Angajoqqaajususi — meeqqasi asannittumik perorsarsigik

„Ilissinni suut tamarmik asanninnermik tunngaveqarlit.“ — 1 KORINTHIMIUT 16:14.

1. Angajoqqaat meerartaaraangamik qanoq misigisarpat?

INUIT amerlanersaat isumaqarput meerartaarneq inuunermi misigisat nuannernerpaat ilagigaat. Anaanaasoq Aleah-mik atilik ima oqaluttuarpoq: „Paninnik inoorlaamik takunneqqaarnera misigisaavoq asseqanngitsoq. Isumaqarpunga meeqqanit allanit tamanit pinnernerpaasoq.“ Pisorli nuannersoq taama ittoq angajoqqaat aamma annilaangalissutigisinnaavaat. Aleah-p uia ima oqarpoq: „Isumakuluutigisara tassaavoq paniga misilinneqaatinut inuunermi avaqqunneqarsinnaanngitsunut piareersarluarsinnaanerlugu.“ Angajoqqaat ilarpassuisa tamakku isumakuluutigisarpaat, aamma nalunngilaat meeqqamik asannittumik perorsarneqarnissartik pisariaqartikkaat. Angajoqqaalli kristumiuusut meeqqaminnik taamatut perorsaarusuttut unamminiagassaqassapput. Taakkua ilaat misissoriartigik.

2. Angajoqqaat sunik unamminiagassaqarpat?

² Maanna pissutsit aaqqissuussaanerata ulluini kingullerni inuuvugut. Soorlu siulittuutigineqartoq, silarsuarmi inunnik asannissuseqanngitsunik ulikkaartumi inuuvugut. Allaat ilaqutariit iluanni inuit ilarpassui ’asanniuitsuupput’, aamma ’qujasuitsunngorsimapput, mitalliisunngorsimallutik, naammatsiuitsunngorsimallutik [ilumoorfigeqatigiinngitsunngorsimallutik, imminut naalakkersinnaanngitsunngorsimallutik, NV] qiningasunngorsimallutillu’. (2 Timotheusi 3:1-5) Inunnut taamatut pissuseqartartunut ullut tamaasa attaveqartarneq kristumiut ilaqutariit iluanni imminnut periaasiannut sunniuteqarsinnaavoq. Aammattaaq angajoqqaat akiuuttarput imminut naalakkersinnaajunnaaqqajaasarnerminnut kingornussaminnut, piaarinatik ajortumik oqaaseqartarnerminnut allanullu tunngatillugu naliliilluarsinnaajunnaartarnerminnut. — Romamiut 3:23; Jaaku 3:2, 8, 9.

3. Angajoqqaat meeqqamik nuannaartuunissaat sulissutiginiarlugu qanoq iliorsinnaappat?

³ Angajoqqaat tamakkuninnga unamminiagaqaraluarlutik qitornatik perorsarsinnaavaat taamaalillutik nuannaarlutillu anersaakkut peqqissuuniassammata. Qanoq? Biibilimi siunnersuutigineqartumik matuminnga malinninnermikkut: „Ilissinni suut tamarmik asanninnermik tunngaveqarlit.“ (1 Korinthimiut 16:14) Aap, asanninneq ilumut tassaavoq „ataasiussutsip qilerutaa naammalluinnartoq“. (Kolossemiut 3:14, NV) Asanninnermut tunngassuteqartut pingasut, apustilip Paulusip Korinthimiunut allakkamini allaaserisai, aamma angajoqqaat meeqqaminnik perorsaagaangamik pissuseq taanna qanoq atorsinnaaneraat misissoriartigit. — 1 Korinthimiut 13:4-8.

