Meeqqasi Jehovamik asanninnissaannik ilinniartissigit

„Qarsutut sorsuttartup tigumiaasut ipput ernerit inuusutsilluni erniarisat.“ — TUSSIAAT 127:4.

1, 2. Meeqqat ’qarsutut sorsuttartup tigumiaasut innerat’ qanoq paasisariaqarpa?

PISERIARTARTOQ qarsoq eqqoriagassami tungaanut piseriunniarlugu piareersarpoq. Qarsoq pisissip noqartianut peqqissaarluni inissippaa nukinilu tamaasa atorlugit pisisseq qilullugu. Nukersornaraluartoq umeqqissaarnissaminut piffissaqarluarniarpoq. Taava piseriarpoq. Eqqoriakkani eqqussavaa? Assigiinngitsorpassuit apeqqutaassapput, ilaatigut piseriartartup pikkorissusia, anori qarsullu qanoq issusia.

² Kunngip Salomop meeqqat ’qarsumut sorsuttartup tigumiaanut’ assersuuppai. (Tussiaat 127:4) Assersuusiaq taanna qanoq atorneqarsinnaanersoq eqqarsaatigeriaruk. Piseriartartup qarsumik noqartimiititsinera sivikitsuinnaavoq. Eqqoriakkani eqqorniarlugu qarsoq iperapallattariaqarpaa. Taamatuttaaq angajoqqaat meeqqamik uummataanni Jehovamut asanninnermik piviusumik ineriartortitsinissamut sivikitsuinnarmik piffissaqarput. Ukiualuinnartut misiginartut kingorna meeqqat inersimasunngortarput nuuttarlutillu. (Matthæusi 19:5) Eqqoriagaq eqqussavaat — tassa namminiilerunik Guutimik asannittuassappat taassumunngalu kiffartortuarlutik? Assigiinngitsorpassuit apeqqutaapput. Pingaaruteqarnerpaat ilaat pingasut tassaapput angajoqqaat pikkorissusiat, avatangiisit meeqqap peroriartorfigisai, aamma ’qarsup’, meeqqap nammineq ilinniartinneqarnerminut periarnera. Taakkua ataasiakkaarlugit misissoriartigit. Siullermik angajoqqaat silatuut meeqqatik pillugit iliuuserisartagaat misissoqqissaassavavut.

Maligassiuilluartarput

3. Sooq angajoqqaat oqaaserisaat sulianik ilaqartariaqarpat?

³ Jiisusi oqaluussissutigisani malillugit inuunermigut angajoqqaanut maligassiuilluarpoq. (Johannesi 13:15) Aamma farisæerit oqaaserisatik malillugit inuunngitsut assuarai. (Matthæusi 23:3) Angajoqqaat meeqqatik Jehovamik asanninnissamut kajumissisissagunikkit oqaasii suliaallu imminnut naapertuuttariaqarput. Oqaatsit sulianik ilaqanngitsut pisissitut noqarteqanngitsutut iluaqutaanngitsigipput. — 1 Johannesi 3:18.

4. Angajoqqaat imminut qanoq aperisariaqarpat, aamma sooq?

⁴ Angajoqqaat maligassiuinerat sooq taama pingaaruteqartigaa? Soorlu inersimasut Jiisusip maligassiaanik qimerluuinermikkut Guutimik asanninneq ilinniarsinnaagaat, taamatuttaaq meeqqat Jehovamik asanninneq ilinniarsinnaavaat angajoqqaamik  maligassiaannik pitsaasunik malinninnermikkut. Inuit meeqqap ilagisartagai meeqqamik nakussatsitsisinnaallutilluunniit ’aseruutissiisinnaapput’. (1 Korinthimiut 15:33) Meeqqap inuunerata ilarujussuani, minnerunngitsumillu ukiuni pingaaruteqartuni meeqqap inuttut kinaassusiata pilersinneqarfiani, angajoqqaat meeqqamut qaninnerpaallutillu sunniuteqarnerpaapput. Taamaattumik angajoqqaat imminut ima aperisariaqarput: ’Qitornara qanoq sunnertarpara? Maligassiuinikkut meerara ileqqunik ajunngitsunik ineriartortitsinissaanut kajumissaarpara? Qinunermut Biibilimillu atuaqqissaarnermut pingaaruteqaqisunut tunngatillugu qanoq maligassiuivunga?’

