Anersaakkut ittunik pingaartitsinermik anguniagaqarneq

QAQQAMI oqaluutsimini tusaamasaasumi Jiisusi ima oqarpoq: „Pilluarput anersaakkut pisariaqartitaqarnerminnik miserratiginninngitsut qilammiup naalagaaffia pigigamikku.“ (Matthæusi 5:3, NV) Qularnanngitsumik illit Jiisusi isumaqatigaat oqarmat uagut inuit anersaakkut ittunik pisariaqartitaqartugut. Inuit sumi tamaaniittut paasisimavaat inuunerminni anersaakkut ittunik pisariaqartitaqarlutik, inuppassuillu misigipput pisariaqartitaqarneq taanna matussuserneqarpat pillualissallutik. Oqariartaaseq ’anersaakkut ittunik pingaartitsineq’ tusarsaanerujartuinnarpoq. Anersaakkut ittunik pingaartitsineq qanoq isumaqarpa, aamma noqqaassutiginissaa imminut akilersinnaava?

Inuppassuit ullumikkut pingaartitanik anersaakkut ittunik ujarlilersimapput. Inuit misigipput ’anersaakkut ittunik amigartoorlutik’, tamannalu iliuuseqarfiginiarlugu assigiinngitsunik misiliipput. Inuilli amerlanerit anersaakkut ittunik pingaartitsinerup suuneranik paasinnilluarsimanngillat. Ilaasa anersaakkut ittunik pingaartitsineq upperisarsiornermut tunngasunik aallutaqarnermut tunngatittarpaat. Allat eqqarsaqqissaarnikkut, yogarnikkut assigisaannilluunniit iliuuseqarnikkut imminut iluarisimaarnermut tunngatittarpaat.

Una apeqqutaavoq: Anersaakkut ittunik pingaartitsineq ilumoortoq qanoq anguneqarsinnaava? Upperisarsiortut tamarluinnangajammik anersaakkut ittunik pisariaqartitaqarnerup qanoq matussuserneqarsinnaanera nalunnginnerarpaat, upperisarsiornerilli amerlaqataattulli amerlatigingajattunik qanoq iliornissamut siunnersuuteqarpoq. Assersuutigalugu ilaat oqartarput eqeersaalluni ataatsimiinnermi annatsitaallutik. Allat nerliiviliaqataanermikkut Guutimut ajunngitsumik attaveqalerniartarput. Buddhasiortut eqqarsaqqissaarneq aqqutigalugu qaammarsagaaniartarput. Hindusiortut imminut naaggaarnikkut ernioqqittaqattaarneq anigorniartarpaat. Isummat tamakku assigiinngitsorpassuit, ataasiinnarluunniit, anersaakkut ittunik pingaartitsinermut ilumoortumut aqqutaappat?

Inuppassuit akissapput anersaakkut ittunik pingaartitsissagaanni upperisarsiortunut attaveqarneq pisariaqanngitsoq. Oqartarput anersaakkut ittunik pingaartitsineq uppernermut tunngassuteqaannartoq, upperisarsioqatigiinnullu aalajangersimasunut attaveqarneq pingaaruteqanngitsoq. Allat isumaqarput anersaakkut ittunik pingaartitsineq qamuuna eqqissinermik inuunerullu siunertaanik ujaasinermut tunngassuteqartoq. Oqartarput anersaakkut ittunik pingaartitsineq upperisarsiornermut tunngassuteqartariaqanngitsoq. Isumaqarput nammineq ilumiugisat, misigissutsit ilorlerpaat, sammineqaannartariaqartut. Atuakkiortoq ima oqarpoq: „Anersaakkut ittunik pingaartitsineq ilumoortoq inuup ilorpiaaniippoq. Tassaavoq silarsuarmut inunnullu avatangiisigisannut asanninnerit, akuersaarnerit attaveqarnerillu. Upperisarsioqatigiinnut attaveqarnikkut aalajangersimasumilluunniit upperisaqarnikkut nassaarineqarsinnaanngilaq.“

Erseqqippoq anersaakkut ittunik pingaartitsineq pillugu inuit isumaat assigiinngitsorujussuusut. Atuakkat tusindilikkuutaat inuunermi anersaakkut ittunik pingaartitsinermut aqqutissiuussinerarput, atuartartulli atuakkanik taakkunannga atuareernermikkut paatsiveeruttartut pakatsisartullu amerlaqaat. Atuagaqarporli ataatsimik anersaakkut ittunik tutsuiginartunik siunnersuutitalimmik. Atuagaq pineqartoq tassaavoq atuagaq Guutimit isumassarsiarititaasimaneranik uppernarsaatitalik, tassa Biibili. (2 Timotheusi 3:16) Misissoriartigu atuakkami tamatumani, Biibilimi, anersaakkut ittunik pingaartitsineq pillugu tamannalu pingaaruteqarnersoq pillugu qanoq allassimasoqarnersoq.