Aappariit isumaqatigiikkunnaaraangata

KIALUUNNIIT uiusup nuliaasulluunniit isumatuup aappariittut akerleriinnerit nuannarinavianngilai, taamaakkaluartorli nalinginnaavallaarpoq. Tamatigungajak aappaasup aapparmi uumigisaanik oqaaseqarneratigut tamanna pisarpoq. Nipituumik oqalulertarput, kamaammertarput, taavalu oqaatsinik annernartunik assortuunneq aallartittarpoq. Tamatuma kingunerisarpaa nipaanneq tujorminartoq aappariit uteriillutik imminnut oqaloqatigiikkumajunnaarnerat. Piffissap ingerlanerani kamappallaarunnaartarput, aappariit imminnut utoqqatserfigisarput eqqisseqatigeeqqilerlutillu — tullissaanik isumaqatigiinngittoqalernissaata tungaannaanut.

Aappariit akornanni aaqqiagiinngissuteqartarnerit fjernsynikkut aallakaatittakkatigut quiassuaatitigullu naaffeqanngiusartutigut sammineqartarput, piviusumilli tamanna quiananngilluinnarpoq. Ussat Biibilimeersoq imaappoq: „Eqqarsariaqqaarnani oqaaserisat panatut kapisisarput.“ (Ussatit 12:18) Aap, sukannersumik oqalunnerit misigissutsitigut ikeqalersitsisinnaapput oqqannerup qaangiutereernerata kingunerujussuatigut aatsaat katassinnaasunik. Oqqannerit allaat nakuusernermik kinguneqarsinnaapput. — 2 Mosesi  21:18.

Naammalluinnanngissuserput pissutigalugu ilaatigut aappariinni ajornartorsiuteqalertarneq soorunami pinngitsoorsinnaanngilarput. (1 Mosesi 3:16; 1 Korinthimiut 7:28) Taamaakkaluartorli oqqateqqajaanerit akulikitsut sakkortuullu taamaattussaannartut isigineqartariaqanngikkaluarput. Ilisimatuut maluginiarsimavaat aappariit oqqattarneq ileqqorilersimappassuk avinnermik kinguneqarnissaa ilimanarnerulertartoq. Taamaattumik pingaaruteqarpoq aappariit marluullutik isumaqatigiinngissutaasut eqqissisimasumik aaqqinniartarnissaat ilinniarunikku.

Imminut misissoqqissaarit

Aappariinnissinni oqqattarnernik nanertuuteqarussi, taava paasiniariarsiuk isumaqatigiinngissuteqarnissinni ileqquliussaqarsimanersusi. Assersuutigalugu aappallu isumaqatigiinngissuteqaraangassi susoqartarpa? Oqqanneq sakkortusigaluttuinnartarpa, ajuallannartunik pisuuteqattaannermillu kinguneqartarluni? Taamaattoqarpat, taava qanoq iliorsinnaavit?

Siullermik imminut unneqqariffigisariaqarputit paasiniarlugulu illit arlaatigut pisooqataanersutit. Kamajasuuit? Oqallikkumatuujuit? Aapparpit akissutissagaluarunisit qanoq akissagaluarpa? Apeqqut kingulleq eqqarsaatigeqqissaassallugu pingaaruteqarpoq, illimmi aappallu immaqa oqallikkusussuseqarnermut tunngatillugu assigiinngitsunik paasinnittaaseqarpusi.

Assersuutigalugu oqariarta aappat tunuarsimaalaartuusoq, akerlianilli illit oqaaseqarniaraangavit ammasuusutit sakkortuumillu periaaseqarlutit. Immaqa ima oqarputit: „Uanga peroriartortillunga ilaquttatsinni tamatta taamatut oqaluttarpugut. Oqqannerunngilluinnarpoq!“ Immaqami illit isinni taamaakkaluarpoq. Kisianni imaassinnaavoq ammasumik unneqqarissumillu oqalunnertut isigisat aappannut annernartuusoq isumaqartilerlugulu oqqakkusuttutit. Illit aappallu assigiinngitsunik oqaloqatigeeriaaseqarnersi paasisimagukku paatsooqatigiinnerit pinaveersaartinnissaannut iluaqutaasinnaavoq.

