Guutip piumasaa siunertaalu inuuninni pingaarnerpaatikkit

„[Kristusip] tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.“ — 2 KORINTHIMIUT 5:15.

1. Ajoqersuiartortitap angalaarfigisartakkamini misigisai oqaluttuarikkit.

AJOQERSUIARTORTITAQ Aaronimik atilik * ima oqaluttuarpoq: „Innuttaasut akornanni sorsuuttoqarnerata kingorna biilerput sakkutuujunngitsut biiliisa Afrikami nunaqarfimmut ungasissumiittumut takkuttut siullersaraat. Ilagiit ikittunnguanik ilaasortallit nunaqarfimmi tassaniittut attaveqarfigisinnaasimanngilavut qatanngutillu pisariaqartitaat isumaginiarlugit iliuuseqartariaqarluta. Nerisassat, atisat atuakkat atuagassiallu Biibililersaarutit saniatigut videofilmi Jehovas Vidner og deres organisation nassarparput. * Soqutiginnittut nunaqarfiup ’filmertarfianukaasut’ — ivinnik illuliaasumut videonik isiginnaaruteqarlunilu tv-limmukaasut — amerlangaarmata filmi marloriarluta takutittariaqarparput. Takutitsinerni taakkunani marlunni atuaqqissaaqatigineqartalersorpassuupput. Qularnanngilluinnarpoq ilungersornitta asuliinnannginnerat.“

2. (a) Sooq kristumiut inuunermik Guutimut kiffartornermi atornissaat aalajangiusimavaat? (b) Apeqqutit suut maanna sammissavavut?

² Sooruna Aaronip ilaasalu suliassaq taama ilungersornartigisoq suliarerusukkaat? Jiisusi Kristusip utertitsissutitut pilliutaa qujamasuutigalugu Guutimut tunniulluinnarsimagamik inuunertillu taassuma piumasaanut siunertaanullu naapertuuttumik atorusukkamikku. Kristumiut tamarmik tamatumunnga assingusumik aalajangersimapput ’imminnik pillutik inuujunnaarniarlutik’ „nutaarsiassarlu nuannersoq pillugu“ (NV) sapinngisartik tamaat iliuuseqarniarlutik. (2 Korinthimiut 5:15; 1 Korinthimiut 9:23) Nalunngilaat pissutsit aaqqissuussaanerat manna atorunnaarpat aningaasat inissisimaffiillu silarsuarmiittut tamarmik naleerutissasut. Inuunertik qujamasuutigalugu inuunertik nukitillu Guutip siunertaanut naapertuuttumik atorusuppaat. (Oqaluussisartup oqaasii 12:1) Tamatta immikkut qanoq ililluta taamaaliorsinnaavugut? Taamaaliornissatsinnut qanoq ililluta sapiissuseqalerlutalu nukissaqalersinnaavugut? Kiffartornissamullu sunik periarfissaqarpugut?

Silatusaarit aalajangersimallutillu iliuuseqarlutit

3. Iliuuserineqartussat tunngaviusut suut Guutip piumasaatut iliornermut ilaappat?

³ Guutip piumasaatut iliornissaq kristumiunut ilumoortunut inuuneq naallugu suliassaavoq. Amerlanertigut aallartissutigineqartarput iliuuserineqartussat tunngaviusut, soorlu ullut tamaasa Biibilimik atuarneq, Teokratiimik Ilinniarfimmut ilanngunneq, oqaluusseqataaneq kuisinnissamullu piukkunnarsarneq. Siumukartilluta apustilip Paulusip oqaasii ukua eqqarsaatigisarpavut: „Tamakku tamaasa isumaginiakkit inuuseralugillu ineriartornerit tamanit takuneqarsinnaaqqullugu.“ (1 Timotheusi 4:15) Taamatut ineriartorneq malugeqqusaarnerunngilaq; namminissarsioratali Guutip piumasaatut iliornissamik aalajangiusimanninnitsinnut ersiutaavoq. Siunnerfik tamanna malillugu iliorutta, tamanna inuunermi sutigut tamatigut Guutimut siulersortittarnitsinnut ersiutaassaaq, uagullu siulersuisinnaanitsinninngarnit taassuma siulersorluarnerungaartarpaatigut. — Tussiaat 32:8.