Meeqqatik qinoqatigisarpaat

5. Meeqqat angajoqqaamik qinnutaat sumik ilinniarfigisinnaavaat?

⁵ Meeqqasi qinnutissinnut tusarnaarnermikkut Jehova pillugu assut ilikkagaqarsinnaapput. Guuti nerisassat pillugit qutsavigigaangassiuk Biibilimillu atuaqqissaarnermut atatillugu qinugaangassi qanoq isummersinnaappat? Qularnanngitsumik paasissavaat Jehovap timikkut pisariaqartitavut isumagisarai — tamannalu pillugu qutsavigisariaqarparput — aamma anersaakkut sallusuissutinik ilinniartittaraatigut. Tamakku ilikkarnissaat paasinissaallu pingaaruteqarpoq. — Jaaku 1:17.

6. Angajoqqaat qanoq ilillutik meeqqatik Jehovamit inuttut soqutigineqartutut misigilersissinnaavaat?

⁶ Nerilernermut aamma ilaqutariittut atuaqatigiinnermut tunngatillugu qinnutigisartakkassi saniatigut piffissani allanissaaq qinoqatigiittarussi qinoqatigiinnissinnilu taakkunani ilissinnut meeqqassinnullu tunngasunik immikkut eqqaasaqartarussi suli naammassisaqarnerusinnaavusi. Taamaalillusi meeqqasi misigitissavasi Jehova ilaqutariinnut ilaasoq, aamma tamassi immikkut isumassungaaraasi. (Efesosimiut 6:18; 1 Petrusi 5:6, 7) Ataataasoq ima oqaluttuarpoq: „Panipput inuummalli qinoqatigisarparput. Alliartortillugu apeqqutit soorlu ikinngutinik toqqaanissamut taassumalu pingaartitaanut allanut tunngasut qinugaangatta ilannguttarpavut. Katinniarluni nuunnissaata tungaanut ullut tamarluinnaasa qinoqatigisarparput.“ Aamma illit meeqqatit ullut tamaasa qinoqatigisarsinnaavigit? Meeqqatit Jehovamik, timikkut anersaakkullu pisariaqartitaannik isumaginniinnarani aammali misigissutsikkut pisariaqartitaannik arajutsisaqarneq ajortumik, ikinngutitut isiginnilernissaannut ikiorsinnaavigit? — Filippimiut 4:6, 7.

7. Angajoqqaat qinnutiminni immikkut erseqqissaasinnaajumallutik suna nalunngittariaqarpaat?

⁷ Qinnutissinni immikkut erseqqissaasinnaajumallusi soorunami meeqqassi inuuneranni susoqartarnersoq nalunngittariaqarparsi. Maluginiariaruk ataataasoq meeqqanik marlunnik perorsaasimasoq qanoq oqarnersoq: „Sapaatip-akunnerata naaneri tamaasa apeqqutit marluk imminut apeqqutigisarpakka: ’Sapaatip-akunnerani uani meeqqama suut sammineruaat? Aamma taakkua silarsuaanni ajunngitsunik sunik pisoqarpa?’“ Ilissi angajoqqaajususi taamatut imminut aperisarsinnaavisi apeqqutinullu taakkununnga akissutit ilaat meeqqasi qinoqatigigaangassigit qinnutissinnut ilannguttarlugit? Taamaaliortarussi Jehovamut — qinnutinik tusartartumut — qinunissamik ilinniartiinnarnagit taassuminnga asanninnissaannik ilinniartissavasi. — Tussiaat 65:3.

Atuaqqissaartarnermik ileqquliussinissamut kajumissaarisarput

8. Sooq angajoqqaat meeqqatik Guutip oqaasianik atuaqqissaartarnermik ileqquliussinissaannut ikiortariaqarpaat?

⁸ Angajoqqaat Biibilimik atuaqqissaartarnermut isiginnittaasiat qitornaasa Guutimut attaveqarnerannut qanoq sunniuteqarsinnaava? Ikinngutigiinneq ineriartorlunilu atajuarsinnaavoq aatsaat ikinngutigiit oqaloqatigiiginnarnatik aammali tusarnaartarpata. Jehovamut tusarnaariaatsitta ilaat tassaavoq Biibilimik atuaqqissaartarneq atuakkat atuagassiallu ’kiffap ilumoortup’ uagutsinnut tunniuttagai iluaqutigalugit. (Matthæusi 24:45-47; Ussatit 4:1, 2) Taamaattumik angajoqqaat meeqqatik Jehovamut ataavartumik qamanngalu pisumik attaveqarnermik ineriartortitsinissaannut ikiorumagunikkit Guutip oqaasianik atuaqqissaartarnermik ileqquliusseqqullugit kajumissaarisarnissaat pingaaruteqarpoq.

