunikkuinnaq Jehovallu neriorsuutaanik eqqarsaatigineqqissaarnerinnakkut nakussatseqqittarpunga. Jehova inuuninni aalajaatsumik najoqqutarigaangakku oqimaaqatigiissaariuarneq ajornannginneerarsuusarpoq.“

Jehovamik neriuffiginninnerit nakussatsiguk

Tussiaasiortup Jehovamik neriuffiginninnerup pingaaruteqassusia ima erseqqissarpaa: „Pilluangaassapput inatsisinnik nuannarinnittut, naakkiuffissaqanngilarlu taakkununnga.“ (Tussiaat 119:165) Guutip oqaasia peqqissaartumik atuaqqissaarukku, isumat uummatillu ulikkaassapput anersaakkut ineriartornartunik ajunngitsunillu, aap ’sunik ilumoortunik tamanik, sunik assuarnaatsunik, sunik iluartunik, sunik minguitsunik, sunik asanartunik, sunik ajunngitsumik oqaatigineqarsinnaasunik, tassa sunik ajunngitsunik nersornartunillu’. Taamaattunut tusarnaarnissat ilinniarnissallu, tamakkualu akuerinissaat iliuuserinissaallu, peqqissaarluartumik ilungersuutigigukkit ’eqqissinerup Guutiata najussavaatit’. — Filippimiut 4:8, 9.

John, ukiuni qulikkuutaani arlalinni tamakkuninnga ilungersuuteqarsimasoq, ima oqarpoq: „Siunissamut nutaamik isiginnittaaseqalersinnanga Guutimullu naammalluinnartumut takussaanngitsumullu attaveqarneq ineriartortitsinnagu, pingaaruteqarsimavoq inuttut pissuserisama eqqarsartaatsimalu allanngorterujussuartariaqarnerannik paasinninnissara. Guutimut ajunngitsumik attaveqarneq aatsaat ineriartortissinnaasimavara anersaakkut ittunik pingaartitsilerama. Tassa Guutip oqaasianik isumassarsiarititaasumik atuartarnikkut eqqarsaatiginnittarnikkullu taassuma eqqarsartarneratut eqqarsartalerpunga taassumatullu isiginnittaaseqalerlunga.“

Sallusuissutip ernganik inuunartumik inuummarissinartumillu Biibilimeersumik imeraangavit ullut tamaasa nutaarsiassanut nuanniitsunut tusagassiuutitigut tusartuartakkatsinnut illersuutitut misilinneqarsimasoq atortassavat. Biibilimi allassimasut malillugit inuugaanni aamma ilaqutariittut ingerlalluartoqarnerulersinnaavoq eqqasuuteqarnannginnerusinnaallunilu. Aammattaaq Guuti neriorsuivoq ’uummatimikkut iluunngarlutik imminik tunaarinnittut pissaanermigut ikiorumallugit’. (2 Nalunaarsuutit 16:9) Pissutsit aaqqissavai sioorasariaarutsilluta.

Phinehas, sorsunnermik toqoraanersuarmillu misigisaqarsimasoq, ima oqarpoq: „Inuunerma Jehovamut isumagitinnissaa ilikkarsimavara. Najoqqutassiat Biibilimeersut maleruarnerisigut ajornartorsiuterpassuarnut illersorneqarpunga.“  Jehova Guuti tatigilluinnarukku allaat ajornartorsiutit anigorneqarsinnaanngitsutut ittut anigornissaannut ikiorsinnaavaatit. (Tussiaat 18:30) Meerannguup angajoqqaaminut qanittumik attaveqartup, angajoqqaani tatigilluinnarpai taakkunanngalu nakkutigineqarnini, allaat napparsimagaluarluni eqqissisimanngissuteqaraluarluniluunniit, toqqissisimanarisarpaa. Toqqissisimaneq taamaattoq misigissavat Jehovamik neriuffiginninnissamik kajumissaarut ilassigukku. — Tussiaat 37:34.

Neriuummut tunngavik qularnaatsoq

Jiisusip ajoqersukkani ima oqarfigai: „Ilissi ima qinussaasi: ’Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.’“ (Matthæusi 6:9, 10) Naalagaaffik qilammiittoq taanna — Jiisusi Kristusimik siulersorneqartoq — tassaavoq Guutip qilammi nunamilu kisimi eqqortumik oqartussaanerminik akitsisitsinermini atugaa. — Tussiaat 2:7-12; Danieli 7:13, 14.

Ullumikkut sioorassuterpassuit inuunitsinnut tunngassuteqartunut tamanut sunniuteqartut erseqqissumik takutippaat Guutip akuliunnissaa pisariaqartikkipput. Qujanartumilli akuliunnissaq taanna qanillivoq. Missiarsitut kunngiusoq, Jiisusi Kristusi, Guutimit maanna ivertinneqareersoq, Jehovap kisimi oqartussaanerata akitsisinnissaanut aqqatalu illernarsisinnissaanut oqartussaassuseqartitaavoq. (Matthæusi 28:18) Ungasinngitsukkut Guutip naalagaaffiata aqutsinerata nunarsuaq soqutigilissavaa siooranermullu eqqasuuteqarnermullu pissutaasut tamaasa piiarlugit. Esaja 9:5-imi takutinneqarpoq Jiisusi naalakkersuinissamut qinngaqqunnanngitsuusoq siooranermillu aniguisissinnaagaatigut. Assersuutigalugu ukua taaguutigai: „Naassaanngitsumik Ataataq“, „Siunnersuisoq Nalissaqanngitsoq“ aamma „Eqqissinermut Naalagaaneq“.