4. Qanoq ililluta pisariaqanngitsumik isumakulukkunnaarsinnaavugut?

⁴ Isumakuluppallaaraanni imaluunniit imminut eqqarsaatigivallaartaraanni, tamanna Guutimut kiffartornermi siumukarnissamut akornutaasinnaavoq. (Oqaluussisartup oqaasii 11:4) Taamaattumik Guutimut kiffartorneq allallu iluaqutissaannik iliuuseqarneq piviusumik nuannaarutigissagutsigit taamatut isumakuluuteqarneq nangaassuteqarnerlu ajugaaffigisariaqarpavut. Assersuutigalugu qatanngutip Erikimik atillip ilagiinni allanik oqaasilinni  kiffartornissani isumaliutigaa. Isumakuluuterpassuaqarporli: ’Ilagiinnut naleqqutissanerlunga? Qatanngutit nuannarissavakka? Nuannarissavaannga?’ Ima oqaluttuarpoq: „Naggataatigut nassuerutigaara imminut eqqarsaatiginerunanga qatanngutit eqqarsaatiginerusariaqarlugit. Aalajangerpunga tamakkua isumakuluutigiunnaarniarlugit sapinngisannillu allanut iluaqutaasumik iliuuseqaannarniarlunga. Jehova ikioqqullunga qinnuigaara pilersaarutikkalu iliuuseralugit. Maanna ilagiinni taakkunani kiffartornera assorsuaq nuannaraara.“ (Romamiut 4:20) Aap, namminissarsiorata Guutimut kiffartornerujartortilluta allallu iluaqutissaannut iliuuseqarnerujartortilluta nuannaarneruleraluttuinnassallutalu nalerisimaarneruleraluttuinnassaagut.

5. Sooq Guutip piumasaatut iliorsinnaassagutta siumut isigisuunissaq pisariaqarpa? Assersuuteqarit.

⁵ Guutip piumasaa siunertaalu inuunitsinni pingaarnerpaajussappata siumut isigisuunissaq aamma pisariaqarpoq. Pissutsit aaqqissuussaanerannut matumunnga inussiaatinngussutigisinnaasatsinnik Guutimullu kiffartornitsinni kiffaanngissutsitsinnik killiliisinnaasumik silatusaarluta akiitsoqalernaveersaarpugut. Biibilimi eqqaasinneqarpugut ’taarsigassarsialik taarsigassarsisitsisumut inussiaataalersartoq’. (Ussatit 22:7) Jehovamik tatiginninnerput anersaakkullu ittunik salliutitsinerput eqqortumik isiginnittaaseqarnissatsinnut toraakkatsinnillu aalajangiusimanninnissamut iluaqutigaarput. Assersuutigalugu Guomingip taassumalu aleqaata najaatalu anaanartik najugaqatigaat sumiiffimmi ineqarnermut akiligassat qaffasissorujussuuffianni aamma aalajangersimasumik suliffittaarnissap ajornakusoorsinnaaffiani. Atorluaasarnermikkut tamarmiullutillu aningaasartuutinik akileeqataasarnermikkut pisariaqartitatik pisarpaat — allaat ulluni pissaaleqiffiusuni. Guoming ima oqaluttuarpoq: „Ilaannikkut arlarput suliffeeruttarpoq, taamaakkaluartorli anaanarput isumassorluaatigalugu pioneritut kiffartornerput ingerlatiinnarsinnaavarput. Qujamasuutigaarput anaanatta kissaatiginngimmagu piisaarluni inuuniassagami anersaakkut sammisassat asoorutissagivut.“ — 2 Korinthimiut 12:14; Hebræerit 13:5.

6. Oqaluttuap suup ersersippaa inuunerput qanoq ililluta Guutip piumasaanut siunertaanullu naapertuutilersissinnaagipput?

