Guutip oqaasianit nakussatsinneqartarpit?

UNAMMINIARNARTUNIK nalaataqaraangavit qanoq iliortarpit? Jiisusi Saatanip unammillerneranut akiuussinnaajumalluni allassimaffinnik aalajangersimasunik eqqaasaqartarpoq. (Matthæusi 4:1-11) Kunngi Daavi aamma misilinneqarami Guutip oqaasianit nakussatsinneqarpoq, oqarami: „Eqqarsaatima eqqissiviilliortileraangannga tuppallersaanerpit nuannaalersittarpaanga.“ — Tussiaat 94:19.

Allassimaffimmik nuannarisatsinnik eqqarsaatiginninnikkut atukkavut artornartut anigornissaannut tamatumunnga assingusumik tuppallersarneqarsinnaallutalu nakussatsinneqarsinnaavugut. Rex 89-inik ukiulik, 1931-miilli piffissaq tamaat oqaluussisartuuvoq, taamaattorli oqarpoq: „Immikkut ittumik suliassinneqaraangama sapiuttutut misigigajuttarpunga.“ Unamminiarnartut taamaattut qanoq ililluni anigorpai? „Allassimaffik nuannarinerpaasara Ussatit 3:5-imiittoq eqqaasarpara: ’[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu!’ Allassimaffik taanna eqqaamallugulu malikkaangakku, suliama ajunngitsumik naammassinissaanut iluaqutigisarpara.“

Allaat meeqqat allassimaffimmik nuannarisaqarneq iluaqutigisinnaavaat. Jack arfinilinnik ukiulik oqarpoq allassimaffik Matthæusi 24:14 nuannarinerpaasaralugu. Allassimaffiup angajoqqaani ilagalugit oqaluusseqataanissaminut kajumilersittarpaa. „Arfininngornerit tamaasa angajoqqaakka aleqaralu ilagalugit oqaluussineq nuannareqaara,“ oqarpoq.

Jiisusitut ilaanni uppernikkut misilinneqartarpit? Taamaappat immaqa allassimaffik Filippimiut 4:13 nuannarinerpaasavit ilagilersinnaavaa. Kunngi Daavitut „eqqarsaatinnit eqqissiviilliortinneqartarpit“? Immaqa taava Filippimiut 4:6, 7-imi allassimasut eqqarsaatigalugit iluaqutigisinnaassavatit. Guutimut kiffartornerit ilaannikkut asuliinnaanersoq isumakuluutigisarpiuk? Taava Korinthimiunut allakkat siulliit 15:58-imi allassimasup nukissaqalersissavaatit.

Allassimaffiit assigiinngitsut alanngaarlugit ilinniarnerisigut Guutip oqaasia inuunitsinni sunniuteqartissavarput. (Hebræerit 4:12) Allassimaffiit nuannarisatta taamaattut nakussatsissinnaallutalu tuppallersarsinnaavaatigut. — Romamiut 15:4 (wE 5/1 04)