9. Meeqqat atuaqqissaartarnermik ileqquliussinissaannut qanoq ikiorneqarsinnaappat?

 ⁹ Meeqqat atuaqqissaartarnermik ileqquliussinissaannut qanoq ikiorneqarsinnaappat? Aamma matumani angajoqqaat maligassiuinermikkut ajunnginnerpaamik ilinniartitsisinnaapput. Meeqqassi aalajangersimasumik Biibilimik atuartusi namminerluunniit atuaqqissaartusi takusarpaasi? Qularnanngilaq meeqqassinnik isumassuineq ulapputigisupilussuugissi immaqalu aamma isumaliutigaarsi atuarnissamut atuaqqissaarnissamullu qanoq ilillusi piffissarsisinnaanersusi. Imminulli ima aperigit: ’Meeqqama fjernsynertuartunga takusarpaannga?’ Taamaappat, taava piffissap tamatuma ilaa nammineq atuaqqissaarnermut tunngatillugu taakkununnga maligassaalluarnissamut atorsinnaaviuk?

10, 11. Sooq angajoqqaat aalajangersimasumik ilaqutariittut atuaqqissaaqatigiittarnissaq isumagisariaqarpaat?

¹⁰ Aamma angajoqqaat meeqqatik Jehovamut tusarnaarnermik ilinniartissinnaavaat aalajangersimasumik ilaqutariittut atuaqqissaaqatigiittarnermikkut. (Esaja 30:21) Ilaalli immaqa ima eqqarsarput: ’Sooq meeqqat ilaqutariittut atuaqqissaaqatigiittarneq pisariaqartissavaat angajoqqaaminnit ilagiit ataatsimiinnerinut ilagineqartarunik?’ Tamatumunnga pissutissaalluartut arlaliupput. Jehovap pingaarnertut angajoqqaat meeqqaminnik ilinniartitsinissamik akisussaaffilerpai. (Ussatit 1:8; Efesosimiut 6:4) Aamma ilaqutariittut atuaqqissaaqatigiinnikkut meeqqat ilinniartarpaat Guutimik pallorfiginninneq tassaanngitsoq kikkut tamarmik takkuanni ileqqulersorneq, tassaasorli ilaqutariit ulluinnarni inuunerannut ilaasoq. — 5 Mosesi 6:6-9.

¹¹ Aammattaaq ilaqutariittut atuaqqissaaqatigiinneq pitsaasumik ingerlanneqartoq iluaqutigalugu angajoqqaat meeqqamik anersaakkut ittunut ileqqussanullu tunngasut pillugit qanoq eqqarsartarnerat paasisaqarfigisinnaavaat. Assersuutigalugu meeqqat mikineranni angajoqqaat atuagaq Biibilimik oqaluttuaatikka * atorsinnaavaat. Biibilimik atuaqqissaarummi tamatumani immikkoortuni tamangajanni angajoqqaat meeqqatik aperisinnaavaat paasisatik qanoq isumaqarfigineraat. Angajoqqaat allassimaffiit atuakkami eqqaaneqartut meeqqatillu oqaloqatigiissutigisarunikkit, immaqa meeqqat ikiorsinnaavaat paasinnissinnaassuserminnik ineriartortitsinissaannut ’ajunngitsumik ajortumillu immikkoortitsisinnaalersillugit’. — Hebræerit 5:14.

12. Angajoqqaat ilaqutariittut atuaqqissaaqatigiittarneq qanoq ilillutik meeqqat pisariaqartitaannut naleqqussarsinnaavaat, sunalu illit sunniuteqarluartutut isigaajuk?

¹² Meeqqat alliartortillugit atuaqqissaaqatigiinneq taakkua pisariaqartitaannut naleqqussartaruk. Maluginiariaruk aappariit qanoq ilillutik meeqqatik inuusuttuaqqat tunngavilersuitillugit paasitikkaat atuarfimmi festertunut peqataanissaq silatusaarnerussanersoq. Ataataasoq ima oqaluttuarpoq: „Meeqqavut oqarfigaavut tullianik ilaqutariittut atuaqqissaaqatigiilerutta  piffissap ilaa isiginnaartitsisuusaarnissamut atussallutigu nuliara uangalu meeraasuusaartugut panivut angajoqqaajusuusaartut. Meeqqat namminneq aalajangersinnaavaat kina arlartik ataataasuusaassanersoq anaanaasuusaassanersorluunniit, peqatigiillutilli sammineqartoq misissussavaat atuarfimmilu festerneq pillugu siunnersuissallutik.“ Isiginnaartitsisuusaarneq qanoq ingerlava? Ataataasoq ima nangippoq: „Panitta (angajoqqaajusuusaartut) akisussaassuseqarpalaassusiat tupaallaatigaarput uagut (meeraasuusaartut) atuarfimmi festeqataanissap silatusaarnerunnginneranut pissutaasut Biibilimeersut pillugit nassuiaakkamisigut. Maluginiagarput alla tassaavoq atuarfimmi festeqataanani sulerisoqarsinnaaneranik siunnersuuteqarnerat. Siunnersuutit taakku niviarsissat eqqarsartaasiat kissaataallu pillugit pingaarutilinnik paasisaqarfigaavut.“ Qularnanngilluinnarpoq maannakkut pisariaqartinneqartunik matussusiisumik ilaqutariittut atuaqqissaaqatigiittassagaanni qasusuinnissaq takorluuisinnaanissarlu pisariaqartut, atuaqqissaaqatigiittarniarlunili ilungersornerit asuliinnarnavianngillat. — Ussatit 23:15.