⁶ Suliassanik silamiorpaluttunik aallussisupilussuuguit — aningaasatigut allatigulluunniit — Guutip piumasaanik siunertaanillu pingaarnerpaatitsisinnaajumallutit immaqa allannguerujussuartariaqassaatit. Amerlanertigut imaaliallaannaq taamatut allannguisoqarsinnaanngilaq. Taamaattumik misiliinerit siulliit iluatsinngippata isumatsattariaqanngilaq. Koichi, piffissaminik aliikkutassanut atuivallaarujussuartarnerminik ajornartorsiuteqartoq, qanoq pisimanersoq tusariartigu. Inuusuttuaraalluni Biibilimik atuaqqissaarsimavoq, ukiorpassuarnili piffissani tamaat qarasaasiami pinnguaatinut atortarpaa. Ullut ilaanni imminut ima aperaaq: ’Sulerisungaana? 30-t sinnerlugit ukioqarpunga inuuneralu silatusaartumik atunngivillugu!’ Koichi Biibilimik atuaqqissaartaleqqippoq ilagiinnillu ikiorneqarnissani akueralugu. Pisariaqartunik allannguiniaasaaraluarluni tunniutiinnanngilaq. Qinusaqattaarneq allallu asannillutik tapersersuinerat iluaqutigalugit naggataatigut tiguartiffigisaminit aniguivoq. (Lukasi 11:9) Maanna Koichip ilagiinni kiffartortuunini nuannaarutigaa.

Oqimaaqatigiissaarinissaq ilikkaruk

7. Guutip piumasaatut ilioraangatta sooq oqimaaqatigiissaarisinnaasariaqarpugut?

⁷ Guutip piumasaa siunertaalu pingaarnerpaatikkusukkutsigik uummatikkut iluunngarluta iliuuseqartariaqarpugut. Nangaanngisaannartariaqarlutalu kiffartornitsinni eqiasunngisaannartariaqarpugut. (Hebræerit 6:11, 12) Taamaakkaluartorli aamma Jehovap kissaatiginngilaa imminut nukillaartilluinnassasugut — timikkut, eqqarsartaatsikkut misigissutsikkulluunniit. Guutip suliareqqusaanik nammineerluta suliarinnissinnaannginnerput maniguulluta nassuerutigigutsigu tamanna Jehovamik ataqqinartitsissaaq, aammattaaq oqimaaqatigissaarisinnaanitsinnut ersiutaassaaq. (1 Petrusi 4:11) Jehovap neriorsornikuuaatigut piumasaatut iliornissatsinnut pisariaqartitatsinnik nukissaqartissalluta, sapinngisarpulli sinnerlugu iliorniarsuataassanngilagut, uagutsinnut piumasarinngisaanik iliorniarsaraluta. (2 Korinthimiut 4:7) Imminut nukillaartinnata Guutimut kiffartortuarsinnaassagutta nukivut atorluartariaqarpavut.

8. Kristumiup inuusuttup silarsuaq Jehovalu pitsaanerpaamik tuniniarsarimmagit qanoq pisoqarpa, taannalu qanoq allannguiva?

⁸ Assersuutigalugu Ji Hye, Asiap Kangisissuani najugaqartoq, ukiuni marlunni ilungersornartorujussuarmik suliffeqarpoq pioneriuutigaluni. Ima oqaluttuarpoq: „Jehova silarsuarlu tamaasa pitsaanerpaamik tuniniarsaraakka, unnukkulli  akunnerni tallimaannarni sinittarpunga. Naggataatigut sallusuissummut nukissaarulluinnarpunga, anersaakkullu sammisassat immannguaannaq nuannaarutigisarlugit.“ Ji Hye ’uummatikkut iluunngarluni tarnikkullu iluunngarluni isumakkullu iluunngarluni nukinilu tamakkerlugit’ Jehovamut kiffartorsinnaajumalluni ilungersornannginnerusumik suliffissarsiorpoq. (Markusi 12:30) Ima oqarpoq: „Ilaquttama aningaasarsiorluarnissannut kimigiiserfigigaluaraannga Guutip piumasaanik pingaarnerpaatitsiniarlunga ilungersorpunga. Pisariaqartinnerpaasannut, soorlu atisanut takujuminartunut ajukkunnanngitsunullu, naammattumik suli aningaasarsiorpunga. Aamma sininnerusalernera iluareqaara! Maanna kiffartornera nuannaarutigaara, aamma anersaakkut nukittunerulerpunga. Tamatumunnga pissutaavoq silarsuarmi ussernartunut allamullu saassutaasinnaasunut piffissaqarpiarunnaarnera.“ — Oqaluussisartup oqaasii 4:6; Matthæusi 6:24, 28-30.