Kamagittartuunissaq pisariaqarpoq

4. Sooq angajoqqaat kamagittartuusariaqarpat?

⁴ Paulusi ima allappoq: „Asanninneq  kamagittartuuvoq.“ (1 Korinthimiut 13:4) Grækerit oqaasiat matumani ’kamagittarneq’-mik nutserneqartoq naammagittarnermik kamajuinnermillu isumaqarpoq. Sooq angajoqqaat kamagittartuusariaqarpat? Qularnanngilaq angajoqqaat amerlanersaasa kamagittartuusariaqarnermut pissutissarpassuarnik eqqaasaqarsinnaanerat. Pissutissalli ilaannaat eqqarsaatigeriakkit. Meeqqat perusutaminnik ataasiaannarlutik qinnuteqartarnerat qaqutigoorpoq. Angajoqqaat allaat erseqqissumik itigartitsigaluartut meeraq immaqa apereqqittaqattaarsinnaavoq naggataatigut akuerineqarnissani neriuutigalugu. Aamma inuusuttuaqqat arlaannut akuerisaajumallutik tunngavilersuisaqattaarsinnaapput angajoqqaamik nalunngikkaluaraat akueritinniagartik sianiilliornerusoq. (Ussatit 22:15) Aammattaaq allatulli meeqqat kukkussutimik ilaat kukkussutigeqqeqqajaasarpaat. — Tussiaat 130:3.

5. Angajoqqaat kamagittartuunissamut suna iluaqutigisinnaavaat?

⁵ Angajoqqaat meeqqaminnut kamagittartuullutillu naammagittartuunissaminnut suna iluaqutigisinnaavaat? Kunngi Salomo ima allappoq: „Inuk silatussusiata kamajaatsunngortittarpaa.“ (Ussatit 19:11) Angajoqqaat meeqqamik pissusiinik paasinnissinnaapput eqqaamasarunikku namminneq ’meeqqatut oqaluttarnikuullutik, meeqqatut paasinnittarnikuullutik, meeqqatut eqqarsartarnikuullutik’. (1 Korinthimiut 13:11) Ilissi maanna angajoqqaajususi eqqaamavisiuk meeraallusi ilaannikkut ataatarsi anaanarsiluunniit piumasassinnut meerarpaluttumut akuersiinnartinniarsarisarlugu? Aamma inuusuttuaraallusi ilaannikkut eqqarsartarpisi angajoqqaasi misigissutsissinnik ajornartorsiutissinnilluunniit paasinninngilluinnartut? Taamaappat, qularnanngitsumik paasivarsi sooq meeqqasi pissusilersornermittut pissusilersornersut, aamma sooq naammagittarlusi aalajangikkassinnik eqqaasitsiuartarnissarsi pisariaqartinneraat. (Kolossemiut 4:6) Malugisariaqarpoq Jehovap angajoqqaat Israelikkuusut peqqummagit inatsisiminik qitornaminnut ’nangeqqiiuartaqqullugit’. (5 Mosesi 6:6, 7) Oqaaseq hebræerisooq „nangeqqittuartassavatit“-mik nutserneqarsimasoq „uteqqiineq“-mik, „oqaatigeqqeeqattaarneq“-mik „puiuikkiussisitsineq“-millu isumaqarpoq. Tamanna angajoqqaat meeqqap Guutip inatsisaanik maleruaanissani ilikkariartorniassammagu aalajangersimasumik oqaatiginneqqeqattaartariaqarsinnaanerannik tikkuussivoq. Aammami inuunermi allatigut ilikkagaqassagaanni uteqattaarinissaq pisariaqartarpoq.

6. Sooq kamagittartuunerup maleruutianeq assigiinnanngilaa?

⁶ Qitornanulli kamagittarnerup maleruutianeq assiginngilaa. Guutip oqaasiani ima mianersoqqussuteqarpoq: „Nukappiaqqap naalanngitsup [isumamineersitap, 1990] anaanani kanngusuutissiortarpaa.“ Ussammi tamatumani aamma erserpoq qanoq ililluni taamatut pinngitsoortitsisoqarsinnaanersoq: „Unatagaaneq [Ungoorissut, NV] ilitsersugaanerlu ilisimassusermik pigisaqalersitsisarput.“ (Ussatit 29:15) Meeqqat ilaasa immaqa angajoqqaat imminnik ilumut naveersisinnaatitaanerat apeqqusissavaat. Ilaqutariilli demokratiitut ingerlanneqartussaanngillat, angajoqqaat meeqqatik akuersiteqqaarlugit malittarisassat aalajangersimasut malinneqarnissaat piumasarisarlugu. Naamik, Jehovap ilaqutariinni Niaquunerpaatut angajoqqaat meeqqaminnik asannittumik ilinniartitsinissaannut perorsaatissiisarnissaannullu oqartussaassusilerpai. (1 Korinthimiut 11:3; Efesosimiut 3:15; 6:1-4) Tassami perorsaatissiisarneq asanninnermut tunngassuteqartumut tulliuttumut Paulusip eqqaasaanut attuumassuteqarluinnarpoq.