Eqqaamajuttaaq oqqanneq tamatigut isumaqartariaqanngimmat immissinnut nilliaffigissasusi. Paulusi kristumiunut ima allappoq: „Nipiliornerit mitalliinerillu . . . eqqaasassanngilasiluunniit.“ (Efesosimiut 4:31) „Nipiliornerit“ isumaqartinneqarpoq nipitunerusumik oqalulerneq, kisiannili „mitalliineq“ oqaaserineqartup imarisaanut tunngatinneqarluni. Tassunga tunngatillugu allaat oqaatsit isussulluni oqaatigineqartut aapparmut kamassaarutaallutilluunniit nikanarsaataappata  oqqannertut oqaatigineqarsinnaapput.

Siuliani pineqartut eqqarsaatigiitigalugit illit aappallu isumaqatigiinngissutissinnik qanoq aaqqiiniartarnerit immaqa eqqarsaatigeqqissinnaavat. Oqallikkumatuujuit? Paaseriikkatsitut aapparpit qanoq paasinnittaaseqarneranit akissutissaa annerusumik aalajangiisuuvoq. Aappat misikkarissuusoriinnarnagu aapparpit isiginnittaasiatut imminut qiviariassasutit pisariaqartunillu allannguillutit. Paulusi ima allappoq: „Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.“ — 1 Korinthimiut 10:24.

„Sianiginiarsiuk qanoq tusartusi“

Isumaqatigiinngissutit allatut iluarsineqarsinnaanerat Jiisusip oqaatsimini ima eqqaavaa: „Sianiginiarsiuk qanoq tusartusi.“ (Lukasi 8:18) Jiisusip tassani aappariinnermi attaveqatigiinneq pinngikkaluarpaa. Taamaakkaluartoq najoqqutassaq tamatumunnga atorneqarsinnaavoq. Aappat oqalutsillugu qanoq tusarnaallaqqitsigivit? Ilumullimi tusarnaartarpit? Imaluunniit maangaannaq kipitittarpiuk ajornartorsiummullu paaseqqissaanngisannut aaqqiissutissamik siunnersuuteqapallattarlutit? Biibilimi allassimavoq: „Oqaaserineqartut naalaarluaqqaarnagit akissuteqarneq sianiitsorpallanneruvoq kanngunarsaataallunilu.“ (Ussatit 18:13) Illit aappallu isumaqatigiikkunnaassagaluarussi oqaloqatigiissutigisariaqarparsi immissinnullu tusarnaarluaqqissaarlusi.

Aapparpit isiginnittiaasia soqutaanngitsutut isigiinnarnagu misiginneqataaniariassasutit. (1 Petrusi 3:8) Oqaaseq grækerisut tunngaviusumik atorneqartoq „misiginneqataaneq“ isumaqartinneqarpoq inoqammut allamut misiginneqatiginninneq imaluunniit naallioqatiginninneq, tassa „naakkiginninneq“. Aappat arlaannik aliasuuteqarpat illittaaq taamaaqatigisariaqaraluarpat. Sapinngisat tamaat pisoq aapparpit tungaaniit isiginiarsariuk.

Guutimik mianerinnittoq Iisaaq taamaaliorsimavoq. Biibilimi oqaluttuarineqarpoq nuliata, Rebekkap, ilaqutariinni ajornartorsiutertik ernerminut Jaakumut tunngassuteqartoq isumakuluutigisimaqigaa. „Hittikkut arnartaat pissutaallutik inuunera uannut avaanngunarsilerpoq!“ Iisaamut oqarpoq. „Taamaattumik aamma Jaaku Hittikkut maanimiut paniisa ilaannik nuliartaaraluarpat taava toquinnaruma pitsaanerussaaq.“ — 1 Mosesi 27:46.

Rebekka aarlerinini pissutigalugu sakkortuumik qisuariarsimassaaq. Ilumut misigisimanerpa inuuneq avaanngunartuusoq? Ernermi Hittikkut paniisa ilaannit katinnissaaninngarnit toquinnarusunnerua? Tamanna ilimananngilaq. Taamaakkaluartoq Iisaap Rebekkap misigissusai soqutiginngitsuusaanngilai. Akerlianilli Rebekkap pissutissaqarluarluni isumakuluuteqarnera paasisinnaavaa, tamatumalu kinguneranik ajornartorsiutip iluarsineqarnissaanut pisariaqartunik iliuuseqarpoq. (1 Mosesi 28:1) Immaqa tulliani aappat arlaannik isumakuluuteqalerpat taamatorluinnaq iliorsinnaavutit. Soqutaanngitsutut isigiinnarnagu aappat tusarnaaruk, isiginnittaasia ataqqiuk asannippaluttumillu qisuariarit.