9. Iliuuserisavut inunnut angalaarfigisartakkatsinniittunut qanoq sunniuteqarsinnaappat?

⁹ Kikkut tamarmiunngitsoq piffissaq tamaat Guutimut kiffartortuusinnaapput. Utoqqalinerit, peqqiilliornerit allatigulluunniit pisinnaasavit killeqarnerat pissutigalugu ilungersortariaqaruit ilisimassavat Jehovap aalajaannerit uummatikkullu iluunngarlutit kiffartuutigisinnaasatit ilumut pingaartikkai. (Lukasi 21:2, 3) Taamaattumik arlaannattaluunniit iliuuserisatta allanut sunniutigisinnaasaat suusupagisariaqanngilaat, iliuuserisinnaasavut killeqaraluarpataluunniit. Assersuutigalugu takorlooriaruk illumiit illumut angalaartugut tusarliussatsinnillu soqutiginnippasissunik naapitaqarata. Angalaarnitta kinguningaatsiaagut imaassinnaavoq kasuttukkatta, immaqa allaat ammaassinngitsut, kasuttornerput suli oqaluuserigaat! Naatsorsuutiginngilarput nutaarsiassamik nuannersumik tusartut tamarmik ajunngitsumik periassasut, ilaalli ajunngitsumik periarumaarput. (Matthæusi 13:19-23) Allat immaqa aatsaat kingusinnerusukkut — silarsuarmi namminnerluunniit inuunerminni pissutsit allanngorpata — periassapput. Qanorluunniilli pisoqaraluarpat tamanut kiffartuuteqarnermi sapinngisatsinnik iliuuseqarnitsigut Guutip suliareqqusaa suliaraarput. Uagut tassaavugut „Guutip suleqatai“. — 1 Korinthimiut 3:9.

10. Ilagiinniittut tamarmik sunik periarfissaqarpat?

¹⁰ Aammattaaq tamatta ilaquttatsinnik anersaakkullu qatanngutitsinnik ikiuisinnaavugut. (Galatiamiut 6:10) Allanut sunniuteqarluarnerput ukiorpassuarni sunniuteqangaarsinnaavoq. (Oqaluussisartup oqaasii 11:1, 6) Utoqqaanertat ilagiinnilu kiffartortut pisussaaffimminnik eqiasuillutik suliarinnikkaangamik ilagiinnik anersaakkut peqqinnerulersitseqataallutillu aalajaannerulersitseqataasarput,  oqaluussisoqarnerulertarporlu. Neriorsoqqissaarneqarpugut ’tamaviaarluta Naalagaq kiffartuukkutsigu’ suliarput „asuliinnaassanngitsoq“. — 1 Korinthimiut 15:58.

Guutip piumasaa siunertaalu anguniakkannut aalajangiisuutikkit

11. Ilagiinni najukkamiittuni kiffartornerup saniatigut kiffartoriaatsit assigiinngitsut suut immaqa toqqarneqarsinnaappat?

¹¹ Kristumiuugatta inuuneq nuannaarutigaarput, iliuutsitsinnilu tamani Guutimik ataqqinarsisitsinissarput kissaatigaarput. (1 Korinthimiut 10:31) Guutip naalagaaffia pillugu nutaarsiassamik nuannersumik oqaluussissutiginninnermut Jiisusillu peqqussutigisaanik tamanik maleruaanissamik allanik ilinniartitsinermut piffissarput nukivullu aalajaalluta atorutsigit kiffartoriaatsit assigiinngitsorpassuit nuannaarnartut peqataaffiginissaannut periarfissaqalissaagut. (Matthæusi 24:14; 28:19, 20) Ilagiinnik najukkatsinniittunik suleqateqarsinnaanitta saniatigut immaqa oqaluussisartunik pisariaqartitsiffiunerusumi, immaqa angalaarfigisartakkami allami, ilagiinni allanik oqaasilinni nunamiluunniit allami kiffartornissamut periarfissaqarpugut. Utoqqaanertat ilagiinnilu kiffartortut piumasaqaatinik eqqortitsisut suli katissimanngitsut Kiffartortut Toqqakkat Atuarfiannut qaaqqusaasinnaapput tamatumalu kingorna qinnuigineqarlutik ilagiinni kristumiunik inersimalluartunik pisariaqartitsiffiusuni, nunagisaminni nunamiluunniit allami, kiffartornissamik. Aappariit piffissaq tamaat kiffartortut ajoqersuiartortitatut Gileadip Atuarfiani ilinniarnissamut tamatumalu kingorna nunamut allamut kiffartoriartortitaanissamut piukkunnarsarsinnaapput. Aamma Betelimi suliassanik assigiinngitsorpassuarnik namminneq kajumissutsiminnik suliarinnikkumasunik aamma ataatsimiittarfinnik immikkoortortaqarfinnillu sanaartoqataajumasunik aserfallatsaaleeqataajumasunillu pisariaqartitsisoqartuaannarpoq.