Eqqarsaatigiuk oqariartaaseq nuannersoq „Naassaanngitsumik Ataataq“. Tamatumani pineqarpoq Jiisusi utertitsissutitut pilliutini tunngavigalugu nunami naassaanngitsumik inuunissamut inuit naalattut periarfissinnissaannut pissaaneqarlunilu oqartussaassuseqartoq — aamma kissaateqartoq. Tamanna isumaqarpoq ajortimit naammalluinnanngissutsimillu, inummit siullermit ajortuliortumit Adamimit kingornussaminnit kiisami aniguisitaasinnaalersut. (Matthæusi 20:28; Romamiut 5:12; 6:23) Kristusip aamma oqartussaaneq Guutimeersoq atorlugu toqungasorpassuit uummarteqqissavai. — Johannesi 11:25, 26.

Jiisusip nunamiikkallarami takutippaa tassaalluni ’Siunnersuisoq Nalissaqanngitsoq’. Guutip oqaasianik ilisimasaqarnini inuillu qanoq pinngortitaanerannik paasinnilluartuunini pissutigalugit nalunngilaa ulluinnarni ajornartorsiutit qanoq aaqqinneqarsinnaanersut. Jiisusi qilammi kunnginngortitaareerami suli tassaavoq ’Siunnersuisoq Nalissaqanngitsoq’ Jehovap inuiannut tusarliisartua pingaarneq. Jiisusip siunnersuutai, Biibilimi atuarneqarsinnaasut, tamatigut pitsaasuullutillu naammalluinnartuupput. Tamatuminnga ilisimaarinnikkuit upperinnikkuillu nalorninak siooranermillu nukillaartitaanak inuusinnaavutit.

Esaja 9:5-imi Jiisusi aamma ima taaneqarpoq: „Eqqissinermut Naalagaaneq“. Ungasinngitsukkut eqqissinermut naalagaanerup Kristusip pissaanini atorlugu politikkikkut, inuit atugarisaasigut aningaasarsiornikkullu assigiinngissutsit tamaasa atorunnaarsissavai. Qanoq ililluni? Inuiaat eqqissisimasumik aqunneqartilerlugit, Naalagaaffimmut Missiarsikkoortumut innuttaalersillugit. — Danieli 2:44.

Naalagaaffiup aqutsinerani nunarsuarmi tamarmi ataavartumik eqqissineqassaaq. Tamanna qanoq qularinngissinnaavarput? Tamatuma akissutaa Esaja 11:9-mi uagutsinnut paasinarsisinneqarpoq: „Ajortumik iliortoqarnanilu ajoqusiisoqassanngilaq uanga qaqqanni illernartumi tamarmi, [Jehovamik] ilisimasaqarnerup nuna tamakkerumaarmagu soorlu ermit matoqqagaat immap naqqa.“ Naggataatigut inuit nunamiittut tamarluinnarmik Guuti pillugu eqqorluartumik ilisimasaqalersimassapput taassumunngalu naalalersimassallutik. Eqqarsaat qiimmaallarnartippiuk? Taamaappat „[Jehovamik] ilisimasaqarnerup“ erlinnartup pigiliunniarnissaa tunuarsimaarfigissanngilat.

Guuti pillugu uppernikkut nakussatsinnartumik inuunartumillu ilisimasaqalissaatit nalitsinni pisartut pillugit, siunissarlu nuanningaartoq pillugu Biibilimi neriorsuutit pillugit, Biibilimi qanorpiaq ajoqersuuteqarnersoq misissorukku. Taamaattumik assut kajumissaarusuppatsigit Jehovap Nalunaajaasuisa akeqanngitsumik Biibilimik kursusernissamik neqeroorutaat akuereqqullugu. Taamaalioruit siunissaq siooragisariaqanngilat, silarsuarmilu ajornartorsiuteqarfiusumi piviusumik neriuuteqalissaatit. (wE 15/5 07)

 [Qupp. 7-mi ungalusaq/​assiliartaq]

Sooq Guutip naalagaaffia neriulersitsisoq

Guutip naalagaaffiani kunngitut Jiisusi Kristusi qilammi nunamilu aqutsinissaminut piginnaassuseqarlunilu pisinnaatitaavoq. (Matthæusi 28:18) Nunarsuarmi (økologiip) pinngortitap pissuseqatigiinnera pissusissaatut ilerteqqissavaa, aamma nappaatit ajugaaffigissavai. Jiisusip nunami tupinnangaartuliai naalakkersuinerani inuiaat pilluaqqussutisiassaannut annerusunut qilanaartuutaapput. Kunngiuvoq naammalluinnartoq tatigisinnaasarput. Missiarsitut kunngiusup pissusimisut ilisarnaataasa ilaat ataani taaneqartut sorliit nuannarinerpaavigit?

▪ Ilassiortoq. — Markusi 10:13-16.

▪ Ingasaassinianngitsoq kinaassusersiortuunngitsorlu. — Markusi 10:35-45.

▪ Tatiginartoq namminissarsiunngitsorlu. — Matthæusi 4:5-7; Lukasi 6:19.

▪ Naapertuilluartoq. — Esaja 11:3-5; Johannesi 5:30; 8:16.

▪ Qajassuussisoq, isumassuisoq maniguuttorlu. — Johannesi 13:3-15.

[Qupp. 4-mi assiliartaq]

Biibilimik atuaraangatta atuakkavullu eqqarsaatigeqqissaaraangatsigik Jehovamik neriuffiginninnerput nakussatsinneqartarpoq