Tusarnaarsinnaanerup paasinnissinnaanerullu pingaaruteqassusiat

Ussat Biibilimeersoq ima allassimavoq: „Inuk silatussusiata kamajaatsunngortittarpaa.“ (Ussatit 19:11) Sakkortuumik assortuuttoqartillugu aapparisaq oqaatsinik annernartunik oqaaseqartillugu kamaqqajaanartarpoq. Tamannali oqqannermik ajornerulersitsiinnartarpoq. Aappat tusarnaartillugu oqaatsit oqaaserineqartut kisiisa  tusaaniaannarnagit aalajangiusimajuk, misigissutsittaaq tunuatungaaniittut tusaaniarnissaat. Siuneqassuseq imaluunniit paasinninneq taamaattoq kamannarisavit maluginiarpallaannginnissaanut iluaqutigissavat, ajornartorsiutilli aallaaviusup isiginiarnerunissaanut.

Takorluulaariaruk nuliavit ima oqarfigigaatit: „Piffissaqarfiginngisaannarparma!“ Immaqa uumitsallutit uparuaaneq ilumuunnginnerassavat pisimasunik ilallugu oqarlutit: „Qaammatip siuliani ilagaakkit — ulloq naallugu!“ Tusarnaarluartuuguilli paasissagaluarpat nuliavit akunnerit minutsillu pinngikkai. Imaassinnaavorli sumiginnagaasutut asaneqanngitsutullu misigigami illit asanninnerit qulakkeerusukkaa.

Nuliaasutut takorluulaariaruk pisiarisimasat pillugu uiit isumakululluni oqartoq. „Sooq aningaasanik taama amerlatigisunik atuigavit?“ upperinnippalunnani aperivoq. Immaqa siullermik imminut illersorniarlutit ilaqutariit aningaasaqarniarnerat pillugu ilumoortunik oqaluttuuppat — immaqaluunniit pisiatit uivit pisiarisimasaanut naleqqiuppatit. Uivilli taamatut qisuariarneranut pissutaasoq paasigukku paasissavat koruunit ørillu pinngikkai. Immaqa annertuumik pisiniarnermi siunersiorneqannginnini ernumassutigiinnarpaa.

Soorunami aappariinniit aappariinnut qanoq annertutigisumik peqatigiittassanerat qanorlu annertutigisunik niuerniarnissaminnut isumaqatigiittarnerat assigiinngillat. Pingaaruteqartorli unaavoq isumaqatigiinngittoqartillugu paasinnissinnaanerup kamanneq unitsilluguluunniit qasukkartissinnaammagu taamaalilluni sunarpiaq pineqarnersoq takuneqarsinnaatilerlugu. Eqqarsaqqaarani oqaaseqarnermit pitsaaneruvoq Biibilimi allaqataasup Jaakup kaammattuutaa malissallugu tassa ’tusarasuartuulluni, oqalukkumaataartuulluni kamajaatsuullunilu’. — Jaaku 1:19.

Eqqaamajuk aappat oqaloqatigigaangakku qanoq oqalunnerit pingaaruteqarmat. Biibilimi allassimavoq ’ilisimasup oqaa katsorsaataasartoq’. (Ussatit 12:18) Isumaqatigiinngitsillusi, oqaatsitit annernartuuppat imaluunniit katsorsaataappat? Akornassinni qarmatut ittumik pilersitsisarpat imaluunniit saammaateqatigiinnissamik aqqutissiuisuuppat? Eqqaaneqareersutut kamaammeraanni taamaaqataanillu akigaanni oqqanneq kamannerulersitsiinnartarpoq. — Ussatit 29:22.

Isumaqatigiinnginneq akerartuulluni oqqannermik kinguneqarpat, ajornartorsiutiviusoq ilungersorluni paasiniarneqartariaqarpoq. Inuttaa pinnagu ajornartorsiummut pissutaasoq isiginiaruk. Eqqortuusoq soqutigiuk kina eqqortumik oqalunnersoq pinnagu. Oqaatsitit atorlugit ikummarissaammik innermut igitsinnginnissat mianersuuguk.  Biibilimi allassimavoq: ”Oqaatsilli ajuallannartut uumitsatsitsisarput.” (Ussatit 15:1) Aap, oqaatsitit, minnerunngitsumillu qanoq nipeqarlutit, oqarnerit aalajangiisuupput illit aappallu suleqatigiillusi ajornartorsiutissinnik aaqqiiniarnissassinnut.