Asannittumik perorsaatissiineq qanoq paasisariaqartoq

7. Sooq angajoqqaat inussiarnerlutillu asannittut meeqqaminnik perorsaatissiiumappat, taamatullu perorsaatissiineq qanoq paasisariaqarpa?

⁷ Paulusi allappoq ’asannittoq inussiarnersuusoq’. (1 Korinthimiut 13:4, 1900/1961) Angajoqqaat ilumoortumik inussiarnerlutillu asannittut meeqqaminnik aalajangersimalluinnarlutik perorsaatissiisarput. Taamaalillutik Jehova ilaartarpaat. Paulusi ima allappoq: ’Asasani Jehovap perorsartarpai’ (1900/1961). Perorsaaneq imaluunniit perorsaatissiineq Biibilimi eqqaaneqartoq tassaaginnanngilaq pillaaneq. Oqaaseq taanna aamma ilinniartitsinermik isumaqartillugu atorneqartarpoq. Perorsaatissiinermut tamatumunnga suna siunertaava? „[Perorsagaanerup] kingunerisarpaa eqqissineq iluarnerlu.“ (Hebræerit 12:6, 11) Angajoqqaat inussiarnerlutik meeqqatik Guutip piumasaanut naapertuuttumik ilinniartikkaangamikkit,  taakku inersimasunngorunik eqqissinermik nuannarisaqarlutillu ileqqorissuunissaannut periarfissittarpaat. Meeqqat „[Jehovap] perorsaanera“ akuerigunikku ilisimassuseqalerlutillu ilisimasaqarlutillu naliliilluarsinnaalissapput — tassa pissutsit sølvimit kuultimillu naleqarnerungaartut. — Ussatit 3:11-18.

8. Angajoqqaat meeqqaminnik perorsaatissiisanngikkaangata amerlanertigut qanoq kinguneqartarpa?

⁸ Paarlattuanilli asannittuliornerussanngilaq angajoqqaat meeqqaminnik perorsaatissiisanngippata. Jehovap Salomo ima allannissaanut isumassarsisippaa: „Unataammik atuiumanngitsup ernini uumigaa, ernerminilli asannittup meerannguuneraniilli sukannersumik perorsartarpaa.“ (Ussatit 13:24) Meeqqat aalajangersimalluinnartumik perorsarneqanngitsut qularnanngitsumik imminuinnaq eqqarsaatigilerlutillu pilluaatsunngussapput. Tamatumali akerlianik meeqqat paasinnittunik, aalajangersimallutilli killilersuisartunik, angajoqqaallit amerlanertigut atuarfimmi ingerlalluartarput, allanut attaveqarluarnerusarlutik pilluartuusarlutillu. Taamaattumik qularutissaanngilaq angajoqqaat meeqqaminnik perorsaatissiisartut meeqqatik ilumut asagaat.

9. Angajoqqaat kristumiut meeqqatik suut pillugit ilinniartittarpaat, piumasaqaatillu taakkua qanoq isigineqartariaqarpat?