Avatangiisinik eqqissinartuutitsigit

13, 14. (a) Angajoqqaat qanoq ilillutik angerlarsimaffimmik eqqissinartuutitsisinnaappat? (b) Angajoqqaat kukkussutiminnik nassuerutiginninnerat qanoq kinguneqarluarsinnaava?

¹³ Qarsup eqqoriakkamut tunnissaa ilimanarnerussaaq piseriartartoq anoreqanngitsumi umerluariarluni piseriarpat. Taamatuttaaq meeqqat Jehovamik asannilernissaat ilimanarnerussaaq angajoqqaat angerlarsimaffimmik eqqissinartuutitsippata. Jaaku ima allappoq: „Iluarneq eqqissinermi siaruartikkat inerititaraat, eqqissisitsisullu pisassaraat.“ (Jaaku 3:18) Angajoqqaat qanoq ilillutik angerlarsimaffimmik eqqissinartuutitsisinnaappat? Aappariilluartuaannartariaqarput. Aappariit asaqatigiillutillu ataqqeqatigiittut meeqqatik allanik, aamma Jehovamik, asanninnissamik ataqqinninnissamillu ilinniartilluarnerusinnaavaat. (Galatiamiut 6:7; Efesosimiut 5:33) Asanninneq ataqqinninnerlu eqqissinermik siuarsaasarput. Aamma aappariit eqqisseqatigiittut ilaqutariinni isumaqatigiinngissutaalersinnaasunik aaqqiilluarnerusinnaapput.

¹⁴ Soorlu ullumikkut nunarsuarmi naammalluinnartunik aappareeqanngitsoq, taamatuttaaq soorunami aamma naammalluinnartunik ilaqutareeqanngilaq. Immaqa angajoqqaat ilaannikkut anersaap inerititai meeqqaminnut ersersinngitsoortarpaat. (Galatiamiut 5:22, 23) Taamatut pisoqaraangat angajoqqaat qanoq periartariaqarpat? Kukkusimanertik nassuerutigippassuk meeqqat angajoqqaaminnik ataqqinninnginnerulissappat? Apustilip Paulusip maligassiaa eqqarsaatigeriaruk. Taanna inuppassuarnut anersaakkut ataataavoq. (1 Korinthimiut 4:15) Unneqqarillunili kukkusarnini nassuerutigaa. (Romamiut 7:21-25) Maniguunnerali unneqqarinneralu pissutigalugit ataqqinnginnerulernagu ataqqinerulerparput. Kukkusaraluarluni Paulusip ilagiit Korinthimiittut isumalluarluni ima allaffigai: „Assiginiarsinga soorlu uanga  Kristusi assiginiariga.“ (1 Korinthimiut 11:1) Illittaaq kukkussutitit nassuerutigisarukkit qularnanngitsumik meeqqavit sanngiissutitit pillugit isumakkeerfigissavaatsit.

15, 16. Sooq angajoqqaat meeqqatik qatanngutiminnik kristumiunik asanninnissamik ilinniartittariaqarpaat, qanorlu ililluni taamaaliortoqarsinnaava?