Ajornartorsiutip aaqqinneqarnissaa siunertaavoq — oqallinnermut ajugaaniarnani

Isumaqatigiinngittoqaleraangat, oqallinnermut ajugaaniunnerunani, ajornartorsiutip aaqqinneqarnissaa siunertaavoq. Qanoq taamaaliortoqarsinnaava? Pitsaanerpaavoq Biibili qanoq siunnersuuteqarnersoq paasiniaraanni maleruarlugulu. Tamanna ingammik uiusup pisussaaffigaa. Apeqqummut ajornartorsiummulluunniit saqitsaassutaalersumut qanoq isumaqarnerit oqaaseqarfigipallannagu, soormi Jehovap isiginnittaasianit isigigukku? Qinnuvigiuk, eqqissinerlu Guutimit pisoq uummatissinnut eqqarsaatissinnullu sernissuisuusussaq piumallugu. (Efesosimiut 6:18; Filippimiut 4:6, 7) Ilungersorlutit nammineq iluaqutissat kisiat pinnagu aapparpit aamma iluaqutissaa isumagiuk. — Filippimiut 2:4.

Eqqarsaatit iliuutsillu misigissutsitigut ajuallassimanermit kamannermillu aqunneqaleraangata pissutsinik ajornerulersitsigajuttarput. Akerlianilli siunnersuutit Guutip oqaasianeersut maleruarlugit allannguerusussuseqarutta eqqissineq isumaqatigiinnerlu angusinnaavagut, Jehovallu najussavaatigut. (2 Korinthimiut 13:11) Taamaattumik ’ilisimassusermit pavannga pisumit’ siulersortittariaqarpugut pissutsillu Guutimik mianerinninnermik ersersitsisut ileqquliullugit. Taamaalilluta takusinnaalissavarput eqqissisitsiniartuuneq’ (NV) qanoq uagutsinnut iluaqutaatigisoq. — Jaaku 3:17, 18.

Inuttut kissaatigisavut tunulliuttariaqaraluarutsigilluunniit inuit tamarmik isumaqatigiinngittarnerit eqqissisimasumik aaqqinniartarnissaat ilikkarniartariaqarpaat. (1 Korinthimiut 6:7) Paulusip kajumissaarutaa malikkutsigu uagutsinnut iluaqutaassaaq: „Iperassavasi: Kamanneq, puffajaneq, ajussuseq, mitaatilliineq kanngunartunillu oqalunneq . . . tassami inutoqaq iperarsimavarsi iliuusai ilanngullugit, atisimallugulu nutaaq [Inuttut pissusitoqqasi ileqqui ilanngullugit peerniarsigik, atiniarsiullu inuttut pissuseq nutaaq, NV].“ — Kolossemiut 3:8-10.

Soorunami pinngitsoorneqarsinnaanngilaq peqqissimissutigisinnaasannik oqartoorsinnaagavit. (Jaaku 3:8) Taamaattoqartillugu, taava aappannut utoqqatserit imminullu sulissutigiuarlutit. Piffissap ingerlanerani takusinnaalissavarsi ajornartorsiutisi aaqqikkuminarnerulersut. (wE 6/1 05)

[Qupp. 14-mi ungalusaq/​assiliartaq]

Alloriarnerit pingasut assortuunnermik pinngitsoortitsisinnaasut

• Aappat tusarnaaruk. Ussatit 10:19

• Isiginnittaasia ataqqiuk. Filippimiut 2:4

• Asannittumik periaaseqarit. 1 Korinthimiut 13:4-7

[Qupp. 15-mi ungalusaq/​assiliartaq]

Massakkut iliuuserisinnaasasi

Apeqqutit ataani allassimasut aappannut apeqqutigikkit akissutaalu tusarnaakkit nipangersinnagu. Kingornalu paarlaatissaasi.

• Oqallikkumatuujuvunga?

• Misigissutsitit oqaatigigaangakkit tusarnaartarpunga, imaluunniit suli oqaluttutit eqqarsaqqaarnanga akisarpunga?

• Oqaluukkaangakkit misigittaappaluttumik kamappaluttumillu nipeqartarpunga?

• Tamatta immikkut oqaloqatigiillaqqinnerulerniarluta qanoq iliorsinnaavugut — pingaartumik isumaqatigiinngikkaangatta?

[Qupp. 13-mi assiliartaq]

Tusarnaartarpit?

[Qupp. 14-mi assiliartaq]

„Soqutigineqanngitsutut asaneqanngitsutullu misigaanga“

[Qupp. 14-mi assiliartaq]

„Piffissaqarfiginngisaannarparma!“

[Qupp. 14-mi assiliartaq]

„Qaammatip siuliani ilagaakkit — ulloq naallugu!“