⁹ Qitornanik inussiarnersumik asannittumillu perorsaatissiisarneq qanoq paasisariaqarami? Angajoqqaat meeqqatik erseqqissumik paasitittariaqarpaat sumik piumaffigineqarnerannik. Assersuutigalugu meeqqat kristumiunik angajoqqaallit najoqqutassiat Biibilimeersut tunngaviunerusut pillugit aamma pallorfiginninnermut ilumoortumut tunngasut assigiinngitsut peqataaffiginissaasa qanoq pingaaruteqartiginerat pillugu siusissukkut ilinniartinneqartarput. (2 Mosesi 20:12-17; Matthæusi 22:37-40; 28:19; Hebræerit 10:24, 25) Meeqqat ilikkartariaqarpaat piumasaqaatit taakku allanngortinneqarsinnaanngitsut.

10, 11. Sooq angajoqqaat angerlarsimaffimmi malittarisassioraangamik meeqqamik kissaataat eqqarsaatigisarsinnaavaat?

¹⁰ Ilaannikkulli imaassinnaavoq angajoqqaat angerlarsimaffimminni malittarisassiornialerunik meeqqatik isumasiorusukkaat. Meeqqat tamakkua pillugit oqaloqataagunik immaqa malittarisassianik malinninniarnerussapput. Assersuutigalugu imaassinnaavoq angajoqqaat meeqqat piffissami aalajangersimasumi angerlartarnissaat pillugu malittarisassiorusuttut. Taava aalajangersinnaapput namminneq piffissamik aalajangiiniarlutik, imaluunniit, periarfissat aappaattut, meeqqat piffissamik siunnersuuteqartinniarlugit siunnersuutiminnullu tunngavilersuisillugit. Taava angajoqqaat oqarsinnaapput meeqqat qassinut angerlartarnissaat kissaatiginerlugu nassuiarlugulu sooq tamanna naleqqussorinerlugu. Ilimagineqarsinnaasutummi isumaqatigiinngikkaanni qanoq iliortoqartarpa? Ilaannikkut immaqa angajoqqaat isumaqatigiissutigisarpaat meeqqamik kissaatigisaat najoqqutassianut Biibilimeersunut akerliunngippata akuerisinnaallugit. Taava imaappa angajoqqaat oqartussaanertik isumakkeeraat?

 ¹¹ Apeqqut tamanna akissutissarsiniarlugu Jehovap Lotimut taassumalu ilaqutaanut oqartussaassutsiminik asannittumik atuinera misissussavarput. Inngilit Loti, nulia paniilu ingiaqatigereeramikkit Lotimut ima oqarput: „Qaqqani isumannaatsumik inissinniarit inuunerit annaajumanngikkukku.“ Lotili allamik siunnersuuteqarluni ima akivoq: „Aajinnga illoqarfik, qanittuararsuummat tassunga aniguiniarsinnaavunga isumannaatsumut pillunga, mikeqaarmi. Taanna annanniarfiginiarlara; mikeqaarmi!“ Jehova qanoq akiva? Ima oqarpoq: „Tamatumuunattaaq qinnutit tusarpara.“ (1 Mosesi 19:17-22) Jehovap oqartussaanini isumakkeerpaa? Naamerluinnaq! Lotip qinnutaa suusupaginngilaa pisimasumilu tamatumani immikkut ajunngisaarfiginiarlugu aalajangerluni. Illit ataataasutut anaanaasutulluunniit ilaqutariinni malittarisassat suut atuutissanersut aalajangeraangakku meeqqavit soqutigisaat eqqarsaatigalugit ilaannikkut aalajangertarsinnaavit?

12. Meeqqat suna toqqissisimalissutigissavaat?

¹² Soorunami meeqqat malittarisassat suunersut ilisimaannarnagu taakkuninnga unioqqutitsinerup kinguneri nalunngittariaqarpaat. Meeqqallu tamanna oqaloqatigiissutigereeraanni paasinnippatalu, malittarisassat malinneqartariaqarput. Angajoqqaat asannittuliornavianngillat meeqqamik pisassartik pissagaat sioorasaartuaraluarlugit iliuuseqartanngikkunik. Biibilimi ima allassimavoq: „Iluaatsuliorneq pillugu piaartumik eqqartuussineqanngikkaangat inuit uummataat ajortuliornissamut pilerissusermik ulikkaartarput.“ (Oqaluussisartup oqaasii 8:11) Soorunami imaassinnaavoq ataataasoq anaanaasorluunniit allat, assersuutigalugu meeqqap kammalaatai, najuutsillugit naveersinianngitsoq meeraq peqqusiileqileqqunagu. Meeqqalli toqqissisimanerulerlutillu angajoqqaaminnik asanninnerulerlutillu ataqqinninnerulertarput nalunngikkaangamikku ’angernerat’ aappimik isumaqartoq, ’naaggaarnerallu’ naaggamik isumaqartoq — pillarneqarnermik ilaqaraluarpataluunniit. — Matthæusi 5:37.