¹⁵ Angajoqqaat avatangiisit meeqqamik Jehovamik asanninnermik ineriartortitsiffigisinnaasaat pilersinniarlugit sunik allanik iliuuseqarsinnaappat? Apustili Johannesi ima allappoq: „Ima oqartoq: ’Guuti asavara,’ qatanngunnili uumigalugu, taanna sallutuujuvoq; qatanngunnimi takusimasani asanngikkuniuk Guuti takusimanngisani asasinnaanngilaa.“ (1 Johannesi 4:20, 21) Ilissi meeqqasi qatanngutiminnik kristumiunik asanninnissaannik ilinniartikkussigit taamaalillusi Guutimik asanninnissaanik ilinniartissavasi. Angajoqqaat silatusaassapput imminut ima aperigunik: ’Ilagiit pillugit oqaloqatigiittarnivut ineriartornarpaluppat imaluunniit isornartorsiuerpalaarpat?’ Tamanna qanoq ilillusi paasisinnaavisiuk? Meeqqassi ataatsimiinnerit ilagiinnullu ilaasortaasut qanoq eqqartortarneraat tusaaniaqqissaarsiuk. Qularnanngitsumik taakkua oqaaserisaat ilissi eqqarsaatissinnik ersersitsissapput.

¹⁶ Angajoqqaat meeqqatik anersaakkut qatanngutiminnik asannilernissaannut ikiorniarlugit qanoq iliorsinnaappat? Peter, nukappissanut inuusuttuaqqanut marlunnut ataataasoq, ima oqarpoq: „Nukappiaqqat mikisuusulli qatanngutinik angutinik arnanillu anersaakkut inersimalluartunik neriartoqqusisarpugut nuannisaaqatigilaarniassagatsigit, nuannisaartaqaagullu. Ernivut peroriartornertik tamaat Jehovamik asannittunik qanitaqarput, tamannalu Guutimut kiffartornerup nuanningaartuuneranik paasinninnissamut iluaqutigaat.“ Dennis, tallimanik panilik, ima oqarpoq: „Panivut kajumissaartarpavut pionerit utoqqaat ilagiinniittut ikinngutigileqqullugit, periarfissallu tamaasa nakkutilliisut angalasartut nuliaallu inoroorsaarfigisarpavut.“ Aamma illit meeqqatit ilagiinnik ilissi ilaqutassinnut ilaasutut isiginnilernissaannut ikiorniarlugit siulliullutit iliuuseqarsinnaavit? — Markusi 10:29, 30.

Meeqqap nammineq akisussaaffia

17. Meeqqat naggataatigut namminneq suna aalajangertussaavaat?

¹⁷ Piseriartartumik assersuusiaq sammeqqilaariartigu. Piseriartartup piseriallaqqissuugaluarluni eqqoriakkani eqqorsinnaanaviarunanngilaa qarsoq piseriussani najunngarsimappat. Soorunami angajoqqaat qitornap eqqarsartaasianik kukkusumik naqqiiniarnermikkut qarsoq najunngarsimasoq narlortinniarlugulusooq sapinngisartik tamaat iliuuseqassapput. Naggataatigulli meeqqat namminneq aalajangertussaapput silarsuarmit matumannga najunngartinneqarniarnerlutik, imaluunniit Jehovamit ilusilersortinniarnerlutik ’ingerlavissatillu taassumunnga nalimmatsertinniarnerlugit’. — Ussatit 3:5, 6; Romamiut 12:2.

18. Meeqqap aalajangigaa allanut qanoq sunniuteqarsinnaava?

¹⁸ „Jehovap ileqqoreqqusai oqaaqqissaarutaalu malillugit“ (NV) qitornanik perorsaanissaq angajoqqaanut akisussaaffiuvoq angisooq, naggataatigulli meeqqap inersimasunngoruni inuttut qanoq ittuunissani nammineq aalajangertussaavaa. (Efesosimiut 6:4) Taamaattumik ilissi meeqqat imminut ima aperisariaqarpusi: ’Angajoqqaama asannittumik uannik perorsaanerat akueriumavara?’ Akuerigussiuk inooriaaseq pitsaanerpaaq qinissavarsi. Angajoqqaasi pilluartittupilussuussavasi. Pingaarnerpaamillu, Jehovap uummataa nuannaartissavarsi. — Ussatit 27:11. (wE 9/1 07)

[Quppernerup ataani ilanngussaq]

Eqqaamavigit?

• Angajoqqaat qinuneq Biibilimillu atuaqqissaarneq eqqarsaatigalugit qanoq maligassiuilluarsinnaappat?

• Angajoqqaat qanoq ilillutik angerlarsimaffimmik eqqissinartuutitsisinnaappat?

• Meeqqat sumik aalajangigassaqarpat, aalajangigaallu allanut qanoq sunniuteqassava?

[Atuaqqissaarnermi apeqqutit]

[Qupp. 20-mi assiliartaq]

Nammineq atuaqqissaarnermut tunngatillugu meeqqannut maligassaalluarpit?

[Qupp. 21-mi assiliartaq]

Ilaqutariinni avatangiisit eqqissinartut nuannaalersitseqataasarput