12, 13. (a) Qanoq ilillutit paasisinnaaviuk kiffartoriaatsit sorliit anguniassanerlugit? (b) Suliami ataatsimi misilittagarilersimasat suliassanut allanut tunngatillugu qanoq iluaqutaasinnaanerannik assersuuteqarit.

¹² Kiffartoriaatsit suut illit anguniassavigit? Jehovamut kiffaagavit tunniulluinnarsimasoq taanna taassumalu peqatigiissortai siunnersortissarsiorfigiuartariaqarpatit. Jehovap ’anersaavata ajunngitsup’ eqqortumik aalajangernissannut ikiussavaatit. (Nehemia 9:20) Suliaq ataaseq allanittaaq suliassaqalernissamut periarfissaqalersitsisarpoq, aamma kiffartoriaatsimi ataatsimi misilittagarilikkat pisinnaalikkallu kingusinnerusukkut suliassanut allanut tunngatillugu iluaqutaasinnaapput.

¹³ Assersuutigalugu Dennis nulialu, Jenny, naalagaaffilersaarfinnik sanaartoqataasarput. Ulussaarsuaq Katrina USA-p kujasinnerusortaani pitoraammat namminneq kajumissutsiminnit ikiuiniaqataaniarlutik nalunaarput. Dennis ima oqaluttuarpoq: „Naalagaaffilersaarfinnik sanaartornerni pisinnaalersimasatsinnik qatanngutitta ikiornissaannut  atuinerput nuannaarutigeqaarput. Qatanngutit ikiukkatta qujamasunnerat nuannaajallaatigeqaarput. Ikiuiniaqatigiit allat amerlanersaat sanaqqiineq eqqarsaatigalugu iluatsitsivallaarsimanngillat. Jehovap Nalunaajaasuisa illut 5300-nit amerlanerusut naalagaaffilersaarfiillu arlallit iluarsaatereerlugilluunniit sanaqqereerpaat. Inuit pisimasunik maluginiaasimapput maannalu tusarliussatsinnik soqutiginninnerullutik.“

14. Piffissaq tamaat kiffartulerumaguit qanoq iliuuseqarsinnaavit?

¹⁴ Guutip piumasaa siunertaalu illit inuuninni pingaarnerpaanngortissinnaavigit piffissaq tamaat kiffartornerup anguniagassattut toqqarneratigut? Taamaaliorsinnaaguit qularissanngilat pilluaqqussutisiassarpassuaqarumaarnissat. Pissutsit maanna atukkatit pissutigalugit pisinnaanngikkuit immaqa allannguisinnaavutit. Nehemiap pingaarutilimmik suliaqarusussuataarami qinusimaneratut qinugit: ’Ila Jehova, kiffat iluatsitsigili.’ (Nehemia 1:11) Tamatuma kingorna qinnutit naapertorlugu iliuuseqarit, ’qinnutinik tusartartoq’ tatigalugu. (Tussiaat 65:3) Jehovamut kiffartorniarlutit ilungersornitit taassuma pilluaqqussappagit tamakkua tamaviaarutigisariaqarpatit. Aalajangereeruit piffissaq tamaat kiffartulerniarlutit, tamanna aalajangiusimasariaqarpat. Piffissaq ingerlatillugu pikkorinneruleraluttuinnarlutillu misilittagaqarneruleraluttuinnassaatit, aamma nuannaarnerulissaatit.

Inuuneq siunertaqarluartoq!

15. (a) Ukiorpassuarni Guutimut kiffartorsimasunik oqaloqateqarneq taakkualu pillugit atuarneq qanoq iluaqutigisinnaavarput? (b) Misigisalikkersaarummik immikkut qiimmaallaatigisannik innersuussuteqarit.