13, 14. Angajoqqaat meeqqaminnik ilinniartitsigaangamik Jehova qanoq ilaarsinnaavaat?

¹³ Naveersineq inussiarnernermut asanninnermullu ersiutaassappat meeqqap pisariaqartitaanut naleqqussartariaqarpoq. Pam ima oqaluttuarpoq: „Meeqqavut marluk perorsaatissinneqarneq eqqarsaatigalugu assigiinngitsupilussuarnik pisariaqartitaqarput. Aappaanut iluaqutaasut aappaanut iluaqutaaneq ajorput.“ Taassuma uia, Larry, ima nassuiaavoq: „Panipput angajulleq uteriittorujussuuvoq aatsaallu sakkortuumik naveerneqaraangami qisuariarpasittarluni. Panittali nukarliup aalajangersimarpaluttumik oqaluunneqalaaginnarnissani immaqaluunniit assuarinnippaluttumik qissimilaaginnarneqarnissani pisariaqartittarpaa.“ Aap, angajoqqaat asannittut meeqqamik tamarmik immikkut qanoq perorsaatissinneqarnissaat paasiniarlugu iliuuseqartarput.

¹⁴ Jehova angajoqqaanut maligassaalluarpoq, kiffamimi tamarmik immikkut nukittuffii sanngiissutaallu nalunngilai. (Hebræerit 4:13) Aamma Jehova pillaagaangami sukannerpallaarnanilu maleruutiavallaarneq ajorpoq. Innuttanili „naleqquttumik“  perorsaatissittarpai. (Jeremia 30:11, NV) Ilissi angajoqqaajususi meeqqassi nukittuffii sanngiissutaallu nalunngilisigit? Taakku pillugit ilisimasasi perorsaanissinni ajunngitsumik inussiarnersumillu atorsinnaavisigit? Taamaappat tamanna meeqqassinnik asanninnissinnut uppernarsaataavoq.

Meeqqatit ammasuullutillu unneqqarissuunissaannut ikiukkit

15, 16. Angajoqqaat qanoq ilillutik meeqqatik ammasuullutillu unneqqarissuunissaannut kajumissaarsinnaavaat, angajoqqaallu kristumiut ilaat iluaqutaasumik qanoq periaaseqarsimappat?

¹⁵ Asanninnermut tunngasoq alla tassaavoq asanninnerup ’iluaanneq nuannarisarinagu sallusuissummik tipaatsuutiginnittarnera’. (1 Korinthimiut 13:6) Angajoqqaat qanoq ilillutik meeqqatik eqqortunik ilumoortunillu nuannarinninnissamik ilinniartissinnaavaat? Qitornanik unneqqarillutik misigissutsiminnik oqaluuserinninnissamut kajumissaarinissaq pingaaruteqartupilussuuvoq, oqaatigisaat akueriuminaakkaluarpataluunniit. Soorunami angajoqqaat nuannaartarput qitornamik eqqarsaatitik misigissutsitillu najoqqutassianut naapertuilluartunut naapertuuttut oqaatigigaangatigik. Ilaannikkulli meeqqap unneqqarilluni oqaasii immaqa eqqunngitsulioqqajaasarneranik ersersitsisarput. (1 Mosesi 8:21) Taava angajoqqaat qanoq qisuariassappat? Isumaat siulleq immaqa tassaassaaq meeqqamik naqqissuinissaq tamakkuninnga eqqarsaateqarnerminik ersersitsimmat. Angajoqqaalli taamatut qisuariartarpata meeqqat angajoqqaamik tusarusutaannaasa oqaatiginissaat immaqa ilikkapallassavaat. Qitornat ataqqinninngippaluttumik oqaluppata soorunami ingerlaannaq naveertariaqarput, qitornanilli pissuserilluni qanoq oqaluttoqartarneranik ilinniartitsineq aamma qanorpiaq oqassanerannik peqqusineq assigiinngissuteqarput.