¹⁵ Guutip piumasaanik siunertaanillu inuuninni pingaarnerpaatitsinerpit qanoq kinguneqassanera naatsorsuutigisinnaaviuk? Jehovamut sivisuumik kiffartorsimasunik oqaloqateqarit, ingammik ukiorpassuarni piffissaq tamaat kiffartortuusimasunik. Taava paasissavat inuunerisa qanoq nalerisimaarnartigalutillu siunertaqarluartiginerat! (Ussatit 10:22) Oqaluttuutissavaatsit Jehovap imminiiginnarsimanngisaannaraatik, aamma ulluni artornartorsiorfiusuni pisariaqartitatik sinnerlugit piuaannarsimallugit. (Filippimiut 4:11-13) Jehovap Nalunaajaasuisa aalajaatsut misigisalikkersaaruterpassui Napasuliaq Alapernaarsuiffik-mi saqqummersinneqartarput. Misigisalikkersaarutini tamarluinnarni aallussilluarnerup nuannaarnerullu anersaava Apustilit Suliaannik allakkani oqaluttuarineqartumut eqqaanartoq ersersinneqarpoq. Misigisalikkersaarutinik tamakkuninnga atuarnerit ima oqarusulissutigissavat: ’Uangattaaq taamatut inoorusuppunga!’

16. Kristumiut inuunerannik siunertaqarluartitsillunilu nuannertitsisoq suua?

¹⁶ Aaron, allaaserisap matuma aallaqqaataatungaani eqqaaneqartoq, ima oqaluttuarpoq: „Afrikami inuusuttunik naapitsigajuppunga inuunerup siunertaanik ujartuillutik angalasunik. Amerlanersaasa ujagartik naninngisaannarpaat. Uagulli Guutip naalagaaffia pillugu nutaarsiassamik nuannersumik oqaluussissutiginninnitsigut Guutip piumasaatut iliornissarput ulapputigaarput, siunertaqarluartumillu inuunerput pissanganartorpassualik nuannaarutigalugu. Nammineerluta misigaarput tunisineq tigusinermit pilluarnarnerusoq.“ — Apustilit Suliaat 20:35.

17. Sooq maanna Guutip piumasaanut siunertaanullu naapertuuttumik inuunissaq pingaaruteqarpa?

¹⁷ Illimmi? Illit suut anguniagaraagit? Aalajangersimasumik anersaakkut anguniagaqanngikkuit allat piffissannik nukinnillu tigooraapallassapput. Sooq inuunerit erlinnartoq Saatanip aaqqissuussaaneranut ajortumut nakutitsiniutaannaasumut atulussinnassaviuk? Qanittuararsuakkut ’naalliunnartussarsuaq’ nalliuppat silarsuarmi matumani nunap piisigut pisuussutit inissisimaffiillu naleerulluinnassapput. Pingaaruteqartutuaq tassaassaaq Jehovamut attaveqarnerput. Guutimut kiffartorsimanerput, allanut iluaqutaasumik iliuuseqarsimanerput Guutillu piumasaanut siunertaanullu naapertuulluinnartumik inuusimanerput qanoq qujamasuutigitigissavarput! — Matthæusi 24:21; Saqqummersitat 7:14, 15. (wE 10/1 07)

[Quppernerup ataani ilanngussat]

Uku nassuiarsinnaavigit?

• Jehovap imminut kiffartornerput qanoq isumaqarfigaa?

• Silatusaarneq oqimaaqatigiissaarisinnaanerlu Guutimut kiffartornissamut allanullu iluaqutaasumik iliuuseqarnissamut qanoq iluaqutigisinnaavavut?

• Kiffartoriaatsit suut anguniarnissaannut periarfissaqarpugut?

• Qanoq ililluta maannakkut siunertaqarluartumik inuusinnaavugut?

[Atuaqqissaarnermi apeqqutit]

[Qupp. 10-mi assiliartat]

Jehova uummatikkut iluunngarluta kiffartorfigiuassagutsigu inuunitsinni oqimaaqatigiissaarisinnaasariaqarpugut

[Qupp. 11-mi assiliartat]

Illernartumik kiffartoriaatsit assigiinngitsorpassuupput