¹⁶ Angajoqqaat ilaqutariinni ammasumik attaveqaqatigiinnermik siuarsaaniarlutik qanoq iliuuseqarsinnaappat? Aleah, allaaserisap matuma aallaqqaataani eqqaaneqartoq, ima oqaluttuarpoq: „Meeqqat eqqissiunnaarutigisatsinnik oqaluttuukkaangatigut ingasattumik qisuariarnaveersaartaratta meeqqat ammallutillu unneqqarittarput.“ Ataataasoq Tomimik atilik ima oqarpoq: „Panipput kajumissaarparput isumaqatiginngikkaluaraangamitigulluunniit uagutsinnut ammasooqqullugu. Isumaqaratta oqalunnerani akornusertuartarutsigu eqqarsaqqaarnatalu piumasarput akueritinniartuartarutsigu nikalluinnassasoq sorpiaallu uummammiuginerlugit oqaluttuutinngitsoortassagaatigut. Tusarnaartaratsiguli aamma uagut tusarnaarusuttarpaatigut.“ Soorunami meeqqat angajoqqaatik naalattussaavaat. (Ussatit 6:20) Ammasumilli attaveqatigiinneq pissutigalugu angajoqqaat meeqqatik tunngavilersuisinnaanermik ineriartortitsinissamut ikiorsinnaavaat. Vincent, sisamanik qitornalik, ima oqarpoq: „Meeqqavut iliuutsit aalajangersimasut pitsaaqutaat ajoqutaallu pillugit oqaloqatigisarpavut taamaalillutik namminneq takusinnaaniassammassuk suna pitsaanerpaamik kinguneqassanersoq. Tamanna eqqarsarsinnaanerminnik ineriartortitsinissamut iluaqutigaat.“ — Ussatit 1:1-4.

17. Angajoqqaat suna qularissanngilaat?

¹⁷ Soorunami angajoqqaat arlaannaataluunniit najoqqutassiat Biibilimeersut meeqqanik perorsaanermi naammalluinnartumik atorsinnaanngilai. Taamaakkaluartorli qularissanngilarsi kamagittarlusi, inussiarnerlusi asannillusilu qitornasi ilinniartinniarlugit ilungersornisi qitornassi ilumut qujamasuutigissagaat. Aamma qularnanngilluinnarpoq Jehovap iliuuserisasi pillugit pilluaqqujumaaraasi. (Ussatit 3:33) Pingaarnerpaamik angajoqqaat kristumiuusut tamarmik kissaatigaat qitornatik namminneq Jehovamik asannitsiginermissulli asannitsigilernissaat. Angajoqqaat anguniagaq nersornangaartoq tamanna qanoq ilillutik angusinnaavaat? Allaaserisami tulliuttumi periaatsit aalajangersimasut sammineqassapput.

Eqqaamavigit?

• Angajoqqaat ilisimasaqarneq kamagittartuunissamut qanoq iluaqutigisinnaavaat?

• Asanninneq, inussiarnerneq perorsaatissiisarnerlu qanoq imminnut attuumassuteqarpat?

• Angajoqqaat meeqqallu ammasumik unneqqarissumillu attaveqatigiinnissaat sooq pingaaruteqartupilussuua?

[Atuaqqissaarnermi apeqqutit]

[Qupp. 15-mi assiliartaq]

Ilissi angajoqqaajususi meeraalluni qanoq innersoq eqqaamasinnaavisiuk?

[Qupp. 16-mi assiliartaq]

Meeqqasi ilissinnut ammasuullutillu unneqqarissuunissaannut kajumissaartarpisigit?